оузьрѣвъ же народꙑ вьзиде на горѫ. ꙇ҅ ѣко сѣде пристѫпишѧ къ н̑емоу оученици его.

ꙇ҅ отвръзъ оуста своѣ оучааше ѩ гл҃ѧ:

Блажени ништиі дх҃омь. ѣко тѣхъ естъ цр҃со нб҃ское:

блажени плачѫштеи. ѣко ти оутѣшѧтъ сѧ:

блажени кротьци. ѣко ти наслѣдѧтъ земл̑ѭ.

блажени алⸯчѫштиꙇ ꙇ҅ жѧждѫштиі правъдꙑ ради. ѣко ти насꙑтѧтъ сѧ:

блажени милостивиі. ѣко ти помиловани бѫдѫтъ:

блажени чистиі сръдцемь. ѣко ти б҃а оузьрѧтъ:

блажени съмирѣѭштиі. ѣко ти сн҃ове бж҃іи нарекѫтъ сѧ:

блажени ꙇзгънани правъдꙑ ради. ѣко тѣхъ естъ цр҃ство нб҃ское:

блажени есте егда поносѧтъ вамъ. ꙇ҅ ижденѫтъ вꙑ. ꙇ҅ рекѫтъ. вьсѣкъ зълъ гл҃ъ на вꙑ. лъжѫште мене ради:

Радоуите сѧ ꙇ веселите сѧ. ѣко мъзда ваша многа естъ на небесехъ: тако бо ꙇ҅згънашѧ пророкꙑ. ꙇже бѣшѧ прѣжде васъ.

вꙑ есте соль земи. аште же соль обоуѣетъ. чимь осолитъ сѧ. ни чьсомоу же бѫдетъ къ томоу. да ꙇ҅сꙑпана бѫдетъ вънъ. ꙇ҅ попираема чк҃ꙑ. !за!ч.

Вꙑ есте свѣтъ мироу. не можетъ градъ оукрꙑти сѧ вр.хоу горꙑ стоѩ.

ни въжагаѭтъ свѣтильника. ꙇ҅ поставл̑ѣѭтъ его подъ спѫдомь. нъ на свѣштьницѣ. ꙇ҅ свѣтитъ вьсѣмъ. ꙇ҅же въ храминѣ сѫтъ.

тако да просвѣтититъ сѧ свѣтъ вашь прѣдъ чк҃ꙑ. да оузьрѧтъ дѣла ваша добраѣ. ꙇ прославѧтъ оц҃а вашего ꙇжь естъ на нб҃хъ.

Не мните ѣко придъ разоритъ закона ли пророкъ. не придъ разоритъ нъ ꙇ҅сплънитъ.

аминⸯ. аминⸯ. гл҃ѭ вамъ. доꙇдеже прѣꙇдетъ нб҃о ꙇ҅ земл̑ѣ. писмѧ едино. ли едина чръта не прѣꙇдеть отъ закона. доꙇдеже всѣ бѫдѫтъ.

ꙇ҅же бо разоритъ единѫ заповѣдь. ꙇ҅ сихъ малъꙇхъ. ꙇ наоучить тако чк҃ꙑ. мьниі наречетъ сѧ въ цр҃си нб҃сцѣмь. а ꙇ҅жь сътворитъ ꙇ҅ наоучитъ. сь велиі наречетъ сѧ въ цр҃си нб҃сцѣмь.

Гл̑ѭ бо вамъ. ѣко аште не ꙇзбѫдетъ правъда ваша. паче кънижьникъ ꙇ҅ фарисеи. не ꙇ҅мате вьнити въ цр҃со нб҃ское.

слꙑшасте ѣко речено бꙑстъ древьниімъ. не оубиеши. ꙇ҅жь бо оубиетъ. повиненъ естъ сѫдоу.

азъ же гл҃ѭ вамъ. ѣко гнѣваѩ ꙇ сѧ на брата своего спꙑти. повиненъ естъ сѫдоу. ꙇ҅жь бо речетъ братоу своемоу. ракⸯка. повиннъ естъ сънъмиштю. а ꙇ҅жь речетъ боуе. повиненъ естъ ђеонѣ огньнѣи.

аште оубо принесеши даръ свои къ олⸯтар̑ю. ꙇ҅ тоу помѣнеши ѣко бръ твои ꙇ҅матъ нѣчто на тѧ.

остави даръ твои тоу прѣдъ олⸯтаремь. ꙇ҅ шедъ прѣжде съмири сѧ съ бротомь твоімь. ꙇ҅ тъгда пришьдъ принеси даръ свои.

Бѫди оувѣштаѩ сѧ съ сѫпьрьмь своꙇмь скоро. доꙇ҅деже еси на пѫти съ н̑имь. да не прѣдастъ тебе сѫпьрь сѫдиі. ꙇ҅ сѫдиі тѧ прѣдастъ слоуѕѣ ꙇ҅ въ темьницѫ въвръжетъ тѧ.

