Ꙇ въшедъ прохождааше ис҃ъ въ ерихѫ.

и се мѫжъ именемь нарицаемъ закьхеи. ꙇ сь бѣ старѣи мꙑтаремъ. ꙇ тъ бѣ богатъ.

ꙇ искааше видѣти ис҃а къто естъ. ꙇ не можааше народомъ. ѣко тѣло{б}мъ малъ бѣ.

и прѣди текъ възлѣзе на сѵкомориѭ. да видитъ і. ѣко тѫдѣ хотѣаше минѫти.

ꙇ ѣ[ко] приде на мѣсто. възьрѣвъ ис҃ видѣ и. ꙇ рече къ немоу. закьхѣе потъштавъ сѧ сълѣзи. дънесь бо подобаатъ ми въ домоу твоемь бꙑти.

и потъштавъ сѧ сълѣзе. и приѩтъ і радоуѩ сѧ.

ꙇ видѣвъше вьси ръптаахѫ гл҃ѭште. ѣко къ грѣшънѫ мѫжю въниде витатъ.

ставъ же закьхеи рече къ г҃и. се полъ имѣниѣ моего г҃и дамъ ништиимъ. ꙇ аште е҅смъ кого чимь обидѣлъ. възвращѫ четворицеѭ.

Рече же къ немоу ис҃ъ. ѣко дьнесь сп҃сние домоу твоемоу бꙑстъ. зане и сь сн҃ъ авраамль естъ.

Приде бо сн҃ъ члв҃чскꙑ възискатъ. ꙇ сп҃стъ погꙑбъшааго. :: к!ц ::

Слꙑшѧщемъ же имъ се. приложь притъчѫ рече. занеже тъ бѣ близъ !има. ꙇ мьнѣахѫ ѣко абие хоштетъ цс҃рствие бж҃ие авити сѧ ::

Рече же. чл҃къ единъ добра рода иде на странѫ далече. приѩти себѣ цс҃рствие. ꙇ възврати сѧ.

Призъвавъ же и десѧть рабъ своихъ. ꙇ дастъ имъ десѧть мънасъ. ꙇ рече къ нимъ. коуплѫ дѣите доньдеже придо.

граждане же его ненавидѣахѫ его. посълашѧ молитвѫ въ слѣдъ его гл҃ѭще. не хоштемъ семоу да цс҃рствоуоутъ надъ нами.

ꙇ бꙑстъ егда сѧ възврати. приимъ цс҃рствие. ꙇ рече да пригласѧтъ емоу рабꙑ тꙑ. ꙇмъже дастъ съребро. да оувѣстъ какѫ коуплѭ сѫтъ сътворили.

приде же пръвꙑ гл҃ѧ г҃и. мън!съ твоѣ придѣла десѧть мьнасъ.

ꙇ рече емоу благꙑ рабе и добрꙑ. ѣко о малѣ вѣренъ бꙑстъ. бѫди область имꙑ надъ десѧтьѭ градъ.

ꙇ приде въторꙑ гл҃ѧ. мънасъ твоѣ г҃и сътвори !д мънасъ.

рече же и томоу. ꙇ тꙑ бѫди надъ пѧтиѭ градъ.

ꙇ дроугꙑ приде гл҃ѧ г҃и. се мънасъ твоѣ ѭже имѣхъ. положенѫ въ оуброусѣ.

боѣахъ бо сѧ тебе. ѣко члв҃къ ѣръ еси. вьземлеши егоже не положъ. ꙇ жьнеши егоже не сѣвъ.

гл҃а емоу отъ оустъ твоихъ сѫждѫ ти зълꙑ рабе. вѣдѣаше ѣко азъ члв҃къ ѣръ есмъ. въземлѧ егоже не положихъ. ꙇ жьнѧ егоже не сѣхъ.

ꙇ по чъто не въдастъ моего съребра пѣнѧжьникомъ. ꙇ азъ пришедъ съ лихвоѭ истѧзалъ е бимъ.

