Ꙇ събърашѧ сѧ къ н̑емоу фарисѣи. ꙇ҅ етериі отъ кънижьникъ. пришьдъше отъ ел҃ма.

ꙇ҅ видѣшѧ етериі отъ оученикъ его. нечистама рѫкама. сирѣчь не омъвенама. ѣдѫштѧ хлѣбꙑ. зазьрѣахѫ.

фарисѣи бо. ꙇ҅ вси ꙇ҅юдѣи. аште не оумꙑваѭтъ рѫкоу тьрѫште. не ѣдѧтъ. дръжѧште прѣдаание старⸯць.

ꙇ҅ отъ кѫпѣли аште не покѫпл̑ѫтъ сѧ. не ѣдѧтъ. ꙇ҅ ина многа сѫтъ. ѣже приѩшѧ дръжати. крьштениѣ стьклѣницамъ. ꙇ҅ чьваномъ. ꙇ҅ котъломъ. ꙇ҅ одромъ.

Потомь же въпрашаахѫ і. Фарисѣи ꙇ҅ кънижьници. по чьто не ходѧтъ оученици твоі. по прѣдаанию старьць. нъ не оумъвенама рѫкама ѣдѧтъ хлѣбъ.

онъ же отъвѣштавъ рече ꙇ҅мъ. въ правъдѫ добрѣ рече ꙇ҅саіѣ о васъ лицемѣри. ѣкоже естъ псано. сиі л̑юдие оустънами чьтѫтъ мѧ. а сръдьце ꙇ҅хъ далече отъстоꙇтъ отъ мене.

въсоуе же чьтѫтъ мѧ. оучѧште оучениѣ заповѣдиі !ччскъ.

оставъше бо заповѣдь бж҃ьѭ. дръжите прѣдааниѣ чс҃ка. крьштениѣ кръчагомъ. ꙇ҅ стьклѣницамъ. ꙇ҅ ина подобьна таковаѣ творите. многа.

ꙇ҅ гл҃ашѧ ꙇ҅мъ. добрѣ отъмѣтаете сѧ. заповѣди бж҃иѩ. да прѣдаание ваше събл̑юдете.

мѵси бо рече. чьти оц҃а твоего ꙇ҅ мр҃ь твоѭ. ꙇ҅ иже зьлословитъ. оц҃а ли мр҃ь. съмрътиѭ да оумьретъ.

вꙑ же гл҃ете. аште речетъ чк҃ъ. оц҃ю ли мр҃и. корⸯванъ. еже естъ даръ. ꙇ҅ еже аште. отъ мене пользевалъ еси.

ꙇ҅ къ томоу не оставл̑ѣете его. ничьсоже сътворити оц҃ю своемоу. ли мр҃и своеи.

прѣстѫпаѭште слово бж҃ье. прѣдааниемь вашимь. еже прѣдасте. ꙇ҅ подобьна такова многа творите.

ꙇ҅ призъвавъ вьсь народъ. гл҃ааше ꙇ҅мъ послоушаꙇ҅те мене вси. ꙇ҅ разоумѣваꙇте.

ничьтоже нѣстъ. еже вьнѣѭдоу чк҃а. въходѧ въ н̑ь. не можетъ оскврънити. нъ ꙇ҅сходѧштаа сѫтъ скврънѧшта чк҃а.

аште къто ꙇ҅матъ оуши слꙑшати да слꙑшитъ

Ꙇ҅ егда вьниде ис҃. въ домъ отъ народа. въпрашаахѫ і оученици его о притъчи.

ꙇ҅ гл҃а ꙇ҅мъ. тако ли вꙑ неразоумьливи есте. не разоумѣете ли. ѣко всѣко еже ꙇ҅звьноу въходитъ въ чк҃а. не можетъ его оскврънити.

ѣко не въходитъ емоу въ сръдьце. нъ въ чрѣво. ꙇ҅ сквозѣ афредонъ ꙇ҅сходитъ. ꙇ҅стрѣбл̑ѣѩ вьсѣ брашьна.

