ⰵⰳⰴⰰ ⰶⰵ ⱄⱏⰽⱁⱀⱐⱍⰰ ⰲⱄⱔ ⰳⰾ҃ⱏⰹ ⱄⱐⱗ. ⰲⱏ ⱄⰾⱆⱈⱏⰹ ⰾ̑ⱓⰴⱐⰿⱏ. ⰲⱐⱀⰻⰴⰵ ⰲⱏ ⰽⰰⱂⰵⱃⱏⱀⰰⱆⰿⱏ.

Ⱄⱏⱅⱐⱀⰻⰽⱆ ⰶⰵ ⰵⱅⰵⱃⱆ ⱃⰰⰱⱏ ⰱⱁⰾⱔ ⰸⱐⰾⱑ. ⱆⰿⰻⱃⰰⰰⱎⰵ. ⰺ҅ⰶⰵ ⰱⱑ ⰵⰿⱆ ⱍⱐⱄⱅⱐⱀⱏ.

ⱄⰾⱏⰹⱎⰰⰲⱏ ⰶⰵ ⰺⱄ҃ⰰ ⱂⱁⱄⱏⰾⰰ ⰽⱏ ⱀ̑ⰵⰿⱆ ⱄⱅⰰⱃⱐⱌⱔ. ⰺ҅ⱓⰴⰵⰺ҅ⱄⰽⱏⰹ. ⰿⱁⰾⱔ ⰹ ⰴⰰ ⱄⱂ҃ⰵⱅⱏ ⱃⰰⰱⱏ ⰵⰳⱁ.

ⱁⱀⰻ ⰶⰵ ⱂⱃⰻⱎⱐⰴⱏⱎⰵ ⰽⱏ ⰺⱄ҃ⰲⰻ. ⰿⱁⰾ̑ⱑⰰⱈⱘ ⰹ ⱅⱏⱎⱅⱐⱀⱁ ⰳⰾ̑ⱙⱎⱅⰵ ⰵⰿⱆ. ⱑⰽⱁ ⰴⱁⱄⱅⱁⰺ҅ⱀⱏ ⰵⱄⱅⱏ. ⰵⰶⰵ ⰰⱎⱅⰵ ⰴⰰⱄⰻ ⰵⰿⱆ.

ⰾ̑ⱓⰱⰻⱅⱏ ⰱⱁ ⱗⰸⱏⰹⰽⱏ ⱀⰰⱎⱐ. ⰺ҅ ⱄⱏⱀⱏⰿⰻⱎⱅⰵ ⱅⱏ ⱄⱏⰸⱏⰴⰰ ⱀⰰⰿⱏ.

ⰺⱄ҃ ⰶⰵ ⰺ҅ⰴⱑⰰⱎⰵ ⱄⱏ ⱀ̑ⰻⰿⰻ. ⰵⱎⱅⰵ ⰶⰵ ⰵⰿⱆ ⱀⰵⰴⰰⰾⰵⱍⰵ ⱄⱘⱎⱅⱓ ⱁⱅⱏ ⰴⱁⰿⱆ. ⱂⱁⱄⱏⰾⰰ ⰽⱏ ⱀ̑ⰵⰿⱆ ⰴⱃⱆⰳⱏⰹ ⱄⱏⱅⱐⱀⰻⰽⱏ ⰳⰾ҃ⱔ ⰵⰿⱆ. ⰳ҃ⰻ ⱀⰵ ⰴⰲⰻⰶⰻ ⱄⱔ. ⱀⱑⱄⰿⱐ ⰱⱁ ⰴⱁⱄⱅⱁⰺ҅ⱀⱏ. ⰴⰰ ⱂⱁⰴⱏ ⰽⱃⱁⰲⱏ ⰿⱁⰹ ⰲⱐⱀⰻⰴⰵⱎⰻ.

ⱅⱑⰿⱐ ⰶⰵ ⱀⰵ ⱄⰵⰱⰵ ⰴⱁⱄⱅⱁⰺⱀⰰ ⱄⱏⱅⰲⱁⱃⰻⱈⱏ. ⱂⱃⰻⱅⰻ ⰽⱏ ⱅⰵⰱⱑ. ⱀⱏ ⱃⱐⱌⰻ ⱄⰾⱁⰲⱁⰿⱐ. ⰺ҅ ⰻⱌⱑⰾⱑⱅⱏ ⱁⱅⱃⱁⰽⱏ ⰿⱁⰻ.

