Monumenta Serbica

Понѥже оубо чловѣколюбць богь неиизреченьною моудростїю и промысломь оустраꙗѥ вьса, поставивь врѣмена и лѣта положи вь области своеи и нарекь вь нихь царе же и власти и кнезѣ и давь имь комоуждо ждрѣбы свои обладати и строити, ꙗкоже ѥсть лѣпо, ꙗко ѡть нѥго прїемлющимь царьство и власть, и сего ради дльжно ѥсть сь оусрьдїемь чисти и хвалити светые его домови и оугодьникы и любити ихь и оукрашати сь вьсакыми потрѣбами царьскыими, изрѣдьнее же паче сь благодаренїемь и почьстьми светомоу и живоносномоу грѡбоу светаго прѣроѡдителꙗ моѥго, прѣподобнаго Сѵмеѡна, новаго мѵроточьца, еже ѡбрѣтаѥмь царьствоу крѣпость и оутврьжденїе и довольствомь достоанїе и ѡдрьжанїе молитвами его, светителꙗ же и чюдотворца Савоу блыжьнꙗго ходатаꙗ ѡ нась кь богоу. тѣмьже и азь, вь Христа бога благовѣрьныи и христолюбивїи самодрьжьць срьблѥмь и грькомь Стефань царь, божьст(в)ьною любовїю раждигаемь прїидохь вь Светоую Гороу аѳонскоую, вь светоую и великоую лавроу срьбьскоую, вь монастирь глаголѥмии Хиланьтарь, иже и сьзданьна бысть прѣродитѣлми моими, прѣподобнымь Сѵмеѡномь новїимь мѵроточьцемь и блаженнымь іерарьхомь кѵрь Савомь прьвїимь оучителѥмь нашимь, и видѣхь храмь и ракоу источивьшоую мѵро прѣродителꙗ моего Сѵмеѡна светаго, и ѡблобызавь поклоних се, и покои прїемь елико мощно и пакы благословенїе прїемь ѡть прѣдрьжещаго начелство, прѣподобнаго рекоу игоумена кѵрь Герьвасїа іеромонаха и ѡть братїе еже поити ми и поклонити се светымь мѣстомь и иже вь безьмльвїи живоущїимь светымь и чьстнымь ѡтьцемь: и тако шьдьшоу ми вь Светоую Гороу и покланꙗющоу ми се светымь и вѣлыкыимь црьквамь и благословенїе прїемь ѡть светыхь и чьстныихь и аггеломь подобныихь житїемь ѡтьцьь, и елико бысть мощьно царьствоу ми, оукрасихь светые и чьстные храмы ѡть малыхь даже и до великыихь ово златїими сьсоуди и сребьрьними ово же свещенными одѣждами, и благодарихь господа нашего Ісоу Христа и прѣчистоую его матерь благодѣтелницоу мою, иже сподоби ме выдѣти очима моима, еже прѣжде слышахь. пакы вьзвративьшоу ми се вь свои выше реченьныи монастирь Хиланьтарь, и елика бысть сила царьствоу ми, оукрасихь светоую црьковь свещенными одѣждами и сьсоуди и иними потрѣбами, светаго же и прѣподобнаго игоумена кѵрь Гѥрьвасїа и сь братїами ѡдаровахь ꙗкоже мольбникы ѥже кь богоу ѡ нашемоу спасенїю и дрьжавѣ царьства. прїидѣ же кь мнѣ игоумень кѵрь Гѥрьвасїе сь чьстныимь сьборомь лавры хиланьдарскыѥ, и повѣдаше царьствоу ми, ꙗко ѥсть мѣсто на Прѣвлацѣ обще Светыѥ Горы глаголѥмоѥ Ливада и храмь светаго архїереа и чюдотворьца Николи, глаголѥмоѥ Палїокометица, и рѣкоше: ѡ цароу, коупи намь мѣсто сїе за оупокоенїе светаго монастира, твоемоу же царьствоу вь вѣчноую паметь, и сьедини сь мѣстомь глаголѥмимь Скорьпїа, ѥже ѥсть коупиль прѣродитѣль твои освещеньнїи Сава ѡть прота Светыѥ Горы кѵрь Исаака и ѡть всего сьбора за шьсть сьть перьпирь вѣлицѣхь и приложиль светомоу монастироу. и еще ѥсть монастирь глаголѥмиїи Зигь, що ѥсть даль светомоу прѣродителю твоемоу кѵрь Саве царь грьчьскы кѵрь Алеѯїе, и принесоше хрисовоуле за Зигь и за мѣсто зовомое Скорьпїа. и азь благо слово вьспрїехь, видѣвь ихь оусрьдїе кь светомоу мѡнастироу, и изволи се царьствоу ми за выше реченнаа мѣста на Прѣвлацѣ, що има Светаа Гора обще глаголѥмое Ливада, и храмь светаго архїереа и чюдотворца Николи глаголѥмое Палїокометица, еже коупити ми то и сьединити сь скорьпїискомь мегѡмь и сь зигскомь и приложити прѣсветѣи владычици нашеи богородици хиланьдарьскои. и абїе призвахь чьстные и богоноснїе ѡтьце кь себѣ и прота кѵрь Гѥрьмана, и поискахь мѣсто сь любовїю, прот же кѵрь Гѥрьмань и вьсь сьборь Светые Горы, сьвѣть сьтворьше, продаше ми выше реченьное мѣсто Ливадѣ и Палїокометицоу храмь светаго арьхїереа и