Ⰺ҅ ⰱⱏⰹⱄⱅⱏ ⰵⰳⰴⰰ ⱄⱏⰽⱁⱀⱐⱍⰰ ⰻⱄ҃. ⰲⱄⱑ ⱄⰾⱁⰲⰵⱄⰰ ⱄⰻ. ⱃⰵⱍⰵ ⱆⱍⰵⱀⰻⰽⱁⰿⱏ ⱄⰲⱁⰺⰿⱏ.

Ⰲⱑⱄⱅⰵ ⱑⰽⱁ ⱂⱁ ⰴⱏⰲⱁⱓ ⰴⱐⱀⱆ ⱂⰰⱄⱈⰰ ⰱⱏⰹⰲⰰⰵⱅⱏ. ⰺ҅ ⱄⱀ҃ⱏ ⱍⱄ҃ⰽⱏⰺ ⱂⱃⱑⰴⰰⰵⱅⱏ ⱄⱔ ⱀⰰ ⱃⰰⱄⱂⱔⱅⰻⰵ.

Ⱅⱏⰳⰴⰰ ⱄⱏⰱⱏⱃⰰⱎⱔ ⱄⱔ ⰰⱃⸯⱈⰻⰵⱃⰵⰻ. ⰺ҅ ⰽⱏⱀⰻⰶⱐⱀⰻⱌⰻ. ⰺ҅ ⱄⱅⰰⱃⱌⰻ ⰾ̑ⱓⰴⱐⱄⱌⰻⰹ. ⱀⰰ ⰴⰲⱁⱃⱏ ⰰⱃⱈⰻⰵⱃⰵⱁⰲⱏ. ⱀⰰⱃⰻⱌⰰⰵⰿⰰⰳⱁ ⰽⰰⰺⱑⱇⰰ.

ⰺ҅ ⱄⱏⰲⱑⱅⱏ ⱄⱏⱅⰲⱁⱃⰻⱎⱔ ⱀⰰ ⰻⱄ҃ⰰ. ⰴⰰ ⰾⱐⱄⱅⰻⱙ ⰺ҅ⰿⱘⱅⱏ ⰺ ⰺ҅ ⱆⰱⰻⱙⱅⱏ ⰺ.

ⰳⰾ҃ⰰⱈⱘ ⰶⰵ. ⱀⱏ ⱀⰵ ⰲⱏ ⱂⱃⰰⰸⰴⱐⱀⰻⰽⱏ. ⰴⰰ ⱀⰵ ⰿⰾⱐⰲⰰ ⰱⱘⰴⰵⱅⱏ ⰲⱏ ⰾ̑ⱓⰴⰵⱈⱏ.

!Ⰻⱄⱛ ⰶⰵ ⰱⱏⰹⰲⱏⱎⱓ ⰲⱏⱅⰰⱀⰻⰹ. ⰲⱏ ⰴⱁⰿⱆ ⱄⰻⰿⱁⱀⰰ ⱂⱃⱁⰽⰰⰶⰵⱀⰰⰵⰳⱁ.

ⱂⱃⰻⱄⱅⱘⱂⰻ ⰽⱏ ⱀ̑ⰵⰿⱆ ⰶⰵⱀⰰ. ⰺ҅ⰿⱘⱎⱅⰻ ⰰⰾⰰⰲⰵⱄⱅⱃⱏ ⰿⱛⱃⰰ ⰴⱃⰰⰳⰰ. ⰺ҅ ⰲⱏⰸⰾⰻⱑ ⱀⰰ ⰳⰾⰰⰲⱘ ⰵⰳⱁ ⰲⱏⰸⰾⰵⰶⱔⱎⱅⰰ.

ⰲⰻⰴⱑⰲⱏⱎⰵ ⰶⰵ ⱆⱍⰵⱀⰻⱌⰻ ⰵⰳⱁ. ⱀⰵⰳⱁⰴⱁⰲⰰⱎⱔ ⰳⰾ̑ⱙⱎⱅⰵ. ⱍⰵⱄⱁ ⱃⰰⰴⰻ ⰳⱏⰹⰱⱑⰾⱐ ⱄⰻ.

ⰿⱁⰶⰰⰰⱎⰵ ⰱⱁ ⱄⰵ ⰿⱛⱃⱁ. ⱂⱃⱁⰴⰰⱀⱁ ⰱⱏⰹⱅⰻ ⱀⰰ ⰿⱀⱁⰸⱑ. ⰺ҅ ⰴⰰⱀⱁ ⰱⱏⰹⱅⰻ ⱀⰻⱎⱅⰻⰹⰿⱏ.

ⱃⰰⰸⱆⰿⱑⰲⱏ ⰶⰵ ⰻⱄ҃ ⱃⰵⱍⰵ ⰺ҅ⰿⱏ. ⱍⱐⱅⱁ ⱅⱃⱆⰶⰴⰰⰵⱅⰵ ⰶⰵⱀⱘ. ⰴⱑⰾⱁ ⰱⱁ ⰴⱁⰱⱃⱁ ⱄⱏⰴⱑⰾⰰ ⱁ ⰿⱀⱑ.

ⰲⱄⰵⰳⰴⰰ ⰱⱁ ⱀⰻⱎⱅⱔⱗ ⰺ҅ⰿⰰⱅⰵ ⱄⱏ ⱄⱁⰱⱁⱙ. ⰿⰵⱀⰵ ⰶⰵ ⱀⰵ ⰲⱄⰵⰳⰴⰰ ⰺ҅ⰿⰰⱅⰵ.

Ⰲⱏⰸⰾⰻⱑⰲⱏⱎⰻⱑ ⰱⱁ ⱄⰻ. ⰿⰻⱃⱁ ⱀⰰ ⱅⱑⰾⱁ ⰿⱁⰵ. ⱀⰰ ⱂⱁⰳⱃⰵⰱⰵⱀⰻⰵ ⰿⱔ ⱄⱏⱅⰲⱁⱃⰻ.