ⰺ҅ⰱⱁ ⰰⰸⱏ ⱍⰽ҃ⱏ ⰵⱄⰿⱐ ⱂⱁⰴⱏ ⰲⰾⰰⱄⱅⰵⰾⱏⰹ. ⱆⱍⰻⱀ̑ⰵⱀⱏ. ⰺ҅ⰿⱑⱗ ⱂⱁⰴⱏ ⱄⱁⰱⱁⱙ ⰲⱁⱗ. ⰺ҅ ⰳⰾ҃ⱙ ⱄⰵⰿⱆ ⰺ҅ⰴⰻ. ⰺ҅ ⰻⰴⰵⱅⱏ. ⰺ҅ ⰴⱃⱆⰳⱆⰿⱆ ⱂⱃⰻⰴⰻ. ⰺ҅ ⱂⱃⰻⰴⰵⱅⱏ. ⰺ҅ ⱃⰰⰱⱆ ⰿⱁⰵⰿⱆ. ⱄⱏⱅⰲⱁⱃⰻ ⱄⰵ ⰺ҅ ⱄⱏⱅⰲⱁⱃⰻⱅⱏ.

ⰺ҅ ⱄⰾⱏⰹⱎⰰⰲⱏ ⱄⰵ ⰻⱄ҃. ⱍⱓⰴⰻ ⱄⱔ ⰵⰿⱆ. ⰺ҅ ⱁⰱⱃⰰⱎⱅⱐ ⱄⱔ ⱂⱁⱄⰾⱑⰴⱆⱙⱎⱅⱓⰿⱆ ⱀⰰⱃⱁⰴⱆ ⱃⰵⱍⰵ. ⰰⰿⰻⱀⱐ ⰳⰾ̑ⱙ ⰲⰰⰿⱏ. ⱀⰹ ⰲⱏ !ⰺⰾ̑ⰻ ⱅⱁⰾⰻⰽⱁⱗ ⰲⱑⱃⱏⰹ ⱀⰵ ⱁⰱⱃⱑⱅⱏ.

ⰺ҅ ⰲⱏⰸⰲⱃⰰⱎⱅⱐ ⱄⱔ ⰲⱏ ⰴⱁⰿⱏ ⱂⱁⱄⱏⰾⰰⱀⱏⰹ. ⱁⰱⱃⱑⱅⱘ ⰱⱁⰾⱔⱎⱅⰰⰰⰳⱁ ⱃⰰⰱⰰ ⰺ҅ⱌⱑⰾⱑⰲⱏⱎⰰ.

Ⰺ҅ ⰱⱏⰹⱄⱅⱏ ⰲⱏ ⱂⱃⱁⱍⰻⰹ. ⰺ҅ⰴⱑⰰⱎⰵ ⰲⱏ ⰳⱃⰰⰴⱏ ⱀⰰⱃⰻⱌⰰⰵⰿⱏⰹ ⱀⰰⰺ҅ⱀⱏ. ⰺ҅ ⱄⱏ ⱀ̑ⰻⰿⱐ ⰺ҅ⰴⱑⰰⱈⱘ ⱆⱍⰵⱀⰻⱌⰻ ⰵⰳⱁ. ⰺ҅ ⱀⰰⱃⱁⰴⱏ ⰿⱀⱁⰳⱏ.

ⱑⰽⱁ ⰶⰵ ⱂⱃⰻⰱⰾⰻⰶⰻ ⱄⱔ ⰽⱏ ⰲⱃⰰⱅⱁⰿⱏ ⰳⱃⰰⰴⰰ. ⰺ҅ ⱄⰵ ⰺ҅ⰸⱀⱁⱎⰰⰰⱈⱘ ⱆⰿⱐⱃⱏⱎⱐ ⱄⱀ҃ⱏ. ⰺ҅ⱀⱁⱍⱔⰴⱏ ⰿⰰⱅⰵⱃⰻ ⱄⰲⱁⰵⰹ. ⰺ҅ ⱅⰰ ⰱⱑ ⰲⱏⰴⱁⰲⰰ. ⰺ҅ ⱀⰰⱃⱁⰴⱏ ⱁⱅⱏ ⰳⱃⰰⰴⰰ ⰿⱀⱁⰳⱏ ⰱⱑ ⱄⱏ ⱀ̑ⰵⱙ.

