ЕВАНГЕЛИЕ ЕЖЕ Ѿ ЛОУКꙐ
17:1
Ⱃⰵⱍⰵ ⰶⰵ ⰽⱏ ⱆⱍⰵⱀⰻⰽⱁⰿⱏ ⱄⰲⱁⰺ҅ⰿⱏ. ⱀⰵⰲⱏⰸⰿⱁⰶⱐⱀⱁ ⰵⱄⱅⱏ ⰴⰰ ⱀⰵ ⱂⱃⰻⰴⱘⱅⱏ ⱄⱏⰱⰾⰰⰸⱀⰻ. ⱁⰱⰰⱍⰵ ⰳⱁⱃⰵ ⱅⱁⰿⱆ ⰺ҅ⰿⱐⰶⰵ ⱂⱃⰻⰴⱘⱅⱏ.
17:2
ⰴⱁⰱⱃⱑⰵ ⰿⱆ ⰱⰻ ⰱⱏⰹⰾⱁ. ⰰⱎⱅⰵ ⰱⰻ ⰽⰰⰿⰵⱀⱐ ⰶⱃⱏⱀⱁⰲⱏⱀⱏⰹ. ⰲⱏⰸⰾⱁⰶⰵⱀⱏ ⱀⰰ ⰲⱏⰹⱙ ⰵⰳⱁ. ⰺ҅ ⰲⱃⱏⰶⰵⱀⱏ ⰲⱏ ⰿⱁⱃⰵ. ⱀⰵⰶⰵ ⰴⰰ ⱄⱏⰱⰾⰰⰶⱀⱑⰵⱅⱏ. ⰿⰰⰾⱏⰹⱈⱏ ⱄⰻⱈⱏ ⰵⰴⰻⱀⱁⰳⱁ.
17:3
Ⰲⱏⱀⰵⰿⰾ̑ⱑⱅⰵ ⱄⰵⰱⱑ. ⰰⱎⱅⰵ ⱄⱏⰳⱃⱑⱎⰻⱅⱏ ⰱⱃⰰⱅⱃⱏ ⱅⰲⱁⰹ. ⰸⰰⱂⱃⱑⱅⰻ ⰵⰿⱆ. ⰺ҅ ⰰⱎⱅⰵ ⱂⱁⰽⰰⰵⱅⱏ ⱄⱔ ⱁⱅⱏⱂⱆⱄⱅⰹ ⰵⰿⱆ.
17:4
Ⰺ҅ ⰰⱎⱅⰵ ⱄⰵⰴⰿⱁⱃⰻⱌⰵⱙ ⱄⱏⰳⱃⱑⱎⰻⱅⱏ ⰲⱏ ⱅⱔ. ⰺ҅ ⱄⰵⰴⰿⱁⱃⰻⱌⰵⱙ ⱁⰱⱃⰰⱅⰻⱅⱏ ⱄⱔ ⰽⱏ ⱅⰵⰱⱑ. ⰳⰾ҃ⱔ ⰽⰰⱙ ⱄⱔ. ⱁⱅⱏⱂⱆⱄⱅⰻ ⰵⰿⱆ.
17:5
Ⰺ҅ ⱃⱑⱎⱔ ⰰⱂ҃ⱁⰾⰻ ⰳⰲ҃ⰻ. ⱂⱃⰻⰾⱁⰶⰻ ⱀⰰⰿⱏ ⰲⱑⱃⱘ.
17:6
ⱃⰵⱍⰵ ⰶⰵ ⰳ҃ⱐ. ⰰⱎⱅⰵ ⰱⰻⱄⱅⰵ ⰺ҅ⰿⱑⰾⰻ ⰲⱑⱃⱘ. ⱑⰽⱁ ⰸⱃⱏⱀⱁ ⰳⱁⱃⱓⱎⱐⱀⱁ. ⰳⰾ҃ⰰⰾⰻ ⰱⰻⱄⱅⰵ ⱆⰱⱁ ⱄⱛⰽⰰⰿⱑⱀⱑ ⱄⰵⰹ. ⰲⱐⰸⰴⰵⱃⰻ ⱄⱔ ⰺ҅ ⰲⱏⱄⰰⰴⰻ ⱄⱔ ⰲⱏ ⰿⱁⱃⰵ. ⰺ҅ ⱂⱁⱄⰾⱆⱎⰰⰾⰰ ⰱⰻ ⰲⰰⱄⱏ.
