Monumenta Serbica

† Господи боже мои, великое и неисповѣдимое твое милосрьдїе, иже еси подаль ꙗвьствно намь, твоимь рабѡмь, иже ѡть ис-прьва начьньшїи прѣдѣда нашего, гоподина прьвааго пастыра и наставника стадоу своемоу, великааго Неманю, земли срьбьскои, и того же изволи насадити ꙗко нѣкоую лѡзоу доброалѡдноую, и ѡть того ѡтрасли прѣкрасныѥ, ихже расплѡдиль еси по вьселѥннѣи, и твоею помощїю, втсеблагыи чловѣколюбивыи владыкѡ, все врагы свое покорившоу и добрѣ ѡтьчьство свое ꙋстроившоу и сь мирѡмь все дьни живота своего прѣшьдь, небесныихь благь сподобльшоу се, иже бысть новыи мѵрѡточьць земли срьбьскои, егоже молитвою и помощїю сподобльшоу се быти сьнаслѣдникоу того добрыимь дѣлѡмь мнѣ, прьвомоу благовѣрномоу и богомь поставлѥньномоу цароу Стефаноу, обновльшомоу прьвыи царьскыи вѣньць срьбьскои и помѡрскои земли, и царьствꙋющꙋ ми землѥю грьчьскою и всемоу помѡрїю и всемь западныимь странамь и всемꙋ дисоу и веселещоу ми се о бозѣ сь всѣми велевьзможныими подь рꙋкою моею, и прьвѣи чьсти вьздающꙋ ми светыимь и божьствныимь црьквамь, по томь же властелѡмь и властеличикемь и инѣмь прочїимь записовани хрисоволѥ и милости слѡвеса царьска, ꙗко ничесомоуже врѣжденьнꙋ быти: по томже ѡбразꙋ царьскꙋ и сиемоу таковомꙋ достовѣрьномꙋ и мнѡгѡ любимомꙋ и всесрьдьчномꙋ и братꙋ царьства ми севастократорꙋ Дѣанꙋ, и како ꙋспоменꙋ и говори царьствꙋ ми ѡ своеи црькви, кою ѥсть сьзидаль ꙋ своѥи бащинѣ, оу земли жегликовскои а ꙋ мѣстѣ рѣкомѣмь Архїлѥвица, вь име прѣсветыѥ и вьсесвѣтлые чюдотворице матере божїе вьведенїе иже вь светаа светыихь, еиже изволивши тако быти храмоꙋ ѥе. и поиска на царьствѣ ми брать царьства ми севастократорь Дѣань приложити села своа бащиньна, коꙗ мꙋ ѥсть записало царьство ми, нѥмꙋ и нѥговѣмь дѣцамь оу бащиноу, и за помилованїе царьства ми матере божїе иже вьздвигши ѡть одра болѣзньнаго изволихь принести дарь сыи к тебѣ богоматери. тѣмьже и царьство ми зговори се сь благочьстивою и христолюбивою прѣвысѡкою авгꙋстїею благовѣрною царицею кѵра Еленою, царицею царьства ми, и сь богодарованнымь и прѣвьзлюблѥннымь сыномь наю, кралѥмь Оурошемь, и сь господиномь и ѡтьцемь нашимь, прѣѡсвещенныимь патрїархѡмь срьблѥмь и грькѡмь, кѵрь Савѡмь, и сь всѣми митрополити и епискѡпыи и игꙋмены и сь властельми всѣми малыми и велицѣми и сь всѣмь сьборѡмь срьбьскые и помѡрьскые землѥ грьчкые, и дарѡва и записа царьство ми сыи вьсевсѣтлыи хрисоволь царьства ми матери божїѥи архїлѥвьскои, и за всеправовѣрно и срьдьчное поработанїе царьства ми севастократора Дѣана вьсесрьдьчныимь желанїемь дарꙋѥть и записꙋѥть царьство ми матери божиеи архїлевьскои метохїю сїю: село Подьлешане с мегꙗми и ѡтьтесы сь засельци и сь всѣми правинами села того; село Архїлѥвица конь црькве с мегꙗми и ѡтьтесы и правинами села того; село Роуизворь с мегꙗми и ѡтесы и правинами села того; селѡ Роугиньци с мегꙗми и ѡтесы и правинами села того; село Мокра Полꙗна; селѡ Арбанасы сь всѣми правинами; село Боиковци сь всѣми правинами; селѡ Дроугошевци с правинами; селѡ Маисторие; селище Маисторие Кроупници; селище