Monumenta Serbica

+ Дава царьство ми ѡризьмѡ си хѡрѣ всеи дѫбрѡвнишстѣи, любѡвнꙑм (в)севѣрнꙑмъ гѡ(стемъ) царьства ми, да ѩдꙋ ходꙙть пѡ всеи хѡрѣ царьства ми с кꙋплѫ каквѫ (ли)бѡ, или нѡсѧ или женѫ, или кꙋпиѫ каквѫ либѡ нѡсѧть, и дѡ кѡꙗ либѡ земѣ или хѡрꙑ дѡидѫ, или дѡ Бъдꙑнѣ или Браничьва и Бѣлграда дѡидѫтъ, или дѡ Трънѡва и по всемꙋ Загѡриꙋ...(и)л(и) дѡ (П)рѧслав(а) или карвꙋнъскꙑѣ хѡрꙑ придѫтъ, или крънъстѣи хорѣ или бѡрꙋис(тѣ)и или вѡ Дринъ и в Димѡт или в скѡпьскѫѫ хѡрѫ или прилѣ(п)скѫѫ или в Дѣвѡлскѫѫ хѡрѫ или в земꙙ арбанаскѫѫ или в Сѡлꙋнъ идѫтъ, пѡ всꙙдꙋ да си кꙋпѡваѫ и продаваѫтъ свѡбѡднѡ бесъ всѣкѡѫ пакѡсти, да не имаѫ(т)ъ пѡ всѣхъ хѡрахъ царъства ми и г(ра)дѡвѣхъ и клисꙋрахъ запрѣтениа, н(ѫ) да си хѡдꙙтъ и кꙋпꙋѫтъ и продаваѫтъ бес печѣли ѣ(к)ѡ и всевѣрнии любѡвнии гѡсте царьства ми. ктѡ ли имъ спакѡсти ѡ том либѡ или на клисꙋрѣ или на фѡрѡсѣхъ или гд(ѣ) л(и)бѡ прѣзъ законъ о кꙋмерки, тѡ да е вѣстъ, тѡи е прѡтивникъ царьствꙋ ми, и милѡсти не щетъ (и)мѣти, (н)ѫ велик(ѫ)... ме ѡргиѫ патитъ... ми +.

+ Асѣн(ъ)... Б(лъгар)ѡ(мъ) и Гръком. +.

... пакы да есть ведомо васемь хотещимь знати, дѡкле есть међа монастирске земле: до Ꙗсенїце оуправо на Долаць, оуправо Быломь на врьхь на Щавницоу, нис-планиноу оуправо на Гоущерице, оуправо прѣко реке, оуправо оуз брьдо на планиноу брѣсничкоу, оуправо на Полоумирь, оуправо на Ибарь, оуправомь Ибромь на Оусђе рекомь Стоуденицѡмь, оуправо на рекоу Ꙗсенїцоу...

Датель благыихь и источникь вьсакомоу данию неѡсоудьнии, оуслышитель вьсакомоу призывающоумоу иистинью, не хоте ни ѥдиногоже погибениѥ, нь веле вьсѣмь спасти се и вь разоумь истиньныи приити, вьсѣхь владыка, Христось богь, истыньна моудрость ѡтьча, ѥгоже аще кто ѡбрѣть вь истиноу блажень, кто оубо довольнь изьглаголати силии господьне? ѡ смѣрении таковаго владыкы, всачьскаѣ оудивьлають се, ꙗко за неше спасениѥ бьисть чловѣкь, вьсѣхь богь вьпльтиви се вь прѣчистꙋю си матерь, и своимь си благоволениѥмь вѣньча нась, даѥ испльнениѥ неѡскоудьно сь любовию припадающихь кь немоу. ѥгоже благостиноу чловѣколюбыѣ разоумѣвь азь грѣшьни Стефань, велии краль, намѣстьныи господинь вьсе срьбьске земле и Диѡклиѥ и Дальматиѥ и Травоуниѥ и хльмьске землѥ, припадаѥ молю ти се, господи, ты приѥть ме ис-чрѣва матере мое, тыи ѥси мои покровитель, тебе оутврьдлениѥ и недеждю имамь, и тебе молительницоу прѣдьлагаю прѣчистоую ти матерь, мене оубо изьбравь домоу ѡтьца моѥго быти ми на(мѣ)стьникоу стола ѡтьца моѥго и вь братии моѥи вишьша ме ꙗвивь и мнѣ прѣдасть пасти стадо ѡтьца моѥго сь благословлениѥмь ѡтьчимь ми, иже и наоучениѥ сицево заповѣдавь мнѣ и рекыи: сыню, моѥ глаголы вьнимаи, кь моимь же словесемь прилагаи оухо твоѥ, сьхрани ѥ оу твоѥмь срьдьци, и боуди оупьваѥ вьсѣмь срьдьцемь на бога, благослови бога на всако врѣме, выноу хвала ѥго вь оустѣхь твоихь, блызь бо господь вьсѣхь боѥщихь се ѥго, и молитвоу ихь оуслышить, и спасеть ѥ аминь. тѣмьже и азь разоумѣвь блаженоую жизнь ѡтьца моѥго, ѣко вьса сь поспѣшениѥмь прилежаше вь заповѣдехь господьнахь, т҆ѣ҆мьже и владыка Христось богь страшьна вьсѣмь живоущимь ѡрьсть его ꙗви и, и мирь и тишина бысть вь дьни владычьства ѥго по словоу пророка Давида: ѣко господь не лишить добра ходещихь незлобою. сего ради и азь припадаю вѣдыи твоѥ чловѣколюбые, молю се вьпие сице ти Исоу Христе: ѡтврьзи ми ѡчи срьдьчнѣи, разоумѣти и творити волю твою вьсе дьни живота моѥго, ꙗко пришьльць азь ѥсемь, не скрии ѡдь мене заповѣдеи твоихь, нь ѡткрии ѡчи мои, да разоумѣю чюдеса ѡдь закона твоѥго, ськажи ми, господи, безьстьна и таина прѣмоудрости твоѥѥ, на те бо оупваю, боже мои, да ты ми просвѣтиши оумь и сьмыслы свѣтомь разоѥма твоего, прѣбывати ми (вь) вьсѣхь писанбныхь твоихь вь ѡбьновлѥниѥ мнѣ и вь просвѣщениѥ истыню и вь спасениѥ доуши моѥи и тѣлю аминь. и такь прѣбывающоу ми аще иное добродѣтели не створихь, ѡ мнѣ провѣсть богь, нь идѣже бисть манастырь коѥго светаго, сь оусрьдьнимь хотѣниѥмь вьсакоу доволь исьпльнихь ѥмоу, и семоу же манастырю прѣчистыѥ владычицѥ наше госпожде богородице вь Млѣтѣ сиѥ дароую: ѡтокь вьсь и Бабыно Поле, ꙋ дроугомь ѡтоцѣ оу Крькрѣ црькьвь светога Вида, Ѣниноу и сь Поповомь Люкомь и светаго Стефана и светога Геѡргиѣ. а меге имь вь соуть: Жоулыꙗнь ѡть мора до мора и ѡть дроуге стране ѡть Мотроужнице ѡть мора до мора, оу Стонѣ црьквь светаго Николы. сиѥ да боудоуть метохиѥ свете богородице млѣтьске црькве. и виногради коупль ѡпать црьквыимь добытькомь да боудꙋть црьквы оу Рѣцѣ и оу Жрьновьници прѣдь Доубровьникомь. сии всегда да бꙋдꙋть црькви. и за сиѥ матохиѥ никоире чловѣкь да не има печали разьвѣ ѡпать, кто ѥ оу мѣстѣ томь, а ини никоире чловѣкь да не имаа печали ни ѡбласти надь нимь. или кто и боуде владыка по мнѣ или моѥ дѣте или прысни мои или ины кто, сега да не разории или ѡбыдещоумоу коимь оусилыѥмь комоу. аще ли кто завистию сотониною ѡдрьжимь и дрьзьнеть разорити что ѡть приносимыхь мною прѣсветѣи богородици благодѣтельници, таковыи да боудеть проклеть ѡдь господа бога вьседрьжителꙗ и прѣсветыѥ богородице, и сила чьстьнаго и животворещаго крьста да мьстить ѥго вь нинꙗ(ш)нѣмь вѣ҆цѣ и вь бꙋдоущемь, и ѡдь мене грѣшьнаго боуди ѥмоу анаѳема. сего ради писавь и подьписахь.

Стефань по милости божиеи вѣньчаны краль и самодрьжьць всѥ срьпске землѥ и поморьскѥ.

Семоу же прѣсветомоу храмоу спаса нашего Ісоуса Христа по неисповѣдимѣи милости его, еже створи ѡ нась, Стефань, по божие милости вѣньчани прьви краль вьсе срьпскиѥ земле, Диѡклитиѥ и Травоѥние и Дальмацие и Захльмие, и сь прѣвьзлоубленимь ми синомь Радославомь, по божиеи милости намѣстьникомь ми, приносивѣ твоꙗ ѡть твоихь вь мольбьноую паметь наю, дарь спасоу нашемоу Ісоусоу Христоу и его светимь, светими дрѣви чьстьнаго и животворещаго крьста господна и светыми страстьми христовами и ѡть прѣсветые богородице ризи и поꙗсь и светаго пророка прѣдьтече крьститела Иѡвана деснице, юже вьзложи на врьхь жиждитела, и крьсти, и ѡть глави прѣдьтечеви мощьми всѣхь светыхь апостоль, пророкь, моученикь, светитель прѣподобнихь, иконами светыхь и чьстьнихь ѡбразь и сьсоуди златими и сребрьними і риѳидами доволно и завѣси и покрови светыми и ризами чьстьними и светими ѥѵангели и книгами многами, инѣми правдами, ꙗже быше на просвѣщение спасоу нашемоу Ісоусоу Христоу. и на крьмоу и на ѡдѣꙗниѥ слоужещимь светомоу храмоу семоу: село Тальско и сь Ратиновь і сь Заклопитовь Лоуковь, Топольница сь Воюшами, Рибьница и сь вьсѣми ѡбьршьми и вь Брѣновь, Жича сь Батиномь, Рибичи сь Чрьновь Рѣкомь, Тльсто Брьдо сь Рашькимь Дѣломь и с Щитариновь, Пѣшьчаница вьса сь Пѣчаномь, Боуковица, Граховища вьса, Свиньци, Грачаница, Радиево, Конарево, Чрьнаве сь Сѣрчовь, Брѣстница сь трьгомь, Свибница сь Ѡкроугломь, Боболе сь Чечиномь, Гвочаница сь Поупавними. оу Ѥльцихь села: Дольна Вьсь, Борькь, Гьнила, Добринꙗ, Витахово. а оу Хвотнѣ села: Пекь сь заселиѥмь си, Чрьни Врьхь, Стльпези, Трѣбовитикы, Горажда вьсь, Накль вьсь сь Челпекии и сь Лаблани, Лютоглавы сь градомь. а оу Затонѣ села: Чрьньча сь заселиѥмт си, ѡбѣ Ивани сь заселиѥмь, Замьчане сь заселиѥмь, Доубово. Гаѥ. и вьса сиѣ села сь заселиꙗми си. а се оу Зетѣ села: Трѣболе, Плавници. оу Горскои Жоупѣ Голичь. а се планине: на Спорихь Ноздри, Ꙗворие сь Лоукавицами; оу Хвосьтнѣ Слано Полѣ сь Тмасвѣмь Гвоздомь, надь Брѣзницами Желинь, а зимие паше одь Брѣзне долоу низ Соутѣскоу сь вьсѣми пашами, ꙗкоре прѣемле црьковьна меда, сь всѣми пашами зимними и лѣтними по ѡнѣ срѣнѣ Котлѣника. а се власи, чьто сьмо дали сѣи црькви, имена си соуть: Грьдь кьнезь и зь дѣтию, Радоьа, Влькославь, Тихомирь, Станимирь, Воихьна, Драгьшань, Нѣгославь, Злина, Мирошь, Браѥнь, Нѣгоушь, Нѣгота, Сына, Радомирь, Драгань, Братинь, Воило, Дрьжихьна, Пачемиль, Батина, Братьмирь, Драгоушь, Тихомирь, Братешь, Грьдошь, Гостило, Попь, Пачень, Боунь, Стань, Драгомань, Стань, Десиславь, Коуплень, Даиша, Берило, Нѣгь, Боунило, Драгомирь, Братень, Станимирь, Братонѣгь, Нѣгота сь дѣтию, Драгоушь, Братило, Радославь, Тоудорь, Лоуцань, Добромирь, Драгославь, Моужило, Тихочь, Драгомирь, Драгоушь, Коумань, Милобрать, Драгоушь, Драгославь, Брапа, Предило, Драга, Прьвославь, Драгоушь, Полиградь, Радишь, Тихомирь, тьща моу и сь дѣтию, Злата, Стань, Драгнь, Попь, Микь, Добриша, Берило и сь дѣтию, Гостимирь, Радь, Гостимира мати, Чоучь, Коумань, Братославь, Боута, Нѣгь, Василь, Братешь, Братославь, Добрьць, Лѣвь, Драгомирь, Сращнь, Тоудорь, Тихомирь, Боунило, Браꙗ, Гостоло, Воимирь, Божаꙗ, Тоурьꙗкь, Прѣдимирь, Боучь, Красимирь, Братило, Боудиславь, Тихославь, Мрьгела, Радоушь, Коуплень, Братань, Боунь, Продань, Воихьна, Братохна, Гостиша, Илиꙗ, Боукорь, Радь, Братина, Бала, Срацинь, Хрелꙗ, Милць, Добромирь, Сина, Владь, Десило, Добрславь, Тешемирь, Боудинь, Божица, Коумань, Боукорь, Радь, Владь, Стань, Понѣгь, Роугь, Грьдошь, Злата, Стань, Драгоуть, Влькьсань, Богьдань, Братослав, Бѣгота и сь дѣтию, Толькь, Драгоунь, Лоубота, Коулинь, Велимирь, Брьзѣи, Тоудорь, Боукорь, Нанота, Сина, Нѣгь, Братеша, Бериславь, Прьвславь, Боуцкать, Црьномоужь, Грьдань, Никола, Драгошь, Драгославь, Воинь, Гоугота, Воусинь, Скоромирь, Проужинь, Воиславь, Дода, Радота, Велимирь, Поврьжень, Воислав, Берило, Мирошь, Велѣнь, Срацинь, Аньдриꙗ, Бѣгота, Гостило, Чврьнѣга, Гргоурь, Боукорь, Богдань, Стань, Десимирь, Бѣжань, Плѣнь, Вратиша, Дѣдоль, оудовица Драгоушла и Тоусь и с материю, Грипонь, Чрьнота, Стань, Шарвань, Воинѣгь, Бѣлота, Воила, Мирошь, Славко, Гостило, Нѣжь, Продань, Боунь, Дѣдь, Драгоушь, Гоунꙗ, Братимирь, Вокосавь, Гостимирь, Ходиша, Прѣдихна, Боукорь, Троусѣнь, Нерадь, Синьгоурь, Драгоушь. и сиѥ жюпе приложихомь подь ѡбласть сиѥ црькви: Кроушилницоу, Моравоу, Борьчь, Лепеницѣ ѡбѣ, Бѣлица, Лѣвочь, Лоугомьа, Расина, Ѥльшаница. и сиѥ что се прилага сиѥи црькви, симь да нѣма протопопа дворьски никоѥре ѡбласти, нь что доходи или ѡть поповь или ѡть влахь, или земльна поповска бирь, что доходи ѡть поповь, половина да се оузима сиѥи црькви. и да се не позива архиѣпискоуповь чловѣкь кралю безь кралеве печати, нь ако ѥ комоу чимь дльжнь архиѥпискоуповь чловѣкь, да га позива с кралевомь печатию кь кралю, да ако не поиде до печати, то тоузи да се оуписоую печати оу кралꙗ, и да ѥ оузима архиепискоупь себѣ. и аще се позове кралевь чловѣкь кь архиепискоупоу, и да боудеть.....

Си же светы и прѣѡсвещени храмь спаса нашего Ісоуса Христа, азь, милостию божиѥю вѣньчани краль Стефань, и с прѣвьзлюбленимь синомь своимь Радославомь прьвѣньцемь, ѥгоже и благословисмо бити емоу кралю вьсе сиѥ дрьжаве, вь сем же храмѣ спаса нашего здѣ да поставлають се вьси кралиѥ, хотеще быти дрьжавѣ сѣи, и архиѥпискоупиѥ и пискоупиѥ (и) игоумениѥ здѣ да поставлають се. и сиѥ жоупе приложихомь поѡдь власть сиѥи црькви: Кроушильницоу, Моравоу, Борьчь, Лепеници ѡбѣ, Бѣлица, Лѣвочь, Лоугомира, Расина, и власи вси сиѥ кралевьске дрьжаве. и сиѥ жоупе, чьто приложихомь црькви спаса нашего, сь симь да не имаю протопопе дворске никоре ѡбласти. а що доходи ѡть поповь или ѡть влахь или земльски люди, что е поповска бирь, что се оуземле на людехь, да се та вса оуземлю сѣи црькви. а инѣмь пискоупиꙗмь ке соу дошле жоупе, да оузима протопопа дворски половиноу бири поповьске, а ѥре ѥ врьховина попомь, да ѡдь тога не оуземле протопопа честы, нь вьсе то пискоупь да оуземле. а сие ·д҃· жоупе: Ѥльшаница, Пноука, ѡба Ибра, ѡдь ис-прьва нѣ оулазиль протопопа. да и ѥще да соу ѡть протопопь свободне и ·д҃· намастири кралевсци: света богородица стоуденичьска и светы Геѡргиѥ оу Расѣ и свтогорьски манастирь и света богородица градьчьска. тѣми ·д҃· -ми ни самѣми ими, или гдѣ имь соу села подь коими пискоупиꙗми, да не имають надь ними никоре ѡбласти пискоупиѥ. а ѡ поповьсцѣмь поставлени сихь манастирскихь ѡбласти и ѡ всакомь доуховномь исправлени прѣдлагаемь та вьса на архиѥпискоупа. а ѡ поставлени игоуменьскомь, ѥгоже по правдѣ изволи кралевьство, сего архиепискоупь благославлаеть божьствьно, а краль даваеть емоу жьздь, и целовь ѥго поставлаеть его игоумена. и по томоу божьствьни сь законь наоучивьше по црьковномоу оуставоу и прѣдани, и господско запрѣщениѥ бысть, не разлоучаты се моужоу ѡть жене и женѣ ѡть моужа; аще ли котори ѡбрѣщеть се сию страшноую заповѣдь прѣстоупае, симь наказаниѥмь да наказоуѥть се: аще ли котори боудеть ѡть властель, да оуземлеть се на немь кралю ·ѕ҃· конь; аще ли ѡть инихь воиникь, да оузимаеть се на немь по ·в҃· кона; аще ли ѡть оубогихь люди створить се, да оузимаеть се на нихь по ·в҃· воли. женамь такожде повелѣваемь: аше ли котора вь прѣстоуплениѥ закона вьпадеть, аще боуде ѡть властель, то властельскимь наказаниѥмь да наказоуеть се; аще ли ѡть нихнихь, то противоу родоу да наказоуеть се; аще ли котора родители ѡтемлет се или инѣмь коимь симь, то такови да наказоует се противоу саноу своѥмоу; аще ли ѡ себѣ сама иметь бѣсновати се, ѡставлꙗющи своѥго моужа, да аще има добитькь, добитькомь да наказоует се; аще ли добытка не има, то своимь тѣломь да наказоуѥ се, ꙗкоже боудеть изволениѥ моужа ѥе. наказавь ю, да ю водить. аще ли не боудеть ѥмоу оугодна водити, то наказавь ю да ю продасть, камо ѥмоу годѥ. и по наказани всаки моужь, кои боудеть поустиль женоу, да ю вьзврати вь домь свои; аще ли сего не иметь послоушати, то такови и ѡть божьствьниѥ црькве да боудеть завезань, и ѡть господина еи да не боудеть оу милости. и аще второу женоу поиметь, да дасть ѡслоухоу подобноу прьвои. или кто по таковомь женоу дасть, иже не име хьтѣти своѥ вьзлещи, то и ты да оупадаѥть оу такоже наказаниѥ, ꙗкоже и поустивии. и женамь же симь ѡбразомь запрѣщениꙗ да бивають, да не имать ѡбласти оставившии своѥго моужа иного оузети; светителемь же и господьствоующимь запрѣщениѥмь божьствьнимь запрѣщенимь, никтоже да не ѡставлаѥть божьствьнаго сего закона, развѣ словесе прлюбодѣинаго. и тои истино да испитаеть се сь расоуждениѥмь на властелѣхь же и на воиницѣхь, да оуземлють на нихь ѡслоухе господьствоующи. а ѥже соуть оубозии, на нихже оуземлю по ·в҃· воли, то гдѣ ѡбрѣтают се оу жоупахь, ке соу подь ѡбластью архиѥпискоупиѥ, да оузимлеть архиѥпискоупиꙗ, а подь ѡбластию инѣхь ѥпискоупиѥи аще ѡбрѣщеть се такови, то да оузима ѥпискоупиꙗ ѥднь воль, а дроуги да оузима господьствоующи. аще кто сватвицоу прѣ-з-аконь оузме, аще боудеть ѡть властель или ѡть воиникь, да оузимаеть ѡслоухоу господьствоуѥи по ·в҃· воли; аще ли ѡть оубогихь, то да оузима светитель половиноу, а таковы да се распоущають оу распоусѣхь или оу сватвицахь. іже позивают се прѣдь светителѥ, ѥре пороукоу светителемь ѥмоут се, то такове роуке и печати светителие да оузимають. и да се не позива архиѥпискоуповь чловѣкь кь кралоу безь кралеве печаты, нь ако ѥ комоу чимь дльжнь архиѥпискоуповь чловѣкь, да се позива сь кралѥвомь печатию кь кралоу. да ако не поиде по печати, то тоузи да се оуписоую печаты оу крала, и да ѥ оузима архиѥпискоупь себѣ. и се вьса сврьшихомь ти, спасе мои, и прѣдахомь божьствьнѣи и неизреченѣи славѣ царствиꙗ твоего, да аще кто прѣстоупить и иметь разарати нѣчто ѡть сего прѣданаго тебѣ, кто любо боудеть прѣтвараѥ сиꙗ, не тькмь да ѥ повиннь и ѡтриновень божьствьномоу тѣлоу и крвы господа бога и спаса нашего Ісоус Христа и богоуматери рождьшеи прѣсвѣтыѥ приснодѣвиѥ Мариѥ, нь и анатѣма ѥмоу боуди и клетва на немь светыхь небеснихь силь, Іѡана прѣдтече и крьститела и светыхь прѣславнихь апостоль и светаго прьвлмоученика Стефана и светаго ѡтца нашего Сави и светыхь ѡтць нашихь ·тиі· иже вь Никыи, и мною грѣшьнѣмь да ѥ завезань вь си вѣкь и вь боудоущии, и наслѣдникь да боудеть прѣдателю Июдѣ и причестьникь рекьшимь: вьзьми, разьпни ѥго, крьвь ѥго на нась и на чедѣхь нашихь, да причьть се кь тѣмь.

Милость створи господство ми доубровьчькимь трьжникомь, да ходе по моѥи земли свободно с трьгомь, безь правьде никто да имь нища не испакости; оу коѥи ли се жꙋпѣ що испакости, тази жꙋпа волꙗ да да кривьце волꙗ да плати.

Господинь Стефань.

Пише кралевьство ми, всѣмь да е ꙋ свѣдѣние. сиковꙋ милость створи кралевьство ми властеличикемь дꙋбровьчькимь, да гредꙋ сь трьгомь ꙋ землꙋ кралевьства ми, и гдѣ гредꙋ ꙋ кое мѣсто или ꙋ Брьсково или иньдѣ гдѣ годѣ, да имь нѣ никоере неправьде ни ꙋсилиꙗ; и крьчьмꙋ да носе; и прѣбѣгарь да не влада надь ними; и сь срьблиномь ꙋ коемь годѣ сꙋдѣ нигдѣ иньдѣ да се не прю, да греде прѣдь кралевьство ми. кто ли се дрьзне прѣтворити, да приме гнѣвь и наказание ѡть кралевьства ми, сие бо все писа кралевьство ми, да е всѣмь ꙋ свѣдѣние.

Стефань краль и сь богомь самодрьжьць срьпскі.

† Пише кралевьство ми, да е вѣдомо всакомꙋ. дало е кралевьство ми милость дꙋбровьчамь, да си продаю вино безь воде и медь ꙋ ꙋцѣнь ꙋ Брьсковѣ ꙋ трьгꙋ кралевьства ми. и ако се кто наиде продавь вино с водомь и медь прѣзь ꙋцѣнь, да мꙋ се все ꙋзьме, що има. а за ине трьжнике да не има печали кралевьство ми. да имь се се не помете, докꙋ стое ꙋ правдѣ кралевьствꙋ ми.

Стефань краль срьпски.

† Стафань, вь Христа бога вѣрны краль всѣхь рашькихь земль и тревоуниискиихь, оуноукь светаго Симеѡна Намане и сынь прьвовѣньчаньнаго крала блаженл почивьшега Стѣфана монаха, Радославь. вь лѣть ·҂ѕѱмв· излѣзохь прѣдь братомь ми Владиславомь за правовѣриꙗ моѥга и за ѥгова ради великаго прѣклетьвьства, придохь оу си градь Доубровьникь: кнезь Петрь Болеславикь и Тꙋдрь Крꙋсикь и сь всѣми властелы ѡбькиновь градьсковь ѡдь мала и до велиꙗ приѥше ме сь почьстию, и много ме почьтише, и правовѣрьно ми послоужише. видѣ кралевьство ми толикоу ѡдь нихь кочьсть и вѣрно послоужениѥ, и сиѥ оучинивь имь и оутврьдихь, ꙗкоре ако ми богь да, и боудоу господарь, како сьмь быль, да си ходе сь своими си трьги по всѣи земли ѡбласти кралевьства ми свободно и по Хльмьсцѣ Земли и по Зетѣ и по всакимь трьгомь кралевьства ми, а да имь се царина не ꙋземле ни ѡдь мала ни до велиꙗ, и могорыше хльмьске, и дань, что даѥте за Рѣкоу и за затоньске винограде и за поличке винограде, ѡдь тога вы ѡсвобага кралевьство ми, да не даѥте ничесаре; и за винограде жрьновьничьке ѡдь дѣдь вашихь и ѡдь ѡтьць вы дори вась до дньсь, что сте посадили лозиемь земле кралевьства ми, или ѥ много или мало, пращаю вы, да сте ѡдь тога свободни, и дани да не даѥте. а ѡль дьньсь по ѡноуге земле мое да не покриѥте ни ѥдьне педи или лозовь или житомь или вокемь коимь. хоке ли что ѡбькина ваша прѣзь сиѥ оутврьгениѥ кралевьства ми что примькноути мое земле, свѣне мене клетва, поневаре вы ѡстаѥте оу прѣклетьвьствѣ. ѡбрѣте ли се кто чловѣкь зьль или ѡдь моихь или ѡдь вашихь потвараѥ сиѥ, оу томь да нѣ зледи никоере, нь то да се исьпрала соудомь правымь божьчтвьныимь. ꙗкоре да е право и безьгрѣшьно кралевьствоу ми и вамь вѣрьнымь ми приꙗтелемь. и кто боудоу подь роуковь кралевьства ми, боудоукоу ми сь милостию божиѥвь и прѣчистыѥ ѥго матере оу моемь господьствѣ, или ѥ брать мои или стрыць ми или братоучедь ми или инь кто любо ѡдь боларь кралевьства ми, кто хоке сиѥ потворити, не маль грѣвь и наказаниѥ им вьсприети ѡть кралевьства ми. по животѣ же моемь наконь мене или ѡстане дѣте мое или оуноуче или праоуноуче или инь кто любо присни мои, и хоке сиѥ потворити, богь да моу соуди и света богородица и крьсть чьстьны и вси свети оу си вѣкь и оу боудоуки, нь сьврьшенѣ боудоуки вашѣи вѣрѣ и любьви и клетвѣ ѡнои, коѥвь ми се хокете ѡбекати ѡ всемь кь мнѣ и кь послѣдьнимь моимь. сего бо ради сиѥ оутврьдивь и подьписахь роукою кралевьства ми вь лѣто више писано, мѣсеца ферьвара ·д҃· индиктиѡна ·д҃· (и да е сꙋдь ꙋ врѣменѣхь по старомꙋ законꙋ ѡдь михолꙗ дьне до гюргева дьне).

† По милости божиеи, ꙗ Стефань Владиславь пишꙋ те(бѣ), кнеже дꙋбровьчьски, и всѣи опькинѣ. ꙗ смь ималь к вамь ѡбѣть, да приѣмь томꙋ градꙋ, и да мꙋ работамь ꙋзь еговꙋ почьсть; а ви се сте обекали и рекьли: да си сѣде твоѣ села свободьно и твои лꙋдие; да ꙗ смь быль рекль моимь лꙋдемь, да се не бое нищаре; да вы како си се сте наꙋчили по клетьвѣ наша села и наше ьолꙗры емати, такози сте и мнѣ ꙋчинили, давше свою рꙋкꙋ и свою вѣрꙋ, тере моѣ села плѣнили и боларе ели, а дрꙋге исѣкьли. да ꙋ томь богь да расꙋди, на комь е клетьвь ѡстала, а ви що можете чинити, чините. богь ви даи здравие.

Стефань Владиславь.

