Monumenta Serbica

† Достолѣпно и добродѣтельно и богоразоумно всегда славꙋ вьсилати богоу вь троици, сїи рѣчь ѡтьцоу и сыноу и светомоу доухоу, единомоу божьствоу, единои силѣ, ѥдиномоу естьствоу, единомоу соущьствоу, несьзданьноу, непрѣложноу и неразмѣсноу, трїисьставноу и сьбезначелноу и ѥдинослаавноу и единопрѣстольноу, ѡть нѥеже просїа свѣть неизреченьныѥ славы и многочьстныѥ, и дарѡлюбныѥ дары дарѡваше се пророкѡмь же и апостоломь и моученикомь и светителѥмь и прѣподобнымь и всемоу народоу православїа, ѡть нѥеже бо процвьтоше всѣмь вѣньци богозрачныи мирно живоущимь сь вѣрѡю на земли, самодрьжавнымь же царѥмь и владыкамь и властемь всѣмь различно дари раздѣлившоу, ꙗкоже всевиньнаа животоу безмѣрнаа моудрость божїа кь всѣмь велегласно вьпиѥть глаголющїи: мною царие царьствоують, и скїфтрї ихь ꙋтврьждают се, и силны сь оусрьдиѥмь правдоу пишоуть. тѣмьже и азь вь Христа бога благовѣрныи и богомь поставлѥны Стефань царь всѣмь срьблѥмь и грькомь и западнѣи странѣ, рекоу же Алванїи и поморїю и вьсемоу дисоу, божьствьноую бо благодѣтию вьзращьшоу ми вь своѥмь ѡтьчьствѣ, по того изволѥныю нарещїи се ѡтрасль благааго корене родительь моихь светїихь, ѡть правьдникꙋ светоую Сѵмеѡна Неманѥ новааго мирѡточца и прьвааго владыкы бывьшааго земли срьпьсцѣи и светителꙗ нашего архїереа и прьвонастолныка ѡтьчьства нашего кѵрь Савы, се же нꙗ господнѥю благодѣтию и поспѣшенїемь прѣчистыѥ владычице наше богородице и молитвами богоꙋгоднїихь тѣхь светїихь родитель и прародитель моихь, благословенїемь божїемь дарѡваньно ми бысть царьствие, и раждеженоу ми бывшоу вь начело царьствїа моѥго кь всѣмь светымь и божьствьныимь црькваамь, наипаче и больше и сь богодарѡваньною ми прѣвысокою и боголюбивѡю царицею авгоустиею кѵра Еленою вьсесрьдьчноо и ѡть все доуше поревноваасмо ѡ монастырехь Светые Горы великые поустынѥ Аѳона, идѣже ѡбрѣтають се прѣподобни и богоносни иноци светы и блаженыи ѡтьци, и слышахѡмь многаа и дивнаа ѡ жити моужьь тѣхь светыихь, и желаше ѡть многаа врѣмене царьство ми видѣти и поклонїти се мѣстомь тѣмь светымь и прїети благословенїе ѡть тѣхь светыхь и богоноснїихь ѡтьцьь страньно живоущїихь на земли: еиже и Христа моѥго изволѥнїемь и поспѣшенїемь прѣчистыѥ ѥго матере посѣшающоумоу на всако дѣло благо и дающоумоу всаа благаа кь спасению и испльнꙗющꙋмꙋ вь благыихь желанїа, и испльни же ѡть всеѥ доуше желанїе срьдьца моѥго видѣти светоую ѡноу гороу, по глаголющоумоу: вьзведохь очи мои вь горы ѡть ноудоуже придеть помощь моꙗ; и пакы: вь горы доуше вьздвигнемь се, греди таамо, ѡть ноудоуже помощь прилеть ти. еиже пришьдь царьство ми и сь богодарованьною ми царицею авгоустїею кѵра Еленою, тоу ѡбрѣтающи се великїи монастырь Хиланьдарь сьзданїи прѣродители моими, пришьдь царьство ми и поклони се и приѥмь благословенїе ѡть живоущїихь вь нѥмь старьць; тааже вьзиде царьство ми вь вьноутрьноунѣише монастыре светые те гѡры, и ѡбьшьдь царьство ми те свете монастыре и сь богодарѡваньною ми царицею авгоустиѥю кѵра Еленою оударисмо и оукрасисмо различны дары, и недостатьчнаа монастыреи тѣхь светыхь всаа испльны царьство ми, и видѣсмо вь тои светои гѡрѣ жилищаа скинїе и врьтьпи прѣподобнїихь тѣхь светыихь и богоносныхь ѡтьць поустыньны житель, и вельми оудивлѥнїи быхѡмь ѡ жити моужь тѣхь светыихь, по истинѣ небесны чловѣцї и земльны аггелїи. и приѥмь благословенїе и доушепользна словеса слышавь вь поꙋченїи, ꙗко и вельми пользевати се ими, по глаголющоумоу: ѡбратеть бо ме, рече, боѥщи се тебе и вѣдоущеи свѣдѣнїа твоꙗ. и ѡбьхожденїемь тѣхь светыхь мѣсть придосмо вь мѣсто рекомо Карѣꙗ, идѣже ѡбрѣтаѥт се келїа светаго Савы, великааго поустынижителꙗ ероусалимьскагѡ, сьзданьна господиномь и родителѥмь и просвѣтителѥмь нашемь кѵрь Савомь, вь нѥиже безьмльвно и богоꙋгодно житиѥ поживь, и видѣвьши боголюбнаа царица авгоутини кѵра Елена нищетоу и велиѥ недостатьчное келїе црькве