ЕВАНГЕЛИЕ ЕЖЕ Ѿ ЛОУКꙐ
6:1
Ⰱⱏⰹⱄⱅⱏ ⰶⰵ ⰲⱏ ⱄⱘⰱⱁⱅⱘ. ⰲⱏⱅⱁⱃⱁⱂⱃⱐⰲⱏⰹ. ⰺ҅ⱅⰻ ⰵⰿⱆ ⱄⰽⰲⱁⰸⱑ ⱄⱑⰰⱀⱐⱑ. ⰺ҅ ⰲⱏⱄⱅⱃⱏⰸⰰⰰⱈⱘ ⱆⱍⰵⱀⰻⱌⰻ ⰵⰳⱁ ⰽⰾⰰⱄⱏⰹ. ⰺ҅ ⱑⰴⱑⰰⱈⱘ ⰺ҅ⱄⱅⰻⱃⰰⱙⱎⱅⰵ ⱃⱘⰽⰰⰿⰰ.
6:2
ⰵⱅⰵⱃⰻⰹ ⰶⰵ. ⱁⱅⱏ ⱇⰰⱃⰻⱄⱑⰹ ⱃⱑⱎⱔ ⰺ҅ⰿⱏ. ⱍⱐⱅⱁ ⱅⰲⱁⱃⰻⱅⰵ. ⰵⰳⱁⰶⰵ ⱀⰵ ⰴⱁⱄⱅⱁⰺ҅ⱅⱏ ⱅⰲⱁⱃⰻⱅⰻ ⰲⱏ ⱄⱘⰱⱁⱅⱘ.
6:3
ⰺ҅ ⱁⱅⱏⰲⱑⱎⱅⰰⰲⱏ ⰻⱄ҃ ⱃⰵⱍⰵ ⰽⱏ ⱀ̑ⰻⰿⱏ. ⱀⰻ ⰾⰻ ⱄⰵⰳⱁ ⰵⱄⱅⰵ ⱍⱐⰾⰻ. ⰵⰶⰵ ⱄⱏⱅⰲⱁⱃⰻ ⰴⰰ҃ⰴⱏ. ⰵⰳⰴⰰ ⰲⱏⰸⰾⰰⰽⰰ ⱄⰰⰿⱏ. ⰺ҅ ⰻⰶⰵ ⰱⱑⰰⱈⱘ ⱄⱏ ⱀⰻⰿⱐ.
6:4
ⰽⰰⰽⱁ ⰲⱐⱀⰻⰴⰵ ⰲⱏ ⰴⱁⰿⱏ ⰱⰶ҃ⰹⰻ. ⰺ҅ ⱈⰾⱑⰱⱏⰹ ⱂⱃⱑⰴⱏⰾⱁⰶⰵⱀⱐⱑ ⱑⱄⱅⱏ. ⰺ҅ ⰴⰰⱄⱅⱏ ⱄⱘⱎⱅⰹⰿⱏ ⱄⱏ ⱀ̑ⰻⰿⱐ. ⰺ҅ⱈⱏⰶⰵ ⱀⰵ ⰴⱁⱄⱅⱁⱑⱎⰵ ⱑⱄⱅⰻ. ⱅⱏⰽⱏⰿⱁ ⰺ҅ⰵⱃⱑⱁⰿⱏ ⰵⰴⰻⱀⱑⰿⱏ.
6:5
ⰺ҅ ⰳⰾⰰⰰⱎⰵ ⰺ҅ⰿⱏ. ⱑⰽⱁ ⰳ҃ⱐ ⰵⱄⱅⱏ ⱄⱀ҃ⱏ ⱍⱄ҃ⰽⱏⰺ ⱄⱘⰱⱁⱅⱑ.
6:6
Ⰱⱏⰹⱄⱅⱏ ⰶⰵ ⰲⱏ ⰴⱃⱆⰳⱘⱙ ⱄⱘⰱⱁⱅⱘ. ⰲⱐⱀⰻⱅⰻ ⰵⰿⱆ. ⰲⱏ ⱄⱏⱀⱏⰿⰻⱎⱅⰵ ⰺ҅ ⱆⱍⰻⱅⰻ. Ⰺ ⰱⱑ ⱍⰽ҃ⱏ ⱅⱆ. ⰺ҅ ⱃⱘⰽⰰ ⰴⰵⱄⱀⰰⰰ ⰵⰳⱁ ⰱⱑ ⱄⱆⱈⰰ.
