Съзъвавъ же оба на десѧте. дастъ ꙇ҅мъ силѫ ꙇ҅ власть. на всѣхъ бѣсѣхъ. ꙇ҅ недѫгꙑ цѣлити.

ꙇ҅ посъла ѩ проповѣдати цр҃ствие бж҃ье. ꙇ҅ ицѣлити болѧштѧѩ.

ꙇ рече къ н̑имъ. ничьсоже не възезм̑ѣте на пѫть. ни жьзла. ни пирꙑ. ни хлѣба. ни съребра. ни дъвою ризоу ꙇ҅мѣти.

ꙇ҅ въ н̑ьже домъ вьнидете. тоу прѣбꙑваіте. ꙇ҅ отътѫдоу ꙇ҅сходите.

Ꙇ҅ елико не приемл̑ѭтъ васъ. ꙇ҅сходѧште отъ града того. прахъ отъ ногъ вашихъ отътрѧсѣте. въ съвѣдѣние на н̑ѧ.

Ꙇ҅сходѧште же прохождаахѫ сквозѣ вси. благовѣстоуѭште въсѫдоу.

Слꙑша же ꙇ҅родъ четврътовластьць. бꙑваѭштаа отъ н̑его вⸯсѣ. ꙇ҅ не домꙑшл̑ѣаше сѧ. зан̑е гл҃емо бѣ отъ етеръ. ѣко ꙇ҅оанъ. въста отъ мрътвꙑхъ.

отъ ꙇ҅нѣхъ же ѣко ꙇ҅лиѣ ави сѧ. отъ дроугꙑхъ же. ѣко пророкъ. нѣкꙑ отъ древльнихъ въскръсе.

ꙇ҅ рече ꙇ҅родъ. ꙇ҅оанна азъ оусѣкнѫхъ. къто же естъ сь. о н̑емьже азъ слꙑшѫ таковаѣ. ꙇ҅ искааше видѣти і.

Ꙇ҅ възвраштьше сѧ !̆аполи. повѣдашѧ емоу ели сътворишѧ. Ꙇ поꙇ҅мъ ѩ отиде единъ. на мѣсто поусто. града нарицаемаго видъсаꙇ҅да.

народи же разоумѣвъше по н̑емь ꙇ҅дѫ. ꙇ҅ приꙇ҅мъ ѩ гл҃ааше ꙇ҅мъ. о цр҃стви бж҃и. ꙇ҅ трѣбоуѭштѧѩ. ꙇ҅цѣл̑еньѣ цѣл̑ьше.

Дьнь же начѧтъ прѣклан̑ѣти сѧ. пристѫпл̑ьша же оба на десѩте. рѣсте емоу. отъпоусти народꙑ. да ошьдъше въ окръстън̑ѧѩ вси. ꙇ҅ села витаѭтъ. ꙇ҅ обрѧштѫтъ брашьно. ѣко сьде на поустѣ мѣстѣ есмъ.

рече же къ н̑имъ. дадите ꙇ҅мъ вꙑ ѣсти. они же рѣшѧ. не ꙇ҅мамъ сьде. вѧште пѧти хлѣбъ. ꙇ҅ рꙑбоу дъвою. аште оубо не мꙑ шьдъше въ всѧ л̑юди сьѩ коупимъ брашьна.

бѣаше бо мѫжь. ѣко пѧть тꙑсѫшть. рече же къ оученикомъ своꙇ҅мъ. посадите ѩ на сподꙑ. по пѧти десѧтъ.

ꙇ҅ сътворишѧ тако ꙇ҅ посадишѧ всѧ.

примъ же пѧть хлѣбъ. ꙇ҅ обѣ рꙑбѣ. възьрѣвъ на нб҃о бг҃ви ѩ. ꙇ҅ съломи. ꙇ҅ даѣше оученикомъ своꙇ҅мъ. прѣдъложити народоу.

ꙇ҅ ѣшѧ ꙇ҅ насꙑтишѧ сѧ вси. ꙇ҅ възѧшѧ ꙇ҅збꙑвъшѧѩ ꙇ҅мъ. оукроухъ. коша дъва на десѧте.

Ꙇ҅ бꙑстъ. егда мол̑ѣаше сѧ единъ. съ н̑имь бѣахѫ оученици его. ꙇ҅ въпроси ѩ гл҃ѧ. кого мѧ непьштюѭтъ народи бꙑти.

они же отъвѣштавъше рѣшѧ ꙇ҅оанна крьстител̑ѣ. ꙇ҅ни же ꙇ҅лиѭ. ови же ѣко !про!ркъ етеръ. древл̑ьниіхъ въскръсе.

рече же ꙇ҅мъ. вꙑ же кого мѧ гл҃ете бꙑти. отъвѣштавъ же петръ рече. х҃а бж҃ьѣ.