† Вь име ѡтьца и сына и светаго дꙋха. азь Жани Даньдоль, кнезь дꙋбровьчски, сь всѣми болꙗри и сь всовь ѡпкиновь градьсковь кльнемо се тебѣ, господинꙋ кралю всѣхь рашкихь земле и поморьскихь Владиславꙋ, ꙋ господа бога нашего Исоу Христа и ꙋ прѣсветꙋ богородицꙋ и ꙋ чьстны и животворещи крьсть и ꙋ света божиѣ еваньгелиѣ и ꙋ все свете ꙋгодивьше богꙋ ѡть вѣка без всаке нꙋжде, нь своимь хтѣниемь и своѡвь воловь, чистѣмь срьдьцемь и правовь вѣровь без всакога пропадства и зьле мыслы, ꙗкоре ѡ(дь) дьнешнега дьне да ти смо прьѣтели правы, и да смо с тобовь единовь мыслию и единѣмь срьдьцемь неразлꙋчно до живота нашега и твоега, и кто е твои прьѣтель, да мꙋ смо прьѣателие, а кто твои врагь прибѣгне ꙋ нашь градь кь намь, да ти не испакости нищаре, ꙋ нась бꙋде; ако ли что испакости, да е мы платимо; ако ли га не платимо, да ѡнога самога да ти дамо; аке ли тога не ꙋчинимо, да да е на нась клетва сиѣ. и ако ти се згоди кое насилые, и прибѣгнеши ꙋ градь нашь кь намь, да те примемо ꙗко господина сь всаковь почьстию и сь всакимь прьꙗниемь сь всѣми твоими болꙗры и с ынѣми всѣми твоими, кои се с тобовь згоде, и колико вьзлюбиши прѣбыти ꙋ нась, да си прѣбꙋдеши сь всаковь почьстию, а зла да ти не ꙋчинимо никогаре ни тебѣ самомꙋ господинꙋ ни госпоги женѣ твоеи ни дѣци твоеи ни добыткꙋ твоемꙋ всакомꙋ ни болꙗромь твоимь и ни всакомꙋ никомꙋре твоемꙋ ни добыткомь имь, нь паче да имашб почьсть и храну противу моки нашеи ако и господина, и кьга си вьсхотеши поити инамо ѡдь нась, да си погеши свободно сь всакою почьстию и сь всѣми твоими и сь добыткомь всакымь твоимь и ѡнѣхь добыткомь всакимь, а мы да те испратимо; и земли твоеи и градомь твоимь да не пакостимо ни плѣномь ни гꙋсовь ни ѡчивѣсть ни таемь, нь паче да имь прьѣмо ꙗко и самѣмь намь; и да стоимо ꙋ старихь мегахь, а прѣс‐то да не посежемо никакоре; а добыткь, ере смо рели дати, да ти дамо, тисꙋкю перьперь и петь десеть дакьть скрьлата чистога и чрьленога, когаре ты самь господинь ѡблюбиши: то половинꙋ да ти дамо сьга петь сьть перьперь и ѡнꙋзи петь десеть лакьть скрьлаьа, коере тебѣ ꙋгодно бꙋде, а дрꙋгꙋ петь сьть перьперь да ти дамо до божика, а ѡть тога да ти не ꙋдрьжимо всега ни мала, нь да ти подамо все испльнено; и цариникь твои да стои ꙋ нась неврѣгень ѡдь нась никакоре, и что е твоѣ правина, да ти ю подаемо всꙋ сврьшенꙋ; и кьга ѡдь нась ꙋстрѣбꙋеши помоки по морꙋ, и поидемо ти на помокь, да ны простишь тога лѣта все, что имамо законь давати, и кꙋпцѥмь нашимь, кои вьсходе по твоеи земли, царинꙋ, ꙗко и господинь свето почивьши дѣдь ти и господинь свето почивши ѡтьць ти, кьга има смо помагали, пращала ны ста: аке ли не ꙋзможемо ити на помокь ти, то да си ꙋзимашь все, како ти е законь. и такоге ти се и мы кльнемо, како ти се сꙋ и ты болꙗре посли наши клели, Маѳѣи Бꙋдачикь и Крьвашь Маньгеревикь и Петрь Срѣкикь, и никоимре ꙋзрокомь да не раздроушимо сие клетве с тобовь, нь да ю дрьжимо тврьдо. и ако се коѣ крамола ꙋчини мегꙋ нами, да се сꙋдомь исправла, а клетвꙋ вынꙋ да дрьжимо к тебѣ непомьчно. и како хокемо сие все схранити, что се пише ꙋ сиеи клетвѣ, тако да нась богь сьхрани на семь свѣтѣ и ꙋ бꙋдꙋкемь: ако ли прѣстꙋпимо и едино ѡдь сега, что смо ꙋговорили с тобовь и ꙋписали здѣ, да ны богь сьпьне и света богородица и все свети, кои се пишꙋ ꙋ сиеи клетвѣ, и на семь свѣтѣ и на‐номь.

† Ѣ Стефань Владиславь, с помокию божиѡвь краль всѣхь рашкихь земль и Диѡклитие и Дальмацие и Тровꙋние и Захльмие, ѡбекꙗваю се вамь гостемь дѣдинѣмь ми и ѡчинѣмь и моимь, кнезꙋ дꙋбровьчькомꙋ и всѣ҆мь властеломь и всои ѡбкинѣ градьскои ѡдь мала до велиѣ, своимь си хтѣниемь, чистѣмь срьдьцемь, безь вьсакога пропадьства, ѣкоре ѡдь дьньшнега дьне, ако ми стоите ꙋ сиеи клетьвѣ, ꙋ кою ми се сте клели, да и до моега живота да вы дрьжꙋ ꙋ вьсакои правьдѣ, ка(ко) вы е дрьжаль дѣдь и ѡтьць ми, и да вы не створю никоегаре зьла никимьре коньцемь, докꙋ не створю сь вам тьрехь сꙋдь: ако ли сие прѣстꙋплю, да ме богь сьпьне и света богородица и вси свети ꙋгождьши богꙋ ѡть вѣка.

Стефань Владиславь с помокию божиѡвь краль всѣхь рашкихь земль и приморскихь.

Вь начетькь тыи, господи, землю ѡ(снова), и дѣла роукоу твоѥю соуть небеса, та погибноуть, тыи же прѣбываѥши, и вса ꙗко и риза ѡбетьшають, и ꙗко ѡдеждоу сьвиѥши ꙗ, и измѣнеть се, тыи же исть ѥси, и лѣта твоꙗ не ѡскоудѣють. створивыи разоумомь небеса и землю оутврьдивии на водахь, приѥм(ыи) страсть вольноую, ꙗко да нась, грѣшныихь и недостоиныихь рабь своихь, изведеши ѡть адьскыихь нераздрѣнимыихь оузь, и своими оученики и апостолы и светителы поставивь различнаꙗ свѣтила, и рекь имь оучити люди си, ѥже стежа чьстьною си крьвию, и: иже вѣроу иметь и крьстить се, спасень боудеть. сии же великии архиѥрѣю христовь Никола, нашь оучитель и пастꙑрь, вь напастехь крѣпькь и вь бранехь помагаѥи, сирымь и вьдовимь и нищимь застоупныкь и вь всацѣхь бѣдахь скоро помагаѥи, (с)твори се ѥго храмь сыи Илариѥю ѥпискоупомь зетьскыимь, и иже любимь бѣ господинома ми и родителема господина блаженаго и свето почившаго Стефана, кралꙗ все срьбьске землѥ и поморьске, Симона Монаха, и господина ми прѣѡсвещеньнаго арьхиѥпискоупа все срьбьскыѥ землѥ и поморьскыѥ кирь Савы, ꙗже ѥста сии дарь оустворивша и принесла кь светомоу и великомоу арьхиѥрѣю хритовоу Николѣ и ина многа молениꙗ кь божиімь црьквамь и смѣрѥнаꙗ кь ангельскомоу и мнишьскомоу ѡбразоу любима. азь же грѣшны и недостоины рабь божии Стѣфань Владиславь, оуспоменоувь сиковаꙗ оуписаниꙗ господовь ми и родители, что принесоу к тебѣ, великыи архиѥрѣю христовь, имьже се быхь избавиль вѣчныѥ моукы? приими сиѥ малоѥ моѥ приношениѥ, и боуди ми скоры застоупныкь вь дьнь страшнаго ми ѡсоуждениꙗ. и даю село светомоу Николѣ Годынѥ сь Рѣковь, а меге моу оу Бесь на врьхь Илане на врьхь .... а по брьдоу, како се ками вали оу Годинѥ, по дѣлоу на врьхь .. ра тако ... оу .. до .. бь ѡть доуба ... ть .. рць оу Мицꙋ право оу блато. и даю село То...оу Николѣ ..... и сь ... оуньнымь им.. дьвѣ Гоуглавоу и Кроушевице, а меге имь оу Бꙋдожигь оу Липовоу Продоль на врьхь Оуши..ца оу злоу плочю ѡдь Трьнова на пропастьньски прѣворь по брьдоу, како се ками вали, оу Ктоунно на прѣворь медоу Доупилоу и мегоу Ктоуньно надь Годиньць по срѣде Дебелꙗака подь Малы Дебелꙗакь, како поꙋть греде на Гомилыцоу, право сь Гомылице низь Бьчьвь........ право оу Рѣкоу и сь Рѣковь право оу вирь оу Бесь. да моу н(ѣсть) воиске ни царьскога злата ни винограда, нь да моу ѥ законь оу хро......оль великыихь лаврь. да не потворите сего оутврьжденаго семоу храмоу мною грѣшнимь кралемь Владислваомь ни брать мои ни синь мои ни оуноукь мои ни соуродникь кралевьства ми, или кого изволи богь быти господьствоующа. ѡбрѣте ли се кто, и дрьзнеть потворити се, да моу ѥсть соупьрникь богь и прѣчистаꙗ мати ѥго, и чьстьныи крьсть да моу нѣ помощьникь ни вь сии вѣкь ни вь боудоущии, и светы Николаѥ да моу ѥсть соупьрьникь на вьторомь пришьстви. и да м(оу соу) пашища и теговища, како ѥ ис-прьва было, да не има тоу ѡбласти ни мои властелинь ни мои владальць ни (ж)оуплꙗнинь ѡть соумеждьникь тѣхь сель, ни арьбанасинь да не има тоу зимовищ(а), и людие црьквьн(ии) да прѣбиваю оу всакои божьствьнои свободѣ, нь да соу работници светомꙋ Николѣ. кто ли се ѡбрѣте прѣслоушавь сиѥ моѥ, испакости что вь земли или вь людехь, да приме грѣвь и наказаниѥ ѡть кралевьства ми, и да да кралевьствоу ми ·т҃· перьперь. сего ради подписано бысть вь лѣтѣ ·҂ѕѱи·

† Стꙋафнь Владиславь с помокію божиѡвь краль всѣхь срьбьскіхь земль и поморьскыхь.

† Степань Владиславь, милостию божиѡвь краль срьбски, даваю свою милость приѣтелемь своимь властеломь дꙋбровьчскимь и всѣи ѡбькниѣ градскои, и пращаю имь могорише, что сꙋ давали ѡдь Жрьновнице, и никимь коньцемь да имь се сие не потвори ни ѡдь моега брата ни ѡдь приснога кога любо, до колѣ стое сь мновь ꙋ правдѣ, кою имамь с ними. кто ли сие потвори, да е проклеть ѡдь бога и ѡдь всѣхь светыхь.

Стефань Владиславь помокию божиѡвь краль србски.

† Вь имѣ ѡтьца и сина и светаго дꙋха аминь. азь Жань Михоиль, кнезь дꙋбровьчьки, сь боларими дꙋбровьчькими тебе, велиемꙋ кралꙋ рашькомꙋ и поморьскомꙋ Стефанꙋ Ꙋрѡшꙋ, ꙋ господина бога вьсѣдерьжитела и ꙋ пречистꙋ ѥго матерь дѣвию Марию и ꙋ честьни животворещи крьсть господьнь и ꙋ света божиа еваньгелиꙗ и ꙋ ·д҃· еваньгелисте кльнемо сѣ, ꙗкоре ни сь нашемь светомь ни сь нашемь вѣдениемь кралица владиславьла ись нашега града ни по морѣ ни по сꙋсѣ ни ꙋ Босьнѣ да не пошлѣ ни книга ни слѣ на твоѥ зло. а сѣ чинимо сь хтениемь твога сла Юрько и сь нашемь хьтениемь. акѣ ли сѣ пристꙋпимо, да ни богь сепьнѣ и света богорѡдица и честьни кѣрьсть и вьси свете божие.

† Вь име господа бога нашего Исꙋ Христа аминь. лѣта вьпльщинѣ господа нашего Исꙋ Христа тисꙋща ·снг·, мѣсеца июнѣ, на дьнь свѣтого Вита, ендиктионь ·аі·, сего бѡ ради да бꙋдеть чистое приѣтельство и сьврьшение чистою любьве, еже било ись прьва междꙋ свѣто и прѣславьнога царьства вьсе земле бльгарьске и грьчьке Иѡвановь Ѡсѣномь и междꙋ ѡпькиномь славьнога града нашега Дюбровьника, ѣко сꙋ жили вь правьдꙋ и любьвь и вь истинꙋ, да повеке растеть и плоть исьнесеть. ись давьна жльдающе тебе свѣтомꙋ и вѣрномꙋ вь Христа бога царꙋ самодрьжавьцꙋ вьсеи земле бльгарьске господинꙋ Михаилю Асѣню, рожденомꙋ ѡдь благовѣрнихь и свѣтихь цари, азь Марьсили Геѡрьги, повеленьемь славьнога дꙋжа бенетьчкога кнезь града Дюбровьника, и вьсе сꙋдие и векьници и ѡпькина вьса прѣславьнога града нашега Дюбровьника, мали и велици, вѣрни приѣтеле свѣтого ти царьства ись давьно врѣмене любовь царьства ти имети жльдающе вь бога и вь свѣтое еваньгелиѥ божье и вь свѣтꙋю девою Марию мати ѥго и вь честни животворещи крьсть и вь свѣтию апостоли Петра и Павьла и блаженꙋю четири еваньгелисте Марька, Матеѣ, Люкꙋ, Иѡвана и вь свѣтꙋю мꙋченике господне Власиѣ, Ловрѣньтьѣ, Петра и Аньдрию нашехь свѣтитель и вьсемь свѣтиимь вьгодивьжемь богꙋ господинꙋ кльнемь се, ѡбещамо се твомꙋ великомꙋ свѣтомꙋ царьствꙋ дрьжа врьхꙋ зло творенье нев(ѣ)рьного крала Ꙋроша и врьхꙋ братью его и рода его и врьхꙋ вьсехь живꙋщихь вь земле ѥговѣ и на техь, кои на ихь земле бихꙋ дрьжали некое владанье, ако бꙋдꙋ невѣрници ни приѣтеле твоемꙋ свѣтомꙋ царьствꙋ, такожде да бꙋдꙋ невѣрьници и враговѣ нашемꙋ градꙋ Дюбровьникꙋ; ако ли кьто ѡдь сихь прѣписанихь или вьси ѡбратеть се свѣтомꙋ ти царьствꙋ, и прѣславьно ти царьство приметь ихь вь приѣтельство, а ми да е имамо за приѣтеле. ако ли Ꙋрошь или некто ѡдь прѣписанихь рода его бꙋдеть врагь нашемоꙋ градꙋ Дюбровьникꙋ, бꙋдеть врагь свѣтомꙋ ти царьствꙋ; ако ли кьто ѡдь прѣписанехь бꙋдеть приѣтель градꙋ дюбровьчкомꙋ, високо твое царьство да га има за приѣтела. и аще богь поможеть свѣтомꙋ ти царьствꙋ исьпꙋдити врага твога и нашега Ꙋроша ись срьпьске земле и брата его Владислава и родь ихь или дрꙋзи властеле, и приб(ѣ)гьнꙋ градꙋ Дюбровьникꙋ, ми да ихь не примемо ни рѣчи ихь, кьте да имь пакостимо, колико можемо. и свѣто ти царьство да не створить мирь безь нась сь Ꙋрошемь и нась сьш-нимь не пустити безь мира, и паче да будемо св6тимь с твоимь царьствомь врьху Уроша врага твога и нашега и врьху вьсега свога рода и врьху 1нога, кои би биль после на еговь столь, и рать и мирь да и(ма)мо сьш-ними на етьно вь животь свѣтого ти царьства и нашь. и свѣтомꙋ твомꙋ царьствꙋ дамо помокь прокь мочи нашеи по поморью, по морꙋ и по сꙋхꙋ; и ако богь поможе твоемꙋ свѣтомꙋ царьствꙋ, и примешь рашькꙋ землꙋ с ꙋсеми придели, и намь богь да помокь приети вьсе граде или костеле, ере сꙋ поморьске, и пристое рашькомꙋ столꙋ, да ихь придамо свѣтомꙋ твомꙋ царьствꙋ добромь веровь, безь пропаства или ѡномꙋ чловѣкꙋ, кои би послань свѣтого ти царьства, проквь мочи нашеи. и кида ми вьвемо, ере твое свѣто царьство вьлезе вь срьпьскꙋ землꙋ, а ми да се вьготовимо наивече за дьвѣ неделе, ѡдь кова ми чꙋемо, с ꙋсомь нашомь силомь и мокью, и да поидемо по морꙋ врьхꙋ граде поморьске и земле се ѡнеми лꙋдьи, кои се ѡбрѣтꙋ то време вь градь дюбровьчьки, расьвѣ да ѡставимо толикози лꙋдьи, колиго да могꙋ чꙋвати града дюбровь(ч)кога. и ако Ꙋрошь или брать его Влалиславь или кьто ѡдь рода того или властелинь би хьтель хабити или би исьхабиль намь, а твое свѣто царьство да ни помага проквь свою мокь врьхь ихь, и да имь исьхабишь. людье и кꙋпьци ѡдь свѣтога свѣтога ти царьства и ѡдь зета ти свѣтога царьства Петра севастократора и добиткь имь ако придеть вь нашь градь Дюбровьникь, да бꙋдꙋть спасени и варовани вь Дюбро(вь)никь и вь прѣдель его ѣко и сами дюбровькане, и да стоеть вь Дюбровникь на свою си волꙋ, и створеть свои трьгь продаваюке и кꙋпꙋюке безь вьсакое данье и безь вьсакое пакости, и да имь се не везьметь никоре данье ни на вратехь ни на мосте ни на броде ни на пꙋти, и паче да си кꙋпꙋю вьсаки трьгь, кои имь ѥ на потребꙋ, злато, сребро, свите и златьне поставѣ или ино, що имь ѥ годѣ, расьвѣ пьшенице, кою да не исьносеть ись града дюбровьчкога безь повеленьѣ кнеза, кои би биль по врѣмене вь кнежьство дюбровьчько; такоде и лꙋдьѥ и кꙋпьци прѣславьнога града Дюбровьника, еже приходеть вь земле светога ти царьства и вь земле зете светого ти царьство Петра севастократора, да си кꙋпꙋють и продають своботьно вь прѣписанехь землехь безь пакости вьсакꙋ кꙋпью на волꙋ ихь, и да имь се не везьметь кꙋмерекь ни никире данье ни вь граде ни на сьборе ни вь селѣхь кꙋпьцемь ни на мосте ни на рѣкахь ни на пꙋтехь, кьте да бꙋдꙋ своботьни на вьсако место, и стоеть и поидуть на ихь хьтенье, и да се се ѡбрате, и да бꙋдꙋ спасени и стрежени вь телахь и добитькь ихь. и аще клꙋчить сьмрьть некомꙋ чловѣкꙋ или кꙋпьцꙋ ѡдь твого светого ти царьства или чловѣкꙋ или кꙋпьцꙋ Петра високого севастократора вь кнежьство дюбровьчьско или сь езикомь или безь езика, и да бꙋдеть безь дрꙋжине, да бесь добиткь ѡнога мьрьца чинимо написати, и екьда твое свето царьство за ихь пошлеть свое книге, да дамо, а добиткь ѡнога мьрьца ѡдь нась да не погибьне нищоре; такожде людемь и кꙋпьц(е)мь дюбровьчькимь годить се сьмьрьть или сь ѥзикомь или безь езика вь землахь светога ти царьства и вь землахь високого севастократора господина Петра, а дрꙋжинꙋ си не бихꙋ имели, добитке ѡнога мьрьца бꙋдꙋть спасена, за твое свѣтое царьство да се прѣдаде ѡномꙋ, кои за добиткь прѣписань мьрьца сь книгами господина кнеза дюбровьчькога би биль послань. и ако людье светого ти царьства или Петрови високого севастократора имꙋть иськати некою правину врьхь кога годе чловѣка кнежьства дюбровьчькога, да ми будемо дрьжани ѡнемь чинити правину безь сутьбине и безь даньѣ по законꙋ нашемꙋ сьврьшенꙋ правьдꙋ, и такоде правьда да бꙋде нашимь людьмь вь землахь светого ти царьства и Петровехь севастократора по ваше свѣто царьство и по високого севасто Петра безь никире данье и безь сꙋтьбине. никоре емьство да не медꙋ свѣтомꙋ царьствꙋ и нась, до кьде се не сꙋди вь правьдꙋ. и ѣко богь поможеть свѣтомꙋ ти царьствꙋ, и приметь земле срьпьске, да си имамо ѡньзи стари законь сьшь н(и)ми, кои е имель имашь градь Дюбровьникь, и да стоимо с ꙋсеми земли и гради срьпьске и поморьске вь ѡнехь законехь, кое смо имели сьшь (ни)ми прѣжде годищь петь на десете, кои сꙋ исьшьли досева. и ако богь поможеть свѣтомꙋ ти царьствꙋ, и бꙋдешь господинь в ꙋсеи земле срьпьске, да не кьто зли людье медꙋ свѣтомꙋ ти царьствꙋ и медꙋ нашь градь ꙋложе злеть, паче да любвь вьсеге ѡдь добро на побольше расти земле и села и дрьжавѣ ѡдь земле и сь сꙋха и ѡдь села и дрьжавѣ, ѡдь ѡнехь земле и ѡдь ѡнехь сель и дрьжавѣ, кое господь богь помагаеть, те брьзо хоте бити прѣдани прѣдане твомꙋ велиствꙋ, хокемо е бележити. а прѣписане дединѣ наше земле и села и дрьжавѣ начинають ѡдь црькве свѣтого Геѡрьгиѣ врьхь стари градь Епитаврь, иже идꙋть до црькве свѣтого Петра, а ѡдь црькве свѣтого Петра идꙋть до црькви свѣтого Пократа, а ѡдь црькви свѣтого Пократа, како дрьже горьре врьхь Белома, и слезꙋть до млинехь, а ѡдь млинехь, како дрьжꙋть горьре, кое гредꙋть врьхь Жьрьновьницѣ дери до Влащице, а ѡдь Влащице, како дрьжеть горьре, кое сꙋть врьхь Шꙋметь, и гредꙋть до Ѡка, а ѡдь ѡне стране Ѡка, како дрьжеть горьре, кое сꙋ врьхь Рѣкꙋ, и сьтетьгьнꙋть се дери до горьре, кое сꙋ врьхь Корила, а ѡдь Корила, како дрьже горьре, кое сꙋ врьхь Затонь и врьхь Полице и врьхь ѠРашьць и сьстегьнеть се до црькви свѣте Тькьле: и вьсе меде ѡдь прѣписанехь земле и села и дрьжавѣ ѡдь врьхе ѡдь вьсе прѣписанѣ горьре слезꙋть до мора, вьсе сꙋ наше дединѣ. и ѡноньзи законь, коне есть ѡдь кꙋмерекь сольски медꙋ краль срьпьски и градь дюбровьчки, да дрьжи свѣто ти царьство, а вѣдомо, де ѡдь вьсе соли, коѣ се продае, не вече лꙋдьмь рашькимь половина ѡдь добитьѣ да има свѣто ти царьство, а дрꙋгꙋ половинꙋ да има ѡпькина дюбровьчька, како било вь стари законь; и свѣто ти царьств да дрьжи намь стари законь, а вѣдомо, ѡдь рѣке дриньске до Неретьвѣ кꙋмерекь сольски да несть на ино место расьвѣ вь Дюбровьникь. и ако богь поможе свѣтомꙋ ти царьствꙋ приети вьсе граде поморьске, наша мати свѣтаѣ црьква, мати вьсемь нашимь црьквамь, да си дрьжи то, що е дрьжала по вьсехь градовѣхь или по сꙋхꙋ или пискꙋпье или манастире или црькви или попови или инꙋ некою правьдꙋ, кою е имела ѡдь старихь врѣменехь, да си има своботьно, ѣко е писано вь старихь книгахь брѣвѣлеги. а ми вьса ѡпькина града нашега Дюбровьника, мали и велици, да смо држани чинити клети вьсе кнезовѣ, ки бꙋдꙋть по врѣменехь вь Дюбровьникь по хьтенью славьнога дꙋжа бенетекькога, дрьжати си ѡбьть вь врѣме свога кнежьства, кида се кльне вь кнежьство дюбровьчьк. и ако ми прѣстꙋпимо сию клетьвꙋ и си ѡбьть, да ни сꙋди богь и сиѣ клетьва и на семь свѣте и на ѡномь, и ми и дѣтьца наша да и(ма)мо везанье и гневь ѡдь високога папѣ римьскога ꙋ векь, и ꙋсе сие приписанье да имамо и хокемо дрьжати спасающе клетьвѣ и почьсть и слꙋжбе, кое смо дрьжани чинити господинꙋ дꙋжꙋ и ѡпькинѣ бенетьчкои, доклꙋ бꙋде свѣто ти царьство и ми. и да сиѥ обьтьтованье и сие писанье дрьжить повещꙋ потверьденье, запечакено ѥсть печатью ѡпькиньскомь и славьнога Марьсилиѣ Геѡрьгиѣ, кнеза нашега града Дюбровьника. а сиѣ сꙋть имена ѡнехь, ки се сꙋ клели, да бꙋде сиѥ обьтьтованье тверьдо и крепько, прьво: славьни властелинь господинь Марьсили Геѡрьги, кнезь дюбровьчки. сꙋдье: Бꙋбаньна Петровикь, Доброна Ломьприликь, Фосько Слабикь, Матеѣ Болачикь, Поськали Крꙋсикь. вѣкьници ѡдь малога веча: Ѣковь Негомирикь, Добр(о)славь Раненикь, Волькась Иваникь, Петрь Матевовикь, Марьгарить Стилевикь, Грьгꙋрь Петроникь. ѡдь вѣка оумолена: Грꙋбеша Гꙋдꙋликь, Михоило Пеженикь, Теѡдрь Бꙋдачикь, Коленьда Чрьнешикь, Аньдреѣ Волькевикь, Чрьне Витоникь. висьѣрье ѡпькиньски: Димитри Меньчетькь, Пальма Пикꙋраревикь, Коленьда Ломьпиновикь. прьци опькинь(с)ки: Гоиславь Крꙋсикь, Петрь Жꙋна Богьданика, Жꙋнь Раненикь. прьци градьци: Никꙋлица Пичинеж(и)кь, Петрь Сречикь. ки дрьже добитекь свѣте богородице: Паска Градикь, Вали Проклечикь. векьници ѡдь вельега веча: Врьсаико Проданьчикь, Марикь Чимикь, Барьби Крꙋсикь, Петрь Маньгеровикь, Маринь Хобꙋжикь, Рꙋсинь Петров(и)кь, Алекьси Чрьнеловикь, Михоило Кьтꙋньчикь, Вита Доброславикь, Меньгача Ломьприкь, Вита Гетальдикь, Михоило Биньчꙋликь, Герьваси Бочиньчикь, Филипо Мовьврѣшикь, Михоило Маинеревикь, Петрь Ганьгꙋликь, Богьдань Пежиновикь, Петрь Крꙋсикь, Рꙋсинь Бельчикь, Матиѣ Донатевикь, Маринь Пикꙋраревикь, Клименьто Мерьнꙋхь, Басили Прибавикь, Маринь Биньчꙋликь, Петрона Бꙋньдикь, Прꙋгль Донатевикь, Марьтинь Сачибабикь, Аньдреѣ Чревикь, Прꙋгль Михоликь, Петрь Карьнизикь, Петрь Мачиневикь, Паська Чипоникь, Пальма Гачикь, Маринь Вилань, Власи Нарикликь, Петрона Добровикь, Дамиѣнь Бочиньчикь, Жꙋнь Чревикь, Жꙋнь Зрьзовикь, Власи Чанькиникь, Петрь Чаканикь, Пологринь Визоликь, Аньдрѣа Ноборикь, Аньдрѣа Гоиславикь, Жꙋнь Болеславикь, Вита Барьборикь, Матевь Верестовикь, Матиѣ Растикь, Филипо Пичинежькь, Жꙋнь Пикꙋраревикь, Михоило Розиновикь, Павьло ѡдь кнеза Маижалека, Аньдрѣа Бенешикь, Никꙋлица Марьтинꙋжикь, Сосень Вита ѡдь Чрьнете, Жꙋнь Больчвикь, Жꙋнь Гледикь, Пальма Максикь. Маринь Челпа, Никꙋла Церьевикь, Власи Рꙋсиновикь, Геѡрьги ѡдь кнеза Трипꙋна, Трипꙋнь ѡдь кнеза Юде, Ломьприжикь, Моврѣшкь, Маринь Гамикь и Валица, Павль Болеславикь, Михоиль Силивѣстровкь, Павль Сарачикь, Михоило Марькꙋшикь, Бочинь Прасетикь, Маринь Кисоникь. и врьхь вьсе ѡво писанье Марьтоль Гꙋлеривикь бань ѡдь кнеза дюбровчкога и ѡдь вьсе ѡпькине града дюбровьчькога, с хотеньемь господина кнеха дюбровьчкога и вьсехь властель дюбровь(чкихь) сьвономь звонивьше на сьборе, ѣко е по законꙋ дюбровь(ч)комꙋ, врьхь дꙋше свое и вьсе ѡпькине дюбровьчьке си ѡбьть потверьдиль дрьжати и клель се.

