ЕВАНГЕЛИЕ ЕЖЕ Ѿ ЛОУКꙐ
8:1
Ⰱⱏⰹ!ⱄ ⰶⰵ ⱂⱁ ⱅⱁⰿⱐ. ⰺ҅ ⱅⱏ ⱂⱃⱁⱈⱁⰶⰴⰰⰰⱎⰵ ⱄⰽⰲⱁⰸⱑ ⰳⱃⰰⰴⱏⰹ. ⰺ҅ ⰲⸯⱄⰻ. ⱂⱃⱁⱂⱁⰲⱑⰴⰰⱗ ⰺ҅ ⰱⰾⰰⰳⱁⰲⱑⱄⱅⱆⱗ. ⱌⱃ҃ⱄⱐⰵ ⰱⰶ҃ⰻⰵ. ⰺ҅ ⱁⰱⰰ ⱀⰰ ⰴⰵⱄⱗⱅⰵ ⱄⱏ ⱀ̑ⰻⰿⱐ.
8:2
ⰺ҅ ⰶⰵⱀⱏⰹ ⰵⱅⰵⱃⱏⰹ. ⱗⰶⰵ ⰱⱑⰰⱈⱘ ⰺ҅ⱌⱑⰾ̑ⰵⱀⱏⰹ ⱁⱅⱏ ⱀⰵⰴⱘⰳⱏ. ⰺ҅ ⱃⰰⱀⱏ. ⰺ҅ ⰴⱈ҃ⱏ ⰸⱏⰾⱏ. ⰺ҅ ⰱⱁⰾⱑⰸⱀⰹⰻ. ⰿⰰⱃⰻⱑ ⱀⰰⱃⰻⱌⰰⰵⰿⰰⱑ ⰿⰰⰳⰴⰰⰾⱏⰹⱀ̑ⰻ. ⰺ҅ⰶ ⱀⰵⱗⰶⰵ ⱄⰵⰴⰿⱐ ⰱⱑⱄⱏ ⰺ҅ⰸⰻⰴⰵ.
8:3
ⰺ҅ ⱁⰰⱀⸯⱀⰰ ⰶⰵⱀⰰ ⱈⱆⰸⱑⰰⱀⰻⱀⰰ. ⰺ҅ ⰻⱀⱏⰹ ⰿⱀⱁⰳⱏⰹ. ⱗⰶⰵ ⱄⰾⱆⰶⰰⰰⱈⱘ ⰵⰿⱆ. ⱁⱅⱏ ⰺ҅ⰿⱑⱀⰻⰹ ⱄⰲⱁⰺⱈⱏ.
8:4
Ⱃⰰⰸⱆⰿⱑⱙⱎⱅⱓ ⰶⰵ ⱀⰰⱃⱁⰴⱆ ⰿⱏⱀⱁⰳⱆ. ⰺ҅ ⰳⱃⱔⰴⱘⱎⱅⰻⰿⱏ ⱁⱅⱏ ⰲⸯⱄⱑⱈⱏ ⰳⱃⰰⰴⱏ ⰽⱏ ⱀ̑ⰵⰿⱆ. ⱂⱃⰻⱅⱏⱍⰵⱙ ⰳⰾ҃ⰰⰰⱎⰵ ⰽⱏ ⱀ̑ⰻⰿⱏ.
8:5
Ⰺⰸⰻⰴⰵ ⱄⱑⱗⰻ ⱄⱑⰰⱅⱏ ⱄⱑⰿⰵⱀⰵ ⱄⰲⱁⰵⰳⱁ. ⰺ҅ ⰵⰳⰴⰰ ⱄⱑⰰⱎⰵ. ⱁⰲⱁ ⱂⰰⰴⰵ ⱂⱃⰻ ⱂⱘⱅⰻ. ⰺ҅ ⱂⱁⱂⱏⱃⰰⱀⱁ ⰱⱏⰹ!ⱄ. ⰺ҅ ⱂⸯⱅⰻⱌⱔ ⱀⰵⰱ҃ⱄⰽⱏⰹⱗ ⱂⱁⰸⱁⰱⰰⱎⱔ ⰵ.
8:6
ⰰ ⰴⱃⱆⰳⱁⰵ ⱂⰰⰴⰵ ⱀⰰ ⰽⰰⰿⰵⱀⰵ. ⰺ҅ ⱂⱃⱁⰸⱔⰱⱏ ⱆⱄⱏⱎⰵ. ⰸⰰⱀ̑ⰵ ⱀⰵ ⰺ҅ⰿⱑⰰⱎⰵ ⰲⰾⰰⰳⱏⰹ.
8:7
ⰰ ⰴⱃⱆⰳⱁⰵ ⱂⰰⰴⰵ ⱂⱁⱄⱃⱑⰴⱑ ⱅⱃⱐⱀⱐⱑ. ⰺ҅ ⰲⱏⰸⰴⱃⰰⱄⱅⰵ ⱅⱃⱐⱀⱐⰵ ⰺ҅ ⱂⱁⰴⰰⰲⰻ ⰵ.
