ЕВАНГЕЛИЕ ЕЖЕ Ѿ ЛОУКꙐ
12:1
ⱁ ⱀⰻⱈⱏⰶⰵ ⱄⱏⱀⱏⰿⱏⱎⰵⰿⱏ ⱄⱔ ⱅⱏⰿⰰⰿⱏ ⱀⰰⱃⱁⰴⰰ. ⱑⰽⱁ ⱂⱃⱑⱂⰻⱃⰰⰰⱈⱘ ⰴⱃⱆⰳⱏ ⰴⱃⱆⰳⰰ. Ⱀⰰⱍⱔⱅⱏ ⰳⰾ҃ⰰⱅⰻ ⰽⱐ ⱆⱍⰵⱀⰻⰽⱁⰿⱏ ⱄⰲⱁⰺⰿⱏ. ⱂⱃⱏⰲⱑⰵ ⰲⱐⱀⰵⰿⰾ̑ⱑⱅⰵ ⱄⰵⰱⱑ ⱁⱅⱏ ⰽⰲⰰⱄⰰ ⱇⰰⱃⰻⱄⱑⰺ҅ⱄⰽⰰ. ⰵⰶⰵ ⰵⱄⱅⱏ ⰾⰻⱌⰵⰿⱑⱃⱐⰵ.
12:2
Ⱀⰻⱍⱐⱅⱁⰶⰵ ⰱⱁ ⱂⱁⰽⱃⱏⰲⰵⱀⱁ ⰵⱄⱅⱏ. ⰵⰶⰵ ⱀⰵ ⱁⱅⱏⰽⱃⱏⰹⰵⱅⱏ ⱄⱔ. ⰺ҅ ⱅⰰⰺⱀⱁ ⰵⰶⰵ ⱀⰵ ⱃⰰⰸⱆⰿⱑⰵⱅⱏ ⱄⱔ.
12:3
ⰲⱐ ⱄⰲⱑⱅⱑ ⱆⱄⰾⱏⰹⱎⰻⱅⱏ ⱄⱔ. ⰺ҅ ⰵⰶⰵ ⰽⱏ ⱆⱈⱆ ⰳⰾ҃ⰰⱄⱅⰵ. ⰲⱏ ⱅⰰⰺⰾⰻⱎⱅⰻⱈⱏ. ⱂⱃⱁⱂⱁⰲⱑⱄⱅⱏ ⱄⱔ ⱀⰰ ⰽⱃⱁⰲⱑⱈⱏ.
12:4
ⰳⰾ҃ⱙ ⰶⰵ ⰲⰰⰿⱏ ⰴⱃⱆⰳⱁⰿⱏ ⰿⱁⰺ҅ⰿⱏ. ⱀⰵ ⱆⰱⱁⰺⱅⰵ ⱄⱔ ⱁⱅⱏ ⱆⰱⰻⰲⰰⱙⱎⱅⰹⰻⱈⱏ ⱅⱑⰾⱁ. ⰺ҅ ⱀⰵ ⱂⱁ ⱅⱁⰿⱐ ⱀⰵ ⰺ҅ⰿⱘⱎⱅⰵⰿⱏ. ⰾⰻⱈⰰ ⱍⰵⱄⱁ ⱄⱏⱅⰲⱁⱃⰻⱅⰻ.
12:5
ⱄⱏⰽⰰⰸⰰⱙ ⰶⰵ ⰲⰰⰿⱏ. ⰽⱁⰳⱁ ⱄⱔ ⱆⰱⱁⰺⱅⰵ. ⱆⰱⱁjⱅⰵ ⱄⱔ ⰺ҅ⰿⱘⱎⱅⰰⰰⰳⱁ ⰲⰾⰰⱄⱅⱐ. ⱂⱁ ⱆⰱⱐⰵⱀⰹⰻ ⰲⱐⰲⱃⱑⱎⱅⰻ ⰲⱏ ⰼⰵⱁⱀⱘ. ⰵⰹ ⰳⰾ̑ⱙ ⰲⰰⰿⱏ. ⱅⱁⰳⱁ ⱆⰱⱁⰺ҅ⱅⰵ ⱄⱔ.
12:6
ⱀⰵ ⱂⱔⱅⱐ ⰾⰻ ⱂⱐⱅⰻⱌⱐ. ⰲⱑⱀⰻⱅⱏ ⱄⱔ ⱂⱑⱀⱔⰸⰵⰿⰰ ⰴⸯⰲⱑⰿⰰ. ⰺ҅ ⱀⰻ ⰵⰴⰻⱀⰰ ⱁⱅⱏ ⱀ̑ⰻⱈⱏ. ⱀⱑⱄⱅⱏ ⰸⰰⰱⱏⰲⰵⱀⰰ ⱂⱃⱑⰴⱏ ⰱ҃ⰿⱐ.
