ЕВАНГЕЛИЕ ЕЖЕ Ѿ ІОАННА
13:1
Ⱂⱃⱑⰶⰴⰵ ⰶⰵ ⱂⱃⰰⰸⰴⱐⱀⰻⰽⰰ ⱂⰰⱄⱌⱑ. ⰲⱑⰴⱏⰹ ⰻⱄ҃ ⱑⰽⱁ ⱂⱃⰻⰴⰵ ⰵⰿⱆ ⰳⱁⰴⰻⱀⰰ. ⰴⰰ ⰺ ⱂⱃⱑⰺ҅ⰴⰵⱅⱏ ⱁⱅⱏ ⰿⰻⱃⰰ ⱄⰵⰳⱁ ⰽⱏ ⱁⱌ҃ⱓ. ⰲⱏⰸⰾ̑ⱓⰱⰾⱐ ⱄⰲⱁⱗ. ⱄⱘⱎⱅⱔⱗ ⰲⱏ ⰲⱐⱄⰵⰿⱐ ⰿⰻⱃⱑ. ⰴⱁ ⰽⱁⱀⱐⱌⰰ ⰲⱐⰸⰾⱓⰱⰻ ⱗ.
Прѣжде же праздьника пасцѣ. вѣдꙑ ис҃ ѣко приде емоу година. да ꙇ прѣꙇ҅детъ отъ мира сего къ оц҃ю. възл̑юбль своѩ. сѫштѧѩ въ вьсемь мирѣ. до коньца вьзлюби ѩ.
13:2
Ⰺ҅ ⰲⰵⱍⰵⱃⰻ ⰱⱏⰹⰲⱏⱎⰻ. ⰴⰻⱑⰲⱁⰾⱆ ⱓⰶⰵ ⰲⱏⰾⱁⰶⱐⱎⱓ ⰲⱏ ⱄⱃⱏⰴⱐⱌⰵ ⰺ҅ⱓⰴⱑ ⱄⰻⰿⱁⱀⱁⰲⱆ. ⰺ҅ⱄⰽⰰⱃⰻⱁⱅⱐⱄⰽⱆⰵⰿⱆ. ⰴⰰ ⰻ ⱂⱃⱑⰴⰰⱄⱅⱏ.
Ꙇ҅ вечери бꙑвъши. диѣволоу юже въложьшю въ сръдьце ꙇ҅юдѣ симоновоу. ꙇ҅скариотьскоуемоу. да и прѣдастъ.
13:3
Ⰲⱑⰴⱏⰹ ⰶⰵ ⰻⱄ҃. ⱑⰽⱁ ⰲⱐⱄⱑ ⰴⰰⱄⱅⱏ ⰵⰿⱆ ⱁⱌ҃ⱐ ⰲⱏ ⱃⱘⱌⱑ. ⰺ҅ ⱑⰽⱁ ⱁⱅⱏ ⰱ҃ⰰ ⰺ҅ⰸⰻⰴⱏ. ⰺ҅ ⰽⱏ ⰱ҃ⱛ ⰳⱃⱔⰴⰵⱅⱏ.
Вѣдꙑ же ис҃. ѣко вьсѣ дастъ емоу оц҃ь въ рѫцѣ. ꙇ҅ ѣко отъ б҃а ꙇ҅зидъ. ꙇ҅ къ б҃ѵ грѧдетъ.
13:4
Ⰲⱏⱄⱅⰰ ⱄⱏ ⰲⰵⱍⰵⱃⱔ. ⰺ҅ ⱂⱁⰾⱁⰶⰻ ⱃⰻⰸⱏⰹ. ⰺ҅ ⱂⱃⰻⰹⰿⱏ ⰾⰵ[̆ⱁ]ⱀⱅⰻⰹ. ⱂⱃⱑⱂⱁⱑⱄⰰ ⱄⱔ.
Въста съ вечерѧ. ꙇ҅ положи ризꙑ. ꙇ҅ приімъ ле[̆о]нтиі. прѣпоѣса сѧ.
