ꙇ҅ въставъше вⸯсе множьство ꙇ҅хъ. Приведошѧ і къ пилатоу.

начѧшѧ на н̑ь вадити гл҃ѭште. сего обрѣтохомъ развраштаѭшта ѩзꙑкъ нашь. ꙇ҅ възбран̑ѣѭшта. даѣти к̑есареви дань. гл҃етъ себе х҃а цр҃ѣ бꙑти.

Пилатъ же въпроси і гл҃ѧ. тꙑ ли еси цр҃ь ꙇ҅юдеомъ. онъ же отъвѣштавъ. рече емоу. тꙑ гл҃еши.

пилатъ же рече къ архиереомъ. ꙇ҅ къ народоу. никоѩже винꙑ не обрѣтаѭ въ чц҃ѣ семь.

Ѡни же крѣпл̑ѣахѫ сѧ гл҃ѭште. ѣко развраштаетъ л̑юди оучѧ. по всеі ꙇ҅юдеі. начьнъ отъ галилеѩ досьде.

пилатъ же слꙑшавъ. въпроси галилеѩ. аште чк҃ъ галилѣꙇ҅скъ естъ.

ꙇ҅ разоумѣвъ. ѣко отъ области ꙇ҅родовꙑ естъ. посъла і къ ꙇ҅родоу. сѫштю томоу въ !ꙇ҅лмѣхъ въ дьни тꙑ.

ꙇ҅родъ же видѣвъ ꙇ҅с҃а. радъ бꙑстъ зѣло. бѣ бо желѣѩ отъ многа врѣмене видѣті и. зан̑е слꙑшааше многа о н̑емь. ꙇ҅ надѣаше сѧ знаменье етеро видѣти. отъ н̑его бꙑваемо.

въпрашааше же і словесꙑ многꙑ. *̆онъ же ничьсоже не отъвѣштавааше емоу.

Стоѣахѫ же архиереі. ꙇ҅ кънижьници. прилежьно вадѧште на н̑ь.

Оукорь же і ꙇ҅родъ съ воі своꙇми. ꙇ҅ порѫгавъ сѧ. облъкъ і вь ризѫ свѣтълѫ. възврати і. къ пилатови.

ꙇ҅ бꙑсте же си дроуга. ꙇ҅родъ же ꙇ҅ пилатъ въ тъ дьнь съ собоѭ. прѣжде бо бѣашете враждѫ ꙇ҅мѫшта междю собоѭ.

Пилатъ же съзъвавъ архиереѩ. ꙇ҅ кънѧзѧ. ꙇ҅ л̑юди.

рече къ н̑имъ. привѣсте ми чк҃а сего. ѣко развраштаѭшта л̑юди. ꙇ҅ се азъ ꙇ҅стѧзавъ і прѣдъ вами. не обрѣтъ ниединоѩже о чц҃ѣ семь винꙑ. ѩже на н̑ь вадите.

нъ ни ꙇ҅родъ. посълахъ бо і къ н̑емоу. ꙇ҅ се ничьтоже достоꙇно съмръти. творено естъ о н̑емь.

показавъ оубо отъпоуштѫ і.

Потрѣбѫ же ꙇ҅мѣаше на вьсѧ праздьникꙑ. отъпоуштати ꙇ҅мъ единого.

възъпишѧ же съ всѣмь народомь гл҃ѭште. възьми сего. отъпоусти же намъ вараавѫ.

ꙇ҅же бѣ за етерѫ крамолѫ бꙑвъшѫѭ въ градѣ. ꙇ҅ оубиіство. въвръженъ въ тьмьницѫ.

Пакꙑ же пилатъ възгласи хотѧ отъпоустити ꙇ҅с҃а.

они же възглашаахѫ гл҃ѭште. пропьні и пропьні и.

онъ же третиіцеѭ рече къ н̑имъ. чьто бо сътвори зъло. ничьсоже достоꙇна съмръти обрѣтъ о н̑емь. показавъ оубо отъпоуштѫ.

Они же прилежаахѫ гласꙑ велиі. просѧште его на пропѧтье. ꙇ҅ оустоѣхѫ гласи ꙇ҅хъ. ꙇ҅ архиерѣꙇ҅сциі.

пилатъ же посѫди бꙑти. прошенье ꙇ҅хъ.

отъпоусти же ꙇ҅мъ вараавѫ. въсажденааго вь тьмьницѫ за крамолѫ. ꙇ҅ оубиіство его прошаахѫ. а ꙇс҃а прѣдастъ вол̑и ꙇ҅хъ.

ꙇ҅ ако і поведошѧ ꙇ҅мъше. симона етера к̑ѵринѣа грѧдѫшта съ села. задѣшѧ емоу крьстъ носити по ꙇс҃ѣ.

Ꙇ҅дѣаше же вь слѣдъ его мъногъ народъ л̑юдиі. мѫжи ꙇ҅ женꙑ. ѩже ꙇ҅ бьѣахѫ сѧ ꙇ҅ плакаахѫ сѧ его.

обрашть же сѧ ꙇс҃ къ н̑имъ рече. дъштери ел҃мскꙑ. не плачите сѧ о мнѣ. обаче себе плачите сѧ. ꙇ҅ чѧдъ вашихъ.

ѣко се дьнье грѧдѫтъ. вь н̑ѧже рекѫтъ. блажена неплодъви ꙇ҅ чрѣва. ѣже не родишѧ. ꙇ҅ съсъци ꙇ҅же не доꙇшѧ.