ꙇ прѣдъстоѩштиимъ рече. вьзьмѣте отъ него мънасѫ. ꙇ дадите имѫштѫоумоу. !ꙇ. мънасъ.

ꙇ рѣшѧ емоу г҃и иматъ !ꙇ мънасъ.

!Глѭ же вамъ ѣко вьсѣкомоу имѫщюмоу дадѧтъ. а отъ не имѫштааго. и еже иматъ отъимѫтъ отъ него :: к!ц ::

Обаче врагꙑ моѩ тꙑ. не хотѣвъшѧѩ мьнѣ {да} да цс҃рь бимь бꙑлъ надъ ними. приведѣте сѣмо. ꙇ исѣцѣте ѩ прѣдъ мъноѭ ::

Ꙇ се рекъ идѣаше прѣди въсходѧ въ !имъ.

ꙇ бꙑстъ ѣко приближи сѧ въ витъфађиѭ и витаниѭ. къ горѣ нарицаемѣи елеонъ. посъла дъва оученикъ своихъ

гл҃ѧ. ꙇдѣта вь прѣмьнѭѫ весь. вь нѭже въходѧшта обрѧштета жрѣбѧ привѧзано. на неже никтоже къде отъ чл҃къ не вьсѣде. отрѣшша е приведѣта.

ꙇ аще къто вꙑ въпрашаатъ. тако речета емоу. ѣко г҃ъ трѣбоуоутъ его.

шедъша же посъланаѣ. обрѣтете ѣкоже рече има.

отрѣшаѭштема же има жрѣбѧ. рѣшѧ господие его къ нима. чъто отрѣшаата жрѣбѧ.

она же рѣсте ѣко г҃ъ трѣбоуоутъ его.

и привѣсте е къ ис҃ви. ꙇ възвръгъше ризꙑ св ѩ҅ на жрѣбѧ. въсадишѧ ис҃а ::

Ꙇдѫщтю же емоу постилаахѫ ризꙑ по пѫти.

приближаѭштю же сѧ емоу абие къ низъхождению горѣ елеоньстцѣи. начѧтъ вьсе мьножъство оученикъ радоуѭште сѧ хвалити б҃а гласомь велиемь о вьсѣхъ силахъ ѩже видѣшѧ.

гл҃ѭще !блгослвнъ грѧдꙑ въ імѧ гн҃е. миръ ннб҃се и слава въ вꙑшъниихъ.

ꙇ едини фа!рсѣи отъ народа рѣшѧ къ немоу. оучителю запрѣти оученикомъ твоимъ.

и отъвѣщавъ рече имъ. гл҃ѭ вамъ. ѣко аще и сии оумлъчѧтъ. камение въпити иматъ.

ꙇ ѣко приближи сѧ видѣвъ градъ плака сѧ о немь гл҃ѧ.

ѣко аште би разоумѣлъ въ дьнь съ твои. ꙇ тꙑ ѣже къ мироу твоемоу. нꙑнѣ же оукрꙑ сѧ отъ очиѭ твоею.

ѣко придѫтъ дьнье на тѧ. ꙇ обложѧтъ врази твои острогъ о тебѣ. и обидѫтъ тѧ. ꙇ осѧдѫтъ тѧ въсѫдѫ.

ꙇ разбиѭтъ тѧ и чѧда твоѣ въ тебѣ. ꙇ не оставѧтъ вь тебѣ камене на камени. понеже не разоумѣ врѣмене :: Посѣщению твоемоу ::

Ꙇ въшедъ въ !црквъ. начѧтъ изгонити продаѭштѧѩ вь неи и коупоуѭштѧѩ.

гл҃ѧ имъ. писано естъ. храмъ мои храмъ молитвѣ естъ. вꙑ же сътвористе и врътъпъ разбоиникомъ. :: ::

Ꙇ бѣ оучѧ въ !цркве по вьсѧ дьни. архиереи же и кънижьници. искаахѫ его погоубити. и старѣишинꙑ людемь.

ꙇ не обрѣтаахѫ чъто сътворѧтъ емоу. людье бо вьси дръжаахѫ сѧ его послоушаѭште.