Вильска; селище Врьдꙋнь; селище Калꙋꙗнѥвци; селище Денково; селище Враче; селище Седларь; селище Мекша; село Глажнꙗ с мегꙗми и ѡтеси и с правинами села того. и за сїа села вса ꙋспоменꙋ бркть царьства ми севастократорь Дѣань, ꙗко да си оутеше мегѥ, коудѣ соу симь селищемь, и такози повелѣ царьство ми, да поге самь с вѣщїими людьми, да ю теше, и оутесавши да принесе царьствꙋ ми, и царьство ми записа меге сие симь селѡмь всѣмь, понѥже соуть оу единь ѡтьтесь. аво меге црькви матери божїи архїлѥвьскои: ѡть крьста поутемь, кои греде ѡть Подьлешань оу Стльпьчаны, терь ѡть стльпьчкога дѣла терь нис-потокь бѣловодичькы, где исходи дольна Клепала, терь прѣходи надь ꙗзь Парьцоулѥве воденице, та на Добри Шорь до меге Роугижꙗ, та оуз мегоу стльпьчькоу оуз доль велїи десныи, та на Градинь дѣль оу гороу прѣко выше Матеа оу Чрьни Врьхь. село Вильска и мегꙗ моу ѡть Црьнога Врьха та на црьквища, та на ѡбѣ Стрьвице, терь на Скрьке, докле Дѣла тече, ѡть дѣла на оу погорь ꙋправь на Грьбавоу Кроушкоу на Честа Гꙋмнища, ѡть Грьбаве Кроушке прѣко подь гороу Новицꙋ оуправь надь Дроузетинь гробь, ѡть Дроузетина гроба ꙋ на погорь ꙋ рѣкꙋ, оу Царичино рѣкѡмь, та на Кобило Кобильщицомь, та на Орлеви дѣль, дѣлѡмь на Водичниковоу главоу, ѡть Водичникове главѣ оуправь на ꙋ погорь на Гльбокыи Доль на Станке, на Ꙗстребара главоу надь Геракара, тере на Ꙗбочно на кѵрь Ѳеѡдѡровь ѡдрь, та на Алавандиноу воденицоу, та на Просеченикь, на светоу Петкꙋ прѣко на Прибисаль крьсть, кои ѥсть надь Лагоборвце, и ѡть тꙋдꙋ надь Халашевце прѣко на дѣль стьпьчкыи дароуеть и записоуеть царьство ми црькви архїлѥвьскои матери божїи царьскымь обысныимь знаменїемь. слова царьства ми ꙗко да соуть тврьда и непоколѣбима никымь до вѣка, развѣ да си дрьжи мати божїа сиꙗ вса оуписаньна до вѣка неѡтьемлѥмо, доньдеже ѥсть и та божьствнаа црькви, и да нѣсть кто вольнь ѡтнети ни едино ѡть сихь всѣхь, развѣ да си дрьжи сиꙗ вса црькви та светаа и божьствнаа до вѣка свободно ѡть вьсѣхь напасти и поданькь велихь и малыихь царьскыихь и ѡть всѣхь владоущїихь, развѣ да си ѡблада сиѡмьзи метохїѡмь црьковь а инь никтоже. тѣмьже егоже изволи богь по мнѣ господьствовати кто любо, молю же и заклинаю сиемоу словꙋ цаарьства ми непотвореньноу быти, нь еще больше потврьждати. кто ли ѡть таковыихь потьщить се разорити сие или ѡтнети що ѡть домоу матере божїе архїлѥвьске, таковааго да разорить господь богь и прѣчистаа мати божїа, и да га порази сила чьстнаго и животворещааго крьста, и ѡть четирехь еѵаггелїсть и ѡть светыхь врьхѡвныихь апостоль ·ві· и ѡть ·тиі· светыихь и богоносныихь ѡтьць никеискыихь и ѡть всѣхь светыихь богоу ꙋгождьшихь и да ѥсть проклеть вь сїи вѣкь и вь боудоущїи, и сь Іоудою да имать оучестїе, и ѡдь царьства ми да нѣсть благословень нь паче и проклеть аминь. и сиѥ извѣстно и всенастоещее златопечатное слово царьства ми записа се и оутврьди вь всакое достоꙗнїе и оутврьжденїе црькви вь лѣто ·҂ѕѡнз·, індїктїѡнь ·і҃·

Вь Христа бога благовѣрныи Стефань царь Срьблемь и Грькѡмь.

И писа се сїе повелѣнїемь благовѣрнааго цара Стефана ꙋ Скопїи.