Monumenta Serbica

† Пише кралевьство ми, да е ведомо всакомꙋ. створи милость кралевьство ми градꙋ дꙋбровьчькомꙋ, що сꙋ дрьжали земле и виноградь и ѡраниꙗ ꙋ господина ми свето почившега ѡтьца ми, такожде имь створи милость кралевьство ми, да си дрьже и ꙋ кралевьства ми, а да имь не забаве ни ѡдь когаре. тько ли ѡбрѣте потворивь повеление кралевьства ми, и що имь забави, испакости, да приме гневь и наказание ѡдь кралевьства ми. а тꙋ имь милость створи кралевьство ми ꙋ Призрене ꙋ граде, а странь кралевьства ми беше слꙋга Драгославь и Бꙋдиславь Хвальчикь. а тꙋ имь милость ꙋчини кралевьство ми, кьди приде Лꙋкарь Михоиловикь и Пѣро Гоиславликь. а ꙋ то време беше кнезь ꙋ Дꙋбровьнице Маринь Жꙋрьжи.

Стефань Ꙋрѡшь краль.

Боже ѡтьче вседрьжителю, иже словомь и дꙋхомь ꙋсть своихь вса ꙋстроивии, видима же и невидимаа, ѡдꙋшевленна же и безьдꙋшна, иже прьвѣѥ аггелскиѥ чини сьстави, бесьпльтьниѥ сили, прѣспѣвающе всакого ꙋмь нась и разꙋмнаго ѥства, ѡдь самого божаства зарею свьтеще се, прѣстола трепетно прѣдьстоеще, и сь страхомь лица своꙗ огненними крили закривающе, и кьждо ихь неизреченнаго свѣта и красоти божаственѥ наслаждающе, имьже прьвостателꙗ и воеводꙋ небеснимь свещеньнимь начелникомь же и кнезомь и ангеломь и архангеломь, красотꙋ рекꙋ же архангела Михаила, велика прѣдьстателꙗ, прѣдьстапю и великаго и прьваго радости проповѣдника архангела Гаврила, сима же великома архистратигома ѡдь бога данни бише родꙋ чловѣчаскомꙋ похвалниѥ похвали и благодѣти, ѡвѣмь побѣда на сꙋпротивники, а симь на радость благовѣщенѥ земалнаго ѥства, нииже похвали ѥзикь можеть исплести нииже изьреки ни ꙋмь постигнеть подобно похвалити, надеждꙋ свою кь нимь вьзлагающе да изречемь великꙋю ихь милость и застꙋпленѥ, сима бо архистратигома небесна крꙋга чꙋдеси исьпльни господь, и земльное ѡснованѥ прѣсвѣтло ꙋкрасии, сима чловѣчаскоѥ ѥство ѡть всакоѥ страсти неврѣжднно прѣбиваеть, сима црькви свѣтло ꙋкрашаѥма правовѣрно ѥдиногласноѥ и трьсветоѥ пѣнѥ богꙋ вьсилаѥть, сима бо благовѣрнии и боголюбиви цариѥ вѣнци нетлѣнними вѣнчаше се: тѣмьже и азь вь Христа бога благовѣрнии и богомь поставлении царь Стефань срьблемь и грькомь и западнѣи странѣ и сь богодарованьною ми богочьстивою и христолюбивою царицею авгꙋстиею кѵра Еленою, и с вьзлюбленнимь и благовѣрнимь синомь наю, кралемь Ꙋрошемь, благодѣтю божиею процвьтшꙋ ми, вь своѥмь ѡтьчствѣ по того изьволенью нарещи се ѡтрасьль благаго корѣне, родитель моихь светѣхь, рекꙋ же Симеѡна Неманꙋ, новаго мироточца и прьваго владики бившаго земли зетсцѣи, великаго светителꙗ и прьвопрѣстꙋпника ѡчьства нашего, кралю Сави правещꙋ ми скифтрь богодарованнаго ми царьства, послѣдꙋѥ житю благопрѣбиванꙗ ѡ Христѣ светихь царь благовѣрно живꙋщихь на