8:8
ⰰ ⰴⱃⱆⰳⱁⰵ ⱂⰰⰴⰵ ⱀⰰ ⰸⰵⰿⰾ̑ⰻ ⰴⱁⰱⱃⱑ. ⰺ҅ ⱂⱃⱁⰸⱔⰱⱏ ⱄⱏⱅⰲⱁⱃⰻ ⱂⰾⱁⰴⱏ. ⱄⱏⱅⱁⱃⰻⱌⰵⱙ. ⱄⰵ ⰳⰾ҃ⱔ ⰲⱏⰸⰳⰾⰰⱄⰻ. ⰺ҅ⰿⱑⱗⰻ ⱆⱎⰻ ⱄⰾⱏⰹⱎⰰⱅⰻ ⰴⰰ ⱄⰾⱏⰹⱎⰻⱅⱏ.
8:9
ⰲⱏⱂⱃⰰⱎⰰⰰⱈⱘ ⰶⰵ ⰹ ⱆⱍⰵⱀⰻⱌⰻ ⰵⰳⱁ ⰳⰾ̑ⱙⱎⱅⰵ. ⱍⱐⱅⱁ ⰵⱄⱅⱏ ⱂⱃⰻⱅⱏⱍⰰ ⱄⰻ.
8:10
ⱁⱀⱏ ⰶⰵ ⱃⰵⱍⰵ ⰹ҅ⰿⱏ. ⰲⰰⰿⱏ ⰴⰰⱀⱁ ⰵⱄⱅⱏ ⱃⰰⰸⱆⰿⱑⱅⰻ ⱅⰰⰹⱀⱏⰹ ⱌⱃ҃ⱄⱐⱑ ⰱⰶ҃ⱐⱑ. ⰰ ⱂⱃⱁⱍⰻⰹⰿⱏ ⰲⱏ ⱂⱃⰻⱅⱏⱍⰰⱈⱏ. ⰴⰰ ⰲⰻⰴⱔⱎⱅⰵ ⱀⰵ ⰲⰻⰴⱔⱅⱏ. ⰺ҅ ⱄⰾⱏⰹⱎⱔⱎⱅⰵ ⱀⰵ ⱄⰾⱏⰹⱎⱔⱅⱏ. ⰺ҅ ⱀⰵ ⱃⰰⰸⱆⰿⱑⱙⱅⱏ.
8:11
Ⰵⱄⱅⱏ ⰶⰵ ⱂⱃⰻⱅⱏⱍⰰ ⱄⰻ. ⱄⱑⰿⱔ ⰵⱄⱅⱏ ⱄⰾⱁⰲⱁ ⰱⰶ҃ⱐⰵ.
8:12
ⰰ ⰺⰶⰵ ⱂⱃⰻ ⱂⱘⱅⰻ ⱄⱘⱅⱏ. ⱄⰾⱏⰹⱎⱔⱎⱅⰵⰹ ⱄⰾⱁⰲⱁ. ⱂⱁⱅⱁⰿⱐ ⰶⰵ ⱂⱃⰻⰴⰵⱅⱏ ⰴⱐⱑⰲⱁⰾⱏ. ⰺ҅ ⰲⱏⰸⱏⰿⰵⱅⱏ ⱄⰾⱁⰲⱁ ⱁⱅⱏ ⱄⱃⱏⰴⱐⱌⰰ ⰺ҅ⱈⱏ. ⰴⰰ ⱀⰵ ⰲⱑⱃⱏⰹ ⰺ҅ⰿⱏⱎⰵ ⱄⱂ҃ⰵⱀⰻ ⰱⱘⰴⱘⱅⱏ.
8:13
ⰰ ⰺ҅ⰶⰵ ⱀⰰ ⰽⰰⰿⰵⱀⰻⰹ. ⰺ҅ⰶⰵ ⰵⰳⰴⰰ ⱆⱄⰾⱏⰹⱎⱔⱅⱏ ⱄⱏ ⱃⰰⰴⱁⱄⱅⰻⱙ ⱂⱃⰻⰵⰿⰾ̑ⱘⱅⱏ ⱄⰾⱁⰲⱁ. ⰺ҅ ⰽⱁⱃⰵⱀⰵ ⱀⰵ ⰺ҅ⰿⱘⱅⱏ. ⰺ҅ⰶⰵ ⰲⱏ ⰲⱃⱑⰿⱔ ⰲⱑⱃⱘ ⰵⰿⰾ̑ⱙⱅⱏ. ⰺ҅ ⰲⱏ ⰲⱃⱑⰿⱔ ⱀⰰⱂⰰⱄⱅⰻ ⱁⱄⱅⱘⱂⰰⱙⱅⱏ.
8:14
ⰰ ⱂⰰⰴⱏⱎⰵⰵ ⰲⱏ ⱅⱃⱐⱀⱐⰵ. ⱄⰻⰹ ⱄⱘⱅⱏ. ⱄⰾⱏⰹⱎⰰⰲⱏⱎⰵⰹ. ⰺ҅ ⱁⱅⱏ ⱂⰵⱍⰰⰾⰻⰹ. ⰺ҅ ⰱⱁⰳⰰⱅⱐⱄⱅⰲⰰ. ⰺ҅ ⱄⰾⰰⱄⱅⱐⰿⰻ ⰶⰻⱅⰻⰹⱄⰽⱏⰺⰿⰻ. ⱈⱁⰴⱔⱎⱅⰵ ⱂⱁⰴⰰⰲⰾ̑ⱑⱙⱅⱏ ⱄⱔ. ⰺ҅ ⱀⰵ ⰴⱁ ⰲⱃⱏⱈⰰ. ⱂⰾⱁⰴⰰ ⱅⰲⱁⱃⱔⱅⱏ.
