Бѣ же пасха ꙇ҅ опрѣснъци. по дъвою дьноу. ꙇ҅ искаахѫ арⸯхⸯиереи ꙇ҅ кънижьници. како і льстиѭ емъше оубиѭтъ.

гл҃аахѫ же нъ не праздьникъ. еда како мл̑ьва бѫдетъ въ л̑юдьхъ.

Ꙇ҅ сѫштю емоу въ витⸯаниі. въ домоу симона прокаженааго. вьзлежѧштю емоу. приде жена. ꙇ҅мѫшти алавѣстръ хризмꙑ. нарⸯдьнꙑ пистик̑иі драгꙑ. ꙇ҅ съкроушьши алавѣстръ. вьзльѣ емоу на главѫ.

бѣахѫ же етеріи негодоуѭште. вь себѣ. ꙇ҅ гл҃ѭште. вь чемь гꙑбѣль си хризмънаѣ бꙑ!с.

можааше бо си хризма продана бꙑти. вѧште триі сътъ пѣнѧзь. ꙇ҅ дати сѧ ништиімъ. ꙇ҅ прѣштаахѫ еі.

ꙇ҅с҃ же рече останѣте еѩ. по чьто ѭ троуждаете. добро бо дѣло съдѣла о мнѣ.

Вьсегда бо ништѧѩ ꙇ҅мате съ собоѭ. ꙇ҅ егда хоштете. можете добро творити ꙇ҅мъ. а мене не вьсегда ꙇ҅мате.

ꙇ҅ еже ꙇ҅мѣ си сътвори. варила естъ похризмити тѣло мое на погребение.

аминⸯ гл҃ѭ вамъ. ꙇ҅деже колижьдо проповѣдано бѫдетъ !̆евађлие се въ вьсемь мирѣ. ꙇ҅ еже сътвори си. гл҃ано бѫдетъ въ !пть еѩ.

Ꙇ҅ июда ꙇ҅скар отьскꙑ. единъ отъ обою на десѧте. ꙇ҅де къ архиереомъ. да ꙇ прѣдастъ ꙇ҅мъ.

они же слꙑшавъше. въздрадовашѧ сѧ. ꙇ҅ обѣшташѧ сѧ емоу съребрьникꙑ дати. ꙇ҅ искааше како і въ подобьно врѣмѧ прѣдастъ.

Ꙇ въ прьвꙑ дⸯнь опрѣснъкъ. егда пасхѫ жьрѣахѫ. гл҃ашѧ емоу оученици своі. къде хоштеши. шьдъше оуготоваемъ ти да ѣси пасха.

ꙇ҅ посъла дъва отъ оученикъ своꙇ҅хъ. ꙇ҅ гл҃а ꙇ҅ма. ꙇ҅дѣта въ градъ. ꙇ҅ сърѧштетъ вꙑ чк҃ъ. въ скѫдольницѣ водѫ несꙙ. по н̑емь ꙇ҅дѣта.

ꙇ҅ идеже аште вьнидетъ. рьцѣта гн҃оу домоу. оучител̑ь гл҃етъ. къде естъ обитѣл̑ь. ꙇ҅деже пасхѫ съ оученикꙑ моꙇ҅ми сънѣмь.

ꙇ҅ тъ вама покажетъ горьницѫ вꙑсокѫ. постъланѫ готовѫ. тоу оуготоваꙇ҅та намъ.

ꙇ҅ изидосте оученика. ꙇ҅ придосте въ градъ. ꙇ҅ обрѣтосте ѣкоже рече ꙇ҅ма. ꙇ҅ оуготовасте пасхѫ.

Ꙇ҅ вечероу бꙑвъшю. приде съ обѣма на десѧте.

ꙇ҅ вьзлежѧштемъ ꙇ҅мъ ꙇ҅ ѣдѫштемъ. рече ис҃. аминⸯ. гл҃ѭ вамъ. ѣко единъ отъ васъ прѣдастъ мѧ. ѣдꙑ съ мноѭ.

