ЕВАНГЕЛИЕ ЕЖЕ Ѿ МАТѲЕꙖ
17:1
ⰺ ⰱⱏⰹⱄⱅⱏ ⱂⱁ ⱎⰵⱄⱅⰻ ⰴⰵⱀⱏ. Ⱂⱁⱗⱅⱏ ⰻⱄ҃ ⱂⰵⱅⱃⰰ ⰻ ⰻⱑⰽⱁⰲⰰ ⰻ ⰻⱁⰰⱀⰰ ⰱⱃⰰⱅⱃⰰ ⰵⰳⱁ. ⰺ ⰲⱐⰸⰲⰵⰴⰵ ⱗ ⱀⰰ ⰳⱁⱃⱘ ⰲⱏⰹⱄⱁⰽⱘ ⰵⰴⰻⱀⱏⰹ.
ꙇ бꙑстъ по шести денъ. Поѩтъ ис҃ петра и иѣкова и иоана братра его. ꙇ вьзведе ѩ на горѫ вꙑсокѫ единꙑ.
17:2
ⰺ ⱂⱃⱑⱁⰱⱃⰰⰸⰻ ⱄⱔ ⱂⱃⱑⰴⱏ ⱀⰻⰿⰻ. ⰺ ⱂⱃⱁⱄⰲⱐⱅⱑ ⱄⱔ ⰾⰻⱌⰵ ⰵⰳⱁ ⱑⰽⱁ ⱄⰾⱏⱀⱏⱌⰵ. ⰰ ⱃⰻⰸⱏⰹ ⰵⰳⱁ ⰱⱏⰹⱎⱔ ⰱⱑⰾⱏⰹ ⱑⰽⱁ ⱄⰲⱑⱅⱏ.
ꙇ прѣобрази сѧ прѣдъ ними. ꙇ просвьтѣ сѧ лице его ѣко слънъце. а ризꙑ его бꙑшѧ бѣлꙑ ѣко свѣтъ.
17:3
ⰺ ⱄⰵ ⰰⰲⰻⱄⱅⰵ ⱄⱔ ⰻⰿⱏ ⰿⱁⱄⰻ ⰻ ⰻⰾⰻⱑ. ⱄⱏ ⱀⰻⰿⱐ ⰳⰾ҃ⱙⱋⰰ.
ꙇ се ависте сѧ имъ моси и илиѣ. съ нимь гл҃ѭща.
17:4
ⱁⱅⱏⰲⱑⱋⰰⰲⱏ ⰶⰵ ⱂⰵⱅⱃⱏ ⰽⱏ ⰻⱄ҃ⰲⰻ ⱃⰵⱍⰵ. ⰳ҃ⰻ : ⰴⱁⰱⱃⱁ ⰵⱄⱅⱏ ⱀⰰⰿⱏ ⱄⱐⰴⰵ ⰱⱏⰹⱅⰻ. ⰰⱎⱅⰵ ⱈⱁⱋⰵⱎⰻ ⰴⰰ ⱄⱏⱅⰲⱁⱃⰻⰿⱏ ⱄⱏⰴⰵ ⱅⱃⰻ ⰽⱃⱁⰲⱏⰹ. ⱅⰵⰱⱑ ⰵⰴⰻⱀⱏ ⰻ ⰿⱁⱄⰵⱁⰲⰻ ⰵⰴⰻⱀⱏ. ⰻ ⰻⰾⰻⰻ ⰵⰴⰻⱀⱏ.
отъвѣщавъ же петръ къ ис҃ви рече. г҃и : добро естъ намъ сьде бꙑти. аште хощеши да сътворимъ съде три кровꙑ. тебѣ единъ и мосеови единъ. и илии единъ.