8:15
ⰰ ⰵⰶⰵ ⱀⰰ ⰴⱁⰱⱃⱑ ⰸⰵⰿⰻ. ⱄⰻⰹ ⱄⱘⱅⱏ. ⰺ҅ⰶⰵ ⰴⱁⰱⱃⱁⰿⱐ ⱄⱃⱏⰴⱐⱌⰵⰿⱐ ⰺ҅ ⰱⰾⰰⰳⱁⰿⱐ. ⱄⰾⱏⰹⱎⱔⱎⱅⰵⰹ ⱄⰾⱁⰲⱁ. ⰴⱃⱏⰶⱔⱅⱏ. ⰺ҅ ⱂⰾⱁⰴⱏ ⱅⰲⱁⱃⱔⱅⱏ ⰲⱏ ⱅⱃⱏⱂⱑⱀⰻⰹ.
8:16
Ⱀⰻⰽⱏⱅⱁⰶⰵ ⱆⰱⱁ ⱄⰲⱑⱅⰻⰾⱐⱀⰻⰽⰰ ⰲⱏⰶⰵⰳⱏ. ⱂⱁⰽⱃⱏⰹⰲⰰⰵⱅⱏ ⰵⰳⱁ ⱄⱂⱘⰴⱁⰿⱐ. ⰾⰻ ⱂⱁⰴⱏ ⱁⰴⱃⱁⰿⱐ ⱂⱁⰾⰰⰳⰰⰵⱅⱏ. ⱀⱏ ⱀⰰ ⱄⰲⱑⱎⱅⱐⱀⰻⰽⱏ ⰲⱏⰸⰾⰰⰳⰰⰵⱅⱏ. ⰴⰰ ⰲⱏⱈⱁⰴⱔⱎⱅⰻⰹ ⰲⰻⰴⱔⱅⱏ ⱄⰲⱑⱅⱏ.
8:17
Ⱀⱑⱄⱅⱏ ⰱⱁ ⱅⰰⰺ҅ⱀⱁ. ⰵⰶⰵ ⱀⰵ ⰰⰲⰻⱅⱏ ⱄⱔ. ⱀⰻ ⱆⱅⰰⰵⱀⱁ ⰵⰶⰵ ⱀⰵ ⰱⱘⰴⰵⱅⱏ ⱂⱁⰸⱀⰰⱀⱁ. ⰺ҅ ⰲⱏ ⰰⰲⰾ̑ⰵⱀⱐⰵ ⱂⱃⰻⰴⰵⱅⱏ.
8:18
Ⰱⰾ̑ⱓⰴⱑⱅⰵ ⱄⱔ ⱆⰱⱁ ⰽⰰⰽⱁ ⱄⰾⱏⰹⱎⰻⱅⰵ. ⰺ҅ⰶⰵ ⰱⱁ ⰺ҅ⰿⰰⱅⱏ ⰴⰰⱄⱅⱏ ⱄⱔ ⰵⰿⱆ. ⰰ ⰺⰶⰵ ⱀⰵ ⰺ҅ⰿⰰⱅⱏ. ⰺ҅ ⰵⰶⰵ ⰿⱐⱀⰻⱅⱏ ⱄⱔ ⰺ҅ⰿⱑⱗ. ⱁⱅⱏⰺ҅ⰿⰵⱅⱏ ⱄⱔ ⱁⱅⱏ ⱀ̑ⰵⰳⱁ.
8:19
Ⱂⱃⰻⰴⱘ ⰶⰵ ⰽⱏ ⱀ̑ⰵⰿⱆ. ⰿⰰⱅⰻ ⰺ҅ ⰱⱃⰰⱅⱃⱐⱑ ⰵⰳⱁ. ⰺ҅ ⱀⰵ ⰿⱁⰶⰰⰰⱈⱘ. ⰱⰵⱄⱑⰴⱁⰲⰰⱅⰻ ⰽⱏ ⱀ̑ⰵⰿⱆ. ⱀⰰⱃⱁⰴⱁⰿⱏ.
8:20
ⰺ҅ ⰲⱏⰸⰲⱑⱄⱅⰻⱎⱔ ⰵⰿⱆ ⰳⰾ҃ⱙⱎⱅⰵ. ⱑⰽⱁ ⰿⰰⱅⰻ ⱅⰲⱁⱑ ⰺ ⰱⱃⰰⱅⱃⱐⱑ. ⱅⰲⱁⱑ ⰲⱐⱀⱑ ⱄⱅⱁⱗⱅⱏ. ⰲⰻⰴⱑⱅⰻ ⱅⱔ ⱈⱁⱅⱔⱎⱅⰵ.
8:21
ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰽⱏ ⱀ̑ⰻⰿⱏ. ⰿⰰⱅⰻ ⰿⱁⱑ ⰺ҅ ⰱⱃⰰⱅⱃⱐⱑ ⰿⱁⱑ. ⱄⰻⰹ ⱄⱘⱅⱏ. ⱄⰾⱏⰹⱎⱔⱎⱅⰵⰹ ⱄⰾⱁⰲⱁ ⰱⰶ҃ⱐⰵ. ⰺ҅ ⱅⰲⱁⱃⱔⱎⱅⰵ ⰵ.