6:7
ⰺ҅ ⱀⰰⰸⰻⱃⰰⰰⱈⱘ ⰹ ⰽⱏⱀ̑ⰻⰶⱐⱀⰻⱌⰻ. ⰰⱎⱅⰵ ⰲⱏ ⱄⱘⰱⱁⱅⱘ ⰺ҅ⱌⱑⰾⰻⱅⱏ ⰺ. ⰴⰰ ⱁⰱⱃⱔⱎⱅⱘⱅⱏ ⱃⱑⱍⱐ ⱀⰰ ⱀ̑ⱐ.
6:8
ⱁⱀⱏ ⰶⰵ ⰲⱑⰴⱑⰰⱎⰵ ⱂⱁⰿⱏⰹⱎⰾ̑ⰵⱀⱐⱑ ⰺ҅ⱈⱏ. ⰺ҅ ⱃⰵⱍⰵ ⰿⱘⰶⰵⰲⰻ ⰺ҅ⰿⱘⱎⱅⱓⰵⰿⱆ. ⱄⱆⱈⱘ ⱃⱘⰽⱘ. ⰲⱏⱄⱅⰰⱀⰻ. ⰺ҅ ⱄⱅⰰⱀⰻ ⱂⱁⱄⱃⱑⰴⱑ. ⱁⱀⱏ ⰶⰵ ⰲⱏⱄⱅⰰ.
6:9
ⱃⰵⱍⰵ ⰶⰵ ⰻⱄ҃ ⰽⱏ ⱀ̑ⰻⰿⱏ. ⰲⱏⱂⱃⱁⱎⱘ ⰲⱏⰹ. ⰰⱎⱅⰵ ⰴⱁⱄⱅⱁⰺ҅ⱅⱏ ⰲⱏ ⱄⱘⰱⱁⱅⱏⰹ ⰴⱁⰱⱃⱁ ⱅⰲⱁⱃⰻⱅⰻ. ⰾⰻ ⰸⱏⰾⱁ ⱄⱏⱅⰲⱁⱃⰻⱅⰻ. ⰴⱎ҃ⱘ ⱄⱂ҃ⱄⱅⰻ ⰾⰻ ⱂⱁⰳⱆⰱⰻⱅⰻ.
6:10
ⰺ ⰲⱏⰸⱐⱃⱑⰲⱏ ⱀⰰ ⰲⱄⱔ ⱃⰵⱍⰵ ⰵⰿⱆ. ⱂⱃⱁⱄⱅⱐⱃⰻ ⱃⱘⰽⱘ ⱅⰲⱁⱙ. ⱁⱀⱏ ⰶⰵ ⱂⱃⱁⱄⱅⱐⱃⱑⱅⱏ. ⰺ҅ ⱆⱅⰲⱃⱏⰴⰻ ⱄⱔ ⱃⱘⰽⰰ ⰵⰳⱁ ⱑⰽⱏⰹ ⰴⱃⱆⰳⰰⱑ.
6:11
ⱁⱀⰻ ⰶⰵ ⰺ҅ⱄⱂⰾⱏⱀⰻⱎⱔ ⱄⱔ ⰱⰵⰸⱆⰿⰻⱑ. ⰺ҅ ⰳⰾ҃ⰰⰰⱈⱘ ⰴⱃⱆⰳⱏ ⰽⱏ ⰴⱃⱆⰳⱆ. ⱍⱐⱅⱁ ⱆⰱⱁ ⰱⰻⱎⱔ ⱄⱏⱅⰲⱁⱃⰻⰾⰻ ⰺⱄ҃ⰲⰻ.
6:12
Ⰱⱏⰹⱄⱅⱏ ⰶⰵ ⰲⱏ ⰴⱐⱀⰻ ⱅⱏⰹ. ⰺ҅ⰸⰻⰴⰵ ⰲⱏ ⰳⱁⱃⱘ ⰿⱁⰾⰻⱅⰻ ⱄⱔ. ⰺ҅ ⰱⱑ ⱁⰱ ⱀⱁⱎⱅⱐ ⰲⱏ ⰿⱁⰾⰻⱅⰲⱑ ⰱⰶ҃ⰹⰻ.
6:13
ⰺ҅ ⰵⰳⰴⰰ ⰱⱏⰹⱄⱅⱏ ⰴⱐⱀⱐ. ⱂⱃⰻⰳⰾⰰⱄⰻ ⱆⱍⰵⱀⰻⰽⱏⰹ ⱄⰲⱁⱗ. ⰺ҅ ⰻⰸⰱⱏⱃⰰ ⱁⱅⱏ ⱀ̑ⰻⱈⱏ ⰱ҃ ⰺ҃. ⱗⰶⰵ ⰺ҅ ⰰⱂ҃ⱁⰾⱏⰹ ⱀⰰⱃⰵⱍⰵ.
