Monumenta Serbica

(ѣзь ве)ли жꙋпань кльнь се и подьписахь. ѣзь кнезь Мирославь кльнь се и подьписахь.

О наслѣгени светаго сего манастыра прѣподобнымь ѡтьцемь нашимь Симеономь и Савою ꙋмїленымь. ѡтьче благослови.

Нашь светы манастырь сии, ѣко оувѣдѣти вамь, ѣко ѡпоустѣло бѣше мѣсто сиѥ ѡть безбожьныхь разбоинїкь, пришьдьшоу же кь мнѣ трьблаженомоу наставнїкоу ѡтьцоу нашемоу Симеѡноу мнихоу, еже иномоу ѡть земльныхь не приложїть се, занеже добродѣтель си ѥсть лоубве ради, еже теплотою искаше ѡть всѣхь, и нашь хотещоу почисти ѡбразь, вь неже теплою проводь се лоубовию, и божьствьнымь подвигь се доухомь слышавь прѣсладкї глась глаголоущь: иже не ѡставить всѣхь, и вь слѣдь мене не идеть, нѣсть ми достоинь, царьство своего ѡтьчьства ѡставивь и вса ѣже не земли и доушоу порабощающаго мира избѣгь, вь сию приде поустыноу мѣсеца ноембра вь ·в҃· дьнь, вь лѣто ·҂ѕѱ· и ·ѕ·, и вьсхотѣ ѡнь блажены, ѣко и тамо ѡправда свое царьство, тако и здѣ вьжделѣвь за вы ѡбрѣсти вы мѣсто спасенїꙗ, испроси оу цара мѣсто сие поустоѥ, и поеть мене грѣшьнаго изь Ватопеда, и вь мѣсто сиѥ вьселивь се и нѣколико мало прѣбывь сь мною великимь же и непрѣестествьны подвинь прѣшьдь ·и҃· мѣсець прѣбывь, кь вѣчномꙋ прѣложи се блаженствоу.