† Сиѥ моѥ повелѣниѥ пише кралевьство ми любовьномꙋ си присьномꙋ кнезꙋ дꙋбровьчьскомꙋ Марцѣлꙋ Геѡрьгию и вьс(ѣ)мь властеломь и вьсѣи ѡпькинѣ градьскои, ꙗкоре ѡдь сего дьне ·гі· авьгꙋста до сꙋда, кои поставьламо по законꙋ наши прьви, да си ходе ваши кꙋпьци по моѥ ѡбласти свободьно никомьре зло неврегѣни, и паче ако си хоте ити ꙋ тꙋгꙋ землꙋ с кꙋплами своими, да си идꙋ никимре ꙋбраненомь, не прѣге да гредꙋ на трьге кралевьства ми и подавьше доходекь господьски ни, тамѡ же да ходе по земламь продаюкѣ. ако ли си кьто ѡнехь ꙋзлюби стати близа ради или на Сѣници или гдѣ, да си стане, и винꙋ да даю доходькь господьски. кто ли се ѡбрѣте преслꙋшавь повѣленѥ кралевьства ми, да се накаже гневомь наказаниемь кралевьства ми; ѡбрете ли сѣ кто ѡть нихь трьговьцѣ нь шедь на трьгѣ, или где годе ставь, нь давь ꙋреченога доходька кралевьства ми, да имь сѣ ꙋземлѣ кꙋплꙗ, како ѥ и прѣги нꙋземано нь шедьшимь на трьге господьске. не ꙋчине ли ми правьдѣ, и приврьжѣ имь клетьвꙋ мои властелинь, кои хоке бити на сꙋдѣ, и ꙋрече имь ꙋрокь, такьци ꙋрокь, како бꙋде мокно и кꙋпьцемь ꙋзьвратити сѣ ꙋ градь ихь свободьно сь свѣми своими правьдами: ако ли се кто ѡбрете прѣзь ꙋрокь или ꙋ мое ѡбласти или ꙋ тꙋгеи земле, да имь се кꙋплиꙗ ꙋзме. ꙋчине ли ми правьдꙋ, и ꙋсьхоте имати чьсть кралевьствꙋ ми, како сꙋ имали господинꙋ ѡтьцꙋ, како ми се сꙋ ѡбѣкали, и подаде ми, що ми сꙋ си ихь властелѣ ѡбетовали: брать Аньдреи и своимь си братомь Соломонь и Тꙋдорь Бꙋдачикь и Петрь Жꙋнь Богьданикь, да стою к нимь ꙋ томь ѡбетѣ, коимь имь (с)мь се клель прѣгнемꙋ кнезꙋ Жань Михаилꙋ и ꙋ сегашьнемь потверьгение, до колѣ ѡни начнꙋ кь мнѣ стоꙗти ꙋ правовѣрнои вере. и сиѥ моѥ повелѣние да имь бꙋде ꙋтвергениѥ.

Стефань Ꙋрошь по милости.

† Ꙗ Стефань Ꙋрошь, с помокию божиѡвь краль вьсе срьбске земле и поморьске, ѡбѣтꙋю се присьномꙋ си кнезꙋ дꙋбровьчькомꙋ Златꙋ Аньдрѣи и вьсѣмь властеломь дꙋбровьчькимь и вьсѣи ѡбкинѣ градьскои ꙋ господа бога вседрьжитела и ꙋ прѣчистꙋю его матерь и ꙋ свети и чьстьни животворещи крьсть господьнь и ꙋ света божиꙗ еваньгелиꙗ и ꙋ вьсе свете богꙋ ꙋгодивьше ѡдь вѣка, ꙗко земле и винограде, що сте дрьжали до ꙋмрьтиꙗ господина ми ѡтьца, да си ю дрьжите, а по тола що се наиде посагено виноградми или земле приемьше, да се сꙋдомь исьправи, да що сꙋдь каже кралевьствꙋ ми, бꙋди кралевьствꙋ ми, и що вамь покаже, то вамь. сꙋдь да стае ѡдь михоилꙗ дьне до гюрьгева дьне, кьди ви бꙋде трѣбе. и сꙋдь да стае, грѣ е и преге стоꙗль ꙋ дьни господина ми ѡтьца. сꙋдьце обое да се кльнꙋ, ꙗко да право сꙋдѣ. кꙋмерька аке постави кралевьство ми, да стои ꙋ законѣ ѡтьчинѣ ми. и ако се коѣ годѣ кривина чини мегю людми кралевьства ми и мегю люди вашими, да се сꙋдомь исьправьла. воиска кралевьства ми гдѣ любо находи люди ваше или сь трьгомь или бесь трьга, да имь никоегаре зла не ꙋчини. сь гради кралевьства ми да си живѣте ꙋ законѣ, како сте жили ꙋ дьни господина ми ѡтьца. и ако се ѡбрѣте чловѣкь земле кралевьства ми ѡсꙋгень вашемꙋ чловѣкꙋ, да сꙋ сое сꙋдьце издаю добитьке; ако ли мꙋ добитька не стече, а ѡни да подаю кривьца самога до ꙋрока, до коле сꙋдьце ꙋрекꙋ; ако ли га сꙋдьце не исьдаде, да где ми правьда ꙋкаже ꙋзети те дьльгь, да га ꙋзме кралевьство ми, и да га постави, где га бꙋде право поставити. и да ви дрьжи кралевьство ми ꙋ чти, како ви е дрьжаль господинь ми ѡтьць, нь ако и ви начнете стоꙗти кралевьствꙋ ми, како сте стоꙗли господинꙋ ми ѡдьцꙋ. и аке кто прибегне ѡть вась ꙋ землꙋ кралевьствꙋ ми, да не исьпакости вамь ничто, стое ꙋ землꙋ кралевьства ми. трьжьници ваши да гредꙋ на Брьсково; и давьше десетькь ѡдь соли, и по тола да си гредꙋ кралевьства ми скрозѣ мою землꙋ свободьно, а да ви се не ꙋземле ничьто, и да гредꙋ сь велимь трьгомь на трьге кралевьства ми, емьше ѡдь кавада дори до свиль; а що е мала кꙋпла, да си ю продаю по земли кралевьства ми ходеке свободьно. а дрꙋгомꙋ пришьдьшꙋмꙋ кь вамь кнезꙋ конь тога кнеза, да стою винꙋ кь вамь ꙋ сиемь ѡбѣтѣ, до колѣ ми и ви стоите ꙋ томь ѡбѣтѣ, ꙋ что се сте ѡбекали кралевьствꙋ ми. ꙗко хоке сие схранити кралевьство ми, тако да ме богь схрани ꙋ си вѣкь и ꙋ придꙋщи. вь лѣто ·҂ѕѱѯв· еньдиктиѡнь ·ві·, мѣсеца агꙋста ·кг· ꙋтврьждено би сие мое ѡбетание прѣдь арьхи(епи)скꙋпомь и предь кнезомь Гюрьгемь и прѣдь жꙋпань Стефань.

Стефань Ꙋрошь с помоки божиѡвь краль вьсеи рашькѣи земли и поморьске.

И сие обекание бьи господина кралꙗ прѣдь Михоиломь Пѣженикемь и прѣдь Петромь Матеикемь и предь Андрѣемь Чрѣвикемь.

Въ царьство благовѣрнаго цара грьчьскаго курь Михаила Палеолога въ третїе лѣто, егда прѣѥ Цариградь оть латинь, и царьствоующоу ѥмоу вьсточными странами и западнїими, а нашемоу господиноу, въноукоу светаго Сⷹумеона и прьвовѣнчаннаго кралꙗ Стефана младѣишомоу сынꙋ его въ всеи братїи своеи, ꙗкоже и дѣдꙋ его Немани бывшꙋ младѣишемоу въ братїи своеи, нъ того молитвами и благословенїемь светымь прѣболшемоу и прѣвысокомоу кралю Стефаноу Оурошꙋ и по благословенїю светаго Сумеона прѣдрьжещꙋ емоу прѣстоль дѣдовь и отьчинь, самодрьжавно владычьствꙋющꙋ емоу въсѣми срьбьскыми землꙗми и поморьскыми, и прѣосвещеннаго прьваго архїепископа Савы прѣдрьжещомꙋ прѣстоль такожде въноукꙋ светаго Сумеона прѣосвещеннаго втораго Савѣ, третїемꙋ же архїепископꙋ срьбьскыхь земль, при блаженнѣмь и прѣподобнѣмь отьци нашемь протѣ светогорьсцѣмь курь Арсенїи и при прѣподобнѣмь отьци нашемь курь Еустаѳїи, игоуменꙋ хиландарскые лавры, въ дни же тѣхь светыхь моужїи и по лѣтѣхь мнозѣхь племенѣ светаго Сумеона третїемоу родꙋ състарѣющꙋ се, а четврьтомꙋ въ воиньство въстꙋпающꙋ, благовѣрномꙋ же кралю нашемꙋ съ всѣми сими прѣдреченны монастырь Светые Горы прѣдрьжещꙋ и прилежно подвизающꙋ се о нѥмь и недостаткы родитель своихь испльнꙗе и выше великаго монастыра въ горѣ създа стльпь, идеже живе посѣтитель доушь светыхь отьць живꙋщихь въ светѣмь мѣстѣ томь, въ дни же того христолюбца за великое благовѣрїе его и за любовь его, юже имать кь Христоу богоу и къ прѣчистѣи его матери и къ светымь родителѥмь его, въ роукотвореннѣмь его стльпꙋ живꙋщꙋ нѣкоемꙋ чрьнцꙋ, и прѣдрьжещоу правило дꙋховное светыхь отьць живꙋщїихь въ светѣмь монастыри того прѣосвещеннаго прьваго Савы послѣднѥмꙋ оученикꙋ Дометїанꙋ їеромонахꙋ, Христось истинны богь ис-прьва царьствꙋеи въ вѣкы и на вѣкы и на нась прѣсветымь доухомь своимь обьꙗви емоу житїе прѣподобнаго отьца нашего Сумеона дѣтелїю светаго доуха, и того светаго изволенїемь тѣмь прѣписано бысть въ Светѣи Горѣ въ монастыри лавры халандарскои в҆ стльпѣ светаго прѣображенїа спасова, и господемь богомь и прѣчистою его матерїю и молитвами светаго и прѣподобнаго отьца нашего Сумеона сїа книга на благословенїе послана емоу оть Светыѥ Горы въ срьбскоую землю. господоу же нашемоу Ісу Христоу слава, чьсть и безначелїе въ бесконьчные вѣкы. аминь.

† Лꙋбовьномꙋ ми приѣтелꙋ кралевьства ми кнезꙋ дꙋбровьчьскомꙋ, Жань Кꙋринꙋ, и вьсои опькинѣ градьскои. ере ми сте писали за соль за калꙋгеровꙋ за Никоновꙋ, како е ꙋ Климе Ньрке вь рꙋцѣ, то ви знате добрѣ, мои кꙋмѣрькь и Никоновь нѣ сталь ꙋ-нои рꙋцѣ, лише ꙋ ваше ѡпькинѣ, да ꙋ томь ми се изложьни не чините, нь ако кога чꙋете крива, а ви ми ꙋзьмьше подаите или соль или злато, и не мозите мꙋ никакоре сьмести, нь мꙋ прѣдаите или соль или злато, дѣ ви знате, ере ѣ не кꙋ пореки инмꙋ мое рѣчи а не тькмо Никонꙋ. богь ви даи здравие.

Стефань Ꙋрошь краль все србске земле.

Вь име ѡтьца и сына и светаго доуха и свете (Мариѥ) богородице и светыхь и врховнихь апостоль. милостию божиѡвь ѥпискоупь с..тв..и Теѡфить сьздахь храмь сиї вь ѡбласть светаго Михаила вь дни благочьстиваго и богомь дрьжавнаго и светороднаго господина кралꙗ Стѣфана Оуроша, сына прьвовѣнчаннаго кралꙗ Стѣфана, вноука светаго Симеѡна Немане. Вь лѣто ·҂ѕѱ(о)з· индиктиѡнь ·ві·

† Да есть вѣдомо всакомоу. створи милость кралевьство ми доубровьчькимь властеломь и всои опьщинѣ малимь и велицѣмь, како имь е биль створиль брать ми, краль Степань, милость, по томоужде образоу и кралевьство ми створи имь милость, до колѣ правдоу имоуть имѣти кралевьствоу ми, коупьци ихь да си ходе по земли кралевьства ми без боꙗзни и бе-з-абаве сь всакомь свободомь, а ѡни да даю ѡдь града кралевьствоу ми на всако годище двѣ тисоуки перьперь на дмитровь дьнь. и ꙗко що сьгрѣше кралевьствоу ми, да се соудомь исправламо. како е по законоу; ако ли соуда не боуде сьврьшение, ихь коупьци кои боудоуть оу земли кралевьства ми, да имь есть рокь за три мѣсеце, да си изидоуть сь всѣмь своимь добитькомь, и даю имь милость до живота моего.

Стефань Оурошь по милости божи краль и с богомь самодрьжьць срьпские земли и поморьские.

† Да ѥ свѣдомо всакомꙋ. створи милость кралевьство ми градю и кнезꙋ и всои ѡпкинѣ града дꙋбровьчкога и трьговьцемь, кои ходе вьсꙋдѣ по земли кралевьства ми, кьди доходи Грꙋбеша и Никꙋла поклисарь на степань дьнь на Дльго Поле, и сию милость имь да господинь краль, да сꙋ на законѣ, що имь ѥ даль свето почивьши господинь ми ѡтьць. да имь нѣ ꙋдаве ꙋ комь годѣ дльгꙋ, лише сꙋдомь да се ищꙋ, да ѥ ѥдьнь срьблинь а дрꙋги дꙋбровьчанинь. аке бꙋде пра сь сасиномь, да бꙋде ѥднь сасинь а дрꙋги дꙋбровьчанинь, прѣдь тѣми да се распралаю. тко ли прѣслꙋша писаниѥ кралевьства ми, да приме гнѣвь и наказаниѥ ѡть кралевьства ми, и да плати кралевьствꙋ ми ·е҃· сьть перьперь, и да ѥ кривь, ꙋ чемь при.

Стефань Ꙋрошь милостию божиѥю краль всѣхь срьпскихь земль и поморскыхь.

† Пише кралевьство ми, да ѥ вѣдомо всакомꙋ. створи милость кралевьство ми градꙋ Дꙋбровьникꙋ, да приходе ихь трьговци по земли и по трьговѣхь кралевьства ми, и да не ходе на воискꙋ, и ни ѥднь чловѣкь ꙋ срьпьскои земли маль же и великь да не ꙋдаѥ ꙋ ꙋдавꙋ дꙋбровьчанина, и да имь се кони подь ризьницꙋ не ꙋзимаю ни на кою работꙋ, и да имь не намѣтꙋѥ безь волѥ месо кꙋпити или браве или свиниѥ или кралево или чие годѣ, ни малꙋ ни великꙋ кꙋплю, развѣ кьди се хоке кралево месо продати, да се зарꙋчи по вьсемꙋ трьгꙋ, да не продаю ни кꙋпꙋю меса, до колѣ се кралево прода, и да имь се не ꙋзима по силѣ ни скрьлато ни медь ни мꙋка ни коꙗ кꙋплꙗ; и кꙋке да имь се не печате ни ѡть кралꙗ ни ѡть властель. и како имь ѥ законь ꙋ Брьсковѣ ѡть ис-прьва, тако да имь ѥ ꙋ Рꙋдницѣ, а инога новаго закона да имь не постави кралевьство ми. и ꙋ кога се ѡбрѣте лꙋдь ѡтрокь, тере що комꙋ испакости, да ꙋ томь господара не ищꙋ, нь да снищꙋ кривца. ако ли крьвь ꙋчини дѣтикь, да га пода господарь; ако ли га не пода, да плати господарь враждꙋ, како и саси плакꙗю; и да си ходе свободно по земли и по трьгохь кралевьства ми; да при коимь ихь селѣ чтета наиде, да плати село ближнѥ; ако село не плати, да плати кралевьство ми; и града да не работаю, ни га блюдꙋ; и ако се ѡбрѣте кои дльгь междꙋ срьблиномь сь дꙋбровьчаниномь, да имь ѥ сꙋдь прѣдь сꙋдиѡмь срьбскимь и прѣдь ѥднѣмь дꙋбровчаниномь, и що сꙋдита, този да ѥ сврьшено; а прѣдь кралевьство ми да идꙋ за невѣрꙋ, за враждꙋ, за челꙗдина, за конь, ꙋ томь да ѥ сꙋдь дꙋбровчанинꙋ прѣдь кралевьствомь ми; и кꙋпци, що несꙋ кꙋплю, ако растовари ꙋ Брьсковѣ, да плати царинꙋ; ако ли мимо несе, да где прода, тꙋ и царинꙋ да плати; и ако кто пакости виноградомь дꙋбровьчкимь, да га позовꙋ прѣдь кралевьство ми: да що се ѡбрѣте кривь, да дасть кралевьство ми, чловѣка да издасть; да аке не да, да плати кралевьство ми; и ѥще да ихь дрьжи кралевьство ми на томь законѣ, кои сꙋ имали ꙋ свето почившега господина ѡтьца кралевьства ми, да ходе свободно по земли кралевьства ми. и сию милость створи кралевьство ми ꙋ Врьхьлаби, кьди приходи кралевьствꙋ ми поклисарь ѡть Дꙋбровьника Никола Крꙋсикь и Биньчꙋла Фосковикь. и сиѥ се писаниѥ створи на крьстовь дьнь вь свѣдѣниѥ всакомꙋ.

† Стефань Ꙋрѡшь краль. †

† Да е вѣ҆домо всакомꙋ. створи милость кралевьство ми трьговцемь дꙋбровьчькимь, да ходе по земли кралевьства ми свободьно, а никто да имь не испакости нища, ни имь забави нища; а кои кꙋпци гредꙋ мимо Брьсково, а не сьвракаю се ꙋ Брьсково, да имь никто не име забавлати ни на нихь трѣбовати чеса; кто ли се обрѣте испакостивь имь или що ꙋзьмь одь нихь, да приме гнѣвь и наказание оть кралевьства ми, и да плати петь сьть перперь кралевьствꙋ ми.

Стефань Ꙋрѡшь краль српски.

Кралевьства ми любвномꙋ жꙋпанꙋ Тврьтькꙋ. знаши, како е ꙋзето Ꙋрьсетеви дрѣво и з добиткомь, да много писа кралевство ми кнезꙋ дꙋбровчкомꙋ и всѣмь дꙋбровчамь, да тамо посила кралевство ми Ꙋрсете, да тако ти моега живота и мое любве, кто ти излазе тꙋдѣзи по работахь по своихь си, како можь, ѡнози ꙋзми на нихь, и подаи Ꙋрсетеви: а кои ти гредꙋ на трьгь кралевьства ми, нѣмаи за не печали, и да види кралевство ми. како ми сврьшити хекеши сизи посьль. ере смо ѡгрѣшиои ꙋ семьзи чловѣцѣ, да ѡсвети га.

Стефань Ꙋрѡшь краль.

† Кнезꙋ дꙋбровьчьскомꙋ и вьсѣмь властелемь и сꙋдьцамь и вьсѣи ѡбькинѣ дꙋбровьчьскои ѡдь кнеза Ђꙋре много поклонение. вы вѣсте, властеле, кьда на ны подꙋ дрѣва заморьска и бьнетьчьска на нашь градь, тьда ваша дрѣва польгь нихь гредꙋ на ны, и мы ꙋ томь нѣмамо гнѣва на вы. да сьда сꙋ ходили мои жꙋплане, ке е даль краль Владиславь мьнѣ и моеи женѣ а своеи кькери, прѣдь вашь градь по заповѣди крала Ꙋроша, да молꙋ кнеза вашега и вась, како да бисте ꙋ томь не зьледовали, како и мы не зьледꙋемо вась, кьда гредете на нашь градь, да молите кнеза вашега, како бимь рꙋкꙋ даль, и сь вами да би сѣдѣли не боеке се; ако ли имь хокете кою пакость ꙋчинити и чькетꙋ, то (и)мь нѣ чините, дѣ ихь е чькета моѣ и корысть ихь моѣ; и молꙋ кнеза вашега, како би ꙋписаль, что е егова вола и ваша, да би ми ꙋдаль по сихь послѣхь. это ти греде ѡтрокь кнеза Ѡзора, именемь Братославь, сь потьникомь кь кнезꙋ вашемꙋ, и чтѡ говори ѡтрокь кнеза Ѡзора, ымѣте мꙋ вѣрꙋ, како самомꙋ Ѡзорꙋ, дѣ мꙋ сꙋ ѡтет.........е гредꙋке кь вамь.

† Пише кралевьство ми кнезꙋ дꙋбровьчскомꙋ Николѣ Маврижинꙋ и сꙋдиꙗмь и вѣкьникомь и властеломь и всои ѡбщинѣ дꙋбровьчьскои. како сте послали кралевьствꙋ ми властеле ваше, придоше Зрьзь и Грꙋбѣша, какѡ се сврьшило бѣше врѣме ꙋстрою петь годищь, какѡ сте были ꙋговорили сь кралевьствомь ми, да ѡдь селѣ и напрѣдь кралевьство ми чини милость властеломь дꙋбровьчьскимь и ѡбьщинѣ и трьжникомь ихь, да имь е мирь, кои е и прьво имь быль, доклꙋ живꙋ право сь кралевьствомь ми. акѡ ли що погрѣше земли кралевьства ми, и не исправе ми се, да имь се да вѣдѣние трьми мѣсеци, ꙗко си могꙋ трьжьници ихь ѡтити ꙋ градь сь всѣмь своимь. а да даю кралевьствꙋ ми на годище двѣ тисꙋщи перьперь. и семꙋзи мирꙋ не ꙋрече кралевьство ми ꙋрока, доклꙋ хоке быти, нь ако ми не сьгрѣше, и до живота моега, да си имаю сизи мирь, и сизи двѣ тисꙋки да даю на дмитровь дьнь.

Стефань по милости божиеи краль србскихь земль и помѡрьскихь.

† Пише кралевьство ми, да е ведомо всакомꙋ. створи милость кралевьство ми градꙋ дꙋбровьчькомꙋ, що сꙋ дрьжали земле и виноградь и ѡраниꙗ ꙋ господина ми свето почившега ѡтьца ми, такожде имь створи милость кралевьство ми, да си дрьже и ꙋ кралевьства ми, а да имь не забаве ни ѡдь когаре. тько ли ѡбрѣте потворивь повеление кралевьства ми, и що имь забави, испакости, да приме гневь и наказание ѡдь кралевьства ми. а тꙋ имь милость створи кралевьство ми ꙋ Призрене ꙋ граде, а странь кралевьства ми беше слꙋга Драгославь и Бꙋдиславь Хвальчикь. а тꙋ имь милость ꙋчини кралевьство ми, кьди приде Лꙋкарь Михоиловикь и Пѣро Гоиславликь. а ꙋ то време беше кнезь ꙋ Дꙋбровьнице Маринь Жꙋрьжи.

Стефань Ꙋрѡшь краль.

Иже во свѧщеннꙋю и божественнꙋю сїю церковь съ вѣрою и любовїю пристꙋпающїи оуслышимъ свѧтаго пророка Давида вѣщающа дꙋхомъ свѧтымъ: кто взыдетъ на горꙋ господню неповиненъ рꙋкама и чистъ сердцемъ, сей прїиметъ благословенїе ѡтъ господа, и оузритъ неизреченнꙋю добротꙋ слави егѡ. иже оубо въ пѣнїихь и вѣснехъ дꙋховныхъ торжествꙋющїи, во свѣтлеишемъ храмѣ семъ, зрите здѣ красоты, небеси подобныѧ и неизреченнїѧ свѣтлости, свѧщеннимъ же подвигомъ и трезвенною молитвою ꙋмно просвѣщаемїи и ѡсїѧваемїи божественною благодатїю, радости многїѧ исполнени бывше, молитви возсилаите, да ꙋлꙋчимъ деснагѡ стоѧнїѧ божественныѧ троицы. иже благочетїѧ ревностїю движимїи, богоноснїи и преблаженнїи отцы наши ꙋчителы и наставницы всеѧ сербскїѧ землы, новыи муроточець Сумеѡнъ преподобный со возлюбленнымъ сыномъ своимъ Саввою, первымъ архїепископомъ всеѧ Сербїи, любовїю божественною разгарѧемїи, многимъ трꙋдомъ и потомъ воздвигоша ѡть основанїѧ церковъ во имѧ пресвѧтыѧ богородицы, въ мѣстѣ семъ, зовомомъ Хиландаръ. по времени же нынѣ, милостїю божїею прїиде и на мнѣ по наслѣдїю отечества ми сербское кралевство, мнѣ Стефанꙋ Ꙋрошꙋ, зетꙋ превысокагѡ самодержца імператора греческагѡ, царѧ Андроніка, тщащемꙋ сѧ множае ѡтъ прежде мене бывшихъ ѧже прародителеи и родителеи нашыхъ недокончаннаѧ исполнити, еликѡ бꙋдетъ хотѣнїе владыкы моегѡ Христа бога, церковъ ꙋбо тѣснꙋ сꙋщꙋю разорихъ, и сїю новꙋю воздвигохъ и подписахъ во имѧ пресвѧтыѧ владычицы нашеѧ богородицы и честнаго еѧ въведенїѧ. но, ѡ владычице, прїми ꙋбогое мое приношенїе, и моли сына твоего и бога нашего, да не лишитъ мене царства своегѡ. аминь. въ лѣто мїробытїѧ ·҂ѕѡа·

Древности же ради помрачившеи сѧ первои исторїи, нынѣ паки изволенїемъ ѡ Христѣ братства ѡбновихомъ новымъ живописанїемъ иждивенїемъ церковнымъ и нѣкоторыхъ ѡтъ братїи нашыхъ приложенїемъ. дарꙋи имъ, господи, жизны вѣчнїѧ прїѧти молитвами пресвѧтыѧ богородицы. аминъ. въ лѣто ѡтъ воплощенїѧ сына божїѧ ·҂аѡд·

Вь Христа бога благовѣрни Стефань Оурошь краль.