Ѡнъ же запрѣшть ꙇ҅мъ. повелѣ никомоуже не гл҃ати. сего

рекъ. ѣко подобаатъ сн҃оу чс҃коумоу много пострадати. ꙇ҅ искоушеноу бꙑти. отъ старць ꙇ҅ архиереі. ꙇ҅ кънижьникъ. ꙇ҅ оубьеноу бꙑти. ꙇ҅ третиі дьнь въскръснѫти.

гл҃ааше всѣмъ. аште къто хоштетъ по мнѣ ꙇ҅ти да отъвръжетъ сѧ себе. ꙇ҅ да възъметъ !крстъ своі. по всѧ дни. ꙇ҅ ходитъ по мнѣ

ꙇ҅же бо аште хоштетъ дш҃ѫ своѭ съпасти погоубитъ ѭ. ꙇ҅же аште хоштетъ погоубитъ дш҃ѫ своѭ. мене ради. тъ сп҃етъ ѭ.

каѣ польза чк҃оу. аште приобрѧштетъ вьсь миръ. а себе погоубитъ. ли отъштетитъ.

ꙇ҅же бо аште постꙑдитъ сѧ мене. ꙇ҅ моꙇхъ словесъ. сего сн҃ъ чс҃кꙑ постꙑдитъ сѧ. егда придетъ въ славѣ своеі. ꙇ҅ !отьчи. ꙇ҅ ст҃ъꙇхъ ађ҃лъ.

!Глѭ же вамъ. въ ꙇстинѫ сѫтъ етери. отъ стоѩштихъ сьде. ꙇ҅же не ꙇ҅мѫтъ въкоусити съмръти. доньдеже оузьрѧтъ цр҃стве бж҃ье.

Бꙑстъ же по словесехъ сихъ. ѣко дьниі осмь. ꙇ҅ поꙇ҅мъ петра. ꙇ҅ оанⸯна. ꙇ҅ иѣкова. вьзиде на горѫ помолитъ сѧ.

ꙇ҅ бꙑ!с егда мол̑ѣаше сѧ. видѣнье лица его ꙇ҅но. ꙇ҅ одѣанье его бѣло блисцаѩ сѧ.

ꙇ҅ се мѫжа дъва съ н̑имь гл̑ѭшта. ѣко бѣсте. мѵ҅си. ꙇ҅ илиѣ.

авьша сѧ въ славѣ. гл҃ааше же ꙇ҅сходъ его. ꙇ҅же хотѣаше съконьчати [сѧ] въ !ꙇ҅лмѣ.

петръ же ꙇ сѫштаа съ н̑имь. бѣахѫ отѧгъчени сънъмь. оубоуждьше же сѧ видѣшѧ славѫ его. ꙇ҅ оба мѫжа стоѩшта съ н̑имь.

ꙇ҅ бꙑстъ егда разлѫчаашете сѧ отъ н̑его. рече петръ къ ꙇс҃ви. наставьниче. добро естъ намъ сьде бꙑти. ꙇ҅ сътворимъ скиниѩ трі. тебѣ единѫ. ꙇ҅ единѫ мосѣови. ꙇ҅ единѫ ꙇ҅лиі. не вѣдꙑ же гл҃ааше.

Се же емоу гл҃ѭштю. бꙑстъ облакъ ꙇ҅ осѣни ѩ. оубоѣшѧ же сѧ. въшьдъшемъ же ꙇ҅мъ въ облакъ.

ꙇ҅ гласъ бꙑ!с ꙇ҅зо облака гл҃ѧ. сь естъ сн҃ъ мои възл̑юбл̑енъꙇ. того послоушаꙇ҅те.

ꙇ҅ егда бꙑстъ гл҃а!с. обрѣте сѧ ис҃. единъ. ꙇ҅ ти оумльчашѧ. ꙇ҅ никомоуже не възвѣстишѧ въ тꙑ дни ничьсоже о тѣхъ ѣже видѣшѧ.

Бꙑстъ же въ прочи дⸯнь. съшедъшемъ ꙇ҅мъ съ горꙑ. сърѣте і народъ многъ.

ꙇ҅ се мѫжь ꙇ҅з народа възъпи гл̑ѧ. оучител̑ю мол̑ѭ ти сѧ. призьри на сн҃ъ моі. ѣко единочѧдъ ми естъ.

ꙇ҅ се дх҃ъ емл̑етъ і. ꙇ҅ вьнезапѫ въпиетъ. ꙇ҅ прѫжаатъ сѧ съ пѣнами. ꙇ҅ едъва оходитъ отъ н̑его съкроушаѩ і.

ꙇ҅ молихъ сѧ оученикомъ твоꙇмъ. да ꙇжденѫтъ і. ꙇ҅ не възмогѫ.

ѡтъвѣштавъ же ис҃. рече емоу. ѡ роде невѣрⸯнъ. ꙇ҅ развраштенъ. доколѣ бѫдѫ въ васъ. ꙇ҅ тръпл̑ѭ вꙑ. приведи сн҃ъ твоі сѣмо.

