ꙇ҅ въниде пакꙑ въ сънъмиште. Ꙇ бѣ тоу чк҃ъ соухѫ рѫкѫ ꙇ҅мꙑ.

ꙇ҅ назираахѫ і. аште въ сѫботѫ ꙇ҅цѣлитъ і. да на н̑ь !възглѭтъ.

ꙇ҅ гл҃а чк҃оу ꙇ҅мѫштоуемоу соухѫ рѫкѫ. стани посрѣдѣ.

ꙇ҅ гл҃и ꙇ҅мъ. достоꙇ҅ ли въ сѫботꙑ добро творити ли зъло творити. дш҃ѫ сп҃сти ли погоубити. они же мльчаахѫ.

възърѣвъ на н̑ѧ съ гнѣвомь. скръбѧ о окамен̑ениі сръдьца ꙇхъ. гл҃а чк҃оу простьри рѫкѫ твоѭ. ꙇ҅ простьрѣ. ꙇ҅ оутвръди сѧ рѫка его цѣла ѣкꙑ дроугаѣ.

Ꙇ҅ абье ꙇ҅шьдъше фарисѣи. съ іродиѣнꙑ. съвѣтъ сътварѣахѫ на н̑ь. како ꙇ҅ бѫ погоубили.

ꙇс҃ же отиде съ оученикꙑ своꙇ҅ми къ мор̑ю. ꙇ҅ многъ народъ отъ галилеѩ. по н̑емь ꙇ҅дошѧ. ꙇ҅ отъ ꙇ҅юдеѩ.

ꙇ҅ отъ ел҃ма. ꙇ҅ отъ ꙇдоумѣѩ. ꙇ҅ съ оного полоу ꙇ҅ордана. ꙇ҅ сѫштеі отъ тⸯоурѣ ꙇ҅ сидона. много мъножьство. слꙑшавъше елико сътварѣаше придошѧ къ н̑емоу.

ꙇ҅ рече оученикомъ своꙇ҅мъ. да естъ при н̑емь ладиіца народа ради. да не сътѫжаѭтъ емоу.

мъногꙑ бо ꙇ҅цѣли. ѣко нападаахѫ емь. хотѧште прикоснѫти сѧ емь. елико ꙇ҅мѣахѫ ранꙑ.

Ꙇ҅ егда видѣахѫ і дс҃и нечистиі. припадаахѫ къ н̑емоу. ꙇ҅ въпиѣхѫ гл̑ѭште. ѣко тꙑ еси х҃ъ сн҃ъ бж҃іи.

ꙇ҅ много прѣштааше ꙇ҅мъ. да авѣ творѧтъ его. ѣко вѣдѣахѫ х҃а самого сѫшта.

Ꙇ҅ вьзиде на горѫ ꙇ҅ призꙑва ѩже самъ въсхотѣ. ꙇ҅ идошѧ къ н̑емоу.

ꙇ҅ сътвори .бꙇ. да бѫдѫтъ съ н̑имь. ꙇ҅ посꙑлаетъ ѩ проповѣдати.

ꙇ҅ имѣти область. цѣлити недѫгꙑ. ꙇ҅ изгонити бѣсꙑ.

ꙇ҅ нарече ꙇ҅мѧ симоноу петръ.

ꙇ҅ ѣкова зеведеова. ꙇ҅ ианⸯна братра ꙇѣковл̑ѣ. ꙇ҅ нарече ꙇ҅ма ꙇ҅менѣ. вооанирђиси. еже естъ сн҃а громова.

ꙇ҅ андрѣѫ ꙇ҅ филипа. ꙇ҅ варⸯтоломеа. ꙇ҅ матⸯтеа мꙑтар̑ѣ. ꙇ҅ тⸯомѫ. ꙇ҅ икова. алфеова. ꙇ҅ тадеа. ꙇ҅ симона. кананѣа.

ꙇ҅ юдѫ ꙇ҅скариотьскааго. ꙇ҅же і прѣдастъ.

ꙇ҅ придошѧ въ домъ. ꙇ҅ събърашѧ сѧ пакꙑ народи. ѣко не мошти ꙇмъ ни хлѣба сънѣсти.

ꙇ҅ слꙑшавъше ꙇ҅же бѣахѫ оу н̑его. ꙇ҅зидѫ ѩти і. гл҃аахѫ бо ѣко неꙇ҅стовъ естъ.

ꙇ҅ кънижьници низъшьдъше отъ ꙇ҅ел҃ма гл҃аахѫ. ѣко вельзѣоулъ ꙇматъ. ꙇ҅ ѣко о кънѧзи бѣсъ. ꙇ҅згонитъ бѣсꙑ.

ꙇ҅ призъвавъ ѩ. въ притъчахъ гл҃ааше ꙇ҅мъ. како можетъ сотона сотонѫ ꙇ҅згънати.

ꙇ҅ аште цр҃со на сѧ раздѣлитъ сѧ. не можетъ стати црьс҃тво то.

ꙇ҅ аште домъ на сѧ раздѣлитъ сѧ. не можетъ стати домъ тъ.

ꙇ҅ аште сотона самъ въста на сѧ. ꙇ҅ раздѣли сѧ. не можетъ стати. нъ коньчинѫ ꙇ҅матъ.

никътоже не можетъ съсѫдъ крѣпъкаего. въшьдъ въ домъ его. расхꙑтити. аште не прьвѣе крѣпъкаего съвѧжетъ. ꙇ҅ тъгда домъ его расхꙑтитъ.

аминⸯ гл҃ѭ вамъ. ѣко всѣ отъпоустѧтъ сѧ сн҃омъ чс҃комъ. съгрѣшениѣ. ꙇ҅ власмиѩ. елико аште власвимисаѭтъ.

а ꙇ҅же аште власвимисаетъ на ст҃ъꙇ дх҃ъ. не ꙇ҅матъ отъпоуштениѣ въ вѣкꙑ. повиннъ вьсе бꙑваетъ.