земли, рекꙋ же великаго и равна апостоломь и прьваго христианомь Костантина цара и инѣхь православно и благочьстно живꙋщихь, ѡдь юности моѥе теплостю дꙋшевною и ревностю раждегь се срьца моѥго любовю кь всѣмь светѣмь божьственимь црьквамь, наипаче и болше кь великима архистратигома Михаилꙋ и Гаврилꙋ, ѡни бо прѣдстоѥще прѣстолꙋ и лицꙋ божию благопрѣмѣнна и благоꙋвѣтлива ѡть сьдѣꙗннихь ми ꙋстраꙗють: тѣмь припадаѥ и мили се дѣѥ ходатаꙗ ѡбрѣстива кь владицѣ моѥмꙋ Христꙋ и дꙋши моѥи вожда и хранителꙗ теплаа и вь належещихь бранехь прѣдьстателꙗ крѣпкаа и сꙋпостатомь пламеноноснимь орꙋжиѥмь ѡтьмьщающа, тѣмь теплѣ припадаю любовию дꙋшевною кь сима архистратигома. видѣ царьство ми храмь божьствении светию архистратигꙋ Михаила и Гаврила сьзданьнаго прародители царьства ми вь боговьзлюбленнѣмь иньгда градѣ Иѥрꙋсалимѣ, вь немьже богь сь пльтю пожить, и диꙗвола иже на нась брань раздрꙋшии, и побѣлителꙗ намь дарова, тѣмь ѡбьꙋбожанѥ видѣ црькви царьство ми потьща се царьство ми вьздвигнꙋти и ꙋкрѣпити и испльнити недостатьчьнаа храма того светого, и приложи царьство ми светого Николꙋ Вранинꙋ и сь црьквомь и сь сели и сь людми и сь са всѣмь метохомь и сь виногради и сь планинами и сь пашищи и сь зимовищи и сь млини и сь сѣнокоси и сь доходьки црькви тези, и що има ꙋ светого Срьгꙗ доходька на всако годище ·р· перьперь ѡть царине царьства ми и сь всѣми правинами и ꙋстави царьства ми и сь всѣми мегꙗми сель тѣхь и сь всѣмь иманѥмь црькве тези, и що ѥсть димина на людехь црьквенихь, и такои ю приложии царьство ми црькви иѥрꙋсалимскои. да си скꙋплꙗ црькви иѥрꙋсалимскаа на всако годище ѡть Вранине, що се ѡбрѣта лѣтине, жита и вина, и ѡть овьць и ѡть кобиль, половина ѡть тога да се продаѥ и да се носи ꙋ Иѥрꙋсалимь. и пакии приложи царьство ми црькви архистратига Михаила иже ꙋ Иѥрꙋсалимѣ, да си ꙋзима ꙋ Дꙋбровницѣ ѡдь дохотка царьства ми на вьсако годище на вьскрѣсенѥ ·е҃· сьть перьперь бенетьчкихь. и людие црьквени светого Николи вранинскога да не работаю работе никоѥре господствꙋющомꙋ, ни дани даю, ни пꙋти тѣраю, ни воиске воюю, ни ꙋ жꙋпꙋ приплащаю, ни града зигю, ни позоби даю, ни конь хране, ни пьсь хране, и ѡть всакое работи и дани ѡсвободихь. и сиѥ приложихь и ꙋтврьдихь, да ѥсть непоколѣбимо до вѣка, и тѣмь всѣмь никто да нѣсть ѡбластьнь, ни кеплиꙗ ни властелинь ни инь тко любо владꙋщии ꙋ земли царьства ми, тькмо ѥгоже богь изволии игꙋмена иѥрꙋсалимскога, ть да ѥсть тѣмь ѡбластань, и ꙋ томь мѣстѣ да нѣсть властьнь никто поставлꙗти старѣшинꙋ, тькмо кога бꙋде хотѣнѥ игꙋменꙋ иѥрꙋсалимскомꙋ, тогази да благослови и постави старѣшинꙋ ꙋ Вранинѣ. и сиѥ записанѥ приложение царьства ми кто ѡтиметь и потворить сиѥ златопечантноѥ слово царьства ми, да мꙋ ѥсть мьстьникь господь богь