ЕВАНГЕЛИЕ ЕЖЕ Ѿ МАРЪКА
9:1
ⰰⰿⰻⱀⱐ ⰳⰾ҃ⱙ ⰲⰰⰿⱏ. ⱑⰽⱁ ⱄⱘⱅⱏ ⰵⰴⰻⱀⰻ ⱁⱅⱏ ⱄⱏⰴⰵ ⱄⱅⱁⱗⱎⱅⰻⰻⱈⱏ. ⰺⰶⰵ ⱀⰵ ⰻⰿⱘⱅⱏ ⰲⱏⰽⱆⱄⰻⱅⰻ ⱄⱏⰿⱃⱏⱅⰻ. ⰴⱁⱀⰴⰵⰶⰵ ⰲⰻⰴⱔⱅⱏ ⱌⱄ҃ⱃⱅⰲⰻⰵ ⰱⰶ҃ⰻⰵ ⱂⱃⰻⱎⰵⰴⱏⱎⰵ{ⰴⱏⱎⰵ}ⰵ ⰲⱐ ⱄⰻⰾⱑ :: ⰽ!ⱌ. ::
аминь гл҃ѭ вамъ. ѣко сѫтъ едини отъ съде стоѩштиихъ. ꙇже не имѫтъ въкоусити съмръти. дондеже видѧтъ цс҃ртвие бж҃ие пришедъше{дъше}е вь силѣ :: к!ц. ::
9:2
ⰺ ⱂⱁ ⱎⰵⱄⱅⰻ ⰴⰵⱀⱏ ⱂⱁⱗⱅⱏ ⰻⱄ҃ⱏ. ⱂⰵⱅⱃⰰ ⰻ ⰻⱑⰽⱁⰲⰰ ⰻ ⰻⱁⰰⱀⰰ. ⰺ ⰲⱐⰸⰲⰵⰴⰵ ⱗ ⱀⰰ ⰳⱁⱃⱘ ⰲⱏⰹⱄⱁⰽⱘ ⰵⰴⰻⱀⱏⰹ. ⰺ ⱂⱃⱑⱁⰱⱃⰰⰸⰻ ⱄⱔ ⱂⱃⱑⰴⱏ ⱀⰻⰿⰻ.
ꙇ по шести денъ поѩтъ ис҃ъ. петра и иѣкова и иоана. ꙇ вьзведе ѩ на горѫ вꙑсокѫ единꙑ. ꙇ прѣобрази сѧ прѣдъ ними.
9:3
ⰺ ⰱⱏⰹⱎⱔ ⱃⰻⰸⱏⰹ ⰵⰳⱁ ⰾⱐⱎⱅⱔⱎⱅⱔ ⱄⱔ ⰱⱑⰾⱏⰹ ⰷⱑⰾⱁ ⱑⰽⱁ ⱄⱀⱑⰳⱏ. ⱑⱌⱑⱈⱏ ⱀⰵ ⰿⱁⰶⰵ ⰳⱀⰰⱇⰵⰻ ⱀⰰ ⰸⰵⰿⰻ ⱅⰰⰽⱁ ⱆⰱⱑⰾⰻⱅⰻ.
ꙇ бꙑшѧ ризꙑ его льштѧштѧ сѧ бѣлꙑ ѕѣло ѣко снѣгъ. ѣцѣхъ не може гнафеи на земи тако оубѣлити.
9:4
ⰺ ⱑⰲⰻ ⱄⱔ ⰻⰿⱏ ⰻⰾⰻⱑ ⱄⱏ ⰿⱁⱄⰵⰵⰿⱏ. ⰺ ⰱⱑⰰⱎⰵⱅⰵ ⰳⰾ҃ⰰⰳⱁⰾⱙⱎⱅⰰ !ⱄⰿⱏ.
ꙇ ѣви сѧ имъ илиѣ съ мосеемъ. ꙇ бѣашете гл҃аголѭшта !смъ.
9:5
ⰺ ⱁⱅⱏⰲⱑⱎⱅⰰⰲⱏ ⱂⰵⱅⱃⱏ ⰳⰾ҃ⰰ ⰻⱄ҃ⰲⰻ. ⱃⰰⰲⱐ[ⰲⰻ] ⰴⱁⰱⱃⱁ ⰵⱄⱅⱏ ⱀⰰⰿⱏ ⱄⱏⰴⰵ ⰱⱏⰹⱅⰻ. ⰺ ⱄⱏⱅⰲⱁⱃⰻⰿⱏ ⱅⱃⰻ ⱄⰽⰻⱀⰻⱗ. ⱅⰵⰱⱑ ⰵⰴⰻⱀⱘ ⰻ ⰿⱁⱄⰵⱁⰲⰹ ⰵⰴⰻⱀⱘ. ⰺ ⰻⰾⰻⰻ ⰵⰴⰻⱀⱘ.
ꙇ отъвѣштавъ петръ гл҃а ис҃ви. равь[ви] добро естъ намъ съде бꙑти. ꙇ сътворимъ три скиниѩ. тебѣ единѫ и мосеові единѫ. ꙇ илии единѫ.
9:6
ⱀⰵ ⰲⱑⰴⱑⰰⱎⰵ ⰱⱁ ⱍⱅⱁ ⰳⰾ҃ⱅⱏ. ⱂⱃⰻⱄⱅⱃⰰⱎⱏⱀⰻ ⰱⱁ ⰱⱑⰰⱈⱘ.