8:22
Ⰱⱏⰹ!ⱄ ⰶⰵ ⰲⱏ ⰵⰴⰻⱀⱏ ⱁⱅⱏ ⰴⱐⱀⰻⰹ. ⰺ҅ ⱅⱏ ⰲⱏⰾⱑⰸⰵ ⰲⱏ ⰽⱁⱃⰰⰱⰾ̑ⱐ. ⰺ҅ ⱆⱍⰵⱀⰻⱌⰻ ⰵⰳⱁ. ⰺ҅ ⱃⰵⱍⰵ ⰺ҅ⰿⱏ. ⱂⱃⱑⰺ҅ⰴⱑⰿⱏ ⱀⰰ ⱁⱀⱏ ⱂⱁⰾⱏ ⰵⰸⰵⱃⰰ. ⰺ҅ ⱂⱃⱑⱑⰴⱘ.
8:23
ⱑⰴⱘⱎⱅⰵⰿⱏ ⰶⰵ ⰺ҅ⰿⱏ. ⱆⱄⱏⱂⰵ ⰻⱄ҃. ⰺ҅ ⱄⱏⱀⰻⰴⰵ ⰱⱆⱃⱑ ⰲⱑⱅⱃⱏⱀⰰ ⰲⱏ ⰵⰸⰵⱃⱏ. ⰺ҅ ⰻⱄⰽⱁⱀⱐⱍⰰⰲⰰⰰⱈⱘ ⱄⱔ. ⰺ҅ ⰲⱏⰾⰰⰰⱈⱘ ⱄⱔ.
8:24
ⱂⱃⰻⱄⱅⱘⱂⱐⱎⰵ ⰶⰵ ⰲⱏⰸⰱⱆⰴⰻⱎⱔ ⰹ ⰳⰾ̑ⱙⱎⱅⰵ. ⱀⰰⱄⱅⰰⰲⱐⱀⰻⱍⰵ ⱀⰰⱄⱅⰰⰲⱐⱀⰻⱍⰵ ⱂⱁⰳⱏⰹⰱⱀⰵⰿⱏ. Ⱉⱀⱏ ⰶⰵ ⰲⱏⱄⱅⰰⰲⱏ ⰸⰰⱂⱃⱑⱅⰻ ⰲⱑⱅⱃⱆ. ⰺ҅ ⰲⰾⱏⱀ̑ⰵⱀⱐⱓ ⰿⱁⱃⱐⱄⰽⱆⰿⱆ. ⰺ҅ ⱆⰾⰵⰶⰵ. ⰺ҅ ⰱⱏⰹⱄⱅⱏ ⱅⰻⱎⰻⱀⰰ.
8:25
ⰺ҅ ⱃⰵⱍⰵ ⰽⱏ ⱀ̑ⰻⰿⱏ. ⰽⱏⰴⰵ ⰵⱄⱅⱏ ⰲⱑⱃⰰ ⰲⰰⱎⰰ. ⱆⰱⱁⱑⰲⱏⱎⰵ ⰶⰵ ⱄⱔ. ⱍⱓⰴⰻⱎⱔ ⱄⱔ ⰳⰾ҃ⱙⱎⱅⰵ ⰽⱏ ⱄⰵⰱⱑ. ⰽⱏⱅⱁ ⱆⰱⱁ ⱄⱐ ⰵⱄⱅⱏ. ⱑⰽⱁ ⰺ҅ ⰲⱑⱅⱃⱁⰿⱏ ⰲⰵⰾⰻⱅⱏ ⰺ҅ ⰲⱁⰴⱑ ⰺ҅ ⱂⱁⱄⰾⱆⱎⰰⱙⱅⱏ ⰵⰳⱁ.
8:26
ⰺ҅ ⱂⱃⱑⱑⰴⱁⱎⱔ ⱀⰰ ⰸⰵⰿⰾ̑ⱙ ⰼⰵⱀⰻⱄⰰⱃⰵⱅⱐⱄⰽⱘ. ⱑⰶⰵ ⰵⱄⱅⱏ ⱁⰱ ⱁⱀⱏ ⱂⱁⰾⱏ ⰳⰰⰾⰻⰾⰵⱗ.
8:27
ⰺ҅ ⰻⱎⱐⰴⱏⱎⰵⰿⱏ ⰺ҅ⰿⱏ ⱀⰰ ⰸⰵⰿⰾ̑ⱙ. ⱄⱏⱃⱑⱅⰵ ⰹ ⰿⱘⰶⱐ ⰵⱅⰵⱃⱏ ⱁⱅⱏ ⰳⱃⰰⰴⰰ. ⰺ҅ⰶⰵ ⰺ҅ⰿⱑⰰⱎⰵ ⰱⱑⱄⱏ ⱁⱅⱏ ⰾⱑⱅⱏ ⰿⱀⱁⰳⱏ. ⰺ҅ ⰲⱐ ⱃⰻⰸⱘ ⱀⰵ ⱁⰱⰾⰰⱍⰰⰰⱎⰵ ⱄⱔ. ⰺ҅ ⰲⱏ ⱈⱃⰰⰿⱑ ⱀⰵ ⰶⰻⰲⱑⰰⱎⰵ. ⱀⱏ ⰲⱏ ⰳⱃⱁⰱⱑⱈⱏ.