и прѣчиста богородица ѡдигитриꙗ, и да га порази и ꙋбиѥ сила чьстнаго и животворещаго крьста, и да ѥсть прѡклеть ѡть ·тиі· светихь ѡтьць иже в Никеи и ѡть ·ві· врховнихь апостоль и ѡть ·д҃· -хь ѥвангелисть и ѡть всѣхь светѣхь ѡть вѣка богꙋ ꙋгодившихь, и да ѥ причесникь ѡтьврьгшим се Христа Арии и Несторию и Юдѣ прѣдателю христовꙋ и кь ѡнѣмь, иже рѣше: крьвь ѥго на нась и на чедѣхь нашихь, и да приме проказꙋ гиѡзиѡвꙋ, и такови, иже потвори, да се распе и накаже, и да плати царьствꙋ ми ·҂в҃· перьперь. а сии хрисовꙋль писа и подьписа царьство ми вь всако ꙋтврьжденѥ мѣсеца априла ·кѳ· дьнь ꙋ Призрѣни, кьда поставии царьство ми темелиѥ архаггела Михаила вь лѣто ·҂ѕѡ·, индиктиѡнь ·а҃·

† Добродѣтелно и всеразꙋмно сь истиньнѡю царьскаго словеси поставлꙗѥть царьство ми вь свѣдѣтельство всѣмь, како придоше к царствꙋ ми всепочтени влачтеле славнаго града Дꙋбровника Маринь Бꙋникь и Живе Николе Гꙋндꙋловикꙗ и Живе Чрѣвикь, и ꙋспоменꙋше царствꙋ ми за Млѣть, како имаю забавꙋ за Млѣть ѡдь царства ми и ѡдь властель царства ми, говореке: господине царꙋ, Млѣть ѥсть царства ми, а ми имамо забавꙋ из нѥга. и ꙋчини милость царство ми властелѡмь и всемꙋ градꙋ Дꙋбровьникꙋ, ѡдь дньсь напрѣде никтоѡ да не има посла за властеле и за градь Дꙋбровникь, рекше за Млѣть, ни само царство ми, да ни инь ктѡ ѡдь властель царства ми ни маль ни великь, тькмо Басета и Трипета ꙋкюкнию властелинꙋ и кнезꙋ царства ми, како има га ѥ даровало и записало царство ми, такози да га имата; и вась молю како моихь срьдьчнихь и любимихь, да ми блюдете Басета и Трипета за сиюзи работꙋ, рекше за Млѣть, да имь помагате за мою любѡвь ѡ сиѥизи работѣ, ѡ чемь ви имета ѡпоменовати. и ꙋ семзи царство ми да иса се не потвори, тькмо да прѣбиваѥть сиѥ слоѡво царства ми тврьдо и непоколѣбимо до вѣки. и сиѥ извѣстноѥ и всенастоѥщеѥ и златопечатноѥ слоѡво царства ми записа се и подьписа и ꙋтврьди вь лѣто ·҂ѕѡѯе·, индиктиѡна ·і҃·, мѣсеца априлꙗ ·кд· дьнь ꙋ Призрѣнѣ.

Стефань Ꙋрѡшь благовѣрни царь Срьблемь и Гркѡмь.

† Да ѥсть вѣдомо всакомꙋ, има хотѣние царьство ми, и благоизволихь и вьсотехь и даровахь сиюзи милость вселюбимомꙋ царьства ми кнезꙋ дꙋбровьчкомꙋ и властеломь и всемꙋ градꙋ Дꙋбровникꙋ, и како придоше кь царьствꙋ ми ꙋ градь Призрѣнь всепочтени властеле града Дꙋбровника на име Маринь Бꙋникь и Чиве Николе Гꙋньдꙋликꙗ синь и Чиве Чрѣвикь, и ѡще, како ꙋспоменꙋше царьствꙋ ми, що ѥсть даль и приложиль и записаль господинь свето почивши царь родитель царьства ми за свою дꙋшꙋ прѣчистои владичици госпожди богородици синаискои, да се дава ѡдь велика дьни до велика дьне на всако годище ѡдь Дꙋбровника петь сьть перьперь бенетьчкихь ѡть Стона, и ѡ томь вьсхоте царьство ми, и ꙋчинихь милость властеломь почтенимь