ⰰⰿⰻⱀⱐ ⰳⰾ҃ⱙ ⰲⰰⰿⱏ. ⰺ҅ⰴⰵⰶⰵ ⰰⱎⱅⰵ ⱂⱃⱁⱂⱁⰲⱑⰴⰰⱀⱁ ⰱⱘⰴⰵⱅⱏ. ⰵⰲⰰⰼ҃ⰾⰻⰵ ⱄⰵ. ⰲⱏ ⰲⱐⱄⰵⰿⱐ ⰿⰻⱃⱑ ⱃⰵⱍⰵⱅⱏ ⱄⱔ. ⰺ҅ ⰵⰶⰵ ⱄⱏⱅⰲⱁⱃⰻ ⱄⰻ ⰲⱏ !ⱂⱅⱐ ⰵⱗ.

Ⱅⱏⰳⰴⰰ ⱎⱐⰴⱏ. ⰵⰴⰻⱀⱏ ⱁⱅⱏ ⱁⰱⱁⱓ ⱀⰰ ⰴⰵⱄⱔⱅⰵ. ⱀⰰⱃⰻⱌⰰⰵⰿⱏⰹ ⰺ҅ⱓⰴⰰ ⰺ҅ⱄⰽⰰⱃⰻⱁⱅⱐⱄⰽⱏⰺ. ⰽⱏ ⰰⱃⱈⰻⰵⱃⰵⱁⰿⱏ

ⱃⰵⱍⰵ. ⱍⱐⱅⱁ ⱈⱁⱎⱅⰵⱅⰵ ⰿⰻ ⰴⰰⱅⰻ. ⰺ҅ ⰰⰸⱏ ⰲⰰⰿⱏ ⱂⱃⱑⰴⰰⰿⱐ ⰻ. ⱁⱀⰻ ⰶⰵ ⱂⱁⱄⱅⰰⰲⰻⱎⱔ ⰵⰿⱆ !ⰼ. ⱄⱏⱃⰵⰱⱃⱐⱀⰻⰽⱏ.

ⰺ҅ ⱁⱅⱏⱅⱁⰾⰻ ⰺⱄⰽⰰⰰⱎⰵ ⱂⱁⰴⱁⰱⱐⱀⰰ ⰲⱃⱑⰿⰵⱀⰵ. ⰴⰰ ⰺ ⱂⱃⱑⰴⰰⱄⱅⱏ.

ⰲⱏ ⱂⱃⱏⰲⱏⰹ ⰶⰵ ⰴⱐⱀⱐ ⱁⱂⱃⱑⱄⱀⱏⰽⱏ ⱂⱃⰻⱄⱅⱘⱂⰻⱎⱔ ⱆⱍⰵⱀⰻⱌⰻ ⰽⱏⰹ ⰻⱄ҃ⱛ. ⰳⰾ̑ⱙⱎⱅⰵ ⰽⱏ ⱀ̑ⰵⰿⱆ. ⰽⱏⰴⰵ ⱈⱁⱎⱅⰵⱎⰻ ⰺ҅ ⱆⰳⱁⱅⱁⰲⰰⰵⰿⱏ ⱅⰻ ⱑⱄⱅⰻ ⱂⰰⱄⱈⰰ.

ⱁⱀⱏ ⰶⰵ ⱃⰵⱍⰵ ⰺ҅ⰴⱑⱅⰵ ⰲⱏ ⰳⱃⰰⰴⱏ ⰽⱏ ⰵⱅⰵⱃⱆ. ⰺ҅ ⱃⱐⱌⱑⱅⰵ ⰵⰿⱆ. ⱆⱍⰻⱅⰵⰾ̑ⱐ ⰳⰾ̑ⰵⱅⱏ. ⰲⱃⱑⰿⱔ ⰿⱁⰵ ⰱⰾⰻⰸⱏ ⰵⱄⱅⱏ. ⱆ ⱅⰵⰱⰵ ⱄⱏⱅⰲⱁⱃ̑ⱘ ⱂⰰⱄⱈⱘ ⱄⱏ ⱆⱍⰵⱀⰻⰽⱏⰹ ⱄⰲⱁⰺ҅ⰿⰻ.

ⰺ҅ ⱄⱏⱅⰲⱁⱃⰻⱎⱔ ⱆⱍⰵⱀⰻⱌⰻ. ⱑⰽⱁⰶⰵ ⱂⱁⰲⰵⰾⱑ ⰺ҅ⰿⱏ ⰻⱄ҃. ⰺ҅ ⱆⰳⱁⱅⱁⰲⰰⱎ̆ⱔ ⱂⰰⱄⱈⱘ.

Ⰲⰵⱍⰵⱃⱆ ⰶⰵ ⰱⱏⰹⰲⱏⱎⱓ. ⰲⱏⰸⰾⰵⰶⰵ ⱄⱏ ⱁⰱⱑⰿⰰ ⱀⰰ ⰴⰵⱄⱔⱅⰵ. ⱆⱍⰵⱀⰻⰽⱁⰿⰰ.

ⰺ҅ ⱑⰴⱘⱎⱅⰵⰿⱏ ⰺ҅ⰿⱏ ⱃⰵⱍⰵ. ⰰⰿⰻⱀⱐ ⰳⰾ̑ⱙ ⰲⰰⰿⱏ. ⱑⰽⱁ ⰵⰴⰻⱀⱏ ⱁⱅⱏ ⰲⰰⱄⱏ ⱂⱃⱑⰴⰰⱄⱅⱏ ⰿⱔ.

ⰺ҅ ⱄⰽⱃⱏⰱⱔⱎⱅⰵ ⰸⱑⰾⱁ ⱀⰰⱍⱔⱎⱔ ⰳⰾ҃ⰰⱅⰻ ⰵⰿⱆ. ⰵⰴⰻⱀⱏ ⰽⱁⰶⰴⱁ ⰺ҅ⱈⱏ. ⰵⰴⰰ ⰰⰸⱏ ⰵⱄⰿⱐ ⰳ҃ⰻ.

Ⱉⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ. ⱁⰿⱁⱍⰻⰹ ⱄⱏ ⰿⱀⱁⱙ ⰲⱏ ⱄⱁⰾⰻⰾⱁ ⱃⱘⰽⱘ. ⱅⱏ ⰿⱔ ⱂⱃⱑⰴⰰⱄⱅⱏ.

ⱄⱀ҃ⱏ ⰶⰵ ⱍⱄ҃ⰽⱏⰺ ⰺ҅ⰴⰵⱅⱏ ⱑⰽⱁⰶⰵ ⰵⱄⱅⱏ ⱂⱄⰰⱀⱁ ⱁ ⱀ̑ⰵⰿⱐ. ⰳⱁⱃⰵ ⰶⰵ ⱍⰽ҃ⱆ ⱅⱁⰿⱆ. ⰺ҅ⰿⱐⰶⰵ ⱄⱀ҃ⱏ ⱍⱄ҃ⰽⱏⰺ ⱂⱃⱑⰴⰰⱀⱏ ⰱⱘⰴⰵⱅⱏ. ⰴⱁⰱⱃⱑⰵ ⰵⰿⱆ ⰱⰻ ⰱⱏⰹⰾⱁ. ⰰⱎⱅⰵ ⱄⱔ ⰱⰻ ⱀⰵ ⱃⱁⰴⰻⰾⱏ ⱍⰽ҃ⱏ ⱅⱏ.

Ⱉⱅⱏⰲⱑⱎⱅⰰⰲⱏ ⰶⰵ ⰺ҅ⱓⰴⰰ ⱂⱃⱑⰴⰰⰲⱏⰺ ⰵⰳⱁ ⱃⰵⱍⰵ. ⰵⰴⰰ ⰰⰸⱏ ⰵⱄⰿⱐ ⱃⰰⰲⸯⰲⰻ. ⰳⰾ҃ⰰ ⰵⰿⱆ ⱅⱏⰹ ⱃⰵⱍⰵ.

*̆ⱑⰴⱘⱎⱅⰵⰿⱏ ⰶⰵ ⰺ҅ⰿⱏ. ⱂⱃⰻⰹⰿⱏ ⰻⱄ҃. ⱈⰾⱑⰱⱏ ⰺ҅ !ⰱⰾⰳⰲⰻⰲⱏ. ⱂⱃⱑⰾⱁⰿⰻ ⰹ. ⰺ҅ ⰴⰰⱑⱎⰵ ⱆⱍⰵⱀⰻⰽⱁⰿⱏ ⱄⰲⱁⰺ҅ⰿⱏ ⰺ҅ ⱃⰵⱍⰵ. ⱂⱃⰻⰿⱑⱅⰵ ⱑⰴⰻⱅⰵ. ⱄⰵ ⰵⱄⱅⱏ ⱅⱑⰾⱁ ⰿⱁⰵ.

Ⰺ҅ ⱂⱃⰻⰿⱏ ⱍⰰⱎⱘ. ⰺ҅ ⱈⰲⰰⰾⱘ ⰲⱏⰸⰴⰰⰲⱏ ⰴⰰⱄⱅⱏ ⰺ҅ⰿⱏ ⰳⰾ҃ⱔ. ⱂⰻⰹⱅⰵ ⱁⱅⱏ ⱀ̑ⰵⱗ ⰲⱄⰻ.

ⱄⰵ ⰵⱄⱅⱏ ⰽⱃⱏⰲⱐ ⰿⱁⱑ. ⱀⱁⰲⰰⰵⰳⱁ ⰸⰰⰲⱑⱅⰰ. ⱂⱃⱁⰾⰻⰲⰰⰵⰿⰰⱑ ⰸⰰ ⰿⱀⱁⰳⱏⰹ. ⰲⱏ ⱁⱅⱏⱂⱆⱎⱅⰵⱀⰻⰵ ⰳⱃⱑⱈⱁⰿⱏ.

ⰳⰾ̑ⱙ ⰶⰵ ⰲⰰⰿⱏ. ⱑⰽⱁ ⱀⰵ ⰺ҅ⰿⰰⰿⱐ ⱂⰻⱅⰻ ⱁⱅⱏ ⱂⰾⱁⰴⰰ ⱄⰵⰳⱁ ⰾⱁⰸⱏⱀⰰⰳⱁ. ⰴⱁ ⱅⱁⰳⱁ ⰴⱀⰵ. ⰵⰳⰴⰰ ⱂⰻⱙ ⱄⱏ ⰲⰰⰿⰻ. ⱀⱁⰲⱏ ⰲⱏ ⱌⱃ҃ⱄⰻ ⱁⱌ҃ⰰ ⰿⱁⰵⰳⱁ.

ⰺ҅ ⰲⱏⱄⱂⱑⰲⱏⱎⰵ ⰺ҅ⰸⰻⰴⱁⱎⱔ ⰲⱏ ⰳⱁⱃⱘ ⰵⰾⰵⱁⱀⱐⱄⰽⱘⱙ.

ⱅⱏⰳⰴⰰ ⰳⰾ҃ⰰ ⰺ҅ⰿⱏ ⰻⱄ҃. ⰲⱄⰻ ⰲⱏⰹ ⱄⱏⰱⰾⰰⰸⱀⰻⱅⰵ ⱄⱔ ⱁ ⰿⱀⱑ ⰲⱏ ⱄⰻⱙ ⱀⱁⱎⱅⱐ. ⱂⱄⰰⱀⱁ ⰱⱁ ⰵⱄⱅⱏ ⱂⱁⱃⰰⰶⱘ ⱂⰰⱄⱅⱏⰹⱃⱑ. ⰺ҅ ⱃⰰⰸⰻⰴⱘⱅⱏ ⱄⱔ ⱁⰲⱐⱌⱔ ⱄⱅⰰⰴⰰ.