гл҃ааше же. ѣко ꙇ҅сходѧштее отъ чк҃а. то скврънитъ чк҃а.

ꙇ҅з ѫтрь̆ѫдоу бо. отъ сръдьца !ччска. помꙑшл̑ениѣ зълаѣ ꙇ҅сходѧтъ. прѣл̑юбодѣаньѣ. л̑юбодѣанье. оубиіства.

татьбꙑ. обидꙑ. лѫкавьства. льсть. стоудодѣанье. око лѫкаво. хоул̑ение. гръдꙑни. безоумье.

вьсѣ си зълаѣ. ꙇ҅зѫтриі ꙇ҅сходѧтъ. ꙇ҅ скврънѧтъ чк҃а. ꙇ҅же ꙇ҅матъ оуши слꙑшати да слꙑшитъ.

Ꙇ҅ отътоудоу въставъ ꙇ҅де. въ прѣдѣлꙑ тⸯоур̑ьскꙑ. ꙇ҅ сидоньскꙑ. ꙇ҅ вьшьдъ въ домъ. не хотѣаше да би къто чюлъ. ꙇ҅ не може оутаꙇ҅ти сѧ.

Слꙑшавъши бо жена о н̑емь. еѩже дъшти ꙇ҅мѣаше дх҃ъ нечистъ. пришьдъши припаде къ ногама его.

жена же бѣ поганꙑн̑и. сѵрофѵник̑ис̑санꙑн̑и родомь. ꙇ҅ мол̑ѣаше и. да ꙇ҅жденетъ бѣсъ. ꙇ҅з дъштере еѩ.

ис҃ же рече еи. остани да прьвѣе насꙑтѧтъ сѧ чѧда. нѣстъ бо добро отѧти хлѣба чѧдомъ. ꙇ҅ пьсомъ поврѣшти.

она же отъвѣштавъши рече емоу. еи г҃и. ꙇ҅бо пси подъ трепезоѭ. ѣдѧтъ отъ кроупиць дѣтьскъ.

ꙇ҅ рече еи за слово се. ꙇ҅ди. ꙇ҅зиде бѣсъ ꙇ҅з дъштере твоеѩ.

ꙇ҅ шьдъши домови. обрѣте отроковицѫ лежѧштѫ. на одрѣ. ꙇ҅ бѣсъ ꙇ҅шьдъшь.

ꙇ҅ пакꙑ ꙇ҅шьдъ ис҃. отъ прѣдѣлъ тⸯѵрⸯскъ. ꙇ҅ сидоньскъ. приде въ море галилеꙇ҅ское. междю прѣдѣлꙑ. декапельскꙑ.

ꙇ҅ приведошѧ къ н̑емоу глоухъ гѫгънивъ. ꙇ҅ мол̑ѣахѫ і. да възложитъ на н̑ь рѫкѫ.

ꙇ҅ поꙇмъ і единъ отъ народа. въложи прьстꙑ своѩ въ оуши его. ꙇ҅ плинѫвъ коснѫ и въ ѩзꙑкъ.

ꙇ҅ възьрѣвъ на нб҃о въздъхнѫвъ. ꙇ҅ гл҃а емоу. ефⸯфата. еже естъ развръзи сѧ.

ꙇ҅ абье развръзосте сѧ слоуха его. ꙇ҅ раздрѣши сѧ ѫза ѩзꙑка его. ꙇ҅ гл҃ааше чисто.

ꙇ҅ запрѣти ꙇ҅мъ. да никомоуже не повѣдѧтъ. еликоже ꙇ҅мъ тъ запрѣштааше. они паче ꙇзлиха проповѣдаахѫ.

ꙇ҅ прѣꙇ҅злиха. дивл̑ѣахѫ сѧ гл̑ѭште. добрѣ вьсе творитъ. ꙇ҅ глоухꙑѩ творитъ слꙑшати. ꙇ҅ нѣмꙑѩ гл҃ати.