ⰺ҅ ⰲⰻⰴⱑⰲⱏ ⱙ ⰳ҃ⱐ ⰿⰻⰾⱁⱄⱃⱏⰴⱁⰲⰰ ⱙ. ⰺ҅ ⱃⰵⱍⰵ ⰵⰹ ⱀⰵ ⱂⰾⰰⱍⰻ ⱄⱔ

ⰺ҅ ⱂⱃⰻⱄⱅⱘⱂⰾⱐ ⰽⱁⱄⱀⱘ ⰲⱏ ⱁⰴⱃⱏ. ⱀⱁⱄⱔⱎⱅⰵⰺ ⰶⰵ ⱄⱅⰰⱎⱔ. ⰺ҅ ⱃⰵⱍⰵ. ⱓⱀⱁⱎⰵ. ⱅⰵⰱⱑ ⰳⰾ̑ⱙ ⰲⱏⱄⱅⰰⱀⰻ.

ⰺ ⱄⱑⰴⰵ ⰿⱃⱏⱅⰲⱏⰺ. ⰺ҅ ⱀⰰⱍⱔⱅⱏ ⰳⰾ҃ⰰⱅⰻ.

Ⱂⱃⰻⱗⱅⱏ ⰶⰵ ⱄⱅⱃⰰⱈⱏ ⰲⱄⱔ. ⰺ҅ ⱄⰾⰰⰲⰾ̑ⱑⰰⱈⱘ ⰱ҃ⰰ ⰳⰾ҃ⱙⱎⱅⰵ. ⱑⰽⱁ ⱂⱃⱁⱃⱁⰽⱏ ⰲⰵⰾⰻⰽⱏ ⰲⱏⱄⱅⰰ ⰲⱏ ⱀⰰⱄⱏ. ⰺ҅ ⱑⰽⱁ ⱂⱁⱄⱑⱅⰻ ⰳ҃ⱐ ⰱ҃ⱏ ⰾ̑ⱓⰴⰻⰹ ⱄⰲⱁⰺⱈⱏ.

Ⰺ҅ ⰻⰸⰻⰴⰵ ⱄⰾⱁⰲⱁ ⱄⰵ ⱂⱁ ⰲⱄⰵⰹ ⰺ҅ⱓⰴⰵⰹ ⱁ ⱀ̑ⰵⰿⱐ. ⰺ҅ ⱂⱁ ⰲⱐⱄⰵⰹ ⱄⱅⱃⰰⱀⱑ.

Ⰺ҅ ⰲⱏⰸⰲⱑⱄⱅⰻⱎⱔ ⰺ҅ⱁⰰⱀⱆ. ⱆⱍⰵⱀⰻⱌⰻ ⰵⰳⱁ. ⱁ ⰲⱄⱑⱈⱏ ⱄⰻⱈⱏ.

ⰺ҅ ⱂⱃⰻⰸⱏⰲⰰⰲⱏ ⰴⱏⰲⰰ ⰵⱅⰵⱃⰰ ⱁⱅⱏ ⱆⱍⰵⱀⰻⰽⱏ ⱄⰲⱁⰺⱈⱏ ⰺ҅ⱁⰰⱀⱏ. ⱂⱁⱄⱏⰾⰰ ⰽⱏ ⰺⱄ҃ⰲⰻ ⰳⰾ҃ⱔ. ⱅⱏⰹ ⰾⰻ ⰵⱄⰻ ⰳⱃⱔⰴⱔⰻ. ⰺ҅ⰾⰻ ⰺ҅ⱀⱁⰳⱁ ⱍⰰⰵⰿⱏ.

ⱂⱃⰻⱎⱐⰴⱏⱎⰰ ⰶⰵ ⰽⱏ ⱀ̑ⰵⰿⱆ ⰿⱘⰶⰰ ⱃⰵⰽⱁⱄⱅⰰ. ⰺ҅ⱁⰰⱀⱏ ⰽⱃⱐⱄⱅⰻⱅⰵⰾ̑ⱐ ⱂⱁⱄⱏⰾⰰ ⱀⱏⰹ ⰽⱏ ⱅⰵⰱⱑ ⰳⰾ҃ⱔ. ⱅⱏⰹ ⰾⰻ ⰵⱄⰻ ⰳⱃⱔⰴⱔⰻ. ⰺ҅ⰾⰻ ⰺ҅ⱀⱁⰳⱁ ⱍⰰⰵⰿⱏ.