не вѣдѣаше бо что гл҃тъ. пристрашъни бо бѣахѫ.
9:7
ⰺ ⰱⱏⰹⱄⱅⱏ ⰶⰵ ⱁⰱⰾⰰⰽⱏ ⱁⱄⱑⱀⱑⱗ ⱗ. ⰻ ⱂⱃⰻⰴⰵ ⰳⰾⰰⱄⱏ ⰻⰸ ⱁⰱⰾⰰⰽⰰ. ⱄⱐ ⰵⱄⱅⱏ ⱄⱀ҃ⱏ ⰿⱁⰻ ⰲⱐⰸⰾⱓⰱⰾⰵⱀⱏⰹ ⱂⱁⱄⰾⱆⱎⰰⰻⱅⰵ ⰵⰳⱁ.
ꙇ бꙑстъ же облакъ осѣнѣѩ ѩ. и приде гласъ из облака. сь естъ сн҃ъ мои вьзлюбленꙑ послоушаите его.
9:8
ⰺ ⰲⱏⱀⰵⰸⰰⰰⱂⱘ ⰲⱐⰸⱐⱃⱑⰲⱏⱎⰵ ⱀⰻⰽⱁⰳⱁⰶⰵ ⱀⰵ ⰲⰻⰴⱑⱎⱔ. ⱅⱏⰽⱏⰿⱁ ⱀⱏ ⰻⱄ҃ⰰ ⰵⰴⰻⱀⱁⰳⱁ ⱄⱏ ⱄⱁⰱⱁⱙ.
ꙇ вънезаапѫ вьзьрѣвъше никогоже не видѣшѧ. тъкъмо нъ ис҃а единого съ собоѭ.
9:9
ⱄⱏⱈⱁⰴⱔⱎⱅⰵⰿⱏ ⰶⰵ ⰻⰿⱏ ⱄⱏ ⰳⱁⱃⱏⰹ. ⰸⰰⱂⱃⱑⱅⰻ ⰻⰿⱏ ⰴⰰ ⱀⰻⰽⱁⰿⱆⰶⰵ ⱀⰵ ⱂⱁⰲⱑⰴⱔⱅⱏ ⱑⰶⰵ ⰲⰻⰴⱑⱎⱔ. ⱅⱏⰽⰿⱁ ⰵⰳⰴⰰ ⱄⱀ҃ⱏ ⱍⰾⰲ҃ⱍⱄⰽⱏⰹⰻ ⰲⱏⱄⰽⱃⱏⱄⱀⰵⱅⱏ ⰻⰸ ⰿⱃⱏⱅⰲⱏⰹⱈⱏ.
съходѧштемъ же имъ съ горꙑ. запрѣти имъ да никомоуже не повѣдѧтъ ѣже видѣшѧ. тъкмо егда сн҃ъ члв҃чскꙑи въскръснетъ из мрътвꙑхъ.
9:10
ⰺ ⱆⰴⱃⱏⰶⰰⱎⱔ ⱄⰾⱁⰲⱁ ⰲⱐ ⱄⰵⰱⱑ. ⱄⱏⱅⱔⰸⰰⱙⱎⱅⰵ ⱄⱔ ⱍⱅⱁ ⰵⱄⱅⱏ ⰵⰶⰵ ⰻⰸ ⰿⱃⱏⱅⰲⱏⰹⱈⱏ ⰲⱏⱄⰽⱃⱏⱄⱀⱘⱅⰻ.
ꙇ оудръжашѧ слово вь себѣ. сътѧзаѭште сѧ что естъ еже из мрътвꙑхъ въскръснѫти.
9:11
ⰻ ⰲⱏⱂⱃⰰⱎⰰⰰⱈⱘ ⰻ ⰳⰾ҃ⱙⱎⱅⰵ ⱑⰽⱁⰶⰵ ⰳⰾ҃ⱙⱅⱏ ⰽⱏⱀⰻⰶⱐⱀⰻⱌⰻ. ⱑⰽⱁ ⰻⰾⰻⰻ ⱂⱁⰴⱁⰱⰰⰰⱅⱏ ⱂⱃⱑⰶⰴⰵ ⱂⱃⰻⱅⰻ.
и въпрашаахѫ и гл҃ѭште ѣкоже гл҃ѭтъ кънижьници. ѣко илии подобаатъ прѣжде прити.
9:12
ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰻⰿⱏ. ⰺⰾⰻⱑ ⱆⰱⱁ ⱂⱃⰻⱎⰵⰴⱏ ⱂⱃⱑⰶⰴⰵ ⱆⱄⱅⱃⱁⰻⱅⱏ ⰲⱐⱄⱑ. ⰺ ⰽⰰⰽⱁ ⰵⱄⱅⱏ ⱂⰻⱄⰰⱀⱁ ⱁ ⱄⱀ҃ⱑ ⱍⰾⱁⰲⱑⱍⱐⱄⱌⱑⰵⰿⱐ. ⰴⰰ ⰿⱏⱀⱁⰳⱁ ⱂⱁⱄⱅⱃⰰⰶⰴⰵⱅⱏ ⰻ ⱆⱀⰻⱍⱐⰶⱔⱅⱏ ⰹ.
онъ же отъвѣштавъ рече имъ. ꙇлиѣ оубо пришедъ прѣжде оустроитъ вьсѣ. ꙇ како естъ писано о сн҃ѣ чловѣчьсцѣемь. да мъного постраждетъ и оуничьжѧтъ і.
