Monumenta Serbica

Слава вь троици славимомꙋ и прѣблагомꙋ богꙋ. понеже оубѡ чловѣколюбьць богь неизреченною мꙋдростїю и промысломь оустра(ꙗ)ѥи вса, врѣмена и мѣста положи вь своеи области, и нарекь постави вь нихь царе же и власти и кнезе и давь имь комꙋждѡ ждрѣбїи свои обладати и строити, и сегѡ ради дльжнѡ есть хвалити и славити егѡ и чисти егѡ светыѥ оугодники и храми, любити ихь и оукрѣплꙗти всакими потрѣбами царскими благолѣпїꙗ ради, вьзиде царьствꙋ моемꙋ и срьдцꙋ моемꙋ великое желанїе поити вь Светꙋю Горꙋ аѳѡнскꙋю. тѣмже и азь вь Христа бога благовѣрныи и христолюбивыи самодрьжьць срьблѥмь и грькомь, бльгаромь и арбанасомь и дисїи рекше западнои странѣ, Стефань царь, божьствьнною ревностїю и любовїю раждигаемь, прїидохь вь Светꙋю Горꙋ аѳонскꙋю, вь светꙋю и великꙋю лаврꙋ срьбскꙋю, вь монастырь Хїландарь, иже сьздань бысть прародителми моими, прѣподобнымь Сѵмеономь, новымь мѵроточцемь, и блаженнымь їерархомь кѵрь Саввомь, прьвымь оучителѥмь нашимь, ихже и ѡбрѣтаемь царьствꙋ крѣпость, и оутврьжденїе и достоꙗнїе царьства ми молитвами ихь прїемлѥмь. и видѣхь чьстныи храмь, и оудивихь се красотѣ егѡ, и светꙋю ракꙋ источившꙋю мѵро прародителꙗ моегѵ светаго Сѵмеѡна, и ѡблобизавь поклонихь се сь теплою дꙋшею, и паче сь великимь благодаренїемь и почьстми почтохь и оукрасихь ракꙋ прародителꙗ моегѡ светагѡ Сѡмеѡна, и покои прїехь еликѡ мощно; и паки благословенїе прїемь ѡть прѣдрьжещагѡ начелствѡ прѣподобнагѡ ѡтьца игꙋмена кирь Гервасїꙗ іеромонаха и ѡть братїѥ еже поити ми и поклонити ми се светымь мѣстомь (и) иже вь безмльвїи живꙋщимь светымь и чьстнымь отьцемь: и такѡ овшьдь всю Светꙋю Горꙋ покланꙗющи се светымь и великимь црьквамь и благословенїе ѡть светыхь и чьстныхь аггелоподобныхь житїемь отьць, и еликѡ бысть мощно царьствꙋ ми, оукрасихь светыѥ и чьстныѥ храми ѡть малыхь даже до великихь ово златими сьсꙋды и сребрьнными ово же свещенными ѡдеждами, и благодарихь господа нашегѡ Іисꙋса Христа и прѣчистꙋю егѡ матерь благодѣтелницꙋ мою, иже ме сподоби видѣти очима моима, еже прѣжде слышахь и желахь видѣти. и прїидохь вь великꙋю и сьборнꙋю црьковь Протато, и обрѣтохь чьстнагѡ прота кирь Германа, и поклонихь се чьстнѣи и велицѣи црькви, и оукрасихь црьковь еликѡ мощно, и чьстнагѡ прота ѡдарихь, и придахь кабаль злата велицѣи црькви помѣна ради. паки вьзвратившꙋ ми се вь свои више реченныи монастирь, и еликѡ бысть мощно царьствꙋ ми, оукрасихь свтꙋю црькѡвь свещенными ѡдеждами и сьсꙋди и иними потрѣбами, ꙗкѡже и прѣжде мене ктитори и родителе мои ми, светагѡ їгꙋмена и братство ѡдаровахь ꙗкѡ молитвенники еже кь богꙋ ѡ нашемꙋ спасенїю и дрьжаве царьства. и прїиде же кь мнѣ їгꙋмень кѵрь Гервасїе и вьсь