† Вь пространьствѣ божьствьныѥ силы небеснаго разоума беспльтныхь высоко пареще агьгельска и архагьгельска воиньства кивота завѣтнаго трапезы небеснаго хлѣба прїѥмьшии благовѣщению дивеще се, вьпльщенїа иже вь прѣсветѣи твоѥи оутробѣ не знающе, обаче видѣвьше, сь пастыри славословиѥ сьплетьше, аще и звѣздошьствию сь вльхвы чюдеще се, и младенць вь ꙗслехь вьзлежещь, милости, щедроть, чловѣколюбиꙗ, дѣвьства твоего, прѣчистаа владычице богородице, похвалы достоины принести не могоуть, грѣшнааго ꙋбо доуши и ськврьньны ꙋстны имоуща посрѣдѣ людїи, гдѣ такова богатьствиꙗ ѡбрѣсти, таковаго оупьваниꙗ и такиѥ надежде? не прїходещааго кь врачьствоу кто ꙋврачюѥть? гдѣ такова вида слѣпоу рожденоу, имаже такыѥ красоты дозрѣти, такыѥ доброты, такыѥ чистоты, паки же нечистѣи и ѡтьноудь ѡськврьненѣи ланитѣ похвалоу дѣвьства чистоты твоѥ изреднаа како речета? вь сихь же недостатьчьствоуѥ ѡкааньныи азь чтѡ створю? мнѣ достоиныѥ глаголы принесоу тебѣ богоматери, понѥже застоупница ѥси христїꙗномь и тихоѥ пристанище вльнꙗѥмымь боурею грѣховною, милостива ꙋбо и милостива господа рождешии, милостию си помилоуи и мене грѣшнааго, паче всѣхь сьгрѣшьша. вѣмь бѡ те светыѥ троице честь приѥмшоу и рождьшоу. нынꙗ ни ѡть грѣшьныхь чести подѣлиꙗ погнꙋшаи се мене грѣшнааго, ѥгоже изь прѣчистыѥ си оутроби породи, слѣпорожденыимь прозрѣниѥ дарова, сьмрьдещеѥ вьскрѣси; азь же вь послѣднꙗа врѣмена вь честь помилованиа твоего царьствиꙗ ѡстахь, тѣмьже не посрами чаꙗниꙗ моего, слѣпа роженьна ме просвѣти, сьмрьдеща ме вьскрѣси, да и ѡ мнѣ прославить се име твое светоѥ: сии ꙋюо вьсѣмь разоумѣти писа кралѥвьство ми, ꙗко хрїсовоуле, створеньныѥ дѣдомь и ѡтьцемь ми светѣи богородици ꙋ Светѣи Горѣ Хиланьдароу, вь нихьже села и власи и пашища ѡбрѣть кралѥвьство ми ѥдно потрено а дроуго изьгоублѥно, изистивь даньнаа прѣродителїи и родители кралѥвьства ми, ꙋписахь ꙋ хрїсовоуль сии. село Гюргевикь, Петровикь, Кроушево, Книна, Роубьчь, Потокь, Дрьстьникь, Гребникь, Говьнь, Дольць, Трьгь, Книньць, Петрьче, ѡбои Враники, Бѣличищи, Видѣнѥ. а оу тѣхь селѣхь два винограда, ѥдинь оу Кроушевѣ, а дроугы оу Пеки, Щоупѣль выше Пеки арьхїпискоупове, Захакь на Бистрици и на нѥмь оульꙗникь сь оульꙗрї. а имена имь: Добрько, брать моу Братославь, Браѥнь, Гноуса, и симь оульꙗремь да нѣ работе никоѥре ине, лише да соу оулиꙗрїе; и ꙗко нѣкоимь врѣменемь погине ꙋлиꙗникь, да го тїи ꙋлиꙗрїе ѡть себе поставлꙗю. а оу Призрѣнѣ села: Сламодраже, Непробище, Момоуша, ѡбѣ Хотьчи, долнꙗ и гонꙗ, и половина Добродолѣнїи, а дроуга половина свете богородице стоуденичьске; а половина винограда ꙋ Жельчищихь, а дроугаа половина свете богородице стоуденичьске; ꙋлиꙗникь ꙋ Трьновьци. ниже долиѥ Хотьче, а за нимь два ꙋлиꙗра ꙋ Моравицахь, Брѣзова и сь заселиꙗми ꙋ Лозницы, ꙋ Моравѣ виноградь, ꙋ Зетѣ половина Камениць сь людьми а именемь Домоушики, ꙋ Плавѣ село Досоугѥ и сь заселїꙗми, а се власи: кнезь Воихна сь дѣтию, зеть моу Прьвославь сь дѣтию, брать моу Станиславь, дроугыи Брьзотикь, Драгомирь сь дѣтию, сынь моу Боунило сь дѣтию, дроугы моу сынь Братань сь дѣтию, Прѣдимирь сь дѣтию, Шерьбань брать моу сь дѣтию, Нѣгославь сь дѣтию, брать моу Радь сь дѣтию. Десиславь сь дѣтию, Баило сь дѣтию, Драгославь сь дѣтию, Станило сь дѣтию, Ꙗрославь сь дѣтию, Радота сь дѣтию, Краиславь сь дѣтию. Воиславь брать моу, стриць моу Грьдоусь сь дѣтию, дроꙋгы моу стриць Воихна сь дѣтию и зеть моу, братоучедь моу Петралить сь дѣтию, Десимирꙗ сь дѣтию, Десиславь Грьдовикь сь дѣтию и сь сираки си, Мирѣнь, Братань, коѥ си ѥ изь Грькь довель, сыновь моу Гостимирь сь дѣтию, Хлапота сь дѣтию и сынь моу сь дѣтию, Храниславь сь дѣтию, Доудь сь дѣтию, Грьдь сь дѣтию, сестра Хранишина сь дѣтию, Ꙗнь сь дѣтию, трїе сынове Балиновики, Бобаꙗ сь дѣтию, ꙋдовица Таина, попь Бльгаринь сь дѣтию, Нѣгь сь дѣтию, Берїславь сь дѣтию, Доброта сь дѣтию, шоура моу Бачь сь дѣтию, брать моу Драгославь сь дѣтию, братиꙗ сь дѣтию, брать моу Добрьчинь сь дѣтию, Стань сь дѣтию, Братѡславь сь дѣтию, Добравь, Шерьбань, сынь моу, Нѣготикь, Балосинь, Воинь сь дѣтию, Станиславь сь дѣтию, Грьдь сь дѣтию, Хранило сь дѣтию, Коукорь сь дѣтию, Додь сь дѣтию, Десо сь дѣтию, Братомирь сь дѣтию, Воиславь сь дѣтию, Прьве сь дѣтию, Продань сь дѣтию, Находь сь дѣтию, Бориславь сь дѣтию, брать моу Срьдань сь дѣтию, дроуги моу брать Добромисль сь дѣтию, Драгославь сь дѣтию, Добрьчинь сь дѣтию, брать моу Грьдь сь дѣтию, Воиславь сь дѣтию, брать моу Бодинь сь дѣтию, Радомирь сь дѣтию, Станиславь сь дѣтию, Радь сь дѣтию, брать моу Радосинь сь дѣтию, Воинь сь дѣтию, Братославь сь дѣтию, Коулинь сь дѣтию, Краѥта сь дѣтию, сынь моу Прьвославь сь дѣтию, Коуньдедать сь дѣтию, Драгоушь сынь моу, Драгославь сь дѣтию, брать моу Воинь сь дѣтию, брать има Радь сь дѣтию, Гюрьгь Калиманикь сь дѣтию, Братолюбь сь дѣтию. а се коихь ѥ господинь краль придаль светѣи црькви: Лала сь дѣтию, зеть моу Стань сь дѣтию, Балица сь дѣтию, Лимань сь дѣтию, Срьдань сь дѣтию, Лала сь дѣтию, Моудре сь дѣтию, Радота сь дѣтию, Радь сь дѣтию, Добре сь дѣтию, Кꙋманиць сь дѣтию, Добромирь сь дѣтию, Братань сь дѣтию, Добре сь дѣтию, Станиславь сь дѣтию, Братославь, Драгомировь зеть, сь дѣтию, Брьзь сь дѣтию, Моужило сь дѣтию, Добромирь, брать Главшевь, Добриль сь дѣтию, Нѣговань сь дѣтию, Радь сь дѣтию, Браꙗ сь дѣтию, Рада попа дѣтьца, Коста и Радомирь, Братосинь сь дѣтию, Храниша сь дѣтию, Прьвославь сь дѣтию, брать моу Гроубьша сь дѣтию, Маноило сь дѣтию. а планина Добрии Доли. а пашища цариньскомоу добитькоу Раковица. коудѣ нѣ дрьжаве кралѥвьства ми, кто доходе изь стоуге землѥ кь светои црькви соущии людиѥ тези землѥ, или ѥ парикь или ѥ влахь или кто либо тоугеземлꙗнинь, да сї е има црькви. сего ради видѣвь кралѥвьство ми, ѥре бѣше потрень хрїсовоуль господина и ѡтьца ми великаго Стефана Оуроша, и зьговоривь се кралѥвьство ми сь арьхїепискоупомь вторимь Еустатиѥмь и сь госпождомь материю ми кралицомь Еленомь и сь всѣми епискоупы срьбьскыими, епискоупомь зетьскымь Їѡаномь, ѥпискоупомь рашьскыимь Филїпомь, ѥпискоупомь звечаньскыимь Даниломь, ѥпискоупомь хвостьньскыимь Їѡаномь, ѥпискоупомь хльмьскыимь Еустатиѥмь, ѥпискоупомь призрѣнскымь Дамиꙗномь, ѥпискоупомь топличскымь Герасимомь, ѥпискоупомь боудимльскымь Герьманомь, ѥпискоупомь лимлꙗньскыимь Аньдониѥмь, ѥпискоупомь скопьскымь Николомь, ѥпискоупомь дьбрьскыимь Їѡаномь, епискоупомь моравьскымь Курїломь, и прѣписахь хрїсовоуль сии светыѥ богородице хиланьдарьскыѥ. и видѣвь кралѥвьство ми, ѥре не имаше светаа црькви пашище оу хвостьнскои земли, и дахь пашища Лабикево: мегꙗ моу, како оутиче Рибникь ꙋ Дрин и ѡдь Рибника оус-потокь на Сьспища право оус-Козникь по дѣлоу, како се камы вали само и ѡнамо, и на Вели Врьхь прѣзь Понорь на Градище право на Роупе оу горне чело Горачева на поуть, како грѣде поуть посрѣдѣ Горачева оу Любижию, и како ꙋтиче Любижьна оу Дримь, а тоу мегю оутеса севасть Ѡбрадь Маниꙗкь. и пакь видѣ кралѥвьство ми, ѥре даѥ светаа црькви на годище по ·ві· ждрѣбца пастыромь бѣлѣгоу, того ради приложихь влахе, и ине влахе изьбрахь ѡть црьквинихь влахь, да пасоу кобиле црьковне, а да не оузимаю ѡть црькве бѣлѣгоу ничто, паче ако что изьгоубе, да плакꙗю ѡть себе конь по ·л҃· перьперь а кобила по ·к҃·, да плакꙗю црькви. того ради ѡсвети ихь кралѥвьство ми ѡть всѣхь работь малихь и великихь кралѥвьства ми, да имь нѣ поноса никога ни житнога ни виньнога ни провода ни конꙗ ни пса ни поклисара ни владальца никогаре кралѥвьства ми, ни оу Светоу Гороу да не ходе никоимь посилиѥмь, развѣ да асоу кобиле свете црькве. симь же влахомь имена: Воинь сь братиѡмь и сь дѣтию, Строиславь сь братиѡмь и сь дѣтию, Нѣгомирь сь дѣтию, Драгань сь дѣтию, Ꙗрославь сь дѣтию, Дабе сь дѣтию и зеть моу Хрьсь, Храниславь сь дѣтию и сь братиѡмь, Дьмитрь сь дѣтию, Прѣдиславь сь братиѡмь и сь дѣтию, Храниславь сь братиѡмь и сь дѣтию, Боукоурь сь дѣтию, Гроубша сь дѣтию, Драгославь сь дѣтию, Раиша сь братиѡмь, Дмитрь сь дѣтию, попь, коимь ѥ работаль. а се власи црьквни и сии да пасоу кобиле: Оуричикь, Радомирь сь братиѡмь, Ꙗнь сь дѣтию, Драгославь Добретикь сь братиѡмь, Братославь Мьнꙗ сь дѣтию. и ѡтьлоучи кралѥвьство ми ·кд· кобиль ѡть своихь кобиль, и приложихь келии своѥи пирьгоу, кои сьмь сьздаль на мори, и да ихь пасоу власи ѡнизи, коихь ѥ придалѡ кралѥвьство ми како и црьквие кобиле, и да имь се даѥ соль сь црьквними кобилами, и да се изьводи оу пирьгь, что се припрѧга моужьско; а калоугерь пирьжаныи да не има печаль ѡ пастырскои хранѣ ни ѡ ѡдеги, ни пастоуха да не храни, развѣ да имь се даѥ ѡть црькве. и ѡбрѣте кралѥвьство ми моѥ трьѥ чловѣке на Горачевѣ Гюрьгица и Радослава и Продана, и придахь ѥ пирьгоу своѥмоу, да боудоуть оулиꙗриѥ, да ѥсть свѣща спасоу, и ѡсвободихь ѥ ѡть всѣхь работь кралѥвьскыхь и црьквныхь, како и влахе выше писанныхь пастырь, и да ѡблада ими пирьжаныи калоугерь, а ине работе да имь нѣсть, развѣ оулиѥ да пасоу, и что погиба ѡть оулии, ѡни ѡть себе да плакꙗю; и аще се коимь врѣменемь слоучи погыбноути ꙋлемь, ѡни да ихь поставе ѡть себе. а ѡ напастехь нѣкоихь или ѡ неправдахь, да ихь ѡгледаю и ѡговараю црьквии владалци. и прида кралѥвьство ми црьквь великославнаго арьхїстратига Михаила иже вь Щипоу градоу, ѥгоже протосевасть Хрелꙗ ѡть основаниꙗ любовию доуше си сьздаль и оукрасиль красотами црьквными, да боудеть приложена црькви сїа монастироу славномоу дрьжави нашеѥ, иже ѥсть вь Светѣи Горѣ, иже именова се Хиланьдарь, вь паметь кралѥвьства ми и вь паметь ѥго, ꙗкоже изьволи се мѣстоу семоу приложити, иже ѥсть коупиль мѣсто оу Щипоу градоу или дворища или водѣничиѥ или винограде или нивиѥ, и прида кралѥвьство ми црькви архїстратигоу ѡть подьградиꙗ щипьскаго ·н҃· люди. а се имена тѣмь людемь: Грьчинь, Грозо, Драгобратовь сынь, сь братиꙗми си, Братиль, Гановь зеть, сь дѣтию, Владь, диꙗковь сынь, Герьговица, Грьчинь, Деѡвь сынь, Оутѣхови, Никола зидьць, Мрьзѣнь сь дѣтию, Гроубьша сь шоурьми, Добромирь сь братомь, Доброславь, Гоновь сынь, сь братомь, Тоуде технитовь сынь, Герьго ковачь, Тоудевь сынь Продань и зеть моу Коо сь дѣтию, Калинь сь братиꙗми си, Славь и зеть моу Ивань, Михо, Лѣловь зеть, Дагань, Аньдрониковь сынь, Драгославь, Нѣговановь сынь, сь дѣтию, Братань, Неговановь зеть, Михо, Дипотинь зеть, Доброславь, Звѣрьковь сынь, Драгань, Бобешановь сынь, сь братиами си, и Василь Драго сь дѣтию, Тоуде, Николинь сынь, сь братомь, Драгославь, Рипетинь сынь, Стаѡ, Кричановь сынь, Дьмитрь, Радовь сынь, сь братомь, Стано, Радомировь зеть, сь дѣтию, Леꙗ цегара дѣтьца, Маноило, Калеловь сынь, сь зетемь си Добрикомь, Петрь, Деѡвь зеть, Никола, Евдокимовь сынь, сь братомь, Дражо, Пиловь сынь, сь дѣтию, Добре, Пиловь сынь, и брать моу Ꙗно сь дѣтьцами си и зеть имь Братило ковачь сь дѣтию, Маниславь сь дѣтию, Калимань сь дѣтїю, Братица сь братомь Гѡрьги златарь сь дѣтию, Никола цегарь сь дѣтию, Баѡ, Мирѣновь зеть, Дарославь, Поударевь сынь, сь братиꙗми, Вранотноко, Предичинь зеть, сь братомь, Радь срьбинь сь дѣтию, Стрѣзо клобоучарь сь дѣтию, Раѡ, Дражинь сынь, Драгославь, Коукоуровь зеть, Стефань, Десибратовь сынь, сь братиꙗми, Богдань Криводрѣво сь дѣтию. и трьгь щипьски и законь подьградию, кои соу ѡтроци сь коньми, да имь ѥсть законь, кьги походи икономь кралю или на котороу годѣ работоу, а ѡни с нимь на конехь, а да имь се кони не оузимають, ни подь товарь да се не подьлагають, нь сами с ними да походеть на кои годѣ посоль црьквии; а кои соу бес-конеи, да ѡроуть дьнь ѥсенине и дьнь пролѣтине, и да го пожноуть и изврьхоуть, и дьнь ꙋ виноградѣ да работають. и прида кралѥвьство ми селища запоустѣвша ѡть вѣка, име селищоу: Брѣсть и Соухогрьль и Лѣсковица и Витьче и Дрѣновь, а мегꙗ Армасана сь вьсѣми людьми и населени сел тѣхь, що си ѥ населиль ѡть тоугихь земль, и селище Брѣстовь прѣзь Лоукавицоу на Бѣсноу Водѣницоу и Калоугерица и полице пашище сь вьсѣми правинами и мегꙗми сель тѣхь, и село оу Ключи Коунарꙗне сь парикы и сь стасми ихь и сь всѣми правинами села того. и не прѣзрѣ кралѥвьство ми ѥгово молениѥ, нь оутврьди и записа кралѥвьство ми, да боудеть оутврьждено и непоколѣбимо светѣи богородици хиланьдарьскои ꙗкоже и ина, иже соуть вьписана вь хрїсовоулѣхь родительми и прѣродителми кралѥвьства ми. тѣмже ѡбразомь и та вьса вьписана соуть. того ради кралѥвьство ми ѡсвободи ѡть малихь и великыхь работь, да имь нѣсть ни града ни позоба ни поклисара ни пьсара ни инь никто ѡть властеи кралѥвьства ми тькьмо игоумена настоѥщаго свете богородице хиланьдарске, и ѥгоже ѡнь изволить поставити ѡбладати храмомь светаго архїстратига Михаила да ѥсть, а инь никто. и прида кралѥвьство ми црьквь светиѥ богородице иже вь Лоꙗнѣ и сь селомь Лоꙗномь сь всѣми мегꙗми села того и сь вьсѣми правинами и сь виногради и сь нивиѥмь и сь ливалиѥмь и сь водѣничиѥмь и сь заселькы, Кькрино и Запльжане и Кобилиꙗ Глава и Доброутовьци и Градище, да ѥсть метохь светие богородице хиландарьске. и селище Вльчи Лоугь оу строумичьскомь поли сь вьсею ѡбластию и правинами. и планина Ѡграждень и пашище Чрьвена Полѣна, синорь Василица, синѡрь Стльбица и Дракьшань и Петрово и Сливница и Кнѥгинꙗ на брѣзничьскы поуть и на Фроугопоулово селище и мѣсто оу Строумици Тетрагонитово, да оучини црьквь и коуке, да ѥсть метохь светиѥ богородице хиланьдарьске, и чловѣкь оу Ст(р)оумици Бале Екьса арьмѣнинь сь дѣтию, и прида кралѥвьство ми црьквь светоу Петькоу на Брѣгалници, що ѥсит зидаль Карьба самь своима роуками и сь троудомь паче и пописаль и оукрасиль красотами црьквними, да ѥсть метохь свете богородице хиланьдарьске сь виноградомь и сь ни(ви)ѥмь и сѣнокоси, паче и пашища и землꙗ, що моу ѥ даль господинь и родитель кралѥвьства ми, и тоу да си има црьквь: и кто си полюби ѡдь ѥговѣхь люди или кто свободьнь чловѣкь да греде свободно подь црьквь светоу Пе(ть)коу. и кралѥвьство ми ѡсвободи ѡнези люди ѡть всѣхь работь кралѥвьства ми малихь и великихь, ꙗкоже и више писано. и црьквь светаго Геѡрьгїа, що есть зидаль Бериславь на селищи Срьбьшори, сь виноградомь и сь нивиѥмь и сь вьсею ѡбласти црькве те: синорь ѡть Поупа вь Ницоу по дѣлоу на локвоу и на Горьницоу, та на дроумь и на Зоубово Кроушиѥ низ рѣкоу до трапа србьскаго, да ѥсть метохь свете богородице хиланьдарьскыѥ. того ради оутврьди и записа кралѥвьство ми, да боудеть оутврьж(д)ено и непоколѣбимо светои богородици хиланьдарьскои ꙗкоже и ина, иже соуть вьписана вь хрїсовоулѣ семь, тѣмьже ѡбразомь и та вса вьписана соуть. кто ли се ѡбрѣ таковии, и потьщить се разорити сиꙗ записаниꙗ и оутврьждена мною Стефаномь кралѥмь и правовѣрнимь властелиномь кралѥвьства ми протосевастомь Хрелѡмь, да моу ѥсть мьстникь господь богь и прѣчистаа мати ѥго, и да го порази сила чьстнаго и животворещаго крьста, и да ѥсть проклеть ѡть бога и ѡть ·тиі· ѡтьць никеискыхь и ѡть всѣхь светыхь богоу оугодивьшихь, и ѡть кралѥвьства ми да ѥсть проклеть, и да ѥсть причестникь прѣдателю Июдѣ и сь рекшими: крьвь ѥго на нась и на чедѣхь нашихь; а таковии да приме гнѣвь и наказаниѥ ѡть кралѥвьства ми, и да плати кралѥвьствоу ми ·т҃· перпирь.

† Стефань вь Христа благовѣрныи краль и самѡдрьжьць всѣхь срьбскихь земль и пѡмѡрскыхь.

† Богоѡтьць оубо Давидь, вьжделѣвь небесныхь сельь и вь оумилѥнии бывь, доухомь светымь наставлꙗѥмь вь пѣснехь своихь вьпиꙗше глаголѥ: вельми мила соуть села твоꙗ, господи сильь, цароу мои, боже мои, и добро тѣмь, иже живоуть вь домохь твоихь. еда пьтица ѡбрѣла себѣ храминоу и грьлица себѣ гнѣздо, на нѥмьже положить и вьспитѣѥть пьтище своѥ? рекохь ѡльтарѥ твоѥ, мои господи, господи сильь, цароу мои, боже мои. и блажении прѣбывающеи вь дворѣхь твоихь. тѣмьже и азь оумилѥныи, подобе се поустынѥлюбьзнѣи грьлици, радь оубо бихь быль ѡгласити вьса оудолиꙗ поустыньнаꙗ мыслию вьсею и присѣщениѥмь благымь, ꙗкоже и грьлица грьканиѥмь своимь ѡглашаѥть дьбри гласомь тьчию, а крѣпость ѥе немощьна соущии, такожде и азь грѣшьныи, глась бо мои вь вьсоу вьселѥноую изиде, дѣль же моихь благыхь на земли богь не видѣ, да инь кто видить, понѥже не створихь блага на земли. слышавь же ѡть спаса моѥго нѣкоую вьдовицоу двѣма мѣдѣницама приѡбрѣтьшоу паче богатьства инѣхь многаа, и азь грѣшьныи не ѡтьчаꙗхь се, видѣвь светыѥ прѣродителѥ и родителѥ моѥ моѥ приложивьшеѥ вь Светѣи Горѣ мьногаа мьножьства монастырю светыѥ богородице, наричемомоу Хиланьдарь, по изволѥнию ѡтьца небеснаго, свѣта светаго, азь Оурѡшь краль Стефань, сынь Оуроша велиꙗго крала, сына Стефанова, Стефана, сына Неманина, рекьше светаго Сѵмеѡна, пришьдьшоу к мнѣ иеромонахоу Кѵрїакоу сь чрьньцы хиланьдарьскыми, и вьспоменоуше ми бѣды своѥ на мори, слоучающеѥ се имь ѡть безбожьныихь хоурьсарь, ихьже не можемь исповѣдѣти, глаголющемь имь кь мнѣ сь оумилѥниѥмь и мольбою: створи намь прѣпокоище вьс животь намь на мори и ѡть морꙗ ны ѥсть. и не прѣчюхь ихь, нь испльниихь вьсе прошениѥ ихь. и сьздахь имь пирьгь, и на нѥмь сьь храмь спасовь, и испльниихь кьнигами и завѣсы и иконами и сьсоуды и ѥще иныими потрѣбами довольныими, да ѥсть на славословиѥ божиѥ, а ѡнѣмь на покоище и на оутѣхоу, и мене вь молитвахь своихь да поминають, раба божиꙗ Стефана Ꙋрооша крала. сьврьши же се храмь сьь вь дьни благовѣрнаго цара кѵрь Андроника и сына ѥго кѵрь Михаила при проотѣ Иꙗникии, при игоуменѣ хиланьдарьскомь Кѵриꙗцѣ, вь лѣто · крала, сына Стефанова, Стефана, сына Неманина, рекьше светаго Сѵмеѡна, пришьдьшоу к мнѣ иеромонахоу Кѵрїакоу сь чрьньцы хиланьдарьскыми, и вьспоменоуше ми бѣды своѥ на мори, слоучающеѥ се имь ѡть безбожьныихь хоурьсарь, ихьже не можемь исповѣдѣти, глаголющемь имь кь мнѣ сь оумилѥниѥмь и мольбою: створи намь прѣпокоище вьс животь намь на мори и ѡть морꙗ ны ѥсть. и не прѣчюхь ихь, нь испльниихь вьсе прошениѥ ихь. и сьздахь имь пирьгь, и на нѥмь сьь храмь спасовь, и испльниихь кьнигами и завѣсы и иконами и сьсоуды и ѥще иныими потрѣбами довольныими, да ѥсть на славословиѥ божиѥ, а ѡнѣмь на покоище и на оутѣхоу, и мене вь молитвахь своихь да поминають, раба божиꙗ Стефана Ꙋрооша крала. сьврьши же се храмь сьь вь дьни благовѣрнаго цара кѵрь Андроника и сына ѥго кѵрь Михаила при проотѣ Иꙗникии, при игоуменѣ хиланьдарьскомь Кѵриꙗцѣ, вь лѣто ·҂ѕѡі·, сльньчнаго кроуга ·кв·, лоуньнаго же ·и҃·, индїкта ·гі·

† Вь Христа бога благовѣрни Стефань Ꙋрѡшь краль †.

† Изредно и ѡ прѣсветѣи, прѣчистѣи и прѣблагословленѣи владычици нашеи госпожди и богородительници, приснодѣвѣи Мариі, тѣмьже и мы, грѣшныи и ꙋмилении раби твои, кою ти похвалоу принесемь, прѣчистаꙗ? что же ли наречемь те, ѡбрадованьнаꙗ? или кыми похвалами вьсхалимь твоѥ прѣнепорочьноѥ дѣвьство, прѣчистаꙗ богородице, дѣво Мариѥ? нь ѡбаче арьханьгеловоу гласоу подобеще се и мы грѣшьныи недостоиными оустьнами вьпиѥмь тии: радоуи се, радоуи се, ѡбрадованьнаꙗ, господь с тобою, и тобою сьмирише се небеснаꙗ сь земльными, и родь чловѣчьскы тобою избавлень бысть прьвыѥ клѥтвы Адамовы, Адамь же и Ѥѵга ликьствоуѥта ѡ рождьствѣ твоѥмь вьсприѥмьша прьвоую добротоу, юже прѣстоуплѥниѥмь погоубиста, аньгеломь славо и пророкомь сьбытиѥ, апостоломь похвало, моученикомь вѣньць, царемь дрьжаво, грѣшникомь прибѣжище. тѣмьже и азь, рабь твои Стефань Оурошь, самодрьжавьныи краль срьбьски и поморьскы, по милости твоѥи и по милости рождьшаго се ис-тебе бе-с-ѣмене сльньца истиньнаго, Христа бога нашего, припадаю кь прѣчистима ногама твоима, милости просе и прощениѥ грѣхомь моимь, ꙗко да помилоуѥши и застоупиши мене, грѣшьнаго раба твоѥго, и сь рабомь твоимь а сь сыномь моимь Стефаномь и ѡть всѣхь врагь нашихь видимыхь и невидимыхь, и вь ѡбласти нашеи, що ми си ты дала, чистаꙗ, и сь сыномь ти богомь нашимь, даю таланьть светомоу храмоу твоѥмоу, ѥже ѥсть оу Рьтьчька, светои богородици рьтьчьскои, Доубоицоу, Зьбоурина и Братошь и Топлишь, Шаптине и Спилани и сь мегами. а се меге: ѡть Ластьве, како тече стоудьньць Мостьць оу ластовьско блато, горѣ ѡть Мостьца оуз брьдо по вѣньцоу, а ѡдь вѣньца оу шапьтинскоу скалоу, ѡть шаптиньске оулице оу Соухии Потокь, ѡть Соухога Потока оу Прѣсѣкоу, ѡть Прѣсѣке оу Градище и ѡдь Дѣвина Врьха, ѡдь Цьпича оу Кальць, оу Плишь на-Топлишемь, оу брьдо Свинищехь, оу Малоу Ѡстрьвицоу, оу Зеленикоу, како гледа оу море: како ѥ ѡбладала госпогꙗ ми мати кралица Ѥлена, и ѡна ѥ дала и записала, то потврьди кралѥвьство ми и записа, да ѥ на пищоу старьцемь и на ѡдеждоу слѣпимь и хромымь и братии, и да ѥ този свободьно ѡдь вьсѣхь работь господьствоующихь великыхь и малихь и ѡть сильныхь оу ѡбласти кралевьства ми, да не поврѣдить, що се тоу именоуѥть црькьвно. и кога богь изволи быти по мнѣ на столѣ кралевьства ми или сынь кралевьства ми или ѡдь рода кралевьства ми, сего писаньнаго малаго мною да не разорить, нь да потврьдить, или кто ѡдь силныхь или ѡдь владоущихь. кто лии дрьзнеть и мало що ѡдь сихь разорити, того богь да разорить гнѣвомь своимь, и да ѥ причестныкь Июдѣ прѣдателю и кь тѣмь рекьшимь: крьвь ѥго на нась и на чедѣхь нашихь, и да ѥ проклѥть ѡдь господа бога вседрьжителꙗ и ѡдь силѥ чьстнаго и животворещаго крьста и ѡдь всѣхь светыхь оугождьшихь богоу ѡть вѣка, и да моу соупьрьница боуде мати божиꙗ прѣдь страшнимь соудиѡмь, ѥгда придеть вь славѣ соудити живымь и мрьтвимь, и ѡдь мене грѣшнаго кралꙗ Оуроша да ѥ проклѥть; а таковыи, кои име пакостити томоу мѣстоу що записа кралѥвьство ми, или оу пашищихь или оу теговищихь, или име кои соудь двизати на црьковь оу тои земли, да плати кралевьствоу ми тисоукю перьперь. и тоу милость сьтвори кралевьство ми домоу светыѥ богородице ретьчьскыѥ, кьди приде оу Которь градь. и тоу бише сь кралевьствомь ми властелѥ: архиѥпискоупь барьски Маринь и казньць Мирославь и ѥпискоупь хльмьскы Иѡань и ѥпискоупь зетьскы Михаиль и чельникь Бранко, дѣдь Мирославь, жоупань Владиславь, пискоупь которьскы Доумꙋнꙗ и два свѣдока Драго и Павьль. сего ради писа и подьписа кралевьство ми вь свѣдѣниѥ вьсакомоу. и сиѥ писа Петриць диꙗкь мѣсеца марьта ·еі·

Стефань Ꙋрошь краль всѣхь срьбскихь земль и поморскихь.

Вь ·ві· дьнь прѣстави се Стефань краль, Ѳеоктисть монахь.

Стефань Оурошь, по милости божиѥи краль, оуноукь господина ми кралꙗ Стефана, синь господина ми кралꙗ Оуроша, видѣвь створениѥ господина дѣда ми кралꙗ Стефана манастирью светыѥ богородице иже на Млѣтѣ, никакоже дрьзьноухь разорити прѣдьложенныхь нимь, нь паче потвьдихь, аще бо и вь грѣсѣ соущоу ми, нь вѣтвиѥ ѥсемь благааго корене свѣтихь господь родитель моихь. тѣмьже аще ктоѡ дрьзнеть разоритии прѣдьложенаѣ светыимь господиномь дѣдомь ми и мьною потврьждениꙗ, таковии да боуде проклеть ѡть господа бога вьседрьжитела и прѣсвете богородице, и да мꙋ ѥ соупьрьница света богородица на страшьномь соудищи, и ѡть мене грѣшьнаго да ѥ прокльть. сего ради писавь и подьписахь.

Стефань Оурошь по милости божиѥи краль и самодрьжьць вьсе срьпьске земль и поморьскѥ.