9:13
ⱀⱏ ⰳⰾ҃ⱙ ⰲⰰⰿⱏ ⱑⰽⱁ ⰻⰾⰻⱑ ⱂⱃⰻⰴⰵ. ⰻ ⱄⱏⱅⰲⱁⱃⰻⱎⱔ ⰵⰿⱆ ⰵⰾⰻⰽⱁ ⱈⱁⱅⱑⱎⱔ. ⱑⰽⱁⰶⰵ ⰵⱄⱅⱏ ⱂⰻⱄⰰⱀⱁ ⱁ ⱀⰵⰿⱐ.
нъ гл҃ѭ вамъ ѣко илиѣ приде. и сътворишѧ емоу елико хотѣшѧ. ѣкоже естъ писано о немь.
9:14
ⰺ ⱂⱃⰻⱎⰵⰴⱏ ⰽⱏ ⱆⱍⰵⱀⰻⰽⱁⰿⱏ. ⰲⰻⰴⱑ ⱀⰰⱃⱁⰴⱏ ⰿⱏⱀⱁⰳⱏ ⱁ ⱀⰻⱈⱏ. ⰺ ⰽⱏⱀⰻⰶⱐⱀⰻⰽⱏⰹ ⱄⱏⱅⱔⰸⰰⱙⱎⱅⱔ ⱄⱔ ⱄⱏ ⱀⰻⰿⰻ.
ꙇ пришедъ къ оученикомъ. видѣ народъ мъногъ о нихъ. ꙇ кънижьникꙑ сътѧзаѭштѧ сѧ съ ними.
9:15
ⰺ ⰰⰱⱐⰵ ⰲⱐⱄⱐ ⱀⰰⱃⱁⰴⱏ ⰲⰻⰴⱑⰲⱏⱎⰵ ⰻ ⱆⰶⰰⱄⱘ ⱄⱔ. ⰻ ⱂⱃⰻⱃⰻⱎⱅⱘⱎⱅⰵ ⱌⱑⰾⱁⰲⰰⰰⱈⱘ ⰻ.
ꙇ абье вьсь народъ видѣвъше и оужасѫ сѧ. и пририштѫште цѣловаахѫ и.
9:16
ⰺ ⰲⱏⱂⱃⱁⱄⰻ ⰽⱏⱀⰻⰶⱏⱀⰻⰽⱏⰹ. ⱍⱏⱅⱁ ⱄⱏⱅⱔⰷⰰⰰⱅⰵ ⱄⱔ ⰲⱐ ⱄⰵⰱⱑ.
ꙇ въпроси кънижъникꙑ. чъто сътѧѕаате сѧ вь себѣ.
9:17
ⰺ ⱁⱅⱏⰲⱑⱎⱅⰰⰲⱏ ⰵⰴⰻⱀⱏ ⱁⱅⱏ ⱀⰰⱃⱁⰴⰰ ⱃⰵⱍⰵ. ⱆⱍⰻⱅⰵⰾⱓ ⱂⱃⰻⰲⱑⱄⱏ ⱄⱀ҃ⱏ ⰿⱁⰻ ⰽⱏ ⱅⰵⰱⱑ. ⰺⰿⱘⱎⱅⱏ ⰴⱈ҃ⱏ ⱀⱑⰿⱏ.
ꙇ отъвѣштавъ единъ отъ народа рече. оучителю привѣсъ сн҃ъ мои къ тебѣ. ꙇмѫштъ дх҃ъ нѣмъ.
9:18
ⰺ ⰻⰶⰵ ⰰⱎⱅⰵ ⰽⱁⰾⰻⰶⱏⰴⱁ ⰻⰿⰵⱅⱏ ⰹ. ⱃⰰⰸⰱⰻⰲⰰⰰⱅⱏ ⰹ ⰻ ⱂⱑⱀⱏⰹ ⱅⱑⱎⱅⰻⱅⱏ. ⰺ ⱄⰽⱃⱐⰶⱐⱎⱅⰵⱅⱏ ⰸⱘⰱⱏⰹ ⱄⰲⱁⰻⰿⰻ. ⰻ ⱁⱌⱑⱂⱑⱀⱑⰰⱅⱏ. ⰺ ⱃⱑⱈⱏ ⱆⱍⰵⱀⰻⰽⱁⰿⱏ ⱅⰲⱁⰻⰿⱏ. ⰴⰰ ⰻⰶⰴⰵⱀⱘⱅⱏ ⰹ ⰻ ⱀⰵ ⰲⱏⰸⰿⱁⰳⱘ.
ꙇ иже аште колижъдо иметъ і. разбиваатъ і и пѣнꙑ тѣштитъ. ꙇ скрьжьштетъ зѫбꙑ своими. и оцѣпѣнѣатъ. ꙇ рѣхъ оученикомъ твоимъ. да ижденѫтъ і и не възмогѫ.