Ѡни же начѧшѧ скръбѣти ꙇ҅ гл҃ати емоу. единъ по единомоу. еда азъ. ꙇ҅ дроугꙑ еда азъ.

*̆ѡнъ же отъвѣштавъ рече ꙇ҅мъ. единъ отъ обою на десѧте. омочьі съ мъноѭ въ солило

сн҃ъ же чс҃къꙇ ꙇ҅детъ ѣкоже естъ пⸯсано о н̑емь. Горе же чк҃оу томоу. ꙇ҅мьже сн҃ъ чс҃кꙑ прѣдаетъ сѧ. добрѣе емоу би бꙑло. аште не би родилъ сѧ чк҃ъ тъ.

Ꙇ҅ ѣдѫштемъ ꙇ҅мъ. приімъ ис҃ хлѣбъ. ꙇ҅ хвалѫ въздавъ. !блгсвешть прѣломи. ꙇ҅ дастъ ꙇ҅мъ. ꙇ҅ рече приімѣте се естъ тѣло мое.

Ꙇ҅ приімъ чашѫ хвалѫ въздавъ. дастъ ꙇ҅мъ. ꙇ҅ пишѧ отъ н̑еѩ вси.

ꙇ҅ рече ꙇ҅мъ се естъ кръвь моѣ. новаго завѣта. проливаемаѣ за многꙑ.

*̆аминⸯ. гл̑ѭ вамъ. ѣко оуже не ꙇ҅мамь пити отъ плода лозънааго. до того дьне. егда пьѭ ꙇ҅ новь цр҃сьи бж҃іи.

Ꙇ҅ въспѣвъше ꙇ҅зидѫ. въ горѫ елеоньскѫѭ.

Ꙇ҅ гл҃а ꙇ҅мъ ис҃. ѣко вьси съблазните сѧ о мнѣ. въ сьѭ ношть. Пⸯсано бо естъ. поражѫ пастꙑр̑ѣ. ꙇ҅ овьцѧ разбѣгнѫтъ сѧ.

нъ по томь егда въскръснѫ. вар̑ѭ вꙑ въ галилеі.

Петръ же рече емоу. ꙇ҅ аште ꙇ҅ вьси съблазнѧтъ сѧ нъ не азъ.

ꙇ҅ гл҃а емоу ис҃. аминⸯ. гл̑ѭ ти. ѣко тꙑ дьньсь въ сиѭ ношть. прѣжде даже въторицеѭ. коуръ не възгласитъ. три кратꙑ отъвръжеши сѧ мене.

Петръ же ꙇ҅злиха гл҃ааше паче. аште ми сѧ лоучитъ оумрѣти съ тобоѭ. не отъвръгѫ сѧ тебе. такожде ꙇ҅ вси гл҃аахѫ.

Ꙇ҅ придошѧ вь вьсь ђенⸯсимани. Ꙇ҅ гл҃а оученикомъ своꙇ҅мъ. сѧдѣте сьде. доньдеже шьдъ помол̑ѭ сѧ.

ꙇ҅ поѩтъ. петра. ꙇ҅ ѣкова. ꙇ҅ иоанⸯна. съ собоѭ. ꙇ҅ начѧтъ оужасати сѧ ꙇ҅ тѫжити.

Ꙇ҅ гл҃а ꙇ҅мъ. прискръбъна естъ дш҃а моѣ до съмръти. пожидѣте сьде ꙇ҅ бьдите.

Ꙇ҅ п!рѣшьдъ мало паде на земл̑и. ꙇ҅ мол̑ѣаше сѧ. да аште възможьно естъ. мимоꙇ҅ти отъ н̑его чѣсъ.

Ꙇ҅ гл҃а авⸯва оц҃ь. вьсѣ възможьна тебѣ сѫтъ. мимонести чашѫ сьѭ отъ мене. нъ не ѣко азъ хоштѫ. нъ еже тꙑ.