тогда начьнѫтъ глаголати горамъ падѣте на нꙑ. ꙇ҅ хльмомъ покрꙑѣте нꙑ.

зан̑е аште въ сꙑрѣ дрѣвѣ си творѧтъ. въ соусѣ чьто бѫдетъ.

Ведѣахѫ же і. ꙇ҅ ина зълодѣѣ дъва. съ н̑имь оубитъ.

Ꙇ҅ егда придошѧ на мѣсто. нарицаемое краниево. тоу і пропѧшѧ. ꙇ҅ зълодѣа. ового оубо о деснѫѭ. а дроугаего о лѣвѫѭ распѧшѧ.

ꙇс҃ же гл҃ааше. !оче отъпоусти ꙇ҅мъ. не вѣдѧтъ бо сѧ чьто творѧтъ. раздѣл̑ѣѭште ризꙑ его метаахѫ жрѣбьѩ.

ꙇ҅ стоѣахѫ л̑юдье. зьрѧште. подражаахѫ же і кънѧзи гл҃ѭште съ н̑ими. ꙇ҅нꙑ естъ сп҃слъ. да сп҃етъ ꙇ҅ сѧ. аште сь естъ х҃ъ сн҃ъ бж҃іі ꙇ҅збъранꙑ.

рѫгаахѫ же сѧ емоу ꙇ҅ воꙇ҅ни пристѫпаѭште. оцьтъ придѣѭште емоу.

ꙇ҅ гл҃ѭште. аште тꙑ еси цр҃ь ꙇ҅юдеꙇ҅скъ. сп҃и сѧ самъ.

Бѣ же ꙇ҅ напсанье напⸯсано. надъ н̑имь. кън̑игами елинъсками. ꙇ҅ римьсками. ꙇ҅ еврѣꙇ҅сками. сь естъ цр҃ь ꙇ҅юдѣꙇ҅скъ.

Единъ же отъ обѣшеноую зълодѣю. хоул̑ѣаше і гл҃ѧ. аште тꙑ еси х҃ъ сп҃и сѧ самъ. ꙇ҅ нꙑ.

Ѡтъвѣштавъ же дроугꙑ прѣштааше емоу гл҃ѧ. ни ли тꙑ боꙇши сѧ б҃а. ѣко въ томьжде осѫждениі еси.

ꙇ҅ вѣ оубо въ правъдѫ. достоꙇ҅наа бо дѣломъ наю въсприемл̑евѣ. а сь ничьсоже зъла не сътвори.

ꙇ҅ гл҃ааше ꙇс҃ви. помѧни ми г҃и. егда придеши вь цр҃си твоемь.

ꙇ҅ рече емоу ис҃. аминⸯ. гл̑ѭ тебѣ. дьньсь съ мноѭ бѫдеши въ раі.

Бѣ же ѣко година шестаа. ꙇ҅ тъма бꙑ!с по всеі земл̑и. до годинꙑ девѧтꙑѩ.

ꙇ҅ слъньцю мръкъшю. ꙇ҅ катапетазма цръковънаѣ. раздъра сѧ. на дъвое отъ горꙑ до низъ.

Ꙇ҅ възглашь гласъмь вельемь ис҃ рече. !оче въ рѫцѣ твоі прѣдаѭ дх҃ъ моі. ꙇ҅ се рекъ ꙇ҅здъше.

Видѣвъ же сътьникъ бꙑвъшее. прослави б҃а гл҃ѧ. Въ ꙇ҅стинѫ чк҃ъ сь правьдьнъ бѣ.

ꙇ҅ вси пришьдъшеі народи. на позорось. видѧште бꙑваѭштаа. бьѭште пръси своѩ възвраштаахѫ сѧ.

стоѣхѫ же вⸯси знаемиі его ꙇ҅здалече. ꙇ҅ женꙑ въшьдъшѧѩ съ н̑имь. отъ галилеѩ зьрѧштѧ сихъ. !ко!ц

Ꙇ се мѫжь ꙇ҅менемь ꙇ҅осифъ. съвѣтьникъ сꙑ. мѫжь благъ ꙇ҅ правьдьнъ.

сь не бѣ присталъ съвѣтѣ. ꙇ҅ дѣлѣ ꙇ҅хъ. отъ ариматⸯѣѩ. града ꙇ҅юдѣꙇ҅ска. ꙇ҅же чааше ꙇ҅ тъ цр҃сиѣ бж҃иѣ.

Сь пристѫпи къ пилатоу. ꙇ҅спроси тѣло ꙇс҃во.

ꙇ҅ съньмъ е обитъ пон̑ѣвицеѭ. ꙇ҅ положі е въ гробѣ ꙇ҅сѣченѣ. вь н̑емьже не бѣ никътоже. никогдаже положенъ.

ꙇ҅ дьнь бѣ параск̑евьђиі. ꙇ҅ сѫбота свитааше.

вь слѣдъ же шьдъшѧ женꙑ. ѩже бѣахо съ н̑имь пришьлꙑ отъ галилеѩ. видѣшѧ гробъ. ꙇ҅ ѣко положено бꙑ!с тѣло его.

възвраштьшѧ же сѧ оуготовашѧ ароматꙑ. ꙇ҅ мⸯѵро. ꙇ҅ въ сѫботѫ. оумльчашѧ по заповѣди.