Ⰲⱏ ⱅⱁ ⰲⱃⱑⰿⱔ ⱂⱃⰻⰴⰵ ⰻⱄ҃. ⰲⱏ ⱄⱘⰱⱁⱅⱘ. ⱄⰽⰲⱁⰸⱑ ⱄⱑⰰⱀⰻⱑ. ⱆⱍⰵⱀⰻⱌⰻ ⰶⰵ ⰵⰳⱁ ⰲⱏⰸⰾⰰⰽⰰⱎⱔ. ⰺ҅ ⱀⰰⱍⱔⱎⱔ ⰲⱏⱄⱅⱃⱏⰳⰰⱅⰻ ⰽⰾⰰⱄⱏⰹ ⰺ҅ ⱑⱄⱅⰻ.

ⱇⰰⱃⰻⱄⱑⰺ҅ ⰶⰵ ⰲⰻⰴⱑⰲⱏⱎⰵ ⱃⱑⱎⱔ ⰵⰿⱆ. ⱄⰵ ⱆⱍⰵⱀⰻⱌⰻ ⱅⰲⱁⰻ ⱅⰲⱁⱃⱔⱅⱏ. ⰵⰳⱁⰶⰵ ⱀⰵ ⰴⱁⱄⱅⱁⰺ҅ⱅⱏ ⱅⰲⱁⱃⰻⱅⰻ ⰲⱏ ⱄⱘⰱⱁⱅⱏⰹ.

ⱁⱀⱏ ⰶⰵ ⱃⰵⱍⰵ ⰺ҅ⰿⱏ. ⱀⱑⱄⱅⰵ ⰾⰻ ⱍⱐⰾⰻ. ⱍⱐⱅⱁ ⱅⰲⱁⱃⰻ ⰴⰰ҃ⰴⱏ. ⰵⰳⰴⰰ ⰲⱏⰸⰾⰰⰽⰰ ⱄⰰⰿⱏ. ⰺ҅ ⱄⱘⱎⱅⰵⰻ ⱄⱏ ⱀ̑ⰻⰿⱐ.

ⰽⰰⰽⱁ ⰲⱐⱀⰻⰴⰵ ⰲⱏ ⱈⱃⰰⰿⱏ ⰱⰶ҃ⰹⰻ. ⰺ҅ ⱈⰾⱑⰱⱏⰹ ⱂⱃⱑⰴⱏⰾⱁⰶⰵⱀⰻⱑ ⱄⱏⱀⱑⱄⱅⱏ. ⰺ҅ⱈⱏⰶⰵ ⱀⰵ ⰴⱁⱄⱅⱁⰺⱀⱁ ⰵⰿⱆ ⰱⱑ ⱑⱄⱅⰻ. ⱀⰻ ⱄⱘⱎⱅⰹⰻⰿⱏ ⱄⱏ ⱀ̑ⰻⰿⱐ. ⱅⱏⰽⰿⱁ ⰺ҅ⰵⱃⰵⱁⰿⱏ ⰵⰴⰻⱀⱑⰿⱏ.

Ⰾⰻ ⱀⱑⱄⱅⰵ ⱍⱐⰾⰻ ⰲⱏ ⰸⰰⰽⱁⱀⱑ. ⱑⰽⱁ ⰲⱏ ⱄⱘⰱⱁⱅⱏⰹ. ⰺ҅ⰵⱃⰵⰻ ⰲⱏ ⱌⱃⰽⱏⰲⰵ. ⱄⱘⰱⱁⱅⱘ ⱄⰽⰲⱃⱏⱀⱔⱅⱏ. ⰺ҅ ⱀⰵ ⱂⱁⰲⰻⱀⱐⱀⰻ ⱄⱘⱅⱏ.

ⰳⰾ̑ⱙ ⰲⰰⰿⱏ. ⱑⰽⱁ ⱌⱃⰽⱏⰲⰵ ⰺ҅ ⰱⱁⰾ̑ⰻⰹ ⰵⱄⱅⱏ ⱄⱐⰴⰵ.