17:7
Ⰽⱁⱅⱁⱃⱏⰹ ⰺ҅ⰶⰵ ⱁⱅⱏ ⰲⰰⱄⱏ. ⱃⰰⰱⱏ ⰺ҅ⰿⱑⱗ. ⱁⱃⱘⱎⱅⱐ. ⰾⰻ ⱂⰰⱄⱘⱎⱅⱐ. ⰺ҅ⰶⰵ ⱂⱃⰻⱎⱐⰴⱏⱎⱆⰿⱆ ⱄⱏ ⱄⰵⰾⰰ. ⱃⰵⱍⰵⱅⱏ ⰵⰿⱆ. ⰰⰱⱐⰵ ⰿⰻⱀⱘⰲⱏ. ⰲⱐⰸⰾⱔⰸⰻ.
17:8
ⰺ҅ⰾⰻ ⱃⰵⱍⰵⱅⱏ ⰵⰿⱆ. ⱆⰳⱁⱅⱁⰲⰰⰹ ⱍⱐⱅⱁ ⰲⰵⱍⰵⱃⱑⱙ. ⰺ҅ ⱂⱃⱑⱂⱁⱑⱄⰰⰲⱏ ⱄⱔ ⱄⰾⱆⰶⰻ ⰿⰻ. ⰴⱁⱀⱐⰴⰵⰶⰵ ⱑⰿⱐ ⰺ҅ ⱂⱐⱙ. ⰺ҅ ⱂⱁⱅⱁⰿⱐ ⱑⱄⰻ ⰺ҅ ⱂⱐⰵⱎⰻ ⱅⱏⰹ.
17:9
ⰵⰴⰰ ⰺ҅ⰿⰰⱅⱏ ⱈⰲⰰⰾⱘ ⱃⰰⰱⱆ ⱅⱁⰿⱆ. ⱑⰽⱁ ⱄⱏⱅⰲⱁⱃⰻ ⱂⱁⰲⰵⰾⱑⱀⰰⰰ. ⱀⰵ ⰿⱐⱀ̑ⱙ ⱅⰰⰽⱁ.
17:10
ⰺ҅ ⰲⱏⰹ ⰵⰳⰴⰰ ⱄⱏⱅⰲⱁⱃⰻⱅⰵ ⱂⱁⰲⰵⰾⱑⱀⰰⰰ ⰲⰰⰿⱏ. !ⰳⰾⰹⱅⰵ ⱑⰽⱁ ⱃⰰⰱⰻ ⱀⰵⰴⱁⱄⱅⱁⰹⱀⰻ ⰵⱄⰿⱏ. ⰵⰶⰵ ⰴⰾⱏⰶⱐⱀⰻ ⰱⱑⱈⱁⰿⱏ ⱄⱏⱅⰲⱁⱃⰻⱅⰻ. ⱄⱏⱅⰲⱁⱃⰻⱈⱁⰿⱏ.
17:11
Ⰺ҅ ⰱⱏⰹ!ⱄ ⰺ҅ⰴⱘⱎⱅⱓ ⰵⰿⱆ ⰲⱏ ⰺⰾ҃ⰿⱏ. ⰺ҅ ⱅⱏ ⱂⱃⱁⱈⱁⰶⰴⰰⰰⱎⰵ ⰿⰵⰶⰴⱓ ⱄⰰⰿⰰⱃⰻⰵⱙ. ⰳⰰⰾⰻⰾⱑⱙ.
17:12
ⰲⱏⱈⱁⰴⱔⱎⱅⱓ ⰵⰿⱆ ⰲⱏ ⰵⱅⰵⱃⱘ ⰲⸯⱄⱐ. ⱄⱏⱃⱑⱅⰵ ⰹ !ⰺ. ⱂⱃⱁⰽⰰⰶⰵⱀⱏ ⰿⱘⰶⱐ. ⰺ҅ⰶⰵ ⱄⱅⰰⱎⱔ ⰺ҅ⰸⰴⰰⰾⰵⱍⰵ.
17:13
ⰺ҅ ⱅⰻ ⰲⱐⰸⱀⱑⱄⱔ ⰳⰾ҃ⱙⱎⱅⰵ. ⰺⱄ҃ⰵ ⱀⰰⱄⱅⰰⰲⱐⱀⰻⱍⰵ ⱂⱁⰿⰻⰾⱆⰹ ⱀⱏⰹ.