ⰲⱏ ⱅⱏ ⱍⰰⱄⱏ ⰺ҅ⱌⱑⰾⰻ ⰿⱀⱁⰳⱏⰹ ⱁⱅⱏ ⱀⰵ..ⰴ=ⱘⰳⱏ= ⰺ҅ ⱃⰰⱀⱏ. ⰺ҅ ⰴⱈ҃ⱏ ⰸⱏⰾⱏ. ⰺ ⰿⱀⱁⰳⱁⰿⱏ ⱄⰾⱑⱂⱁⰿⱏ ⰴⰰⱃⱁⰲⰰ ⱂⱃⱁⰸⱐⱃⱑⱀⱐⰵ.

ⰺ҅ ⱁⱅⱏⰲⱑⱎⱅⰰⰲⱏ ⰻⱄ҃ ⱃⰵⱍⰵ ⰺ҅ⰿⰰ. ⱎⱐⰴⱏⱎⰰ ⰲⱏⰸⰲⱑⱄⱅⰻⱅⰰ ⰺ҅ⱁⰰⱀⱀⱁⰲⰻ. ⱑⰶⰵ ⰲⰻⰴⱑⱄⱅⰰ ⰺ҅ ⱄⰾⱏⰹⱎⰰⱄⱅⰰ. ⱑⰽⱁ ⱄⰾⱑⱂⰻⰹ ⱂⱃⱁⰸⰻⱃⰰⱙⱅⱏ. ⰺ҅ ⱈⱃⱁⰿⰹⰻ ⱈⱁⰴⱔⱅⱏ. ⰺ҅ ⱂⱃⱁⰽⰰⰶⰵⱀⰻⰹ ⱁⱍⰻⱎⱅⰰⱙⱅⱏ ⱄⱔ. ⰺ҅ ⰳⰾⱆⱄⰻⰹ ⱄⰾⱏⰹⱎⱔⱅⱏ. ⰿⱃⱏⱅⰲⰻⰹ ⰲⱏⱄⱅⰰⱙⱅⱏ. ⱀⰻⱎⱅⰻⰹ ⰱⰾⰰⰳⱁⰲⱑⱄⱅⰲⱆⱙⱅⱏ.

ⰺ҅ ⰱⰾⰰⰶⱐⱀⱏ ⰵⱄⱅⱏ ⰺ҅ⰶⰵ ⰰⱎⱅⰵ ⱀⰵ ⱄⱏⰱⰾⰰⰸⱀⰻⱅⱏ ⱄⱔ ⱁ ⰿⸯⱀⱑ.

ⱁⱎⱐⰴⱏⱎⰵⰿⰰ ⰶⰵ ⱆⱍⰵⱀⰻⰽⱁⰿⰰ ⰺ҅ⱁⰰⱀⱁⰲⱁⰿⰰ. ⱀⰰⱍⱔⱅⱏ ⰳⰾ҃ⰰⱅⰻ ⰽⱏ ⱀⰰⱃⱁⰴⱁⰿⱏ ⱁ ⰺ҅ⱁⰰⱀⸯⱀⱑ. ⱍⰵⱄⱁ ⰺ҅ⰸⰻⰴⱁⱄⱅⰵ ⰲⱏ ⱂⱆⱄⱅⱏⰹⱀ̑ⱙ ⰲⰻⰴⱑⱅⱏ. ⱅⱃⱐⱄⱅⰻ ⰾⰻ ⰲⱑⱅⱃⱁⰿⱐ ⰴⰲⰻⰶⰵⰿⱏⰹ.

ⱀⱏ ⱍⰵⱄⱁ ⰺ҅ⰸⰻⰴⱁⱄⱅⰵ ⰲⰻⰴⱑⱅⱏ. ⱍⰽ҃ⰰ ⰾⰻ. ⰿⱔⰽⱏⰽⰰⰿⰻ ⱃⰻⰸⰰⰿⰻ ⱁⰴⱑⱀⰰ. ⱄⰵ ⰺ҅ⰶⰵ ⰲⱏ ⱁⰴⰵⰶⰴⰻ ⱄⰾⰰⰲⱐⱀⱑ. ⰺ҅ ⰲⱏ ⱂⰻⱎⱅⰻ ⰿⸯⱀⱁⰸⱑ ⱄⱘⱎⱅⰵ. ⰲⱐ ⱌⱃ҃ⱄⱅⰲⰹⰻⱈⱏ ⱄⱘⱅⱏ.