6:14
ⱄⰻⰿⱁⱀⰰ ⰵⰳⱁⰶⰵ ⰺ҅ⰿⰵⱀⱁⰲⰰ ⱂⰵⱅⱃⰰ. ⰺ҅ ⰰⱀⸯⰴⱃ ⱆ ⰱⱃⰰⱅⱃⰰ ⰵⰳⱁ. ⰺ҅ ⱑⰽⱁⰲⰰ. ⰺ҅ ⱁⰰⱀⱀⰰ. ⱇⰻⰾⰻⱂⰰ. ⰺ҅ ⰲⰰⱃⸯⱅⱁⰾⱁⰿⱑⰰ.
6:15
ⰺ҅ ⰿⰰⱅⸯⱅⰵⰰ. ⰺ҅ ⱅⸯⱁⰿⱘ. ⰺ҅ ⱑⰽⱁⰲⰰ ⰰⰾⱐⱇⰵⱁⰲⰰ. ⰺ҅ ⱄⰻⰿⱁⱀⰰ ⱀⰰⱃⰻⱌⰰⰵⰿⰰⰰⰳⱁ ⰸⰻⰾⱁⱅⰰ.
6:16
ⰺ҅ ⱓⰴⱘ ⰺ҅ⱑⰽⱁⰲⰾ̑ⱑ. ⰺ҅ ⰻⱓⰴⱘ ⰺ҅ⱄⰽⰰⱃⰻⱁⱅⱐⱄⰽⰰⰰⰳⱁ. ⰺ҅ⰶⰵ ⰱⱏⰹ!ⱄ ⰺ҅ ⱂⱃⱑⰴⰰⱅⰵⰾ̑ⱐ.
6:17
Ⰺ ⱄⱏⱎⱐⰴⱏ ⱄⱏ ⱀ̑ⰻⰿⰻ ⱄⱅⰰ ⱀⰰ ⰿⱑⱄⱅⱑ ⱃⰰⰲⱐⱀⱑ. ⰺ҅ ⱀⰰⱃⱁⰴⱏ ⱆⱍⰵⱀⰻⰽⱏ ⰵⰳⱁ. ⰺ҅ ⰿⱀⱁⰶⱐⱄⱅⰲⱁ ⰿⱀⱁⰳⱁ ⰾ̑ⱓⰴⰻⰹ. ⱁⱅⱏ ⰲⱐⱄⰵⱗ ⰺ҅ⱓⰴⱑⱗ. ⰺ҅ ⰻⰾ҃ⰿⰰ. ⰺ҅ ⱂⱁⰿⱁⱃⱐⱑ ⱅⸯⱛ҅ⱃⱐⱄⰽⰰⱑ. ⰺ҅ ⱄⰻⰴⱁⱀⱐⱄⰽⰰ. ⰺ҅ⰶⰵ ⱂⱃⰻⰴⱘ ⱂⱁⱄⰾⱆⱎⰰⱅⱏ ⰵⰳⱁ. ⰺ҅ ⰻⱌⱑⰾⰻⱅⰻ ⱄⱔ. ⱁⱅⱏ ⱀⰵⰴⱘⰳⱏ ⱄⰲⱁⰺ҅ⱈⱏ.
6:18
ⰺ҅ ⱄⱅⱃⰰⰶⰴⱘⱎⱅⰵⰹ. ⱁⱅⱏ ⰴⱈ҃ⱏ ⱀⰵⱍⰻⱄⱅⱏ. ⱌⱑⰾ̑ⱑⰰⱈⱘ ⱄⱔ.
6:19
ⰺ҅ ⰲⱐⱄⱐ ⱀⰰⱃⱁⰴⱏ ⰺ҅ⱄⰽⰰⰰⱎⰵ ⱂⱃⰻⰽⰰⱄⰰⱅⰻ ⱄⱔ ⰵⰿⱐ. ⱑⰽⱁ ⱄⰻⰾⰰ ⰺ҅ⰸ ⱀⰵⰳⱁ ⰺ҅ⱄⱈⱁⰶⰴⰰⰰⱎⰵ. ⰺ҅ ⰻⱌⱑⰾ̑ⱑⰰⱎⰵ ⰲⱐⱄⱔ.
