Ⰺ ⱄⱏⰱⱏⱃⰰⱎⱔ ⱄⱔ ⰽⱏ ⱀ̑ⰵⰿⱆ ⱇⰰⱃⰻⱄⱑⰻ. ⰺ҅ ⰵⱅⰵⱃⰻⰹ ⱁⱅⱏ ⰽⱏⱀⰻⰶⱐⱀⰻⰽⱏ. ⱂⱃⰻⱎⱐⰴⱏⱎⰵ ⱁⱅⱏ ⰵⰾ҃ⰿⰰ.

ⰺ҅ ⰲⰻⰴⱑⱎⱔ ⰵⱅⰵⱃⰻⰹ ⱁⱅⱏ ⱆⱍⰵⱀⰻⰽⱏ ⰵⰳⱁ. ⱀⰵⱍⰻⱄⱅⰰⰿⰰ ⱃⱘⰽⰰⰿⰰ. ⱄⰻⱃⱑⱍⱐ ⱀⰵ ⱁⰿⱏⰲⰵⱀⰰⰿⰰ. ⱑⰴⱘⱎⱅⱔ ⱈⰾⱑⰱⱏⰹ. ⰸⰰⰸⱐⱃⱑⰰⱈⱘ.

ⱇⰰⱃⰻⱄⱑⰻ ⰱⱁ. ⰺ҅ ⰲⱄⰻ ⰺ҅ⱓⰴⱑⰻ. ⰰⱎⱅⰵ ⱀⰵ ⱆⰿⱏⰹⰲⰰⱙⱅⱏ ⱃⱘⰽⱆ ⱅⱐⱃⱘⱎⱅⰵ. ⱀⰵ ⱑⰴⱔⱅⱏ. ⰴⱃⱏⰶⱔⱎⱅⰵ ⱂⱃⱑⰴⰰⰰⱀⰻⰵ ⱄⱅⰰⱃⸯⱌⱐ.

ⰺ҅ ⱁⱅⱏ ⰽⱘⱂⱑⰾⰻ ⰰⱎⱅⰵ ⱀⰵ ⱂⱁⰽⱘⱂⰾ̑ⱘⱅⱏ ⱄⱔ. ⱀⰵ ⱑⰴⱔⱅⱏ. ⰺ҅ ⰻⱀⰰ ⰿⱀⱁⰳⰰ ⱄⱘⱅⱏ. ⱑⰶⰵ ⱂⱃⰻⱗⱎⱔ ⰴⱃⱏⰶⰰⱅⰻ. ⰽⱃⱐⱎⱅⰵⱀⰻⱑ ⱄⱅⱐⰽⰾⱑⱀⰻⱌⰰⰿⱏ. ⰺ҅ ⱍⱐⰲⰰⱀⱁⰿⱏ. ⰺ҅ ⰽⱁⱅⱏⰾⱁⰿⱏ. ⰺ҅ ⱁⰴⱃⱁⰿⱏ.

Ⱂⱁⱅⱁⰿⱐ ⰶⰵ ⰲⱏⱂⱃⰰⱎⰰⰰⱈⱘ ⰹ. Ⱇⰰⱃⰻⱄⱑⰻ ⰺ҅ ⰽⱏⱀⰻⰶⱐⱀⰻⱌⰻ. ⱂⱁ ⱍⱐⱅⱁ ⱀⰵ ⱈⱁⰴⱔⱅⱏ ⱆⱍⰵⱀⰻⱌⰻ ⱅⰲⱁⰹ. ⱂⱁ ⱂⱃⱑⰴⰰⰰⱀⰻⱓ ⱄⱅⰰⱃⱐⱌⱐ. ⱀⱏ ⱀⰵ ⱆⰿⱏⰲⰵⱀⰰⰿⰰ ⱃⱘⰽⰰⰿⰰ ⱑⰴⱔⱅⱏ ⱈⰾⱑⰱⱏ.

ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰺ҅ⰿⱏ. ⰲⱏ ⱂⱃⰰⰲⱏⰴⱘ ⰴⱁⰱⱃⱑ ⱃⰵⱍⰵ ⰺ҅ⱄⰰⰹⱑ ⱁ ⰲⰰⱄⱏ ⰾⰻⱌⰵⰿⱑⱃⰻ. ⱑⰽⱁⰶⰵ ⰵⱄⱅⱏ ⱂⱄⰰⱀⱁ. ⱄⰻⰹ ⰾ̑ⱓⰴⰻⰵ ⱆⱄⱅⱏⱀⰰⰿⰻ ⱍⱐⱅⱘⱅⱏ ⰿⱔ. ⰰ ⱄⱃⱏⰴⱐⱌⰵ ⰺ҅ⱈⱏ ⰴⰰⰾⰵⱍⰵ ⱁⱅⱏⱄⱅⱁⰺⱅⱏ ⱁⱅⱏ ⰿⰵⱀⰵ.

ⰲⱏⱄⱆⰵ ⰶⰵ ⱍⱐⱅⱘⱅⱏ ⰿⱔ. ⱆⱍⱔⱎⱅⰵ ⱆⱍⰵⱀⰻⱑ ⰸⰰⱂⱁⰲⱑⰴⰻⰹ !ⱍⱍⱄⰽⱏ.

ⱁⱄⱅⰰⰲⱏⱎⰵ ⰱⱁ ⰸⰰⱂⱁⰲⱑⰴⱐ ⰱⰶ҃ⱐⱙ. ⰴⱃⱏⰶⰻⱅⰵ ⱂⱃⱑⰴⰰⰰⱀⰻⱑ ⱍⱄ҃ⰽⰰ. ⰽⱃⱐⱎⱅⰵⱀⰻⱑ ⰽⱃⱏⱍⰰⰳⱁⰿⱏ. ⰺ҅ ⱄⱅⱐⰽⰾⱑⱀⰻⱌⰰⰿⱏ. ⰺ҅ ⰻⱀⰰ ⱂⱁⰴⱁⰱⱐⱀⰰ ⱅⰰⰽⱁⰲⰰⱑ ⱅⰲⱁⱃⰻⱅⰵ. ⰿⱀⱁⰳⰰ.

ⰺ҅ ⰳⰾ҃ⰰⱎⱔ ⰺ҅ⰿⱏ. ⰴⱁⰱⱃⱑ ⱁⱅⱏⰿⱑⱅⰰⰵⱅⰵ ⱄⱔ. ⰸⰰⱂⱁⰲⱑⰴⰻ ⰱⰶ҃ⰻⱗ. ⰴⰰ ⱂⱃⱑⰴⰰⰰⱀⰻⰵ ⰲⰰⱎⰵ ⱄⱏⰱⰾ̑ⱓⰴⰵⱅⰵ.

ⰿⱛⱄⰻ ⰱⱁ ⱃⰵⱍⰵ. ⱍⱐⱅⰻ ⱁⱌ҃ⰰ ⱅⰲⱁⰵⰳⱁ ⰺ҅ ⰿⱃ҃ⱐ ⱅⰲⱁⱙ. ⰺ҅ ⰻⰶⰵ ⰸⱐⰾⱁⱄⰾⱁⰲⰻⱅⱏ. ⱁⱌ҃ⰰ ⰾⰻ ⰿⱃ҃ⱐ. ⱄⱏⰿⱃⱏⱅⰻⱙ ⰴⰰ ⱆⰿⱐⱃⰵⱅⱏ.

ⰲⱏⰹ ⰶⰵ ⰳⰾ҃ⰵⱅⰵ. ⰰⱎⱅⰵ ⱃⰵⱍⰵⱅⱏ ⱍⰽ҃ⱏ. ⱁⱌ҃ⱓ ⰾⰻ ⰿⱃ҃ⰻ. ⰽⱁⱃⸯⰲⰰⱀⱏ. ⰵⰶⰵ ⰵⱄⱅⱏ ⰴⰰⱃⱏ. ⰺ҅ ⰵⰶⰵ ⰰⱎⱅⰵ. ⱁⱅⱏ ⰿⰵⱀⰵ ⱂⱁⰾⱐⰸⰵⰲⰰⰾⱏ ⰵⱄⰻ.