ⱀⱏ ⱍⰵⱄⱁ ⰺ҅ⰸⰻⰴⱁⱄⱅⰵ ⰲⰻⰴⱑⱅⱏ. ⱂⱃⱁⱃⱁⰽⰰ ⰾⰻ. ⰵⰺ. ⰳⰾ҃ⱙ ⰲⰰⰿⱏ. ⰺ҅ ⰾⰻⱎⰵ !ⱂⱃⱁ!ⱃⰽⰰ.

Ⱄⱐ ⰱⱁ ⰵⱄⱅⱏ ⱁ ⱀ̑ⰵⰿⱐⰶⰵ. ⱄⸯⱂⰰⱀⱁ ⰵⱄⱅⱏ. ⱄⰵ ⰰⰸⱏ ⱂⱁⱄⱏⰾ̑ⱙ ⰰⰼ҃ⰾⱏ ⰿⱁⰻ. ⱂⱃⱑⰴⱏ ⰾⰻⱌⰵⰿⱐ ⱅⰲⱁⰺⰿⱐ. ⰺ҅ⰶⰵ ⱆⰳⱁⱅⱁⰲⰰⰵⱅⱏ ⱂⱘⱅⱐ ⱅⰲⱁⰹ ⱂⱃⱑⰴⱏ ⱅⱁⰱⱁⱙ.

!Ⰳⰾⱙ ⰶⰵ ⰲⰰⰿⱏ. ⰱⱁⰾ̑ⰻⰹ ⱃⱁⰶⰴⰵⱀⱏⰹⱈⱏ ⰶⰵⱀⰰⰿⰻ ⱂⱃⱁⱃⱁⰽⱏ. ⰺ҅ⱁⰰⱀⱀⰰ ⰽⱃⱐⱄⱅⰻⱅⰵⰾ̑ⱑ ⱀⰻⰽⱏⱅⱁⰶⰵ ⱀⱑⱄⱅⱏ. ⰿⱐⱀ̑ⰻⰹ ⰶⰵ ⰲⱏ ⱌⱃ҃ⱄⰻ ⰱⰶ҃ⰹⰻ ⰱⱁⰾ̑ⰻⰹ ⰵⰳⱁ ⰵⱄⱅⱏ.

Ⰺ҅ ⰲⱄⰻ ⰾ̑ⱓⰴⱐⰵ ⱄⰾⱏⰹⱎⰰⰲⱏⱎⰵ. ⰺ҅ ⰿⱏⰹⱅⰰⱃⰵ. ⱁⱂⱃⰰⰲⱐⰴⰻⱎⱔ ⰱ҃ⰰ. ⰽⱃⱐⱎⱅⱐⱎⰰ ⱄⱔ ⰽⱃⱐⱎⱅⰵⱀⱐⰵⰿⱐ ⰺ҅ⱁⰰⱀⱁⰲⱁⰿⱐ.

ⱇⰰⱃⰻⱄⱑⰺ҅ ⰶⰵ ⰺ҅ ⰸⰰⰽⱁⱀⱐⱀⰻⱌⰻ. ⱄⱏⰲⱑⱅⱏ ⰱⰶ҃ⰹⰻ ⱁⱅⱏⰲⱃⱏⰳⱘ ⰲⱏ ⱄⰵⰱⱑ. ⱀⰵ ⰽⱃⰵⱎⱅⱐⱎⰵ ⱄⱔ ⱁⱅⱏ ⱀ̑ⰵⰳⱁ.

ⰽⱁⰿⱆ ⱆⱂⱁⰴⱁⰱⰾ̑ⱙ ⱍⰽ҃ⱏⰹ ⱃⱁⰴⰰ ⱄⰵⰳⱁ. ⰺ҅ ⰽⱁⰿⱆ ⱄⱘⱅⱏ ⱂⱁⰴⱁⰱⱐⱀⰻ.