17:5
ⰵⱎⱅⰵ ⰶⰵ ⰵⰿⱆ ⰳⰾ҃ⱙⱎⱅⱓ. ⱄⰵ ⱁⰱⰾⰰⰽⱏ ⱄⰲⱑⱅⰵⰾⱏ ⱁⱄⰻⱑ ⱗ. ⰺ ⱄⰵ ⰳⰾⰰⱄⱏ ⰻⰸ ⱁⰱⰾⰰⰽⰰ ⰳⰾ҃ⱔ. ⱄⱐ ⰵⱄⱅⱏ ⱄⱀ҃ⱏ ⰿⱁⰻ ⰲⱐⰸⰾⱓⰱⰾⰵⱀⱏⰹ ⱁ ⱀⰵⰿⱐⰶⰵ ⰱⰾⰰⰳⱁⰻⰸⰲⱁⰾⰻⱈⱏ. ⱅⱁⰳⱁ ⱂⱁⱄⰾⱆⱎⰰⰻⱅⰵ.
еште же емоу гл҃ѭштю. се облакъ свѣтелъ осиѣ ѩ. ꙇ се гласъ из облака гл҃ѧ. сь естъ сн҃ъ мои вьзлюбленꙑ о немьже благоизволихъ. того послоушаите.
17:6
ⰺ ⱄⰾⱏⰹⱎⰰⰲⱏⱎⰵ ⱆⱍⰵⱀⰻⱌⰻ ⱂⰰⰴⱘ ⱀⰻⱌⰻ. ⰻ ⱆⰱⱁⱑⱎⱔ ⱄⱔ ⰷⱑⰾⱁ.
ꙇ слꙑшавъше оученици падѫ ници. и оубоѣшѧ сѧ ѕѣло.
17:7
ⰻ ⱂⱃⰻⱄⱅⱘⱂⱐ ⰻⱄ҃ ⱂⱃⰻⰽⱁⱄⱀⱘ ⱄⱔ ⰻⱈⱏ. ⰺ ⱃⰵⱍⰵ ⰲⱏⱄⱅⰰⱀⱑⱅⰵ ⰻ ⱀⰵ ⰱⱁⰻⱅⰵ ⱄⱔ.
и пристѫпь ис҃ прикоснѫ сѧ ихъ. ꙇ рече въстанѣте и не боите сѧ.
17:8
ⰲⱏⰸⰲⰵⰴⱏⱎⰵ ⰶⰵ ⱁⱍⰻ ⱄⰲⱁⰻ ⱀⰵ ⰲⰻⰴⱑⱎⱔ ⱀⰻⰽⱁⰳⱁⰶⰵ ⱅⱁⰽⱏⰿⱁ ⰻⱄ҃ⰰ ⰵⰴⰻⱀⱁⰳⱁ.
възведъше же очи свои не видѣшѧ никогоже токъмо ис҃а единого.
17:9
ⰻ ⱄⱏⱈⱁⰴⱔⱋⰵⰿⱏ ⰻ҅ⰿⱏ ⱄⱏ ⰳⱁⱃⱏⰹ. ⰸⰰⱂⱁⰲⱑⰴⱑ ⰻⰿⱏ ⰻⱄ҃ⱏ ⰳⰾ҃ⱔ. ⱀⰻⰽⱁⰿⱆⰶⰵ ⱀⰵ ⱂⱁⰲⱑⰴⰻⱅⰵ ⰲⰻⰴⱑⱀⰻⱑ. ⰴⱁⱀⱐⰴⰵⰶⰵ ⱄⱀ҃ⱏ ⱍⰾⰲ҃ⱍⱄⰽⱏⰹ ⰻⰸ ⰿⱃⱏⱅⰲⱏⰹⱈⱏ ⰲⱏⱄⰽⱃⱏⱄⱀⰵⱅⱏ.
и съходѧщемъ и҅мъ съ горꙑ. заповѣдѣ имъ ис҃ъ гл҃ѧ. никомоуже не повѣдите видѣниѣ. доньдеже сн҃ъ члв҃чскꙑ из мрътвꙑхъ въскръснетъ.