еште же грѧдоуштю емоу повръже і бѣсъ. ꙇ҅ сътрѧсе. запрѣти же ис҃ дх҃ви нечистоумоу. дш҃е нечистꙑ. ꙇ҅зиди отъ отрока. ꙇ҅ ицѣли отрока. ꙇ҅ въдастъ і оц҃ю его.

дивл̑ѣахѫ же сѧ вси о величиі бж҃іи. Вⸯсѣмъ же чюдѧштемъ сѧ. о всѣхъ ѣже твор̑ѣаше ис҃. рече оученикомъ своꙇмъ.

въложите вꙑ въ оуши ваши словеса си. сн҃ъ бо чс҃кꙑ ꙇ҅матъ прѣдати сѧ. въ рѫцѣ !чсцѣ.

они же не разоумѣшѧ гл҃а сего. бѣ бо прикръвенъ отъ н̑ихъ. да не оштютѧтъ его. ꙇ҅ боѣахѫ сѧ въпроситі иі. о гл҃ѣ семь.

Вьниде же помꙑшл̑енье вь н̑ѧ. къто ꙇ҅хъ вѧштиі би бꙑлъ.

ꙇс҃ же вѣдꙑ помꙑшл̑енье сръдьца ꙇ҅хъ. приімъ отрочѧ постави е оу себе.

ꙇ҅ рече ꙇ҅мъ. ꙇ҅же аште приіметъ отрочѧ се. въ ꙇ҅мѧ мое. мѧ приемл̑етъ. ꙇ҅ иже аште мѧ приемл̑етъ. приемл̑етъ посълавъшааго мѧ. ꙇ҅же бо мьн̑иі естъ всѣхъ васъ. сь естъ вѧштьі.

Ѡтъвѣштавъ же ꙇ҅оаннъ. рече. наставьниче. видѣхомъ етера. о ꙇ҅мени твоемь. ꙇ҅згонѧшта бѣсꙑ. ꙇ҅ възбранихомъ емоу. ѣко въ слѣдъ ходитъ съ нами.

ꙇ҅ рече къ н̑емоу ис҃. не браните емоу. нѣстъ бо на вꙑ. ꙇ҅же бо нѣстъ на вꙑ по васъ естъ.

Бꙑ!с же егда съконьчаваахѫ сѧ дьнье. въсхожденью его. ꙇ҅ тъ оутвръди лице свое ꙇ҅ти въ !ілмъ.

ꙇ҅ посъла вѣстьникꙑ прѣдъ лицемь своꙇмь. ꙇ҅ шьдъше вьнидѫ въ всь самарѣньскѫ. да оуготовѧтъ емоу.

ꙇ҅ не приѩшѧ его. ѣко лице его бѣ грѧдꙑ въ !ілмъ.

видѣвъша же оученика его. ꙇ҅ѣковъ. ꙇ҅ оанⸯнъ. рѣсте. г҃и. хоштеши ли. ꙇ҅ речевѣ. да огн̑ь съшьдъ съ неб҃се. ꙇ҅ поѣстъ ѩ. ѣкоже ꙇ҅лиѣ сътвори.

ѡбрашть же сѧ запрѣти ꙇ҅ма ꙇ҅ рече. не вѣста сѧ. кого дх҃а еста вꙑ. сн҃ъ бо чс҃кꙑ нѣстъ пришьлъ. дш҃ь чс҃къ погоубитъ. нъ сп҃стъ.

ꙇ҅ идѫ въ ꙇнѫ вьсь.

Бꙑстъ же ꙇ҅дѫштемъ ꙇ҅мъ по пѫти. рече етеръ къ н̑емоу. ꙇ҅дѫ по тебѣ ѣможе колижьдо ꙇ҅деши г҃и.

ꙇ҅ рече емоу ис҃. лиси ѣзвинꙑ ꙇ҅мѫтъ. ꙇ҅ пⸯтицѧ нб҃скꙑѩ гнѣзда. а сн҃ъ чс҃кꙑ не ꙇ҅матъ къде главꙑ подъклонити.

рече къ дроугоумоу. ходи въ слѣдъ мене. онъ же рече г҃и. повели ми. древл̑е шьдъше погрети оц҃а моего.

рече же емоу ис҃. остави мрътвъꙇмъ. погрети своѩ мрътвьцѧ. тꙑ же шьдъ възвѣштаі цр҃сие бж҃ье.

Рече же ꙇ҅ дроугъꙇ. ꙇ҅дѫ по тебѣ г҃и. древл̑е же повели отъврѣшти ми сѧ. ꙇ҅же сѫтъ въ домоу моемь.

рече же. никътоже възложь рѫкꙑ своеѩ на рало. ꙇ҅ зьрѧ вьспѧть. оуправл̑енъ естъ въ цр҃си бж҃іи.