ⱂⱁⰴⱁⰱⱐⱀⰻ ⱄⱘⱅⱏ ⱁⱅⱃⱁⱍⰻⱎⱅⰵⰿⱏ. ⱄⱑⰴⱔⱎⱅⰵⰿⱏ ⱀⰰ ⱅⱃⱏⰶⰻⱎⱅⰻⱈⱏ. ⰺ҅ ⱂⱃⰻⰳⰾⰰⱎⰰⱙⱎⱅⰵ ⰴⱃⱆⰳⱏ ⰴⱃⱆⰳⰰ. ⰺ҅ !ⰳⰾⱙⱅⱏ. ⱄⰲⰻⱃⰰⱈⱁⰿⱏ ⰲⰰⰿⱏ ⰺ҅ ⱀⰵ ⱂⰾⱔⱄⰰⱄⱅⰵ. ⱂⰾⰰⰽⰰⱈⱁⰿⱏ ⱄⱔ ⰲⰰⰿⱏ ⰺ҅ ⱀⰵ ⱂⰾⰰⰽⰰⱄⱅⰵ.

ⱂⱃⰻⰴⰵ ⰱⱁ ⰺ҅ⱁⰰⱀⱏ ⰽⱃⱐⱄⱅⰻⱅⰵⰾ̑ⱐ. ⱀⰻ ⱈⰾⱑⰱⰰ ⱑⰴⱏⰹ. ⱀⰻ ⰲⰻⱀⰰ ⱂⱐⱗ. ⰺ҅ ⰳⰾ҃ⰵⱅⰵ ⰱⱑⱄⱏ ⰺ҅ⰿⰰⱅⱏ.

ⱂⱃⰻⰴⰵ ⱄⱀ҃ⱏ ⱍⱄ҃ⰽⱏⰹ. ⱑⰴⱏⰹ ⰻ ⱂⱐⱗ. ⰺ҅ ⰳⰾ҃ⰵⱅⰵ. ⱄⰵ ⱍⰽ҃ⱏ. ⱑⰴⱐⱌⰰ. ⰺ҅ ⰲⰻⱀⱁⱂⰻⰲⱐⱌⰰ. ⰴⱃⱆⰳⱏ ⰿⱏⰹⱅⰰⱃⰵⰿⱏ ⰺ҅ ⰳⱃⱑⱎⱐⱀⰻⰽⱁⰿⱏ.

ⰺ҅ ⱁⱂⱃⰰⰲⱐⰴⰻ ⱄⱔ ⱂⱃⱑⰿⱘⰴⱃⱁⱄⱅⱐ. ⱁⱅⱏ ⰲⱄⱑⱈⱏ ⱍⱔⰴⱏ ⱄⰲⱁⰺ҅ⱈⱏ.

Ⰿⱁⰾ̑ⱑⰰⱎⰵ ⰶⰵ ⰹ. ⰵⱅⰵⱃⱏ ⱁⱅⱏ ⱇⰰⱃⰻⱄⱑⰹ. ⰴⰰ ⰱⰻ ⱑⰾⱏ ⱄⱏ ⱀ̑ⰻⰿⱐ. ⰺ҅ ⰲⱏⱎⱐⰴⱏ ⰲⱏ ⰴⱁⰿⱏ ⱇⰰⱃⰻⱄⱑⱁⰲⱏ ⰲⱐⰸⰾⰵⰶⰵ.

Ⰺ҅ ⱄⰵ ⰶⰵⱀⰰ ⰲⱏ ⰳⱃⰰⰴⱑ. ⱑⰶⰵ ⰱⱑ ⰳⱃⱑⱎⱐⱀⰻⱌⰰ. ⰺ҅ ⱆⰲⱑⰴⱑⰲⱏⱎⰻ ⱑⰽⱁ ⰲⱏⰸⰾⰵⰶⰻⱅⱏ ⰲⱏ ⱈⱃⰰⰿⰻⱀⱑ ⱇⰰⱃⰻⱄⱑⱁⰲⱑ. ⱂⱃⰻⱀⰵⱄⱏⱎⰻ ⰰⰾⰰⰲⰰⱄⱅⱃⱏ ⰿⸯⱛⱃⰰ.

