Monumenta Serbica

По неизреченьномꙋ милосрьдию и чловѣколюбию владики моѥго, сладкаго ми Христа, по изволению и милости и вьсемилостивномꙋ ѥго призрѣнию ѥже и на царьствѣ ми, ꙗкоже и на прьвихь светихь православнихь царихь, такожде и благодѣть прѣсветаго своѥго дꙋха и на царьствѣ ми показа, ꙗкоже излиꙗ на светиѥ своѥ ꙋченики и апостоли, рекь имь: идѣте вь вьсꙋ вьселенꙋю, и проповѣдите славꙋ моѥго божьства. по вьсехвалимѣи ѥго милости таковиѥ дари и царьствꙋ дарова, и постави ме господина вьсемꙋ стежанию ѡтьчьствиꙗ моѥго, рекꙋ же земли србьскои и всѣмь грькѡмь, поморию вьсточномꙋ и западнимь странамь. милостию божию и неизреченимь ѥго промишлениѥмь сьдрьжещꙋ ми сиꙗ вьса, благовѣрномꙋ и богопоставленомꙋ Стѣфанꙋ Ꙋрошꙋ царꙋ, царьствꙋющꙋ ми ѡ бозѣ и веселещꙋ ми се сь вьзлюбленими властели и властеличики царьства ми и вьсегда непрѣстаньно чьстними дарови дарꙋѥ ихь; и како приходи кь царьствꙋ ми вьсечьстни старьць светиѥ гори Аѳона, Романь, синь севастократора Бранька, и ꙋспоменꙋ царьствꙋ ми, како се ѥсть зговориль своримь братѡмь Грьгꙋрѡмь и Влькѡмь, и како да приложе ѡдь своѥ бащине црькви светои богородици хиландарскои, и за ꙋспоменꙋтиѥ вьсечьстнога старьца Романа своѡмь братиѡмь дарова мꙋ царьство ми си свѣтли хрисовꙋль царьства ми, и записа мꙋ царьство ми црьквь бащинꙋ а светаго арьханьгела с треми селии: сь Трьстѣникомь и з Бѣжаники и с Тꙋшиломь и селищемь, що ѥсть дало било царьство ми севастократорꙋ Бранкꙋ с Хꙋдинами, ѡ-чеса ѥсть Житѣѥ ꙋ Бꙋгаре побѣгль, а подь црьков светꙋ богородицꙋ хиландарьскꙋ. и како ѥсть царьство ми инимь светимь и божьствнимь црьквамь записало и ꙋтврьдило хрисовꙋле, по томꙋжде ѡбразꙋ и сиѥзи црькви свето и божьствьноѥ записа и ꙋтврьди царьство ми светои богородици хиландарьскои. и молю и повелѣва и запрѣща царьство ми, ѥгоже богь изволи сина на прѣстолѣ царьства ми, сиѥмꙋ словꙋ царьства ми непотворенꙋ би(ти) и неврѣжденꙋ. аще ли се тко покꙋшаѥть потворити а или разорити ѥднꙋ чрьтꙋ ѡдь више писанога слова царьства ми, таковаго да ꙋбиѥ и порази господь богь вьседрьжитель и прѣчиста ѥго мати и сила чьстнаго и животворещаго крьста христва, и вь мѣсто помощи да мꙋ ѥсть мьстница и сꙋпостатница мати божиꙗ хиландарска на страшнѣмь сꙋдѣ христовѣ, и ѡдь царьства ми да нѣсть благословень. и сиѥ извѣстно и вьсенастоѥще и златопечатноѥ словѡ царьства ми записа се и подьписа и ꙋтврьди ѡбразѡмь и знамениѥмь царьства ми вь лѣто ·҂ѕѡог·, индиктиѡна ·г҃·, мѣсеца марта ·аі· дньꙋ.

† Стѣфань Оурѡшь вѣрни царь Срблемь и Гркѡмь †.

Повелѣниѥмь господина светаго цара логофеть Деꙗнь прѣрꙋчи ꙋ Прищинѣ мѣсеца марта ·аі· дньꙋ.