и всемꙋ Дꙋбровникꙋ, ꙗко ѡньзи доходькь петь сьть перьперь, що ѥсть приложиль родитель царьства ми богородици синаискои, да се дава на всако годище на великь дьнь и пакь до велика дьне. и този записание и приложение господина и родителꙗ царьства ми видевь царьство ми потврьдихь и записахь такожде, ꙗко този записание и приложение господина и родителꙗ царьства ми да прѣбиваеть тврьдо до вѣка, како да се давать богородици синаискои на великь дьнь и паке до велика дьне петь сьть перьперь дꙋбровьчкихь бенетьчкихь ѡть Стона, и за тьзи доходокь да не имать посла само царьство ми забавити или ꙋдрьжати или ѡтнети тьзи доходокь ѡть богородице синаиские, ни да слꙋшають властеле дꙋбровьчсци ни посланиꙗ царьства ми ни писаниꙗ царьства ми, ни да се слꙋшають за то ни кнезове царьства ми, кои дрьжеть кꙋкю царьства ми ни нихь писание да ни инехь властель царьства ми, да ни по иномь ни по чемь, развѣ да прѣбиваеть този приложение ꙋ богородице синаиске до вѣка, и властеле дꙋбровьчсци тьзи доходокь да никомꙋ не давають по милости царьства ми тькмо синаискои богоодици, како и више пишеть. и сие потврьждениѥ и милость царьства ми да прѣбиваеть тврьдо и неѡтемлемо до вѣка. кто ли такови дрьзнеть ѡтнети и потворити сие записание царьства ми, такови да имать запрѣщениѥ ѡть господа бога, и да мꙋ ѥсть мьстница прѣсвета богородица синаискаꙗ вь дьнь страшнаго сꙋда христова, и ѡть царьства ми да приметь гнѣвь и наказание по законикꙋ царьства ми. записа же се сиꙗ милость и потврьди вь лѣто ·҂ѕѡѯе·, ендикта ·і҃·

Мѣсець априль.

Повелениемь господина цара логоѳеть Драгославь прѣрꙋчи подь Призрѣномь на Рибницѣ априлꙗ ·кд·

† По неизреченномꙋ милосрьдию и чловѣколюбию владики моѥго сладкаго ми Христа, по изволению и милости и всемилостивномꙋ ѥго призрѣнию еже на царьство ми, ꙗкоже и на прьвихь светихь православнихь царь такожде и благодѣть прѣсветаго своѥго дꙋха и на царьствѣ ми показа, ꙗкоже излиꙗ на светиѥ своѥ ꙋченики и апостоли, рекь имь: идѣте вь всꙋ вьселенꙋю, проповѣдите славꙋ моѥго божьства; по всехвалимѣи ѥго милости таковиѥ дари и царьствꙋ ми дарова, и постави ме господина всемꙋ стежанию ѡтьчьства моѥго, рекꙋ же земли срьбскои и грьчкои, поморию и западнимь странамь. милостию божиѥю и неизреченнимь ѥго промишлениѥмь сьдрьжещꙋ ми сиꙗ вса благовѣрномꙋ и богомь поставленноѡмꙋ Стефанꙋ Ꙋрошꙋ царꙋ всегда веселещꙋ ми се ѡ бозѣ и дрьжещꙋ ми скифтрось царьствиꙗ по прѣданию же и ꙋставꙋ господина и родителѣ царьства ми светаго цара Стефана, ꙗкоже ѥсть ꙋставиль и ꙋзакониль записовати хрисовꙋле словесе царьска, и прьво светимь и божьствнимь црьквамь, по томь властеломь и властеличикемь и инимь прочимь, и ничемꙋже неврѣжденнꙋ бити, изволи же и царьство ми по томꙋжде ѡбразꙋ даровати