17:14
ⰺ҅ ⰲⰻⰴⱑⰲⱏ ⱗ ⱃⰵⱍⰵ ⰺ҅ⰿⱏ Ⱎⱐⰴⱏⱎⰵ ⱂⱁⰽⰰⰶⰻⱅⰵ ⱄⱔ ⰺ҅ⰵⱃⰵⱁⰿⱏ. ⰺ҅ ⰱⱏⰹ!ⱄ ⰺ҅ⰴⱘⱎⱅⰵⰿⱏ ⰺ҅ⰿⱏ. ⰺ҅ⱎⱅⰹⱄⱅⰻⱎⱔ ⱄⱔ.
17:15
ⰵⰴⰻⱀⱏ ⰶⰵ ⱁⱅⱏ ⱀ̑ⰻⱈⱏ ⰲⰻⰴⱑⰲⱏ ⱑⰽⱁ ⰺ҅ⱌⱑⰾⱑ. ⰲⱏⰸⰲⱃⰰⱅⰻ ⱄⱔ ⱄⱏ ⰳⰾⰰⱄⱁⰿⱐ ⰲⰵⰾⱐⰵⰿⱐ ⱄⰾⰰⰲⱔ ⰱ҃ⰰ.
17:16
ⰺ҅ ⱂⰰⰴⰵ ⱀⰻⱌⱐ ⱀⰰ ⱀⱁⰳⱆ ⰵⰳⱁ. ⱈⰲⰰⰾⱘ ⰵⰿⱆ ⰲⱏⰸⰴⰰⱗ. ⰺ҅ ⱅⱏ ⰱⱑ ⱄⰰⰿⰰⱃ̑ⱑⱀⰻⱀⱏ.
17:17
ⱁⱅⱏⰲⱑⱎⱅⰰⰲⱏ ⰶⰵ ⰻⱄ҃. ⱃⰵⱍⰵ. ⱀⰵ ⰴⰵⱄⱔⱅⱐ ⰾⰻ ⰺ҅ⱎⱅⰻⱄⱅⰻⱎⱔ ⱄⱔ. ⰴⰰ ⰴⰵⰲⱔⱅⱐ ⰽⰰⰽⱁ
17:18
ⱀⰵ ⱁⰱⱃⱑⱅⱘ ⱄⱔ. ⰲⱏⰸⰲⱃⰰⱎⱅⱐⱎⰵ ⱄⱔ ⰴⰰⱅⰻ ⱄⰾⰰⰲⱘ ⰱ҃ⱛ. ⱅⱏⰽⱏⰿⱁ ⰺ҅ⱀⱁⱂⰾⰵⰿⰵⱀⸯⱀⰻⰽⱏ ⱄⱐ.
17:19
ⰺ҅ ⱃⰵⱍⰵ ⰵⰿⱆ ⰲⱏⱄⱅⰰⰲⱏ ⰺ҅ⰴⰻ. ⰲⱑⱃⰰ ⱅⰲⱁⱑ ⱄⱂ҃ⰵ ⱅⱔ.
17:20
Ⰲⱏⱂⱃⱁⱎⰵⱀⱏ ⰶⰵ ⰱⱏⰹ!ⱄ ⱁⱅⱏ ⱇⰰⱃⰻⱄⱑⰻ. ⰽⱁⰳⰴⰰ ⱂⱃⰻⰴⰵⱅⱏ ⱌⱃ҃ⱄⱐⰵ ⰱⰶ҃ⰻⰵ. ⱉⱅⱏⰲⱑⱎⱅⰰ ⰺ҅ⰿⱏ ⰺ҅ ⱃⰵⱍⰵ. ⱀⰵ ⱂⱃⰻⰴⰵⱅⱏ ⱌⱃ҃ⱄⱐⰵ ⰱⰶ҃ⰻⰵ ⱄⱏ ⱄⱘⰿⱐⱀⱑⱀⰻⰵⰿⱐ.
17:21
ⱀⰻ ⱃⰵⰽⱘⱅⱏ. ⱄⰵ ⱄⱐⰴⰵ ⰾⰻ ⱁⰲⱐⰴⰵ. ⱄⰵ ⰱⱁ ⱌⱃ҃ⱄⱐⰵ ⰱⰶ҃ⰻⰵ. ⰲⱏⱀⱘⱅⱃⱐ̆ⱘⰴⱆ ⰲⱏ ⰲⰰⱄⱏ ⰵⱄⱅⱏ.
17:22
Ⱃⰵⱍⰵ ⰶⰵ ⰽⱏ ⱆⱍⰵⱀⰻⰽⱁⰿⱏ. ⱂⱃⰻⰴⱘⱅⱏ ⰴⱐⱀⱐⰵ. ⰵⰳⰴⰰ ⰲⱐⰶⰴⰵⰾⱑⰵⱅⰵ ⰵⰴⰻⱀⱁⰳⱁ ⰴⱐⱀⰵ. ⱄⱀ҃ⰰ ⱍⱄ҃ⰽⰰⰰⰳⱁ ⰲⰻⰴⱑⱅⰻ. ⰺ҅ ⱀⰵ ⱆⰸⱐⱃⰻⱅⰵ.