ⰰⱎⱅⰵ ⰾⰻ ⰱⰻⱄⱅⰵ ⰲⱑⰴⱑⰾⰻ. ⱍⱐⱅⱁ ⰵⱄⱅⱏ. ⰿⰻⰾⱁⱄⱅⰻ ⱈⱁⱎⱅⱘ. ⰰ ⱀⰵ ⰶⱃⱏⱅⰲⱑ. ⱀⰻⰽⱁⰾⰻⰶⰵ ⱆⰱⱁ ⰱⰻⱄⱅⰵ ⱁⱄⱘⰴⰻⰾⰻ ⱀⰵⱂⱁⰲⰻⱀⱏ[ⱀⱏ]ⰺⱈⱏ.

ⰳ҃ⱐ ⰱⱁ ⰵⱄⱅⱏ ⱄⱘⰱⱁⱅⱑ ⱄⱀ҃ⱏ ⱍⱄ҃ⰽⱏⰹ.

Ⰺ ⱂⱃⱑⱈⱁⰴⱔ ⱁⱅⱏⱅⱘⰴⱑ ⰻⱄ҃. ⱂⱃⰻⰴⰵ ⱀⰰ ⱄⱏⱀⱏⰿⰻⱎⱅⰵ ⰺ҅ⱈⱏ.

ⰺ҅ ⱄⰵ ⱍⰽ҃ⱏ ⰱⱑ ⱅⱆ ⱃⱘⰽⱘ ⰺ҅ⰿⱏⰹ ⱄⱆⱈⱘ. ⰺ҅ ⰲⱏⱂⱃⱁⱄⰻⱎⱔ ⰻ ⰳⰾ̑ⱙⱎⱅⰵ. ⰰⱎⱅⰵ ⰴⱁⱄⱅⱁⰺⱅⱏ ⰲⱏ ⱄⱘⰱⱁⱅⱘ ⱌⱑⰾⰻⱅⰻ. ⰴⰰ ⱀⰰ ⱀ̑ⱐ ⰲⱏⰸⰳⰾⰰⰳⱁⰾ̑ⱙⱅⱏ.

ⱁⱀⱏ ⰶⰵ ⱃⰵⱍⰵ ⰺⰿⱏ. ⰽⱏⱅⱁ ⰵⱄⱅⱏ ⱁⱅⱏ ⰲⰰⱄⱏ ⱍⰽ҃ⱏ ⰺ҅ⰶⰵ ⰺ҅ⰿⰰⱅⱏ ⱁⰲⱐⱍⱔ ⰵⰴⰻⱀⱁ. ⰺ҅ ⰰⱎⱅⰵ ⰲⱏⱂⰰⰴⰵⱅⱏ ⱄⱔ ⰲⱏ ⱄⱘⰱⱁⱅⱘ ⰲⱏ ⱑⰿⱘ. ⱀⰵ ⰺ҅ⰸⱏⰿⰵⱅⱏ ⰾⰻ ⰵⰳⱁ.

ⰽⱁⰾⱐⰿⰻ ⱆⰱⱁ ⰾⱆⱍⰻⰹ ⰵⱄⱅⱏ ⱍⰽ҃ⱏ ⱁⰲⱐⱍⱔⱅⰵ. ⱅⱑⰿⰶⰵ ⰴⱁⱄⱅⱁⰺ҅ⱅⱏ ⰲⱏ ⱄⱘⰱⱁⱅⱘ ⰴⱁⰱⱃⱁ ⱅⰲⱁⱃⰻⱅⰻ.

ⱅⱏⰳⰴⰰ ⰳⰾ҃ⰰ ⱍⰽ҃ⱆ. ⱂⱃⱁⱄⱅⱐⱃⰻ ⱃⱘⰽⱘ ⱅⰲⱁⱙ. ⰺ҅ ⱂⱃⱁⱄⱅⱐⱃⱑⱅⱏ ⱃⱘⰽⱘ ⰺ҅ ⱆⱅⰲⱃⱏⰴⰻ ⱄⱔ ⰵⰿⱆ. ⰺ҅ ⰱⱏⰹⱄⱅⱏ ⱌⱑⰾⰰ ⱑⰽⱁ ⰺ҅ ⰴⱃⱆⰳⰰⱑ.