9:19
ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⰵⰿⱆ ⰳⰾ҃ⰰ :: ⱉ҅ ⱃⱁⰴⰵ ⱀⰵⰲⱑⱃⱏⱀⱐ ⰴⱁⰽⱁⰾⱑ ⰲⱏ ⰲⰰⱄⱏ ⰱⱘⰴⱘ. ⰴⱁⰽⱁⰾⱑ ⱅⱃⱏⱂⰾⱙ ⰲⱏⰹ. ⱂⱃⰻⱀⰵⱄⱑⱅⰵ ⰻ ⰽⱏ ⰿⱏⱀⱑ
онъ же отъвѣштавъ емоу гл҃а :: ѡ҅ роде невѣрънь доколѣ въ васъ бѫдѫ. доколѣ тръплѭ вꙑ. принесѣте и къ мънѣ
9:20
ⰻ ⱂⱃⰻⱀⱑⱄⱔ ⰻ ⰽⱏ ⱀⰵⰿⱆ. ⰺ ⰲⰻⰴⱑⰲⱏ ⰹ ⰴⱈ҃ⱏ ⰰⰱⰻⰵ ⱄⱏⱅⱃⱔⱄⰵ ⰻ. ⰺ ⱂⰰⰴⱏ ⱀⰰ ⰸⰵⰿⰻ ⰲⰰⰾⱑⰰⱎⰵ ⱄⱔ ⱂⱑⱀⱏⰹ ⱅⱑⱎⱅⱔ.
и принѣсѧ и къ немоу. ꙇ видѣвъ і дх҃ъ абие сътрѧсе и. ꙇ падъ на земи валѣаше сѧ пѣнꙑ тѣштѧ.
9:21
ⰺ҅ ⰲⱏⱂⱃⱁⱄⰻ ⰻⱄ҃ⱏ ⱁⱅ҃ⱌⰰ ⰵⰳⱁ. ⰽⱁⰾⰻⰽⱁ ⰾⱑⱅⱏ ⰵⱄⱅⱏ ⱁⰴⱏⱀⰵⰾⰻⰶⰵ ⱄⰵ ⰱⱏⰹⱄⱅⱏ ⰵⰿⱆ. ⱁⱀⱏ ⰶⰵ ⱃⰵⱍⰵ ⰻⰸ ⱁⱅⱃⱁⱍⰻⱀⱏⰹ.
ꙇ҅ въпроси ис҃ъ от҃ца его. колико лѣтъ естъ одънелиже се бꙑстъ емоу. онъ же рече из отрочинꙑ.
9:22
ⰻ ⰿⱏⱀⱁⰶⰻⱌⰵⱙ ⰺ ⰲⱏ ⱁⰳⱀⱐ ⰲⱏⰲⱃⱏⰶⰵ. ⰺ ⰲⱏ ⰲⱁⰴⱘ ⰴⰰ ⰻ ⰱⰻ ⱂⱁⰳⱆⰱⰻⰾⱏ. ⱀⱏ ⰰⱎⱅⰵ ⱍⱅⱁ ⰿⱁⰶⰵⱎⰻ ⱂⱁⰿⱁⰸⰻ ⱀ[ⰰ]ⰿⱏ. ⰿⰻⰾⱁⱄⱃⰴⱁⰲⰰⰲⱏ ⱁ ⱀⰰⱄⱏ.
и мъножицеѭ ꙇ въ огнь въвръже. ꙇ въ водѫ да и би погоубилъ. нъ аште что можеши помози н[а]мъ. милосрдовавъ о насъ.
9:23
ⰺⱄ҃ ⰶⰵ ⱃⰵⱍⰵ ⰵⰿⱆ. ⰵⰶⰵ ⰰⱎⱅⰵ ⰿⱁⰶⰵⱎⰻ ⰲⱑⱃⱁⰲⰰⱅⰻ. ⰲⱐⱄⱑ ⰲⱏⰸⰿⱁⰶⱏⱀⰰ ⰲⱑⱃⱆⱙⱎⱅⱓⰿⱆ.
ꙇс҃ же рече емоу. еже аште можеши вѣровати. вьсѣ възможъна вѣроуѭштюмоу.
9:24
ⰺ ⰰⰱⰻⰵ ⰲⱏⰸⱏⱂⰻⰲⱏ ⱁⱅⰵⱌⱏ ⱁⱅⱃⱁⱍⱔⱅⰵ ⱄⱏ ⱄⰾⱏⰸⰰⰿⰻ ⰳⰾ҃ⰰⰰⱎⰵ. ⰲⱑⱃⱆⱙ ⰳ҃ⰻ ⱂⱁⰿⱁⰸⰻ ⰿⱁⰵⰿⱆ ⱀⰵⰲⱑⱃⱐⱄⱅⰲ ⱓ҅.
ꙇ абие възъпивъ отецъ отрочѧте съ слъзами гл҃ааше. вѣроуѭ г҃и помози моемоу невѣрьств ю҅.
9:25
ⰲⰻⰴⱑⰲⱏ ⰶⰵ ⰻⱄ҃ⱏ ⱑⰽⱁ ⱄⱏⱃⰻⱎⱅⰵⱅⱏ ⱄⱔ ⱀⰰⱃⱁⰴⱏ. ⰸⰰⱂⱃⱑⱅⰻ ⰴⱈ҃ⱆ ⱀⰵⱍⰻⱄⱅⱆ{ⱆ}ⰿⱆ ⰳⰾ҃ⱔ ⰵⰿⱆ. ⱀⱑⰿⱏⰹ ⰺ ⰳⰾⱆⱈⱏⰹ ⰴⱎ҃ⰵ. ⰰⰸⱏ ⱅⰻ ⰲⰵⰾⱙ ⰻⰸⰻⱅⰻ ⰻⰸ ⱀⰵⰳⱁ. ⰺ ⰽ ⱅⱁⰿⱆ ⱀⰵ ⰲⱐⱀⰻⰴⰻ ⰲⱐ ⱀⱐ.