6:20
Ⰺ҅ ⱅⱏ ⰲⱏⰸⰲⰵⰴⱏ ⱁⱍⰻ ⱄⰲⱁⰹ. ⱀⰰ ⱆⱍⰵⱀⰻⰽⱏⰹ ⱄⰲⱁⱗ ⰳⰾ҃ⰰⰰⱎⰵ. Ⰱⰾⰰⰶⰵⱀⰻ ⱀⰻⱎⱅⰻⰹ ⰴⱈ҃ⱁⰿⱐ. ⱑⰽⱁ ⰲⰰⱎⰵ ⰵⱄⱅⱏ ⱌⱃ҃ⱄⱅⰲⰻⰵ ⰱⰶ҃ⰻⰵ.
6:21
Ⰱⰾⰰⰶⰵⱀⰻ ⰾⰰⱍⱘⱎⱅⰵⰹ ⱀⱏⰹⱀ̑ⱑ. ⱑⰽⱁ ⰲⱏⰹ ⱀⰰⱄⱏⰹⱅⰻⱅⰵ ⱄⱔ. Ⰱⰾⰰⰶⰵⱀⰻ ⱂⰾⰰⱍⱘⱎⱅⰵⰹ ⱄⱔ ⱀⱏⰹⱀ̑ⱑ. ⱑⰽⱁ ⰲⱏⰹ ⰲⱏⱄⰿⱑ̆ⰵⱅⰵ ⱄⱔ.
6:22
Ⰱⰾⰰⰶⰵⱀⰻ ⰱⱘⰴⰵⱅⰵ. ⰵⰳⰴⰰ ⰲⱐⰸⱀⰵⱀⰰⰲⰻⰴⱔⱅⱏ ⰲⱏⰹ ⱍⱌ҃ⰻ. ⰺ҅ ⰵⰳⰴⰰ ⱃⰰⰸⰾⱘⱍⱔⱅⱏ ⰲⱏⰹ. ⰺ҅ ⱂⱃⱁⱀ[ⱁ]ⱄ[ⱔ]ⱅⱏ ⰺ҅ⰿⱔ ⰲⰰⱎⰵ. ⱑⰽⱁ ⰸⱏⰾⱁ ⱄⱀ҃ⰰ ⱍⱄ҃ⰽⰰⰳⱁ ⱃⰰⰴⰻ.
6:23
ⰲⱏⰸⰴⱃⰰⰴⱆⰺⱅⰵ ⱄⱔ ⰲⱏ ⱅⱏ ⰴⱐⱀⱐ. ⰺ҅ ⰲⱐⰸⰻⰳⱃⰰⰺ҅ⱅⰵ. ⱄⰵ ⰿⱏⰸⰴⰰ ⰲⰰⱎⰰ ⰿⱀⱁⰳⰰ ⱀⰰ ⱀⰵⰱⰵⱄⰵⱈⱏ. ⱂⱁ ⱄⰻⱈⱏ ⰱⱁ ⱅⰲⱁⱃⱑⰰⱈⱘ ⱂⱃⱁⱃⱁⰽⱁⰿⱏ !ⱁⱌⰻ ⰺ҅ⱈⱏ.
6:24
Ⱉⰱⰰⱍⰵ ⰳⱁⱃⰵ ⰲⰰⰿⱏ ⰱⱁⰳⰰⱅⱏⰺⰿⱏ. ⱑⰽⱁ ⰲⱏⱄⱂⱃⰻⱗⱄⱅⰵ ⱆⱅⱑⱈⱘ ⰲⰰⱎⱘ.
6:25
ⰳⱁⱃⰵ ⰲⰰⰿⱏ ⱀⰰⱄⱏⰹⱎⱅⰵⱀⰻⰹ ⱀⱏⰹⱀⱑ. ⱑⰽⱁ ⰲⱏⱄ[ⱂ]ⰾⰰⱍⰵⱅⰵ ⱄⱔ. Ⰳⱁⱃⰵ ⰲⰰⰿⱏ ⱄⰿⱑⱙⱎⱅⰹⰿⱏ ⱄⱔ ⱀⱏⰹⱀ̑ⱑ. ⱑⰽⱁ ⰲⱏⰸⰴⱏⰹⱈⰰⰵⱅⰵ ⰺ҅ ⰲⱏⱄⱂⰾⰰⱍⰵⱅⰵ ⱄⱔ.
6:26
ⰳⱁⱃⰵ ⰵⰳⰴⰰ ⰴⱁⰱⱃⱑ ⱃⰵⰽⱘⱅⱏ ⱁ ⰲⰰⱄⱏ ⰲⱄⰻ ⱍⱌ҃ⰻ. ⱂⱁ ⱄⰵⰿⱆ ⰱⱁ ⱅⰲⱁⱃⱑⰰⱈⱘ ⰾⱏⰶⰻⰹⰿⱏ ⱂⱃⱁⱃⱁⰽⱁⰿⱏ !ⱁⱌⰻ ⰺ҅ⱈⱏ.