сьборь лаври хїландарьскїѥ, и вьспомѣнꙋше царьствꙋ ми, ꙗко монастирское мѣстѡ ѡкрꙋжное имать синоре вь многихь книгахь а не вь единомь хрисовꙋле, и молимь царьствїе ти, не прѣслꙋшаеть царьствїе ти, проть и їгꙋмени Светыѥ Горы и старцы прїити и сложити все синоре вь единь хрисовꙋль. и не прѣзрѣхь моленїꙗ чьстныхь ѡтьць, и написахь свои царьскїи листь сь моленїемь чьстномꙋ протꙋ кирь Германꙋ и прѣподобнимь їгꙋменомь и старцемь всеѥ обитѣли трꙋдь вьспрїѥти и прїити кь царьствꙋ ми вь монастырь Хиландарь. и они чьстныи мꙋжїе ꙗко отцы послꙋшливи и чедолюбцы прїидоше не закьснѣвше, и сказавь имь моленїе чьстныхь отьць лаври хиландарскїѥ ꙗкѡ сьединити ѡкрꙋжнїѥ синоре мѣсть монастирскихь вь единь хрисовꙋль, проть же кирь Германь и вси чьстныи отьцы ѡтвѣщаше царьствꙋ ми: все хотѣнїе твое, царю, испльнимь. и поискавше мѣстѡ ѡть кꙋдꙋ синорꙋ почети се и смотривше ѡть южнагѡ морꙗ кь западꙋ зреще ѡть мѣста подь Великѡмь Выгломь кь Зигю прилежеще, и тамѡ есть водица и мала трьстїꙗ, и паки почесмо, гдѣ есть водица, и трьстїе исходить на море, и идеть покраи морꙗ подь Хрїꙋметицꙋ и подь црьковь светагѡ Георгїꙗ на солища, и такѡ идеть краемь морꙗ краемь морꙗ на три врата, що сꙋ три камене оу море, и мимо ходи моноѯилисте и паки моремь моремь покраи правꙋ зреще кь Аѳѡнꙋ доходи на рѣкꙋ Иваницꙋ, а доходить до великагѡ камене оу морю на краи и ѡть толи кь сѣверꙋ правꙋ хридомь на дѣлькь, и тамѡ вьдрꙋзисмо крьсть вь дꙋбѣ, и ѡть толи правꙋ на келїища, и тꙋ камень подобьнь гробꙋ и на немь кꙋлꙋ положисмо, и ѡть толи право вь брьдо на Херово на велики дѣль, и тꙋ постависмо вꙋлꙋ оу камене, и такѡ дѣломь дѣломь паки низь брьдо право на пꙋть сьборныи противꙋ Пещерамь Орлїимь, и подь пꙋта на долине камень постависмо, и оу немꙋ вꙋла; и ѡть толи право прѣко рѣки Пещери Орлїѥ и паки правꙋ на великїи хридь кь сѣверꙋ на равнїи дѣль на светꙋю Маринꙋ и ѡть толѣ слѣче сѣче подь планинꙋ посрѣдѣ, и доходи оу каменїе сьбраннѡ, и ѡть толи доходи на долакь на желѣзныи крьсть на сьборныи пꙋть, и дрьжи пꙋтемь, що идеть ꙋ Свигмень, зрещи кь врьтоградꙋ свигменскомꙋ, и иде странно на црьквенꙋ землю и на црьвени камень, како се ками валꙗ кь Свигменꙋ, и идеть хридомь на Прїимь и на Лꙋстрꙋ, и мимо ходить сь зади црькве Цаинове; и ѡть толѣ прѣкл ꙋзь хридь правꙋ оу море; паки ѡть толѣ моремь моремь мимо ходеще Самарїю и пристанище и светагѡ Георгїꙗ и црьковь светагѡ Сѵмеѡна право моремь на светагѡ Андреꙗ; и ѡбходеще Стиларь моремь моремь подь платїю и елꙋ и светагѡ Еѵѳѵмїꙗ моремь на ловища ѡркинарскаꙗ на сьборныи пꙋть, и ѡть толѣ сьборнымь пꙋтемь на Виглꙋ зреще на вьстокь, и тꙋ есть крьсть ѡть древнее врѣме, и ѡть толѣ паки на десно кь югꙋ Вигломь на