13:5
ⱂⱁⱅⱁⰿⱐ ⰶⰵ ⰲⱁⰾⰻⱑ ⰲⱁⰴⱘ ⰲⱏ ⱆⰿⱏⰹⰲⰰⰾⱐⱀⰻⱌⱘ. ⰺ҅ ⱀⰰⱍⱔⱅⱏ ⱆⰿⱏⰹⰲⰰⱅⰻ ⱀⱁⰸⱑ ⱆⱍⰵⱀⰻⰽⱁⰿⱏ. ⰺ҅ ⱁⱅⰻⱃⰰⱅⰻ ⰾⰵⱀⱅⰻⰵⰿⱐ. ⰺ҅ⰿⱐⰶⰵ ⰱⱑ ⱂⱃⱑⱂⱁⱑⱄⰰⱀⱏ.
потомь же волиѣ водѫ въ оумꙑвальницѫ. ꙇ҅ начѧтъ оумꙑвати нозѣ оученикомъ. ꙇ҅ отирати лентиемь. ꙇ҅мьже бѣ прѣпоѣсанъ.
13:6
ⱂⱃⰻⰴⰵ ⰶⰵ ⰽⱏ ⱄⰻⰿⱁⱀⱆ ⱂⰵⱅⱃⱆ. ⰺ҅ ⰳⰾ҃ⰰ ⰵⰿⱆ ⱅⱏ ⰳ҃ⰻ. ⱅⱏⰹ ⰾⰻ ⰿⱁⰺ ⱆⰿⱏⰹⰵⱎⰻ ⱀⱁⰸⱑ.
приде же къ симоноу петроу. ꙇ҅ гл҃а емоу тъ г҃и. тꙑ ли моꙇ оумꙑеши нозѣ.
13:7
ⱁⱅⱏⰲⱑⱎⱅⰰ ⰻⱄ҃. ⰺ҅ ⱃⰵⱍⰵ ⰵⰿⱆ. ⰵⰶⰵ ⰰⰸⱏ ⱅⰲⱁⱃⱘ ⱅⱏⰹ ⱀⰵ ⰲⱑⱄⰻ ⱀⱏⰹⱀ̑ⱑ. ⱃⰰⰸⱆⰿⱑⰵⱎⰻ ⰶⰵ ⱂⱁ ⱄⰻⱈⱏ.
отъвѣшта ис҃. ꙇ҅ рече емоу. еже азъ творѫ тꙑ не вѣси нꙑн̑ѣ. разоумѣеши же по сихъ.
13:8
ⰳⰾ҃ⰰ ⰵⰿⱆ ⱂⰵⱅⱃⱏ. ⱀⰵ ⱆⰿⱏⰹⰵⱎⰻ ⰿⱁⰵⱓ ⱀⱁⰳⱆ ⰲⱏ ⰲⱑⰽⱏ. ⱁⱅⱏⰲⱑⱎⱅⰰ ⰵⰿⱆ ⰻⱄ҃. ⰰⱎⱅⰵ ⱀⰵ ⱆⰿⱏⰹⱙ ⱅⰵⰱⰵ. ⱀⰵ ⰺ҅ⰿⰰⱎⰻ ⱍⱔⱄⱅⰻ ⱄⱏ ⰿⱀⱁⱙ.
гл҃а емоу петръ. не оумꙑеши моею ногоу въ вѣкъ. отъвѣшта емоу ис҃. аште не оумꙑѭ тебе. не ꙇ҅маши чѧсти съ мноѭ.
13:9
ⰳⰾ҃ⰰ ⰵⰿⱆ ⱄⰻⰿⱁⱀⱏ ⱂⰵⱅⱃⱏ. ⰳ҃ⰻ ⱀⰵ ⱀⱁⰷⱑ ⰿⱁⰹ ⱅⱏⰽⱏⰿⱁ. ⱀⱏ ⰹ ⱃⱘⱌⱑ ⰺ҅ ⰳⰾⰰⰲⱘ.