ⱂⱁ ⰲⱏⱄⰽⱃⱏⱄⱀⱁⰲⰵⱀⰻ ⰶⰵ ⰿⱁⰵⰿⱐ. ⰲⰰⱃⱑⱙ ⰲⱏⰹ ⰲⱏ ⰳⰰⰾⰻⰾⰵⰻ.

Ⱉⱅⱏⰲⱑⱎⱅⰰⰲⱏ ⰶⰵ ⱂⰵⱅⱃⱏ ⱃⰵⱍⰵ ⰵⰿⱆ. ⰰⱎⱅⰵ ⰺ҅ ⰲⱄⰻ ⱄⱏⰱⰾⰰⰸⱀⱔⱅⱏ ⱄⱔ ⱁ ⱅⰵⰱⱑ. ⰰⰸⱏ ⱀⰻⰽⱁⰾⰻⰶⰵ ⱀⰵ ⱄⱏⰱⰾⰰⰶⱀ̑ⱘ ⱄⱔ ⱁ ⱅⰵⰱⱑ.

ⱃⰵⱍⰵ ⰵⰿⱆ ⰻⱄ҃. ⰰⰿⰻⱀⱐ ⰳⰾ҃ⱙ ⱅⰵⰱⱑ. ⱑⰽⱁ ⰲⱏ ⱄⰻⱙ ⱀⱁⱎⱅⱐ ⱂⱃⱑⰶⰴⰵ. ⰴⰰⰶⰵ ⰽⱆⱃⱏ ⱀⰵ ⰲⱏⰸⰳⰾⰰⱄⰻⱅⱏ. ⱅⱃⰻ ⰽⱃⰰⱅⱏⰹ ⱁⱅⱏⰲⱃⱏⰶⰵⱎⰻ ⱄⱔ ⰿⰵⱀⰵ.

ⰳⰾ҃ⰰ ⰵⰿⱆ ⱂⰵⱅⱃⱏ. ⰰⱎⱅⰵ ⰿⰻ ⱄⱔ ⰽⰾ̑ⱓⱍⰻⱅⱏ ⰺ҅ ⱄⱏ ⱅⱁⰱⱁⱙ ⱆⰿⱃⱑⱅⰻ. ⱀⰵ ⱁⱅⱏⰲⱃⱏⰳⱘ ⱄⱔ ⱅⰵⰱⰵ. ⱅⰰⰽⱁⰶⰴⰵ ⰺ҅ ⰲⱄⰻ ⱆⱍⰵⱀⰻⱌⰻ ⱃⱑⱎⱔ.

Ⱅⱏⰳⰴⰰ ⱂⱃⰻⰴⰵ ⱄⱏ ⱀ̑ⰻⰿⰻ ⰻⱄ҃. ⰲⱐ ⰲⱄⱐ ⱀⰰⱃⰻⱌⰰⰵⰿⱘⱙ. ⰼⰵⱀⸯⱄⰻⰿⰰⱀⰻ. ⰺ҅ ⰳⰾ҃ⰰ ⱆⱍⰵⱀⰻⰽⱁⰿⱏ. ⱄⱔⰴⱑⱅⰵ ⱅⱆ. ⰴⱁⱀⸯⰴⰵⰶⰵ ⱎⱐⰴⱏ ⱂⱁⰿⱁⰾ̑ⱙ ⱄⱔ ⱅⰰⰿⱁ.

ⰺ҅ ⱂⱁⰵⰿⱏ ⱂⰵⱅⱃⰰ ⰺ҅ ⱁⰱⰰ ⱄⱀ҃ⰰ ⰸⰵⰲⰵⰴⰵⱁⰲⰰ. ⱀⰰⱍⱔⱅⱏ ⱄⰽⱃⱏⰱⱑⱅⰻ. ⰺ҅ ⱅⱘⰶⰻⱅⰻ.

ⱅⱏⰳⰴⰰ ⰳⰾ҃ⰰ ⰺ҅ⰿⱏ ⰻⱄ҃. ⱂⱃⰻⱄⰽⱃⱏⰱⱏⱀⰰ ⰵⱄⱅⱏ ⰴⱎ҃ⰰ ⰿⱁⱑ ⰴⱁ ⱄⱏⰿⱃⱏⱅⰻ. ⱂⱁⰶⰻⰴⱑⱅⰵ ⱄⱐⰴⰵ ⰺ҅ ⰱⱐⰴⰻⱅⰵ ⱄⱏ ⰿⱀⱁⱙ.

ⰺ҅ ⱂⱃⱑⱎⱐⰴⱏ ⰿⰰⰾⱁ ⱂⰰⰴⰵ ⱀⰻⱌⱐ. ⰿⱁⰾⱔ ⱄⱔ ⰺ҅ ⰳⰾ҃ⱔ. !ⱁⱍⰵ ⰿⱁⰻ. ⰰⱎⱅⰵ ⰲⱏⰸⰿⱁⰶⱐⱀⱁ ⰵⱄⱅⱏ. ⰴⰰ ⰿⰻⰿⱁⰺ҅ⰴⰵⱅⱏ ⱁⱅⱏ ⰿⰵⱀⰵ ⱍⰰⱎⰰ ⱄⰻ. ⱁⰱⰰⱍⰵ ⱀⰵ ⱑⰽⱁⰶⰵ ⰰⰸⱏ ⱈⱁⱎⱅⱘ. ⱀⱏ ⱑⰽⱁⰶⰵ ⱅⱏⰹ.