ⰺ҅ ⰽⱏ ⱅⱁⰿⱆ ⱀⰵ ⱁⱄⱅⰰⰲⰾ̑ⱑⰵⱅⰵ ⰵⰳⱁ. ⱀⰻⱍⱐⱄⱁⰶⰵ ⱄⱏⱅⰲⱁⱃⰻⱅⰻ ⱁⱌ҃ⱓ ⱄⰲⱁⰵⰿⱆ. ⰾⰻ ⰿⱃ҃ⰻ ⱄⰲⱁⰵⰻ.

ⱂⱃⱑⱄⱅⱘⱂⰰⱙⱎⱅⰵ ⱄⰾⱁⰲⱁ ⰱⰶ҃ⱐⰵ. ⱂⱃⱑⰴⰰⰰⱀⰻⰵⰿⱐ ⰲⰰⱎⰻⰿⱐ. ⰵⰶⰵ ⱂⱃⱑⰴⰰⱄⱅⰵ. ⰺ҅ ⱂⱁⰴⱁⰱⱐⱀⰰ ⱅⰰⰽⱁⰲⰰ ⰿⱀⱁⰳⰰ ⱅⰲⱁⱃⰻⱅⰵ.

ⰺ҅ ⱂⱃⰻⰸⱏⰲⰰⰲⱏ ⰲⱐⱄⱐ ⱀⰰⱃⱁⰴⱏ. ⰳⰾ҃ⰰⰰⱎⰵ ⰺ҅ⰿⱏ ⱂⱁⱄⰾⱆⱎⰰⰺ҅ⱅⰵ ⰿⰵⱀⰵ ⰲⱄⰻ. ⰺ҅ ⱃⰰⰸⱆⰿⱑⰲⰰⰺⱅⰵ.

ⱀⰻⱍⱐⱅⱁⰶⰵ ⱀⱑⱄⱅⱏ. ⰵⰶⰵ ⰲⱐⱀⱑⱙⰴⱆ ⱍⰽ҃ⰰ. ⰲⱏⱈⱁⰴⱔ ⰲⱏ ⱀ̑ⱐ. ⱀⰵ ⰿⱁⰶⰵⱅⱏ ⱁⱄⰽⰲⱃⱏⱀⰻⱅⰻ. ⱀⱏ ⰺ҅ⱄⱈⱁⰴⱔⱎⱅⰰⰰ ⱄⱘⱅⱏ ⱄⰽⰲⱃⱏⱀⱔⱎⱅⰰ ⱍⰽ҃ⰰ.

ⰰⱎⱅⰵ ⰽⱏⱅⱁ ⰺ҅ⰿⰰⱅⱏ ⱆⱎⰻ ⱄⰾⱏⰹⱎⰰⱅⰻ ⰴⰰ ⱄⰾⱏⰹⱎⰻⱅⱏ

Ⰺ҅ ⰵⰳⰴⰰ ⰲⱐⱀⰻⰴⰵ ⰻⱄ҃. ⰲⱏ ⰴⱁⰿⱏ ⱁⱅⱏ ⱀⰰⱃⱁⰴⰰ. ⰲⱏⱂⱃⰰⱎⰰⰰⱈⱘ ⰹ ⱆⱍⰵⱀⰻⱌⰻ ⰵⰳⱁ ⱁ ⱂⱃⰻⱅⱏⱍⰻ.

ⰺ҅ ⰳⰾ҃ⰰ ⰺ҅ⰿⱏ. ⱅⰰⰽⱁ ⰾⰻ ⰲⱏⰹ ⱀⰵⱃⰰⰸⱆⰿⱐⰾⰻⰲⰻ ⰵⱄⱅⰵ. ⱀⰵ ⱃⰰⰸⱆⰿⱑⰵⱅⰵ ⰾⰻ. ⱑⰽⱁ ⰲⱄⱑⰽⱁ ⰵⰶⰵ ⰺ҅ⰸⰲⱐⱀⱆ ⰲⱏⱈⱁⰴⰻⱅⱏ ⰲⱏ ⱍⰽ҃ⰰ. ⱀⰵ ⰿⱁⰶⰵⱅⱏ ⰵⰳⱁ ⱁⱄⰽⰲⱃⱏⱀⰻⱅⰻ.

