Monumenta Serbica

† И азь смѣрѥны и всѣхь послѣднии милостию божиѡвь арьхиепискоупь всѣхь срьбскиихь и поморскиихь земьльь, нареченыи же вь мнишьскомь ѡбразѣ вь име светаго и великаго апостола и арьхииереꙗ срьбьскаго кѵрь Савы, рекьше Сава третии, видѣвь благооутробьноѥ смышлѥниѥ и потьщаниѥ и потроуждениѥ паче же и поданиѥ добро господина ми прѣвысокааго крала все срьбске землѥ и поморьске Стефана Оуроша ѥже ѡ кѥлии светаго вьзнесениꙗ вь Светѣи Горѣ, ѥже ѥсть пирьгь близь морꙗ на мѣстѣ рекомѣмь Хроусиꙗ вь ѡбласти монастыирꙗ светыиѥ богородице хиланьдарскыиѥ и прошениѥмь того самого господина ми прѣвысокаго крала, и ꙗкоже видѣхь записанаа и оутврьждена кралевьствомь ѥго, ѥлика соуть вь сиѥмь хрисовоулѣ, збговоривь се и азь сь братиѥю своѥю сь епискоупы, записахь и оутврьдихь и запрѣщамь и казлиинамь силою божьствьною и прѣчистыиѥ ѥго матере и чьстнаго и животворещаго крьста и всѣми светыими оугождьшиими ѥмоу ѡть вѣка молитвами господина и светителꙗ нашего кѵрь Савы и светаго Арьсениꙗ, Савы, Иѡаникиꙗ, Ѥѵстаѳиꙗ и Иꙗкова и Ѥѵстаѳиꙗ вьтораго, и азь же и братиꙗ моꙗ светители живи соуще проклинамо и завезоуѥмо, иже хощеть разорити и мало чьто ѡть писаныихь господиномь нашимь кралѥмь вь сиѥмь хрисоволѣ, нь паче да прѣбываѥть схранꙗѥмо и сблюдаѥмо тврьдо и непоколѣблимо и кралѥмь срьбскиимь, ѥгоже богь изволии господьствовати, и светители хотещиими по нась быти и игоумены и братиꙗми домоу светыиѥ богородице хиланьдарьскииѥ: аще ли кьто вьсхощеть разорити, да разориить ѥго богь и вь сии вѣкь и вь боудоущии аминь. сего ради писавше и подьпиисасмо вь свѣдѣниѥ всѣмь.

† Сава по милости божиѥ архиепискоупь всѣхь срьбскихь и поморскихь земль †.