Ꙇ҅ приде ꙇ҅ обрѣте ѩ съпѧштѧ. ꙇ҅ гл҃а петрови. симоне съпиши ли. не възможе единого часа побьдѣти.

Бьдите ꙇ҅ молите сѧ. да не вьнидете въ напасть. дх҃ъ бо бьдръ а плъть немоштьна.

Ꙇ҅ пакꙑ шьдъ. помоли сѧ тожде слово рекъ.

ꙇ҅ възврашть сѧ. обрѣте ѩ пакꙑ съпѧштѧ. бѣашете бо ꙇ҅мъ очи тѧготьнѣ. ꙇ҅ не оумѣахѫ чьто бишѧ отъвѣштали емоу.

Ꙇ҅ приде третиіцеѭ. ꙇ҅ гл҃а ꙇ҅мъ. съпите прочее почиваꙇ҅те. приспѣ коньчина. приде часъ. се прѣдаетъ сѧ сн҃ъ чс҃къꙇ. въ рѫцѣ грѣшьникомъ.

въстанѣте ꙇ҅дѣмъ. се прѣдаѩі мѧ приближи сѧ.

Ꙇ҅ абье еште емоу гл̑ѭштю. приде ꙇ҅юда ꙇ҅скар отьскꙑ. единъ отъ обою на десѧте. ꙇ҅ съ н̑имь народи съ орѫжиі. ꙇ҅ дрьколⸯми. отъ архⸯиерѣи. ꙇ҅ кънижьникъ. ꙇ҅ старⸯць.

Дастъ же прѣдаѩі его знаменье ꙇ҅мъ гл҃ѧ. егоже аште лобъжѫ ꙇ҅мѣте и то естъ. ꙇ҅ ведѣте і съхраньно.

ꙇ҅ пришьдъ абье пристѫпь къ н̑емоу гл҃а. рабби рабби. ꙇ҅ облобꙑза і.

Ѡни же възложишѧ рѫцѣ на н̑ь ꙇ҅ ѩшѧ і.

единъ же отъ стоѩштиіхъ. ꙇ҅звлькъ ножь. оудари раба архⸯиереова. ꙇ҅ оурѣза емоу оухо.

ꙇ҅ отъвѣштавъ ис҃ рече ꙇ҅мъ. ѣко на разбоꙇ҅ника ли ꙇ҅зидосте. съ орѫжьіми ꙇ҅ дрькол̑ьми. ѩти мене.

по всѧ дьни бѣхъ въ васъ. оучѧ въ цръкъве ꙇ҅ не ѩсте мене. Нъ да събѫдѫтъ сѧ кънигꙑ.

ꙇ҅ оставьше і бѣжашѧ.

ꙇ҅ единъ етеръ юноша по н̑емь ꙇ҅де. одѣнъ въ пон̑ѣвицѫ нагъ. ꙇ҅ ѩшѧ ꙇ҅ юношѫ.

онъ же оставь пон̑ѣвицѫ. нагъ бѣжа оть н̑ихъ.

ꙇ҅ ведошѧ ис҃а къ архⸯиереоу каꙇфѣ. ꙇ҅ сънидѫ сѧ къ н̑емоу вси архⸯиереі. ꙇ҅ старьци. ꙇ҅ кън̑ижьници.

Ꙇ҅ петръ ꙇ҅дѣаше ꙇ҅здалече вь слѣдъ его. до вънѫтрь въ дворъ архиереовъ. ꙇ҅ бѣ сѣдѧ съ слоугами. ꙇ҅ грѣѩ сѧ при свѣшти.

*̆архⸯиереꙇ҅ же ꙇ҅ вьсь съньмъ. ꙇ҅скаахѫ на ꙇс҃а. съвѣдѣтел̑ьства да і оубьѭтъ. ꙇ҅ не обрѣтаахѫ.