8:28
ⱆⰸⱐⱃⱑⰲⱏ ⰶⰵ ⰺⱄ҃ⰰ. ⱂⱃⰻⱂⰰⰴⰵ ⰽⱏ ⱀ̑ⰵⰿⱆ. ⰺ҅ ⰳⰾⰰⱄⱁⰿⱐ ⰲⰵⰾⱐⰵⰿⱐ ⱃⰵⱍⰵ. ⱍⱐⱅⱁ ⰵⱄⱅⱏ ⰿⱐⱀⱑ. ⰺ҅ ⱅⰵⰱⱑ ⰺ҅ⱄ҃ⰵ ⱄⱀ҃ⰵ ⰱ҃ⰰ ⰲⱏⰹⱎⱐⱀ̑ⱑⰵⰳⱁ. ⰿⱁⰾ̑ⱙ ⱅⰻ ⱄⱔ ⱀⰵ ⰿⱘⱍⰻ ⰿⰵⱀⰵ.
8:29
ⱂⱃⱑⱎⱅⰰⰰⱎⰵ ⰱⱁ ⰴⱈ҃ⰲⰻ ⱀⰵⱍⰻⱄⱅⱆⰿⱆ. ⰺ҅ⰸⰻⰴⰻ ⱁⱅⱏ ⱍⰽ҃ⰰ. ⱁⱅⱏ ⰿⱏⱀⱁⰳⱏ ⰱⱁ ⰾⱑⱅⱏ ⰲⱏⱄⱈⱏⰹⱎⱅⰰⰰⱎⰵ ⰹ. ⰺ҅ ⰲⱔⰸⰰⰰⱈⱘ ⰹ ⱘⰶⰻ ⰶⰵⰾⱑⰸⱀⱏⰹ. ⰺ҅ ⱂⱘⱅⱏⰹ ⱄⱅⱃⱑⰳⱘⱎⱅⰵⰹ. ⰺ҅ ⱃⰰⱄⱅⱃⱏⰸⰰⰰⱎⰵ ⱘⰸⱏⰹ. ⰳⱁⱀⰻⰿⱏ ⰱⱏⰹⰲⰰⰰⱎⰵ ⰱⱑⱄⱁⰿⱐ. ⱄⰽⰲⱁⰸⱑ ⱂⱆⱄⱅⱏⰹⱀ̑ⱔ.
8:30
ⰲⱏⱂⱃⱁⱄⰻ ⰶⰵ ⰹ ⰺⱄ҃ ⰳⰾ҃ⱔ. ⱍⱐⱅⱁ ⱅⰻ ⰺ҅ⰿⱔ ⰵⱄⱅⱏ. ⱁⱀⱏ ⰶⰵ ⱃⰵⱍⰵ ⰾⰵⰼⰵⱁⱀⱏ. ⱑⰽⱁ ⰱⱑⱄⰻ ⰿⱀⱁⰸⰻ ⰲⱐⱀⰻⰴⱘ ⰲⱏ ⱀ̑ⱐ.
8:31
ⰺ҅ ⰿⱁⰾ̑ⱑⰰⱈⱘ ⰹ ⰴⰰ ⱀⰵ ⱂⱁⰲⰵⰾⰻⱅⱏ ⰺ҅ⰿⱏ ⰲⱏ ⰱⰵⰸⰴⱏⱀⱘ ⰺ҅ⱅⰻ.
8:32
ⰱⱑ ⰶⰵ ⱅⱆ ⱄⱅⰰⰴⱁ ⱄⰲⰻⱀⰻⰹ ⰿⱀⱁⰳⱁ ⱂⰰⱄⱁⰿⱁ ⰲⱏ ⰳⱁⱃⱑ. ⰺ҅ ⰿⱁⰾ̑ⱑⰰⱈⱘ ⰹ. ⰴⰰ ⱂⱁⰲⰵⰾⰻⱅⱏ ⰺ҅ⰿⱏ. ⰲⱏ ⱅⱏⰹ ⰲⱐⱀⰻⱅⰻ. ⰺ҅ ⱂⱁⰲⰵⰾⱑ ⰺ҅ⰿⱏ.
8:33
ⰺ҅ ⰻⱎⱐⰴⱏⱎⰵ ⰱⱑⱄⰻ ⱁⱅⱏ ⱍⰽ҃ⰰ. ⰲⱏⱀⰻⰴⱁⱎⱔ ⰲⱐ ⱄⰲⰻⱀⱐⱗ. ⰺ҅ ⱆⱄⱅⱃⱏⰿⰻ ⱄⱔ ⱄⱅⰰⰴⱁ ⱂⱁ ⰱⱃⱑⰳⱆ ⰲⱏ ⰵⰸⰵⱃⱁ. ⰺ҅ ⰻⱄⱅⱁⱂⰵ.
8:34
ⰲⰻⰴⱑⰲⱏⱎⰵ ⰶⰵ ⱂⰰⱄⱘⱎⱅⰵⰹ ⰱⱏⰹⰲⱏⱎⰵⰵ. ⰱⱑⰶⰰⱎⱔ. ⰺ҅ ⰲⱐⰸⰲⱑⱄⱅⰻⱎⱔ ⰲⱏ ⰳⱃⰰⰴⱑ ⰺ҅ ⰲⱐ ⱄⰵⰾⱑⱈⱏ.