гл҃а емоу симонъ петръ. г҃и не ноѕѣ моі тъкъмо. нъ і рѫцѣ ꙇ҅ главѫ.
13:10
ⰳⰾ҃ⰰ ⰵⰿⱆ ⰻⱄ҃. ⰺ҅ⰸⰿⱏⰲⰵⱀⱏⰹ ⱀⰵ ⱅⱃⱑⰱⱆⰵⱅⱏ. ⱅⱏⰽⱏⰿⱁ ⱀⱁⰷⱑ ⱆⰿⱏⰹⱅⰻ. ⰵⱄⱅⱏ ⰱⱁ ⰲⱐⱄⱐ ⱍⰻⱄⱅⱏ. ⰺ҅ ⰲⱏⰹ ⱍⰻⱄⱅⰻ ⰵⱄⱅⰵ ⱀⱏ ⱀⰵ ⰲⱐⱄⰻ.
гл҃а емоу ис҃. ꙇ҅змъвенꙑ не трѣбоуетъ. тъкъмо ноѕѣ оумꙑти. естъ бо вьсь чистъ. ꙇ҅ вꙑ чисти есте нъ не вьси.
13:11
ⰲⱑⰴⱑⰰⱎⰵ ⰱⱁ ⱂⱃⱑⰴⰰⱙⱎⱅⰰⰵⰳⱁ ⰺ. ⱄⰵⰳⱁ ⱃⰰⰴⰻ ⱃⰵⱍⰵ. ⱑⰽⱁ ⱀⰵ ⰲⱄⰻ ⰵⱄⱅⰵ ⱍⰻⱄⱅⰻ.
вѣдѣаше бо прѣдаѭштаего ꙇ. сего ради рече. ѣко не вси есте чисти.
13:12
ⰵⰳⰴⰰ ⱆⰿⱏⰹ ⱀⱁⰸⱑ ⰺ҅ⱈⱏ. ⰺ҅ ⱂⱃⰻⱗⱅⱏ ⱃⰻⰸⱏⰹ ⱄⰲⱁⱗ. ⰺ҅ ⰲⱐⰸⰾⰵⰶⰵ. ⱂⰰⰽⱏⰹ ⱃⰵⱍⰵ ⰺ҅ⰿⱏ ⰲⱑⱄⱅⰵ ⰾⰻ ⱍⱐⱅⱁ ⱄⱏⱅⰲⱁⱃⰻⱈⱏ ⰲⰰⰿⱏ.
егда оумꙑ нозѣ ꙇ҅хъ. ꙇ҅ приѩтъ ризꙑ своѩ. ꙇ҅ вьзлеже. пакꙑ рече ꙇ҅мъ вѣсте ли чьто сътворихъ вамъ.
13:13
Ⰲⱏⰹ ⰳⰾⰰⱎⰰⰵⱅⰵ ⰿⱔ ⱆⱍⰻⱅⰵⰾ̑ⱑ ⰺ҅ !ⰳⱑ. ⰺ҅ ⰴⱁⰱⱃⱑ ⰳⰾ҃ⰵⱅⰵ ⰵⱄⰿⱐ ⰱⱁ.
Вꙑ глашаете мѧ оучител̑ѣ ꙇ҅ !гѣ. ꙇ҅ добрѣ гл҃ете есмь бо.
13:14
Ⰰⱎⱅⰵ ⱆⰱⱁ ⰰⰸⱏ ⱆⰿⱏⰹⱈⱏ ⰲⰰⱎⰻ ⱀⱁⰷⱑ. ⰳ҃ⱐ ⰺ҅ ⱆⱍⰻⱅⰵⰾ̑ⱐ. ⰺ҅ ⰲⱏⰹ ⰴⰾⱏⰶⱐⱀⰻ ⰵⱄⱅⰵ ⰴⱃⱆⰳⱏ ⰴⱃⱆⰳⱆ. ⱆⰿⱏⰹⰲⰰⱅⰻ ⱀⱁⰸⱑ.
