Зачѧло евађ҃лиѣ. ꙇс҃ хв҃а сн҃а бж҃иѣ.

ѣкоже естъ псано въ пророцѣхъ. се азъ посъл̑ѭ ађ҃лъ моі. прѣдь лицемь моꙇмь. ꙇ҅же оуготовитъ пѫть твоꙇ. прѣдъ тобоѭ.

Гласъ въпиѭштаго въ поустꙑн̑и. оуготоваꙇ҅те пѫть гн҃ь. правꙑ творите стьзѧ его.

Бꙑстъ ꙇ҅оанъ кръстѧ въ поустꙑн̑и. ꙇ҅ проповѣдаѩ крьштение покаанию. въ отъпоуштение грѣхомъ.

Ꙇ҅ исхождааше къ н̑емоу всѣ ꙇ҅юдѣꙇскаѣ страна. ꙇ҅ ил҃мѣне. ꙇ҅ крьштахѫ сѧ вси въ ꙇорданьсцѣꙇ рѣцѣ. отъ н̑его. ꙇ҅сповѣдаѭште грѣхꙑ своѩ.

бѣ же ꙇ҅оанъ обльченъ власꙑ вельбѫжди. ꙇ҅ поѣсъ оусъмѣнъ о чрѣслѣхъ его. ꙇ҅ ѣдь. акриди ꙇ҅ медъ дивиі.

ꙇ҅ проповѣдааше гл҃ѧ. грѧдетъ крѣпл̑еꙇ мене. въ слѣдъ мене. емоуже нѣсмь достоꙇ҅нъ. поклон̑ь сѧ раздрѣшити. ремене сапогоу его.

азъ оубо крьстихъ вꙑ водоѭ. а тъ крьститъ вꙑ дх҃омь ст҃ьꙇмь.

ꙇ҅ бꙑсть въ дьни тꙑ. приде ис҃ отъ назарѣта галилеꙇ҅скааго. ꙇ҅ крьсти сѧ отъ ꙇ҅оана въ ꙇорⸯданѣ.

ꙇ҅ абие въсходѧ отъ водꙑ. ꙇ҅ видѣ разводѧшта сѧ !нбса. ꙇ҅ дх҃ъ ѣко голѫбь сьходѧшть на н̑ь.

ꙇ҅ бꙑстъ гласъ съ неб҃се. тꙑ еси сн҃ъ моі възл̑юбл̑енъꙇ. о тебѣ благоволихъ.

ꙇ҅ абие дх҃ъ ꙇзведе і въ поустꙑн̑ѭ.

ꙇ҅ бѣ тоу въ поустꙑн̑и дьниі к҃. ꙇ҅скоушаемъ сотоноѭ. ꙇ҅ бѣ съ звѣрьми. ꙇ҅ ађ҃ли слоужаахѫ емоу.

по прѣданиі же ꙇоановѣ. приде ис҃ въ галилеѭ. проповѣдаѩ евађ҃лие. цр҃сиѣ бж҃иѣ.

гл҃ѧ. ѣко ꙇ҅сплъни сѧ врѣмѧ. ꙇ҅ приближи сѧ цр҃ствие бж҃ие. покаите сѧ ꙇ҅ вѣроуіте въ евађ҃лие бж҃ие.

Ходѧ же при мори галилеꙇ҅сцѣмь видѣ симона. ꙇ҅ аньдрѣа брата того симона. въметѫшта мрѣжѧ въ мор̑е. бѣашете бо рꙑбар̑ѣ.

ꙇ҅ рече ꙇ҅ма ис҃. придѣта въ слѣдъ мене. ꙇ҅ сътвор̑ѭ вꙑ бꙑти ловьца чк҃омъ.

ꙇ҅ абие оставьша мрѣжѧ по н̑емь ꙇ҅досте.

ꙇ прѣшⸯдъ мало отътѫдоу. оузьрѣ ꙇ҅ѣкова зеведеова. ꙇ҅оана братра его. ꙇ҅ та въ алⸯдиі. завѧзаѭшта мрѣжѧ.

ꙇ҅ абье възъва ѣ. ꙇ҅ оставьша оц҃а своего зеведѣа въ ладиі. съ наꙇ҅мьникꙑ по н̑емь ꙇ҅досте.

ꙇ҅ вънидошѧ въ каперънаоумъ. ꙇ҅ абье въ сѫботꙑ. на сънъмишти оучааше.

ꙇ҅ дивл̑ѣхѫ сѧ о оучениі его. бѣ бо оучѧ ѣко власть ꙇ҅мꙑ. а не акꙑ кънижьници ꙇ҅хъ.