Ⱇⰰⱃⰻⱄⱑⰺ ⰶⰵ ⰺ҅ⱎⱐⰴⱏⱎⰵ. ⱄⱏⰲⱑⱅⱏ ⱄⱅⰲⱁⱃⰻⱎⱔ ⱀⰰ ⱀ̑ⱐ. ⰽⰰⰽⱁ ⰻ ⱂⱁⰳⱆⰱⱔⱅⱏ.

ⰺⱄ҃ ⰶⰵ ⱃⰰⰸⱆⰿⱑⰲⱏ ⱁⱅⰻⰴⰵ ⱁⱅⱏⱅⱘⰴⱑ. ⰺ҅ ⱂⱁ ⱀ̑ⰵⰿⱐ ⰺ҅ⰴⱁⱎⱔ ⱀⰰⱃⱁⰴⰻ ⰿⱀⱁⰷⰻ. ⰺ҅ ⰻⱌⱑⰾⰻ ⱗ ⰲⱄⱔ.

ⰺ҅ ⰸⰰⱂⱃⱑⱅⰻ ⰺ҅ⰿⱏ. ⰴⰰ ⱀⰵ ⰰⰲⱑ ⰵⰳⱁ ⱄⱏⱅⰲⱁⱃⱔⱅⱏ.

ⰴⰰ ⱄⱏⰱⱘⰴⰵⱅⱏ ⱄⱔ ⱂⱃⱁⱃⱁⰽⱁⰿⱐ ⰺ҅ⱄⰰⰺⰵⰿⱐ ⰳⰾ̑ⱙⱎⱅⰵⰿⱐ.

ⱄⰵ ⱁⱅⱃⱁⰽⱏ ⰿⱁⰻ ⰵⰳⱁⰶⰵ ⰺ҅ⰸⰲⱁⰾⰻⱈⱏ. ⰲⱏⰸⰾ̑ⱓⰱⰾ̑ⰵⱀⱏⰹ ⰿⱁⰻ. ⱀⰰ ⱀ̑ⱐⰶⰵ ⰱⰾⰰⰳⱁⰺ҅ⰸⰲⱁⰾⰻ ⰴⱎ҃ⰰ ⰿⱁⱑ. ⱂⱁⰾⱁⰶⱘ ⰴⱈ҃ⱏ ⰿⱁⰻ ⱀⰰ ⱀ̑ⰵⰿⱐ. ⰺ҅ ⱄⱘⰴⱏ ⱗⰸⱏⰹⰽⱁⰿⱏ ⰲⱐⰸⰲⱑⱄⱅⰻⱅⱏ.

ⱀⰵ ⱂⱃⱑⱃⰵⱍⰵⱅⱏ ⱀⰻ ⰲⱏⰸⱏⱂⰻⰵⱅⱏ. ⱀⰵ ⱆⱄⰾⱏⰹⱎⰻⱅⱏ ⱀⰻⰽⸯⱅⱁⰶⰵ. ⱀⰰ ⱃⰰⱄⱂⱘⱅⰻⰺⱈⱏ ⰳⰾⰰⱄⰰ ⰵⰳⱁ.

ⱅⱃⱐⱄⱅⰻ ⱄⱏⰽⱃⱆⱎⰵⱀⱏⰹ ⱀⰵ ⱂⱃⰻⰾⱁⰿⰻⱅⱏ. ⰺ҅ ⱂⱃⱏⱅⰰ ⱀⰵ ⰲⱏⱀⰵⰿⱏⱎⰰ ⱄⱔ ⱀⰵ ⱆⰳⰰⱄⰻⱅⱏ. ⰴⱁⱀⸯⰴⰵⰶⰵ ⰲⱏⰸⰲⰵⰴⰵⱅⱏ ⱀⰰ ⱂⱁⰱⱑⰴⱘ ⱄⱘⰴⱏ.

ⰺ҅ ⱀⰰ ⰺ҅ⰿⱔ ⰵⰳⱁ ⱗⰸⱏⰹⱌⰻ ⱆⱂⱏⰲⰰⱙⱅⱏ.