Аште оубо азъ оумꙑхъ ваши ноѕѣ. г҃ь ꙇ҅ оучител̑ь. ꙇ҅ вꙑ длъжьни есте дроугъ дроугоу. оумꙑвати нозѣ.
13:15
ⱁⰱⱃⰰⰸⱏ ⰴⰰⱈⱏ ⰲⰰⰿⱏ. ⰴⰰ ⱑⰽⱁⰶⰵ ⰰⰸⱏ ⱅⰲⱁⱃⰻⱈⱏ ⰲⰰⰿⱏ. ⰺ҅ ⰲⱏⰹ ⱅⰲⱁⱃⰻⱅⰵ.
образъ дахъ вамъ. да ѣкоже азъ творихъ вамъ. ꙇ҅ вꙑ творите.
13:16
Ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⱀⱑⱄⱅⱏ ⱃⰰⰱⱏ ⰱⱁⰾ̑ⰻ !ⰳⱑ ⱄⰲⱁⰵⰳⱁ. ⱀⰻ ⰰⱂ҃ⱁⰾⱏ ⰱⱁⰾⰻ ⱂⱁⱄⱏⰾⰰⰲⱏⱎⰰⰵⰳⱁ ⰺ.
Амин амин гл҃ѭ вамъ. нѣстъ рабъ бол̑и !гѣ своего. ни ап҃олъ боли посълавъшаего ꙇ.
13:17
ⰰⱎⱅⰵ ⱄⰻ ⰲⱑⱄⱅⰵ ⰱⰾⰰⰶⰵⱀⰻ ⰵⱄⱅⰵ. ⰰⱎⱅⰵ ⱅⰲⱁⱃⰻⱅⰵ ⱑ.
аште си вѣсте блажени есте. аште творите ѣ.
13:18
ⱀⰵ ⱁ ⰲⱐⱄⱑⱈⱏ ⰲⰰⱄⱏ ⰳⰾ҃ⱙ. ⰰⰸⱏ ⰱⱁ ⰲⱑⰿⱐ ⰵⰶⰵ ⰺ҅ⰸⰱⱏⱃⰰⱈⱏ. ⱀⱏ ⰴⰰ ⰽⱏⱀ̑ⰻⰳⱏⰹ ⱄⱏⰱⱘⰴⱘⱅⱏ ⱄⱔ. ⱑⰽⱁ ⱑⰴⱏⰹ ⱄⱏ ⰿⱀⱁⱙ ⱈⰾⱑⰱⱏ. ⰲⱐⰸⰴⰲⰻⰳⱀⰵⱅⱏ ⱀⰰ ⰿⱔ ⱂⱔⱅⱘ ⱄⰲⱁⱙ.
не о вьсѣхъ васъ гл҃ѭ. азъ бо вѣмь еже ꙇ҅збърахъ. нъ да кън̑игꙑ събѫдѫтъ сѧ. ѣко ѣдꙑ съ мноѭ хлѣбъ. вьздвигнетъ на мѧ пѧтѫ своѭ.
13:19
ⱁⱅⱏⱄⰵⰾⱑ ⰳⰾ҃ⱙ ⰲⰰⰿⱏ. ⱂⱃⱑⰶⰴⰵ ⰴⰰⰶⰵ ⱀⰵ ⰱⱘⰴⰵⱅⱏ. ⰴⰰ ⰵⰳⰴⰰ ⰱⱘⰴⰵⱅⱏ ⰲⱑⱄⱅⰵ ⱑⰽⱁ ⰰⰸⱏ ⰵⱄⰿⱐ.
отъселѣ гл҃ѭ вамъ. прѣжде даже не бѫдетъ. да егда бѫдетъ вѣсте ѣко азъ есмь.