12:7
ⱀⱏ ⰺ ⰲⰾⰰⱄⰻ ⰳⰾⰰⰲⱏⰹ ⰲⰰⱎⰵⱗ. ⰲⱐⱄⰻ ⰺ҅ⱎⱅⱐⱅⰵⱀⰻ ⱄⱘⱅⱏ. ⱀⰵ ⰱⱁⰺⱅⰵ ⱆⰱⱁ. ⰿⱏⱀⱁⰸⱑⱈⱏ ⱂⱐⱅⰻⱌⱐ ⱄⱆⰾⱑⰺ҅ⱎⰻ ⰵⱄⱅⰵ ⰲⱏⰹ.
12:8
Ⰳⰾ̑ⱙ ⰶⰵ ⰲⰰⰿⱏ. ⰲⱄⱑⰽⱏ ⰺⰶⰵ ⰽⱁⰾⰻⰶⱐⰴⱁ. ⰺ҅ⱄⱂⱁⰲⱑⱄⱅⱏ ⰿⱔ ⱂⱃⱑⰴⱏ ⱍⰽ҃ⱏⰹ. ⰺ҅ ⱄⱀ҃ⱏ ⱍⱄ҃ⰽⱏⰹ ⰺ҅ⱄⱂⱁⰲⱑⱄⱅⱏ ⰺ҅. ⱂⱃⱑⰴⱏ ⰰⰼ҃ⰾⱏⰹ ⰱⰶ҃ⰹⰹ.
12:9
Ⰰ ⱁⱅⱏⰲⱃⱏⰳⱏⰹ ⱄⱔ ⰿⰵⱀⰵ ⱂⱃⱑⰴⱏ ⱍⰽ҃ⱏⰹ. ⱁⱅⱏⰲⱃⱏⰶⰵⱀⱏ ⰱⱘⰴⰵⱅⱏ ⱂⱃⱑⰴⱏ ⰰⰼ҃ⰾⱏⰹ ⰱⰶ҃ⰹⰻ.
12:10
ⰺ҅ ⰲⱄⱑⰽⱏ ⰺ҅ⰶⰵ ⱃⰵⱍⰵⱅⱏ ⱄⰾⱁⰲⱁ ⱀⰰ ⱄⱀ҃ⱏ ⱍⱄ҃ⰽⱏⰹ. ⱁⱅⱏⱂⱆⱄⱅⰻⱅⱏ ⱄⱔ ⰵⰿⱆ. Ⰰ ⰺⰶⰵ ⰲⰾⰰⱄⰲⰻⰿⰻⱄⰰⰵⱅⱏ ⱀⰰ ⰴⱈ҃ⱏ ⱄⱅ҃ⱏⰹ. ⱀⰵ ⱁⱅⱏⱂⱆⱄⱅⰻⱅⱏ ⱄⱔ ⰵⰿⱆ.
12:11
ⰵⰳⰴⰰ ⰶⰵ ⱂⱃⰻⰲⰵⰴⱘⱅⱏ ⰲⱏⰹ ⱀⰰ ⱄⱏⱀⱏⰿⰻⱎⱅⰰ. ⰺ҅ ⰲⰾⰰⱄⱅⰻ. ⰺ҅ ⰲⰾⰰⰴⱏⰹⱍⱐⱄⱅⰲⰻⱑ. ⱀⰵ ⱂⱐⱌⱑⱅⰵ ⱄⱔ ⰽⰰⰽⱁ ⰾⰻ ⱍⱐⱅⱁ ⱂⱁⰿⱏⰹⱄⰾⰻⱅⰵ. ⰾⰻ ⱍⱐⱅⱁ ⱃⰵⱍⰵⱅⰵ.
12:12
ⱄⱅ҃ⱏⰹ ⰱⱁ ⰴⱈ҃ⱏ ⱀⰰⱆⱍⰻⱅⱏ ⰲⱏⰹ. ⰲⱏ ⱅⱏ ⱍⰰⱄⱏ ⱑⰽⱁⰶⰵ ⱂⱁⰴⱁⰱⰰⰵⱅⱏ ⰳⰾ҃ⰰⱅⰻ.
12:13
Ⱃⰵⱍⰵ ⰶⰵ ⰵⰿⱆ ⰵⱅⰵⱃⱏ ⱁⱅⱏ ⱀⰰⱃⱁⰴⰰ. ⱆⱍⰻⱅⰵⰾ̑ⱓ. ⱃⱐⱌⰻ ⰱⱃⰰⱅⱆ ⰿⱁⰵⰿⱆ. ⰴⰰ ⱃⰰⰸⰴⱑⰾⰻⱅⱏ ⱄⱏ ⰿⱏⱀⱁⱙ ⰴⱁⱄⱅⱁⱑⱀⰻⰵ.
12:14
ⱉⱀⱏ ⰶⰵ ⱃⰵⱍⰵ ⰵⰿⱆ ⱍⰾⱁⰲⱑⱍⰵ. ⰽⱏⱅⱁ ⰿⱔ ⱂⱁⱄⱅⰰⰲⰻ ⱄⱘⰴⰻⱙ ⰾⰻ ⰴⱑⰾⰰⱅⰵⰾ̑ⱑ ⱀⰰⰴⱏ ⰲⰰⰿⰻ.