Ис-кони сьтвори богь небо и землю и чловѣка на неи, и благослови ѥ, и дасть имь власть на всѣи твари своеи, и постави ѡви царе, дроугие кнезе, ини владикы, и комоужде дасть пасти стадо свое и сьблоудати е ѡть всакога зьла находещаго на не. тѣмьже, братие, богь прѣмилостивы оутвьрди Грьке царьми а Оугре кральми, и когожде езика раздѣливь и законь давь и нравы оуставы и владикы надь ними по нравоу и по законоу раставль своею прѣмоудростию. тѣмьже по мьнозѣи его и неизьмѣрьнѣи милости и чловѣколюбию дарова нашимь прадѣдомь и нашимь дѣдомь ѡбладати сиювь земловь срьбьсковь, и вьсакоѣко богь строе на оуньша чловѣкомь не хоте чловѣчи гибѣли, и постави ме велиега жоупана, нареченаго вь свѣтѣмь крьщени Стѣфана Неманоу, и ѡбновихь свою дѣдиноу, и больше оутврьдихь божиювь помокию и своею моудростию, дановь ми ѡть бога, и вьздвигохь погибьшꙋю свою дѣдинꙋ, и приобрѣтохь ѡдь морьске землꙋ Зетоу и сь градовы. а ѡдь Арьбанась Пилоть, а ѡдь грьчьске земле Лабь с Льпланемь, Гльбочицоу, Рѣке, Загрьлатоу, Лѣвьче, Бѣлицоу, Лепеницоу. и божиювь помокию и своимь троудомь та вса приобрѣть, поспѣшениемь божиемь мирь и тихость вьсьприемьшоу владичьствоу моемоу ѡдь вьсоуда, зачехь по(о)щравати мысль свою и пооучавати оумь свои, вьжделѣвати и пещи се ѡ доуши своеи, вь которое число вьчьтень бꙋдоу вь дьнь страшьнаго сꙋда, и како би мощьно вьсприети ми ангельски и апостольски ѡбразь и послѣдовати владичьнемь глаголомь: вьзьмѣте иго мое на се, и наоучите се ѡть мене, ѣко кротькь есмь и сьмѣрень срьдьцемь, иго бо мое благо и брѣме мое лько есть. миноувьшоу же врѣмени многоу владика мои прѣмилостивы не прѣзьрѣ молениѣ сьплѣсканиѣ своего, нь ѣко щедры трꙋдоположьникь и мьздовьздатель, иже рече нескврьними своими оусти: не придохь призьвати праведьникь нь грѣшьникь вь покаѣние; и мьнѣ по милосрьдью его вьнезапоу приклоучьшоу се врѣмени ѣсно, и вса мира сего чьсть и слава ви вь чьтоже ми вьмѣнена бысть, и вьсоу красотоу житиѣ сего и дивьно вьзьрѣние ѣко и дымь ми бысть видимо, а христова любы паче привезоваше се кь мьнѣ аще и кь недостоиноу. и вьнезапоу ѡставихь владичьство мое и вьса моѣ, различьнаѣ моѣ, Христоу изьвольшоу тако и прѣсветѣи госпожди богородици, и сподоб(и) ме грѣшьнаго светаго ига его благаго, и ѡбьщьника ме сьтвори чьстьнаго и аннгельскаго и апостольскаго ѡбраза малаго и великаго. семоу же коньчавьшоу се о мьнѣ, оустрою семоу бываемоу, ѡставихь на прѣстолѣ моемь и вь христодарованѣмь ми владичьствѣ лоубьвьнаго ми сына Стѣфана, велиега жоупана и севастократора, зети ѡдь бога вѣньчанаго кирь Алеѯиѣ цара грьчькога, и аще и не достоинь рабь Христоу нарещи се, Симеонь мнихь, благословихь и всакимь благословлениемь, ѣкоже благослови Исакь Иѣкова, сына своего, еже посьпѣшьствовати емоу ѡ васкомь дѣлѣ блазѣ оу владичьствѣ своемь и благосрьдꙋ быти на мирь крьстиѣньскы и ѡ црькв(а)хь пещи се и о слоужещихь вь нихь и никакоже быти зазорьноу ѡдь всѣхь творьца и господа. по семь же изьволениемь владикы моего Исоу Христа, ѣкоже вѣщаваеть писание: никоториже пророкь вь ѡтьчьствѣ своемь приеть есть, начеть подвизати се мысль моѣ изити ми ѡдь знаниѣ моего и дѣти и постигноути нѣкое мѣсто и тоу полоучити сьпасение, и не ѡстави мене владика мои и моего желаниѣ, паче бо радꙋеть се ѡ грѣшьницѣ кающи се. издохь изь ѡтьчьства своего вь Светоую Гороу, и ѡбрѣтохь монастирь нѣколи бывьши, зовомы Хиландарь, вьведение светые и прѣславьние владичице наше богородице, идѣже не бѣ камень осталь на камени ноу развалень ѡдьноудь; и потроудивь старость свою, посьпѣшьствоующоу ми сыноу ми, велиемоу жоупаноу Стѣфаноу, сьподоби ме владика мои быти емоу кьтитороу. и чести его погибьшее вьзискахь, и ѡбновихь и по изьволению владичице богородице, и да, ере исьпросихь Парике оу цара оу Призьрѣнѣ, да дахь ѡдь нихь манастироу оу Светои, Горѣ светои богородици оу Милеꙗхь села Непробища, Момоушоу, Сламодравы, Ретивлоу, Трьние, Ретивьщица, Трьновьць, Хоча и дрꙋга Хоча и трьгь Тꙋнге и дьва винограда Тꙋнге насадихь и оулиѣнике ·д҃· : едьнь оу Трьпезѣхь, дрꙋги оу Дабьшорѣ, трети ꙋ Голишевѣ, четврьти ꙋ Парицѣхь; а за коимьжде оулиѣникомь по дьва чловѣка, и планиноу Богачоу, и ѡд влахь Радово соудьство и Ђꙋрьгево, а всеге влахь ·ро·, и дахь ѡдь бытька чьто моге, и оу Зетѣ кобыле и соли ·л҃· сьпоудовь. и аке кьто ѡдь манастирьскихь лꙋди бѣжи или влахь подь велиега жꙋпана или код инога кога, да се вракаю ѡпеть; ако ли ѡдь жꙋпанихь лꙋди приходе ꙋ манастирьске лоуди, да се вракаю опеть. и вьса елико дахь манастыреви оу Светоу Гороу, да нѣ трѣбѣ ни моемоу дѣтетеви ни моемоу оуноучетеви ни мо(емоꙋ) ро(ди)моу ни иномоу никомоуре. ако ли кьто сие прѣтвор(и да) моу богь соуди, и да моу е соупьрьница света богородица на страшьномь соудищи ѡномь и ѣзь грѣшьникь Симеѡнь.

Крьсть Симѡнѡвь и подьписание.

О врѣменьи сьмрьти прѣподобнаго ѡтьца Симеона и мниха.

Вь лѣто ·҂ѕѱи· мѣсеца фервара вь ·гі· дьнь вь вѣчномоу прѣложї се блаженствоу ѡтьць нашь Симеѡнь. завѣтомь ѡставивь манастырь си на мнѣ, велию тоугоу и боꙗзнь приехь, едино ѡть поустошьства, а дроуго и ѡть боꙗзни безбожьныхь разбоиникь. ѡставивь манастырь мнѣ вь маломь и смѣреномь ѡбразѣ, вь немьже ми ѡтиде, и прьвога игоумена прѣподобна моужа Меѳодиꙗ мніха и т. д.