13:20
Ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⱂⱃⰻⰵⰿⰾⱔⰺ҅ ⰰⱎⱅⰵ ⰽⱁⰳⱁ ⱂⱁⱄⱏⰾ̑ⱙ ⰿⰵⱀⰵ ⱂⱃⰻⰵⰿⰾⰵⱅⱏ. ⰰ ⱂⱃⰻⰵⰿⰾ̑ⱔⰹ ⰿⰵⱀⰵ. ⱂⱃⰻⰵⰿⰾ̑ⰵⱅⱏ ⱂⱁⱄⱏⰾⰰⰲⱐⱎⰰⰵⰳⱁ ⰿⱔ.
Амин амин гл҃ѭ вамъ. приемлѧꙇ҅ аште кого посъл̑ѭ мене приемлетъ. а приемл̑ѧі мене. приемл̑етъ посълавьшаего мѧ.
13:21
Ⱄⰻ ⱃⰵⰽⱏ ⰻⱄ҃. ⰲⱏⰸⰿⱘⱅⰻ ⱄⱔ ⰴⱈ҃ⱁⰿⱐ. ⰺ҅ ⱄⱏⰲⱑⰴⱑⱅⰵⰾ̑ⱐⱄⱅⰲⱁⰲⰰ ⰺ҅ ⱃⰵⱍⰵ. ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⱑⰽⱁ ⰵⰴⰻⱀⱏ ⱁⱅⱏ ⰲⰰⱄⱏ ⱂⱃⱑⰴⰰⱄⱅⱏ ⰿⱔ.
Си рекъ ис҃. възмѫти сѧ дх҃омь. ꙇ҅ съвѣдѣтел̑ьствова ꙇ҅ рече. амин амин гл҃ѭ вамъ. ѣко единъ отъ васъ прѣдастъ мѧ.
13:22
Ⱄⱏⰸⰻⱃⰰⰰⱈⱘ ⰶⰵ ⱄⱔ ⰿⰵⰶⰴⱓ ⱄⱁⰱⱁⱙ ⱆⱍⰵⱀⰻⱌⰻ. ⱀⰵ ⰴⱁⰿⱏⰹⱄⰾⱔⱎⱅⰵ ⱁ ⰽⱁⰿⱐ ⰳⰾ҃ⰵⱅⱏ.
Съзираахѫ же сѧ междю собоѭ оученици. не домꙑслѧште о комь гл҃етъ.
13:23
Ⰱⱑ ⰶⰵ ⰲⱐⰸⰾⰵⰶⱔ ⰵⰴⰻⱀⱏ ⱁⱅⱏ ⱆⱍⰵⱀⰻⰽⱏ ⰵⰳⱁ ⱀⰰ ⰾⱁⱀⱑ ⰺⱄ҃ⰲⱑ. ⰵⰳⱁⰶⰵ ⰾ̑ⱓⰱⰾ̑ⱑⰰⱎⰵ ⰻⱄ҃.
Бѣ же вьзлежѧ единъ отъ оученикъ его на лонѣ ꙇс҃вѣ. егоже л̑юбл̑ѣаше ис҃.
13:24
ⱂⱁⰿⰰⱀⱘ ⰶⰵ ⱄⰵⰿⱆ ⱄⰻⰿⱁⱀⱏ ⱂⰵⱅⱃⱏ. ⰲⱏⱂⱃⱁⱄⰻⱅⰹ ⰻ ⰽⱏⱅⱁ ⱆⰱⱁ ⰵⱄⱅⱏ. ⱁ ⱀ̑ⰵⰿⱐⰶⰵ ⰳⰾ҃ⰵⱅⱏ.
поманѫ же семоу симонъ петръ. въпроситі и къто оубо естъ. о н̑емьже гл҃етъ.
13:25
ⱀⰰⱂⰰⰴⱏ ⰶⰵ ⱅⰰⰽⱁ ⱀⰰ ⱂⱃⱏⱄⰻ ⰺⱄ҃ⰲⱏⰹ. ⰳⰾ҃ⰰ ⰵⰿⱆ. ⰳ҃ⰻ ⰽⱏⱅⱁ ⰵⱄⱅⱏ.