мнози бо лъжи съвѣдѣтел̑ьствоваахѫ на н̑ь. ꙇ҅ не бѣахѫ равъна съвѣдѣтел̑ьствьѣ.

Ꙇ҅ етериі въставъше. лъжѫ съвѣдѣтельствоваахѫ на н̑ь гл̑ѭште.

ѣко мꙑ слꙑшахомъ ꙇ гл҃ѭшть. ѣко азъ разор̑ѭ цръковь сиѭ рѫкотворенѫѭ. ꙇ҅ трьми дьнꙑ. ꙇ҅но нерѫкотворенѫ съзиждѫ.

тако же не бѣ равъно съвѣдѣтел̑ьство ꙇ҅хъ.

ꙇ҅ ставъ арⸯхиереи посрѣдѣ. въпроси ꙇс҃а гл҃ѧ. не отъвѣштаваеши ли ничьсоже. чьто сиі на тѧ съвѣдѣтел̑ьствоуѭтъ.

ꙇ҅с же мльчааше. ꙇ҅ ничьсоже не отъвѣштавааше. Пакꙑ архиереі въпроси і. гл҃ѧ емоу. тꙑ ли еси х҃ъ сн҃ъ !блгвенааго.

ꙇс҃ же рече азъ есмь. Ꙇ҅ оузьрите сн҃а чс҃каго. о деснѫѭ сѣдѧшта силꙑ. ꙇ҅ грѧдѫшта. съ облакꙑ неб҃скъꙇ҅ми.

*̆архⸯиереі же растръзавъ ризꙑ своѩ гл҃а. чьто еште трѣбоуемъ съвѣдѣтел̑ьства.

слꙑшасте власвимиѭ. чьто вамъ сѧ авл̑ѣетъ. Ѡни же вси осѫдишѧ і. повиньноу бꙑти съмръти.

ꙇ҅ начѧшѧ етериі пл̑ьвати на н̑ь. ꙇ҅ прикрꙑвати лице его. ꙇ҅ мѫчити і. ꙇ҅ гл҃ати емоу. прорьци намъ !хе къто естъ оударивꙑ тѧ. ꙇ҅ слоугꙑ бьѭште і за ланитѫ. приѩшѧ і.

Ꙇ҅ сѫштю петрови низоу на дворѣ. приде едина отъ рабꙑн̑ь арⸯхⸯиереовъ.

ꙇ҅ видѣвъши петра грѣѭшта сѧ. възьрѣвъши на н̑ь ̑гл҃а. Ꙇ҅ тꙑ съ назарѣаниномь ꙇ҅с҃мь бѣ.

Онъ же отъвръже сѧ гл҃ѧ не оумѣѭ ни съвѣмь. чьто тꙑ гл҃еши. ꙇ҅ изиде вънъ на прѣдъдворие. ꙇ҅ коуръ въспѣтъ.

ꙇ҅ видѣвъши і пакꙑ ꙇ҅на рабꙑн̑и. начѧтъ гл҃ати къ стоѩштиімъ. ѣко сь отъ н̑ихъ естъ.

онъ же пакꙑ отъмѣтааше сѧ. ꙇ҅ не по многоу пакꙑ стоѩштеі. гл҃аахѫ петрови. въ ꙇ҅стинѫ отъ н̑ихъ еси. ꙇ҅бо галилеанинъ еси. ꙇ҅ бесѣда твоѣ подобитъ ти сѧ.

*̆ѡнъ же начѧтъ ротити сѧ ꙇ҅ клѧти сѧ. ѣко не вѣмь чк҃а сего. еже гл҃ете.

[ꙇ҅ вътори] ꙇ҅ въторицеѭ коуръ въспѣтъ. ꙇ҅ помѣнѫ петръ гл҃ъ. ѣкоже рече емоу ис҃. прѣжде даже коуръ не възгласитъ. дъва кратꙑ отъвръжеши сѧ мене. три кратꙑ. ꙇ҅ начьнъ плакааше сѧ.