8:35
ⰺ҅ⰸⰻⰴⱘ ⰶⰵ ⰲⰻⰴⱑⱅⱏ ⰱⱏⰹⰲⱏⱎⰰⰰⰳⱁ. ⰺ҅ ⱂⱃⰻⰴⱘ ⰽⱏ ⰺⱄ҃ⰲⰻ. ⰺ҅ ⱁⰱⱃⱑⱅⱘ ⱄⱑⰴⱔⱎⱅⰰ ⱍⰽ҃ⰰ. ⰺ҅ⰶ ⱀⰵⰳⱁⰶⰵ ⰱⱑⱄⰻ ⰺ҅ⰸⰻⰴⱘ. ⱁⰱⰾⱐⱍⰵⱀⰰ ⰺ҅ ⱄⱏⰿⱏⰹⱄⰾⱔⱎⱅⰰ. ⱂⱃⰻ ⱀⱁⰳⱆ ⰺ҅ⱄ҃ⰲⱆ. ⰺ҅ ⱆⰱⱁⱑⱎⱔ ⱄⱔ.
8:36
ⰲⱐⰸⰲⱑⱄⱅⰻⱎⱔ ⰺ҅ⰿⱏ. ⰲⰻⰴⱑⰲⱏⱎⰵ ⰶⰵ ⰺ҅ ⰽⰰⰽⱁ ⱄⱏⱂⰰⱄⰵ ⱄⱔ ⰱⱑⱄⱏⱀⱁⰲⰰⰲⱏⰹ.
8:37
ⰺ҅ ⰿⱁⰾⰻⱎⱔ ⰹ ⰲⱐⱄⱐ ⱀⰰⱃⱁⰴⱏ ⱁⰱⰾⰰⱄⱅⰻ. ⰼⰵⱃⰼⰵⱄⰹⱀⱐⱄⰽⱏⰹⱗ. ⱁⱅⰻⱅⰻ ⱁⱅⱏ ⱀⰻⱈⱏ. ⱑⰽⱁ ⱄⱅⱃⰰⱈⱁⰿⱐ ⰲⰵⰾⱐⰵⰿⱐ ⱁⰴⱃⱏⰶⰻⰿⰻ ⰱⱑⰰⱈⱘ. ⱁⱀⱏ ⰶⰵ ⰲⱏⰾⱑⰸⱏ ⰲⱏ ⰽⱁⱃⰰⰱⰾ̑ⱐ. ⰲⱏⰸⰲⱃⰰⱅⰻ ⱄⱔ.
8:38
Ⰿⱁⰾ̑ⱑⰰⱎⰵ ⰶⰵ ⱄⱔ ⰵⰿⱆ ⰿⱘⰶⱐ. ⰺ҅ⰶ ⱀⰵⰳⱁⰶⰵ ⰺ҅ⰸⰻⰴⰵ ⰱⱑⱄⱏ. ⰴⰰ ⰱⰻ ⱄⱏ ⱀ̑ⰻⰿⱐ ⰱⱏⰹⰾⱏ. ⰺⱄ҃ ⰶⰵ ⱁⱅⱏⱂⱆⱄⱅⰻ ⰹ ⰳⰾ҃ⱔ.
8:39
ⰲⱏⰸⰲⱃⰰⱅⰻ ⱄⱔ ⰲⱏ ⰴⱁⰿⱏ ⱅⰲⱁⰹ. ⰺ҅ ⱂⱁⰲⱑⰴⰰⰹ ⰵⰾⰻⰽⱁ ⱅⰻ ⱄⱏⱅⰲⱁⱃⰻ ⰱ҃ⱏ. ⰺ҅ ⰻⰴⰵ ⱂⱁ ⰲⱐⱄⰵⰿⱆ ⰳⱃⰰⰴⱆ ⱂⱃⱁⱂⱁⰲⱑⰴⰰⱗ. ⰵⰾⰻⰽⱁ ⱄⱏⱅⰲⱁⱃⰻ ⰵⰿⱆ ⰱ҃ⱏ.
8:40
Ⰱⱏⰹ!ⱄ ⰶⰵ ⰵⰳⰴⰰ ⰲⱏⰸⰲⱃⰰⱅⰻ ⱄⱔ ⰻⱄ҃. ⱂⱃⰻⱗⱅⱏ ⰹ ⱀⰰⱃⱁⰴⱏ. ⰱⱑⰰⱈⱘ ⰱⱁ ⰲⱐⱄⰻ ⱍⰰⱙⱎⱅⰵ ⰵⰳⱁ.
8:41
Ⰺ҅ ⱄⰵ ⱂⱃⰻⰴⰵ ⰿⱘⰶⱐ. ⰵⰿⱆⰶⰵ ⰱⱑ ⰺ҅ⰿⱔ ⰺⰰⱃⱐ. ⰺ҅ ⱅⱏ ⰽⱏⱀⱔⰸⱐ ⱄⱏⱀⱏⰿⰻⱎⱅⱓ ⰱⱑ. ⰺ҅ ⱂⰰⰴⱏ ⱂⱃⰻ ⱀⱁⰳⱆ ⰺ҅ⱄ҃ⰲⱆ. ⰿⱁⰾ̑ⱑⰰⱎⰵ ⰹ ⰲⱐⱀⰻⱅⰻ ⰲⱏ ⰴⱁⰿⱏ ⱄⰲⱁⰹ.