† Господь вьзнесь се на небеса да поустить мировїи ꙋтѣшителꙗ, небеса ꙋготоваше прѣстоль ѥго, ѡблаци вѣль.. лѣпїѥ славїи царствїа ѥго, аггелы сего хвалеще дивише се, прѡрочаскаꙗ сьврьшающаа и дивнаꙗ вь чловѣцѣхь творѣщааго, рече бо: вь ѡни дьни извѣю ѡть дꙋха моѥго на вьсакꙋ пльть, и пакы: вь ѡтьць твоихь мѣсто быше сыновѣ твои; и пакы: небеса исповедають славоу божїю. кь симь оубо правовѣрїю оушеса на слышанїѥ приложиты подобаѥть и вь разоумь вьнетїа, правовѣрїа бо строителю и вѣликааго Сиѡна ѡбражающе вь жити сѣмь нарицають се исповѣдающе и вь .....ажающе славоу божїю, ихьже паметь не прѣстающїи и жизнь некончаѥма, слишаше бо бога рекша: любеи ме вьзлюблѥнь боудеть ѡтьцемь моимь, и азь вьзлюблю и, и ѡбрѣщоу посрѣдѣ его волю мою, по сихь же ѡбитель бо ѡтьца моѥго сьтвороу ѥмꙋ. о блаженноѥ слышанїе, о блаженное ѡбещаниѥ, о блаженна надѣжда, ꙗже ѡбещанна бысть... светаго корѣне боголюбїе вѣтвїи, иже вь (еди)но сьвькоупивь боголюбива слышанїа и видѣнїа и (тр)оуди и поты своими потише се сьтворитї ꙗ, б(лаж)еннаго и боголюбиваго наричю Стѣфана кралꙗ Владиславав всѣ срьбскїѥ землѥ и поморскѥ, вьноукь светаго Симеѡна Неманѥ и сына Стѣфана кралꙗ, вь мнишьскѡмь ѡбразе нареченнаго Симона монаха, иже богодарованима ѥмоу прозорливама доуховнима и любазнима ѡчима кь владицѣ и вьзносителю елеѡнскомоу проз(ва) ѥго божьставнаго телѣсе стопи коньчнеѥ статиꙗ вьс(пом)инанїи сьтварїи, рекше вьзнесенїа храмь на мест(ѣ) нарицаемемь Милѣшева вь жоупе Чрьнои Стѣне, егоже божествьными и чловѣчьскїими красотамїи ꙋкрашень и сели и влах(ы) ѡбластїи прѣдавь мнѣ сь богомь господствоующоумоу тогда кралю и пакы сь богомь самодрьжьца всеи срьбскїи земли и поморскїи Стѣфанꙋ Оурошоу блаженоую свою доушоу вь роуцѣ любимомоу Христоу прѣдаа. тѣмже и азь Стѣфань Оурошь потьщахь се родителѥмь моимь и прародителѥмь сьздати храмь светомоу архиѣрею и чоудотворцоу христовоу Николи вь Хвоснѣ на реци Бистрици близь вѣликїѥ архїепїскопїе срьбскїѥ, и сїи свети храмь сьздахь вьп ... роучїи вьзнесенїа господнꙗ рекше Милешева, идеже почиваѥть прьвїи архїепискꙋпь и оучитель срьбскы и прародитель нашь, светитѣль христовь Савва, вь испокоенїѥ братїамь ѡть светаго манастира, намь же и родителѥмь нашимь и прародителѥмь вь вѣчни помень. и кога богь изволи .... владати землѥю сею, на того вьзлагаю всако ...тителство, и приложихь храмоу семꙋ вь оукрѣплѥнїе и ..... Стльпь, а мега мꙋ оу Градска воденища Петрашикь потокомь и ртомь на стꙋденаць чрьнгарꙋ на Ковачеваць надь Жїѡчицоу камень, ѡть Жїѡчице косомь, како ками вали, оу Любешь потокь, Любешь потокомь и оу Бистрицоу. тебѣ, ѡтьче свети Николаѥ .... прїѥмлѥ милостїи помощь, тѣмь многогрѣшны Стефань Оурошь кь тебѣ прибегохь, мои застоупниче тепль, вса сїи приложихь храмоу твоемꙋ, да аще кто дрьзнеть, ѡдрьжимь завистїю сотон(ин)ою дарованныихь мною вьнꙋтрьнихь домоу и вьнешнихь, таковїи да боудеть проклѣть вь сѣмь вѣце и вь боудоущѣмь ѡть господа бога вседрьжитела и ѡть прѣчистїе и прѣнепорочнїе и приснодѣви Марїе владичице богородице и ѡть всехь светїи(хь) богоу ꙋгождашихь ѡть вѣка аминь, и да боудеть причесникь прѣдателѥмь сь распаншими господа и рекшими: крьвь его на нась и на чедехь нашихь и ѡть богодарованнаго намь (в)ѣнца да боуде проклѣть. аминь, аминь, аминь.

† Стѣфань ·в҃· Ꙋрошь госпѡдинь вьсе срьбскїе земле и пѡмѡрьскїе.

† Сладости неизреченьнаꙗ, владыко Христе, испльни моѥ желаниѥ, ꙗко послѣдовати твоимь оучениѥмь, вещаль бо ѥси вь светѣмь твоѥмь еѵангелии, да просвѣтить се свѣть вашь пр҆ѣдь чловѣкы, ꙗко да оузреть добраꙗ ваша дѣла, и прославеть ѡтьца вашего, иже ѥсть на небесѣхь. слышеще оубо сии великаꙗ обѣтованиꙗ, глаголаньнаа тобою любещимь те, спасе мои, сего ради тьщимь се и мыи подвижоуще се ѡть земльныихь кь небеснымь наипаче слышати, кыимь оубо господь мьзды вьздаѥть и вѣчьнаа благаа. не приносещимь ли ѥмоу славоу и сьчть, приносещимь славоу имени ѥго? вьзмѣте бо рече жрьтвы, и вьходите вь дворы ѥго. да понѥже ѥсть таковаа намь помощь и оутврьждениѥ ѡть господа створьшаго небо и землю, подобаеть оубѡ вьсею доушею и ѡть вьсего помышлѥниꙗ вьзлюбити того божьствьныѥ заповѣди, вь нихьже прѣжде прьвии ходивьше обѣтованиꙗ оулоучише вѣчьнаа. мьнѣ же хвалити се да не боудеть, тькмо ѡ силѣ и помощи господа нашего Їсоу Христа, ꙗко молитвами прѣчистыѥ ѥго матере и светаго прьвомоученика и арьхидиꙗкона Стефана и светыхь моихь прѣродительь и родительь дасть и мьнѣ настольникоу быти имь вь ѡтьчьствии моѥмь, Стефаноу Оурѡшоу вьторомоу, ѡть племене же краль и самодрьжьць вьсе срьбскыѥ и приморьскыѥ землѥ, прѣвьноукь светаго Симеѡна Неманѥ, вьноукь прьвовѣньчаньнаго кралꙗ Стефана, сынь же Стефана крала Оуроша прьваго, Сѵмона монаха изволѥниѥмь божьствьныѥ благодати. оумолѥнь бывь живоущими вь домоу прѣсветыѥ богородице владателнице хиланьдарьскыѥ иже вь Светѣи Горѣ, игоуменомь и бащомь и вьсею братиѥю, сьздахь пирьгь великь и тврьдь сь градомь ѡколо и сь келиꙗми на покои хотещимь жити чрьньцемь тоу на мѣстѣ рекомѣмь Хроусиꙗ при мори, и с помощию божьствьною ѡбрьхь того великаго пирьга створихь црьновь вь име прѣславьнаго ѥго вьзнесениꙗ , и оукрасихь пописаниѥмь и сьсоуды ꙗже на потрѣбоу свещеньными вьноутрь и вьнѣшьними правьдами. и ѥще благодати божии сьпоспѣшьствоующи ми потьщахь се, и испросихь оу господина и родителꙗ ми цара грьчьскаго, кѵрь Аньдроника, и оу вьзлюблѥнаго сына ѥго брата кралевьства ми цара грьчьскаго, кѵрь Михаила, оу стрꙋмьскои ѡбласти село, именемь Коуцово, сь винограды и сь доходькы и сь всѣми правинами села того близь сельь монастырьскыихь соумегь сь ними, и сего села Коуцова не испросихь на име монастырьско, ни га дахь монастырю, нь да имь ѡбладаеть старьць прѣбываѥи вь семь пирьгоу храма вьзнесениꙗ господнꙗ. сии же пиргь не ѡтьлоучии кралевьство ми ѡть монастырꙗ, нь паче да ѥдиньсвоуѥ сь монастырѥмь, како ѥ и записано вь прьвомь хрѵсоволѣ, ѥгоже створи кралевьство ми монастырю. и ѡть иноуде старьць хотеи прѣбывати вь семь пирьгоу да се не ставии, тькмо ѡть монастырꙗ да се избираа ѡбьщимь сьвѣтомь братиѥ подобныи на тѡ дѣло прьвыи по игоуменѣ и по бащи, и безь великаа оузрока и дѣла да не изимаѥть се. и чьто смь даль ѡть дома кралевьства ми живога или мрьтвога добытька, рекше ꙗже соуть вьноꙋтрь црькве на слоужббоу и на оукрашениѥ црьковьноѥ, книге, иконы, завѣси, чьстьнии крьсти, сьсоуди злати и сребрьни и инаа маоа и голѣма, и вьсе, чьто ѥ дало кралевьство ми на име пирьгоу, с проста да не имать власти ни самь кралевьствоуѥи вьзети что даныхь мною вь дарь господеви. аще ли кто вьзметь и мало чьто, да га мьстии светоѥ вьзнесениѥ и светаа богородица, и да ѥсть проклеть ѡдь всѣхь светыихь и ѡдь мене грѣшьнаго. и ѥгоже изволии богь по мнѣ кралевьствовати срьбьскою землѥю или сыноу моѥмоу или сыновьцоу моѥмоу или вьноукоу моѥмоу или иномоу комоу ѡть рода моѥго, сего да не потворить ни разорить, ꙗко и кралевьство ми прьвыхь писании и оутврьждении не потькноухь ни потворихь. на того бо самого кралевьствоующаго вьзложихь сиѥ моѥ сьзданиѥ, ѥже вьдахь вь дарь спасоу моѥмоу Христоу, ꙗко поменоу и мольбѣ быти за нь тоу ꙗкоже и за ме вь животѣ ми, томоуже сьблюдати и песаловати се и большаа придавати вьса ꙗже вь потрѣбѣ домоу светаго вьзнесениꙗ господнꙗ, и пищоу и ѡдѣꙗниѥ старьцоу сь чрьньцы соущими сь нимь, вьтораго бѡ ктитора по мьнѣ кралевьствоующаго нарекохь мѣстоу семоу светомоу испльнꙗти и крѣпити, не ѡтоузети же чьто мала и велика даныихь и записанихь мьною здѣ, ни потькновеньноу быти. аще ли кто, бога не боѥ се и чловѣкьь не срамлꙗѥ се и соудь страшьныи прѣѡбилѣвь, и вьсхощеть разорити или прѣтворити или ѡтнети что ѡть приложеныхь и оузаконѥныихь и писаныихь мною, ꙗкоже и выше рекохь, вь сиѥмь хрисовоулѣ, аще и тьь самь кралевьстоуѥи краль срьбьскыѥ землѥ или ѡть настоѥщиихь игоуменьь монастырꙗ а или инь кто, ѡть таковаго да ѡтниметь милость свою спась мои Христось, вьзнесыи се вь славѣ кь ѡтьцоу, и проклетиѥ ѥмоу боуди ѡть того самого господа бога вьседрьжителꙗ и ѡть прѣчистыѥ ѥго матере, и поражень да боудеть ѡть силы чьстьнаго и животворещаго крьста и ѡть ·ві· светыихь апостольь и ѡть ·тиі· светыихь ѡтьцьь иже вь Никеи, и ѡть всѣхь светыихь богоу оугождьшиихь ѡть вѣка да ѥсть проклѣть и трьклеть, и да боудеть причтень кь Июдѣ прѣдателю и кь ѡнѣмь рекьшимь: крьвь ѥго на нась и на чедѣхь нашихь, и ѡть мене, ако и грѣшьнь ѥсмь, и ѡть богодарованьнаго намь вѣньца да ѥсть проклеть вь семь вѣцѣ и вь боудоущемь. сего ради подьписоую вь свѣдѣниѥ вьсѣмь.

† Стефань Оурѡшь по милости божиеи краль и сь богомь самодрьжьць всѣхь срьбьские земьль.

† Земьльнаꙗ земьли ѡставльше и тлѣньньихь и прьстныихь ѡшьдьше придите, вьзникнѣмь, и на высотоу вьзьнесѣмь ѡчи, и разоумы вьперимь, глаголюще кь прѣвѣчьномоу и безначельномоу владыцѣ и благомоу ѡтьцоу небесномоу творьцоу вьсеѥ твари видимыѥ и невидимыѥ и ѥдиночедомоу сыноу ѥго, вь надежди и похвалѣ рода христиꙗньскаго, господоу богоу спасоу нашемоу Ісоу Христоу, и прѣсветомоу и благомоу и животворещемоу доухоу ѥго вьпиюще: слава тебѣ, трьсветаꙗ троице вь ѥдиномь божьствѣ вь вѣки аминь. понѥже благоизволивь посла ѥдиночедыи сынь твои на землю спасениꙗ ради чловѣчьскаго, ꙗдрь же тебе благаго ѡтьца не ѡтьлоучивь се любьзныи Ісоусь Христось родии се, ꙗко самь вьсхотѣ, и ꙗвии се, ꙗко самь изволии, пострада пльтию, а не божьствомь, из мрьтвыихь вьскрьсе поправь смрьть, и вьзнесе се вь славѣ, сьврьшеи всачьскаꙗ, миирь давь светыимь своимь апостоломь и ѡбещаниѥ пришьствиꙗ светаго доуха, имже ѡсѣнѥни начеше глаголати инѣми ѥзыкы, и тако просвѣтише вьселѥноѥю наставлꙗюще вь разоумь твои истиньнаго бога нашего, мыи же просѣщьше се ими поѥмь твои светоѡбразныи лица зракь, покланꙗѥмь се страстемь твоимь, чьтемь же и вьскрьсениѥ, и славьноѥ вьзнесениѥ славимь, и припадающе молимь се, сладости неизреченнаꙗ, владыко Христе, испльни моѥ желаниѥ, ꙗко послѣдовати ми твоимь оучениѥмь, вѣщаль бо ѥси вь светѣмь твоѥмь ѥѵангелии: да просвѣтиить се свѣть вашь прѣдь чловѣкы, ꙗко да оузреть добраꙗ ваша дѣла, и прославеть ѡтьца вашего, иже ѥсть на небесѣхь. слышахомь бо сии великаꙗ ѡбѣтованиꙗ глаголанаꙗ тобою кь любещиимь те, спасе мои: сего ради тьщиимь се и мыи, подьвижꙋще се ѡть земльныихь на небеснаꙗ, наипаче слышати, кыимь оубо господь крѣпость даѥть и вѣчьнаꙗ блага, нь не приносещиимь ли ѥмоу славоу и чьсть, приносещиимь славоу имени ѥго? вьзмѣте бо рече жрьтвы, и вьходите вь дворы господнѥ, да понѥже ѥсть таковаꙗ помощь и оутврьждениѥ намь ѡть господа, створьшаго небо и землю, подобаше оубо ѡть все доуше и ѡть всего помышьлѥниꙗ вьзлюбити того божьствьныиѥ заповѣди, вь нихьже прѣжде прьвии ходивьшеи ѡбѣтованиꙗ оулоучише. мнѣ же хвалити се да не боуде, тькьмо ѡ силѣ и помощи господа нашего Ісоу Христа, ꙗко молитвами прѣчистыѥ ѥго матере и светаго прьвомоученика и арьхидиꙗкона Стефана и светыхь моихь прародительь и родительь дасть и мнѣ настольникоу быти имь вь ѡтьчьствии моѥмь, Стефань Оурошь вьторыи, ѡть племене же краль и самодрьжьць все срьбскииѥ и поморскииѥ земьлѥ, правьноукь светаго Симеѡна Неманѥ и вьноукь прьвовѣньчанаго крала Стефана Симона монаха, сынь же Стефана крала Оуроша Сѵмона монаха, поноуждень же божьствьною благодѣтию и оумолѥнь (бы)вь живоущими вь домоу прѣстветыѥ богородице благодѣтелнице хиланьдарьскииѥ иже вь Светѣи Горѣ, игоуменомь и бащомь и всею братиѥю, и сьздахь имь стльпь великь и тврьдь на мѣстѣ рекомѣмь Хроусиꙗ, и с помощию божьствьною ѡбрьхь того пирга створихь црьковь вь име прѣславнаго ѥго вьзнесениꙗ. и ѥще же богоу послѣшьствоующоу ми ѡ божьствьнѣмь ѥго дарѣ, иже ми дасть, и инаа многаа приложениꙗ, ѥлико ми бысть вьзьможно, приложихь вь сьзаниꙗхь и вь направлѥниихь храма прѣсветыѥ богородице хиланьдарьскыѥ, ꙗже соуть вноутрь и извьнь монастыирꙗ и вь запоустѣвьшиихь метохиꙗхь ѡбновлѥниꙗ и винограднаꙗ насаждениꙗ и ѥже ѥсть на крьмоу и ѡдѣниѥ слоужещиимь светѣи црькви села и пашища довольно вь срьбьсцѣи и вь грьчьсцѣи земьли, ѥлико испросихь оу господина ми и родителꙗ, светаго цара грьчьскаго кѵрь Аньдроника, и оу вьзлюблѥнаго сына ѥго брата кралевьства ми, кѵрь Михаила, цара грьч(ьс)каго, та же вса здѣ не испишасе се. писана же соуть вь царьскихь хрисовоулѣхь и вь кралевьства ми хрисовоулѣ, а ꙗже не вьзьможьна быше вьписати се вь хрисомоуль вьса по ѥдиномь, тѣмь боудеть свѣдѣтелница и приѥмьница прѣчистаꙗ моꙗ застоупьница и благодѣтелница хиланьдарьска, могоущии ме избавити вѣчныѥ моуки. сии же пиргь не ѡтьлоучии кралевьство ми ѡдь монастыира, нь паче да ѥдиньствоуѥ с монастырѥмь, како ѥ и записано ꙋ прьвомь хрисовоулѣ, ѥгоже створии кралевьство ми монастыирю. и ѥще же богоу поспѣшьствоующоу ми и оумыслихь, ѥже хощеть быти на покои и на пищоу и на ѡдѣниѥ братиꙗмь хотещиимь жити вь семь пирьгоу вь храмѣ вьзнесениꙗ христова, да се даѥ на всако годище ѡдь монастыирꙗ храна мѣртикь сврьшень испльнь всѣмь живоущиимь вь сиѥмь пирьгоу, како ѥсть записано оу монастырьскомь хрисовоули. того ради да кралевьство ми монастыирю вь скопьскои ѡбласти црьквь светаго Никиты оу Банꙗхь сь селы и с людми и с влахы, и тоуигѥ оу скопьскои ѡбласти дроуго село Тьморани и добытька живога и мрьтвога, ѥлико свѣде тогда настоѥщаа братиꙗ вь монастыри, колико ѥ довольно давало кралевьство ми вь вса врѣмена, ѥлико ми ѥсть пощедѣль богь господствовати вь срьбсцѣи земли. сии же комать и мерьтикь оуставлѥнь бысть изволѥниѥмь и ѡбьщиимь зьговорѥниѥмь по воли, а не по ноужди игоумена и каще и всега сьбора домоу светыѥ богородице хиланьдарьскыиѥ рекьше, ꙗко и коуплѥно бысть кралевьствомь ми ѡдь нихь, ꙗко да ѥсть тврьдо и непрѣложьно ни ѡть тѣхь самѣхь ни ѡть иныхь хотещихь быти вь томь монастыри старѣишинамь , рекше игоумена и баще и иконома и еклисіꙗрьха и иже с ними. того ради кралевьство ми записоуѥ и оутврьждоуѥ и заклинамь и страхомь божимь запрѣщамь, ꙗко семоу не разорѥноу быти никакоже, нь доньдѣже стоить монастырь Хиланьдарь, и сиѥ записаниѥ да ѥсть тврьдо и непоколѣблимо. аще ли кьто дрьзнеть разорити ѥго, того да мьстить спась мои Христось и светоѥ ѥго вьзнесениѥ и прѣчистаꙗ богородица, вь мѣсто по(мо)щи да моу ѥ мьстительница, и да ѥсть проклеть ѡть всѣхь светыихь и ѡдь мене, ако и грѣшьнь ѥсьмь. и ѥще же благодѣти божии поспѣшьствоующии потьщахь се и испросихь оу господина и родителꙗ ми цара грьчьскаго, кирь Аньдроника, и оу вьзлюблѥнаго сына ѥго, брата кралевьства ми, цара грьчьскаго, кѵрь Михаила, оу строумьскои ѡбласти село именемь Коуцово с винограды и сь доходькы и сь всѣми правинами села тога блиизь сельь монастырскиихь соумегь с ними. и сега села не испросихь на име монастырьско, ни га дахь монастырю, нь да имь ѡбладаа старць прѣбываѥи вь семь пирьгоу храма светаго вьзнесениꙗ. и что сьмь даль ѡдь моѥга дома или живога или мрьтвога добытька, рекьше ꙗже соуть вьноутрь црькве на слоужьбоу и на оукрашениѥ црьквноѥ, кьниге, иконе, завѣси, чьстнии крьсти и сьсоуди златии и сребнии и ино все мало и голѣмо, такожде и извьнь црькве, ѥже ѥсть на потрѣбоу старцоу і иже с ниимь хотещиимь молити бога за доушоу кралевьства ми или виногради или маслице или кобыле или ѡвце или козе или говеда и все, що ѥ дало кралевьство ми на име пирьгоу, и що нѣ писано оу хрисовоулѣ монастырьскомь, с проста да нѣма надь тѣмь ѡбласти игоумень монастырьскии ни инь никьто ѡть монастырꙗ, нь старьць да ѡблада тѣмь. и что и ѥще оусхокѥ дати кралевьство ми на име пирьгоу, или що старьць самь притежии или добоуде или испросии ѡть коуде годѣ, и Сѵмеѡнь старьць прѣбываѥи вь пирьзѣ чьто си ѥ своѥ принесль, и що ѥ оу кого испросиль, вьсе тѣмьжде да ѥ ѡбразомь вь ѡбласть старцоу изьвьнь ѡбласти монастырскыѥ. симь же ѡбразомь оустависмо и ѡбьщиимь зьговорѥниѥмь кралевьства ми и всега сьбора, ꙗко да хотеи старьць прѣбывати вь домоу светаго вьзнесениꙗ рекьше оу пирьгоу да се не ставии ѡть иноуде, нь ѡть монастыирꙗ да се избираа доуховьнь моужь попь чрьньць, иже ѥсть подобьнь на този дѣло прьвыи по игоуменѣ и по бащи, и не по лицемѣрию и по любьви ѥднога игоумена или нѣкога ѡть старѣише братиѥ да се избиираѥть нь страхомь божиимь и ѡбьщиимь изволѥниѥмь вьсега сьбора светыиѥ богородице хиланьдарьские, и безь изьѡбрѣтениꙗ виины таковыиѥ да га не изьметоу никоимь оузрокомь, лише ако се ѡбрѣте до нѥга такова виина, ꙗже ѥсть подобна изврьдению, тогда да се ѡтставлюѥ, а дроугии пакь да се избираа, кои ѥ достоинь, да се поставии. и никьтоже да не дрьзнеть вьзети оть тога чьтоѡ, що ѥ дало кралевьство ми своѥи кѥлии рекьше пирьгоу, ѥже соуть вьноутрь потрѣбе, и ꙗже соуть извьнь црькве, ни игоумень ни баща ни икономь ни еклисиꙗрьхь ни инь никьто ни оу коупно име ни оу залогоу ни коимь ѡбразомь: аще ли кто вьзьметь и мало чьто, да га мьстии светоѥ вьзнесениѥ и светаа богородица хиланьдарьскаа, и ꙗкоже выше писахомь, да ѥсть проклеть ѡдь всѣхь светыхь и ѡдь мене, ако и грѣшьнь ѥсмь, понѥже азь ѥлика ѥсьмь даль монастырю и записаль и оутврьдиль хрисовоуломь кралевьства ми, тогази оу моѥмь животѣ не потькноухь ни разорихь, нь паче како ѥ записано и оутврьждено, такози да стои непоколѣблимо. и вась, господиѥ, прошоу и молю, ѥгоже богь изволии по кралевьствѣ ми господьствовати срьбскиимь кралевьствомь или сынь мои или сыновь мои или инь кьто ѡть соуродникьь моихь или инь кьто любо, сего да не потвориите ни разориите, понѥже и кралевьство ми првыхь писании и оутврждении не потвории, на господьствоующаго бо рекьше крала срьбьскаго прѣложихь сиѥ моѥ сьзданиѥ, и ѥже дахь вь дарь спасоу моѥмоу Христоу и светомоу вьзнесению ѥго, ꙗко сьблюдати, печаловати се и большаа придавати а не ѡтоузети ни мала чьта ѡть здѣ соущихь даныхь и записаныихь мною; такожде и игоумене молю и старѣишины монастырьске, и запрѣщамь и заклинамь тѣмьжде ѡбразомь не потькновеноу быти ими ничемоу ѡть здѣ записаныихь: аще ли кьто бога не боѥ се и чловѣкьь не срамлꙗѥ се и вьсхощеть разорити или прѣтворити или ѡтьнести чьто ѡть приложеныхь и оузаконѥныихь и записаныихь мною вь сиѥмь хрисовоулѣ, аще и тьь самь господьствоующии крааль срьбьске землѥ или ѡть тамо настоѥщиихь игоуменьь монастырьскиихь и братьства, тоѡ горѥ томоу, ꙗко ѡтиметь ѡть нѥго свою милость спась мои Христось вьзнесыи се вь славѣ кь ѡтьцоу, и проклетиѥ ѥмоу боуди ѡть того самого господа бога вседржителꙗ и ѡть прѣчистыиѥ ѥго матере, и поражень боудеть ѡть силы животворещаго крьста и ѡть ·ві· светыхь апостольь проклеть и ѡть ·тиі· светыхь ѡтьцьь иже вь Никеи и ѡть всѣхь светыхь ѡть вѣка богоу оугодившиихь, и да боудеть причьтень кь Июдѣ прѣдателю и кь ѡнѣмь рекшимь: крьвь ѥго на нась и на чедѣхь нашихь, и ѡть мене, ако и грѣшьнь ѥсьмь, и ѡдь богодарованаго намь вѣнца да ѥсть проклеть вь сиѥмь вѣцѣ и вь боудоущемь. сего ради писавь и подьписахь вь свѣдѣниѥ всѣмь.

† Стефань Оурѡшь по милости божиѥи краль и сь богомь самодржць всѣхь срьбскихь и поморскихь земль †.

Си чьстьни крьсть створи господинь краль Стефань Ꙋрошь и сынь великаго кралꙗ Ꙋроша домꙋ светіхь апостоль Петрꙋ и Павьлꙋ, ѣко да мꙋ е на здравіе и на спасенѥ и на ѡтпꙋщ(е)ньѥ греховь.

И крьсть створи епискꙋпь рашки Григориѥ вьтори, ѣко и она вьдовица две цете дад(оу)ще. кто вьсхощетьси крьсть ꙋзети ѡдь светихь апостоль или лѡть чьстьнога древа, да ѥ проклеть.

Крьстѡмь ѡграждаѥми врагꙋ противлꙗѥм се, не боѥще се казни его ни лаꙗна, ꙗко грьди ꙋпраздни се и попрань бьисть силою на древѣ распетаго Христа.

Стефанъ Урошъ Христу богу вѣрьнь, милостию божїѥю краль, самодрьжецъ всѣхь сербскихъ земль и поморскихь и хтїторъ. Симонида кральица Палеологїна, дщи цара Андроника Палеолога.

Мѣсеца ѡктомвриꙗ ·кѳ· прѣстави се великы вь милостинꙗхь свети краль срьбьски Стефань Оурѡшь.

Сии апостоль написа се вь дьни благородьнаго кралꙗ Стефана Оуроша третиѥго вьсѣхь срьбьскыихь земьль и поморьскыхь повелѣниѥмь арьхиѥпискоупа вьсѣхь срьбьскыихь земьль и поморьскыихь кирь Никодима, роукою оубогааго и многогрѣшнааго чрьноризьца Дамиꙗна и недостоинааго нарещи се, нь по милости божиѥи ѥрьмонаха, ѥмоуже ѡтьчьство гробь а богатьство грѣси и паракликиикь и ѡхьтаикь, оу Пеки вь градѣ рекомѣмь Жрѣлѣ, на славословиѥ светѣи троици вь лѣтѣ ·҂ѕѡлв· молю же вы, ѡтьци и братиѥ, кога богь сподобии чисти книгы сии, аще что боудеть вь нихь погрѣшено или гроубостию или недооумѣниѥмь моѥго безоумиꙗ, исправлꙗюще и проходеще чьтѣте и благословите, а не кльнѣте. а вась богь да простить и благословить.

† Пише кралевьство ми, да ѥсть вѣдомо всакомꙋ. створи милость кралевьство ми а поклисаремь дꙋбровьчскимь Жꙋню Влькасовикю и Жꙋню Дрьжикю и Жꙋню Лꙋкаревикю, да имь ходе трьговьци по землии кралевьства ми и по трьговѣхь и по пꙋтевѣхь, да имь нѣсть пакосте не и ѡдь кога ꙋ земли кралевьства ми, да ходе свободно, да се никьто за нихь не задегѥ: испакости ли имь кьто що или ꙋ трьгꙋ или ꙋ жꙋпѣ, да имь сплати вьсе жꙋпа; не исплати ли имь жꙋпа, да имь плати кралевьство ми из моѥ кꙋкѥ. и пакь имь створи милость кралевьство ми, и записа: аке им се где слꙋчи дрѣво, тере имь се разбиѥ на мори при земли кралевьства ми, да се за ѡнози дрѣво никьтѡ не задегѥ ѡдь властель кралевьства ми ни ѡдь велихь ни ѡдь малихь; аке ли имь се коꙗ чьтета ꙋчини ѡньдези, да имь сьплате ѡкольна села волꙗ градь, кои бꙋде; не сплати ли имь, да имь кралевьство ми плати из моѥ кꙋкѥ; кто ли имь що испакости трьговцемь ꙋ земли кралевьства или дрѣвꙋ, да приме гнѣвь и наказаниѥ ѡдь кралевьства ми, и да плати кралевьствꙋ ми ·е҃· сьть перьперь. а сию имь кралевьство ми записа милость на Дани м6сеца марта ·ке· дьнь на благовѣщениѥ, а ѡдь в(ьп)льщениꙗ христова тисꙋща и ·ткѕ· лѣто. а тꙋ бѣше воѥвода Младѣнь и тепьчи Владоѥ и чельникь Гюрашь, и Ранко рече писати.