6:27
Ⱀⱏ ⰲⰰⰿⱏ ⰳⰾ̑ⱙ ⱄⰾⱏⰹⱎⱔⱎⱅⰻⰹⰿⱏ. ⰾ̑ⱓⰱⰻⱅⰵ ⰲⱃⰰⰳⱏⰹ ⰲⰰⱎⱔ. ⰴⱁⰱⱃⱁ ⱅⰲⱁⱃⰻⱅⰵ ⱀⰵⱀⰰⰲⰻⰴⱔⱎⱅⰻⰹⰿⱏ ⰲⰰⱄⱏ.
6:28
!ⰱⰳⱄⰲⰻⱅⰵ ⰽⰾⱏⱀⱘⱎⱅⱔⱗ ⰲⱏⰹ. ⰿ̆ⱁⰾⰻⱅⰵ ⱄⱔ ⰸⰰ ⱅⰲⱁⱃⱔⱎⱅⱔⱗ ⰲⰰⰿⱏ ⱁⰱⰻⰴⱘ.
6:29
Ⰱⱐⱙⱎⱅⱓⰿⱆ ⱅⱔ ⰲⱏ ⰴⰵⱄⱀⱘⱙ ⰾⰰⱀⰻⱅⱘ. ⱂⱁⰴⰰⰹ ⰴⱃⱆⰳⱘⱙ. ⰺ҅ ⱁⱅⰵⰿⰾ̑ⱙⱎⱅⱓⰿⱆ ⱅⰵⰱⱑ ⱃⰻⰸⱘ. ⰺ҅ ⱄⱃⰰⱍⰻⱌⱔ ⱀⰵ ⰲⱏⰸⰱⱃⰰⱀⰻ.
6:30
ⰲⱄⱑⰽⱁⰿⱆ ⱂⱃⱁⱄⱔⱎⱅⱓⰿⱆ ⱆ ⱅⰵⰱⰵ ⰴⰰⰹ. ⰺ҅ ⱁⱅⱔⰿⰾ̑ⱙⱎⱅⰰⰰⰳⱁ ⱅⰲⱁⱑ. ⱀⰵ ⰺ҅ⱄⱅⱔⰸⰰⰹ.
6:31
Ⰺ҅ ⱑⰽⱁⰶⰵ ⱈⱁⱎⱅⰵⱅⰵ ⰴⰰ ⱅⰲⱁⱃⱔⱅⱏ ⰲⰰⰿⱏ ⱍⱌ҃ⰻ. ⰺ҅ ⰲⱏⰹ ⱅⰲⱁⱃⰻⱅⰵ ⰺ҅ⰿⱏ ⱅⰰⰽⱁⰶⰴⰵ.
6:32
ⰺ҅ ⰰⱎⱅⰵ ⰾ̑ⱓⰱⰻⱅⰵ ⰾ̑ⱓⰱⱔⱎⱅⱔⱗ ⰲⱏⰹ. ⰽⰰⱑ ⰲⰰⰿⱏ ⱈⰲⰰⰾⰰ ⰵⱄⱅⱏ. ⰺ҅ⰱⱁ ⰺ҅ ⰳⱃⱑⱎⱐⱀⰻⱌⰻ ⰾ̑ⱓⰱⱔⱎⱅⱔⱗ ⰾ̑ⱓⰱⱔⱅⱏ.
6:33
Ⰺ҅ ⰰⱎⱅⰵ ⰱⰾⰰⰳⱁⱅⰲⱁⱃⰻⱅⰵ. ⰱⰾⰰⰳⱁⱅⰲⱁⱃⱔⱎⱅⰻⰹⰿⱏ ⰲⰰⰿⱏ. ⰽⰰⱑ ⰲⰰⰿⱏ ⱈⰲⰰⰾⰰ ⰵⱄⱅⱏ. ⰺ҅ⰱⱁ ⰺ҅ ⰳⱃⱑⱎⱐⱀⰻⱌⰻ ⱅⱁⰶⰴⰵ ⱅⰲⱁⱃⱔⱅⱏ.