ⱑⰽⱁ ⱀⰵ ⰲⱏⱈⱁⰴⰻⱅⱏ ⰵⰿⱆ ⰲⱏ ⱄⱃⱏⰴⱐⱌⰵ. ⱀⱏ ⰲⱏ ⱍⱃⱑⰲⱁ. ⰺ҅ ⱄⰽⰲⱁⰸⱑ ⰰⱇⱃⰵⰴⱁⱀⱏ ⰺ҅ⱄⱈⱁⰴⰻⱅⱏ. ⰺ҅ⱄⱅⱃⱑⰱⰾ̑ⱑⱗ ⰲⱐⱄⱑ ⰱⱃⰰⱎⱐⱀⰰ.

ⰳⰾ҃ⰰⰰⱎⰵ ⰶⰵ. ⱑⰽⱁ ⰺ҅ⱄⱈⱁⰴⱔⱎⱅⰵⰵ ⱁⱅⱏ ⱍⰽ҃ⰰ. ⱅⱁ ⱄⰽⰲⱃⱏⱀⰻⱅⱏ ⱍⰽ҃ⰰ.

ⰺ҅ⰸ ⱘⱅⱃⱐ̆ⱘⰴⱆ ⰱⱁ. ⱁⱅⱏ ⱄⱃⱏⰴⱐⱌⰰ !ⱍⱍⱄⰽⰰ. ⱂⱁⰿⱏⰹⱎⰾ̑ⰵⱀⰻⱑ ⰸⱏⰾⰰⱑ ⰺ҅ⱄⱈⱁⰴⱔⱅⱏ. ⱂⱃⱑⰾ̑ⱓⰱⱁⰴⱑⰰⱀⱐⱑ. ⰾ̑ⱓⰱⱁⰴⱑⰰⱀⱐⰵ. ⱆⰱⰻⰹⱄⱅⰲⰰ.

ⱅⰰⱅⱐⰱⱏⰹ. ⱁⰱⰻⰴⱏⰹ. ⰾⱘⰽⰰⰲⱐⱄⱅⰲⰰ. ⰾⱐⱄⱅⱐ. ⱄⱅⱆⰴⱁⰴⱑⰰⱀⱐⰵ. ⱁⰽⱁ ⰾⱘⰽⰰⰲⱁ. ⱈⱆⰾ̑ⰵⱀⰻⰵ. ⰳⱃⱏⰴⱏⰹⱀⰻ. ⰱⰵⰸⱆⰿⱐⰵ.

ⰲⱐⱄⱑ ⱄⰻ ⰸⱏⰾⰰⱑ. ⰺ҅ⰸⱘⱅⱃⰻⰹ ⰺ҅ⱄⱈⱁⰴⱔⱅⱏ. ⰺ҅ ⱄⰽⰲⱃⱏⱀⱔⱅⱏ ⱍⰽ҃ⰰ. ⰺ҅ⰶⰵ ⰺ҅ⰿⰰⱅⱏ ⱆⱎⰻ ⱄⰾⱏⰹⱎⰰⱅⰻ ⰴⰰ ⱄⰾⱏⰹⱎⰻⱅⱏ.

Ⰺ҅ ⱁⱅⱏⱅⱆⰴⱆ ⰲⱏⱄⱅⰰⰲⱏ ⰺ҅ⰴⰵ. ⰲⱏ ⱂⱃⱑⰴⱑⰾⱏⰹ ⱅⸯⱆⱃ̑ⱐⱄⰽⱏⰹ. ⰺ҅ ⱄⰻⰴⱁⱀⱐⱄⰽⱏⰹ. ⰺ҅ ⰲⱐⱎⱐⰴⱏ ⰲⱏ ⰴⱁⰿⱏ. ⱀⰵ ⱈⱁⱅⱑⰰⱎⰵ ⰴⰰ ⰱⰻ ⰽⱏⱅⱁ ⱍⱓⰾⱏ. ⰺ҅ ⱀⰵ ⰿⱁⰶⰵ ⱆⱅⰰⰺ҅ⱅⰻ ⱄⱔ.