нападъ же тако на пръси ꙇс҃вꙑ. гл҃а емоу. г҃и къто естъ.
13:26
ⱁⱅⱏⰲⱑⱎⱅⰰ ⰻⱄ҃. ⱅⱏ ⰵⱄⱅⱏ ⰵⰿⱆⰶⰵ ⰰⰸⱏ ⱁⰿⱁⱍⱐ ⱈⰾⱑⰱⱏ ⱂⱁⰴⰰⰿⱐ. ⰺ҅ ⱁⰿⱁⱍⱐ ⱈⰾⱑⰱⱏ ⱂⱃⰻⱗⱅⱏ. ⰺ҅ ⰴⰰⱄⱅⱏ ⰺ҅ⱓⰴⱑ ⱄⰻⰿⱁⱀⱆ. ⰺ҅ⱄⰽⰰⱃⰻⱁⱅⱐⱄⰽⱆⰿⱆ.
отъвѣшта ис҃. тъ естъ емоуже азъ омочь хлѣбъ подамь. ꙇ҅ омочь хлѣбъ приѩтъ. ꙇ҅ дастъ ꙇ҅юдѣ симоноу. ꙇ҅скариотьскоумоу.
13:27
ⰺ҅ ⱂⱁ ⱈⰾⱑⰱⱑ. ⱅⱁⰳⰴⰰ ⰲⱐⱀⰻⰴⰵ ⰲⱏ ⱀ̑ⱐ ⱄⱁⱅⱁⱀⰰ. !Ⰳⰾⰰ ⰵⰿⱆ ⰻⱄ҃. ⰵⰶⰵ ⱅⰲⱁⱃⰻⱎⰻ ⱅⰲⱁⱃⰻ ⱄⰽⱁⱃⱁ.
ꙇ҅ по хлѣбѣ. тогда вьниде въ н̑ь сотона. !Гла емоу ис҃. еже твориши твори скоро.
13:28
ⱄⰵⰳⱁ ⰶⰵ ⱀⰻⰽⱏⱅⱁⰶⰵ ⱀⰵ ⱃⰰⰸⱆⰿⱑ. ⰲⱐⰸⰾⰵⰶⱔⱎⱅⰻⱈⱏ. ⱍⰵⱄⱁ ⱃⰰⰴⰻ ⱃⰵⱍⰵ ⰵⰿⱆ.
сего же никътоже не разоумѣ. вьзлежѧштихъ. чесо ради рече емоу.
13:29
ⰵⱅⰵⱃⰻ ⰱⱁ ⰿⱐⱀⱑⰰⱈⱘ. ⱂⱁⱀ̑ⰵⰶⰵ ⰽⱁⰲⱐⱍⰵⰶⱐⱌⱐ ⰺ҅ⰿⱑⰰⱎⰵ ⰺ҅ⱓⰴⰰ. ⱑⰽⱁ ⰳⰾ҃ⰵⱅⱏ ⰵⰿⱆ ⰻⱄ҃. ⰽⱆⱂⰻ ⰵⰳⱁⰶⰵ ⱅⱃⱑⰱⱆⰵⰿⱏ ⱀⰰ ⱂⱃⰰⰸⰴⱐⱀⰻⰽⱏ. ⰾⰻ ⱀⰻⱎⱅⰻⰿⱏ ⰴⰰ ⱀⱑⱍⱐⱅⱁ ⰴⰰⱄⱅⱏ.
етери бо мьнѣахѫ. пон̑еже ковьчежьць ꙇ҅мѣаше ꙇ҅юда. ѣко гл҃етъ емоу ис҃. коупи егоже трѣбоуемъ на праздьникъ. ли ништимъ да нѣчьто дастъ.