и записати сизи хрисѡвоуль и милость, како придоше кь царьствꙋ ми сизи почтени властеле а поклисариѥ дꙋбровьчьци: Маринь Бꙋникь и Живе Николе Гꙋндꙋликꙗ синь и Живе Чрѣвикь, и ѡбрѣтоше царьство ми ꙋ Призрѣнѣ с чьстиѡмь и з даромь, и вса, елика трѣбоваше и просише ꙋ царьства ми, този имь все дарова и записа царьство ми; и ꙋспоменꙋше царьствꙋ ми ѡ записани и ѡ милостехь, що имь ѥсть записальл прадѣдь и дѣдь и родитель царьства ми господинь свето почивши царь ѡ законѣхь и ѡ всакоꙗкихь правинахь, и ѡгледавь царьство ми тази вса прьва записаниꙗ, и не потворихь, нь и ѡще болше и крѣпцѣ потврьдихь и записахь по томꙋжде ѡбразꙋ, що ѥсть вьсь градь Дꙋбровникь, да гредꙋ своими главами, иманиѥмь своимь, и нихь трьговци с кꙋплѡмь свободо безь всаке забаве по земли царьства ми, да имь никто нищо не ꙋзме ни забави посилиѥмь ни властелинь царьства ми да ни кто любо инь, ни маль ни великь, вь земли царьства ми, тькмо да ходе свободно: ако ли се ѡбрѣте кто ꙋзьмь посилиѥмь що любо нихь ꙋ земли царьства ми, все този да плати царьство ми ѡномꙋзи, комꙋ бꙋде що ꙋзето, а тогази кривца да ище царьство ми, и да ꙋзме на немь, кто бꙋде ꙋзель и ꙋчиниль зло коѥ; и нихь трьговци с трьгомь кто люби ити ꙋ инꙋ землю с трьгомь, с кꙋплѡмь, да греде прѣзь землю царьства ми свободно безь всаке забаве, тькмо ѡрꙋжиꙗ да не носить ни ꙋ Бꙋгаре ни ꙋ Басарабинꙋ землю ни на Ꙋгре ни ꙋ Боснꙋ ни ꙋ грьке ни инамо камо любо ꙋ тꙋгю землю, тькмо ꙋ землю царьства ми: кто ли се ѡбрѣте понесь ѡрꙋжиꙗ ꙋ инꙋ землю, да мꙋ се все този ѡрꙋжиѥ ꙋзме. и кто греде ꙋ Дꙋбровникь и изь Дꙋбровника, да им се не ꙋзима царина на Трѣбини да ни на ѥдномь пꙋти ни на бродꙋ, тькмо всаки да ходи свободно безь всаке забаве. и ѡще трьговци дꙋбровчане, кои се ѡбрѣтаю по трьговехь царьства ми, що им се слꙋча кои любо сꙋдь, да се сꙋде прѣдь цариникѡмь и кнеземь а или прѣдь кепалиѡмь, кои бꙋде града тогази, закономь родителѣ и прародителꙗ царьства ми, и за сиѥзи да гредꙋ прѣдь царьство ми на сꙋдь: за крьвь и за землю и за проводь и за чловѣка и за сводь, а за ино ни за що; и кьди при латининь срьблина, да да латининь срьблинꙋ половинꙋ латинь а половинꙋ срьбль свѣдоке, такожде и срьблинь кьди при латинина, да мꙋ даѥ свѣдоке половинꙋ срьбль а половинꙋ латинь, по законꙋ, како сꙋ имале ꙋ родителѣ и прародителѣ царьства ми и ꙋ светаго кралꙗ; и где комꙋ даѥ дꙋбровьчанинь свои добитькь комꙋ годѣ трьговцꙋ, тере мꙋ ѡдь нега ꙋ бьхь ꙋдарить, да се кльне латининь за този, да бꙋде вѣровань по законꙋ, како сꙋ имале ꙋ родителѣ и ꙋ прародителѣ царьства ми; и кои трьговьць кꙋпи конꙗ на трьгꙋ и плати за нь царинꙋ, да рече цариникь дꙋшѡмь, ере ѥсть тогази конꙗ кꙋпиль, и за нега платиль царинꙋ, а тати не зна, да мꙋ за този свода нѣсть: ако ли