чюдотворца Николи сь вьсемь оправданїемь и синори, що има, за ·҂аѱѯ· златиць. оумолих же светы сьборь, ꙗко да се потроуде и покажоу мегѥ и прѣдѣле мѣстоу томоуи, и да сьедине сь скорьпиискомь и зигьскомь мегѡмь, еже и сьтворише и поидоше сь царьствомь ми до выше реченнѣхь мѣстьь, и сь вьсакымь соудомь и закономь царьскыимь изнаидоше мегѥ и синоре. прьви синорь починѥ ѡть вьстока, гдѣ слази поуть вѣлыкыи на Ѡркїнарїю исподь брьда, и тоуи има два камена становита, и ѡть тоуи на море и покраи мора на Топила близь Коуметице и ѡть тоуи прѣма Коуметице на царьскыи поуть на трьстїе и ѡть тоуи кь западоу на просѣченїи ками на поуть, ѡть тоуи выше на Ватовоу кроушкоу и ѡть тоуи по хридоу по хридоу кь западоу на велики потокь ниже Скорпїе и прѣко потока исходи горѣ на делани ками забодени, що има тры рогови, и по выше конь поуть на камень плоскны и забодени и ѡть тѣли прѣко хрида оуправь на море ѡть юга, и тоуи има врьницоу на краи мора, и ѡть тоуи покраи мора покраи мора на Какодїавоу, и ѡще покраи мѡра до срѣде Сикамьнїе, гдѣ потокь пристае оу море, и тоуи има вроулоу, и ѡть тлеи глѣда на вьстокь на хридь на расцѣплѥни ками близь царьскога поута, и ѡть тоуи поутемь поутемь на гоумно, гдѣ има доубь, що се зове Каладендра, и пакы поутемь поутемь, и оузима на дѣсно на Бели Брѣгь, и прѣко потока на велилоу грамадоу и по ниже на хридь на дроугоу грамадоу и подолѣ на Црьвени Ками, зовоми Пирипетра, и ѡть тоуи оуправь на море и моремь моремь исподь Зига и мимо Зигь напрѣдь моремь, и выше мора има водицоу и трьсть и ѡть тлѣи оуправь оуз гороу на брьдо на велико блато и прѣко гльбокога потока исходи на равьниноу, и тоу ѥсть камень становить, и выше выше що исходи брьдо на Великоу Быгьлоу, и тоу ѥсть ками глаголѥмїи Моливьдоуза, и ѡть тлеи Бигломь Бигломь на Орькинарїю на два камена становита подь брьдо, ѡть кле ѡвьи синорь починѥ. и иже се обрѣтоше тогда на сьборѣ, записа и тѣхь имена царьство ми вь сїемь златопечатленемь хрисовоуле вь оувѣденїе: чьстны проть Светые Гори Гѥрьмань іеромонахь, царьскые великїе Лавры игоумень Акакїе іеромонахь и игоумень, великые и чьстные обытѣли иверьскїе игоумень Харьламьпїе іеромонахь, Ѯиропотамоу игоумень Павль іеромонахь, Свигьменоу игоумень Елеѵьѳерїе іеромонахь, Каракалоу игоумень Лаврентїе іерьмонахь, роушкыи игоумень Іѡакѵмь іеромонахь, Дохїароу игоумень Ромиль іеромонахь, Ѯенофоу игоумень Варьлаамь іеромонахь, Филоѳеоу игоумень Матѳеи іеромонахь, Кастамонитоу игоумень Паисїе іеромонахь, Алоупьскы игоумень Ѳеодоуль іеромонахь и Зографоу игоумень Макарїе іеромонахь, Сѵмеона Петра обытѣли Маѯїмь іеромонахь, Харитонови обыт́ѣли Іѡаникѵе іеромонахь, Григорїеви обытѣли Калистрать іеромонахь, светаго Павла обытѣли Пахомїе іеромонахь, Дїонѵсїеви обытѣли Ѳеѡдосїе іеромонахь. и сїе приложи царьство ми и оутврьди сь златопечаьнымь словѡмь сь чьстнымь сьборомь Светые Горы, да ѥсть вь область прѣсветѣи владычици нашеи богородици хиландарьскои вьвѣденїю вь светаа светыхь, ꙗко да си има выше реченьнаа мѣста никымже поврѣждена или ѡтьемлѥма, нь да светаа обытѣль хиландарьскаа тѣмеи заповѣда ѡть нась и до вѣка. молю же и вась, ѥгоже богь изволить царьствовати по нась, или сынь царьства ми или инь, кого богь изволить, непотвореноу быти нашемоу семоу завѣщанїю нь паче потврьжденноу и испльнѥноу. аще ли кто дрьзнеть потворити или разорити сїе наше приношенїе и дарь, таковаго да разорить господь богь и прѣчистаа богомати, и да моу соу соупьрьници светы Сѵмеѡнь и светитель Сава, и да ѥсть причестнь рекшимь: вьзьми, распни его. записа се сїе словеси златопечатленними вь лѣто ·҂ѕѡнѕ·, мѣскца декемврїа ·ві· дьнь, иньдикьтиѡнь ·а҃· на Прѣвлацѣ.

† Стефань вь Христа бога благовѣрны царь и самодрьжьць Срьблѥ(мь) и Гркомь и Бльгаромь.