видѣвъ же ис҃ъ ѣко съриштетъ сѧ народъ. запрѣти дх҃оу нечистоу{оу}моу гл҃ѧ емоу. нѣмꙑ ꙇ глоухꙑ дш҃е. азъ ти велѭ изити из него. ꙇ к томоу не вьниди вь нь.
9:26
ⰺ ⰲⱏⰸⱏⱂⰻⰲⱏ ⰻ ⰿⱏⱀⱁⰳⱁ ⱂⱃⱘⰶⰰⰲⱏ ⱄⱔ ⰻⰸⰻⰴⰵ. ⰺ ⰱⱏⰹⱄⱅⱏ ⱑⰽⱁ ⰿⱃⱏⱅⰲⱏ. ⱑⰽⱁ ⰿⱏⱀⱁⰸⰻ ⰳⰾ҃ⰰⰰⱈⱘ ⱑⰽⱁ ⱆⰿⱐⱃⱑⱅⱏ.
ꙇ възъпивъ и мъного прѫжавъ сѧ изиде. ꙇ бꙑстъ ѣко мрътвъ. ѣко мънози гл҃аахѫ ѣко оумьрѣтъ.
9:27
ⰺⱄ҃ ⰶⰵ ⰵ҅ⰿⱏ ⰹ ⰸⰰ ⱃⱘⰽⱘ ⰲⱏⰸⰴⰲⰻⰶⰵ ⰺ ⰲⱏⱄⱅⰰ.
ꙇс҃ же е҅мъ і за рѫкѫ въздвиже ꙇ въста.
9:28
ⰺ ⰲⱏⱎⰵⰴⱏⱎⱓ ⰵⰿⱆ ⰲⱏ ⰴⱁⰿⱏ. ⱆⱍⰵⱀⰻⱌⰻ ⰵⰳⱁ ⰲⱏⱂⱃⰰⱎⰰⱈⱘ ⰻ ⰵⰴⰻⱀⱁⰳⱁ. ⱑⰽⱁ ⰿⱏⰹ ⱀⰵ ⰲⱏⰸⰿⱁⰳⱁⰿⱏ ⰻⰸⰳⱏⱀⰰⱅⰻ ⰵⰳⱁ.
ꙇ въшедъшю емоу въ домъ. оученици его въпрашахѫ и единого. ѣко мꙑ не възмогомъ изгънати его.
9:29
ⰺ ⱃⰵⱍⰵ ⰻⰿⱏ. ⱅⱏ ⱃⱁⰴⱏ ⱀⰻⱍⰻⰿⱏⰶⰵ ⱀⰵ ⰿⱁⰶⰵⱅⱏ ⰻⰸⰻⱅⰻ ⱅⰽⰿⱁ ⰿⱁⰾⰻⱅⰲⱁⱙ ⰻ ⱂⱁⱄⱅⱁⰿⱏ. ::
ꙇ рече имъ. тъ родъ ничимъже не можетъ изити ткмо молитвоѭ и постомъ. ::
9:30
ⰺ҅ ⱁⱅⱏ ⱅⱘⰴⱘ ⰻⱎⰵⰴⱏⱎⰵ ⰻⰴⱑⰰⱈⱘ ⱄⰽⱁⰸⱑ ⰳⰰⰾⰻⰾⰵⱙ. ⰺ ⱀⰵ ⱈⱁⱅⱑⰰⱎⰵ ⰴⰰ ⰽⱏⱅⱁ ⱆⰲⱑⱄⱅⱏ.
ꙇ҅ отъ тѫдѫ ишедъше идѣахѫ скозѣ галилеѭ. ꙇ не хотѣаше да къто оувѣстъ.
9:31
ⱆⱍⰰⰰⱎⰵ ⰱⱁ ⱆⱍⰵⱀⰻⰽⱏⰹ ⱄⰲⱁⱗ ⰻ ⰳⰾ҃ⰰⱎⰵ ⰻⰿⱏ. ⱑⰽⱁ ⱄⱀ҃ⱏ ⱍⰾⰲ҃ⱄⰽⱏⰹ ⱂⱃⱑⰴⰰⱀⱏ ⰱⱘⰴⰵⱅⱏ ⰲⱏ ⱃⱘⱌⱑ ⱍⰾⰲ҃ⱍⱄⱌⱑ. ⰺ ⱆⰱⱐⱙⱅⱏ ⰹ ⰻ ⱆⰱⱐⰵⱀⱏ ⰱⱏⰹⰲⱏ. ⰲⱏ ⱅⱃⰵⱅⰻⰻ ⰴⰵⱀⱐ ⰲⱏⱄⰽⱃⱏⱄⱀⰵⱅⱏ :: ⰽ!ⱌ. ::
оучааше бо оученикꙑ своѩ и гл҃аше имъ. ѣко сн҃ъ члв҃скꙑ прѣданъ бѫдетъ въ рѫцѣ члв҃чсцѣ. ꙇ оубьѭтъ і и оубьенъ бꙑвъ. въ третии день въскръснетъ :: к!ц. ::
9:32
ⱁⱀⰻ ⰶⰵ ⱀⰵ ⱃⰰⰸⱆⰿⱑⱎⱔ ⰳⰾ҃ⰰ. ⰺ ⰱⱁⱑⰰⱈⱘ ⱄⱔ ⰲⱏⱂⱃⱁⱄⰻⱅⰻ ⰻ ::
они же не разоумѣшѧ гл҃а. ꙇ боѣахѫ сѧ въпросити и ::
9:33
ⰺ ⱂⱃⰻⰴⰵ ⰲⱏ ⰽⰰⱂⰵⱃⱏⱀⰰⱆⰿⱏ ⰺ ⰲⱏ ⰴⱁⰿⱆ ⰱⱏⰹⰲⱏ ⰲⱏⱂⱃⰰⱎⰰⰰⱎⰵ ⱗ. ⱍⱅⱁ ⱀⰰ ⱂⱘⱅⰻ ⰲⱐ ⱄⰵⰱⱑ ⱂⱁⰿⱏⰹⱎⰾⱑⰰⱎⰵⱅⰵ.