17:10
ⰺ҅ ⰲⱏⱂⱃⱁⱄⰻⱎⱔ ⰻ ⱆⱍⰵⱀⰻⱌⰻ ⰵⰳⱁ ⰳⰾ҃ⱙⱋⰵ ⱍⱏⱅⱁ ⱆⰱⱁ ⰳⰾ҃ⱙⱅⱏ ⰽⱏⱀⰻⰶⱏⱀⰻⱌⰻ. ⱑⰽⱁ ⰻⰾⰻⰻ ⱂⱁⰴⱁⰱⰰⰰⱅⱏ ⱂⱃⰻⰴⰻ ⱂⱃⱑⰶⰴⰵ.
ꙇ҅ въпросишѧ и оученици его гл҃ѭще чъто оубо гл҃ѭтъ кънижъници. ѣко илии подобаатъ приди прѣжде.
17:11
ⰺⱄ҃ ⰶⰵ ⱁⱅⱏⰲⱑⱋⰰⰲⱏ ⱃⰵⱍⰵ ⰻⰿⱏ. ⰺⰾⰻⱑ ⱆⰱⱁ ⱂⱃⰻⰴⰵⱅⱏ ⱂⱃⱑⰶⰴⰵ ⰻ ⱆⱄⱅⱃⱁⰻⱅⱏ ⰲⱐⱄⱑ.
ꙇс҃ же отъвѣщавъ рече имъ. ꙇлиѣ оубо придетъ прѣжде и оустроитъ вьсѣ.
17:12
ⰳⰾ҃ⱙ ⰶⰵ ⰲⰰⰿⱏ. ⱑⰽⱁ ⰻⰾⰻⱑ ⱓ҅ⰶⰵ ⱂⱃⰻⰴⰵ ⰻ ⱀⰵ ⱂⱁⰸⱀⰰⱎⱔ ⰵⰳⱁ. ⱀⱏ ⱄⱏⱅⰲⱁⱃⰻⱎⱔ ⱁ ⱀⰵⰿⱐ ⰲⱏⱄⱑ ⰵⰾⰻⰽⱁ ⰲⱏⱄⱈⱁⱅⱑⱎⱔ ⱅⰰⰽⱁ ⰻ ⱄⱀ҃ⱏ ⱍⰾⰲ҃ⱍⱄⰽⱏⰹ ⰻⰿⰰⱅⱏ ⱄⱅⱃⰰⰴⰰⱅⰻ ⱁⱅⱏ ⱀⰻⱈⱏ.
гл҃ѭ же вамъ. ѣко илиѣ ю҅же приде и не познашѧ его. нъ сътворишѧ о немь въсѣ елико въсхотѣшѧ тако и сн҃ъ члв҃чскꙑ иматъ страдати отъ нихъ.
17:13
ⱅⱏⰳⰴⰰ ⱃⰰⰸⱆⰿⱑⱎⱔ ⱆⱍⰵⱀⰻⱌⰻ. ⱑⰽⱁ ⱁ ⰻⱁⰰⱀⱑ ⰽⱃⱏⱄⱅⰻⱅⰵⰾⰻ ⱃⰵⱍⰵ ⰻⰿⱏ.
тъгда разоумѣшѧ оученици. ѣко о иоанѣ кръстители рече имъ.
17:14
ⰺ ⱂⱃⰻⱎⰵⰴⱏⱎⰵⰿⱏ ⰻⰿⱏ ⰽⱏ ⱀⰰⱃⱁⰴⱆ. Ⱂⱃⰻⱄⱅⱘⱂⰻ ⰽⱏ ⱀⰵⰿⱆ !ⱍⰽⱏ. ⰽⰾⰰⱀⱑⱗ ⱄⱔ ⰵⰿⱆ
ꙇ пришедъшемъ имъ къ народоу. Пристѫпи къ немоу !чкъ. кланѣѩ сѧ емоу
17:15
ⰻ ⰳⰾ҃ⱔ. ⰳ҃ⰻ. ⱂⱁⰿⰻⰾⱆⰻ ⱄⱀ҃ⱏ ⰿⱁⰻ. ⱑⰽⱁ ⱀⰰ ⱀⱁⰲⱏⰹ !ⰿⱄⱌⱔ ⰱⱑⱄⱏⱀⱁⰵⱅⱏ ⱄⱔ ⰺ ⰸⱐⰾⱑ ⱄⱅⱃⰰⰶⰴⰵⱅⱏ. ⰿⱏⱀⱁⰶⰻⱌⰵⱙ ⰱⱁ ⱂⰰⰴⰰⰵⱅⱏ ⱀⰰ ⱁⰳⱀⱐ. ⰺ ⰿⱏⱀⱁⰶⰻⱌⰵⱙ ⰲⱏ ⰲⱁⰴⱘ.