13:30
ⱂⱃⰹⰻⰿⱏ ⰶⰵ ⱁⱀⱏ ⱈⰾⱑⰱⱏ. ⰺ҅ⰸⰻⰴⰵ ⰰⰱⰻⰵ. ⰱⱑ ⰶⰵ ⱀⱁⱎⱅⱐ
пріимъ же онъ хлѣбъ. ꙇ҅зиде абие. бѣ же ношть
13:31
ⰵⰳⰴⰰ ⰺ҅ⰸⰻⰴⰵ. ⰳⰾ҃ⰰ ⰶⰵ ⰻⱄ҃. Ⱀⱏⰹⱀ̑ⱑ ⱂⱃⱁⱄⰾⰰⰲⰻ ⱄⱔ ⱄⱀ҃ⱏ ⱍⱄ҃ⰽⱏⰹ. ⰺ҅ ⰱ҃ⱏ ⱂⱃⱁⱄⰾⰰⰲⰻ ⱄⱔ ⱁ ⱀ̑ⰵⰿⱐ.
егда ꙇ҅зиде. гл҃а же ис҃. Нꙑн̑ѣ прослави сѧ сн҃ъ чс҃кꙑ. ꙇ҅ б҃ъ прослави сѧ о н̑емь.
13:32
ⰰⱎⱅⰵ ⰱ҃ⱏ ⱂⱃⱁⱄⰾⰰⰲⰻⱅⱏ ⱄⱔ ⱁ ⱀ̑ⰵⰿⱐ. ⰺ҅ ⰱ҃ⱏ ⱂⱃⱁⱄⰾⰰⰲⰻⱅⱏ ⰹ [ⰲ] ⱄⰵⰱⱑ. [ⰻ] ⰰⰱⰻⰵ ⱂⱃⱁⱄⰾⰰⰲⰻⱅⱏ ⰹ.
аште б҃ъ прославитъ сѧ о н̑емь. ꙇ҅ б҃ъ прославитъ і [в] себѣ. [и] абие прославитъ і.
13:33
ⱍⱔⰴⱐⱌⰰ ⰵⱎⱅⰵ ⰿⰰⰾⱁ ⱄⱏ ⰲⰰⰿⰻ ⰵⱄⰿⱐ. ⰲⱐⰸⰻⱎⱅⰵⱅⰵ ⰿⰵⱀⰵ. ⰺ҅ ⱑⰽⱁⰶⰵ ⱃⱑⱈⱏ ⰺⱓⰴⱑⱁⰿⱏ. ⱑⰽⱁ ⱑⰿⱁⰶⰵ ⰰⰸⱏ ⰺ҅ⰴⱘ ⰲⱏⰹ ⱀⰵ ⰿⱁⰶⰵⱅⰵ ⱂⱃⰻⱅⰻ. ⰺ҅ ⰲⰰⰿⱏ ⰳⰾ҃ⱙ ⱀⱏⰹⱀ̑ⱑ.
чѧдьца еште мало съ вами есмь. вьзиштете мене. ꙇ҅ ѣкоже рѣхъ ꙇюдѣомъ. ѣко ѣможе азъ ꙇ҅дѫ вꙑ не можете прити. ꙇ҅ вамъ гл҃ѭ нꙑн̑ѣ.
13:34
ⰸⰰⱂⱁⰲⱑⰴⱐ ⱀⱁⰲⱘ ⰴⰰⱙ ⰲⰰⰿⱏ. ⰴⰰ ⰾ̑ⱓⰱⰻⱅⰵ ⰴⱃⱆⰳⱏ ⰴⱃⱆⰳⰰ. ⱑⰽⱁⰶⰵ ⰲⱐⰸⰾ̑ⱓⰱⰻⱈⱏ ⰲⱏⰹ. ⰴⰰ ⰺ҅ ⰲⱏⰹ ⰾ̑ⱓⰱⰻⱅⰵ ⰴⱃⱆⰳⱏ ⰴⱃⱆⰳⰰ.
заповѣдь новѫ даѭ вамъ. да л̑юбите дроугъ дроуга. ѣкоже вьзл̑юбихъ вꙑ. да ꙇ҅ вꙑ л̑юбите дроугъ дроуга.