ⰺ҅ ⱄⱅⰰⰲⱏⱎⰻ ⰸⰰⰴⰻ ⱂⱃⰻ ⱀⱁⰳⱆ ⰵⰳⱁ. ⱂⰾⰰⱍⱘⱎⱅⰻ ⱄⱔ. ⱀⰰⱍⱔⱅⱏ ⰿⱁⱍⰻⱅⰻ ⱀⱁⰸⱑ ⰵⰳⱁ ⱄⰾⱐⰸⰰⰿⰻ. ⰺ҅ ⰲⰾⰰⱄⱏⰹ ⰳⰾⰰⰲⱏⰹ ⱄⰲⱁⰵⱗ ⱁⱅⰻⱃⰰⰰⱎⰵ. ⰺ҅ ⱁⰱⰾⱁⰱⱏⰹⰸⰰⰰⱎⰵ ⱀⱁⰸⱑ ⰵⰳⱁ. ⰺ҅ ⰿⰰⰸⰰⰰⱎⰵ ⰿⸯⱛⱃⱁⰿⱐ.

ⰲⰻⰴⱑⰲⱏ ⰶⰵ ⱇⰰⱃⰻⱄⰵⰹ. ⰲⱏⰸⱏⰲⰰⰲⱏⰹ ⰵⰳⱁ. ⱃⰵⱍⰵ. ⰲⱐ ⱄⰵⰱⱑ ⰳⰾ҃ⱔ. ⱄⱐ ⰰⱎⱅⰵ ⰱⰻ ⰱⱏⰹⰾⱏ !ⱂⱃⱁ!ⱃⰽⱏ. ⰲⱑⰴⱑⰾⱏ ⰱⰻ ⱆⰱⱁ. ⰺ҅ ⰽⰰⰽⱁⰲⰰ ⰶⰵⱀⰰ ⱂⱃⰻⰽⰰⱄⰰⰵⱅⱏ ⱄⱔ ⰵⰿⱐ. ⱑⰽⱁ ⰳⱃⱑⱎⱐⱀⰻⱌⰰ ⰵⱄⱅⱏ.

ⱉⱅⱏⰲⱑⱎⱅⰰⰲⱏ ⰶⰵ ⰻⱄ҃. ⱃⰵⱍⰵ ⰽⱏ ⱀ̑ⰵⰿⱆ. ⱄⰻⰿⱁⱀⰵ. ⰺ҅ⰿⰰⰿⱐ ⱅⰻ ⱀⱑⱍⱐⱅⱁ ⱃⰵⱎⱅⰻ. ⱁⱀⱏ ⰶⰵ ⱃⰵⱍⰵ. ⱆⱍⰻⱅⰵⰾ̑ⱓ ⱃⱐⱌⰻ.

ⰴⱏⰲⰰ ⰴⰾⱏⰶⱐⱀⰻⰽⰰ ⰱⱑⰰⱎⰵⱅⰵ ⰸⰰⰺ҅ⰿⱁⰴⰰⰲⱐⱌⱓ ⰵⱅⰵⱃⱆ. ⰵⰴⰻⱀⱏ ⰱⱑ ⰴⰾⱏⰶⱐⱀⱏ. ⱂⱔⱅⱐⱙ ⱄⱏⱅⱏ ⰴⰻⱀⰰⱃⱐ. ⰰ ⰴⱃⱆⰳⱏⰹ ⱂⱔⱅⱐⱙ ⰴⰵⱄⱔⱅⱏ.

ⱀⰵ ⰺⰿⱘⱎⱅⰵⰿⰰ ⰶⰵ ⰺ҅ⰿⰰ ⰲⱏⰸⰴⰰⱅⰻ. ⱁⰱⱑⰿⰰ ⰺ҅ⰿⰰ ⱁⱅⱏⰴⰰ. ⰽⱁⱅⱁⱃⱏⰹ ⱁⰱⱁⱓ ⱂⰰⱍⰵ ⰲⱐⰸⰾⱓⰱⰻⱅⱏ ⰹ.

ⱁⱅⱏⰲⱑⱎⱅⰰⰲⱏ ⱄⰻⰿⱁⱀⱏ ⱃⰵⱍⰵ. ⱀⰵⱂⱏⱎⱅⱓⱙ ⱑⰽⱁ ⰵⰿⱆⰶⰵ ⰲⱔⱎⱅⰵ ⱁⱅⱏⰴⰰ. ⱁⱀⱏ ⰶⰵ ⱃⰵⱍⰵ ⰵⰿⱆ. ⱂⱃⰰⰲⱐ ⱄⱘⰴⰻⰾⱏ ⰵⱄⰻ.