ⰺ҅ ⰲⱏⱄⱅⰰⰲⱏ ⱁⱅⱏ ⰿⱁⰾⰻⱅⰲⱏⰹ ⱂⱃⰻⰴⰵ ⰽⱏ ⱆⱍⰵⱀⰻⰽⱁⰿⱏ. ⰺ҅ ⱁⰱⱃⱑⱅⰵ ⱗ ⱄⱏⱂⱔⱎⱅⱔ. ⰺ҅ ⰳⰾ҃ⰰ ⱂⰵⱅⱃⱁⰲⰻ. ⱅⰰⰽⱁ ⰾⰻ ⱀⰵ ⰲⱏⰸⰿⱁⰶⰵ. ⰵⰴⰻⱀⱁⰳⱁ ⱍⰰⱄⰰ ⱂⱁⰱⱐⰴⱑⱅⰻ ⱄⱏ ⰿⱀⱁⱙ.

Ⰱⱐⰴⰻⱅⰵ ⰺ҅ ⰿⱁⰾⰻⱅⰵ ⱄⱔ. ⰴⰰ ⱀⰵ ⰲⱐⱀⰻⰴⰵⱅⰵ ⰲⱏ ⱀⰰⱂⰰⱄⱅⱐ. ⰴⱈ҃ⱏ ⰱⱁ ⰱⱐⰴⱃⱏ. ⰰ ⱂⰾⱏⱅⱐ ⱀⰵⰿⱁⱎⱅⱐⱀⰰ.

Ⱂⰰⰽⱏⰹ ⰲⱏⱅⱁⱃⰻⱌⰵⱙ ⱂⱁⰿⱁⰾⰻ ⱄⱔ ⰳⰾ҃ⱔ. !ⱁⱍⰵ ⰿⱁⰹ. ⰰⱎⱅⰵ ⱀⰵ ⰿⱁⰶⰵⱅⱏ ⱍⰰⱎⰰ ⱄⰻ ⰿⰻⰿⱁⰺ҅ⱅⰻ ⱁⱅⱏ ⰿⰵⱀⰵ. ⰰⱎⱅⰵ ⱀⰵ ⱂⱐⱙ ⰵⱗ. ⰱⱘⰴⰻ ⰲⱁⰾ̑ⱑ ⱅⰲⱁⱑ.

ⰺ ⱂⱃⰻⱎⱐⰴⱏ ⱂⰰⰽⱏⰹ ⱁⰱⱃⱑⱅⰵ ⱗ ⱄⱏⱂⱔⱎⱅⱔ. ⰱⱑⱄⱅⰵ ⰱⱁ ⱁⱍⰻ ⰺ҅ⰿⱏ ⱅⱔⰳⱁⱅⱐⱀⱑ.

ⰺ҅ ⱁⱄⱅⰰⰲⱐ ⱗ ⱂⰰⰽⱏⰹ ⱎⱐⰴⱏ ⱂⱁⰿⱁⰾⰻ ⱄⱔ. ⱅⱃⰵⱅⰻⱌⰵⱙ ⱅⱁⰶⰴⰵ ⱄⰾⱁⰲⱁ ⱃⰵⰽⱏ.

ⱅⱏⰳⰴⰰ ⱂⱃⰻⰴⰵ ⰽⱏ ⱆⱍⰵⱀⰻⰽⱁⰿⱏ. ⰺ҅ ⰳⰾ҃ⰰ ⰺ҅ⰿⱏ ⱄⱏⱂⰻⱅⰵ. ⰺ҅ ⱂⱃⱁⱍⰵⰵ ⱂⱁⱍⰻⰲⰰⰺ҅ⱅⰵ. ⱄⰵ ⱂⱃⰻⰱⰾⰻⰶⰻ ⱄⱔ ⰳⱁⰴⰻⱀⰰ. ⰺ҅ ⱄⱀ҃ⱏ ⱍⱄ҃ⰽⱏⰺ ⱂⱃⱑⰴⰰⰵⱅⱏ ⱄⱔ ⰲⱏ ⱃⱘⱌⱑ ⰳⱃⱑⱎⱐⱀⰻⰽⱁⰿⱏ.

Ⰲⱏⱄⱅⰰⱀⱑⱅⰵ ⱂⱁⰺ҅ⰴⱑⰿⱏ. ⱄⰵ ⱂⱃⰻⰱⰾⰻⰶⰻ ⱄⱔ ⱂⱃⱑⰴⰰⱗⰻ ⰿⱔ.

Ⰺ ⰵⱎⱅⰵ ⰳⰾ̑ⱙⱎⱅⱓ ⰵⰿⱆ. ⱄⰵ ⰺ҅ⱓⰴⰰ ⰵⰴⰻⱀⱏ. ⱁⱅⱏ ⱁⰱⱁⱓ ⱀⰰ ⰴⰵⱄⱔⱅⰵ ⱂⱃⰻⰴⰵ. ⰺ҅ ⱄⱏ ⱀ̑ⰻⰿⱐ ⱀⰰⱃⱁⰴⱏ ⰿⱀⱁⰳⱏ. ⱄⱏ ⱁⱃⱘⰶⰻⰹ. ⰺ҅ ⰴⱃⸯⰽⱁⰾⸯⰿⰻ. ⱁⱅⱏ ⰰⱃⸯⱈⰻⰵⱃⰵⰻ. ⰺ҅ ⱄⱅⰰⱃⱌⱐ ⰾ̑ⱓⰴⱐⱄⰽⱏⰺⱈⱏ.

ⱂⱃⱑⰴⰰⱗⰺ҅ ⰶⰵ ⰹ. ⰴⰰⱄⱅⱏ ⰺ҅ⰿⱏ ⰸⱀⰰⰿⰵⱀⰻⰵ. ⰵⰳⱁⰶⰵ ⰰⱎⱅⰵ ⰾⱁⰱⱏⰶⱘ. ⱅⱁ ⰵⱄⱅⱏ. ⰺ҅ⰿⱑⱅⰵ ⰻ.

ⰺ҅ ⰰⰱⰻⰵ ⱂⱃⰻⱄⱅⱘⱂⰾ̑ⱐ ⰽⱏ ⰺⱄ҃ⰲⰻ.