га такози не ѡправи цариникь, да да сводь, ꙋ кога ѥсть кꙋпиль; а кои любо трьговьць доведе коне кꙋпивь ис-тꙋге земле, а познаю се, да се крьне тьзи трьговьць самь дрꙋги, ере га ѥсть кꙋпиль ꙋ тꙋгеи земли, и не зна тати ни гꙋсара, да не даѥ свода за този: да ако си ꙋзлюби сизи, кои си га познава, ꙋзети конꙗ, да си га ꙋзме, а ѡномꙋзи трьговцꙋ да пода цѣнꙋ, що бꙋде подаль за нега. ако да царьство ми приходи ꙋ трьгь, да ме почитꙋю и дарꙋю своѡмь волѡмь, како ѥсть подобно цара поч(и)тати, а почилнога дара и ꙋзетиꙗ да имь нѣсть. и ако се царьство ми свади з Дꙋбровникѡмь, що се ѡбрѣтаю дꙋбровчане по земли царьства ми, да им се постави рокь за ·ѕ҃· мѣсець, да се испрате свободно безь всаке забаве, и да походе, а з градомь да се ратꙋѥ царьство ми. и що се разбиѥ дрѣво бенетьчко и дꙋбровьчко, що ꙋтече ꙋ землю царьства ми, да ѥсть свободно, и да се не ꙋзме нищѡ. и кои трьговци гредꙋ по земли и по трьговѣхь царьства ми, да плакꙗ всаки царинꙋ по законꙋ, како сꙋ давали ꙋ родитель и прародитель царьства ми. и ѡще ш ними сикози ꙋтькьми царьство ми, що се ѡбрѣтаю людиѥ царьства ми, кои бꙋдꙋ прѣшли ꙋ Стонь по толи, кьди га ѥсть даль дꙋбровьчанѡмь господинь царь, свето почивши родитель царьсвта ми, тези люди царьства ми дꙋброѡвьчане да ѡдженꙋть. и що бꙋдꙋ прѣꙋзели землю царьства ми прѣзь мегю, како ѥсть била мегꙗ ꙋ родителѣ и ꙋ прародителѣ царьства ми и ꙋ светаго кралꙗ, ако бꙋдꙋ и винограде насадили прѣзь мегю, все да ми поврате. и за сꙋдове и за всако ѡправданиѥ како сꙋ имале ꙋ родителѣ и ꙋ прародителѣ царьства ми, такози и ѡдь дньсь напрѣда да имаю, и за все да ѥсть на Желѣзнои Плочи сꙋдь, како ѥсть и ѡть прѣжде било. и за Млѣть да не имають печали ни за що, тькмо да ѥсть царьства ми, како ѥсть и ѡть прѣжде било ꙋ родителѣ и прародителѣ царьства ми. и ѡть сели напрѣда да не прѣиме ни ꙋзьме никто залоге ни ѡть властелина царьства ми ни ѡть коѥго любо ѡдь дрьжаве царьства ми: кто ли се ѡбрѣте ꙋзьмь, да залогꙋ тꙋзи поврати ѡпеть, а що ѥсть прѣѥль, да мꙋ се тази кꙋплѣ ꙋпадиеть. и ѡще: како ѥсть ꙋглавиль ш ними родитель царьства ми, господинь свето почивши царь, що сꙋ залоге заложене кога любо мала и голѣма и-з-емле царьства ми, да се ищꙋ сꙋдомь и правдомь. и потврьди имь царьство ми законе и повеле, що сꙋ имале ꙋ родителꙗ и прародитель царьства ми, како да ѥсть нищо не пѡтворено. и симзи ѡбразомь записа и потврьди царьство ми сизи златопечатни хрисовꙋль царьства ми, ꙗко да прѣбиваѥть вь всакѡмь ꙋтврьждени и своѡбодѣ чистѣ. и сиѥ извѣстноѡѥ и всенастоѥщеѥ слоѡво царьства ми записа се и ꙋтврьди знамениѥмь царьскимь вь лѣто ·҂ѕѡѯе·, ендиктиѡнь ·і҃·, мѣсеца априлꙗ ·ке· дьнь, подь Призрѣнѡмь на Рибникꙋ.

† Стефань Ꙋрѡшь вь Христа бога благовѣрни царь Срблемь и Гркѡмь.