те светыѥ, раждежена бывьши любѡвию христовою вь тои светѣи кели, и по изволѥнию боголюбнааго срьдьца еѥ и нарекшею на име царьства еѥ, ꙗко да ѥсть тои светои и божьствьнои кели вьторы хтиторь, вь сьблюденїе и ѡгледованїе мѣста тѡго светаго, ꙗко да ѥсть вь доушепользноѥ царьства еѥ, и да си избира ѡть всега чина хиланьдарьскааго старьца, коѥго хѡщеть, и полага вь тои светѣи кели, нь сь ꙋпрошенїемь и благословенїемь хиландарьскыимь и по е воли и хотѣни, а ѡть иноудѣ да не боуде кромѣ црькве хиландарскые. и вьзьвращающоУ се паки царьствоУ ни вь своА си вь светы и божьствьны монастырь Хиланьдарь, поискавь царьство мї и сь богодарѡваньною ми царицею авгоустиѥю кѵра Еленою старьца прѣдьстателꙗ кели тѡи светѣи, и сь изволѥнїемь царьства ни и благословениемь игоумена и всѣхь старьць благословисмо проигоумена попа Ѳеѡдоула, да ѥсть прѣдьстатель кели тѡи иже оу Карѣꙗхь, и такози моу ю даа царьство ни, ꙗко да моу ѥсть и до живота непрѣмѣньнаа, да молить бога за животь и за спасениѥ доуши царьства ни. и по благосрьдомоу ꙋмолѥнию и благооутробию кь всѣмь светымь и божьствьнымь црьквамь прѣвисокїе и богодарѡваньныѥ ми царице авгоустиѥ кѵра Елене и сь богодарованьнымь сыномь наю благовѣрнымь кралѥмь Ꙋрѡшемь всечьстѣи кели тѡи светаго Савы иже вь Карѣꙗхь дарѡва царьство ми ꙋ Хвостьнѣ село Косорикѥ и сь всѣми засельци, заселькь моу Дьнеполѥ, Долꙗни, Чешково, Челопечи и сь периѡромь косоритьскымь и сь ѡтьтесомь и сь мегами, сь виногради, сь млины, сь врьти, сь ливадами, с пашищи и сь лази и сь планиномь и сь вьсѣми правинами села того. и такози ѥ дарѡва царьство ми, да ѥсть келї светаго Савы иже ꙋ Карѣꙗхь до вѣка. и ѡсвободи ѥ царьство ми ѡть сокꙗ, ѡть позоба и ѡть приселице, ѡть воиске, ѡть ѱара и ѡть поклисарꙗ, ѡть града, ѡть винограда, ѡть сѣнокоше, ѡть глобе и поданька, просто рещи ѡть всѣхь работьь велихь и малихь. и тѡмоу да не забави ни кефалиꙗ ни кнезь ни сѣвасть ни владоущїи вь земли царьства ми, развѣ да ѡблада кедїа Савына и настоѥщи вь нѥи старьць вь волю и хотѣнїе того старьца; и да ѥсть оу законь сельь хиланьдарьскыихь ꙗкоже и Кроушево и прочаа села хиланьдарьска, да работаю кели тѡи светои. и що ѥсть записано ѡть светыхь хтиторь, да се даѥ ѡть монастыра оу келию светаго Савы благословенїе. моли царьство ми и запрѣщаа, да се испльнꙗ и наврьша, ꙗкоже ѥсть оуставлѥноо ѡть светыихь хтиторь такожде и вь домоу спасовѣ православнѣи патрїархїи ѡтьчьства нашего, иже изволише хтиторыѥ светы, да се даѥ, и тѡ да нѣсть вьзбраньно господиномь и ѡтьцемь нашимь патрїархѡмь светаго прѣстола великїе црькви патрїархїе, нь паче да се даѥ, ꙗкоже ѥсть оуреждено ѡть светыхь хтиторь. кь семоу же царьство ми приложи, да се даѥ ѡть коуке царьства ни на всако годище ·р҃· перперь бенетицѣхь и ·і· гоунь и ·і҃· кожоухь и ·і҃· клашьнь и ·і҃· мѣхь сиренїа и ·і҃· сировь; и да си ꙋзима всако лѣто на Плочи ·и҃· споудьь соли; и село Косорикь, що бихꙋ сокь давали царьствоу ми, този да даю кели светаго Савы. и сїе златопечатноѥ слово царьства ми молю всѣхь вась, по мнѣ царьствоующїи, сїемоу хрисовоулꙋ не разореноу быти нь паче оутврьждати: аще ктѡ наважденїемь дїаволимь потьщить се разорити сїе записаниѥ мною царемь Стефаномь и царицею авгоутїею кѵра Еленою, таковааго да разорить господь богь и прѣчистаа его мати, и да ѥсть поражень силою чьстнааго и животворещааго крьста и ѡть ·ві·хь апостоль и ·д҃·хь еѵангелисть и ѡть ·з҃·хь вьселенсыихь сьборь и светыхь ѡтьць нашихь Сѵмеѡна и Савы, и ѡть всѣхь светыхь да ѥсть проклеть, и ѡть царьства ми да нѣсть благословень, и да ѥсть причтень Июдѣ прѣдателю христовоу и к тѣмь рекьшїимь: крьвь ѥго на нихь и на чедѣхь ихь. написа же се сїи хрїсовоуль стоѥщоу господиноу прѣвисокѡмоу царю вь великѡславнѣмь градоу Прилѣпѣ вь лѣто ·҂ѕѡнѕ·, индикта ·а҃·

† Стефань вь Христа бога благовѣнрь царь и самодрьжьць Срьблемь и Грькомь, Поморию и Западнои Странѣ. †