6:34
Ⰺ҅ ⰰⱎⱅⰵ ⰲⱏ ⰸⰰⰺ҅ⰿⱏ ⰴⰰⰵⱅⰵ. ⱁⱅⱏ ⱀ̑ⰻⱈⱏⰶⰵ ⱍⰰⰵⱅⰵ ⰲⱏⱄⱂⱃⰻⱗⱅⰻ. ⰽⰰⱑ ⰲⰰⰿⱏ ⱈⰲⰰⰾⰰ ⰵⱄⱅⱏ. ⰺ҅ⰱⱁ ⰺ҅ ⰳⱃⱑⱎⱐⱀⰻⱌⰻ ⰳⱃⱑⱎⱐⱀⰻⰽⱁⰿⱏ ⰲⱏ ⰸⰰⰺ҅ⰿⱏ ⰴⰰⱙⱅⱏ. ⰴⰰ ⰲⱏⱄⱂⱃⰻⰿⱘⱅⱏ ⱃⰰⰲⱏⱀⱁ.
6:35
ⱁⰱⰰⱍⰵ ⰾ̑ⱓⰱⰻⱅⰵ ⰲⱃⰰⰳⱏⰹ ⰲⰰⱎⱔ. ⰺ҅ ⰱⰾⰰⰳⱁⱅⰲⱁⱃⰻⱅⰵ. ⰺ҅ ⰲⱏ ⰸⰰⰺ҅ⰿⱏ ⰴⰰⰺⱅⰵ. ⱀⰻⱍⰵⱄⱁⰶⰵ ⱍⰰⱙⱎⱅⰵ. ⰺ҅ ⰱⱘⰴⰵⱅⱏ ⰿⱏⰸⰴⰰ ⰲⰰⱎⰰ ⰿⱀⱁⰳⰰ. ⰺ҅ ⰱⱘⰴⰵⱅⰵ ⱄⱀ҃ⱁⰲⰵ ⰲⱏⰹⱎⱐⱀ̑ⱑⰰⰳⱁ. ⱑⰽⱁ ⱅⱏ ⰱⰾⰰⰳⱏ ⰵⱄⱅⱏ. ⱀⰰ ⱀⰵⰲⱏⰸⰱⰾⰰⰳⱁⰴⱑⱅⱏⱀⱏⰹⱗ. ⰺ҅ ⰸⱏⰾⱏⰹⱗ.
6:36
Ⰱⱘⰴⱑⱅⰵ ⱆⰱⱁ ⰿⰻⰾⱁⱄⱃⱏⰴⰻ. ⱑⰽⱁⰶⰵ ⱁⱌ҃ⱐ ⰿⰻⰾⱁⱄⱃⱏⰴⱏ ⰵⱄⱅⱏ.
6:37
ⰺ҅ ⱀⰵ ⱄⱘⰴⰻⱅⰵ. ⰴⰰ ⱀⰵ ⱄⱘⰴⱔⱅⱏ ⰲⰰⰿⱏ. ⰺ҅ ⱀⰵ ⱁⱄⱘⰶⰴⰰⰺ҅ⱅⰵ ⰴⰰ ⱀⰵ ⱁⱄⱘⰴⱔⱅⱏ ⰲⰰⱄⱏ. ⱁⱅⱏⱂⱆⱄⱅⰻⱅⰵ ⰺ҅ ⱁⱅⱏⱂⱆⱄⱅⱔⱅⱏ ⰲⱏⰹ.
6:38
ⰴⰰⰺ҅ⱅⰵ ⰺ҅ ⰴⰰⱄⱅⱏ ⱄⱔ ⰲⰰⰿⱏ. ⰿⱑⱃⱘ ⰴⱁⰱⱃⱘ ⱀⰰⱅⱏⰽⰰⱀⱘ. ⰺ҅ ⱂⱁⱅⱃⱘⱄⱏⱀⱘ. ⰺ ⱂⱃⱑⰾⰻⱑⱙⱎⱅⱘ ⱄⱔ. [ⰴⰰ] ⰴⰰⰴⱔⱅⱏ ⱀⰰ ⰾⱁⱀⱁ ⰲⰰⱎⰵ. ⱅⱁⱙ ⰱⱁ ⰿⱑⱃⱁⱙ. ⰵⱙⰶⰵ ⰿⱑⱃⰻⱅⰵ. ⰲⱏⰸⰿⱑⱃⱔⱅⱏ ⰲⰰⰿⱏ.
6:39
ⱃⰵⱍⰵ ⰶⰵ ⱂⱃⰻⱅⱏⱍⱘ ⰺ҅ⰿⱏ. ⰵⰴⰰ ⰿⱁⰶⰵⱅⱏ ⱄⰾⱑⱂⱐⱌⱐ. ⱄⰾⱑⱂⱌⰰ ⰲⱁⰴⰻⱅⰻ. ⱀⰵ ⱁⰱⰰ ⰾⰻ ⰲⱏ ⱑⰿⱘ ⰲⱏⱂⰰⰴⰵⱅⰰ ⱄⱔ.