12:15
ⱃⰵⱍⰵ ⰶⰵ ⰽⱏ ⱀ̑ⰻⰿⱏ. ⰱⰾ̑ⱓⰴⱑⱅⰵ ⱄⱔ. ⰺ҅ ⱈⱃⰰⱀⰻⱅⰵ ⱄⱔ. ⱁⱅⱏ ⰲⱄⱑⰽⱁⰳⱁ ⰾⰻⱈⱁⰺ҅ⰿⰻⱑ. ⱑⰽⱁ ⱀⰵ ⱁⱅⱏ ⰺ҅ⰸⰱⱏⰹⱅⱏⰽⰰ ⰽⱁⰿⱆⰶⱐⰴⱁ. ⰶⰻⰲⱁⱅⱏ ⰵⰳⱁ ⰵⱄⱅⱏ. ⱁ ⰺ҅ⰿⱑⱀⰻⰹ ⰵⰿⱆ.
12:16
ⱃⰵⱍⰵ ⰶⰵ ⱂⱃⰻⱅⱏⱍⱘ ⰽⱏ ⱀ̑ⰻⰿⱏ ⰳⰾ҃ⱔ. !Ⱍⰽⱆ ⰵⱅⰵⱃⱆ ⰱⱁⰳⰰⱅⱆ. ⱆⰳⱁⰱⱐⰸⰻ ⱄⱔ ⱀ̑ⰻⰲⰰ.
12:17
ⰺ҅ ⰿⱏⰹⱎⰾ̑ⱑⰰⱎⰵ ⰲⱐ ⱄⰵⰱⱑ !ⰳⰾⱗ. ⱍⱐⱅⱁ ⱄⱏⱅⰲⱁⱃ̑ⱙ. ⱑⰽⱁ ⱀⰵ ⰺ҅ⰿⰰⰿⱐ ⰽⱏⰴⰵ ⱄⱏⰱⰻⱃⰰⱅⰻ. ⱂⰾⱁⰴⱏ ⰿⱁⰺ҅ⱈⱏ.
12:18
ⰺ҅ ⱃⰵⱍⰵ ⱄⰵ ⱄⱏⱅⰲⱁⱃ̑ⱙ. ⱃⰰⰸⱁⱃ̑ⱙ ⰶⰻⱅⱐⱀⰻⱌⱘ ⰿⱁⱙ. ⰺ҅ ⰱⱁⰾⱐⱎⱘ ⱄⱏⰸⰻⰶⰴⱘ. ⰺ҅ ⱄⱏⰱⰵⱃⱘ ⱅⱆ ⰶⰻⱅⰰ ⰿⱁⱑ. ⰺ҅ ⰴⱁⰱⱃⱁ ⰿⱁⰵ.
12:19
ⰺ҅ ⱃⰵⰽⱘ ⰴⱎ҃ⰻ ⰿⱁⰵⰹ. ⰴⱎ҃ⰵ. ⰺ҅ⰿⰰⱎⰻ ⰿⱏⱀⱁⰳⱁ ⰴⱁⰱⱃⱁ ⰾⰵⰶⱔⱎⱅⰵ ⱀⰰ ⰾⱑⱅⰰ ⰿⱀⱁⰳⰰ. ⱂⱁⱍⰻⰲⰰⰹ. ⱑⰶⰴⱐ ⱂⰻⰹ. ⰲⰵⱄⰵⰾⰻ ⱄⱔ.
12:20
Ⱃⰵⱍⰵ ⰶⰵ ⰵⰿⱆ ⰱ҃ⱏ. ⰱⰵⰸⱆⰿⱐⱀⰵ. ⰲⱏ ⱄⰻⱙ ⱀⱁⱎⱅⱐ ⰴⱎ҃ⱘ ⱅⰲⱁⱙ ⰺ҅ⱄⱅⱔⰸⰰⱙ ⱁⱅⱏ ⱅⰵⰱⰵ. ⰰ ⱑⰶⰵ ⱆⰳⱁⱅⱁⰲⰰ ⰽⱁⰿⱆ ⰱⱘⰴⱘⱅⱏ.
12:21
ⱅⰰⰽⱁ ⱄⱏⰱⰻⱃⰰⱗⰹ ⱄⰵⰱⱑ. ⰰ ⱀⰵ ⰲⱏ ⰱ҃ⱏ ⰱⱁⰳⰰⱅⱑⱗ.
12:22
ⱃⰵⱍⰵ ⰶⰵ ⰽⱏ ⱆⱍⰵⱀⰻⰽⱁⰿⱏ ⱄⰲⱁⰺ҅ⰿⱏ. ⱄⰵⰳⱁ ⱃⰰⰴⰻ ⰳⰾ҃ⱙ ⰲⰰⰿⱏ. ⱀⰵ ⱂⱐⱌⱑⱅⰵ ⱄⱔ ⰴⱎ҃ⰵⱙ ⱍⱐⱅⱁ ⱑⱄⱅⰵ. ⱀⰻ ⱅⱑⰾⱁⰿⱐ ⰲⱏ ⱍⱐⱅⱁ ⱁⰱⰾⱑⱍⰵⱅⰵ ⱄⱔ.
