Monumenta Serbica

† И азь смѣреныи и всѣхь послѣдьнии милостию божиѥю арьхиѥпискоупь всѣхь срьбьскыихь и поморскыихь земльь, нареченыи же вь мнишьскомь ѡбразѣ вь име светаго и великаго апостола и арьхиѥреꙗ срьбьскаго кѵрь Савы, рекьше Сава третии, видѣвь благооутробноѥ сьмышлѥниѥ и потьщаниѥ и потроуждениѥ, паче же и поданиѥ добро господина ми прѣвысокаго кралꙗ вьсе срьбьске землѥ и поморьске, Стефана Оуроша, ѥже ѡ келии светаго вьзнесениꙗ вь Светѣи Горѣ, ѥже ѥсть пирьгь близь мора на мѣстѣ рекомѣмь Хроусиꙗ, вь ѡбласти монастырꙗ светыѥ богородице хиланьдарьскыѥ, и прошениѥмь того самого господина ми прѣвысокаго кралꙗ, и ꙗкоже видѣхь записанаа и оутврьжденна кралевьствомь ѥго, ѥлика соуть вь сиѥмь хрисовоулѣ, зьговоривь се и азь сь братиѥю своѥю сь ѥпискоупы, записахь и оутврьдихь и запрѣщамь и заклинамь силою божиѥю и прѣчистыѥ ѥго матере и чьстьнаго и животворещаго крьста и всѣми светиими оугождьшими ѥмоу оть вѣка молитвами господина и светителꙗ нашего кѵрь Савы и светаго Арьсѣниꙗ, Савы, Иѡаникиꙗ, Ѥѵстаѳиꙗ и Иꙗкова и Ѥѵстаѳиꙗ вьтораго, и азь же и братиꙗ моꙗ светители живи соуще проклинамо и завезоуѥмо, иже хощеть разорити и мало чьто ѡть писаныихь господиномь нашимь кралѥмь вь сиѥмь хрисовоулѣ, нь паче да прѣбываѥть сьхранꙗѥмо и сьблюдаѥмо тврьдо и непоколѣбимо и кралѥмь срьдьскымь, ѥгоже богь изьволии господьствовати, и светители хотещиими по нась быти и игоумени и братиꙗми домоу светыѥ богородице хиланьдарьскыѥ. аще ли кьто вьсхощеть разорити, да разорить ѥго богь и вь сыи вѣкь и вь боудоущии. аминь. сего ради писавьше и подьписасмо вь свѣдѣниѥ всѣмь.

† Сава по милости божиѥи архиѥпискоупь всѣхь срьбскыхь и поморскыхь земьль.