Стефань Ꙋрошь краль.

† Страшно и славно сьмотрениѥ твоѥго чловѣколюбиꙗ, владыко Христе, всѣхь господи, и милосрьдноѥ сьнитиѥ на землю нась ради и рождьство неизреченьно ѡть дѣвы чистыѥ, юже положи застоупницоу и помощьницоу вьсѣмь вѣрнїимь, оутврьждениѥ и помощь и пристанище доушамь нашимь, ѥеже крьсоти и помођи желаѥ насладити се вси вѣрьнїи, земльнаа земли ѡставльше и тлѣнныхь прьстныхь ѡшьдьше, прїидѣте, вьзникнѣмь, на высотоу очи вьзнесемь и разоумь вьперимь, глаголюще кь прѣвѣчномоу и безначельномоу ѡтьцоу и благомоу владыцѣ небесномоу, творьцоу вьсеи твари, видимиѥ и невидимиѥ, и ѥдиночедомоу сыноу его, кь надежди и похвалѣ рода христїаньскаго, мнѣ же рабоу твоѥмоу по велицѣи милости твоѥи, ѡ владыко, творьче мои, азь Стефань, краль всѣхь срьбьскыихь земьльь и поморьскыихь, потьщахь се милїи сїи дарь принести кь врѣстветѣи богородици, рекомѣ Хиландари, каако прїиде кралѥвьствоу ми вьсечьстнїи игоумень Светые Гори Аѳона богородице хиландарскыѥ, кѵрь Гѥрвасиѥ, сь братиꙗми, и говорише кралѥвьствоу ми за села, що имаю мегю сели прѣчистыѥ стꙋденичке, и како дѣлѣ село Добродолꙗне сь ними на полѣ: и сиꙗ сьмысливь кралѥвьство ми и проразоумѣхь горкы сїи притраньныи чась сьмрьтныи, како прѣдьстати тебѣ владыцѣ Христоу моемоу, ꙗкоже и бывшїи прьвнїи цариѥ и светыи прародителиѥ кралѥвьства ми такожде и кралѥвьство ми испльни прошениѥ ихь, приложи кралѥвьство ми прѣчистои стоуденичкои село Ꙗринѥ на Иброу, а прѣчистои хиландарскои половина Добродолꙗнь, а дроуга половина си ѥсть била ис-прьва богородице хиланьдарскыѥ, и тази села кралѥвьство ми оутврьди хрисоволѥмь златопечатныимь, село Сламодража и село Добродолꙗне и село Непробища и село Момꙋша и Бела Црьква. а мегꙗ темьзи селомь ѡть села Трьнꙗ прѣчистыѥ стоуденичке прьвїи белегь Горачинь Лоугь и прѣко полꙗ оуправь оу камень оу Хоусть и брегомь на главичицоу и на поуть, кои иде прѣко слатиньске шоуме, и ѡдь Стоуденьчань оуправь прѣко Топлоухе и оу Ивань доꙋбь и оузь хридь дѣломь оу крьсть на поуть и прѣко шоуме оу мали габьрь и малѣмь поутемь оу понорь и прѣко шоуме, где се поутови стаю, и поутемь оу Медвегь Доль ѡть Хращань и поутемь оу Некатоу и ѡть Кострьца оуз дель на Горкоу Чрешню оу рьть граба и ѡдь Браишиньцьь дѣломь, како се ками вали, оу Браишин лазь оу Бѣли Брегь и оу доубь выше Тоурьтешеве Воде и ѡть Пагароуше на Не-чоуи-глась и прѣко оу врьхь дола, где се стаѥ с Папоуловомь роупомь, и прѣко дѣла оу великоу разьпадь и ѡдь Ꙗичищьь на Окроуглоу роупоу и оу плочю на поутоу на Радосаль Стоуденьць и на Чрьни Врьхь дѣломь сходеки и дѣломь, како се ками вали, и поутемь низь страноу на великїи поуть оуправь посрѣдѣ равьны прѣко дола на доубь оуправь на Боꙗновь Хридь и прѣко Гладишева Дола на Илїиноу Главоу и доломь на црьквоу Светоую Врачюю право прѣко Топлꙋхе на Коуканинь Стоуденць оуправь на щрьково гнѥздо прѣко Галичника прокосомь оу локвоу и прѣко поута призрен(с)кога оуправь дѣломь торажде до мегѥ трьнꙗньске исходеки оу Горачинь Лоугь. и сиѥ приложи кралѥвьство ми и оутьврьди. и кога изволи богь господьствовати по нась или сынь кралѥвьства ми или вьноукь или ѥгоже богь изволи, сиѥга не потворити: кто ли се потьщи сиѥ разорити врагомь наваждень, таковааго да разорить господь богь и прѣчистаа мати божиꙗ хиландарьскаа, и да га оубиѥ сила чьстнааго и животворещаго крьста и вь сїимь вѣчѣ и вь боудоущїимь, и да ѥсть проклеть ѡть ·тиі· светыхь ѡтьцьь никеискыихь и ѡть светаго Сѵмеѡна и Савы и всѣхь светыихь, и вь дьнь страшнааго испитанїа христова да се причьте кь всѣмь нечьстивїимь и поплювавьшїимь Ісу Христа, сына божиꙗ, и рекшїихь: крьвь ѥго на нась и чедѣхь нашихь. и сиѥ записа кралѥвьство ми вь лѣто ·҂ѕѡле· мѣсеца іюлїа ·ѳ҃· дьнь.

† Стефань благовѣрни краль сербскыхь и поморскихь земль.

† Вседрьжитель господь и творьць всачьскымь, сьдрьжеи ѡбластию вьсоу тварь, ѥдинь вь свѣтѣ приносоущнѣмь, вь трехь сьствѣхь прѣбываѥи, богь ѡть бога, свѣть ѡть свѣта, животь и животоу податель, прѣвѣчна моудрость и сила, иже безь матере на небесѣхь зьнаѥмь и пакы нашего ради спасениꙗ безь ѡтьца на земьли ѡть матере видимь, богь чловѣкь, да чловѣкы спасеть и вь прьвоую породоу вьведеть раискаго вечелиꙗ, вса прѣтрьпѣ на земли ходеи, ангеломь и архангеломь и вьсѣмь небеснымь силамь владыка и господь, похоулꙗѥмь и ѡклеветаѥмь, пороугань, расьпинаѥмь и смрьть поносноую приѥмь и вьскрьсь изь мрьтвыхь ѡть ада вьзведе ѥстьство чловѣчьскоѥ, на небеса вьзнесе се кь ѡтьцоу, апостоломь и оученикомь ѥго зьрещимь и жалоующимь ѡ разлоучени ѥго, имьже ѡбеща се послати прѣсветы доухь, и наставить ихь на вьсакоу истиноу, не тьчию ѥдинѣмь оученикомь ѥго нь и всѣмь вѣроующимь вь име ѥго. имже вьразоумлꙗѥмии и наоучаѥмии вьси светыи славоу полоучише, ѥѥже ѡко не видѣ, ни оухо слышаа, ни на срьдьце чловѣкоу вьзиде, и кьто довольнь изьглаголати силы господнѥ? кь немоуже и намь лѣпо ѥсть вьперивше срьдьчнѣи и доушевьнѣи ѡчи сьмысльно разоумѣти, кьто сьи ѥсть царь царемь и господь господемь, ѡтьѥмьлѥи доухы и царемь и кьнеземь, вь нѥгоже роукоу вьсако дыханиѥ сь страхомь и радостию припадати ѥмоу по пророкоу Давидоу рекшюмоу: работаите господеви сь страхомь, и радоуите се ѥмоу сь трепетомь; и пакы: вьзьмѣте жрьтвы, и вьходите вь дворы ѥго; и пакыи: принесѣте господеви славоу и чьсть, ѥгоже вьзлюбише ѡтьци наши, и на нѥго оупьваше, и спасли се соуть, вьзненавидѣвьше бо вьсего земльнаго попечениѥ вь доуховьны разоумь и страхь божи вьселивьше и измѣнише земльнымь царьствомь небесноѥ житиѥ и славоу неконьчаѥмоую, ѡставльше намь достохвальныѥ памети на земли, всакаго наслаждениꙗ и веселиꙗ напльнꙗюще доуше и телеса наша, рекоу же, Сѵмеѡна Неманю, прьваго и светаго господина ѡтьчьствоу любьца, просвѣтителꙗ срьпьскаго и новаго мироточьца, и ѡть нѥго рожденьнаго сына изь млада богомь вьзлюблѥнаго светаго и прѣѡсвещеннаго Савоу, прьваго архиѥпискоупа срьпскаго, и брата ѥго по пльти, прьвовѣнчаннаго крала Стефана, и по сихь всѣхь родитель нашихь вьсиꙗвшихь ѡть нихь и царьствовавшихь на земли, имже боуди вѣчна паметь, ѡть нихьже племене и азь грѣшьны и недостоины рабь Христоу, Стефань, краль и сь богомь самодрьжьць всѣхь србьскихь и поморскихь земьль, правноукь светаго Сѵмеѡна Неманѥ и вноукь Стефана прьвовѣньчаньнаго крала и сынь светаго и крѣпкаго и прѣвысокаго кралꙗ вьсѣхь срьбьскыхь и поморскыхь земьль, Стефана Оуроша, сынь и наслѣдьникь светаго корѣне ихь, вѣтьвь и ѡтрасль ѥдинородна родителю моѥмоу светомоу, вьзлюблѥнь вь срьдьци ѥго паче вьсего живота ѥго, подьпорь и крѣпость старости ѥго, злаꙗ моꙗ, ꙗже пострадахь, вь брьзѣ изьрекоу, не моѥ ради болѣзни, юже приѥхь, нь славы ради божиѥ, да вси слышеще по ссьемь наоучеть се любити господа и боꙗти се сь страхомь ꙗко бога всемогоущаа. тако оубо живоущоу ми вь любьви родительскои, и вь славѣ земльнои веселещоѥ ми се всегда, нь зьлы ѡкаꙗни диꙗволь, ис-прьва ненавидеи рода чловѣчьскаго, вьзбѣсивы братию продати прѣкраснаго Иѡсифа, брата своѥго, и вьложивы прѣдателю Июдѣ вь срьдьце прѣдати господа своѥго на пропетиѥ, забвыь вьса благаꙗ оучениꙗ и наслаждениꙗ, ихже наслади се ѡть оучителꙗ свѡего сь светыми апостолі, тьжде и зде вьсели се вь злонравиѥ и зломысоьныѥ чловѣкыи, ихже вьспитѣше светы родителиѥ кралѥвьства ми и само кралѥвьство ми сь любовию срьдьца ꙗко братию и чеда, иже ѡставльше бога и великоую любовь нашю забывше начеше по малоу сѣꙗти злыѥ плѣвелы междоу мною и родителемь кралѥвьства ми, намь разьличьновѣрьны сь льстию ꙗвлꙗюще се горьши и ѡканьнѣи невѣрныхь ꙗвише се, иже поревьновавьше моѥмоу добромоу житию сьвещаниѥмь злымь и неподобнымь наведоше ѥго на таковое дѣло страшьное и неподобное, ꙗко неоудобь слышати ни вь оумь чловѣкомь вьмѣнити, створише ѡ мнѣ, ѥже створише, и послоушавь ихь вь скорѣ свѣта очїю моѥю лиши ме, не потрьпѣвь ни испытавь истиныи ни расоудивь испытьно соуда, ꙗко соудь божи ѥсть; и ѥще кь семоу и вь заточениѥ вьдасть ме, и сь чеды моими прѣдати ме дрьжати вь Константинѣ Градѣ цароу Андроникоу, рекше, ꙗко по семь не ꙗвити се имени моѥмоу ни чедомь моимь ни видѣти землѥ ѡтьчьствиꙗ моѥг. благи же богь, ис-прьва вса вѣдыи и испытаѥи срьдьца, оукрѣпивы проданнаго прѣкрасьнаго Иѡсифа и створивы ѥго цара многимь ѥзыкомь и надь своѥю братиѥю, тьжде свѣдыи любовь и правьдоу срьдьца моѥго кь моѥмоу родителю ꙗви ѡ мнѣ великоѥ милосрьдыѥ своѥ, свѣть ѡчи моѥю вьзвративь просвѣти ме, и ꙗко ѡть самѣхь оусть смрьтоносьнаго ада истрьже ме, и изведь посади ме на прѣстолѣ светыхь родитель и прародитель кралѥвьства ми, и ꙗко цара и владыкоу постави ме господина вьсемоу стежанию ѡтьца моѥго, ꙗко не оутаило се ѥсть сиѥ страшьноѥ дѣло всѣмь дроугомь кралѥвьства ми, царемь и кралѥмь ѡкрьсть нась живоущимь и вьсѣмь странамь слышавьшимь. и богомь дарованьнимь вѣньцемь кралѥвьства срьпьскаго вѣнчань быхь на кралѥвьство вь ѥдинь дьнь сь сыномь моимь вь лѣто ·҂ѕѡкѳ·, мѣсеца генара ·ѕ҃· дьнь, индикта ·е҃·, вь праздникь богоꙗвлѥниꙗ, благословениѥмь и роукою прѣѡвсещеньнаго арьхиѥпискоупа Никодима и всѣхь ѥпискоупь и вьсего сьбора срьбскаго, ꙗко зьвати се Стефань богомь помилованы и богомь просвѣщены краль Оурошь третии. азь же веселе се доушею и тѣломь ѡ божьствьнѣмь дарѣ, ѥже ми дасть, владыко мои Христе, и сь вьзлюблѥньнымь сыномь кралѥвьства ми, младимь кралѥмь Стефаномь, что ти вьздамь, владыко мои Христе, за вса, ꙗже ми вьздасть? ꙗко падша ме вьздвиже и оумрьщьвена ме ѡживи. и вь оумь вьсприѥмь страшны чась смртны, ꙗко вси пророци и апостоли и моученици и светителиѥ и цариѥ смрьтию скончаше се, и ни ѥдиньже ихь не изьбысть, вьси вь гробь вьселише се, и всѣхь приѥть землꙗ ꙗкоже и маті, и боѥ се, ѥгда на соудѣ твоѥмь вьзоупиють ангели: понесѣте дѣла, да мьздоу примете, кь тебѣ припадаю вѣдоущоумоу вса моА прѣгрѣшениꙗ ꙗвленьнаꙗ и неꙗвленна, трѣбоуѥ твоѥ помощи великиѥ и боѥ се ѡть вьсеѥ доуше и желаѥ послѣдовати оучению и дѣломь добримь светыхь родитель и прародитель моихь и недостатьчьнаꙗ ихь испльнити и сврьшити, и вь сихь всѣхь блажю и славьлю Савоу блаженьнаго и прѣѡсвещеннаго, паче всѣхь троуждьша се ѡ светыхь заповедехь божихь, ѥгоже и самь Христось оублажи и прослави на земьли и на небеси неизреченьною славою, иже оукраси і прѣѥ прѣстоль кралѥвьства срьбьскаго, арьхиѥпискоупию сьзда, и иниѥ многыѥ црькви ѡть начела сьзда, и оукрасивь постави вь нихь чьстныѥ моужи, ѡвы ѥпискоупы, ѡвы игоумени, и мьного мьножьство сьбравь чрьньць и и всакого чина црьковнаго на славословиѥ божиѥ прѣдасть дрьжати по чиноу своѥмоу, иже и зде вь мѣстѣ семь нареченьнѣмь Дѣчани вь жоупѣ затрьнавьскои ѡбрѣть мѣсто красьно и подобно на сьздани҅ домоу божиꙗ, назнаменавь и прочеѥ благослови светыма роукама своима быти ѥмоу мѣстоу свѣтилищьномоу, нѣкакоу врѣмени емоу не оуспѣвшоу сьздати си храмь вьзиде на прѣнебеснаꙗ села кь любімомоу ѥго Христоу, вьзискаѥ намь сврьшеннаго спасениꙗ, ꙗко пастирь истинны всегда пекы се ѡ стадѣ своѥмь: мнѣ же грѣшьномоу и недостоиномоу рабоу сего светаго, Стефаноу, богомьь помилованьномоу кралю вьсѣхь срьбьскыхь и поморьскыхь земль, Оурошоу третиѥмоу, молитвами ѥго ѡтькри се скровище сиѥ скрьвеньноѥ на сиѥмь селѣ симь светымь господиномь моимь, и за толико врѣме мьного пощедѣно мнѣ и сыноу моѥмоу младомоу кралю, начехь здати домь господеви богоу моѥмоу паньдократороу, и сьздавь оукрасихь всѣми красотами вьноутрьними и вьнѣшними, и нарекохь ѥго игоумениꙗ ѡбьще мѣсто чрьньцемь сь благословениѥмь господина ми и ѡтьца Данила и всѣхь ѥпискоупь и вьсего сбора србскаго, и ѥлико ми бысть вьзможьно приложити храмоу семоу сель и катоунь вьлашькыхь и арбанашькихь и кьнижиꙗ и чьстныѥ крьсты ѡкованьныѥ и позлакенниѥ сь бисеромь и камениѥмь и иконе красне и разлічне ѡкованиѥ златомь и сребромь сь вьсакымь оукрашениѥмь и чьстныѥ сьсоуди свещениѥ и каньдила и рипидиѥ и кадильнице и свѣщникыи и красними рызами и петрахили и нароуквицами и набедрьницами и трафезафори и завѣси и фелоны и диплами и всакими красотами на просвѣщениѥ домоу божиꙗ и ина многа притежаниꙗ ꙗже на крьмоу и на ѡдѣниѥ всѣмь слоужителѥмь црьквнымь и маломощьнымь и страннимь, вь паметь и вь помень мнѣ и сыноу моѥмоу и всѣмь родителѥмь и прародителемь кралѥвьства ми вь вѣки аминь.

І еще приложихь кралѥвьства ми виноградь подь монастирь сь всѣми мѣгꙗми до великога поута и до воде, коꙗ тече оу Дечане, и до црькве светые троице; и виноградь дечанинь сь всѣми мегꙗми до црькве светаго Геѡргїꙗ и до поута до великїе цѣсте и до црьвенобрешкога потока; и еще приложихь кралѥвьства ми землю Быволꙗкь сь всѣми мѣгꙗми до прѣке цѣсте и до Быстрыце и до воде, коꙗ тече Кроушевцоу, и до Папракꙗни прѣко до Быстрыце; и виноградь Харць, мѣгꙗ моу поуть кои исходї ись Ч(р)бвенога Брега до великїе цѣсте, коꙗ тече подь Чрьвени Брегь, и прѣко до чрьвенобрѣшке ниве и ѡдь изьгорь прѣма црькве светаго Гѥѡргїꙗ.