ꙇ приде въ каперънаоумъ ꙇ въ домоу бꙑвъ въпрашааше ѩ. что на пѫти вь себѣ помꙑшлѣашете.
9:34
ⱁⱀⰻ ⰶⰵ ⰿⰾⱏⱍⰰⰰⱈⱘ :: Ⰴⱃⱆⰳⱏ ⰽⱏ ⰴⱃⱆⰳⱆ ⰱⱁ ⱄⱏⱅⱔⰷⰰⱎⱔ ⱀⰰ ⱂⱘⱅⰻ. ⰽⱅⱁ ⰵⱄⱅⱏ ⰱⱁⰾⰵⰻ.
они же млъчаахѫ :: Дроугъ къ дроугоу бо сътѧѕашѧ на пѫти. кто естъ болеи.
9:35
ⰺ ⱄⱑⰴⱏ ⰳⰾⰰⱄⰻ ⱁⰱⰰ ⱀⰰ ⰴⰵⱄⱔⱅⰵ. ⰺ ⰳⰾ҃ⰰ ⰻⰿⱏ ⰰⱎⱅⰵ ⰽⱅⱁ ⱈⱁⱋⰵⱅⱏ ⱄⱅⰰⱃⱑⰻ ⰱⱏⰹⱅⰻ ⰴⰰ ⰱⱘⰴⰵⱅⱏ ⰲⱐⱄⱑⱈⱏ ⰿⱐⱀⰵⰻ. ⰺ ⰲⱐⱄⱑⰿⱏ ⱄⰾⱆⰳⰰ.
ꙇ сѣдъ гласи оба на десѧте. ꙇ гл҃а имъ аште кто хощетъ старѣи бꙑти да бѫдетъ вьсѣхъ мьнеи. ꙇ вьсѣмъ слоуга.
9:36
ⰺ ⱂⱃⰻⰵⰿⱏ ⱁⱅⱃⱁⱍⱔ ⱂⱁⱄⱅⰰⰲⰻ ⰵ ⱂⱁ ⱄⱃⱑ[ⰴⱑ] ⰻⱈⱏ ⰻ ⱁⰱⰵⰿⱏ ⰵ ⱃⰵⱍⰵ ⰻⰿⱏ.
ꙇ приемъ отрочѧ постави е по срѣ[дѣ] ихъ и обемъ е рече имъ.
9:37
ⰺⰶⰵ ⰰⱎⱅⰵ ⰵⰴⰻⱀⱁ ⱅⰰⰽⱁⰲⱏⰹⱈⱏ ⱁⱅⱃⱁⱍⱔⱅⱏ. ⱂⱃⰻⰻⰿⰵⱅⱏ ⰲⱏ ⰹⰿⱔ ⰿⱁⰵ. ⰿⱔ ⱂⱃⰻⰵⰿⰾⰵⱅⱏ. ⰺ ⰻⰶⰵ ⰰⱋⰵ ⰿⰵⱀⰵ ⱂⱃⰻⰵⰿⰾⰵⱅⱏ. ⱀⰵ ⰿⰵⱀⰵ ⱂⱃⰻⰵⰿⰾⰵⱅⱏ ⱀⱏ ⱂⱁⱄⱏⰾⰰⰲⱏⱎⰰⰰⰳⱁ ⰿⱔ :: ::
ꙇже аште едино таковꙑхъ отрочѧтъ. прииметъ въ імѧ мое. мѧ приемлетъ. ꙇ иже аще мене приемлетъ. не мене приемлетъ нъ посълавъшааго мѧ :: ::
9:38
ⱁ҅ⱅⱏⰲⱑⱎⱅⰰ ⰵⰿⱆ ⰻⱁⰰⱀⱏ ⰳⰾ҃ⱔ ⱆⱍⰻⱅⰵⰾⱓ ⰲⰻⰴⱑⱈⱁⰿⱏ ⰵⰴⰻⱀⱁⰳⱁ ⰻⰿⰵⱀⰵⰿⱏ ⱅⰲⱁⰻⰿⱐ ⰻⰸⰳⱁⱀⱔⱎⱅⰰ ⰱⱑⱄⱏⰹ. ⰺⰶⰵ ⱀⰵ ⱈⱁⰴⰻⱅⱏ ⱂⱁ ⱀⰰⱄⱏ. ⰺ ⰲⱏⰸⰱⱃⰰⱀⰻⱈⱁⰿⱏ ⰵⰿⱆ. ⱑⰽⱁ ⱀⰵ ⱂⱁⱄⰾⱑⰴⱁⰲⰰ ⱀⰰⰿⱏ.