ам҃нь. гл̑ѭ ти не ꙇ҅зидеши отътѫдѣ. доньдеже въздаси послѣдьниі. конъдратъ.

Слꙑшасте ѣко речено бꙑстъ древьн̑имъ. не прѣл̑юбꙑ сътвориши.

азъ же гл̑ѭ вамъ. ѣко вьсѣкъ ꙇ҅же възьритъ на женѫ съ похотиѭ. оуже л̑юбꙑ сътвори съ н̑еѭ. въ сръдьци своемь.

аште же око твое десное съблажн̑ѣетъ тѧ ꙇ҅стъкни е. ꙇ҅ отъвръзи отъ себе. добрѣе бо ти естъ да погꙑбл̑етъ единъ оудъ твоꙇ҅хъ. а не все тѣло твое. въвръжено бѫдетъ въ ђеонѫ.

ꙇ҅ аште деснаѣ твоѣ рѫка съблажнаетъ тѧ. оусѣце ѭ. ꙇ҅ отъвръзи отъ себе. добрѣе бо ти естъ да погꙑбл̑етъ единъ оудъ твоꙇ҅хъ. а не все тѣло твое въвръжено бѫдетъ въ ђеонѫ.

речено же бꙑстъ. ꙇ҅же аште поуститъ женѫ своѭ. дастъ еи кънигꙑ распоустънꙑѩ.

азъ же гл̑ѭ вамъ. ѣко вьсѣкъ поуштаѩи женѫ своѭ. развѣ словесе л̑юбодѣꙇнааго. творитъ ѭ прѣл̑юбꙑ дѣати. ꙇ҅ иже подъпѣгѫ поемл̑етъ. прѣл̑юбꙑ дѣетъ

пакꙑ слꙑшасте ѣко речено бꙑстъ древьн̑иімъ. нъ въ лъже кльнеши сѧ. въздаси же гв҃и клѧтвꙑ своѩ.

азъ же гл̑ѭ вамъ. не клѧти сѧ вамъ. не клѧти сѧ отънѫдь. небомь. ѣко прѣстолъ естъ бж҃іи.

ни земл̑ѭ. ѣко подъножие естъ ногама его. ни ел҃ммь ѣко градъ естъ великааго цр҃ѣ.

ни главоѭ своеѭ кльни. сѧ. ѣко не можеши власа единого бѣла. ли чръна сътворити.

бѫди же слово ваше. еи. еи. ꙇ҅ ни ни. лихое бо сею отъ неприѣзни естъ.

слꙑшасте ѣко речено !бꙑ!с. око за око. ꙇ҅ зѫбъ за зѫбъ.

азъ гл̑ѭ вамъ. не противити сѧ зълоу. нъ аште къто тѧ оударитъ. въ деснѫѭ ланитѫ. обрати сѧ емоу дроугѫѭ.

ꙇ҅ хотѧштюмоу сѫдъ приѩти съ тобоѭ. ꙇ҅ ризѫ твоѭ вьзѧти. отъпоусти емоу ꙇ҅ срачицѫ твоѭ.

ꙇ҅ аште къто поꙇ҅метъ тѧ по силѣ. пръпьриште едино ꙇ҅ди съ н̑имь двѣ. !за!ч.

Просѧштюмоу оу тебе даи ꙇ҅ хотѧштааго отъ тебе заѩти. не отъврати.

слꙑшасте ѣко речено бꙑ!с. вьзлюбиши подроуга своего. ꙇ҅ възненавидиши врагꙑ своѩ.

Азъ же гл̑ѭ вамъ. л̑юбите врагꙑ вашѧ. благословите клънѫштѧѩ вꙑ. добро творите ненавидѧштиімъ васъ. ꙇ҅ молите. за творѧштѧѩ вамъ напасти. ꙇ҅ изгонѧштѧѩ вꙑ.

да бѫдете сн҃ове оц҃а вашего. ꙇ҅жь естъ на небесехъ. ѣко слъньце свое сиѣетъ. на зълꙑ ꙇ҅ благꙑ. ꙇ҅ дъждитъ на праведънꙑѩ. ꙇ҅ неправьдънꙑ.

аште л̑юбите л̑юбѧштѧѩ вꙑ. кѫѭ мъздѫ ꙇ҅мате. не ꙇ҅ мьздоꙇмьци ли тожде творѧтъ.

ꙇ҅ аште цѣлоуете дроугꙑ вашѧ. токмо чьто творите. не ꙇ҅ мьздоꙇ҅мьци ли тожде творѧтъ.

бѫдѣте оубо съвръшени. ѣко ꙇ оц҃ь вашь нб҃скъ съвръшенъ естъ. !ко!н. !за!ч.