гл҃ааше же ꙇ҅ къ оученикомъ своꙇмъ. !Чкъ етеръ бѣ богатъ. ꙇ҅же ꙇ҅мѣаше приставьникъ. ꙇ҅ тъ окл̑еветанъ бꙑстъ къ н̑емоу. ѣко растачаѩ ꙇ҅мѣньѣ его.

ꙇ҅ приглашь і рече емоу. чьто се слꙑшѫ о тебѣ въздаждь. отъвѣтъ о приставл̑ени домовьнѣемь. не възможеши бо къ томоу домоу строꙇти.

рече же вь себѣ приставьникъ домоу. чьто сътвор̑ѭ. ѣко г҃ь моі отъемлетъ строенье домоу отъ мене. копати не могѫ. хлѫпати стꙑждѫ сѧ.

разоумѣхъ чьто сътворѫ. егда отъставл̑енъ бѫдѫ отъ строеньѣ домоу. примѫтъ мѧ въ домꙑ своѩ.

ꙇ҅ призъвавъ единого когождо длъжьникъ !гѣ своего. гл҃ааше пръвоумоу. колицѣмь длъжьнъ еси гн҃оу своемоу.

онъ же рече. !рмь. мѣръ олѣа. онъ же рече. пріими боукъви твоѩ. ꙇ҅ сѣдъ скоро напиши: !и:

потомь же дроугоумоу рече. тꙑ же колицѣмь длъженъ еси. онъ же рече. сътомь коръ. пьшеницѧ. гл҃а емоу. прими боукъви твоѩ. ꙇ҅ напиши. !о.

ꙇ҅ похвали гн҃ъ домоу ꙇ҅конома. неправьдънааго. ѣко мѫдрѣ створи. ѣко сн҃ове вѣка сего. мѫдрѣꙇ҅ше паче сн҃овъ свѣта. въ родѣ своемь сѫтъ.

ꙇ҅ азъ вамъ гл҃ѭ. сътворите себѣ дроугꙑ. отъ мамонинꙑ неправъдꙑ. да егда оскѫдѣете. приꙇ҅мѫтъ вꙑ вь вѣчьнꙑѩ кровꙑ.

вѣрънꙑ въ малѣ. ꙇ҅ въ мноѕѣ вѣрьнъ естъ. ꙇ҅ невѣрънꙑ въ малѣ. ꙇ҅ въ мнозѣ неправьдьнъ естъ.

аште оубо вь неправьдьнѣмь житиі. не бисте вѣрьни. въ ꙇстинⸯнѣмь къто вамъ вѣрѫ ꙇ҅метъ.

ꙇ҅ аште въ тоуждемь вѣрьни не бисте. ваше къто вамъ дастъ.

Никотерꙑ же рабъ. не можетъ дьвама гн҃ома работати. ли бо единого вьзненавидитъ. а дроугаего вьзл̑юбитъ. ли единого дръжитъ сѧ. а о дроузѣмь небрѣшти въчьнетъ. не можете б҃ѵ работати ꙇ҅ мамонѣ.

слꙑшаахѫ же си вси. ꙇ҅ фарисеі съреброл̑юбьци сѫште. ꙇ҅ подражаахѫ і.

Ꙇ҅ рече ꙇ҅мъ. вꙑ есте оправьдаѭштеі себе прѣдъ чк҃ꙑ. б҃ъ же вѣстъ срдьца ваша. ѣко еже естъ въ чц҃ѣхъ вꙑсоко. мръзость прѣдъ б҃мь естъ.

Законъ ꙇ҅ пророци. до ꙇоанна. отътоли цр҃ствие бж҃ие. благовѣствоуетъ сѧ. ꙇ҅ вьсѣкъ вь н̑е нѫдитъ сѧ

Оудобѣе же естъ !нбоу ꙇ҅ земл̑и прѣꙇти. неже отъ закона единоі чрътѣ погꙑбнѫти.

вⸯсѣкъ поуштаѩі женѫ своѭ. ꙇ҅ приводѧ ꙇ҅нѫ. прѣл̑юбꙑ дѣетъ. ꙇ҅ женѧꙇ҅ сѧ поуштеницеѭ отъ мѫжа. прѣл̑юбꙑ дѣетъ.

Чкъ етеръ бѣ богатъ. ꙇ҅ облачааше сѧ въ форфⸯирѫ. ꙇ҅ вѵсⸯсонъ. веселѧ сѧ на вⸯсѣкъ дьнь свѣтьлъ.

нішть же бѣ етеръ ꙇ҅менемь лазоръ. ꙇ҅же лежааше. при вратѣхъ его гноꙇ҅нъ.

ꙇ҅ желѣѩ насꙑтити сѧ. отъ кроупиць падаѭштиіхъ. отъ трепезꙑ богатааго. нъ ꙇ҅ пⸯси приходѧште. облізаахѫ гноі его.

бꙑ!с же оумрѣти ништюмоу. ꙇ҅ несеноу бꙑти ађ҃лꙑ. на лоно авраамл̑е. оумрѣтъ же ꙇ҅ богатꙑ. ꙇ҅ погребошѧ і.

ꙇ҅ въ адѣ възведъ очи своі. сꙑ въ мѫкахъ. оузьрѣ авраама ꙇ҅здалече. ꙇ҅ лазора на лонѣ его.

ꙇ҅ тъ възглашь рече. !ѡче аврааме. помилоуꙇ мѧ. ꙇ҅ посъли лазора да омочитъ. коньць пръста своего въ водѣ. ꙇ оустоудитъ ѩзꙑкъ моі. ѣко страждѫ въ пламене семь.

рече же авраамъ. чѧдо. помѣни ѣко вьсприѩлъ еси твоѣ благаа. въ животѣ твоемь. ꙇ҅ лазарь такожде своѣ зълаѣ. нꙑн̑ѣ же сьде оутѣшаетъ сѧ. а тꙑ страждеши.

ꙇ҅ надъ вⸯсѣми сими. междю нами ꙇ҅ вами. пропасть вельѣ оутврьди сѧ. ѣко да хотѧштеі минѫти. отъсѫдоу тамо. не възмагаѭтъ. ні ꙇ҅же отътѫдоу [прѣхо] къ намъ прѣходѧтъ.

рече же. мол̑ѭ тѧ оубо !оче. да ꙇ посъл̑еши въ домъ оц҃а моего.

ꙇ҅мамь бо пѧть братрьѩ. ѣко да засъвѣдѣтел̑ьствоуетъ ꙇ҅мъ. да не ꙇ ти придѫтъ на мѣсто се мѫчьное.

гл҃а же авраамъ. ꙇ҅мѫтъ мосѣа. ꙇ҅ пророкꙑ да послоушаѭтъ ꙇхъ.

онъ же рече. ни !оче аврааме. нъ аште къто отъ мрътвꙑхъ ꙇ҅детъ къ н̑имъ. покаѭтъ сѧ.

рече же емоу. аште мѵсѣа ꙇ҅ пророкъ не послоушаѭтъ. ни аште къто отъ мрътвъꙇхъ въскръснетъ. не ꙇ҅мѫтъ вѣрꙑ.