† По неизреченномꙋ милосрдию и чловѣколюбию владики моѥго сладкаго ми Христа, по изволению и милости и всемилостивномꙋ его призрѣнию еже на царьство ми ꙗкоже и на прьвихь светихь православнихь царь такожде и благодѣть прѣсветаго своѥго дꙋха и на царьствѣ ми показа, ꙗкоже излиꙗ на светиѥ своѥ ꙋченики и апостоли, рекь имь: идѣте вь всꙋ вьселенꙋю, проповѣдите славꙋ моѥго божьства, и по всехвалимѣи ѥго милости таковиѥ дари и царьствꙋ ми дарова, и постави ме господина всемꙋ стежанию ѡтьчьства моѥго, рекꙋ же земли срьбскои и грьчкои, поморию и западнимь странамь: милостию божиѥю и неизреченнимь ѥго промишлениѥмь сьдрьжещꙋ ми сиꙗ вса благовѣрномꙋ и богомь поставленномꙋ Стефанꙋ Урошꙋ царꙋ, всегда веселещꙋ ми се ѡ бозѣ и дрьжещꙋ ми скифтрось царьствиꙗ, по прѣданию же и ꙋставꙋ господина и родителѣ царьства ми светаго цара Стефана, ꙗкоже ѥсть ꙋставиль и ꙋзакониль записовати хрисовꙋле слоѡвеса царьска и прьво светимь и божьствнимь црьквамь, по томь властелѡмь и властеличикемь и инимь прочимь и ничемꙋже не врѣжденꙋ бити, изволи же и царьство ми по томꙋжде ѡбразꙋ записати сизи хрисовоуль и милость, како придоше кь царьствꙋ ми сизи все почтени властеле и поклисариѥ дꙋбровьчьци: Маринь Бꙋникь и Живе Гꙋндꙋликь и Живе Чрѣвикь, и ѡбрѣтоше царьство ми ꙋ Призрѣнѣ с чьстиѡмь и з дарѡмь, и вса, елико просише и трѣбоваше ꙋ царьства ми, вса имь дарова и записа царьство ми, и даде имь царьство ми и записа и дарова землю, како се ками вали долꙋ к виноградомь дꙋбровьчкимь и к моѡрꙋ ѡдь Люте до Кꙋрила, все имь този щзаписа царьство ми безь изма, все що се ѡбрѣта на тоизи земли, да си има и дрьжи градь Дꙋбровникь тꙋзи землю, како ю имь ѥсть и даровало и записало царьство ми, и да имь не имать по сема сего забавити за тꙋзи землю ни властелинь царьства ми ни кепалиꙗ ни инь ни ктоѡ, кто имь бꙋде ꙋ сꙋсѣдьствѣ, на всако врѣме. и царьство ми ꙋ семь да им се не потвори, тькмо да си имаю и дрьже сь милостиѡмь царьства ми тврьдо и непоколѣбимо и неѡтемлемо ни кимь любо до дьни и до вѣка. и сиѥ извѣстноѥ и всенастоѥщеѥ златопечатноѥ слоѡво царьства ми записа се и ꙋтврьди знамениѥмь царьскимь вь лѣто ·҂ѕѡѯе·, ендиктиѡнь ·і҃·, мѣсеца априлꙗ ·ке· дьнь, подь Призрѣнѡмь на Рибникꙋ.

† Стефань Ꙋрѡшь вь Христа бога благовѣрни царь Срблемь и Гркѡмь †.

† Понѥже изволи благы и чловѣколюбивии царь славѣ господь нашь Іисоус Христос, сынь божїи, непостижими, неисповѣдими, неизглаголанныи, неизьчтѣнныи, неизреченныи, неизслѣдими владыка и творць и сьздатель вьсеи твари, и оумысли оумышлѥнїемь своимь, ꙗкоже самь вѣсть, и инь никтоже тожеть исповѣдати. ѡть неисповѣдимихь чюдесь твоихь, Христе боже нашь, ѥже ни аггелы оубо прѣдьстоеще прѣсветомоу твоемоу прѣстолоу, владыко, божьства твоего никтоже можеть таковихь исповѣдати, своима бо прѣчистима роукама боголѣпно вьзьмь прьсть, и ѡть прьсти сьздавь наше брѣно тѣло и ѡть небытїа вь бытїе привѣдь и пакы своимь дьхновенїемь прѣсветаго и животворещааго доуха дьхноувь и оживїи и вьложи доушоу вь нѥ, и повелѣ жити на земли. и паки вь землю вьзвращати се по словеси господню, иакоже и прьвозданныи Адамь и вьси праведниї пророци и апостоли и моученици и вьси светыи оугодившеи Христоу богоу ѡть вѣка, ѡви же пророчьствїа а дроузи проповѣданїа