17:23
Ⰺ҅ ⱃⰵⰽⱘⱅⱏ ⰲⰰⰿⱏ. ⱄⰵ ⱄⱐⰴⰵ. ⱄⰵ ⱁⰲⱐⰴⰵ ⱈ҃ⱏ. ⱀⰵ ⰺⰸⰻⰴⱑⱅⰵ. ⱀⰻ ⱂⱁⰶⰵⱀⱑⱅⰵ.
17:24
ⱑⰽⱁ ⰱⱁ ⰿⰾⱏⱀⰻ ⰱⰾⰻⱄⱌⰰⱙⱎⱅⰻ ⱄⱔ. ⱁⱅⱏ !ⱂⱁⰴⱏⱀⱄⰽⱏⰹⱗ. ⱀⰰ !ⱂⱁⰴⱏⱀⱄⰽⱘⱙ. ⱄⰲⱐⱅⰻⱅⱏ ⱄⱔ. ⱅⰰⰽⱁ ⰱⱘⰴⰵⱅⱏ ⱄⱀ҃ⱏ ⱍⱄ҃ⰽⱏⰹ. ⰲⱏ ⰴⱀⱐ ⱄⰲⱁⰹ.
17:25
Ⱂⱃⱑⰶⰴⰵ ⰶⰵ ⱂⱁⰴⱁⰱⰰⰵⱅⱏ ⰵⰿⱆ. ⰿⱀⱁⰳⱁ ⱂⱁⱄⱅⱃⰰⰴⰰⱅⰻ. ⰺ҅ ⰻⱄⰽⱆⱎⰵⱀⱆ ⰱⱏⰹⱅⰻ ⱁⱅⱏ ⱃⱁⰴⰰ ⱄⰵⰳⱁ.
17:26
ⰺ҅ ⱑⰽⱁⰶⰵ ⰱⱏⰹ!ⱄ ⰲⱏ ⰴⱐⱀⰻ ⱀⱁⰵⰲⱏⰹ. ⱅⰰⰽⱁ ⰱⱘⰴⰵⱅⱏ ⰺ҅ ⰲⱏ ⰴⱐⱀⰻ ⱄⱀ҃ⰰ ⱍⱄ҃ⰽⰰⰳⱁ.
17:27
ⱑⰴⱑⰰⱈⱘ ⰺ҅ ⱂⱐⱑⱈⱘ ⰺ ⰶⰵⱀ̑ⱑⰰⱈⱘ ⱄⱔ ⰺ҅ ⱂⱁⱄⰰⰳⰰⰰⱈⱘ. ⰴⱁ ⱀ̑ⰵⰳⱁⰶⰵ ⰴⱐⱀⰵ ⰲⱐⱀⰻⰴⰵ ⱀⱁⰵ ⰲⱏ ⰽⱁⰲⱐⱍⰵⰳⱏ. ⰺ҅ ⱂⱃⰻⰴⰵ ⱂⱁⱅⱁⱂⱏ ⰺ҅ ⱂⱁⰳⱆⰱⰻ ⰲⱐⱄⱔ.
17:28
Ⱅⰰⰽⱁⰶⰴⰵ ⱑⰽⱁⰶⰵ ⰱⱏⰹ!ⱄ. ⰲⱏ ⰴⱐⱀⰻ ⰾⱁⱅⸯⱁⰲⱏⰹ. ⱑⰴⱑⰰⱈⱘ ⰺ҅ ⱂⱐⱑⰰⱈⱘ. ⰽⱆⱂⱁⰲⰰⰰⱈⱘ ⰺ҅ ⱂⱃⱁⰴⰰⰰⱈⱘ. ⱄⰰⰶⰴⰰⰰⱈⱘ ⰸⱏⰴⰰⰰⱈⱘ.
17:29
ⰲⱏ ⱀ̑ⱐⰶⰵ ⰴⱐⱀⱐ ⰺ҅ⰸⰻⰴⰵ ⰾⱁⱅⱏ. ⱁⱅⱏ ⱄⱁⰴⱁⰿⰾ̑ⱑⱀⱏ. ⱁⰴⱏⰶⰴⰻ ⰶⱓⱂⱐⰾⱏ. ⰺ҅ ⱁⰳⱀⱐ ⱄⱏ ⱀⰵⰱⰵⱄⰵ. ⰺ҅ ⱂⱁⰳⱆⰱⰻ ⰲⱐⱄⱔ.
