Monumenta Serbica

† Иже ис-прьва сицеваꙗ любьвь божьс(тв)ьнаꙗ и сладость неизреченниѥ слави твоѥе и кто довольнь ѥсть изглаголати таковꙋю благодать, иже дароваль ѥси, владико Христе, небесни царꙋ слави, своимь рабомь и православнимь царемь пожившимь благовѣриѥмь и чистотою прѣшьдьшимь вса лѣта живота своѥго и вьсприѥмшимь вѣнце почьсти ѡдь всемогꙋщаго владики и ѡть рꙋкии ангельске мьчь побѣди, си же вь царь(ствꙋ).... ꙋлꙋчише ѡбѣтованиꙗ божиꙗ, богꙋ же вьсхотѣвшꙋ и сиꙗ вса слꙋчившаꙗ се мнѣ сь милости господа бога спаса моѥго Исꙋ Христа, иже по то(го) изволению дарова мнѣ Стефанꙋ Ꙋрѡшꙋ, царꙋ срьблемь и грькѡмь, поморию и западнимь, веселю се доушею и тѣломь ѡ божьс(тв)ьнѣмь даровани, иже ми дасть владика Христось вьсприѥти ми вѣньць царьствиꙗ диꙗдимою и прьвоѥ знамениѥ царьскаго чрьтога, иже вса добрѣ ꙋстраꙗющꙋ ми по законꙋ ꙋставленномꙋ всечьстнаго збора иже ѡть прѣжде господиномь и родителемь царьства ми свето почившимь царемь, ииже ꙋстави всакаꙗ правила, тази вса ꙋтврьждаѥть царьство ми, зговорив се сь госпогѡмь и материю царьства ми, благовѣрною царицею кѵра Еленою, и сь господиномь и ѡтьцемь прѣѡсвѣщеньнимь патриархомь кѵрь Савомь и сь всѣми митрополити, игꙋмени и сь всѣми властели веле вьзможними подь рꙋкою царьства ми и сь всѣмь зборѡмь срьбьскимь иже записовати хрисовоуль и милости слоѡва царьска ꙗко ничемꙋже врѣжденнꙋ бити, по томꙋжде ѡбразꙋ царьскомꙋ изволи же и царьство ми, и сиѥма таковима достовѣрнима и ꙋгоднима и любимима властелинома царьства ми, Басетꙋ Баринчелꙋ Биволичикю и Трипетꙋ Миховикю Бꙋкикю, за нихь правовѣрно и всесрьдьчноѥ поработаниѥ царьствꙋ ми дарова имь царьство ми сиизи хрисѡвꙋль, и записа имь царьство ми ѡтокь ѡнꙋге Дꙋбровника Млѣть сь всѣми сели и сь мегѣми и ꙋтеси и сь всѣми правинами тогаи ѡтока и сь всѣмь метохѡмь, како ѥсть ѡть вѣка биль, с чимь га сꙋ имали ини вси ѡдь прѣжде, да имь ѥсть ꙋ бащинꙋ и ꙋ ѡюрочко име и нихь дѣцамь до вѣка, да си га имаю и дрьже како и всакꙋ свою сꙋщꙋю бащинꙋ; како ѥсть царьство ми инимь властеломь и властеличикемь записало и ꙋтрьдило бащине, тако и Басетꙋ Баринченꙋ и Трипетꙋ Михꙋ Бꙋкикю и нихь дѣцамь записахь и ꙋтврьдихь, ꙗко да имь ѥсть тврьдо до вѣка, любе подь црьковь за дꙋшꙋ подьписати, ꙋ прикию дати, продати, харизати, замѣнити, кꙋдѣ имь хотѣниѥ, ѡбратити, како и всакꙋ свою сꙋщꙋю бащинꙋ; и ꙋ сиѥмзи ꙋ всемь да се царьство ми не потвори, ни да имь ꙋзмꙋ ни за ѥдино ни за коѥ сьгрѣшениѥ просто рекше развѣ невѣре. и ѥгоже изволить богь по мнѣ господьствꙋюща на прѣстолѣ царьства ми, сиѥмꙋ слоѡвꙋ царьства ми не потвореннꙋ бити, нь и ѥще болше и крѣпчѣѥ потврьждати и сьблюдати. и сиѥ извѣстное и всенастоющеѥ печатноѥ слоѡво царьства ми записа се и ꙋтврьди ... всако ꙋтрьждениѥ и достоꙗниѥ царьско, иже се и записа знамениѥмь царьскимь вь лѣто ·҂ѕѡѯе·, индиктионь ·і҃·, вь славномь грдꙋ Скопи царьскомь, мѣсеца априла ·і҃· дьнь.

† Стефань Ꙋрошь благовѣрни царь Срьблемь и Грькѡмь.