и оученїа езыкомь и крьщенїа вьсемь живоущїимь на земли. тебѣ же, небесныихь воиньствь воеводо, арьхїстратиже, божїи слоуго, арьхаггеле Михаиле, небеснымь силамь чиноначелниче и предьстоꙗтелю, вьси земльнїи припадающе и приносеще добродетелнїе дары кь светомоу и божьствномоу храмоу твоемоу, царем же и вьсѣмь вь православїи живоущїимь на земли, елыциже оубо вь царихь прїеше правовѣрїе, и сїи полоучише обѣтованїа божїа. сего ради и азь, рабь твои, Стефань Оурѡшь, царь и самодрьжьць срьблѥмь и грькѡмь, и сь христолюбивою матерїю царьства ми, благовѣрьною царицею кѵра Иеленою, припадающа и просеща помѡщи, покрыти нась кровомь крылоу твоею здѣ и вь страшное ѡнѡ пришьствїе соудища христова, вѣчныихь благь получити просимь к тебѣ припадающе, и видѣвь царьство ми хрисовоуле записаннїе господиномь родителѥмь царьства ми, трьблаженнымь и присно поминаемимь благовѣрнїимь царемь кѵрь Стефаномь, що е приложиль и записаль црьквы светомоу архаггелоу, ꙗже ѥсть вь Іеросолїме, и та вьса видѣвь царьство ми и прочтавь и еще больше потврьдихь и записахь царьскыимь слѡвомь, що ѥсть давано ѡть доходька царьства ми изь Доубровника на Ѥросолимь на вьсако годище на великь дьнь на вьскрьсенїе петь сьть перьперь доубровьчкыихь и на дмитровь дьнь такожде дроугоу петь сьть перьперь доубровьчкыихь, како да се напльнꙗ на годинꙋ тисоукꙗ перьперь доубровьчкыхь, и тоуи тисоущоу перьперь да даваю доубровчане на всакоу годинꙋ храмоу царьства ми арьхаггела Михаила, ꙗже ѥсть вь Їеросолїмѣхь, до гдѣ годѣ Доубровникь дрьжи Стонь градь, и нимь облагѥ, и този рѣхомь, ꙗкоже ѥсть приложиль родитель царьства ми, трьблаженыи царь кѵрь Стефань, такожде и царьство ми записа оу хрисовоулих. аще ли се прилоучить запоустети грѣхь ради нашихь храмоу светаго арьхаггела вь Їеросалимѣ, то да се давать таи тисоуща перьперь ѡдь Доубровника оу Светоую Гороу нашемь монастиромь, еже ѥсть вьвѣдѣнїе вь светаа светыхь прѣсветые богородице глаголѥмїи Хиландарь, и монастироу светаго великомоученика Гѥѡргїа, глаголѥмїи светыи Павль, що соу сьградили прѣдѣди царьства ми прѣподобныи Сѵмеѡнь новїи мѵроточьць и светыи архїепискоупь и чюдотворць кѵрь Сава и по нихь рѡдитель царьства ми и мы такожде, ꙗко да ѥсть сїи доходькь неѵтьемлѥмь ѡть тѣхь светыхь мѡнастирьь ни кымь любо до вѣка. и молю, егоже господь изволи по мнѣ на столѣ царьства ми, сїе да не разорить ни пороушить, нь паче больше да потврьдить и сьхранить. и сїе извѣстное и златопечатное слѡво царьства ми записахь и оутврьдихь, каде прїидоше кь царьствоу ми оу Призрень вьсечьстны игоумень иеросалимьскы кѵрь Гѥрасимь и игоумень Светые Гори великые лаври Хиландара кѵрь Арсенїе и игоумень свеьаго Павла кѵр Їѡань вь лѣто ·҂ѕѡѯѕ·, индиктїѡнь ·аі·, мѣсеца іюнїа ·к҃· дьнь при логофете Драгославѣ. и аще се кто покоусить и разорить бесовьскыимь наважденїемь сїе наше приношенїе и дарь светыимь црьквамь любо ѡть сьродникь моихь любо инь ктѡ, таковаго да разорить господь богь и прѣсветаа владычица наша богородица и приснодѣваа Марїа, и да ѥсть проклеть ѡть светыхь ·ві· апостоль и ѡть светыхь ѡтьць ·тиі· иже вь Никеи, и да има честь сь прѣдателѥм Июдою и сь рекшим: вьзми, распни его.

† Стефань вь Христа бога благовѣрни Оурошь царь Срьблемь и Гркомь.