Ⱅⱁⰳⰴⰰ ⱂⱃⰻⰲⱑⱄⱔ ⰵⰿⱆ ⰱⱑⱄⱏⱀⱆⱙⱎⱅⱐ ⱄⱔ ⱄⰾⱑⱂⱏ ⰺ҅ ⱀⱑⰿⱏ. ⰺ ⰻⱌⱑⰾⰻ ⰹ. ⱑⰽⱁ ⱄⰾⱑⱂⱏ ⰺ҅ ⰳⰾⱆⱈⱏ ⰺ҅ ⰳⰾ҃ⰰⱎⰵ ⰺ҅ ⰳⰾⱔⰴⰰⰰⱎⰵ.

ⰺ҅ ⰴⰻⰲⰾ̑ⱑⰰⱈⱘ ⱄⱔ ⰲⱄⰻ ⱀⰰⱃⱁⰴⰻ. ⰳⰾ̑ⱙⱎⱅⰵ. ⰵⰴⰰ ⱄⱐ ⰵⱄⱅⱏ ⱄⱀ҃ⱏ !ⰴⰰⰲⱏ.

Ⱇⰰⱃⰻⱄⱑⰻ ⰶⰵ ⱄⰾⱏⰹⱎⰰⰲⱏⱎⰵ ⱃⱑⱎⱔ. ⱄⱐ ⱀⰵ ⰺ҅ⰸⰳⱁⱀⰻⱅⱏ ⰱⱑⱄⱏ. ⱅⱏⰽⰿⱁ ⱁ ⰲⰵⰾⱐⰸⱑⰲⱁⰾⱑ ⰽⱏⱀⱔⰸⰻ ⰱⱑⱄⱏ.

ⰲⱑⰴⱏⰹ ⰶⰵ ⰻⱄ҃. ⰿⱏⰹⱄⰾⰻ ⰺⰿⱏ ⰺ҅ ⱃⰵⱍⰵ ⰺ҅ⰿⱏ. ⰲⱄⱑⰽⱁ ⱌⱃ҃ⱄⱅⰲⱁ ⱃⰰⰸⰴⱑⰾ̑ⱐ ⱄⱔ ⱀⰰ ⱄⱔ. ⰸⰰⱂⱆⱄⱅⱑⰵⱅⱏ. ⰺ҅ ⰲⱐⱄⱑⰽⱏ ⰳⱃⰰⰴⱏ. ⰾⰻ ⰴⱁⰿⱏ. ⱃⰰⰸⰴⱑⰾ̑ⱐ ⱄⱔ ⱀⰰ ⱄⱔ ⱀⰵ ⱄⱅⰰⱀⰵⱅⱏ.

ⰺ҅ ⰰⱎⱅⰵ ⱄⱁⱅⱁⱀⰰ ⱄⱁⱅⱁⱀⱘ ⰺ҅ⰸⰳⱁⱀⰻⱅⱏ. ⱀⰰ ⱄⱔ ⱃⰰⰸⰴⱑⰾⰻⰾⱏ ⱄⱔ ⰵⱄⱅⱏ. ⰽⰰⰽⱁ ⱆⰱⱁ ⱌⱃ҃ⱄⱁ ⰵⰳⱁ.

ⰺ҅ ⰰⱎⱅⰵ ⰰⰸⱏ. ⱁ ⰲⰵⰾⱐⰸⱑⰲⱁⰾⱑ ⰺ҅ⰸⰳⱁⱀ̑ⱙ ⰱⱑⱄⱏⰹ. ⱄⱀ҃ⱁⰲⰵ ⰲⰰⱎⱔ ⱁ ⰽⱁⰿⱐ ⰺⰸⰳⱁⱀⱔⱅⱏ. ⱄⰵⰳⱁ ⱃⰻⱅⰻ ⰲⰰⰿⱏ ⰱⱘⰴⱘⱅⱏ ⱄⱘⰴⰻⱗ.

ⰰⱎⱅⰵ ⰾⰻ ⱁ ⰴⱄ҃ⱑ ⰱⰶ҃ⰹⰻ. ⰰⰸⱏ ⰺ҅ⰸⰳⱁⱀ̑ⱙ ⰱⱑⱄⱏⰹ. ⱆⰱⱁ ⱂⱁⱄⱅⰻ ⰶⰵ ⱀⰰ ⰲⰰⱄⱏ ⱌⱃ҃ⱄⰻⰵ ⰱⰶ҃ⰻⰵ.