и гл҃ѧ. г҃и. помилоуи сн҃ъ мои. ѣко на новꙑ !мсцѧ бѣсъноетъ сѧ ꙇ зьлѣ страждетъ. мъножицеѭ бо падаетъ на огнь. ꙇ мъножицеѭ въ водѫ.
17:16
ⰺ ⱂⱃⰻⰲⱑⱄⱏ ⰹ ⰽⱏ ⱆⱍⰵⱀⰻⰽⱁⰿⱏ ⱅⰲⱁⰻⰿⱏ. ⰺ ⱀⰵ ⰿⱁⰳⱘ ⰵⰳⱁ ⰻⱄⱌⱑⰾⰻⱅⰻ.
ꙇ привѣсъ і къ оученикомъ твоимъ. ꙇ не могѫ его исцѣлити.
17:17
ⱁⱅⱏⰲⱑⱎⱅⰰⰲⱏ ⰶⰵ ⰻⱄ҃ⱏ ⱃⰵⱍⰵ. ⱉ ⱃⱁⰴⰵ ⱀⰵⰲⱑⱃⱏⱀⱏⰹ ⰻ ⱃⰰⰸⰲⱃⰰⱋⰵⱀⱏⰹ. ⰴⱁ ⰽⱁⰾⱑ ⱄⱏ ⰲⰰⰿⰻ ⰱⱘⰴⱘ ⰴⱁ ⰽⱁⰾⱑ ⱅⱃⱏⱂⰾⱙ ⰲⰰⱄⱏ. ⱂⱃⰻⰲⰵⰴⱑⱅⰵ ⰿⰻ ⰻ ⱄⱑⰿⱁ.
отъвѣштавъ же ис҃ъ рече. ѡ роде невѣрънꙑ и развращенꙑ. до колѣ съ вами бѫдѫ до колѣ тръплѭ васъ. приведѣте ми и сѣмо.
17:18
ⰺ ⰸⰰⱂⱃⱑⱅⰻ ⰵⰿⱆ ⰻⱄ҃. ⰻ ⰻⰸⰻⰴⰵ ⰻⰸ ⱀⰵⰳⱁ ⰱⱑⱄⱏ. ⰺ҅ ⰻⱄⱌⱑⰾⱑ ⱁⱅⱃⱁⰽⱏ ⱅⱁⰿⱐ ⱍⰰⱄⱑ.
ꙇ запрѣти емоу ис҃. и изиде из него бѣсъ. ꙇ҅ исцѣлѣ отрокъ томь часѣ.
17:19
Ⱅⱁⰳⰴⰰ ⱂⱃⰻⱄⱅⱘⱂⱐⱎⰵ ⱆⱍⰵⱀⰻⱌⰻ ⰻⱄ҃ⰲⰻ ⰵⰴⰻⱀⱁⰿⱆ ⱃⱑⱎⱔ. ⱂⱁ ⱍⱐⱅⱁ ⰿⱏⰹ ⱀⰵ ⰲⱏⰸⰿⱁⰳⱁⰿⱏ ⰻⰸⰳⱏⱀⰰⱅⰻ ⰵⰳⱁ.
Тогда пристѫпьше оученици ис҃ви единомоу рѣшѧ. по чьто мꙑ не възмогомъ изгънати его.