13:35
ⱁ ⱄⰵⰿⱐ ⱃⰰⰸⱆⰿⱑⱙⱅⱏ ⰲⸯⱄⰻ. ⱑⰽⱁ ⰿⱁⰹ ⱆⱍⰵⱀⰻⱌⰻ ⰵⱄⱅⰵ. ⰰⱎⱅⰵ ⰾ̑ⱓⰱⱁⰲⱐ ⰺ҅ⰿⰰⱅⰵ ⰿⰵⰶⰴⱓ ⱄⱁⰱⱁⱙ
о семь разоумѣѭтъ вⸯси. ѣко моі оученици есте. аште л̑юбовь ꙇ҅мате междю собоѭ
13:36
ⰳⰾ҃ⰰ ⰵⰿⱆ ⱄⰻⰿⱁⱀⱏ ⱂⰵⱅⱃⱏ. ⰳ҃ⰻ. ⰽⰰⰿⱁ ⰺ҅ⰴⰵⱎⰻ. ⱁⱅⱏⰲⱑⱎⱅⰰ ⰵⰿⱆ ⰻⱄ҃. ⱑⰿⱁⰶⰵ ⰰⰸⱏ ⰺ҅ⰴⱘ. ⱀⰵ ⰿⱁⰶⰵⱎⰻ ⱀⱏⰹⱀ̑ⱑ ⱂⱁ ⰿⱐⱀⱑ ⰺ҅ⱅⰻ. ⱂⱁⱄⰾⱑⰴⱐ ⰶⰵ ⱂⱁ ⰿⱀⱑ ⰺ҅ⰴⰵⱎⰻ.
гл҃а емоу симонъ петръ. г҃и. камо ꙇ҅деши. отъвѣшта емоу ис҃. ѣможе азъ ꙇ҅дѫ. не можеши нꙑн̑ѣ по мьнѣ ꙇ҅ти. послѣдь же по мнѣ ꙇ҅деши.
13:37
!Ⰳⰾⰰ ⰵⰿⱆ ⱂⰵⱅⱃⱏ. ⰳ҃ⰻ ⱂⱁ ⱍⱐⱅⱁ ⱀⱏⰹⱀ̑ⱑ ⱂⱁ ⱅⰵⰱⱑ ⱀⰵ ⰿⱁⰳⱘ ⰺ҅ⱅⰻ. ⱀⱏⰹⱀ̑ⱑ ⰴⱎ҃ⱘ ⰿⱁⱙ ⰸⰰ ⱅⱔ ⱂⱁⰾⱁⰶⱘ.
!Гла емоу петръ. г҃и по чьто нꙑн̑ѣ по тебѣ не могѫ ꙇ҅ти. нꙑн̑ѣ дш҃ѫ моѭ за тѧ положѫ.
13:38
ⱁⱅⱏⰲⱑⱎⱅⰰ ⰵⰿⱆ ⰻⱄ҃. ⰴⱎ҃ⱘ ⰾⰻ ⱅⰲⱁⱙ ⰸⰰ ⰿⱔ ⱂⱁⰾⱁⰶⰻⱎⰻ. ⰰⰿⰻⱀ ⰰⰿⰻⱀ ⰳⰾ҃ⱙ ⱅⰵⰱⱑ. ⱀⰵ ⰲⱏⰸⰳⰾⰰⱄⰻⱅⱏ ⰽⱆⱃⱏ. ⰴⱁⱀ̑ⱐⰴⰵⰶⰵ ⱁⱅⱏⰲⱃⱏⰶⰵⱎⰻ ⱄⱔ ⰿⰵⱀⰵ ⱅⱃⰻ ⰽⱃⰰⱅⱏⰹ.
отъвѣшта емоу ис҃. дш҃ѫ ли твоѭ за мѧ положиши. амин амин гл҃ѭ тебѣ. не възгласитъ коуръ. дон̑ьдеже отъвръжеши сѧ мене три кратꙑ.