8:42
ⱑⰽⱁ ⰴⱏⱎⱅⰻ ⰺ҅ⱀⱁⱍⱔⰴⰰ ⰱⱑ ⰵⰿⱆ. ⱑⰽⱁ ⰺ҅ ⰴⱏⰲⱁⱓ ⱀⰰ ⰴⰵⱄⱔⱅⰵ ⰾⱑⱅⱆ. ⰺ҅ ⱅⰰ ⱆⰿⰻⱃⰰⰰⱎⰵ. ⰵⰳⰴⰰ ⰶⰵ ⰺ҅ⰴⱑⰰⱎⰵ. ⱀⰰⱃⱁⰴⰻ ⱆⰳⱀⱑⱅⰰⰰⱈⱘ ⰹ.
8:43
Ⰺ҅ ⰶⰵⱀⰰ ⱄⱘⱎⱅⰻ ⰲⱏ ⱅⱁⱍⰵⱀⰹⰻ ⰽⱃⱏⰲⰻ. ⱁⱅⱏ ⰴⱏⰲⱁⱓ ⱀⰰ ⰴⰵⱄⱔⱅⰵ ⰾⱑⱅⱆ. ⱑⰶⰵ ⰲⱃⰰⱍⰵⰿⱏ. ⰺ҅ⰸⰴⰰⰰⰲⱏⱎⰻ ⰲⱐⱄⰵ ⰺ҅ⰿⱑⱀⱐⰵ ⱄⰲⱁⰵ. ⱀⰻ ⱁⱅⱏ ⰵⰴⰻⱀⱁⰳⱁ ⰶⰵ ⱀⰵ ⰿⱁⰸⰵ ⰺ҅ⱌⱑⰾⱑⱅⰻ.
8:44
ⱄⰻ ⱂⱃⰻⱄⱅⱘⱂⱐⱎⰻ ⱄⱏ ⱄⰾⱑⰴⰰ. ⰽⱁⱄⱀⱘ ⱄⱔ ⰲⱏⱄⰽⱃⰻⰾⰻⰹ ⱃⰻⰸⱑ ⰵⰳⱁ. ⰺ҅ ⰰⰱⱐⰵ ⱄⱅⰰ. ⱅⰵⱍⰵⱀⱐⰵ ⰽⱃⱏⰲⰵ ⰵⱗ.
8:45
ⰺ҅ ⱃⰵⱍⰵ ⰻⱄ҃. ⰽⱏⱅⱁ ⰵⱄⱅⱏ ⰽⱁⱄⱀⱘⰲⱏⰹ ⱄⱔ ⰿⸯⱀⱑ. ⱁⱅⱏⰿⱑⱅⰰⱙⱎⱅⰵⰿⱏ ⰶⰵ ⱄⱔ ⰲⱄⱑⰿⱏ. ⱃⰵⱍⰵ ⱂⰵⱅⱃⱏ. ⰺ҅ ⰻⰶⰵ ⱄⱏ ⱀ̑ⰻⰿⱐ ⰱⱑⰰⱈⱘ. ⱀⰰⱄⱅⰰⰲⱐⱀⰻⱍⰵ. ⱀⰰⱃⱁⰴⰻ ⱆⱅⱑⱎⱅⰰⱙⱅⱏ ⱅⱔ. ⰺ҅ ⰳⱀⰵⱅⱘⱅⱏ. ⰺ҅ ⰳⰾ҃ⰵⱎⰻ ⰽⱏⱅⱁ ⰵⱄⱅⱏ ⰽⱁⱄⱀⱘⰲⱏⰹ ⱄⱔ ⰿⸯⱀⱑ.
8:46
ⰺⱄ҃ ⰶⰵ ⱃⰵⱍⰵ. ⱂⱃⰻⰽⱁⱄⱀⱘ[ⰲⱏⰹ] ⱄⱔ ⰿⱀⱑ ⰽⱏⱅⱁ. ⰰⰸⱏ ⰱⱁ ⱍⱓⱈⱏ ⱄⰻⰾⱘ ⰺ҅ⱎⱐⰴⱏⱎⱘ ⰺ҅ⰸ ⰿⰵⱀⰵ.
8:47
ⰺ҅ ⰲⰻⰴⱑⰲⱏⱎⰻ ⰶⰵⱀⰰ. ⱑⰽⱁ ⱀⰵ ⱆⱅⰰⰺ҅ ⱄⱔ. ⱅⱃⰵⱂⰵⱎⱅⱘⱎⱅⰻ ⱂⱃⰻⰴⰵ. ⰺ҅ ⱂⰰⰴⱏⱎⰻ ⱂⱃⱑⰴⱏ ⱀ̑ⰻⰿⱐ. ⰸⰰ ⱀ̑ⱙⰶⰵ ⰲⰻⱀⱘ ⱂⱃⰻⰽⱁⱄⱀⱘ ⱄⱔ ⰵⰿⱐ. ⱂⱁⰲⱑⰴⰰ ⱂⱃⱑⰴⱏ ⰲⱄⱑⰿⰻ ⰾ̑ⱓⰴⱐⰿⰻ. ⰺ҅ ⰰⰽⱁ ⰺ҅ⱌⱑⰾⱑ ⰰⰱⱐⰵ.