17:20
ⰺⱄ҃ ⰶⰵ ⱃⰵⱍⰵ ⰻⰿⱏ. ⰸⰰ ⱀⰵⰲⱑⱃⱏⱄⱅⰲⱁ ⰲⰰⱎⰵ. ⰰⰿⰻⱀⱐ ⰱⱁ ⰳⰾ҃ⱙ ⰲⰰⰿⱏ. ⰰⱋⰵ ⰻⰿⰰⱅⰵ ⰲⱑⱃⱘ ⱑⰽⱁ ⰸⱃⱏⱀⱁ ⰳⱁⱃⱓⱎⱏⱀⱁ. ⱃⰵⱍⰵⱅⰵ ⰳⱁⱃⱑ ⱄⰵⰻ ⱂⱃⱑ[ⰻ]ⰴⰻ ⱁⱅⱏ ⱄⱘⰴⱑ ⱅⰰⰿⱁ. ⰺ ⱂⱃⱑⰻⰴⰵⱅⱏ. ⰺ ⱀⰻⱍⱅⱁⰶⰵ ⱀⰵ ⰲⱏⰸⰿⱁⰶⱏⱀⱁ ⰱⱘⰴⰵⱅⱏ ⰲⰰⰿⱏ.
ꙇс҃ же рече имъ. за невѣръство ваше. аминь бо гл҃ѭ вамъ. аще имате вѣрѫ ѣко зръно горюшъно. речете горѣ сеи прѣ[и]ди отъ сѫдѣ тамо. ꙇ прѣидетъ. ꙇ ничтоже не възможъно бѫдетъ вамъ.
17:21
ⱃⱁⰴⱏ ⰶⰵ ⱄⱐ ⱀⰵ ⰻⱄⱈⱁⰴⰻⱅⱏ ⱅⱏⰽⰿⱁ ⰿⱁⰾⰻⱅⰲⱁⱙ ⰻ ⱂⱁⱄⱅⱁⰿⱐ ::
родъ же сь не исходитъ тъкмо молитвоѭ и постомь ::
17:22
Ⰶⰻⰲⱘⱎⱅⰵⰿⱏ ⰶⰵ ⰻⰿⱏ ⰲⱏ ⰳⰰⰾⰻⰾⰵⰻ. ⱃⰵⱍⰵ ⰻⰿⱏ ⰻⱄ҃ⱏ ⱂⱃⱑⰴⰰⱀⱏ ⰻⰿⰰⱅⱏ ⰱⱏⰹⱅⰻ ⱄⱀ҃ⱏ ⱍⰾⰲ҃ⱍⱄⰽⱏⰹ ⰲⱏ ⱃⱘⱌⱑ ⱍⰾⰲ҃ⰽⱁⰿⱏ.
Живѫштемъ же имъ въ галилеи. рече имъ ис҃ъ прѣданъ иматъ бꙑти сн҃ъ члв҃чскꙑ въ рѫцѣ члв҃комъ.
17:23
ⰺ ⱆⰱⰻⱙⱅⱏ ⰹ ⰻ ⱅⱃⰵⱅⰻ ⰴⰵⱀⱐ ⰲⱏⱄⱅⰰⱀⰵⱅⱏ :. ⰽ!ⱌ. Ⰺ ⱄⰽⱃⱏⰱⱐⱀⰻ ⰱⱏⰹⱎⱔ ⰷⱑⰾⱁ ::
ꙇ оубиѭтъ і и трети день въстанетъ :. к!ц. Ꙇ скръбьни бꙑшѧ ѕѣло ::
17:24
Ⱂⱃⰻⱎⰵⰴⱏⱎⰵⰿⱏ ⰶⰵ ⰻⰿⱏ ⰲⱏ ⰽⰰⱇⰵⱃⱏⱀⰰⱆⰿⱏ. ⱂⱃⰻⱄⱅⱘⱂⰻⱎⱔ ⱂⱃⰻⰵⰿⰾⱙⱋⰵⰻ ⰴⰻⰴⱃⰰⰳⰿⰰ. ⰽⱏ ⱂⰵⱅⱃⱁⰲⰻ ⰻ ⱃⱑⱎⱔ. ⱆⱍⰻⱅⰵⰾⱐ ⰲⰰⱎⱏ ⱀⰵ ⰴⰰⰵⱅⱏ ⰾⰻ ⰴⰻⰴⱃⰰⰳⰿⰰ.