ⱃⰵⱍⰵ ⰵⰿⱆ. ⰴⱃⱆⰶⰵ ⱀⰰ ⱀ̑ⰵⰶⰵ ⰵⱄⰻ ⱂⱃⰻⱎⱐⰾⱏ. ⱅⱁⰳⰴⰰ ⱂⱃⰻⱄⱅⱘⱂⱐⱎⰵ. ⰲⱏⰸⰾⱁⰶⰻⱎⱔ ⱃⱘⱌⱑ ⱀⰰ ⰻⱄ҃ⰰ. ⰺ҅ ⱗⱎⱔ ⰻ.

Ⰺ҅ ⱄⰵ ⰵⰴⰻⱀⱏ ⱁⱅⱏ ⱄⱘⱎⱅⰻⰹⱈⱏ ⱄⱏ ⰺⱄ҃ⱁⰿⱐ. ⱂⱃⱁⱄⱅⱐⱃⱏ ⱃⱘⰽⱘ ⰺ҅ⰸⰲⰾⱑⰽⱏ ⱀⱁⰶⱐ ⱄⰲⱁⰻ. ⰺ҅ ⱆⰴⰰⱃⰻ ⱃⰰⰱⰰ ⰰⱃⸯⱈⰻⰵⱃⰵⱁⰲⰰ. ⰺ҅ ⱆⱃⱑⰸⰰ ⰵⰿⱆ ⱆⱈⱁ.

ⱅⱏⰳⰴⰰ ⰳⰾ҃ⰰ ⰵⰿⱆ ⰻⱄ҃. ⰲⱏⰸⰲⱃⰰⱅⰻ ⱀⱁⰶⱐ ⱄⰲⱁⰻ ⰲⱏ ⱄⰲⱁⰵ ⰿⱑⱄⱅⱁ. Ⰲⱄⰻ ⰱⱁ ⱂⱃⰻⰵⰿⱏⱎⰻ ⱀⱁⰶⱐ. ⱀⱁⰶⰵⰿⱐ ⱂⱁⰳⱏⰹⰱⱀⱘⱅⱏ.

ⰾⰻ ⰿⸯⱀⰻⱅⱏ ⱅⰻ ⱄⱔ. ⱑⰽⱁ ⱀⰵ ⰿⱁⰳⱘ ⱀⱏⰹⱀ̑ⱑ. ⱆⰿⱁⰾⰻⱅⰻ ⱁⱌ҃ⰰ ⰿⱁⰵⰳⱁ. ⰺ҅ ⱂⱃⰻⱄⱅⰰⰲⰻⱅⱏ ⰿⸯⱀⱑ. ⰲⱔⱎⱅⰵ. ⰾⰻ ⰴⱏⰲⰰ ⱀⰰ ⰴⰵⱄⱔⱅⰵ ⰾⰵⰼⰵⱁⱀⰰ ⰰⰼ҃ⰾⱏ.

ⰽⰰⰽⱁ ⰶⰵ ⱆⰱⱁ ⱄⱏⰱⱘⰴⱘⱅⱏ ⱄⱔ ⰽⱏⱀⰻⰳⱏⰹ. ⱑⰽⱁ ⱅⰰⰽⱁ ⱂⱁⰴⱁⰱⰰⰰⱎⰵ ⰱⱏⰹⱅⰻ.

Ⰲⱏ ⱅⱏ ⱍⰰⱄⱏ ⱃⰵⱍⰵ ⰻⱄ҃ ⰽⱏ ⱀⰰⱃⱁⰴⱁⰿⱏ. ⱑⰽⱁ ⱀⰰ ⱃⰰⰸⰱⱁⰺ҅ⱀⰻⰽⰰ ⰾⰻ ⰺ҅ⰸⰻⰴⱁⱄⱅⰵ. ⱄⱏ ⱁⱃⱘⰶⰻⰵⰿⱐ ⰺ҅ ⰴⱃⱐⰽⱁⰾⸯⰿⰻ. ⱗⱅⰻ ⰿⱔ. ⱂⱁ ⰲⸯⱄⱔ ⰴⸯⱀⰻ ⱄⱑⰴⱑⱈⱏ ⱄⱏ ⰲⰰⰿⰻ. ⰲⱏ ⱌⱃ҃ⰽⱏⰲⰵ ⱆⱍⱔ. ⰺ҅ ⱀⰵ ⱗⱄⱅⰵ ⰿⰵⱀⰵ.

ⱄⰵ ⰶⰵ ⰲⱄⰵ ⰱⱏⰹⱄⱅⱏ. ⰴⰰ ⱄⱏⰱⱘⰴⱘⱅⱏ ⱄⱔ ⰽⱏⱀ̑ⰻⰳⱏⰹ ⱂⱃⱁⱃⱁⱍⱐⱄⰽⱏⰹⱗ. ⱅⱏⰳⰴⰰ ⱆⱍⰵⱀⰻⱌⰻ ⰲⱄⰻ ⱁⱄⱅⰰⰲⱐⱎⰵ ⰻ ⰱⱑⰶⰰⱎⱔ.

Ⱁⱀⰻ ⰶⰵ [ⱂⱁ]ⰺ҅ⰿⱏⱎⰵ ⰻⱄ҃ⰰ ⰲⰵⰴⱁⱎⱔ ⰻ ⰽⱏ ⰽⰰⰺⱑⱇⱑ. ⰰⱃⸯⱈⰻⰵⱃⰵⱁⰲⰻ. ⰺ҅ⰴⰵⰶⰵ ⰽⱏⱀⰻⰶⱐⱀⰻⱌⰻ. ⰺ҅ ⱄⱅⰰⱃⱌⰻ ⱄⱏⰱⱏⱃⰰⱎⱔ ⱄⱔ.