12:23
ⰴⱎ҃ⰰ ⰱⱁ ⰱⱁⰾⱐⱎⰻ ⰵⱄⱅⱏ ⱂⰻⱎⱅⱔ. ⰺ҅ ⱅⱑⰾⱁ ⱁⰴⰵⰶⰴⱔ.
12:24
ⱄⱏⰿⱁⱅⱃⰻⱅⰵ ⰲⱃⰰⱀⱏ. ⰽⰰⰽⱁ ⱀⰵ ⱄⱑⱙⱅⱏ ⱀⰻ ⰶⱐⱀ̑ⱙⱅⱏ. ⰺ҅ⰿⱏⰶⰵ ⱀⱑⱄⱅⱏ ⱄⱏⰽⱃⱁⰲⰻⱎⱅⰰ. ⱀⰻ ⱈⱃⰰⱀⰻⰾⰻⱎⱅⰰ. ⰺ҅ ⰱ҃ⱏ ⱂⰻⱅⱑⰵⱅⱏ ⱗ. ⰽⱁⰾⱐⰿⰻ ⱂⰰⱍⰵ ⰲⱏⰹ ⰵⱄⱅⰵ ⰾⱆⱍⱐⱎⰻ ⱂⱐⱅⰻⱌⱐ.
12:25
ⰽⱏⱅⱁ ⰶⰵ ⱁⱅⱏ ⰲⰰⱄⱏ ⱂⰵⰽⱏⰹ ⱄⱔ ⰿⱁⰶⰵⱅⱏ. ⱂⱃⰻⰾⱁⰶⰻⱅⰻ ⱅⱑⰾⰵⱄⰵ ⱄⰲⱁⰵⰿⱐ ⰾⰰⰽⱏⱅⱐ ⰵⰴⰻⱀⱏ.
12:26
ⰰⱎⱅⰵ ⱆⰱⱁ ⱀⰻ ⰿⰰⰾⰰ ⱍⰵⱄⱁ ⰿⱁⰶⰵⱅⰵ. ⱍⱐⱅⱁ ⰲⱏ ⱂⱃⱁⱍⰻⰹⱈⱏ ⱂⰵⱍⰵⱅⰵ ⱄⱔ.
12:27
ⱄⱏⰿⱁⱅⱃⰻⱅⰵ ⱌⰲⱑⱅⱏ ⱄⰵⰾⱏⱀⱏⰺ҅ⱈⱏ. ⰽⰰⰽⱁ ⱃⰰⱄⱅⱘⱅⱏ. ⱀⰵ ⱅⱃⱆⰶⰴⰰⱙⱅⱏ ⱄⱔ ⱀⰻ ⱂⱃⱔ[ⰴ]ⱘⱅⱏ. ⰳⰾ҃ⱙ ⰶⰵ ⰲⰰⰿⱏ. ⱑⰽⱁ ⱀⰻ ⱄⱁⰾⱁⰿⱆⱀⱏ. ⰲⱏ ⰲⱄⰵⰹ ⱄⰾⰰⰲⱑ ⱄⰲⱁⰵⰹ ⱁⰱⰾⱑⱍⰵ ⱄⱔ. ⱑⰽⱁ ⰵⰴⰻⱀⱏ ⱁⱅⱏ ⱄⰻⱈⱏ.
12:28
ⰰⱎⱅⰵ ⰾⰻ ⰶⰵ ⱅⱃⱑⰲⱘ. ⰴⱐⱀⱐⱄⱐ ⱀⰰ ⱄⰵⰾⱑ ⱄⱘⱎⱅⱘ. ⰺ҅ ⱆⱅⱃⱑ ⰲⱏ ⱂⰵⱎⱅⱐ ⰲⱏⰿⱑⱅⰰⰵⰿⱘ. ⰱ҃ⱏ ⱅⰰⰽⱁ ⱁⰴⱑⰵⱅⱏ. ⰽⱁⰾⱐⰿⰻ ⱂⰰⱍⰵ ⰲⰰⱄⱏ ⰿⰰⰾⱁⰲⱑⱃⰻ.
12:29
ⰺ҅ ⰲⱏⰹ ⱀⰵ ⰺ҅ⱎⱅⱑⱅⰵ ⱍⱐⱅⱁ ⰺ҅ⰿⰰⱅⰵ ⱑⱄⱅⰻ. ⰺ҅ ⱍⱐⱅⱁ ⱂⰻⱅⰻ. ⰺ҅ ⱀⰵ ⰲⱏⰸⱀⱁⱄⰻⱅⰵ ⱄⱔ.