ⰾⰻ ⰽⰰⰽⱁ ⰿⱁⰶⰵⱅⱏ ⰽⱅⱁ. ⰲⱐⱀⰻⱅⰻ ⰲⱏ ⰴⱁⰿⱏ ⰽⱃⱑⱂⱏⰽⰰⰰⰳⱁ. ⰺ҅ ⱄⱏⱄⱘⰴⱏⰹ ⰵⰳⱁ ⱃⰰⱄⱈⱏⰹⱅⰻⱅⰻ. ⰰⱎⱅⰵ ⱀⰵ ⱂⱃⱏⰲⱑⰵ ⱄⱏⰲⱔⰶⰵⱅⱏ ⰽⱃⱑⱂⱏⰽⰰⰰⰳⱁ. ⰺ҅ ⱅⱏⰳⰴⰰ ⰴⱁⰿⱏ ⰵⰳⱁ ⱃⰰⱄⱈⱏⰹⱅⰻⱅⰻ.

ⰺⰶⰵ ⱀⱑⱄⱅⱏ ⱄⱏ ⰿⱀⱁⱙ ⱀⰰ ⰿⱔ ⰵⱄⱅⱏ. ⰺ҅ ⰻⰶⰵ ⱀⰵ ⱄⱏⰱⰻⱃⰰⰵⱅⱏ ⱄⱏ ⰿⱀⱁⱙ ⱃⰰⱄⱅⰰⱍⰰⰵⱅⱏ.

Ⱄⰵⰳⱁ ⱃⰰⰴⰻ ⰳⰾ̑ⱙ ⰲⰰⰿⱏ. ⰲⱄⱑⰽⱏ ⰳⱃⱑⱈⱏ ⰺ҅ ⰲⰾⰰⱄⰲⰻⰿⰻⱑ. ⱁⱅⱏⱂⱆⱄⱅⰻⱅⱏ ⱄⱔ ⱍⰽ҃ⱁⰿⱏ. ⰰ ⱑⰶⰵ ⱀⰰ ⰴⱈ҃ⱏ ⰲⰾⰰⱄⰲⰻⰿⰻⱑ. ⱀⰵ ⱁⱅⱏⱂⱆⱄⱅⰻⱅⱏ ⱄⱔ ⱍⰽ҃ⱁⰿⱏ.

ⰺ҅ ⰻⰶⰵ ⰽⱁⰾⰻⰶⱐⰴⱁ ⱃⰵⱍⰵⱅⱏ ⱄⰾⱁⰲⱁ ⱀⰰ ⱄⱀ҃ⱏ ⱍⱄ҃ⰽⱏ. ⱁⱅⱏⱂⱆⱄⱅⰻⱅⱏ ⱄⱔ ⰵⰿⱆ. ⰰ ⰺ҅ⰶⰵ ⱃⰵⱍⰵⱅⱏ ⱀⰰ ⰴⱈ҃ⱏ ⱄⱅ҃ⱏⰺ. ⱀⰵ ⱁⱅⱏⱂⱆⱄⱅⰻⱅⱏ ⱄⱔ ⰵⰿⱆ. ⱀⰻ ⰲⱐ ⱄⱐ ⰲⱑⰽⱏ. ⱀⰻ ⰲⱏ ⰳⱃⱔⰴⱘⱎⱅⰻⰹ.

Ⰾⰻ ⱄⱏⱅⰲⱁⱃⰻⱅⰵ ⰴⱃⱑⰲⱁ ⰴⱁⰱⱃⱁ. ⰺ҅ ⱂⰾⱁⰴⱏ ⰵⰳⱁ ⰴⱁⰱⱃⱏ. ⰾⰻ ⱄⱏⱅⰲⱁⱃⰻⱅⰵ ⰴⱃⱑⰲⱁ ⰸⱏⰾⱁ. ⰺ҅ ⱂⰾⱁⰴⱐ ⰵⰳⱁ ⰸⱏⰾⱏ. ⱁⱅⱏ ⱂⰾⱁⰴⰰ ⰱⱁ ⰴⱃⱑⰲⱁ ⱂⱁⰸⱀⰰⱀⱁ ⰱⱘⰴⰵⱅⱏ.