Пришедъшемъ же имъ въ каферънаоумъ. пристѫпишѧ приемлѭщеи дидрагма. къ петрови и рѣшѧ. оучитель вашъ не даетъ ли дидрагма.
17:25
ⱃⰵⱍⰵ ⰵⰻ. ⰺ ⰵⰳⰴⰰ ⰲⱐⱀⰻⰴⰵ ⰲⱏ ⰴⱁⰿⱏ. ⰲⰰⱃⰻ ⰻⱄ҃. ⰳⰾ҃ⱔ. ⱍⱅⱁ ⱅⰻ ⱄⱔ ⰿⱐⱀⰻⱅⱏ ⱄⰻⰿⱁⱀⰵ. ⱌⱄ҃ⱃⰻ ⰸⰵⰿⱐⱄⱌⰻⰻ ⱁⱅⱏ ⰽⱏⰹⱈⱏ ⱂⱃⰻⰵⰿⰾⱙⱅⱏ ⰴⰰⱀⰻ. ⰾⰻ ⰽⰻⱀⱄⱐ. ⱁⱅⱏ ⱄⰲⱁⰻⱈⱏ ⰾⰻ ⱄⱀ҃ⰲⱏ. ⰾⰻ ⱁⱅⱏ ⱅⱆⰶⰴⰻⱈⱏ.
рече еи. ꙇ егда вьниде въ домъ. вари ис҃. гл҃ѧ. что ти сѧ мьнитъ симоне. цс҃ри земьсции отъ кꙑхъ приемлѭтъ дани. ли кинсь. отъ своихъ ли сн҃въ. ли отъ тоуждихъ.
17:26
ⰺ ⱃⰵⱍⰵ ⰵⰿⱆ ⱂⰵⱅⱃⱏ. ⱁⱅⱏ ⱅⱆⰶⰴⰻⰻⱈⱏ. ⱃⰵⱍⰵ ⰵⰿⱆ ⰻⱄ҃. ⱆⰱⱁ ⱄⰲⱁⰱⱁⰴⱐⱀⰻ ⱄⱘⱅⱏ ⱄⱀ҃ⰲⰵ.
ꙇ рече емоу петръ. отъ тоуждиихъ. рече емоу ис҃. оубо свободьни сѫтъ сн҃ве.
17:27
ⱀⱏ ⰴⰰ ⱀⰵ ⱄⱏⰱⰾⰰⰸⱀⰻⰿⱏ ⰻⱈⱏ. ⱎⰵⰴⱏ ⰲⱏ ⰿⱁⱃⰵ ⰲⱏⰲⱃⱏⰷⰻ ⱘⰴⰻⱌⱘ. ⰺ ⱙⰶⰵ ⰻⰿⰵⱎⰻ ⱂⱃⱑⰶⰴⰵ ⱃⱏⰹ ⰱⱘ ⰲⱐⰸⱐⰿⰻ ⰻ ⱁⱅⰲⱃⱏⰸⱏ ⱆⱄⱅⰰ ⰻ҅. ⰺ ⱁⰱⱃⱔⱎⱅⰵⱎⰻ ⱄⱅⰰⱅⰻⱃⱏ. ⱅⱏ ⰲⱏⰸⰵⰿⱏ ⰴⰰⰶⰴⱏ ⰻⰿⱏ ⰸⰰ ⰿⱔ ⰻ ⰸⰰ ⱄⱔ.
нъ да не съблазнимъ ихъ. шедъ въ море въвръѕи ѫдицѫ. ꙇ ѭже имеши прѣжде рꙑ бѫ вьзьми и отвръзъ оуста и҅. ꙇ обрѧштеши статиръ. тъ въземъ даждъ имъ за мѧ и за сѧ.