Ⱄⰾⱏⰹⱎⰰⰲⱏⱎⰻ ⰱⱁ ⰶⰵⱀⰰ ⱁ ⱀ̑ⰵⰿⱐ. ⰵⱗⰶⰵ ⰴⱏⱎⱅⰻ ⰺ҅ⰿⱑⰰⱎⰵ ⰴⱈ҃ⱏ ⱀⰵⱍⰻⱄⱅⱏ. ⱂⱃⰻⱎⱐⰴⱏⱎⰻ ⱂⱃⰻⱂⰰⰴⰵ ⰽⱏ ⱀⱁⰳⰰⰿⰰ ⰵⰳⱁ.

ⰶⰵⱀⰰ ⰶⰵ ⰱⱑ ⱂⱁⰳⰰⱀⱏⰹⱀ̑ⰻ. ⱄⱛⱃⱁⱇⱛⱀⰻⰽ̑ⰻⱄ̑ⱄⰰⱀⱏⰹⱀ̑ⰻ ⱃⱁⰴⱁⰿⱐ. ⰺ҅ ⰿⱁⰾ̑ⱑⰰⱎⰵ ⰻ. ⰴⰰ ⰺ҅ⰶⰴⰵⱀⰵⱅⱏ ⰱⱑⱄⱏ. ⰺ҅ⰸ ⰴⱏⱎⱅⰵⱃⰵ ⰵⱗ.

ⰻⱄ҃ ⰶⰵ ⱃⰵⱍⰵ ⰵⰻ. ⱁⱄⱅⰰⱀⰻ ⰴⰰ ⱂⱃⱐⰲⱑⰵ ⱀⰰⱄⱏⰹⱅⱔⱅⱏ ⱄⱔ ⱍⱔⰴⰰ. ⱀⱑⱄⱅⱏ ⰱⱁ ⰴⱁⰱⱃⱁ ⱁⱅⱔⱅⰻ ⱈⰾⱑⰱⰰ ⱍⱔⰴⱁⰿⱏ. ⰺ҅ ⱂⱐⱄⱁⰿⱏ ⱂⱁⰲⱃⱑⱎⱅⰻ.

ⱁⱀⰰ ⰶⰵ ⱁⱅⱏⰲⱑⱎⱅⰰⰲⱏⱎⰻ ⱃⰵⱍⰵ ⰵⰿⱆ. ⰵⰻ ⰳ҃ⰻ. ⰺ҅ⰱⱁ ⱂⱄⰻ ⱂⱁⰴⱏ ⱅⱃⰵⱂⰵⰸⱁⱙ. ⱑⰴⱔⱅⱏ ⱁⱅⱏ ⰽⱃⱆⱂⰻⱌⱐ ⰴⱑⱅⱐⱄⰽⱏ.

ⰺ҅ ⱃⰵⱍⰵ ⰵⰻ ⰸⰰ ⱄⰾⱁⰲⱁ ⱄⰵ. ⰺ҅ⰴⰻ. ⰺ҅ⰸⰻⰴⰵ ⰱⱑⱄⱏ ⰺ҅ⰸ ⰴⱏⱎⱅⰵⱃⰵ ⱅⰲⱁⰵⱗ.

ⰺ҅ ⱎⱐⰴⱏⱎⰻ ⰴⱁⰿⱁⰲⰻ. ⱁⰱⱃⱑⱅⰵ ⱁⱅⱃⱁⰽⱁⰲⰻⱌⱘ ⰾⰵⰶⱔⱎⱅⱘ. ⱀⰰ ⱁⰴⱃⱑ. ⰺ҅ ⰱⱑⱄⱏ ⰺ҅ⱎⱐⰴⱏⱎⱐ.

ⰺ҅ ⱂⰰⰽⱏⰹ ⰺ҅ⱎⱐⰴⱏ ⰻⱄ҃. ⱁⱅⱏ ⱂⱃⱑⰴⱑⰾⱏ ⱅⸯⱛⱃⸯⱄⰽⱏ. ⰺ҅ ⱄⰻⰴⱁⱀⱐⱄⰽⱏ. ⱂⱃⰻⰴⰵ ⰲⱏ ⰿⱁⱃⰵ ⰳⰰⰾⰻⰾⰵⰺ҅ⱄⰽⱁⰵ. ⰿⰵⰶⰴⱓ ⱂⱃⱑⰴⱑⰾⱏⰹ. ⰴⰵⰽⰰⱂⰵⰾⱐⱄⰽⱏⰹ.