12:30
ⰲⱐⱄⱑⱈⱏ ⱄⰻⱈⱏ ⱗⰸⱏⰹⱌⰻ ⰿⰻⱃⰰ ⱄⰵⰳⱁ ⰺ҅ⱎⱅⱘⱅⱏ. ⰲⰰⱎⱐ ⰶⰵ ⱁⱌ҃ⱐ ⰲⱑⱄⱅⱏ. ⱑⰽⱁ ⱅⱃⱑⰱⱆⰵⱅⰵ ⱄⰻⱈⱏ.
12:31
ⱁⰱⰰⱍⰵ ⰺ҅ⱎⱅⰰⱅⰵ ⱌⱃ҃ⱄⱐⱑ ⰱⰶ҃ⰻⱑ. ⰺ҅ ⱄⰻ ⰲⱄⱑ ⱂⱃⰻⰾⱁⰶⱔⱅⱏ ⱄⱔ ⰲⰰⰿⱏ.
12:32
Ⱀⰵ ⰱⱁⰺ҅ⱅⰵ ⱄⱔ ⰿⰰⰾⱁⰵ ⱄⱅⰰⰴⱁ. ⱑⰽⱁ ⰱⰾⰰⰳⱁⰺ҅ⰸⰲⱁⰾⰻ ⱁⱌ҃ⱐ ⰲⰰⱎⱐ. ⰴⰰⱅⰻ ⰲⰰⰿⱏ ⱌⱃ҃ⱄⱐⰵ.
12:33
ⱂⱃⱁⰴⰰⰴⰻⱅⰵ ⰺ҅ⰿⱑⱀⱐⰵ ⰲⰰⱎⰵ. ⰺ҅ ⰴⰰⰴⰻⱅⰵ ⰿⰻⰾⱁⱄⱅⱏⰹⱀ̑ⱙ. Ⱄⱏⱅⰲⱁⱃⰻⱅⰵ ⰲⱏⰾⰰⰳⰰⰾⰻⱎⱅⰵ ⱀⰵ ⰲⰵⱅⱏⱎⰰⱙⱎⱅⰵ. ⱄⱏⰽⱃⱁⰲⰻⱎⱅⰵ ⱀⰵ ⱄⰽⱘⰴⱑⰵⰿⱁ. ⱀⰰ !ⱀⱄⱈⱏ. ⰺ҅ⰴⰵⰶⰵ ⱅⰰⱅⱐ ⱀⰵ ⱂⱃⰻⰱⰾⰻⰶⰰⰵⱅⱏ ⱄⱔ. ⱀⰻ ⱅⱐⰾ̑ⱑ ⱅⱐⰾⰻⱅⱏ. ⱀⰻ ⱍⱃⱏⰲⱐ.
12:34
ⰺ҅ⰴⰵⰶⰵ ⰱⱁ ⰵⱄⱅⱏ ⱄⱏⰽⱃⱁⰲⰻⱎⱅⰵ ⰲⰰⱎⰵ. ⱅⱆ ⰺ҅ ⱄⱃⱏⰴⱐⱌⰵ ⰲⰰⱎⰵ ⰱⱘⰴⰵⱅⱏ.
12:35
Ⰱⱘⰴⱘ ⱍⱃⱑⱄⰾⰰ ⰲⰰⱎⰰ ⱂⱃⱑⱂⱁⱑⱄⰰⱀⰰ. ⰺ҅ ⱄⰲⱑⱅⰻⰾⱐⱀⰻⱌⰻ ⰳⱁⱃⱘⱎⱅⰵ.
12:36
ⰺ҅ ⰲⱏⰹ ⱂⱁⰴⱁⰱⱐⱀⰻ ⱍⰽ҃ⱁⰿⱏ. ⱍⰰⱙⱎⱅⰵⰿⱏ !ⰳⰰ ⱄⰲⱁⰵⰳⱁ. ⱅⱏⰳⰴⰰ ⰲⱏⰸⰲⱃⰰⱅⰻⱎⱔ ⱄⱔ ⱁⱅⱏ ⰱⱃⰰⰽⱏ. ⰴⰰ ⱂⱃⰻⱎⱐⰴⱏⱎⱓ ⰺ҅ ⱅⰾⱏⰽⱀⱘⰲⱏⱎⱓ. ⰰⰱⱐⰵ ⱁⱅⰲⱃⱏⰸⱘⱅⱏ ⰵⰿⱆ.
12:37
Ⰱⰾⰰⰶⰵⱀⰻ ⱃⰰⰱⰻ ⱅⰹ. ⱗⰶⰵ ⰳ҃ⱐ ⱁⰱⱃⱔⱎⱅⰵⱅⱏ ⰱⱐⰴⱔⱎⱅⱔ. ⰰⰿⰻⱀⸯ ⰳⰾ҃ⱙ ⰲⰰⰿⱏ. ⱑⰽⱁ ⱂⱃⱑⱂⱁⱑⱎⰵⱅⱏ ⱄⱔ. ⰺ҅ ⱂⱁⱄⰰⰴⰻⱅⱏ ⱗ. ⰺ҅ ⰿⰻⱀⱘⰲⱏ ⱂⱁⱄⰾⱆⰶⰻⱅⱏ ⰺⰿⱏ.