ⰺ҅ⱎⱅⱔⰴⰻⱑ ⰵⱈⰻⰴⱀⱁⰲⰰ. ⰽⰰⰽⱁ ⰿⱁⰶⰵⱅⰵ ⰴⱁⰱⱃⱁ ⱅⰲⱁⱃⰻⱅⰻ ⰸⱐⰾⰻ ⱄⱘⱎⱅⰵ. ⱁⱅⱏ ⰺⰸⰱⱏⰹⱅⱏⰽⰰ ⰱⱁ ⱄⱃⱏⰴⱐⱌⱓ ⱆⱄⱅⰰ ⰳⰾ̑ⱙⱅⱏ.

Ⰴⱁⰱⱃⱏⰺ ⱍⰽ҃ⱏ ⱁⱅⱏ ⰴⱁⰱⱃⰰⰰⰳⱁ ⱄⱏⰽⱃⱁⰲⰻⱎⱅⰰ. ⰺ҅ⰸⱀⱁⱄⰻⱅⱏ ⰴⱁⰱⱃⰰⰰ. ⰺ҅ ⰸⱏⰾⱏⰺ ⱍⰽ҃ⱏ ⱁⱅⱏ ⰸⱏⰾⰰⰰⰳⱁ ⱄⱏⰽⱃⱁⰲⰻⱎⱅⰰ ⰺ҅ⰸⱀⱁⱄⰻⱅⱏ ⰸⱏⰾⰰⱑ.

ⰳⰾ҃ⱙ ⰶⰵ ⰲⰰⰿⱏ. ⱑⰽⱁ ⰲⱄⱑⰽⱁ ⱄⰾⱁⰲⱁ ⱂⱃⰰⰸⰴⱐⱀⱁ. ⰵⰶⰵ ⰰⱎⱅⰵ. ⱃⰵⰽⱘⱅⱏ ⱍⱌ҃ⰻ. ⰲⱏⰸⰴⰰⰴⱔⱅⱏ ⱁ ⱀ̑ⰵⰿⱐ. ⱄⰾⱁⰲⱁ. ⰲⱐ ⰴⱐⱀⱐ ⱄⱘⰴⱏⱀⱏⰺ.

ⱁⱅⱏ ⱄⰾⱁⰲⰵⱄⱏ ⰱⱁ ⱄⰲⱁ̑ⰺⱈⱏ ⱁⱂⱃⰰⰲⱐⰴⰻⱎⰻ ⱄⱔ. ⰺ҅ ⱄⰾⱁⰲⰵⱄⱏⰹ ⱄⰲⱁⰺ҅ⰿⰻ ⱁⱄⱘⰴⰻⱎⰻ ⱄⱔ. !ⰽⱁ!ⱌ.

Ⱅⱏⰳⰴⰰ ⱁⱅⱏⰲⱑⱎⱅⰰⱎⱔ ⰵⱅⰵⱃⰻⰹ. ⱁⱅⱏ ⰽⱏⱀⰻⰶⱐⱀⰻⰽⱏ ⰺ҅ ⱇⰰⱃⰻⱄⱑⰻ ⰳⰾ̑ⱙⱎⱅⰵ. ⱆⱍⰻⱅⰵⰾ̑ⱓ ⱈⱁⱎⱅⰵⰿⱏ ⱁⱅⱏ ⱅⰵⰱⰵ ⰸⱀⰰⰿⰵⱀⰻⰵ ⰲⰻⰴⱑⱅⰻ.

Ⱉⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰺ҅ⰿⱏ. ⱃⱁⰴⱏ ⰾⱘⰽⰰⰲⱏ. ⰺ҅ ⰾ̑ⱓⰱⱁⰴⱑⰻ. ⰸⱀⰰⰿⰵⱀⰻⱑ ⰺ҅ⱎⱅⰵⱅⱏ. ⰺ҅ ⰸⱀⰰⰿⰵⱀⰻⰵ ⱀⰵ ⰴⰰⱄⱅⱏ ⱄⱔ ⰵⰿⱆ. ⱅⱏⰽⰿⱁ ⰸⱀⰰⰿⰵⱀⰻⰵ ⰺ҅ⱁⱀⱏⰹ ⱂⱃⱁⱃⱁⰽⰰ.

