Въ вечеръ же сѫботънъꙇ. свитаѭшти въ пръвѫѭ сѫботѫ. приде мариѣ магъдалꙑн̑и. ꙇ҅ дроугаѣ мариѣ видѣтъ гроба.

ꙇ҅ се трѫсъ бꙑстъ велиі. ађ҃лъ бо гн҃ь съшьдъ съ нб҃се. ꙇ҅ пристѫпь отъвали камень. ѡтъ двьриі гроба. ꙇ҅ сѣдѣаше на н̑емь.

бѣ же зракъ его ѣко млъни. ꙇ҅ одѣние его бѣло ѣко снѣгъ.

̆ѡтъ страха же его сътрѧсошѧ сѧ стрѣгѫштеі. ꙇ҅ бѣшѧ ѣко мрътви.

отъвѣштавъ же ађ҃лъ рече женама. не боꙇта вꙑ сѧ. вѣмь бо ѣко ꙇ҅с҃а. пропѧтаего ꙇ҅штета.

нѣстъ сьде. въста бо. ѣкоже рече. придѣта видита мѣсто. ꙇ҅деже лежа х҃ъ.

ꙇ҅ скоро шьдъши. рьцѣта оученикомъ его. ѣко въста отъ мрътвъꙇхъ. ꙇ҅ се варѣетъ вꙑ въ галилеи. тоу і оузьрите. се рѣхъ вама.

ꙇ҅ ошьдъши скоро отъ гроба. съ страхомь ꙇ҅ радостиѭ велиеѭ. тѣсте възвѣститъ оученикомъ. егда же ꙇ҅дѣашете възвѣститъ оученикомъ его.

ꙇ҅ се ис҃. сърѣте і гл҃ѧ. радоуꙇ҅та сѧ. онѣ же пристѫпьши. ѩсте сѧ за нозѣ его. ꙇ҅ поклонисте сѧ емоу.

Тъгда гл҃а ꙇ҅ма ис҃. не боꙇ҅та сѧ. ꙇ҅дѣта ꙇ҅ възвѣстита братриі моеи. да ꙇ҅дѫтъ въ галил̆еѭ ꙇ҅ тоу мѧ видѧтъ.

ꙇ҅дѫштема же ꙇ҅ма. сь етерꙑ отъ коустодиѩ. пришьдъше въ градъ. възвѣстишѧ арⸯхиереомъ всѣ бꙑвъшаа.

ꙇ҅ събърашѧ сѧ старци. съвѣтъ же сътворьше. съребро много дашѧ воꙇномъ.

гл҃ѭште. рьцѣте. ѣко оученици его ноштиѭ. пришьдъше оукрадошѧ і намъ съпѧштемъ.

ꙇ҅ аште се оуслꙑшано бѫдетъ. оу ꙇ҅ђемона. мꙑ оутолимъ і. ꙇ҅ вꙑ бес печали сътворимъ.

они же приімъше съребро. сътворишѧ ѣкоже наоучени бꙑшѧ. ꙇ҅ промьче сѧ слово се. въ ꙇюдеꙇ҅хъ до сего дне.

Единъꙇ же на десѧте оученикъ ꙇ҅дошѧ въ галилеѭ въ горѫ ѣможе повелѣ ꙇ҅мъ ис҃.

ꙇ҅ видѣвъше и поклонишѧ сѧ емоу. ови же оусѫмьнѣшѧ сѧ.

ꙇ҅ пристѫпль ис҃. рече ꙇ҅мъ гл҃ѧ. дана ми естъ всѣка власть. на нб҃се ꙇ҅ на земли.

шьдъше оубо наоучите всѧ ѩзꙑкꙑ. крьстѧштѧ ѩ. въ ꙇ҅мѧ оц҃а ꙇ҅ сн҃а ꙇ҅ ст҃аго дх҃а.

оучѧштѧ ѩ бл̑юсти. вьсѣ елико заповѣдѣхъ вамъ. ꙇ҅ се азъ съ вами есмь. всѧ дни. до съконьчаниѣ вѣка. аминь: +