12:38
ⰾ̑ⱓⰱⱁ ⰲⱏ ⰲⱏⱅⱁⱃⱘⱙ. ⰾ̑ⱓⰱⱁ ⰲⱏ ⱅⱃⰵⱅⰻⱙ ⱄⱅⱃⰰⰶⱘ ⱂⱃⰻⰴⰵⱅⱏ. ⰺ҅ ⱁⰱⱃⱔⱎⱅⰵⱅⱏ ⱗ ⱅⰰⰽⱁ. ⰱⰾⰰⰶⰵⱀⰻ ⱄⱘⱅⱏ ⱃⰰⰱⰻ ⱅⰻ.
12:39
Ⱄⰵ ⰶⰵ ⰲⱑⰴⰻⱅⰵ. ⱑⰽⱁ ⰰⱎⱅⰵ ⰱⰻ ⰲⱑⰴⱑⰾⱏ ⰳⱀ҃ⱏ. ⱈⱃⰰⰿⰻⱀⱏⰹ. ⰲⱏ ⰽⱏⰹ ⱍⰰⱄⱏ ⱅⰰⱅⱐ ⱂⱃⰻⰴⰵⱅⱏ. ⰱⱐⰴⱑⰾⱏ ⱆⰱⱁ ⰱⰻ. ⰺ҅ ⱀⰵ ⰴⰰⰾⱏ ⱂⱁⰴⱏⰽⱁⱂⰰⱅⰻ ⰴⱁⰿⱆ ⱄⰲⱁⰵⰳⱁ.
12:40
ⰺ҅ ⰲⱏⰹ ⰱⱘⰴⱑⱅⰵ ⰳⱁⱅⱁⰲⰻ. ⱑⰽⱁ ⰲⱏ ⱀ̑ⱐⰶⰵ ⱍⰰⱄⱏ ⱀⰵ ⰿⱐⱀⰻⱅⰵ ⱄⱀ҃ⱏ ⱍⱄ҃ⰽⱏⰹ ⱂⱃⰻⰴⰵⱅⱏ.
12:41
Ⱃⰵⱍⰵ ⰶⰵ ⰵⰿⱆ ⱂⰵⱅⱃⱏ ⰳ҃ⰻ. ⰽⱏ ⱀⰰⰿⱏ ⰾⰻ ⱂⱃⰻⱅⱏⱍⱘ ⱄⱐⱙ ⰳⰾ҃ⰵⱎⰻ. ⰾⰻ ⰽⱏ ⰲⱄⱑⰿⱏ.
12:42
Ⱃⰵⱍⰵ ⰳ҃ⱐ. ⰽⱏⱅⱁ ⱆⰱⱁ ⰵⱄⱅⱏ ⰲⱑⱃⱏⱀⱏⰹ ⱂⱃⰻⱄⱅⰰⰲⱐⱀⰻⰽⱏ. ⰺ҅ ⰿⱘⰴⱃⱏⰹ. ⰵⰳⱁⰶⰵ ⱂⱁⱄⱅⰰⰲⰻⱅⱏ ⰳⱀ҃ⱏ ⱀⰰⰴⱏ ⰴⱁⰿⱁⰿⱐ ⱄⰲⱁⰺ҅ⰿⱐ. ⰴⰰⱑⱅⰻ ⰲⱏ ⰲⱃⱑⰿⱔ ⰶⰻⱅⱁⰿⱑⱃⰵⱀⱐⰵ.
12:43
Ⰱⰾⰰⰶⰵⱀⱏ ⱃⰰⰱⱁⱅⱏ ⰵⰳⱁⰶⰵ ⱂⱃⰻⱎⱐⰴⱏ ⰳⱀ҃ⱏ ⰵⰳⱁ. ⱁⰱⱃⱔⱎⱅⰵⱅⱏ ⱅⰲⱁⱃⱔⱎⱅⰰ ⱅⰰⰽⱁ.
12:44
ⰲⱏ ⰺⱄⱅⰻⱀⱘ ⰳⰾ̑ⱙ ⰲⰰⰿⱏ. ⱑⰽⱁ ⱀⰰⰴⱏ ⰲⸯⱄⱑⰿⱐ ⰺ҅ⰿⱑⱀⰻⰵⰿⱐ ⱄⰲⱁⰺ҅ⰿⱐ ⱂⱁⱄⱅⰰⰲⰻⱅⱏ ⰺ҅.
12:45
Ⰰⱎⱅⰵ ⰾⰻ ⱃⰵⱍⰵⱅⱏ ⱃⰰⰱⱏ ⱅⱏ ⰲⱏ ⱄⱃⱏⰴⱐⱌⰻ ⱄⰲⱁⰵⰿⱐ. ⰿⱘⰴⰻⱅⱏ ⰳⱀ҃ⱏ ⰿⱁⰹ ⱂⱃⰻⱅⰻ. ⱀⰰⱍⱐⱀⰵⱅⱏ ⰱⰻⱅⰻ ⱃⰰⰱⱏⰹ. ⰺ҅ ⱃⰰⰱⱏⰹⱀ̑ⱔ. ⱑⱄⱅⰻ ⰶⰵ ⰺ҅ ⱂⰻⱅⰻ. ⰺ҅ ⱆⱂⰻⰲⰰⱅⰻ ⱄⱔ.