ⱑⰽⱁ ⰱⱁ ⰱⱑ ⰺ҅ⱁⱀⰰ ⰲⱐ ⱍⱃⱑⰲⱑ ⰽ̑ⰻⱅⱁⰲⱑ. ⱅⱃⰻ ⰴⱀⰻ. ⱅⱃⰻ ⰶⰵ ⱀⱁⱎⱅⰻ. ⱅⰰⰽⱁ ⰱⱘⰴⰵⱅⱏ ⱄⱀ҃ⱏ ⱍⱄ҃ⰽⱏⰺ ⰲⱏ !ⱄⱃⰴⱌⰻ ⰸⰵⰿⰾ̑ⱔ. ⱅⱃⰻ ⰴⱀⰻ ⰺ҅ ⱅⱃⰻ ⱀⱁⱎⱅⰻ.

ⰿⱘⰶⰻ ⱀⰵⰲⱐⰼⰻⱅⱐⱄⱌⰹ. ⰲⱏⱄⱅⰰⱀⱘⱅⱏ ⱀⰰ ⱄⱘⰴⱏ. ⱄⱏ ⱃⱁⰴⱁⰿⱐ ⱄⰻⰿⱐ ⰺ҅ ⱁⱄⱘⰴⱔⱅⱏ ⰺ. ⱑⰽⱁ ⱂⱁⰽⰰⰰⱎⱔ ⱄⱔ ⱂⱃⱁⱂⱁⰲ̆ⱑⰴⰻⱙ ⰺ҅ⱁⱀⰻⱀⱁⱙ. ⰺ҅ ⱄⰵ ⰱⱁⰾ̑ⰵ ⰺ҅ⱁⱀⱏⰹ ⱄⱐⰴⰵ.

!ⱌⱃⰻⱌⰰ ⱓⰶⱐⱄⰽⰰⰰ ⰲⱏⱄⱅⰰⱀⰵⱅⱏ ⱀⰰ ⱄⱘⰴⱏ ⱄⱏ ⱃⱁⰴⱁⰿⱐ ⱄⰻⰿⱐ. ⰺ҅ ⱁⱄⱘⰴⱔⱅⱏ ⰺ. ⱑⰽⱁ ⱂⱃⰻⰴⰵ ⱁⱅⱏ ⰽⱁⱀⱌⱐ ⰸⰵⰿⰾ̑ⱔ. ⱄⰾⱏⰹⱎⰰⱅⱏ ⱂⱃⱑⰿⱘⰴⱃⱁⱄⱅⰻ ⱄⱁⰾⱁⰿⱁⱀ̑ⱔ. ⰺ҅ ⱄⰵ ⰱⱁⰾ̑ⰵ ⱄⱁⰾⱁⰿⱁⱀⰰ ⱄⱐⰴⰵ.

Ⰵⰳⰴⰰ ⰶⰵ ⱀⰵⱍⰻⱄⱅⱏⰺ ⰴⱈ҃ⱏ ⰺ҅ⰸⰻⰴⰵⱅⱏ ⱁⱅⱏ ⱍⰽ҃ⰰ. ⱂⱃⱑⱈⱁⰴⰻⱅⱏ ⱄⰽⰲⱁⰸⱑ ⰱⰵⰸⰴⱏⱀⰰⱑ ⰿⱑⱄⱅⰰ. ⰺ҅ⱎⱅⱔ ⱂⱁⰽⱁⱑ ⰺ҅ ⱀⰵ ⱁⰱⱃⱑⱅⰰⰵⱅⱏ.

ⱅⱏⰳⰴⰰ ⱃⰵⱍⰵⱅⱏ. ⰲⱏⰸⰲⱃⰰⱎⱅⱘ ⱄⱔ ⰲⱏ ⱈⱃⰰⰿⱏ ⰿⱁⰻ. ⱁⱅⱐⱀⱆⰴⱆⰶⰵ ⰺⰸⰻⰴⱏ. ⰺ҅ ⱂⱃⰻⱎⱐⰴⱏ ⱁⰱⱃⱔⱎⱅⰵⱅⱏ ⱂⱃⰰⰸⰴⱐⱀⱏ. ⱂⱁⰿⰵⱅⰵⱀⱏ ⰺ҅ ⱆⰽⱃⰰⱎⰵⱀⱏ.