17:30
ⰺ҅ ⱂⱁ ⱅⱁⰿⱆⰶⰴⰵ ⰱⱘⰴⰵⱅⱏ ⰺ҅ ⰴⱀⱐ. ⰲⱏ ⱀ̑ⱐⰶⰵ ⱄⱀ҃ⱏ ⱍⱄ҃ⰽⱏ ⱑⰲⰻⱅⱏ ⱄⱔ.
17:31
Ⰲⱏ ⱅⱏ ⰴⱐⱀⱐ ⰲⱏ ⱀ̑ⱐⰶⰵ ⰱⱘⰴⰵⱅⱏ ⱀⰰ ⰽⱃⱁⰲⱑ. ⰺ҅ ⱄⱏⱄⱘⰴⰻ ⰵⰳⱁ ⰲⱏ ⰴⱁⰿⱆ. ⰴⰰ ⱀⰵ ⱄⱏⰾⱑⰸⰵⱅⱏ ⰲⱏⰸⱔⱅⱏ ⰺⱈⱏ. ⰺ҅ⰶⰵ ⱀⰰ ⱄⰵⰾⱑ. ⱅⰰⰽⱁⰶⰴⰵ ⰴⰰ ⱀⰵ ⰲⱏⰸⰲⱃⰰⱅⰻⱅⱏ ⱄⱔ. ⰲⱐⱄⱂⱔⱅⱐ.
17:32
ⱂⱁⰿⰻⱀⰰⰺ҅ⱅⰵ ⰶⰵⱀⱘ ⰾⱁⱅⱁⰲⱘ.
17:33
ⰺ҅ⰶⰵ ⰰⱎⱅⰵ ⰲⱐⰸⰻⱎⱅⰵⱅⱏ ⰴⱎ҃ⱘ ⱄⰲⱁⱙ ⱄⱂ҃ⱄⱅⰻ ⱂⱁⰳⱆⰱⰻⱅⱏ ⱙ. ⰰ ⰺ҅ⰶⰵ ⱂⱁⰳⱆⰱⰻⱅⱏ ⰶⰻⰲⰹⱅⱏ ⱙ.
17:34
ⰳⰾ҃ⱙ ⰶⰵ ⰲⰰⰿⱏ. ⰲⱏ ⱅⱘ ⱀⱁⱎⱅⱐ ⰱⱘⰴⰵⱅⰵ ⰴⱏⰲⰰ. ⱀⰰ ⰾⱁⰶⰻ ⰵⰴⰻⱀⱁⰿⱐ. ⰵⰴⰻⱀⱏ ⱂⱁⰵⰿⰾ̑ⰵⱅⱏ ⱄⱔ ⰰ ⰴⱃⱆⰳⱏⰹ ⱁⱄⱅⰰⰲⰾ̑ⱑⰵⱅⱏ.
17:35
ⰱⱘⰴⰵⱅⰵ ⰴⱐⰲⱑ ⰲⱏ ⰽⱆⱂⱑ ⰿⰵⰾ̑ⱙⱎⱅⰻ. ⰵⰴⰻⱀⱘ ⱂⱁⰵⰿⰾ̑ⱙⱅⱏ ⰰ ⰴⱃⱆⰳⱘⱙ ⱁⱄⱅⰰⰲⰾ̑ⱑⱙⱅⱏ.
17:36
ⰴⱏⰲⰰ ⱀⰰ ⱄⰵⰾⱑ. ⰵⰴⰻⱀⱏ ⱂⱁⰵⰿⰾ̑ⱙⱅⱏ ⰰ ⰴⱃⱆⰳⱏⰹ ⱁⱄⱅⰰⰲⰾ̑ⱑⱙⱅⱏ.
17:37
ⰺ҅ ⱁⱅⱏⰲⱑⱎⱅⰰⰲⱏⱎⰵ ⰳⰾ҃ⰰⱎⱔ ⰵⰿⱆ. ⰽⱏⰴⰵ ⰳ҃ⰻ. ⱁⱀⱏ ⰶⰵ ⱃⰵⱍⰵ ⰺ҅ⰿⱏ. ⰺ҅ⰴⰵⰶⰵ ⱅⱑⰾⱁ. ⱅⱆ ⰺ҅ ⱁⱃⰾⰻ ⱄⱏⱀⰵⰿⰾ̑ⱙⱅⱏ ⱄⱔ.