12:46
ⱂⱃⰻⰴⰵⱅⱏ ⰳⱀ҃ⱏ ⱃⰰⰱⰰ ⱅⱁⰳⱁ. ⰲⱏ ⱀ̑ⱐⰶⰵ ⰴⱐⱀⱐ ⱀⰵ ⱍⰰⰵⱅⱏ. ⰺ҅ ⰲⱏ ⱍⰰⱄⱏ ⰲⱏ ⱀ̑ⱐⰶⰵ ⱀⰵ ⰲⱑⱄⱅⱏ. ⰺ҅ ⱂⱃⱁⱅⰵⱎⰵⱅⱏ ⰹ. ⰺ҅ ⱍⱔⱄⱅⱐ ⰵⰳⱁ ⱄⱏ ⱀⰵⰲⱑⱃⱏⱀⱏⰺⰿⰻ ⱂⱁⰾⱁⰶ{ⰻⱅ}ⰻⱅⱏ.
12:47
ⱅⱏ ⰶⰵ ⱃⰰⰱⱏ ⰲⱑⰴⱏⰹ ⰲⱁⰾ̑ⱙ ⱄⱀ҃ⰰ ⱄⰲⱁⰵⰳⱁ. ⰺ҅ ⱀⰵ ⱆⰳⱁⱅⱁⰲⰰⰲⱏ. ⰾⰻ ⱀⰵ ⱄⱏⱅⰲⱁⱃⱐ ⱂⱁⰲⰵⰾⱑⱀⰻⰹ ⰵⰳⱁ. ⰱⱐⰵⱀⱏ ⰱⱘⰴⰵⱅⱏ ⰿⱀⱁⰳⱁ.
12:48
ⱀⰵ ⰲⱑⰴⱑⰲⱏⰹ ⰶⰵ. ⱄⱏⱅⰲⱁⱃⱐ ⰶⰵ ⰴⱁⱄⱅⱁⰺⱀⰰⰰ ⱃⰰⱀⰰⰿⱏ. ⰱⱐⰵⱀⱏ ⰱⱘⰴⰵⱅⱏ ⰿⰰⰾⱏⰹ. Ⰲⸯⱄⱑⰽⱁⰿⱆ ⰶⰵ ⰵⰿⱆⰶⰵ ⰴⰰⱀⱁ ⰱⱏⰹ!ⱄ ⰿⱀⱁⰳⱁ. ⰿⱏⱀⱁⰳⱁ ⰺ҅ⰸⰻⱎⱅⰵⱅⱏ ⱄⱔ ⱁⱅⱏ ⱀ̑ⰵⰳⱁ. ⰺ҅ ⰵⰿⱆⰶⰵ ⱂⱃⱑⰴⰰⰰⱎ=ⱔ= ⰿⱀⱁⰳⱁ. ⰾⰻⱎⸯⱎⰰ ⱂⱃⱁⱄⱔⱅⱏ ⱁⱅⱏ ⱀ̑ⰵⰳⱁ.
12:49
Ⱉⰳⱀ̑ⱑ ⱂⱃⱑⰴⱏ ⰲⱏⰲⱃⱑⱎⱅⰻ ⰲⱏ ⰸⰵⰿⰾ̑ⱙ. ⱍⱐⱅⱁ ⱈⱁⱎⱅⱘ. ⰰⱎⱅⰵ ⱆⰶⰵ ⰲⱏⰸⰳⱁⱃⱑ ⱄⱔ.
12:50
ⰽⱃⱐⱎⱅⰵⱀⱐⰵⰿⱐ ⰺ҅ⰿⰰⰿⱐ ⰽⱃⱐⱄⱅⰻⱅⰻ ⱄⱔ. ⰺ҅ ⰽⰰⰽⱁ ⱆⰴⱃⱏⰶⱘ ⱄⱔ. ⰴⱁⱀⰴⰵⰶⰵ ⰽⱁⱀⱐⱍⰰⰵⱅⱏ ⱄⱔ.
12:51
ⰿⱐⱀⰻⱅⰵ ⰾⰻ ⱑⰽⱁ ⰿⰻⱃⰰ ⱂⱃⰻⰴⱏ ⰴⰰⱅⰻ ⱀⰰ ⰸⰵⰿⰾ̑ⱙ. ⱀⰻ. ⰳⰾ̑ⱙ ⰲⰰⰿⱏ. ⱀⱏ ⱃⰰⰸⰴⱑⰾ̑ⰵⱀⱐⱑ.