Село прьво Дѣтчани заселки и сь мегꙗми, а село Лоучане, заселькь дѣчаньскы, и Бѣлѣгь заселькь дѣчанскы, Чрьвени Брѣгь заселькь дѣчаньскыи. а Датьчамь мегьѥ ѡдь Чрьвенога Брѣга на Гомилоу оу рѣкоу и ѡдь Роусални оу локвоу, ѡдь локве прѣдь Николиноу црьквь оу рѣкоу; а планине имь Геровица и Шипь до Тоуртеша и до Илочице. село Истиники и всѥми мегꙗми. а планина имь Плѣшь на Боукови стоуденьць (до Гозне Главе на Доучиноу Главоу) до стрѣлчьке мегѥ. село Папракꙗни и своими мегꙗми, а мегѥ моу сь Кроушевцемь и сь Бродлики до Прѣке Стѣне на Ѡзрислале коукѥ; село Стрѣльць, а мегѥ моу на Степаню црьквь, на Заблатиѥ, на Теклище, на Богоѥво селище, на три ѡрахе и оу рѣкоу и на Градище, на три крьсте, на Доубовникь стоуденьць оу прѣкоу цѣстоу до соухе Любоуше и оу планиноу на Космьче лазе оу планиноу до гроба мегьнога; село Люболики, а мегꙗ Люболикемь с Ораховичики, како сходи сь планине срѣдни доль на срѣдиноу трьгь на поуть, кои исходи изь Люболикь на мраморь дроуги и мьраморь на срѣдь доубраве на нивоу излазеке на трети мраморь на поути, кои походи изь Ѡраховичикь оу брьдо, и четврьты мраморь на великои цѣстѣ, такоре оу ѡрахь посрѣдь Блатьца и низь Соушницоу великомь цѣстомь на Радотинь Потокь, а вода, коꙗ изь Блатьца потече, да имь ѥсть на полни. заселькь Люболикемь Бохорики и своими мегꙗми; село Храстовица засельки и своими мегꙗми; Прилѣпи заселькь Храстовицы; Прѣки Лоугь заселькь Храстовицы, а мегѥ Прѣкомоу Лоугоу сь Чрвенимь Брѣгомь, како рѣка тече мегю село и оузь рѣкоу оу Бигорь стоуденьць, такоре право малимь поутемь подь ливадоу и оу локвоу оу Соуходоль; село Бабе и сь мегꙗми, а се мегѥ Бабамь зь Добрьчимь Доломь: ѡдь тополе на мраморь, на локьвоу и на дроугоу локвоу, на хридоу, на Кокошь стоуденьць, боучимь поутемь, како испада боучии поуть, и стаѥта се ѡба поути на мрамороу оу локьвоу и оу рѣкоу Трьнавоу; Грьмочель засельки и с мегꙗми, а се меге Грьмочелоу сь Ливьлꙗни: мьраморь и поутемь на тополоу а зь Дрѣвод҆ломь мегꙗ Илиино брьдо, како спада оу Ѥлшаницоу, а Рогатьцоу мегꙗ оу Ѥрьдань, како пристаѥ оу Ѥлшаницоу, а Рогатьцоу мегꙗ сь Прѣкимь Лоугомь подь Саковьць, и како Трепетьникь потече изь Прѣкога Лоуга, и пристаѥ оу Стльпьчаницоу; село Оулокꙗне и своими мегꙗми; село Чабике засельки и сь мегꙗми: мегѥ Чабикю сь Щитарицомь с Оунѥмиромь ѡдь Гоубавьча потока великомь цѣстомь и оузь брьдо надь виноградь и ѡдь винограда оуз Роудинѣ҆ на локвоу, ѡдь локьве низь поуть на доубь, ѡдь доуба на дольни поуть конь ниве, кои греде изь Ѥльшанице прѣко Власѣнога Полꙗ оу призрѣньскоу цѣстоу, коꙗ греде изь Трѣбче, и поутемь до Млѣкꙗни, ѡдь Млѣкꙗни прѣко до Трьна. а мегꙗ Степани црькви сь Чабикемь, како оупада Соухы Доль оу потокь, и оузь Соухии Доль подь Кикени доубь на Регѥвь стоуденьць и поутемь на Игларевь стоуденьць. а Чабикю мегꙗ зь Гюрьгѥвикомь: ѡдь Игларева, и где се стаѥта ѡба поути изь Дрьстьника и изь Гюрьгѥвика, такоре по дѣлоу на доубь, на мраморь и на Рогьль Сватове Полꙗне и по дѣлоу на локвоу, ѡдь локьве дѣломь по срѣдь стльпа низь Дльбоки Потокь оу рѣкоу оу бродь. а се мегꙗ Щитарици зь Гюрьгевикомь: ѡдь рѣке на црьквь, ѡдь црькве оузь дѣль Возникомь прѣзь доль Дльбочакь, оузь дроуги дольць на Влашьки лазь и оузь дѣль надь Влахе на Возникь, кои греде до по дѣлоу мегю Ресникь и мегю Толановиноу и мегю Щитарицоу и дѣломь, кои греде мегю Щитарицоу и мегю Ѡвьчарево и на ѡпогорь, кои дѣль спада мимо Власѣно Поле и ѡноугѥ мегьника, тѣмьзи дѣломь и право оу рѣкоу на мраморь и такоре прѣзь рѣкоу и прѣзь бароу оу Гоубавьчь потокь, кои походи изь Ꙗзвине. заселькь Чабикю Добродоли, що даа кралѥвьство ми икономоу Раданоу иѥговѣ братии оу бащиноу, да си населе, а мегѥ моу: ѡдь Недѣлине црькве поутемь по дѣлоу оу стоуденьць оу Сватовоу Полꙗноу и низь Воихьнинь доль оу Ꙗщвиноу, низь ꙗзвинь на дѣль и подь Грьдановоу нивоу подь Ковачевь лазь оу Трьнь оузь дѣль надь Оурви, такоре оузь дѣль такоре право оу велию цѣстоу оу Недѣлиноу црьковь. Срѣдне Село и с мегꙗми, село Коуманово и своими мегꙗми, а замѣни ѥ кралѥвьство ми арьхиѥпискоупоу Данилоу за Ꙗбланицоуоу. Алтинь заселькы и сь всѣми мегꙗми. а се мегѥ вьсемоу Альтиноу: Маторскы Прѣслопь на Тльсто Брьдо, на Виноградище, како оупада оу Жрьково оу слатиноу, такоре подь Родогощоу поутемь и подь Дльгоу оу борь, ѡдь бора оу Слѣпни Потокь, ѡдь Слѣпнога Потока на Равьниѥ, сь Равьниꙗ на Хльмьць, сь Хльмьца оу Оумечиноу на велию главоу и прѣко оу Дрочинь камыи и оу проуде оу борь, ѡдь бора по дѣлоу оу Вратницоу и по дѣлоу на Чрьнь Камы, и по дѣлоу оу Трѣскавьць надь Добри Доль по дѣлоу и на Брьньць на Оуѥзьдноу оу Хомориѥ и поутемь оу потокь оу Планьникь, сь Планника право оу Врѣло. село оу Плавѣ Градь, а мегѥ моу: ѡдь горьнѥга Града посрѣдь Медьвѣгѥ Главе оу доубь, и како дѣль спада оу бароу, и како бара пристаѥ оу Лимь, и пакь горѣ оузь брьдо оу ‚рѣзовоу Равьнь, и дѣломь оу Лысьць прѣзь Высаторь оу Соуха Бора низь Мрькыи Доль прѣма Варьдищемь и прѣко оу Чрьвеноу Стѣноу право оу дѣль и низь дѣль оу прьвы потокь выше Петрове црькве, и како пристаѥ потокь оу Лимь, а замелькь Градоу Ꙗре. село Комарани, а мегѥ имь сь Рибары: ѡдь витичрѣвьскога потока прѣзь Комарьщицоу оу хридь, оузь хридь на планиноу по дѣлоу оу Плавь на ѡпогорь надь Трѣскавьць подь рыбарьске сѣнокосе прѣзь потокь трѣскавьчкии оузь рьть прѣко посрѣдь Боучиꙗ и посрѣдь льнищь оу велии врьхь оу ѥдражькыи и на ѡпогорь по старои меги посрѣдь нивь оу Грѣшьню старомь мегомь оу главицоу оу рѣкоу Чрьвщицоу и низь рѣкоу, како стара Чрьвьщица оупада оу Лимь. село Великаа: а мегѥ Велицѣ сь Рьжаницомь оу Петковоу црькьвь и конь Бѣлошева брѣга оу дѣль, и како се ками вали оу Великоу и Рьжаницоу, оузь дѣль оу планиноу Драгоила до хрисовоула светостефанскога и до гвозда оу Грохоть конь Носа оу Сальче гладе прѣко оу Стражище и низь потокь витичрѣвьски, и како пристаѥ оу Комарьщицоу планина Рьжана и локьва. село Трѣбьча: а меге моу з Досоугемь оу границоу оуз доль мегю Градьца оу поуть и оу Заградьци оу брьдьце оу Высокии Крьшь конь дѣла и по дѣлоу надь Трѣбчю, како се камыи валии, и пакь оу Выситорь оу Кикѥно Дрѣвце оу Ѡбрачю Стѣноу оу Крьшиць оу стоуденьць, ѡдь стоуденьца право оу Копанни Брѣгь на блатѣ. село Грьнчарево: мегꙗ Грьньчаревоу з Досоугѥмь оу Лоукинь вирь оу кми оу заводищноу главоу на велии врьхь оузь дѣль, а зь Гоусиномь мегꙗ оузь хроусоувоуль светостефанскии ѡдь Пеки оу Литоу Стѣноу оу Камене Строуге оу Ꙗворови Доль оу Прѣдѣльць оу брѣсть низь Волскоу оу Бѣлии Потокь посрѣдь Годылѥ выше Бабине Боукьве оу Драгомань Лазь конь Дльгихь Лоукь низь Врьмошоу конь Бабина Лоуга низь рѣкоу конь Кривачь оу Трьновьщицоу и конь Прѣровьниць оу Ѡсрѣдкь оу мочила конь Стрьмоглавьниць и конь Попове Лоуке оу врьбоу оу Трифоунь Крьсть. село Врьмошаа: мегꙗ Чрьнимь Горамь мегю Плавомь и Боудимломь конь Козиега Хрьбьта оу локвоу и право оузь брьдо мегю Бенчю сь градьчкомь мегомь и право оу велиѥ брьдо и оу вели ками и на ѡпогорь по дѣлоу крозѣ гьвоздь и спадаюкѥ з дѣла прѣма Лоуковимь Потокомь, а ѡдь Зьле Рѣке, коудѣ се ни ѡре ни копа, този все планина, и прѣзь потокь оу поуть, како спада сь Липовице, и право оузь брьдо оу локвоу на врьхь и низь Бориѥ оу Радошевь камии, а ѡдь Врьмоше, коудѣ се ни ѡре ни коси, този планина. а Рикавьцоу мегꙗ Скроботница. а се планине плавске: Хотина Гора, Щирьнице, Добра Водица, Седьми Бори; а мегꙗ имь: ѡдь Седьми Борь поутемь оу стоуденьць, такоре оу Трѣскавьць, ѡдь Трѣскавьца оу Лоучьницоу, ѡдь Лоучнице оузь дѣль оу Сѣченоу Стѣноу и по дѣлоу оу Доброу Водицоу, ѡдь Добре Водице оу Хотишь, ѡдь Хотиша оу Рьжаноу, ѡдь Рьжанꙋ поутемь на борь оу кроушевьскыи дѣль, ѡдь дѣла оу потокь конь полꙗ. село Добра Рѣка сь засельки и сь вьсѣми мегꙗми и оу нѥи оурочьни конюси, кои соу были оу старе кралице; а се мегꙗ Доброи Рѣцѣ: до Лима, ѡдь Лима оу Лоучинь Крьсть, ѡдь Лоучина Крьста оу Бьхнь, ѡдь Бьхнꙗ по ртоу Прѣвыне оу планиноу Стльбицоу и оу локвоу и оу рьть оу Торьць по дѣлоу на Врато и по дѣлоу трѣбьчьке планине и по дѣлоу мимо досоугьскоу планиноу и по дѣлоу до планине грьньчаревьске оу Липовицоу и поутемь низь Липовицоу и оу Чрьнии Потокь до светостефаньскога хроусовоулꙗ. а Комома мегꙗ до градьчькога хрисовоула и ѡдь Комоу оу Щавьноу Полꙗноу и по дѣлоу оу Вѣтрошевице оу Велии Пехь оу Драгалѣѥвь потокь и низь потокь оу рѣкоу и низь рѣкоу оу Лимь. и приложи кралѥвьство ми ѥклисиарха Василиꙗ Леѡньдичевикꙗ и сь ѥговѣмь селомь Зерьзевомь, а мегѣ моу зь Брестовьцемь, како потече бара изь Дрима и ѡдь баре на Илииноу црькьвь до половине лоуга на поуть бѣлоцрьковьскы, а сь Постелькаки мегꙗ ѡдь Медьвѣгѥга Дола, како греде плочькии поуть на Раика Постельщака коукю и на Засѣдалище и посрѣдь Градища оу Дримь и по ѡнои странѣ Дрима на Цѣстьнь, како ѥ Дримь текль подь велии брѣгь; такожде и Прокопиꙗ Богьдановикꙗ сь братиѡмь и сь селомь сь Палежи и сь вьсѣми мегꙗми оу брьсковьскои жоупѣ; и оу любовигьскои жоупѣ Марько Костикь и сь дѣцомь и сь селомь Ꙗбдьчьномь и Чрьни моу Врьхь заселиѥ. оу Комьщици сѣно да се коси, а мегꙗ моу ѡдь Гѥвьчине, како поуть греде оузь гороу оу Кошоутоу, и горѣ оу Савинь сѣнокось. власи Ратишевьци и своимы мегꙗмі; власи Соушичане и своими мегꙗми; власи Варьдищане и своими мегꙗми; власиЛѣвьчиновьци и своими мегꙗми; власи Тоудоричевсци и своими мегꙗми. а се кто хьте быти сокалници: оу Дѣчахь Краиславь и Михое, оу Бѣлѣзѣ Ꙗрославь Оувратичевикь, оу Папракꙗхь Прѣдакь и Прѣꙗ Павловикь, оу Истиникихь Радославь Богдановикь и Тоуль и Мироѥ Срдановикь и Прибоѥ Бранковикь, оу Люболикихь Михоило Драгославикь и Мирадь Драгобратикь, оу Храстовици Тошань и Милеша и Драгина и братиа, оу Прилѣпѣхь Влико и Станимирь Нѣгоѥвикь и Ѡзроѥ и Ранко сь Воихномь заѥдно и Драгомиль и Храниславь, оу Бабахь Радомирь Прибичикь и Зорань, оу Грьмочелѣ Добровои и Шиша и Демонь и Торникь и Драико Шапрановикь, оу Чабики Прѣлюбь Бероѥвикь, Прибьць Хранетикь, Милошь Толѥновикь, Доумица, Добрьчинь Храньчикь, Радославь Щрьбьць, Богоѥ Братомиликь, Драгомань, Хлѣчько, Гоимирь, Итоулꙗ, Хранень, Воико, Боудьникь, Боуꙗнб сб Прѣдиславомь, Воико Доброшевикь, Станко Гроубшикь, Мирько и зетемь с Воиломь, Боудимирь, Бритьва, оу Плавѣ оу Велицѣ Ѡбрадь Радиновикь, Помень, Прѣдое, Храниславь, оу Комарахь Радославь, Аньдрѣꙗ, оу Трѣбьчи Лоука, оу Грьньчаревѣ Радоуи и Богоѥ Богоутовикь и Радославь Любослаликь, оу Врьмоши Толоѥ и Хранота, Милиꙗкь оу Доброи Рѣцѣ Лилꙗновикь Смиль, Витань Выльчикь, Добретько Гюликь. а се магюпьци: оу Велицѣ Владое, Дроужоѥ, Драгоило, Нѣгославь, Драгошь, Котылько, Ранко, Гюроѥ, Станько, Градоѥ, оу Комарахь Радинь Станьшикь, Милославь, Мироѥ, Миловань, Мильгость (Гюроѥ Добрикь, Радетько Милоѥвикь) Милославь Мьгликь, Драꙗ Драговикь, Ѡбрадьць, Драгоунь Срьдановикь, Ранко и брать моу Богоѥ, Хранимирь, Богдань, Крьчелѣи. Сѣди альтинꙗнинь; Захариꙗ и Михаль, оу Пилотѣ оу Никитѣ, и ѡстависмо ихь, аа да даваю црькви свиле за вьсако годище, Захариꙗ ·д҃· тосоуке, а Михаль ·в҃ꙵ тисꙋки. посади игоумень Арсѣниѥ Милоша Братослаликꙗ и сь родомь оу Трьнавѣ, да забѣла блюде. и ѥще благодати божиѥи поспѣшьстьвоующи мии ѡбещахь се господеви моѥмоу паньдократороу, да ми поможе на соупротивьницы моѥ на цара бльгарьскога, и поможе ми, и приложии кралѥвьство ми село Рьзиникѥ и сь всѣми мегꙗми и ·в҃· катоуна влахь, а се планине: Плѣшь, Гѥровица, Плочица, Тоурьтешь, и коупи кралѥвьство ми оу Витомира Оуѥздноу, и сиѥ все планине своими мегꙗми. а се законь мѣропьхомь, кто землю дрьже, да ѡроу: ·ѕ҃· мьти пьшенице, ·в҃· ѡвьса, ·в҃· проса; ·в҃· винограда мьть мѣромь, ꙗко и по инихь црьквахь, зьгона да имь нѣ, бѣдьвоу да имаю, и що оузороу бѣдьвомь, този да се бѣдьвомь истежи. а сокальникомь законь: пьшенице мьть, проса мьть, ѡвьса мьть, винограда мьть. а ковачиѥ и златариѥ и седьлариѥ и шьвьци и стрьгоуниѥ и вси маисториѥ да работаю и ѡрю ꙗко и сокальници; и что хоте сокальници и вьси маисториѥ тежати жито и вино, вьсе да сьврьстовавьше и прѣдаде оу црькьвь. а сѣно да косе какл и мѣропси тако и сокальници тако и вьси маисториѥ; и коꙗ села сѣна имаю, да га такози и косе; а оу коѥмь селѣ нѣ црьковнога сѣнокоса, а ѡни да косе, где ѥ игоумьноу зьговорьно сь зьборомь; ꙗгнетиноу вьсакь да даѥ, а попове да даю врьховиноу, како ю сꙋ и оу пискоупа давали, ѥре коупи кралѥвьство ми тоузи врьховиноу оу пискоупа хвостьньскога; мѣропьша работа чьтице житотрѣблѥниѥ; сладь да чине вса села, коимь игоумень повелии; ѡтроци, кто с игоумьномь на поуть гредоу а или с коимь калоугѥромь по црьковьнои работѣ, да се црьковьнымь брашномь хрании, а кьто самь греде по црьковьнои работѣ, да се ѡдь коукѥ храни; а виноградь всакь да копа или попь или кто любо, кьто землю држи; и ако се по нѣкоѥмь грѣхоу нанесе погорѣти монастырю, ѡтроци да помагаю дѣлати; влахь, кто кобиле пасе, да не оузима бѣлѣга ѡдь кобиль, но да се храни мѣсечиномь, а кьто ѡвце пасоу, да оузимаю на гѥѡргиѥвь дьнь ѡвцоу сь ꙗгнѥтемь, а что изьгоуби, да плати, а мѣсечиноу да оузима; срьбинь да се не жени оу власѣхь, ако ли се ѡжени, да ю веде оу мѣропьхе, и да ѥ нѥ мѣропьшькы законь и оуноучию ѥѥ; землꙗ црьковна да се оу бь(хь) никомоу не дава; а кьто прииде к црькви, ако ѥ сокальникь, да се кь сокальникомь присади, где боуде ѡбилиѥ землѥ. ѡдьтеса да нѣ ни ѡдь когаре села ни болꙗриноу ни сокальникоу ни попоу; а за ратаѥ, колико има игоумень плоуговь оу коѥмь селѣ, ѡдь тогагѥре села да постави ратаѥ, кога хокѥ; и оу коѥмь любо селѣ кьто се маисториѥ ѡбрѣтаю, тере се разьроде ·г҃· волꙗ ·д҃· сынове, да ѡстане ѥдинь на своѥмь мѣстѣ, а ѡстали да постоупе оу сокальнике; ако ли си оузьлюби оузети землю ѡдь мѣропьшьке землѥ, а ѡнь да постоупи оу мѣропьхе; поповьсци сынове кто кьнигоу изоучи, да стои с оцемь на своѥмь ждрѣбию: ако ли книге не изоучии, а ѡнь да ѥ мѣропьхь; а да се попь ѡдь попа ставии: ако ли мѣропьшикь книгоу изоучи, да ѥ мѣропьхь. села товара да не носе, нь да храни всако село по ѥднога конꙗ коудра, да носи црьковни товарь: да ако оумьрѥ подь црьковнимь товаромь, да га црькьвь на мѣсто постави, ако ли оумре оу селѣ, да га село на мѣсто постави. послоухь роука печать ·д· динари а за праждоу, како ѥ законь по срьбскои земьли, црькви половина а наводьчии половинаа. власи законьноу соль да носе ѡдь доходька црьковнога, а чьто веке донесоу, да ѥсть половина црькви а половина влахомь: ако ли црьква оузьлюби, и този да имь ѡдькоупии. сии вьса сврьшивьше, спасе мои, и прѣдахомь божьстьвьнѣи и неизьреченьнѣи дрьжавѣ твоѥи, ты бо ѥси датель благыхь, источникь всакомоу данию неѡскоудьныи, оуслышитель всѣмь призывающимь те истиною, не хотеи ниѥдиномоуже погибьноути, нь повелѣваѥ вьсѣмь спасти се и вь разоумь истиньны приити, вьсачьска бо оудывлꙗють се таковомоу сьмотрению, ꙗко за наше спасениѥ вьчловѣчити се изволи, и показа славоу свою оученикомь своимь, и намь дарова вѣньць царьства земльнаго, и показа славоу свою прѣдь цари земльными и многими ѥзыкыи, и пакы готоваѥ намь вѣньц царьства небеснаго, рече бо вь светѣмь своѥмь ѥѵаньгели: придѣте, благословени ѡтьца моѥго, наслѣдоуите оуготованьноѥ вамь царьство небесноѥ; и пакы: идеже дьва или трьѥ име моѥ призовоуть, тоу азь ѥсмь посрѣдѣ ихь; и пророкь Давидь глаголѥть: се коль добро и коль красьно ѥже житии братии вь коупѣ. ѡ семь бо завеща господь животь вѣчьнии, сего ради и азь грѣшьныи и недостоиныи рабь Христоу Стефань Оурошь ·г҃· , богомь помилованьны краль всѣхь срьбьскыхь и поморьскыхь земьль, сьбрахь зьброь срьбьскыѥ земьлѥ арьхиѥпискоупа и ѥпискоупии и игоумени и казньце и тепьчиѥ и воѥводы и слоугы и ставильце, и зьговорихь се сь ними, и приѥхь благословениѥ ѡть господина ми и ѡтьца арьхиѥпискоупа Данила и вьсѣхь ѥпискоупь и вьсѣхь игоумень и ѡть вьсего сьбора срьбьскаго ѥже ѡ приложении храмоу семоу; и кьто исповѣсть, ꙗ ѡ мьнѣ милосрьдиꙗ божиꙗ? показа чюдо дивнѣѥ и славьнѣѥ всѣхь чюдесь. храмоу семоу жиждемоу и сиѥмоу хроусовоулоу записаваѥмомоу вь домоу кралѥвьства ми оу Породимьли вьнезапоу побѣди се царь бльгарьскыи Михаиль Шишьманикь сь инѣми сильними ·д҃·ми цари и сь иноплеменьними ѥзыкы и мьногими погании, на брань кралѥвьства ми прѣѥти хоте срьбскоу землю: азь же противоу ѥмоу изьшьдь и сь вьзлюблѥнимь сыномь кралѥвьства ми, младимь кралѥмь Стефаномь, и сь всѣми властели кралѥвьства ми и вьздѣвь роуцѣ на небо и рекохь: слава тебѣ, прѣвѣчьныи цароу, ꙗко неправедно помышлѥниѥ и неподобьно сьвещаниѥ сии цариѥ свещаше ѡ мьнѣ; и бывьшеи рати голѣмѣи сь помощию божиѥю и молитвами светыхь родитель и прѣродителии кралѥвьства ми цара Михаила оубихь, и ѡтьѥхь поношениѥ ѥго, и иныѥ царе побѣдихь и разьбихь, и вьзехь достоꙗниꙗ ихь на мѣстѣ рекомѣмь Вельблоуждь вь лѣто ·҂ѕѡли· мѣсеца июлꙗ вь ·ки· дьнь. да тѣмь оубо слышавьше, боголюбиваꙗ чеда, разоумѣимь ѥже на нась милосрьдыѥ божиѥ, потьщите се сиѥ моѥ приношениѥ и дарованиѥ храмоу семоу не тькьмо чьто разорити или ѡтьнети, нь паче и недостатьчьнаꙗ исьпльните, имамь бо вьси живоущеи на земли сьмрьть вькоусивьше гробоу прѣдати телеса наша. да ѥгоже богь изволить кралѥвьствовати по мнѣ вь богодарованнѣмь ѡтьчьствѣ нашемь, на того вьзьлагаю всакоу помощь и ѡсветоу, да аще кто дрьзнеть разорити ѡть записаньныхь вь хрисовоули семь вьноутрь нихь домоу или ѡть вьнѣшьнихь, таковыи да боудеть проклеть и завезань вь сии вѣкь и вь боудоущии ѡть господа бога вседрьжителꙗ и ѡть прѣчистыѥ ѥго матере и ѡть вьсѣхь светыхь ѡть вѣка богоу оугодившихь, и да ѥсть причьтень Июдѣ прѣдателю и Каиноу братооубиицоу, и да не сьмилить се господеви ꙗко и Содомь и Гоморь, и да станеть на соудищи сь ѡтьрекьшими се славы божиѥ и рекьшими: вьзьми, вьзьми, расьпни, крьвь ѥго на нась и на чедѣхь нашихь, и ѡть богодарованьнаго намь вѣньца да боудеть проклеть и завезань аминь.

† Стефань Оурошь ·г҃· по милости божиеи краль всѣхь срьбскихь и поморьскихь земьль.

҂ѕѡм. Мы Стефанъ Ꙋрошъ ·г҃· Неманѧ ·е҃·, милостїю божїею царь всесрбских и поморских земль, сей крестъ честное древо, на немже распет се господь нашъ ꙶІисоусъ Христосъ, приложихъ домꙋ пандократорову зовомь Дечани неотето во будущыї вѣ҆къ, ꙗкоже въ русоволи завѣщано есть.

Светыи Стефанъ краль дечанскїи ·҂ѕѡм·

Господь с небесе призре видети сини члѡвечаские и ꙋслишати глась всехь ꙋпвающехь на нь, дрьжеи ѡбластию всꙋ тварь, имже царие царствꙋють и мꙋчителие дрьжеть землю, богь единь Исꙋ Христь вьчера и данась таждо и ва виеки, изабравии светее рѡдителе и прарѡдителе кралевства срьпские земли и пѡморские и прѡслави ихь паче всехь царь земалнихь на земли и пакь на небеси вѣнци свѣтлиеми ꙋкрасивь ихь савсимь светиеми, ꙗкѡ не ꙋтаила се есть всеи васеленеи блаженаѣ ихь паметь. ѡт нихже племене и азь изабрань бихь помѡщию бѡжьею и пречистеи его матере и молитвами ихь Степань, милѡстью божьею краль всиехь срьпсцихь земаль и пѡмѡрскихь, иже не далече ѡть нихь пльтью, на правьнꙋкь и ванꙋкь, сии же и сьнаследникь истини ѡть светаго ихь корѣне, повелѣниемь и сꙋдѡмь божиемь приемь всꙋ државꙋ срьпские земле и сѣдь на приестѡли кралевства србскаго ꙗкѡ царь и владика всемꙋ стежанью светиехь рѡлитель моихь, и ѡть свиехь приемле часть и славꙋ и дари мнѡгие, вь сѣхже всихь видѣхь срчанꙋ любавь и вѣрнѡ порабѡтанье рѡдителемь и прарѡдителемь кралевства ми и самѡмꙋ кралевствꙋ ми властель славнаго града Дꙋбрѡвника, и ва прьвое мое пришастье кралевствѡ дари, иже ми дарѡваше, ·и҃· тисꙋщь перперь иние многие потреби бесчисление са любѡвью ихь нелицемѣрною, и за ꙋм(о)лениѣ ихь ради, кьди послаше кралевствꙋ ми свое вастеле и братью свою Павла Мартинꙋшевика и Климета Гочетиђа и Николꙋ Лꙋкаревиђа, и дах имь с милѡстию и с ꙋтврьжденьемь Рать Стонски са всѣми међами своими и заселки и с людми, и да сꙋ ѡбластни зидати га на Прѣвлаци и на дрꙋгѡмь мѣстие, гдѣ имь бꙋде хтѣние; и ѡще имь придахь ѡдь Прѣвлаке ꙋс-краи мора дѡ дꙋбрѡвачке међе и селища, коѣ сꙋ тꙋизи била, и Посређницꙋ, какѡ ѡптече Неретва дѡ мора: и тоизи все да имь кралевство ми ꙋ бащинꙋ и дѣцамь ихь и ꙋнꙋчью ихь, а ѡпђина дꙋбрѡвачка да ми дае на всакѡ гѡдище на великь дань ·е҃· сать перперь бнетачкихь ѡдь тогаизи мѣста дѡхѡтка кралевства ми и всѣмь, коихь богь изволѣ госпоцтвовати кралевствѡмь срьбскимь пѡ мнѣ, и да пѡсила кралевствꙋ ми вынꙋ на великь дань ꙋзети дѡходакь више писани ·е҃· сать перперь, какѡ и дрꙋги дѡхѡдакь дꙋбрѡвачки ꙋзима кралевство ми: акѡ ли ми не плат(ет)ь на рѡкь, да даде двоинꙋ. и тꙋ имь милѡсть ꙋчини кралевсвѡ ми ꙋ Полѡзѣ ва лѣтѡ ·҂ѕѡлг· мѣсеца генвара ·кв· дань, а тꙋи бѣхꙋ всеѡсвещени епискꙋпь призренски Арсение, казнаць Бальдѡвинь, воевѡда Градиславь, жꙋпань Браткѡ, кнезь Грьгꙋрь Кꙋрьѣкѡвиђь, ставилаць Милѡшь, воевѡда Деѣнь Маньѣкь, Градиславь Сꙋшеница, Никѡла Бꙋкꙗ, архидиѣкь Маринь Баранинь. и егоже богь изволѣ господьствовати по нась, мѡлю ꙗкѡ господина и брата, сиегаи писаньѣ не потворити, еже дарѡвахь за правꙋ любавь васелѡмь дꙋбрѡвачцемь, за порабѡтанье и за часть ихь: тко ли сие потвори, да е прѡклеть ѡдь господина бѡга вседржителꙗ и ѡдь пречисте его матере и ѡдь ·ві· светихь апꙋстола и ѡть ·д҃· еванђелисте и ѡть ·тиі· светиехь ѡтаць иже ва Никеи, и да есть причтень Иꙋди предателю христѡвꙋ, и ѡдь кралевства ми да е прѡклеть, а такѡвии да приме гниевь и наказанье ѡдь кралевства ми, и да плати ·е҃· тисꙋђе перперь, и да ми е невервнь.

Стефань по милости божиеи краль все србске земле и поморске.

† Пише кралевьство ми, да ѥ вѣдомо всакомꙋ, како се бѣше порасрьчило кралевьство ми на властеле дꙋбровьчьке за Стоньски Редь, а ѡни видѣвьше расрьчениѥ кралевьства ми послаше кь кралевьствꙋ ми властеле своѥ Жꙋнꙗ Влькасовикꙗ и Жꙋнꙗ Жꙋрьговикꙗ и Николицꙋ Марьтинꙋшевикꙗ ꙋ поклисарьство кралевьствꙋ ми, и придоше кралевьствꙋ ми, и ꙋчинише все хотѣниѥ кралевьства ми. да видѣвь кралевьство ми, ѥре присташе на всꙋ волю кралевьства ми, и правꙋ слꙋжбꙋ ихь кралевьствꙋ ми, и сьтвори имь милость и записаниѥ кралевьство ми, и потврьди имь кралевьство ми Стоньски Редь, како имь га ѥ дало и записало кралевьство ми, такози да си га дрьже свободно безь всаке забаве с милостию кралевьства ми, тѣмьжде ѡбразомь, како имь га ѥсть записало кралевьство ми ꙋ прѣдню повелю; понеже имь потврьди кралевьство ми милость и записаниѥ кралевьства ми, и по семь да нѣсть междꙋ кралевьствомь ми и мегю ними никоꙗ свада развѣ право житиѥ, како ѥсть и прѣге било. и ꙋтькьмисмо се мегю собомь, каго не прѣимꙋ ниѥднога чловѣка ѡдь земле кралевьства ми лихо ѡнѣхьзи люди кралевьства ми, коихь засташе ꙋ Стонꙋ и ꙋ Рьтꙋ, този да си дрьже с милостию кралевьства ми; а за ине люди, кои нѣсꙋ ѡдь земле кралевьства ми, за този да не има печали кралевьство ми; и ако се наиде кои годѣ чловѣкь ѡдь земле кралевьства ми развѣ ѡнѣхьзи люди, коѥ имь ѥсть дало кралевьство ми, коѥ засташе ꙋ Стонꙋ и ꙋ Рьтꙋ, ѥре бꙋдꙋ приѥли, кьди га име искати кралевьство ми или чловѣкь кралевьства ми, да да кнезь дꙋбровьчьки и властеле дꙋбровьчьци пристава момꙋ чловѣкꙋ, и да погю ꙋ Стонь и ꙋ Рьть, да га ище с моимь чловѣкомь. и колико се люди наидꙋ ѡдь земле кралевьства ми, да ѥсть за все за то дльжна ѡпькина и градь, да ихь подаде чловѣкꙋ кралевьства ми, кога годѣ пошле кралевьство ми; аке ли чловѣкь кралевьства ми не ѡбрѣте ниѥднога чловѣка ѡдь землѥ кралѥвьства ми, а кралевьство ми не име вѣровати, ѥре ѥсть сикози, да нарече кралевьство ми четиремь или петимь властеломь дꙋбровьчькимь, да ми се ѡдькльнꙋ ꙋ богородицꙋ дꙋбровьчькꙋ прѣдь чловѣкомь кралевьства ми, каго нѣ ниѥднога чловѣка кралевьства ми ни ꙋ Рьтꙋ ни ꙋ Стонѣ, ни ѥ ꙋселень ни скрьвень ꙋ нихь свѣсти ниѥдинь чловѣкь кралевьства ми. и ѥще се сꙋ заклели кралевьствꙋ ми властеле дꙋбровьчьци, да прѣбива попь срьбьски, и да поѥ ꙋ црьквахь, коѥ сꙋ ꙋ Стонꙋ и ꙋ Рьтꙋ, како ѥсть повелѣвало кралевьство ми. и аке се згоди разьмириѥ междꙋ кралевьствомь ми и градомь дꙋбровьчькимь, да не воюѥ чловѣкь изь Стона ихь Рьта на земьлю кралевьства ми ни на чловѣка кралевьства ми. и аке прѣстꙋпи ѡпькина дꙋбровьчька си ѡбѣть, кои сꙋ ѡбѣщали кралевьствꙋ ми, да сꙋ криви кралевьствꙋ ми, и аке имь не ꙋзможе кралевьство ми дати имь ꙋзрокь кривине, да ми сꙋ ѡдькльнꙋ ·і҃· властель дꙋбровьчькихь, каго нѣсꙋ криви ни прѣстꙋпили ѡбѣти више писаньниѥ. и како ке сьхранить кралевьство ми си ѡбѣть и записаниѥ кралевьства ми, таго да сьхранить господь богь дꙋшꙋ и тѣло кралевьства ми вь сиѥмь вѣцѣ и вь придꙋщемь. и сиѥ створи и записа кралевьство ми вь лѣто ·҂а҃· и ·т҃· и ·лд·, мѣсеца маꙗ ·ѳі· дьнь, а Цоцань прѣрꙋчи и подьписа и запечати на Добрꙋщи.

† Стефань краль.

† К тебѣ, иѥрархо и чюдотворче христовь Николаѥ, припадаю и молю се помилоуваниѥмь твоимь теплиимь и скоримь застоуплениѥмь бога моѥго помилоувавьша ме, извести ме хоте из глоубини прѣисподнѣго, позавидѣвь ми оубо лоукави врагь, ꙗко и раждеженьна оустроити оутробоу родителꙗ кралѥвьства ми, и вьврѣщи ме хоте вь ровь погыбѣльни, ꙗко не бити ми наслꙗдника столоу ѡтьчьства моѥго, не волею ни хотѣниѥмь ѥго, нь завистию и пронорлываго миродрьжьца, вьсхотѣ оубо болѣзни ѥго понести недоугы же вьсприѥти, па подобьнь бывь по всемоу развѣ грѣха сего истлꙗвша сьтворити. не тьчию же сего ѥдиного свобожденыꙗ ради нь паче всего сего ѥстьства подоб(н)о ѥсть рещи нынꙗшнаꙗ словеса сь испитаниѥмь, добро ѥсть слишати, пользоу оубо приносити доуши, рече оубо: ищоущи словеса блага жизнь вѣчноую ѡбрещоуть. царьскоу оубо таиноу добро ѥсть таити а божьствьноѥ же слово сь любовию вѣри истинниѥ изьꙗснити, пророкоу оубо глаголющоу богоѡтьцоу: сладшаꙗ словеса твоꙗ паче меда оустомь моимь. зде же не добро ѥсть срамлꙗти се тлꙗющихь ни таланьта скриѥма, ѥгоже и вьсприѥхомь ѡть роуки благаго питателꙗ жизни, и не прѣбоудимь альчоуще, нь паче наситим се пива доуховна ѡть источника непрѣсихаѥма иѥрарха христова и чоудотворца Николи, присниѥ ѥго и теплиѥ помощи. помилоувавь ме и застоупивь ме ѡть видимихь и невидимихь врагь и противнихь врагь и соупостати; благы же и незлобыви, чловѣколюбиви богь, призрѣви на ме милосрьднимь си ѡкомь, извести ме и хоте ѡ(ть) рова оустрьмша се, на те же и ꙗзь непостидноѥ оупьваниѥ надѣѥ се и твое име всегда призиваю, владыко мои, ти же ми дарова столь ѡтьчьства ми, и не мнещоу се мнѣ, нь ꙗко вь снѣ видѣниѥ видѣти. тꙗм же и ꙗзь, вь Христа бога вѣрни краль и сь богомь самодрьжьць всѣхь србскихь и поморьскихь земьль, Стефань, вьноукь прѣвисокаго и светаго и страшнаго кралꙗ Стефана Ꙋроша, прѣоуноукь господина ни и прѣподобнаго ѡтьца Симеѡна Стѣфана Неманѥ, новааго мироточьца, владыкы бывьшааго самодрьжавьна срьбьскыхь и поморьскыхь земль, и кралѥвьство ми благосрьдиѥмь оумоливи выше смисла щедроть си ѡ спасени зданиꙗ вседѣтелниѥ ѥго деснице придохь вь мѣсто рекомо Добрꙋща, изобрѣтохь црькьвь светаго и великославнаго чоудотворьца христова Николи запоустѣвшоую и разореньноу до коньца, и милосрьдовавши се и сьзидахь и ѡбновихь храмь тьи светаго чоудотворца Николи, да ѥсть вь помѣнь кралѥвьствоу ми, паче же кь тои црькви да кралѥвьство ми и приложи село Доброущоу сь забѣломь и с планиномь и сь млини и сѣнокоси с мегѣми и сь всѣми правинами села того, село Жоури с мегꙗми и сь всѣми правинами села того, село Врьдница с мегѣми и сь всѣми правинами села того, село Калогени сь црьквомь и Смоулики и с мегѣми и сь всѣми правинами села того, село Воѥвике с мегꙗми и с планиномь и сь всѣми правинами села того. тако да и записа кралѥвьство ми, да дрьжи и ѡблада светы Никола доброущьски ꙗкоже и иниѥ светыѥ и божьствьниѥ црькви, такожде и светы Никола доброщьски да дрьжить тази села, и да ѡблада сь всѣми правинами, и како ѥсть законь людемь метохиискимь оу работахь црковнихь и оу работахь кралѥвьства ми, и такожде и тѣмьзи селамь и вь тоужде свободоу, и да не има нитко ѡбласти надь ни(ми) тькмо калоугерь, коѥга постави игоумьнь Светыѥ Гори и аѳоньскиѥ богородице хиландарскиѥ, понеже ѥсть подьписано оу ѡбласть ѥѥ. и мою ви ѡ господы, ѡтьци и братꙗ, кога богь изволии по сьмрьти кралѥвьства ми тако господьствоующа или сынь кралѥвьства ми али кто ѡ(ть) соуродникь кралѥвьства ми, сиѥмоу записанномоу мною, Стефаномь кралѥмь четврьтимь, не потвореньноу быти нь паче потврьжденьноу. кто ли дрьзнеть разорити сиѥ записаниѥ, да ѥсть проклеть ѡть господа бога вседрьжителꙗ и ѡть прѣчистиѥ богородице и ѡдьги(три)ѥ и ѡдь ·тиі· ѡтьць никꙗнскихь и ѡть всѣхь светыхь ѡть вѣка богоу оугождьшихь и ѡ(ть) всѣхь првовѣрнихь архиѥпискоупь и пискоупь і игоумьнь срьбьскихь, и ѡть мене грѣшнаго да нѣ благословлень, нь да ѥсть проклеть и оу си вѣкь и оу придоущи. аминь. и приложи кралѥвьство ми виноградь любовь на Ѡгледницѣ на мегы любижьньскои и трьгь оу Призрѣнѣ прѣдь праздникомь светаго Николи, да ѥсть свѣкꙗ црькви тои. и ѡть царине оу светаго спаса на всако годище ·ри· перперь да се даѥ доуодькь црькви тои.

