Ꙇ҅ абье на оутрьѣ. съвѣтъ створишѧ архⸯиереі. съ старⸯци ꙇ҅ кънижьникꙑ. ꙇ҅ вьсь сънъмъ. съвѧзавъше ꙇ҅с҃а ведошѧ. ꙇ҅ прѣдашѧ і пилатови.

Ꙇ҅ въпроси і пилатъ. тꙑ ли еси цр҃ь ꙇ҅юдеꙇ҅скъ. онъ же отъвѣштавъ рече емоу. тꙑ гл҃еши.

ꙇ҅ гл҃аахѫ на н̑ь архиерѣі много. онъ же ничьсоже не отъвѣштавааше.

Пилатъ же пакꙑ въпрашааше і гл҃ѧ. не отъвѣштаваеши ли ничьсоже. виждь колико на тѧ съвѣдѣтел̑ьствоуѭтъ.

ꙇ҅с҃ же къ н̑емоу ничьсоже не отъвѣшта. ѣко дивити сѧ пилатови.

На всѣкъ же праздьникъ. отъпоуштааше ꙇ҅мъ. единого съвѧзьн̑ѣ егоже прошаахѫ.

Бѣ же нарицаемъꙇ вараава. съ своіми ковьникꙑ съвѧзанъ. ꙇ҅же въ горѣ оубьіства створишѧ.

ꙇ҅ възъпивъ народъ. начѧ просити. ѣкоже творѣаше ꙇ҅мъ.

Пилатъ же отъвѣшта ꙇ҅мъ гл҃ѧ. хоштете ли да отъпоуштѫ вамъ цр҃ѣ ꙇ҅юдеꙇ҅ска.

вѣдѣаше бо ѣко зависти ради прѣдашѧ і а!рхⸯиереі.

архⸯиереі же поманѫшѧ народоу. да паче вараавѫ отъпоуститъ ꙇмъ.

Пилатъ же отъвѣштавъ. пакꙑ рече чьто оубо хоштете створ̑ѭ. егоже гл҃ете цр҃ѣ ꙇ҅юдеꙇ҅ска.

они же паче възъпишѧ пропьни и.

пилатъ же гл҃а ꙇ҅мъ. чьто оубо створи зъло. они же лише възъпишѧ пропьни і.

Пилатъ же хотѧ народоу похоть сътворити. поусти ꙇ҅мъ вараавѫ. ꙇ҅ прѣдастъ ис҃а тепъ. да і распънѫтъ.

Воꙇни же ведошѧ і вънѫтрь на дворъ. еже естъ прѣторъ. ꙇ҅ призъвашѧ вьсѫ спирѫ.

ꙇ҅ облѣшѧ і въ прапрѫдѫ. ꙇ҅ възложишѧ на н̑ь. съплетъше. трьновъ вѣньць.

ꙇ҅ начѧсѧ цѣловати і. радоуі сѧ !црю ꙇ҅юдѣꙇ҅скъ.

ꙇ҅ бь̆ѣахѫ трьстьѭ по главѣ. ꙇ҅ пльваахѫ на н̑ь. ꙇ҅ прѣгꙑбаѭште колѣна. поклан̑ѣахѫ емоу.

Ꙇ҅ егда порѫгашѧ сѧ емоу. съвлѣшѧ съ н̑его прапрѫдъ. ꙇ҅ облѣшѧ и вь ризꙑ своѩ. ꙇ҅ изведошѧ і да і пропьнѫтъ.

Ꙇ҅ задѣшѧ мимоходѧштю. етероу симоноу. к̑ѵрѣниноу грѧдѫштю съ села. !оцю алекⸯсанⸯдровоу. ꙇ҅ р[оу]фовоу. да възъметъ кръстъ его.

Ꙇ приведошѧ і на мѣсто ђелъђота. еже естъ съказаемо краниево мѣсто.

Ꙇ҅ даѣхѫ емоу. питі оцьтъно вино. онъ же не приѩтъ.

Ꙇ҅ пропьнъше і. раздѣльше ризꙑ его меташѧ жрѣбьѩ о н̑ѧ. къто чьто вьзъметъ.

Бѣ же година трьтьѣ. ꙇ҅ пропѧшѧ і.

ꙇ҅ бѣ насⸯпанье винꙑ его напⸯсано. цр҃ь ꙇ҅юдеꙇ҅скъ.