8:48
ⰺⱄ҃ ⱃⰵⱍⰵ ⰵⰹ. ⰴⱃⱏⰸⰰⰹ ⰴⱏⱎⱅⰻ. ⰲⱑⱃⰰ ⱅⰲⱁⱑ ⱄⱂ҃ⰵ ⱅⱔ. ⰺ҅ⰴⰻ ⰲⱏ ⰿⰻⱃⱏ.
8:49
Ⰵⱎⱅⰵ ⰶⰵ ⰵⰿⱆ ⰳⰾ҃ⱙⱎⱅⱓ. ⱂⱃⰻⱎⱐⰴⱏ ⰵⱅⰵⱃⱏ ⱁⱅⱏ ⰰⱃⱈⸯⰻⱄⱛⱀⰰⰳⱁⰳⰰ. ⰳⰾ҃ⰰ ⰵⰿⱆ. ⱑⰽⱁ ⱆⰿⱃⱑⱅⱏ ⰴⱏⱎⱅⰻ ⱅⰲⱁⱑ. ⱀⰵ ⰴⰲⰻⰶⰻ ⱆⱍⰻⱅⰵⰾ̑ⱑ.
8:50
ⰻⱄ҃ ⰶⰵ ⱄⰾⱏⰹⱎⰰⰲⱏ. ⱁⱅⱏⰲⱑⱎⱅⰰ ⰵⰿⱆ ⰳⰾ҃ⱔ. ⱀⰵ ⰱⱁⰹ ⱄⱔ ⱅⱏⰽⱏⰿⱁ ⰲⱑⱃⱆⰻ. ⰺ҅ ⱄⱂ҃ⰵⱀⰰ ⰱⱘⰴⰵⱅⱏ.
8:51
ⱂⱃⰻⱎⱐⰴⱏ ⰶⰵ ⰲⱏ ⰴⱁⰿⱏ. ⱀⰵ ⰴⰰ ⱀⰻⰽⱁⰿⱆⰶⰵ ⰲⱐⱀⰻⱅⰻ ⱄⱏ ⱄⱁⰱⱁⱙ. ⱅⱏⰽⱏⰿⱁ ⱂⰵⱅⱃⱁⰲⰻ. ⰺ҅ ⰻⱁⰰⱀⱆ. ⰺ҅ ⰻⱑⰽⱁⰲⱆ. ⰺ҅ ⱁⱌ҃ⱓ ⱁⱅⱃⱁⰽⱁⰲⰻⱌⱔ. ⰺ҅ ⰿⰰⱅⰵⱃⰻ.
8:52
ⱃⱏⰹⰴⰰⰰⱈⱘ ⰶⰵ ⰲⱄⰻ. ⰺ҅ ⱂⰾⰰⰽⰰⰰⱈⱘ ⰶⰵ ⱄⱔ ⰵⱗ. ⱁⱀⱏ ⰶⰵ ⱃⰵⱍⰵ. ⱀⰵ ⱂⰾⰰⱍⰻⱅⰵ ⱄⱔ ⱀⱑⱄⱅⱏ ⱆⰿⱃⱏⰾⰰ ⰴⱑⰲⰻⱌⰰ. ⱀⱏ ⱄⱏⱂⰻⱅⱏ.
8:53
ⰺ҅ ⱃⱘⰳⰰⰰⱈⱘ ⱄⱔ ⰵⰿⱆ. ⰲⱑⰴⱘⱎⱅⰵ ⱑⰽⱁ ⱆⰿⱃⱑⱅⱏ.
8:54
ⱁⱀⱏ ⰶⰵ ⰺ҅ⰸⰳⱏⱀⰰⰲⱏ ⰲⱐⱄⱔ ⰲⱏⱀⱏ. ⰺ҅ ⰻⰿⱏ ⱙ ⰸⰰ ⱃⱘⰽⱘ. ⰲⱏⰸⰳⰾⰰⱄⰻ ⰳⰾ̑ⱔ. ⱁⱅⱃⱁⰽⱁⰲⰻⱌⰵ ⰲⱏⱄⱅⰰⱀⰻ.
8:55
ⰺ҅ ⰲⱏⰸⰲⱃⰰⱅⰻ ⱄⱔ ⰴⱈ҃ⱏ ⰵⱗ. ⰺ҅ ⰲⱏⱄⰽⱃⱏⱄⰵ ⰰⰱⱐⰵ. ⰺ҅ ⱂⱁⰲⰵⰾⱑ ⰴⰰⱅⰻ ⰵⰹ ⱑⱄⱅⰻ.
8:56
ⰺ҅ ⱆⰶⰰⱄⱀⱘⱄⱅⰰ ⱄⱔ ⱃⱁⰴⰻⱅⰵⰾ̑ⱑ ⰵⱗ. ⱁⱀⱏ ⰶⰵ ⰸⰰⱂⱃⱑⱅⰻ ⰺ҅ⰿⰰ. ⱀⰵ ⱂⱁⰲⱑⰴⰻⱅⰰ ⱀⰻⰽⱁⰿⱆⰶⰵ ⰱⱏⰹⰲⱏⱎⰰⰵⰳⱁ.