† Стефань вь Христа благовѣрни краль и сь богѡмь самодрьжьць всѣхь србьскихь и поморскыхь земль.

† К тебѣ, иѥрарьхо и чюдотворьче христовь Николаѥ, припадаю моле се, помиловньныи твоиимь скорыимь застоуплениѥмь и бога моѥго помиловавьша ме и и изведьша ме из гльбыны рова прѣисподьнꙗго, заточена ме бываша родителемь кралевьства ми, не волѥю ни хотѣниѥмь ѥго нь завистию злыихь и пронорьлывыихь люди, нь тыи застоупивь и помиловавь ме и дарова ми столь ѡтьчьства моѥго: того ради видѣвь кралевьство ми храмь твои ѥже оу Вранинѣ и приложениѥ кралевьства ми, ѥже приложихь, кьда господовахь Зетою, неразорено и неповрѣжденьно родителемь кралевьства ми нь паче оутврьждено, и кралевьство ми приложии и ѡще потврьдыи сь всакиимь оутврьждениѥмь, ѥже записахь оу господьствѣ си, кьда не бѣхь кралемь, те все правине и метохыѥ да има светыи Никола сь всѣми правинами, ꙗкоже лѣпо и подобьно светыимь и божьствьныимь црьквамь своѥ правине и метохы дрьжати. и видѣ кралевьство ми правовѣрьноѥ поработаниѥ властелина кралевьства ми, казьньца Дьмитра, и видѣхь желаниѥ ѥгово (иѥра)рхы, иѥрею и чюдотворьцоу (ско)ромоу вь помощехь Николѣ краниньскомоу, идѣже и гробь оустрои прѣставлению своѥмоу, и испроси оу кралевьства ми село своѥ Брьчеле приложити светомоу Николѣ сь всѣми мегꙗми и сь всѣми правинами села тога, ꙗко до живота свога тѣмьзи селомь да се храныи казьньць Дьмитрь и ѥгова жена, а по животѣ ѥговѣ да ѥсть црькви сь всакиимь оутврьждениѥмь; и ако (се) ѥгова жена ѡмоужии по ѥговѣ смрьти, да не метеха сь ѡнѣмьзи селомь; ако ли се не ѡмоужи, да има храноу ѡть црькве, а црьвы светаго Николи да дрьжи село Брьчали ............ вьсѣми инѣми людьми села тога сь всѣми правинами ꙗко ..... ине метохыѥ ........ законь и ... тоужде свободоу ꙗкоже и прѣж.... (села) и метохиѥѥ, ꙗко семоу биты тврьдоу и непоколѣбимоу. кто ли се ѡбрѣте сиꙗ потворивь господьствоуѥи или сынь кралевьства ми и соуродьникь кралевьства ми, или кога богь изволии бы(ти) господьствоующаа, да моу ѥ соупрьникь богь и прѣсвета богародица, и чьстьныи крьсть да моу нѣ помощьн(икь) вь си вѣкь и вь прид(оущ)ии, и светыи Никола да моу ѥ соупьрьникь на вьторомь пришьстыи. а ѡдь властель великыхь и малихь (кто) се ѡбрѣте испакостивь что любо до(моу) светаго Николи, да прииме гнѣвь и наказаниѥ ѡть кралевьствоующаа(го, и) да платыи кралю ·т҃· перьперьь. сего ради подьписоую вь свѣдѣниѥ всѣмь.

† Стефань Оурѡшь краль. †

..... падаю моле се, помилованьны твоимь скоримь застоу(плениѥмь), изьведьша ме изь глоубыни рова прѣисподьнаго ...... волею ни хотѣныѥмь ѥго нь завистию злихь ...... (помилова)вь ме и дарова ми столь ѡтьчьства моѥго: того раді ...... и приложеныѥ кралевьства ми, ѥже приложихь ... неповрѣждено родителемь кралевьства ми нь паче оутврьждено. и кралевьство ми приложи и ѡще потврьдыи сь всакимь оутврьжденыѥмь, ѥже записахь оу господьствѣ си, кьда (н)е бѣхь кралемь, те вьсе правине и метохиѥ да има светы Никола сь вьсѣми правинамыи, ꙗкоже лѣпо и подобьно светымь и божьствьнымь црьквамь своѥ правине и метохиѥ дрьжати. тѣмьже и азь по милости божиѥи Сѳефань краль видѣ кралевьство ми оутврьждено и записано прародители и родители кралевьства ми, и по томьжде образоу кралевьство ми припадаѥ кь милосрьдыю светаго Николи иже оу Вранынѣ, ѥгда бѣхь немощьнь оу Прищинѣ, и дахь село оу Чрьмьници именемь Брьчели сь всѣми людьми и мегами и засельци, и кто оузьме, чьто ѥ дрьжаль казьньць Дьмитрь сь вьсакими правинами, оу тоуге работоу како и ине метохиѥ, и ѡсьвободихь ѡдь вьсаке работе кралевьства ми, ѡть позоба и ѡдь воиське и ѡдь винограда и ѡдь сѣна и ѡдь пьсь, ꙗко семоу быти тврьдоу и непоколѣбьлимоу. а се меге села того: ѡть свете Троице низь Брѣсь тере оу Батоушоу, ѡть Батоуше низь Соуходоль тере оу Биволь Слѣдь, ѡдь Бивола Слѣда тере оу Прьхиноу, ѡдь Прьхине оу Тѣскьноу Оулицоу, ѡдь Тѣскьне Оулице, како се ками вали поврьхь Стола, тере оу Лисоу Стѣноу, ѡдь Лисе Стѣне прѣко оу Вирь, ѡдь Вира оузь Рѣкоу оу Томинь Потокь прѣко оу Брьчело тере оу Бѣли Клькь, сь Бѣлога Клька прѣко на Дрѣнь, сь Дрѣна на Лѣськовьць, сь Лѣськовьца на Грабь, сь Граба на Бабьць, сь Бабьца на Чирь на Мали, сь Чира на Течаль, ѡть Течали на светоу Троицоу, и ꙗко семоу бити тврьдоу и непоколѣблимоу. кьто ли се обрѣте сиꙗ потворивь господьствоуѥи или сынь кралевьства ми или соуродьникь кралевьства ми, или кога богь изьволи быти господьствоующаго, да моу соупьрьникь богь и прѣсвета богородица, и чьстьныи крьсть да моу нѣ помощьникь вь си и вь придоущии, и свети Никола да моу ѥ соупьрьныкь на вьторомь пришьсти. а ѡдь властель великихь и малихь кьто се ѡбрѣте изьпакостивь чьто любо домоу светаго Ниеоли, да приметь гнѣвь и наказаныѥ ѡть кралевьствоующаго, и да плати кралю .... перперь .... подьписоую .... вьсѣмь.

† Стефань краль.

Прими, владыко господи ѡ пандократоре, приносимое моленїе раба твоего Стефана кралꙗ, сїе бо приношу црьковь божьственную сь сыномь моимь кралемь Стефаномь, взираю на тлѣное ми тѣло на(дь) гробомь своимь, и бою се страшнаго ти судища, кь тебѣ припадаю вседрьжителю, помилуи ме вь дьнь судныи.

Светыи краль Урошь ·г҃·тїи все срьбскїе земли и поморсїе и ктиторь мѣста сего светаго.

кралѥвство ми вь хрисоволїи архіепископовѣхь.

Ноѥбра ·г҃· прѣстави се Оурѡшь краль третїи.

† Азь вь Христа бога вѣрьныи краль Стефань, сынь и наслѣдьникь прѣвысокаго кралꙗ Оуроша третиѥга, веселю се доушею и тѣломь ѡ божьствьнѣмь дарѣ, иже ми дасть владыка мои Христось: кь тебѣ припадаю скоромоу помощьныкоу вьсѣдоущомоу вьсаа моꙗ прѣгрѣшениꙗ ꙗвьлѥнаа и неꙗвьлѥньна, трѣбоуѥ твоѥ помощи великыѥ, свете иѥрарьхо христовь Николаѥ, скоромоу и крѣпькомоу помощьныкоу, пособителю кралѥвьства ми, веселю се доушею и желаѥ послѣдовати оучению и дѣломь добриимь светыхь родительь и прародительь моихь, недостатьчьна ихь исьпльниты и сьврьшити. мнѣ же грѣшьномꙋ и недостѡиномоу Стефаноу, богомь помилованьномоу и богомь просвѣщеньномоу кралю вьсѣхь срьпьскыхь и поморьскыхь земльь, и та вьса видѣвь кралѥвьство ми и ѥлико ми бысть вьзможьно приложити светымь црьквамь и великымь манастыремь, и изнаиде кралѥвьство ми црьквь светаго Николи мрачьскога, вь врѣме то слоучивьшоу се старьцоу иже ѡть светыхь мѣстьь старьць Иѡань икономь ходьчьскыи, и да моу кралѥвьство ми црьквь тоу светаго Николи, да си ѡблада икономь Иѡань црьквомь томь и сь сельми вьсѣми, що се находи оу црькве те до нѥгова живота за ѥгово дрьзьновениѥ, понѥже видѣвь кралѥвьство ми ѥгово поработаниѥ домоу прѣчистиѥ владычице госпожде и богородице хиланьдарскыи, иже ѥсть вь Аѳонѣ, сь троудомь и вьсакымь поспѣхомь напаче и сь сьмѣрениѥ(мь), да моу ѥсть до живота оу помень и за доушоу кралѥвьства ми, и да ѥсть виноу подь ѡбласть светогорьскоу оу послоушаниѥ иноуменоу и вьсеи брати светогорьскои. а игоумень и братиꙗ да га не потькноу сь ѡнога мѣста, що моу ѥсть кралѥвьство ми записало, до ѥгова живота, разьвѣ да си се дохрани старьць Їѡань до смрьти своѥ оу црькви те светаго Николии, паче и ѥлико се находе людиѥ оу црькве те, да га слоушаю сь всакымь страхомь кралѥвьства ми како и вьсакого господарꙗ игоумена ѡ вьсѣхь работахь, що комоу заповѣдоуѥ црьквныхь и кралѥвьства ми, не тькьмо ѡ работахь ноу вь всакомь исправьлѥнии црькв(н)ѣмь како и соущега старьца коуке кралѥвьства ми и брата хиланьдарьскаа. и сиѥ прило(жи)вьши и записавьши кралѥвьство ми Светои Горѣ, и молю, ѥгоже богь изволи кралѥвьствовати на прѣстолѣ светыхь прародительь и родительь кралѥѥвьства ми вь земьли срьпьскои или сынь кралѥвьства ми или брать кралѥвьства ми а или кто ѡдь соуродьныкьь кралѥвьства ми, молю се ѥмоу непотвореноу быти моѥмоу сиѥмоу маломоу записанию икономоу Іѡаноу, нь паче потврьдити и прилагати и записати, понѥже прьвы цариѥ и кралиѥ и прародителиѥ кралѥвьства ми нѣсоу разорили, нь паче приложивьши и записовали, ѥлико оузьможьно было комоу приложити, такожде и кралѥвьство ми не потвори ихь записаныꙗ, нь паче потврьждахь и прилагахь. кто се ѡбрѣте ѡть таковыхь потьщавь диꙗвольскымь наваждениѥмь разорити малоѥ се приложениѥ и записаниѥ кралѥвьства ми, таковаго да разорить господь богь вьседрьжитель, и в мѣсто помощи и застоуплѥниꙗ да моу ѥсть мьстительница богородица хиланьдарьска и светыи скори помощьникь иѥрарьхо Николаѥ, иже се ѡбрѣта вь мѣстѣ томь, и да га оубиѥ и поразы сила чьстнаго и животворещаго крьста христова, и да ѥсть проклеть ѡдь ·д҃· хь иѥѵангелисть и ѡть ·ві· апостольь и ѡть ·тиі· светыхь и богоносныхь ѡтьцьь иже вь Никеи, и да ѥсть прѣчьтень кь тѣмь, иже рекоше: вьзьми, пропьни, крьвь ѥго на нась и на чедѣхь нашихь, и да нѣсть благословень вь сии вѣкь и вь придоущии, и ѡть всега зьбора светогорьскога да боудеть проклеть. и сиѥ записа кралѥвьство ми оу Моравѣ прѣге спасова дьне вь лѣто ·҂ѕѡн·, еньдикьтиѡна ·з҃·

† Стефань вь Христа бога вѣрни краль всѣхь срьпскихь и поморскихь земль.

† Пише кралевьство ми, да ѥсть вѣдомо всакомꙋ, како придѡше поклисарие властели дꙋбровьчьци кралевьствꙋ ми подь Серь: Пиро Грꙋбешикь и Марьтоль Чрѣвикь и Паске Гꙋчетикь, и говорише кралевьствꙋ ми на слꙋгꙋ Дабижива, како е ꙋчиниль трькь на Трѣбини, и ꙋзима ѡдь товара динарь, кто греде и ꙋ Дꙋбровьникь, изь Дꙋбровьника, и ѡдь добитка, кои греде ꙋ Дꙋбровникь, и говорѣ Дабиживь прѣдь кралевьствомь ми, ꙋзимана е и прѣжде ѡнази царина ѡньдѣзии, а говорѣке поклисарие дꙋбровьчьци: тази царина не ꙋзимана ѡдь века ѡдь века, ѡдь коле свѣть сталь; и кралевьство ми изнаге, ерѣ не ꙋзимана тази царина и ꙋ моихь дѣдь и прадѣдь и ꙋ родителꙗ кралевьства ми и ꙋ кралевьства ми, и створи милость кралевьство ми всемь властеломь дꙋбровьчьцимь вѣлимь и малимь, да не ѡногази трьга на Трѣбини, како га и прѣжде не било, и по сема сега да не ꙋзима Дабиживь дꙋбровьчаномь ни царине да ни коега доходька ни трьговцꙋ дꙋбровьчькомꙋ ни влахꙋ ни срьбинꙋ да ни кѡмꙋ, и кто греде ꙋ Дꙋбровникь, изь Дꙋбровника; и всаци властели, кои те стоꙗти по Дабиживѣ, да не ꙋзима царине тези до века ни ꙋ сина кралевьства ми да ни ꙋ кога настоещаго кралꙗ ꙋ Срьблихь. и сие записа кралевьство ми, да ѥ тврьдо и неразорѣнноѡ до вѣка. кто ли потвори сие записание кралевьства ми, да ѥсть проклеть ѡдь господа бога и ѡдь прѣчистие богородице и ѡдигитрие и ѡдь светихь апостоль ·ві· врьховникь, и да га ꙋбие и порази сила чьстнаго крьста христова, а такови потвориви да ми ѥсть невѣрьнь, и да плати тисꙋщꙋ перперь кралевьствꙋ ми. а сию милость прѣрѣчи господинь краль подь Серѡмь, мѣсеца ѡхтебра ·кѕ· вь лѣто ·҂ѕѡнд·

† Стефань краль.

† Пише кралевьство ми сиѥ, да ѥсть вѣдомо всакомꙋ. створихь милость дꙋбровчаномь всѣмь, да си кꙋвꙋю жито по земли и по градовѣхь кралевьства ми свободно, да имь никто не забави, ни властелинь ни владалць кралевьства ми. и кто имь продаѥ, и томꙋ да нѣ забаве ни ѡть кога, да продвѥ свободно. кто ли се ѡбрѣте ꙋчинивь нѣкою забавꙋ дꙋбровчанинꙋ или землꙗнинꙋ, кои мꙋ продаѥ жито, да приме гнѣвь и наказаниѥ ѡдь кралевьства ми, и да плати кралевьствꙋ ми ·е҃· сьть перперь. и сию имь милость створихь ꙋ Неродимли, мѣсеца авгꙋста ·ді· дьнь.

† Стефань краль.

† Пише кралевьство ми, да ѥ вѣдомо всакомꙋ. створи милость кралевьство ми всѣмь трьговцемь дꙋбровьчкимь, кои ходе по земли кралевьства ми, и такози имь се ѡбѣта кралевьство ми вь господа бога и вь прѣчистꙋю матерь божию, да имь не ꙋзме нища кралевьство ми безь кꙋпа, ни кнезь кралевьства ми ни ки властелинь ꙋ земли кралевьства ми да не ꙋзме нища безь кꙋпа, ни само кралевьство ми да не ꙋзме силомь безь кꙋпа, развѣ да си продаю, свободно ходе по земли кралевьства ми, ни на панагюри ни ꙋ коѥмь трьгꙋ ꙋ земли кралевьства ми да имь нища не ꙋзме силомь кралевьство ми, развѣ да ходꙋ по трьговѣхь, и що своѡмь воломь продаю кралевьствꙋ ми, да имь кралевьство ми плакꙗ кꙋпь како прочи дюдиѥ. и на мою вѣрꙋ на кралевꙋ да се ни ꙋ чемь не потвори кралевьство ми, що сьмь писаль.

† Стефань краль.

† Безначельнаго, невилимаго, неѡписаньнааго, всесилнаго, бесконьчнаго ѡтьца ꙗдрь не ѡтьлоучивь се сынь и словѡ сы ипостаси ѥго, вселюбьзны Ісоусе, прѣклонивыи небеса, и сьшьды на земьлю спасениꙗ ради рѡда чловѣчьскаго, и вьпльтив се ѡть прѣчистыѥ дѣвы Мариѥ, и все пльтьскоѥ сьмотренїе ѥже ѡ нась сьврьшивь, прѣтрьпѣвы пльтию страсти, чловѣчьство оувѣраѥ, и ꙗко богь божьствьнаꙗ чюдодѣиствоуѥ, и многаго ради милосрьдиꙗ избавивь своѥ сьзданиѥ, чловѣка, ѡть моучителꙗ власти, вьзнесе се вь слваѣ кь трисиꙗньномоу божьствоу, мирь давь своимь оученикѡмь и ѡбещаниѥ пришьствиꙗ светаго доуха, имьже ѡсѣнѥниѥмь начеше глаголати инѣми ѥзыкы, и тако просвѣтише вселѥньноую, наставлꙗюще вь разоумь твои истиньнагѡ бога нашего. мы же просвѣщь се имї и поѥмь твои свѣтоѡбразни лица зракь, покланꙗѥмь се страстемь твоимь, чьтемь же и вьскрьсенїѥ, и славное вьзнесенїѥ славимь, и припадающе молим се, сладости неизреченьнаа, владыко Христе, испльны моѥ желаниѥ, ꙗко послѣдовати твоимь ꙋчениѥмь, вещал бо ѥси вь светѣмь твоѥмь еѵангелїи: да просвѣтїт се свѣть вашь прѣдь чловѣкы, ꙗко да оузреть добраꙗ ваша дѣла, и прославеть ѡтьца вашего, иже ѥсть на небесехь. слишахомь бо сии великаа ѡбѣтованиꙗ глаголаньнаа тобою кь любещимь те, спасе мои; сего ради потьщимь се и мы, подвыжоуще се ѡть земльныхь на небеснаꙗ, наипаче слышати, киимь ꙋбо господь крѣпость даѥть и вѣчнаа благаа, нь не приносещим ли ѥмоу славоу и чьсть, пригосещимь славоу именї ѥго? вьзмѣте бо рече жрьвы, и вьходите вь дворы господнѥ. да понѥже ѥсть такова помощь и оутврьждениѥ намь ѡть господа, створьшаго небо и землю, подобаѥть оубо ѡть всеѥ доуше и ѡть всего помылѥнїꙗ вьзлюбити тогѡ божьствьныѥ заповѣди, вь ныхьже прѣжде ходившеи и ѡбѣтованиꙗ оулоучише. мнѣ же да не бꙋдеть хвалити се тькьмѡ о силѣ и помощи господа нашего Ісоу Христа, ꙗко молитвами прѣчистыѥ ѥго матере и светаго моученика прьваго и арьхидиꙗкона Стефана и светыхь моихь прародитель и родитель дасть и мнѣ настольникоу быти имь вь ѡтьчьствы моѥмь, Стефань краль, сынь богомь просвѣщеньнаго кралꙗ срьпскаго Оуроша третиꙗго и правноукь светаго Сѵмеѡна новаго мѵрѡточьца Неманѥ, ихьже корене света азь грѣшны ѡтрасль ѥсмь. и господьствоующоу ми вь земли ѡтьчьства моѥго самодрьжвано видѣ кралѥвьство ми благооутробноѥ сьмышлѥниѥ и потьщаниѥ и потроуждениѥ и поданиѥ добро прѣвысѡкаго кралꙗ все срьпскыѥ землѥ и поморьскыѥ, дѣда кралѥвьства ми, Стефана Оурѡша втораго, ꙗже ѡ пирьгоу иже вь Светѣи Горѣ при мори, вь нѥмьже ѥсть црьквы светаго вьзнесениꙗ господа нашего Ісоу Христа на мѣстѣ рекомѣмь Хроусиꙗ, вь ѡбласти светыѥ богородице хиландарьскыѥ, иже ѡть основаниꙗ ѥго вьздвыгь и наздавь сьврьшї и. и кралѥвьствао ми, ревьноуѥ богооугодномоу ѥго потьщанию, даровьномоу приложению иже вь господню славоу вьздвиженьномоу ѡть нѥго пирьгоу, паче же и поразоумѣвь соуѥтоуу мира сего тлѣньнааго, ꙗко вса мимо ходеть, и соуща ꙗко не соуща бывають по словеси прѣмоудраго Соломѡна: сꙋѥта сꙋѥтѣ, вса сꙋѥта, наставлѥн же маниѥмь божьствьниѥ благодѣти пачеже и вьспомѣноутиѥмь ѡ господи доухѡвнаго наставьныка и оучителꙗ ѡтьца кралѥвьства ми, баще монастира прѣсветыѥ богородице хиланьдарьскыѥ, їеромонаха Андонїꙗ, прѣдрьжещаго пирьгь тьгда, и приѥмь ѥго богооугодноѥ проношениѥ, доушевнаго ради спасениꙗ кралѥвьстваоу ми вьсхотѣ и кралѥвьство ми, благаго желанїа теплотою горе, иже выдѣхь недостатьчноѥ келии вьзнесенїꙗ господнꙗ пирьгоу испльнити ꙗко трѣбоующоу мѣстоу потрѣбы строѥніꙗ ради и братиꙗмь тоу живоущимь на ꙋтѣшеныѥ, ꙗко да не бꙋдеть имь потрѣбныхь оскоудно, приложи и кралѥвьство ми келїи спасовѣ пирьгоу малии дарь сыи, црьквь прѣсветыѥ богородице оу Липлꙗны и поповы, колици се ѡбрѣтаю своими породицами, и колици полюбе црьквь ꙋ земли кралѥвьства ми, да гредоу свободнѡ. и ѡще приложи кралѥвьство ми трьгь оу Липлꙗны, да ѥ свѣща матери божеи, и село подь црквь Словинѥ сь людьми и сь ливадами и сь оулиꙗникѡмь. и се мегѥ селоу Словиню: почьньше ѡть Гꙋщерыча поутемь, кои греде по дѣлоу мегю Гꙋщерычемь и мегю Словынѥмь, и до поути, кои греде подь Медникь, подь стоудꙋньць и подь црьквь, коꙗ ѥсть выше Гоущерыча посрѣдѣ дола, и до стльпа гребнога выше Добротина и до Стоубла стоуденьца и на Дрꙋговь стльпь посрѣдѣ Соуходола на Смолоушоу прѣхь шоумоу до водѣничища Злодꙋшьца, коꙗ ѥсть на рѣцѣ Смолоуши, и прѣко прѣзь шꙋмоу до поути, кои греде по дѣлоу, на Ꙗблановыкь и подь Роудиницꙋ вь ѡбрьшь Смолоуше и до ливадь кралѥвѣхь мегю Словынѥмь и Ѡбрьнѥны до ниве Братькове прѣко рѣке на црьквыще Варьварино и до врьха Илиина вь ѡбрьшь Страшника и до поути, кои греде ѡть Голїихь Брьдьь. сии имена людемь ꙋ селѣ Словыны: попь Дрꙋгошь, Богдань Стевановикь, Воихна Зепашикь зь братиомь, Драгиꙗ з братомь, Драгиꙗ и зь братомь, Милько зь братомь, Драгиꙗ Боудикь, Петрь Воислаликь, Ѡбрадь Кыѥвчь сестричикь зь братомь, Дабиживь Мильковикь з братомь, Драгыша Петровикь зь братомь, Хохьль изь Липлꙗнь з дѣтию, Станимирь Ꙋрьбрашновикь зь братиѡмь, Ѡбраддь ратаи зь братиѡмь. и се отроци, кои соу полюбили црьквь: Брьзь, Прибыхваль, Краикѡ, Милѣнь, Прибоѥ ковачь сь шоурами, Стаико, Краиславь, Бероѥ, Добромисль Щимлꙗнинь. и планиноу Млѣчны ѡтдвыше Сириникь. и стльпь землѥ при црьквы оу Липлꙗни. такожде и оу Соухогрьлѣ поль винограда Гоубавьча и стльпь Мрѣжица и трїи стльпы подь поутемь, кои греде ѡдь Банѥ ꙋ Кострьць, и до поути, кои греде ѡдь Роудникь ꙋ Братонино и до брега баньске землѥ, и ливада ельха надь поутемь, кои греде ѡдь Жакове на Дрѣнь. се людиѥ оу Соухогрьлѣ: Гюра Михановикь, Воико Задраговикь, Милюнь Доброѥвикь, Прибань Храноѥвикь, Прѣлюбь Ꙋгодьчикь и Прѣмиль. и где се ѡбрѣтаю людиѥ келиѥ спасови пирьга ꙋ Липлꙗни и оу Сꙋхогрьлѣ или инде где, ѡсвободи ихь кралѥвьство ми ѡть позоба и приселице, провода, соколарь, псарь, ѡраниꙗ, жетве, сѣнокоше, винограда, градныхь работь, воиске, и просто рещи ѡть всѣхь работь кралѥвьства ми малихь и великыхь, и да имь нѣсть соуда развѣ прѣдь кралѥмь и прѣдь икономомь настоѥщимь, нь да работаю црьквы закономь светаго Савы, що имь повелѣва иконѡмь, ꙗкоже ѥсть писанно вь хрїсовоули дѣда кралѥвьства ми, светаго кралꙗ. и никтоже да дрьзнеть вьзеты, что ѥсть дало кралѥвьство ми на име пирьгоу, и ѥще что ꙋсхощоу дати, или что самь старць притежить или добоуде или испроси ѡть коудоу годѣ, с проста да нема надь тѣмь ѡбласти игꙋмень монастырьскы ни баща ни иконѡмь ни еклисиꙗрьхь ни инь никто ни ꙋ кꙋпно име ни ꙋ залогоу и никѡимь ѡбразомь, нь да старць обладаѥть симь, ꙗкоже и дѣдь краӆѥвьства ми пришеть вь своѥмь хрисѡвоулѣ. сего ради и вась, господиѥ, прошоу и молю, егоже богь изволить по кралѥвьствѣ ми господствовати срьпьскымь кралѥвьствомь или сынь мѡи или кто ѡть сꙋродныкь моихь или инь кто любо, сего да не потворите ни разорите, понѥже и кралѥвьство ми прьвыхь писаныи и оутрьжденїи не потвории, на господьствоующаго бо, рекьше кралꙗ срьпскагѡ, прѣлѡжихь сиѥ моѥ приложениѥ, и ѥже дахь вь дарь спасоу моѥмоу Христоу и светомоу вьзнесеныю ѥго, ꙗко сьблюдати, печаловати се и больша придавати, а не ꙋзети ни мала что ѡть зде соущихь даньныихь и записаньныихь мною; такожде и игоумене молю и старѣишины монастирьскыѥ, и запрѣщамь имь и заклиинамь тѣмьжде ѡбразомь непотькновеньноу быти имыи ничемоу ѡть зде записанныихь. аще ли ктѡ, бога не боѥ се и чловѣкь не срамлꙗѥ се, дрьзнеть разорити сиѥ записаниѥ, да снидеть на нь гнѣвь ѡть господа бога вседрьжителꙗ и прѣчистыѥ ѥго матере и на доушоу и на тѣло ѥго, и да ѥсть поражень силою чьстнагѡ и животворещаго крьста господнꙗ и ѡть ·ві· врьховьныихь ѥгѡ апостольь и четирехь еѵангелисть и ѡть ·тиі· светыхь ѡтьць иже вь Никеи и всѣхь светыхь ѡть вѣка богоу ꙋгождьшихь, и да ѥсть причтень Июдѣ прѣдателю христовоу и кь ѡнѣмь рекшимь: крьвь ѥго на нась и на чедѣхь нашихь, и ѡть мене, акѡ и грѣшьнь ѥсмь, и ѡть богодарованьнаго намь вѣньца да ѥсть проклеть вь сиѥмь вѣцѣ и вь бꙋдꙋщемь. сего ради писа кралѥвьство ми и подьписа вь свѣдѣниѥ всѣмь.

† Стефань вь Христа бога вѣрьны краль.

Вь Христа бога благовѣрни Стефань Ꙋрѡшь краль всѣмь Срьблѥмь.