ⱂⰵⱅⱃⱏ ⰶⰵ ⰺ҅ⰴⱑⰰⱎⰵ ⱂⱁ ⱀ̑ⰵⰿⱐ ⰺ҅ⰸⰴⰰⰾⰵⱍⰵ. ⰴⱁ ⰴⰲⱁⱃⰰ ⰰⱃⱈⰻⰵⱃⰵⱁⰲⰰ. ⰺ҅ ⰲⱏⱎⱐⰴⱏ ⰲⱏⱀⱘⱅⱃⱐ ⱄⱑⰴⱑⱎⰵ ⱄⱏ ⱄⰾⱆⰳⰰⰿⰻ. ⰲⰻⰴⱑⱅⰻ ⰽⱁⱀⱍⰻⱀⱘ.

ⰰⱃⸯⱈⰻⰵⱃⰵⰻ ⰶⰵ ⰺ҅ ⱄⱅⰰⱃⱌⰻ. ⰺ҅ ⱄⱏⱀⱐⰿⱏ ⰲⱐⱄⱐ. ⰺ҅ⱄⰽⰰⰰⱈⱘ ⰾⱏⰶⰰ ⱄⱏⰲⱑⰴⱑⱅⰵⰾ̑ⱑ ⱀⰰ ⰺⱄ҃ⰰ. ⱑⰽⱁ ⰴⰰ ⱆⰱⰻⱙⱅⱏ ⰺ.

ⰺ҅ ⱀⰵ ⱁⰱⱃⱑⱅⱘ. ⰺ҅ ⰿⱀⱁⰳⱁⰿⱏ ⰾⱏⰶⰵⰿⱏ. ⱄⱏⰲⱑⰴⱑⱅⰵⰾ̑ⰵⰿⱏ ⱂⱃⰻⱄⱅⱘⱂⱐⱎⰵⰿⱏ. ⱂⱁⱄⰾⱑⰴⱐ ⰶⰵ ⱂⱃⰻⱄⱅⱘⱂⱐⱎⰰ ⰴⰲⰰ ⱄⱏⰲⱑⰴⱑⱅⰵⰾ̑ⱑ

ⱃⱑⱄⱅⰵ. ⱄⱐ ⱃⰵⱍⰵ ⰿⱁⰳⱘ ⱃⰰⰸⱁⱃⰻⱅⰻ ⱌⱃⸯⰽⱁⰲⱐ ⰱⰶ҃ⰻⱙ. ⰺ҅ ⱅⱃⱐⰿⰻ ⰴⸯⱀⱐⰿⰻ ⱄⱏⰸⱏⰴⰰⱅⰻ ⱙ.

ⰺ҅ ⰲⱏⱄⱅⰰⰲⱏ ⰰⱃⱈⰻⰵⱃⰵⰻ ⱃⰵⱍⰵ ⰵⰿⱆ. ⱀⰻⱍⰵⱄⱁⰶⰵ ⰾⰻ ⱀⰵ ⱁⱅⱏⰲⱑⱎⱅⰰⰲⰰⰵⱎⰻ. ⱍⱐⱅⱁ ⱄⰻ ⱀⰰ ⱅⱔ ⱄⱏⰲⱑⰴⱑⱅⰵⰾ̑ⱐⱄⱅⰲⱆⱙⱅⱏ.

ⰺⱄ҃ ⰶⰵ ⰿⰾⱐⱍⰰⰰⱎⰵ. ⰺ҅ ⱁⱅⱏⰲⱑⱎⱅⰰⰲⱏ ⰰⱃⸯⱈⰻⰵⱃⰵⰻ ⱃⰵⱍⰵ ⰵⰿⱆ. ⰸⰰⰽⰾⰻⱀⰰⱙ ⱅⱔ ⰱ҃ⰿⱐ ⰶⰻⰲⱏⰺⰿⱐ. ⰴⰰ ⱃⰵⱍⰵⱎⰻ ⱀⰰⰿⱏ. ⰰⱎⱅⰵ ⱅⱏⰹ ⰵⱄⰻ ⱈ҃ⱏ ⱄⱀ҃ⱏ ⰱⰶ҃ⰹⰻ.

ⰳⰾ҃ⰰ ⰵⰿⱆ ⰻⱄ҃ ⱅⱏⰹ ⱃⰵⱍⰵ. ⱁⰱⰰⱍⰵ ⰳⰾ̑ⱙ ⰲⰰⰿⱏ. ⱁⱅⱏⱄⰵⰾⱑ ⱆⰸⱐⱃⰻⱅⰵ ⱄⱀ҃ⰰ ⱍⱄ҃ⰽⰰⰰⰳⱁ ⱄⱑⰴⱔⱎⱅⰰ ⱁ ⰴⰵⱄⱀⱘⱙ ⱄⰻⰾⱏⰹ. ⰺ҅ ⰳⱃⱔⰴⱘⱎⱅⰰ ⱀⰰ ⱁⰱⰾⰰⱌⱑⱈⱏ ⱀⰵⰱ҃ⱄⰽⱏⰺⱈⱏ.

ⱅⱏⰳⰴⰰ ⰰⱃⱈⰻⰵⱃⰵⰹ ⱃⰰⱄⱅⱃⱏⰸⰰ ⱃⰻⰸⱏⰹ ⱄⰲⱁⱗ ⰳⰾ҃ⱔ. ⱑⰽⱁ ⰲⰾⰰⱄⰲⰻⰿⰻⱙ ⱃⰵⱍⰵ. ⱍⱐⱅⱁ ⰵⱎⱅⰵ ⱅⱃⱑⰱⱆⰵⰿⱏ ⱄⱏⰲⱑⰴⱑⱅⰵⰾ̑ⱐ. ⱄⰵ ⱀⱏⰹⱀ̑ⱑ ⱄⰾⱏⰹⱎⰰⱄⱅⰵ. ⰲⰾⰰⱄⰲⰻⰿⰻⱙ ⰵⰳⱁ.