6:40
ⱀⱑⱄⱅⱏ ⱆⱍⰵⱀⰻⰽⱏ ⱀⰰⰴⱏ ⱆⱍⰻⱅⰵⰾ̑ⰵⰿⱐ ⱄⰲⱁⰺ҅ⰿⱐ. ⱄⱏⰲⱃⱏⱎⰵⱀⱏ ⰶⰵ ⰲⱄⱑⰽⱏ ⰱⱘⰴⰵⱅⱏ. ⱑⰽⱁⰶⰵ ⰺ҅ ⱆⱍⰻⱅⰵⰾ̑ⱐ ⰵⰳⱁ.
6:41
Ⱍⱐⱅⱁ ⰶⰵ ⰲⰻⰴⰻⱎⰻ ⱄⱘⱍⱐⱌⱐ. ⰺ҅ⰶⰵ ⰵⱄⱅⱏ ⰲⱏ ⱁⱍⰵⱄⰵ ⰱⱃⰰⱅⱃⰰ ⱅⰲⱁⰵⰳⱁ. ⰰ ⰱⱃⱐⰲⱏⱀⰰ ⰵⰶⰵ ⰵⱄⱅⱏ ⰲⱏ ⱁⱍⰵⱄⰵ ⱅⰲⱁⰵⰿⱐ ⱀⰵ ⱍⱓⰵⱎⰻ.
6:42
ⰾⰻ ⰽⰰⰽⱁ ⰿⱁⰶⰵⱎⰻ ⱃⰵⱎⱅⰻ ⰱⱃⰰⱅⱃⱆ ⱅⰲⱁⰵⰿⱆ. ⰱⱃⰰⱅⱃⰵ. ⱁⱄⱅⰰⰲⰻ ⰴⰰ ⰺ҅ⰸⱏⰿⱘ ⱄⱘⱍⱐⱌⱐ. ⰺ҅ⰶⰵ ⰵⱄⱅⱏ ⰲⱏ ⱁⱌⱑ ⱅⰲⱁⰵⰿⱐ. ⱄⰰⰿⱏ ⰱⱃⱏⰲⱏⱀⰰ ⰲⱏ ⱁⱌⱑ ⱅⰲⱁⰵⰿⱐ ⱀⰵ ⰲⰻⰴⱔ. ⰾⰻⱌⰵⰿⱑⱃⰵ. ⰺ҅ⰸⱏⰿⰻ ⱂⱃⱏⰲⱑⰵ ⰱⱃⱐⰲⱏⱀⱁ. ⰺ҅ⰸ ⱁⱍⰵⱄⰵ ⱅⰲⱁⰵⰳⱁ. ⰺ҅ ⱅⱏⰳⰴⰰ ⱂⱃⱁⰸⱐⱃⰻⱎⰻ ⰺ҅ⰸⱔⱅⰻ ⱄⱘⱍⱐⱌⱐ. ⰺ҅ⰶⱐ ⰵⱄⱅⱏ ⰲⱏ ⱁⱍⰵⱄⰵ ⰱⱃⰰⱅⱃⰰ ⱅⰲⱁⰵⰳⱁ.
6:43
Ⱀⱑⱄⱅⱏ ⰱⱁ ⰴⱃⱑⰲⱁ ⰴⱁⰱⱃⱁ ⱅⰲⱁⱃⱔ ⱂⰾⱁⰴⰰ ⰸⱏⰾⰰ. ⱀⰻ ⰴⱃⱑⰲⱁ ⰸⱏⰾⱁ ⱅⰲⱁⱃⱔ ⱂⰾⱁⰴⰰ ⰴⱁⰱⱃⰰ.
6:44
ⰲⱄⱑⰽⱁ ⱆⰱⱁ ⰴⱃⱑⰲⱁ ⱁⱅⱏ ⱂⰾⱁⰴⰰ ⱄⰲⱁⰵⰳⱁ ⱂⱁⰸⱀⰰⰵⱅⱏ ⱄⱔ. ⱀⰵ ⱁⱅⱏ ⱅⱃⱐⱀⱐⱑ ⰱⱁ ⱍⰵⱎⱘⱅⱏ ⱄⰿⱁⰽⱏⰲⰻ. ⱀⰻ ⱁⱅⱏ ⰽⱘⱂⰻⱀⱏⰹ ⰳⱃⱁⰸⰴⰰ ⱁⰱⰵⰿⰾ̑ⱙⱅⱏ.