о҅тъвѣшта емоу иоанъ гл҃ѧ оучителю видѣхомъ единого именемъ твоимь изгонѧшта бѣсꙑ. ꙇже не ходитъ по насъ. ꙇ възбранихомъ емоу. ѣко не послѣдова намъ.
9:39
ⰺⱄ҃ ⰶⰵ ⱃⰵⱍⰵ ⱀⰵ ⰱⱃⰰⱀⰻⱅⰵ ⰿⱆ. ⱀⰻⰽⱅⱁⰶⰵ ⰱⱁ ⰵⱄⱅⱏ ⰻⰶⰵ ⱄⱏⱅⰲⱁⱃⰻⱅⱏ ⱄⰻⰾⱘ ⱁ ⰻⰿⰵⱀⰻ ⰿⱁⰵⰿⱐ. ⰺ ⰲⱏⰸⰿⱁⰶⰵⱅⱏ ⰲⱏⱄⰽⱁⱃⱑ ⰸⱏⰾⱁⱄⰾⱁⰲⰻⱅⰻ ⰿⱔ.
ꙇс҃ же рече не браните моу. никтоже бо естъ иже сътворитъ силѫ о имени моемь. ꙇ възможетъ въскорѣ зълословити мѧ.
9:40
ⰺⰶⰵ ⰱⱁ ⱀⱑⱄⱅⱏ ⱀⰰ ⰲⱏⰹ ⱂⱁ ⰲⰰⱄⱏ ⰵⱄⱅⱏ.
ꙇже бо нѣстъ на вꙑ по васъ естъ.
9:41
ⰺ҅ⰶⰵ ⰱⱁ ⰰⱎⱅⰵ ⱀⰰⱂⱁⰻⱅⱏ ⰲⱏⰹ ⱍⰰⱎⱘ ⰲⱁⰴⱏⰹ. ⰲⱏ ⰹⰿⱔ ⱑⰽⱁ ⱈⱃⱏⱄⱅⱁⰲⰻ ⰵⱄⱅⰵ. ⰰⰿⰻⱀⱐ ⰳⰾ҃ⱙ ⰲⰰⰿⱏ. ⱀⰵ ⱂⱁⰳⱆⰱⰻⱅⱏ ⰿⱏⰸⰴⱏⰹ ⱄⰲⱁ ⱗ҅.
ꙇ҅же бо аште напоитъ вꙑ чашѫ водꙑ. въ імѧ ѣко хръстови есте. аминь гл҃ѭ вамъ. не погоубитъ мъздꙑ сво ѩ҅.
9:42
ⰺ ⰻⰶⰵ ⰰⱋⰵ ⱄⱏⰱⰾⰰⰸⱀⰻⱅⱏ ⰵⰴⰻⱀⱁⰳⱁ ⱁⱅⱏ ⰿⰰⰾⱏⰹⱈⱏ ⱄⰻⱈⱏ ⰲⱑⱃⱆⱙⱎⱅⰻⰻⰻⱈⱏ ⰲⱐ ⰿⱔ. ⰴⱁⰱⱃⱑⰵ ⰵⰿⱆ ⰵⱄⱅⱏ ⱂⰰⱍⰵ. ⰰⱋⰵ ⱁⰱⰾⱁⰶⱔⱅⱏ ⰽⰰⰿⰵⱀⱐ ⰶⱃⱏⱀⱁⰲⱏⱀⱏⰹ ⱁ ⰲⱏⰹⰻ ⰵⰳⱁ. ⰺ ⰲⱏⰲⱃⱏⰳⱘⱅⱏ ⰹ ⰲⱏ ⰿⱁⱃⰵ.
ꙇ иже аще съблазнитъ единого отъ малꙑхъ сихъ вѣроуѭштииихъ вь мѧ. добрѣе емоу естъ паче. аще обложѧтъ камень жръновънꙑ о вꙑи его. ꙇ въвръгѫтъ і въ море.
9:43
ⰺ҅ ⰰⱎⱅⰵ ⱄⱏⰱⰾⰰⰶⱀⰰⰰⱅⱏ ⱅⰵ ⱃⱘⰽⰰ ⱅⰲⱁⱑ. ⱁⱅⱏⱄⱑⱌⰻ ⱙ. ⰴⱁⰱⱃⱑⰰ ⱅⰻ ⰵⱄⱅⱏ ⰿⰰⰾⱁⰿⱁⱎⱅⰻⱙ ⰲⱏ ⰶⰻⰲⱁⱅⱏ ⰲⱏⱀⰻⱅⰻ. ⱀⰵⰶⰵ ⱁⰱⱑ ⱃⱘⱌⱑ ⰻⰿⱘⱎⱅⱓ ⰻⱅⰻ ⰼⰵⱁⱀⱘ. ⰲⱏ ⱁⰳⱀⱐ ⱀⰵ ⰳⰰⱎⱘⱋⰻⰻ.
ꙇ҅ аште съблажнаатъ те рѫка твоѣ. отъсѣци ѭ. добрѣа ти естъ маломоштиѭ въ животъ вънити. неже обѣ рѫцѣ имѫштю ити ђеонѫ. въ огнь не гашѫщии.