ⱍⱐⱅⱁ ⱄⱔ ⰲⰰⰿⱏ ⰿⱐⱀⰻⱅⱏ. ⱁⱀⰻ ⰶⰵ ⱁⱅⱏⰲⱑⱎⱅⰰⰲⱏⱎⰵ ⱃⱑⱎⱔ. ⱂⱁⰲⰻⱀⱀⱏ ⰵⱄⱅⱏ ⱄⱏⰿⱃⱏⱅⰻ.

ⱅⱏⰳⰴⰰ ⰸⰰⱂⰾ̑ⱐⰲⰰⱎⱔ ⰾⰻⱌⰵ ⰳⱁ. ⰺ҅ ⱂⰰⰽⱁⱄⱅⰻ ⰵⰿⱆ ⰴⱑⰰⱎⱔ. ⱁⰲⰻ ⰶⰵ ⰸⰰ ⰾⰰⱀⰻⱅⱘ ⱆⰴⰰⱃⰻⱎⱔ

ⰳⰾ̑ⱙⱎⱅⰵ. ⱂⱃⱁⱃⱐⱌⰻ ⱀⰰⰿⱏ !ⱈⰵ ⰽⱏⱅⱁ ⰵⱄⱅⱏ ⱆⰴⰰⱃⱐⰺ ⱅⱔ.

Ⱂⰵⱅⱃⱏ ⰶⰵ ⰲⱐⱀⱑ ⱄⱑⰴⱑⰰⱎⰵ ⱀⰰ ⰴⰲⱁⱃⱑ. ⰺ҅ ⱂⱃⰻⱄⱅⱘⱂⰻ ⰽⱏ ⱀ̑ⰵⰿⱆ ⰵⰴⰻⱀⰰ ⱃⰰⰱⱏⰹⱀ̑ⰻ. ⰳⰾ҃ⱙⱎⱅⰻ. ⰺ҅ ⱅⱏⰹ ⰱⱑ ⱄⱏ ⰺⱄ҃ⱁⰿⱐ ⰳⰰⰾⰻⰾⱑⰺ҅ⱄⰽⱏⰺⰿⱐ.

ⱁⱀⱏ ⰶⰵ ⱁⱅⱏⰲⱃⱏⰶⰵ ⱄⱔ ⱂⱃⱑⰴⱏ ⰲⱄⱑⰿⰻ ⰳⰾ҃ⱔ. ⱀⰵ ⰲⱑⰿⱐ ⱍⱐⱅⱁ ⰳⰾ҃ⰵⱎⰻ.

ⰺ҅ⱎⱐⰴⱏⱎⱓ ⰶⰵ ⰵⰿⱆ ⰲⱏ ⰲⱃⰰⱅⰰ. ⱆⰸⱐⱃⱑ ⰻ ⰴⱃⱆⰳⰰⱑ. ⰺ҅ ⰳⰾ҃ⰰ ⰵⰿⱆ. ⱅⱆ ⰺ҅ ⱄⱐ ⰱⱑ ⱍⰽ҃ⱏ. ⱄⱏ ⰺ҅ⱄ҃ⱁⰿⱐ ⱀⰰⰸⰰⱃⱑⱀⰻⱀⱁⰿⱐ.

ⰺ҅ ⱂⰰⰽⱏⰹ ⱁⱅⱏⰲⱃⱏⰶⰵ ⱄⱔ ⱄⱏ ⰽⰾⱔⱅⰲⱁⱙ. ⱑⰽⱁ ⱀⰵ ⰸⱀⰰⱙ ⱍⰽ҃ⰰ.

ⱀⰵ ⱂⱁ ⰿⱀⱁⰳⱆ ⰶⰵ ⱂⱃⰻⱄⱅⱘⱂⱐⱎⰵ. ⱄⱅⱁⱗⱎⱅⰵⰹ ⱃⱑⱎⱔ ⱂⰵⱅⱃⱁⰲⰻ. ⰲⱏ ⰺ҅ⱄⱅⰻⱀⱘ ⰺ҅ ⱅⱏⰹ ⱁⱅⱏ ⱀⰻⱈⱏ ⰵⱄⰻ. ⰺ҅ ⰱⰵⱄⱑⰴⰰ ⱅⰲⱁⱑ ⰰⰲⱑ ⱅⱔ ⱅⰲⱁⱃⰻⱅⱏ.

Ⱅⱏⰳⰴⰰ ⱀⰰⱍⱔⱅⱏ ⱃⱁⱅⰻⱅⰻ ⱄⱔ ⰺ҅ ⰽⰾⱔⱅⰻ ⱄⱔ. ⱑⰽⱁ ⱀⰵ ⰸⱀⰰⱙ ⱍⰽ҃ⰰ. ⰺ҅ ⰰⰱⰻⰵ ⰽⱆⱃⱏ ⰲⱏⰸⰳⰾⰰⱄⰻ.

ⰺ҅ ⱂⱁⰿⱑⱀⱘ ⱂⰵⱅⱃⱏ ⰳⰾ҃ⱏ ⰺⱄ҃ⰲⱏ. ⰺ҅ ⱃⰵⱍⰵ ⰵⰿⱆ. ⱑⰽⱁ ⱂⱃⱑⰶⰴⰵ ⰴⰰⰶⰵ ⰽⱆⱃⱏ ⱀⰵ ⰲⱏⰸⰳⰾⰰⱄⰻⱅⱏ. ⱅⱃⰻ ⰽⱃⰰⱅⱏⰹ ⱁⱅⱏⰲⱃⱏⰶⰵⱎⰻ ⱄⱔ ⰿⰵⱀⰵ. ⰺ҅ ⰻⱎⱐⰴⱏ ⰲⱏⱀⱏ ⱂⰾⰰⰽⰰ ⱄⱔ ⰳⱁⱃⸯⰽⱁ. !ⰽⱁ!ⱌ.