6:45
ⰱⰾⰰⰳⱏⰹ ⰱⱁ ⱍⰽ҃ⱏ. ⱁⱅⱏ ⰱⰾⰰⰳⰰⰰⰳⱁ ⱄⱏⰽⱃⱁⰲⰻⱎⱅⰰ ⱄⱃⱏⰴⱐⱌⰰ ⱄⰲⱁⰵⰳⱁ. ⰺ҅ⰸⱀⱁⱄⰻⱅⱏ ⰱⰾⰰⰳⱁⰵ. ⰺ҅ ⰸⱏⰾⱏⰹ ⱍⰽ҃ⱏ. ⱁⱅⱏ ⰸⱏⰾⰰⰰⰳⱁ ⱄⱏⰽⱃⱁⰲⰻⱎⱅⰰ. ⱄⰲⱁⰵⰳⱁ. ⰺ҅ⰸⱀⱁⱄⰻⱅⱏ [ⰾ] ⰸⱏⰾⱁⰵ. ⱉⱅⱏ ⰺⰸⰱⱏⰹⱅⱏⰽⰰ ⰱⱁ ⱄⱃⱏⰴⱐⱌⰰ. !ⰳⰾⱙⱅⱏ ⱆⱄⱅⰰ ⰵⰳⱁ.
6:46
ⱍⱐⱅⱁ ⰶⰵ ⰿⱔ ⰸⱁⰲⰵⱅⰵ ⰳ҃ⰻ ⰳ҃ⰻ. ⰰ ⱀⰵ ⱅⰲⱁⱃⰻⱅⰵ ⱑⰶⰵ ⰳⰾ̑ⱙ.
6:47
ⰲⱄⱑⰽⱏ ⰳⱃⱔⰴⱔⰻ ⰽⱏ ⰿⱀⱑ. ⰺ҅ ⱄⰾⱏⰹⱎⱔⰻ ⱄⰾⱁⰲⰵⱄⰰ ⰿⱁⱑ ⰺ҅ ⱅⰲⱁⱃⱔ ⱑ. ⱄⱏⰽⰰⰶⱘ ⰲⰰⰿⱏ. ⰽⱁⰿⱆ ⰵⱄⱅⱏ ⱂⱁⰴⱁⰱⱐⱀⱏ.
6:48
ⱂⱁⰴⱁⰱⱐⱀⱏ ⰵⱄⱅⱏ ⱍⰽ҃ⱆ ⰸⰻⰶⰴⱘⱎⱅⱓ ⱈⱃⰰⰿⰻⱀⱘ. ⰺ҅ⰶⰵ ⰺ҅ⱄⰽⱁⱂⰰ ⰺ҅ ⱆⰳⰾⱘⰱⰻ. ⰺ҅ ⱂⱁⰾⱁⰶⰻ ⱁⱄⱀⱁⰲⰰⱀⱐⰵ ⱀⰰ ⰽⰰⰿⰵⱀⰵ. ⱀⰰⰲⱁⰴⱐⱓ ⰶⰵ ⰱⱏⰹⰲⱏⱎⱓ. ⱂⱃⰻⱂⰰⰴⰵ ⱃⱑⰽⰰ ⱈⱃⰰⰿⰻⱀⱑ ⱅⱁⰹ. ⰺ҅ ⱀⰵ ⰿⱁⰶⰵ ⱂⱁⰴⰲⰻⰳⱀⱘⱅⰻ ⰵⱗ. ⱁⱄⱀⱁⰲⰰⱀⰰ ⰱⱁ ⰱⱑ ⱀⰰ ⰽⰰⰿⰵⱀⰵ.
6:49
ⰰ ⱄⰾⱏⰹⱎⰰⰲⱏⰹ ⰺ҅ ⱀⰵ ⱅⰲⱁⱃⱐ. ⱂⱁⰴⱁⰱⱐⱀⱏ ⰵⱄⱅⱏ ⱍⰽ҃ⱆ. ⱄⱏⰸⱏⰴⰰⰲⱏⱎⱓ ⱈⱃⰰⰿⰻⱀⱘ ⰱⰵⰸⱏ ⱁⱄⱀⱁⰲⰰⱀⱐⱑ. ⰵⰺⰶⰵ ⱂⱃⰻⱃⰰⰸⰻ ⱄⱔ ⱃⱑⰽⰰ. ⰺ҅ ⰰⰱⱐⰵ ⱃⰰⰸⱁⱃⰻ ⱄⱔ. ⰺ҅ ⰱⱏⰹⱄⱅⱏ ⱃⰰⰸⰴⱃⱆⱎⰵⱀⱐⰵ ⱈⱃⰰⰿⰻⱀⱏⰹ ⱅⱁⱗ ⰲⰵⰾⱐⰵ.