Ꙇ҅ бѣ на сънъмишти[хъ] ꙇ҅хъ. чк҃ъ нечистомь дх҃омь. ꙇ възъва

гл҃ѧ. остани чьто естъ намъ. ꙇ҅ тебѣ ис҃е. назарѣнине. пришьлъ еси погоубитъ насъ. вѣмъ тѧ къто еси ст҃ъꙇ бж҃іи.

ꙇ҅ запрѣти емоу ис҃ гл҃ѧ. оумльчи. ꙇ҅ изиди ꙇ҅ж н̑его.

ꙇ҅ сътрѧсъ і дх҃ъ нечистъꙇ. ꙇ҅ възъпивъ гласъмь велиемь. ꙇ҅ изиде ꙇ҅ж н̑его.

ꙇ҅ оужасѫ сѧ вси. ѣко ꙇ сътѧзаахѫ сѧ къ себѣ гл̑ѭште. чьто оубо естъ се. ꙇ҅ чьто оучение се новое. ѣко по области дх҃мъ. нечистъꙇмъ велитъ. ꙇ҅ послоушаѭтъ его.

ꙇ҅ изиде слоухъ его абие. въ вьсѫ странѫ галилеꙇ҅скѫ.

ꙇ҅ абье ꙇ҅шьдъше ꙇ сънъмишта. придѫ въ домъ симоновъ ꙇ҅ аньдрѣовъ. съ ꙇ҅ѣковомь. ꙇ҅ иоанномь.

Тъшта же симонова. лежааше огн̑емь жегома. ꙇ҅ абие гл҃ашѧ емоу о н̑еі.

ꙇ҅ пристѫпл̑ь въздвиже ѭ. ꙇ҅мъ за рѫкѫ еѩ. ꙇ҅ остави ѭ огн̑ь. ꙇ҅ слоужааше емоу.

поздѣ же бꙑвъши. егда же захождааше слъньце. приношаахѫ къ н̑емоу всѧ недѫжьнꙑѩ.

ꙇ҅ бѣ вьсь градъ събъралъ сѧ къ двьремъ.

Ꙇ҅ ицѣли многꙑ недѫжьнꙑѩ. ꙇ҅мѫштѧ различьнꙑ ѩзѧ. ꙇ҅ бѣсꙑ многꙑ ꙇ҅згъна. ꙇ҅ не оставл̑ѣаше гл҃ати бѣсъ ѣко вѣдѣахѫ і.

ꙇ҅ ютро пробрѣзгоу ѕѣло. въставъ ꙇ҅зиде. ꙇ҅ иде въ поусто мѣсто. ꙇ҅ тоу молитвѫ дѣаше.

ꙇ҅ гънашѧ і симонъ. ꙇ҅ иже бѣахѫ съ н̑имь. ꙇ҅ обрѣтъше і

гл҃ашѧ емоу. ѣко вси ꙇ҅штѫтъ тебе.

ꙇ҅ гл҃а ꙇ҅мъ. ꙇ҅дѣмъ въ ближьн̑ѧѩ вси ꙇ҅ градꙑ. да ꙇ҅ тоу проповѣмъ. на се бо ꙇ҅зидохъ.

ꙇ҅ бѣ проповѣдаѩ на сънъмиштихъ ꙇ҅хъ. въ вьсеи галилеі. ꙇ҅ бѣсꙑ ꙇ҅згонѧ.

Ꙇ приде къ н̑емоу прокаженъ молѧ і. ꙇ҅ на колѣноу падаѩ. ꙇ҅ гл҃а емоу ѣко аште хоштеши. можеши мѧ ꙇ҅штистити.

ис҃ же милосръдовавъ. простьръ рѫкѫ коснѫ і. ꙇ҅ гл҃а емоу. хоштѫ ꙇ҅штісти сѧ.

ꙇ҅ рекъшю емоу абие отиде проказа отъ н̑его. ꙇ҅ чистъ бꙑстъ.

ꙇ҅ запрѣшть емоу абье ꙇ҅згъна и.

ꙇ҅ гл҃а емоу бл̑юди сѧ. никомоуже ничьтоже не рьци. нъ шьдъ покажи сѧ архиереови. ꙇ҅ принеси за очиштение твое. еже повелѣ м̑ѵси. вь съвѣдѣтел̑ьство ꙇ҅мъ.

Ѡнъ же шьдъ начѧтъ проповѣдати много. ꙇ҅ проносити слово. ѣко къ томоу не можааше авѣ въ градъ вънити. нъ вьнѣ въ поустѣхъ мѣстѣхъ бѣ. ꙇ҅ прихождаахѫ къ н̑емоу отъвъсѫдѣ.