ⱅⱏⰳⰴⰰ ⰺ҅ⰴⰵⱅⱏ. ⰺ҅ ⱂⱁⰺ҅ⰿⰵⱅⱏ ⱄⱏ ⱄⱁⰱⱁⱙ. !ⰶ. ⰺ҅ⱀⱑⱈⱏ ⰴⱈ҃ⱏ ⰾ̑ⱓⱎⱅⱐⱎⱐ ⱄⰵⰱⰵ. ⰺ҅ ⰲⱏⱎⰵⰴⱏⱎⰵ ⰶⰻⰲⱘⱅⱏ. ⰺ҅ ⰱⱘⰴⱘⱅⱏ ⱂⱁⱄⰾⱑⰴⱐⱀ̑ⱑⱑ ⱍⰽ҃ⰰ ⱅⱁⰳⱁ. ⰳⱁⱃⱐⱎⰰ ⱂⱃⱏⰲⱏⰺⱈⱏ. ⱅⰰⰽⱁ ⰱⱘⰴⰵⱅⱏ ⰺ҅ ⱃⱁⰴⱆ ⱄⰵⰿⱆ ⰾⱘⰽⰰⰲⱏⱀⱆⰵⰿⱆ.

Ⰵⱎⱅⰵ ⰵⰿⱆ ⰳⰾ̑ⱙⱎⱅⱓ ⰽⱏ ⱀⰰⱃⱁⰴⱁⰿⱏ. ⱄⰵ ⰿⰰⱅⰻ ⰺ҅ ⰱⱃⰰⱅⱃⰻⱑ ⰵⰳⱁ ⱄⱅⱁⱑⱈⱘ ⰲⱐⱀⱑ. ⰺ҅ⱄⰽⱘⱎⱅⰵ ⰳⰾ҃ⰰⱅⰻ ⰵⰿⱆ.

ⱃⰵⱍⰵ ⰶⰵ ⰵⱅⰵⱃⱏ ⰽⱏ ⱀ̑ⰵⰿⱆ. ⰿⱅ҃ⰻ ⱅⰲⱁⱑ ⰺ҅ ⰱⱃⰰⱅⱃⰻⱑ ⱅⰲⱁⱑ. ⰲⱐⱀⱑ ⱄⱅⱁⱗⱅⱏ ⱈⱁⱅⱔⱎⱅⰵ ⰳⰾ҃ⰰⱅⰻ ⰽⱏ ⱅⰵⰱⱑ.

ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰽⱏ ⰳⰾ̑ⱙⱎⱅⱆⰿⱆ. ⰽⱏⱅⱁ ⰵⱄⱅⱏ ⰿⰰⱅⰻ ⰿⱁⱑ. ⰺ҅ ⰽⱏⱅⱁ ⱄⱘⱅⱏ ⰱⱃⰰⱅⱃⰻⱑ ⰿⱁⱑ.

ⰺ҅ ⱂⱃⱁⱄⱅⱐⱃⱏ ⱃⱘⰽⱘ ⱄⰲⱁⱙ ⱀⰰ ⱆⱍⰵⱀⰻⰽⱏⰹ ⱄⰲⱁⱗ ⱃⰵⱍⰵ. ⱄⰵ ⰿⰰⱅⰻ ⰿⱁⱑ ⰺ҅ ⰱⱃⰰⱅⱃⰻⱑ ⰿⱁⱑ.

ⰺ҅ⰶⰵ ⰱⱁ ⰰⱎⱅⰵ ⱅⰲⱁⱃⰻⱅⱏ ⰲⱁⰾ̑ⱙ ⱁⱌ҃ⰰ ⰿⱁⰵⰳⱁ ⰺ҅ⰶⰵ ⰵⱄⱅⱏ ⱀⰰ ⱀⰱ҃ⱄⱈⱏ. ⱅⱏ ⰱⱃⰰⱅⱏ ⰿⱁⰻ. ⰺ҅ ⱄⰵⱄⱅⱃⰰ. ⰺ҅ ⰿⱅ҃ⰻ ⰵⱄⱅⱏ.