12:52
ⰱⱘⰴⰵⱅⱏ ⰱⱁ ⱁⱅⱏⱄⰵⰾⱑ. ⱂⱔⱅⱐ ⰲⱏ ⰵⰴⰻⱀⱁⰿⱐ ⰴⱁⰿⱆ ⱃⰰⰸⰴⱑⰾ̑ⰵⱀⱏ. ⱅⱃⰻⰵ ⱀⰰ ⰴⸯⰲⰰ. ⰺ҅ ⰴⰲⰰ ⱀⰰ ⱅⱃⰻ.
12:53
ⱃⰰⰸⰴⱑⰾⱔⱅⱏ ⱄⱔ. ⱁⱌ҃ⱐ ⱀⰰ ⱄⱀ҃ⰰ. ⰺ ⱄⱀ҃ⱏ ⱀⰰ ⱁⱌ҃ⰰ. ⰿⰰⱅⰻ ⱀⰰ ⰴⱏⱎⱅⰵⱃⱐ. ⰺ҅ ⰴⱏⱎⱅⰻ ⱀⰰ ⰿⰰⱅⰵⱃⱐ. ⰺ҅ ⱄⰲⰵⰽⱃⱏⰲⰵ ⱀⰰ ⱀⰵⰲⱑⱄⱅⱘ ⱄⰲⱁⱙ. ⰺ҅ ⱀⰵⰲⱑⱄⱅⱘ ⱀⰰ ⱄⰲⰵⰽⱃⱏⰲⰵ ⱄⰲⱁⱙ.
12:54
!Ⰳⰾⰰⰰⱎⰵ ⰶⰵ ⰺ҅ ⱀⰰⱃⱁⰴⱁⰿⱏ. ⰵⰳⰴⰰ ⱆⰸⱐⱃⰻⱅⰵ ⱁⰱⰾⰰⰽⱏ. ⰲⱏⱄⱈⱁⰴⱔⱎⱅⱐ ⱁⱅⱏ ⰸⰰⱂⰰⰴⱏ. ⰰⰱⱐⰵ ⰳⰾ҃ⰵⱅⰵ ⱑⰽⱁ ⱅⱘⱍⰰ ⰳⱃⱔⰴⰵⱅⱏ. ⰺ҅ ⰱⱏⰹⰲⰰⰵⱅⱏ ⱅⰰⰽⱁ.
12:55
ⰺ҅ ⰵⰳⰴⰰ ⱓⰳⱏ ⰴⱆⱎⰵⱅⱏ. ⰳⰾ҃ⰵⱅⰵ ⰲⰰⱃⱏ ⰱⱘⰴⰵⱅⱏ. ⰺ҅ ⰱⱏⰹⰲⰰⰵⱅⱏ.
12:56
ⱛⱂⱁⰽⱃⰻⱅⰻ. ⰾⰻⱌⰵ !ⱀⰱⱆ. ⰺ҅ ⰸⰵⰿⰾ̑ⰹ ⱆⰿⱑⰵⱅⰵ ⰺ҅ⱄⰽⱆⱎⰰⱅⰻ.
12:57
ⱍⱐⱅⱁ ⰶⰵ ⰺ҅ ⱁ ⱄⰵⰱⱑ ⱀⰵ ⱄⱘⰴⰻⱅⰵ ⱂⱃⰰⰲⱏⰴⱏⰹ.
12:58
Ⰵⰳⰴⰰ ⰶⰵ ⰳⱃⱔⰴⰵⱎⰻ ⱄⱏ ⱄⱘⱂⱐⱃⰵⰿⱐ ⱄⰲⱁⰺ҅ⰿⱐ ⰽⱏ ⰽⱏⱀⱔⰸⱆ. ⱀⰰ ⱂⱘⱅⰻ ⰴⰰⰶⰴⱐ ⰴⱑⰾⰰⱀⱐⰵ ⰺ҅ⰸⰱⱏⰹⱅⰻ ⱁⱅⱏ ⱀ̑ⰵⰳⱁ. ⰴⰰ ⱀⰵ ⱂⱃⰻⰲⰾⱑⱍⰵⱅⱏ ⱅⰵⰱⰵ ⰽⱏ ⱄⱘⰴⰹⰻ. ⰺ҅ ⱄⱘⰴⰻ ⱅⱔ ⱂⱃⱑⰴⰰⱄⱅⱏ ⱄⰾⱆⰸⱑ. ⰺ҅ ⱄⰾⱆⰳⰰ ⱅⱔ ⰲⱏⱄⰰⰴⰻⱅⱏ ⰲⱏ ⱅⱐⰿⱐⱀⰻⱌⱘ.
12:59
ⰳⰾ҃ⱙ ⱅⰵⰱⱑ. ⱀⰵ ⰺ҅ⰿⰰⱎⰻ ⰺ҅ⰸⰻⱅⰻ ⱁⱅⱏⱅⱘⰴⱑ. ⰴⱁⱀⰴⰵⰶⰵ ⰺ҅ ⱂⱁⱄⰾⱑⰴⱐⱀ̑ⰻⰹ ⱅⱃⱐⱈⱁⱅⱐ ⰲⱏⰸⰴⰰⱄⰻ.