ⰺ҅ ⱁⰱⱃⰰⱎⱅⱐ ⱄⱔ ⰽⱏ ⰶⰵⱀⱑ. ⱃⰵⱍⰵ ⱄⰻⰿⱁⱀⱆ. ⰲⰻⰴⰻⱎⰻ ⰾⰻ ⱄⱐⱙ ⰶⰵⱀⱘ. ⰲⱐⱀⰻⰴⱏ ⰲⱏ ⰴⱁⰿⱏ ⱅⰲⱁⰹ. ⰲⱁⰴⱏⰹ ⱀⰰ ⱀⱁⰸⱑ ⰿⱁⰹ ⱀⰵ ⰴⰰⱄⱅⱏ. ⱄⰻ ⰶⰵ ⱄⰾⱐⰸⰰⰿⰻ ⱁⰿⱁⱍⰻ ⱀⱁⰸⱑ ⰿⱁⰹ. ⰺ҅ ⰲⰾⰰⱄⱏⰹ ⱄⰲⱁⰺⰿⰻ ⱁⱅⱐⱃ̑ⰵ.

ⰾⱁⰱⱐⰸⰰⱀⱐⱑ ⰿⸯⱀⱑ ⱀⰵ ⰴⰰⱄⱅⱏ. ⱄⰻ ⰶⰵ ⱁⱅⱏⱀ̑ⰵⰾⰻⰶⰵ ⰲⱐⱀⰻⰴⱏ. ⱀⰵ ⱂⱃⱑⱄⱅⰰ ⱁⰱⰾⱁⰱⱏⰹⰸⰰⱙⱎⱅⰻ ⱀⱁⰳⱆ ⰿⱁⰵⱓ.

ⰿⰰⱄⰾⱁⰿⱐ ⰳⰾⰰⰲⱏⰹ ⰿⱁⰵⱗ ⱀⰵ ⱂⱁⰿⰰⰸⰰ. ⱄⰻ ⰶⰵ ⰿⸯⱛⱃⱁⰿⱐ ⱂⱁⰿⰰⰸⰰ ⱀⱁⰷⱑ ⰿⱁⰹ.

ⰵⰳⱁⰶⰵ ⱃⰰⰴⰻ ⰳⰾ҃ⱙ ⱅⰻ. ⱁⱅⱏⱂⱆⱎⱅⰰⱙⱅⱏ ⱄⱔ ⰵⰹ ⰳⱃⱑⱄⰻ ⰿⱀⱁⰸⰹⰻ. ⱑⰽⱁ ⰲⱐⰸⰾ̑ⱓⰱⰻ ⰿⱀⱁⰳⱁ. ⰰ ⰵⰿⱆⰶⰵ ⰿⱐⱀ̑ⰵ ⱁⱅⱏⱂⱆⱎⱅⰰⰵⱅⱏ ⱄⱔ. ⰿⱐⱀ̑ⱐⱎⱐⰿⰻ ⰾ̑ⱓⰱⰻⱅⱏ.

ⱃⰵⱍⰵ ⰶⰵ ⰵⰺ ⱁⱅⱏⱂⱆⱎⱅⰰⱙⱅⱏ ⱄⱔ ⱅⰵⰱⱑ ⰳⱃⱑⱄⰻ.

ⰺ҅ ⱀⰰⱍⱔⱎⱔ ⰲⱐⰸⰾⰵⰶⱔⱎⱅⰵⰹ ⱄⱏ ⱀ̑ⰻⰿⱐ. ⰳⰾ҃ⰰⱅⰻ ⰲⱐ ⱄⰵⰱⱑ. ⰽⱏⱅⱁ ⱄⱐ ⰵⱄⱅⱏ. ⱑⰽⱁ ⰺ҅ ⰳⱃⱑⱈⱏⰹ ⱁⱅⱏⱂⱆⱎⱅⰰⰵⱅⱏ.

ⱃⰵⱍⰵ ⰶⰵ ⰽⱏ ⰶⰵⱀⱑ. ⰲⱑⱃⰰ ⱅⰲⱁⱑ ⱄⱏⱂⰰⱄⰵ ⱅⱔ. ⰺ҅ⰴⰻ ⰲⱏ ⰿⰻⱃⱏ.