ⰺ҅ ⱂⱃⰻⰲⰵⰴⱁⱎⱔ ⰽⱏ ⱀ̑ⰵⰿⱆ ⰳⰾⱆⱈⱏ ⰳⱘⰳⱏⱀⰻⰲⱏ. ⰺ҅ ⰿⱁⰾ̑ⱑⰰⱈⱘ ⰹ. ⰴⰰ ⰲⱏⰸⰾⱁⰶⰻⱅⱏ ⱀⰰ ⱀ̑ⱐ ⱃⱘⰽⱘ.

ⰺ҅ ⱂⱁⰺⰿⱏ ⰹ ⰵⰴⰻⱀⱏ ⱁⱅⱏ ⱀⰰⱃⱁⰴⰰ. ⰲⱏⰾⱁⰶⰻ ⱂⱃⱐⱄⱅⱏⰹ ⱄⰲⱁⱗ ⰲⱏ ⱆⱎⰻ ⰵⰳⱁ. ⰺ҅ ⱂⰾⰻⱀⱘⰲⱏ ⰽⱁⱄⱀⱘ ⰻ ⰲⱏ ⱗⰸⱏⰹⰽⱏ.

ⰺ҅ ⰲⱏⰸⱐⱃⱑⰲⱏ ⱀⰰ ⱀⰱ҃ⱁ ⰲⱏⰸⰴⱏⱈⱀⱘⰲⱏ. ⰺ҅ ⰳⰾ҃ⰰ ⰵⰿⱆ. ⰵⱇⸯⱇⰰⱅⰰ. ⰵⰶⰵ ⰵⱄⱅⱏ ⱃⰰⰸⰲⱃⱏⰸⰻ ⱄⱔ.

ⰺ҅ ⰰⰱⱐⰵ ⱃⰰⰸⰲⱃⱏⰸⱁⱄⱅⰵ ⱄⱔ ⱄⰾⱆⱈⰰ ⰵⰳⱁ. ⰺ҅ ⱃⰰⰸⰴⱃⱑⱎⰻ ⱄⱔ ⱘⰸⰰ ⱗⰸⱏⰹⰽⰰ ⰵⰳⱁ. ⰺ҅ ⰳⰾ҃ⰰⰰⱎⰵ ⱍⰻⱄⱅⱁ.

ⰺ҅ ⰸⰰⱂⱃⱑⱅⰻ ⰺ҅ⰿⱏ. ⰴⰰ ⱀⰻⰽⱁⰿⱆⰶⰵ ⱀⰵ ⱂⱁⰲⱑⰴⱔⱅⱏ. ⰵⰾⰻⰽⱁⰶⰵ ⰺ҅ⰿⱏ ⱅⱏ ⰸⰰⱂⱃⱑⱎⱅⰰⰰⱎⰵ. ⱁⱀⰻ ⱂⰰⱍⰵ ⰺⰸⰾⰻⱈⰰ ⱂⱃⱁⱂⱁⰲⱑⰴⰰⰰⱈⱘ.

ⰺ҅ ⱂⱃⱑⰺ҅ⰸⰾⰻⱈⰰ. ⰴⰻⰲⰾ̑ⱑⰰⱈⱘ ⱄⱔ ⰳⰾ̑ⱙⱎⱅⰵ. ⰴⱁⰱⱃⱑ ⰲⱐⱄⰵ ⱅⰲⱁⱃⰻⱅⱏ. ⰺ҅ ⰳⰾⱆⱈⱏⰹⱗ ⱅⰲⱁⱃⰻⱅⱏ ⱄⰾⱏⰹⱎⰰⱅⰻ. ⰺ҅ ⱀⱑⰿⱏⰹⱗ ⰳⰾ҃ⰰⱅⰻ.