Ꙇ҅ съ н̑имь распѧшѧ два разбоꙇ҅ника. единого о деснѫѭ. а дроугааго о шюѭ его.

Ꙇ҅ събꙑстъ сѧ пⸯсаное еже гл҃етъ. Ꙇ съ безаконникома причьтенъ бꙑ!с.

ꙇ҅ мимоходѧштеи хоул̑ѣахѫ і. покꙑваѭште главами своꙇ҅ми. ꙇ҅ гл̑ѭште оувⸯва. разарѣѩі цръкъве ꙇ҅ трьми дьньми съзидаѩ.

!съпси сѧ самъ. ꙇ҅ съниди съ !крста.

Такожде ꙇ҅ арⸯхиерѣі рѫгаахѫ сѧ. съ кънижьникꙑ. дроугъ дроугоу гл҃аахѫ. ꙇ҅нꙑ сп҃е. али себе не можетъ съпасти.

х҃ъ цр҃ь !ꙇ҅левъ. да сънидетъ нꙑн̑ѣ съ !крста. да видимъ ꙇ҅ вѣрѫ ꙇ҅мемъ. !ко!ц: - Ꙇ҅ пропѧтаѣ съ н̑имь. поношаашете емоу.

Бꙑвъши же годинѣ шестѣі. тъма бꙑ!с по вьсеі земл̑и. до девѧтꙑѩ годинꙑ.

Ꙇ҅ въ девѧтѫѭ же годинѫ вьзъпи ис҃. гласомь вельемь гл҃ѧ. елоі елоі. лима завахътани. еже естъ съказаемо. бж҃е мои. бж҃е мои въскѫѭ мѧ остави.

Ꙇ҅ етериі отъ стоѩштиіхъ. слꙑшавъше гл҃аахѫ. виждь. ꙇ҅лиѭ глашаетъ.

Текъ же единъ. ꙇ҅ исплън̑ь гѫбѫ оцьта. вьзньзъ на трьсть. напаѣаше і гл҃ѧ. не дѣꙇ҅те да видимъ. аште придетъ ꙇ҅лиѣ. сънѧтъ его.

!Ис же поушть гласъ вельі. ꙇ҅здъше.

ꙇ҅ опона цр҃къвънаа раздъра сѧ на дъвое. съ вꙑше до ниже.

Видѣвъ же сътьникъ стоѩі прѣмо емоу. ѣко тако възъпивъ ꙇ҅здъше. рече. Въ ꙇстинѫ чк҃ъ сь. сн҃ъ бж҃ьі бѣ.

Бѣахѫ же женꙑ ꙇ҅здалече зьрѧштѧ вь н̑ихъ же бѣ мариѣ магдалꙑн̑и. ꙇ҅ мариѣ ꙇ҅ѣкова малааго. ꙇ҅ мати ꙇосиова. ꙇ҅ саломи.

ѩже егда бѣ въ галилеі. по н̑емь хождаахѫ ꙇ҅ слоужаахѫ емоу. ꙇ҅ инꙑ многꙑ. въшьдъшѧѩ съ н̑имь въ !ерлмъ.

!зач. Ꙇ҅ юже поздѣ бꙑвъшю. пон̑еже бѣ параск̑евьђиⸯі. еже естъ къ сѫботѣ.

приде ꙇ҅осифъ отъ ариматⸯеѩ. благо̆образьнъ съвѣтьникъ. ꙇ҅же ꙇ҅ тъ бѣ чаѩ цр҃сиѣ бж҃ьѣ. ꙇ҅ дръзнѫвъ вьниде къ пилатоу. ꙇ҅ п!роси тѣла ꙇс҃ва.

пилатъ же диві сѧ. аште оуже оумрѣтъ. ꙇ҅ призъвавъ сътьника. въпроси і аште оумрѣтъ.

ꙇ҅ оувѣдѣвъ отъ к̑енътоуриона. дастъ тѣло ꙇ҅осифови.

Ꙇ҅ коупл̑ь пон̑ѣвицѫ. ꙇ҅ съньмъ обитъ і въ пон̑ѣвицѫ. ꙇ҅ въложи і въ гробъ. ꙇ҅же бѣ ꙇ҅сѣченъ въ камене. ꙇ҅ привали камень на двьри гроба.

Мариѣ же магдалꙑн̑и. ꙇ҅ мариѣ ꙇ҅осиова. зьрѣашете къде і полагаахѫ. !ко!ц.