9:44
ⰺⰴⰵⰶⰵ ⱍⱃⱏⰲⱐ ⰻⱈⱏ ⱀⰵ ⱆⰿⰻⱃⰰⰰⱅⱏ. ⰺ ⱁⰳⱀⱐ ⱀⰵ ⱆⰳⰰⱄⰰⰰⱅⱏ.
ꙇдеже чръвь ихъ не оумираатъ. ꙇ огнь не оугасаатъ.
9:45
ⰺ ⰰⱎⱅⰵ ⱀⱁⰳⰰ ⱅⰲⱁⱑ ⱄⱏⰱⰾⰰⰶⱀⰰⰰⱅⱏ ⱅⱔ ⱁⱅⱏⱄⱑⱌⰻ ⱙ. ⰴⱁⰱⱃⱑⰰ ⱅⰻ ⰵⱄⱅⱏ ⰲⱏⱀⰻⱅⰻ ⰲⱏ ⰶⰻⰲⱁⱅⱏ ⱈⱃⱁⰿⱆ. ⱀⰵⰶⰵ ⰴⱏⰲⱑ ⱀⱁⰷⱑ ⰻⰿⱘⱋⰵ ⰲⱏⰲⱃⱏⰶⰵⱀⱆ ⰱⱏⰹⱅⰻ ⰲⱏ ⰼⰵⱁⱀⱘ. ⰲⱏ ⱁⰳⱀⱐ ⱀⰵ ⰳⰰⱎⱘⱎⱅⰻⰻ.
ꙇ аште нога твоѣ съблажнаатъ тѧ отъсѣци ѭ. добрѣа ти естъ вънити въ животъ хромоу. неже дъвѣ ноѕѣ имѫще въвръженоу бꙑти въ ђеонѫ. въ огнь не гашѫштии.
9:46
ⰺⰴⰵⰶⰵ ⱍⱃⱏⰲⱐ ⰺⱈⱏ ⱀⰵ ⱆⰿⰻⱃⰰⰰⱅⱏ. ⰺ ⱁⰳⱀⱐ ⱀⰵ ⱆⰳⰰⱄⰰⰰⱅⱏ.
ꙇдеже чръвь ꙇхъ не оумираатъ. ꙇ огнь не оугасаатъ.
9:47
ⰺ ⰰⱎⱅⰵ ⱁⰽⱁ ⱅⰲⱁⰵ ⱄⱏⰱⰾⰰⰶⱀⰰⰰⱅⱏ ⱅⱔ ⰻⱄⱅⱏⰽⱀⰻ ⰵ. ⰴⱁⰱⱃⱑⰰ ⱅⰻ ⰵⱄⱅⱏ ⱄⱏ ⰵⰴⰻⱀⱑⰿⱐ ⱁⰽⱁⰿⱐ ⰲⱐⱀⰻⱅⰻ ⰲⱏ ⱌⱄ҃ⱃⱄⱅⰲⰻⰵ ⰱⰶ҃ ⰵ҅. ⱀⰵⰶⰵ ⱁⰱⱑ ⱁⱍⰻ ⰻⰿⱘⱋⱓ. ⰺⱅⰻ ⰲⱏ ⰼⰵⱁⱀⱘ ⱁⰳⱀⱐⱀⱘⱙ.
ꙇ аште око твое съблажнаатъ тѧ истъкни е. добрѣа ти естъ съ единѣмь окомь вьнити въ цс҃рствие бж҃ е҅. неже обѣ очи имѫщю. ꙇти въ ђеонѫ огньнѫѭ.
9:48
ⰺⰴⰵⰶⰵ ⱍⱃⱏⰲⱐ ⰻⱈⱏ ⱀⰵ ⱆⰿⰻⱃⰰⰰⱅⱏ. ⰺ ⱁⰳⱀⱐ ⱀⰵ ⱆⰳⰰⱄⰰⰰⱅⱏ.
ꙇдеже чръвь ихъ не оумираатъ. ꙇ огнь не оугасаатъ.
9:49
ⰲⱐⱄⱑⰽⱏ ⰱⱁ ⱁⰳⱀⰵⰿⱐ ⱁⱄⱁⰾⰻⱅⱏ ⱄⱔ. ⰺ ⰲⱐⱄⱑⰽⰰ ⰶⱃⱏⱅⰲⰰ ⱄⱁⰾⰻⱙ ⱁⱄⱁⰾⰻⱅⱏ ⱄⱔ.
вьсѣкъ бо огнемь осолитъ сѧ. ꙇ вьсѣка жрътва солиѭ осолитъ сѧ.
9:50
ⰴⱁⰱⱃⱁ ⰵⱄⱅⱏ ⱄⱁⰾⱐ. Ⰰⱎⱅⰵ ⰾⰻ ⰶⰵ ⱄⱁⰾⱐ ⱀⰵ ⱄⰾⰰⱀⰰ ⰱⱘⰴⰵⱅⱏ ⱍⰻⰿⱐ ⱁⱄⱁⰾⰻⱅⰵ. ⰺⰿⱑⰻⱅⰵ ⱄⱁⰾⱐ ⰲⱐ ⱄⰵⰱⱑ. ⰺ҅ ⰿⰻⱃⱏ ⰻⰿⱑⱅⰵ ⰿⰵ{ⰴ}ⰶⰴⱓ ⱄⱁⰱⱁⱙ.
добро естъ соль. Аште ли же соль не слана бѫдетъ чимь осолите. ꙇмѣите соль вь себѣ. ꙇ҅ миръ имѣте ме{д}ждю собоѭ.