Великꙋ Виглꙋ на сьборныи пꙋть, и тꙋ есть камень зовомїи Моливдꙋза, и ѡть толѣ низь брьдо зреще кь югꙋ на равнинꙋ, и тꙋ есть камень становить, и ѡть толѣ прѣко Глꙋбока Потока оу велико блато, и такѡ правѡ низь брьдо кь морю на водицꙋ и трьтїе, идѣже почесмо. того ради оумоли црьство ми прѣподобнагѡ прота кирь Германа и чьстныи игꙋмени, и трꙋдолюбьзнѡ ѡбшьдше мѣсто и сьстависмо синоре вь единомь хрисовꙋлѣ, да не имать кто досаждати нашеи обитѣли. и иже се тьгда ѡбрѣтоше на сьборѣ, записахмо тѣхь имена царьство ми вь семь златопечатномь хрисовꙋлѣ на оувѣдѣнїе послѣднымь: чьстныи проть Светыѥ Горы кирь Германь іеромонахь, великїе и чьстныѥ царьскїѥ лавры їгꙋмень Павьль іеромонахь, Свигменꙋ їгꙋмень Елефтерїе іеромонахь, Каракалꙋ їгꙋмень Лаврентїе іеромонахь, Пандократора їгꙋмень Константїѥ іеромонахь, рꙋшкїи їгꙋмень Іѡакимь іеромонахь, Дохїꙗрꙋ їгꙋмень Рѡмиль іеромонахь, Ѯенофꙋ їгꙋмень Варлаамь іеромонахь, Филоѳеа їгꙋмень Тимоѳеи іеромонахь, Костамонитꙋ їгꙋмень Паисїѥ іеромонахь, Алꙋпскїи їгꙋмень Ѳеодꙋль іеромонахь, Зогрфскїи їгꙋмень Макарїи іеромонахь, Светагѡ Павла обытѣли їгꙋмень Пахомїи іеромонахь, дїѡнисїѥви ѡбитѣли їгꙋмень Ѳеѡдосїи іеромонахь. и сїе царьство ми сложи и оутврьди сь златопечатнымь словомь сь чьстнымь сьборомь Светыѥ Горы, да есть вь область прѣсветыѥ владычицы нашеѥ богородицы хиландарскои вьведенїе светаꙗ вь светыхь, ꙗкѡ да си имать никїмьже поврѣжденна или ѡтьемлема, нь да светаꙗ обитѣль хиландарскаꙗ тѣми заповѣда ѡть нась и до вѣка. молю же, иже вась богь изволить царьствовати по нась или синь царьства ми или ини, кого богь изволить, непотвореннꙋ быти нашемꙋ семꙋ завѣщанїю или комꙋ ѡтьдати се ѡть того мѣста, нь и паче потврьжденнꙋ да имать и испльненнꙋ. аще ли кто и ѡбррещеть се таковыи оухищренїемь дїаволскимь разорити или инако прѣложити или ѡтети ѡть выше писанныхь, таковагѡ да разорить господь богь и прѣчистаꙗ богомати, и вь мѣсто помощи да бꙋдеть емꙋ сьпрьница, и да гѡ поразить сила чьстнагѡ и животворещаго крьста, и да есть проклеть ѡть тыхь светыхь и богоносныхь отьць и ѡть всѣхь светыхь апостоль и ѡть четирехь еѵангелисть, и да есть причестникь Іꙋдѣ прѣдателю христовꙋ, а да есть сь оними, иже рѣше: вьзми, вьзми, распни егѡ, и тѣмь рѣкьшимь: крьвь егѡ на нась и на чедѣхь нашихь, и клетвꙋ да имать ѡть светыхь ктиторовь, светагѡ Сѵмеѡна и светытелꙗ Саввы и ѡть чьстнагѡ сьбора Светыѥ Горы аѳѡнскїѥ и ѡть инихь светыхь горь, и ѡть царьства ми да не есть благословень аминь. записа се сїе и оутврьди се словомь златопечатнымь мѣсеца априлїꙗ ·кѕ· дьнь, вь лѣто ·҂ѕѡнѕ·, индикта ·а҃·

Стꙋафнь вь Христа бога благовѣрныи царь и самодрьжьць Срьблѥмь, Грькѡмь, Бльгарѡмь и Арбанасѡмь.