о нихъже сънъмъшемъ сѧ тъмамъ народа. ѣко прѣпираахѫ дроугъ дроуга. Начѧтъ гл҃ати кь оученикомъ своꙇмъ. пръвѣе вьнемл̑ѣте себѣ отъ кваса фарисѣꙇ҅ска. еже естъ лицемѣрье.

Ничьтоже бо покръвено естъ. еже не отъкрꙑетъ сѧ. ꙇ҅ таꙇно еже не разоумѣетъ сѧ.

вь свѣтѣ оуслꙑшитъ сѧ. ꙇ҅ еже къ оухоу гл҃асте. въ таꙇлиштихъ. проповѣстъ сѧ на кровѣхъ.

гл҃ѭ же вамъ дроугомъ моꙇ҅мъ. не оубоꙇте сѧ отъ оубиваѭштіихъ тѣло. ꙇ҅ не по томь не ꙇ҅мѫштемъ. лиха чесо сътворити.

съказаѭ же вамъ. кого сѧ оубоꙇте. оубоjте сѧ ꙇ҅мѫштааго власть. по оубьеніи вьврѣшти въ ђеонѫ. еі гл̑ѭ вамъ. того оубоꙇ҅те сѧ.

не пѧть ли пьтиць. вѣнитъ сѧ пѣнѧзема дⸯвѣма. ꙇ҅ ни едина отъ н̑ихъ. нѣстъ забъвена прѣдъ б҃мь.

нъ ꙇ власи главꙑ вашеѩ. вьси ꙇ҅штьтени сѫтъ. не боꙇте оубо. мънозѣхъ пьтиць соулѣꙇ҅ши есте вꙑ.

Гл̑ѭ же вамъ. всѣкъ ꙇже колижьдо. ꙇ҅сповѣстъ мѧ прѣдъ чк҃ꙑ. ꙇ҅ сн҃ъ чс҃кꙑ ꙇ҅сповѣстъ ꙇ҅. прѣдъ ађ҃лꙑ бж҃іі.

А отъвръгꙑ сѧ мене прѣдъ чк҃ꙑ. отъвръженъ бѫдетъ прѣдъ ађ҃лꙑ бж҃іи.

ꙇ҅ всѣкъ ꙇ҅же речетъ слово на сн҃ъ чс҃кꙑ. отъпоуститъ сѧ емоу. А ꙇже власвимисаетъ на дх҃ъ ст҃ꙑ. не отъпоуститъ сѧ емоу.

егда же приведѫтъ вꙑ на сънъмишта. ꙇ҅ власти. ꙇ҅ владꙑчьствиѣ. не пьцѣте сѧ како ли чьто помꙑслите. ли чьто речете.

ст҃ꙑ бо дх҃ъ наоучитъ вꙑ. въ тъ часъ ѣкоже подобаетъ гл҃ати.

Рече же емоу етеръ отъ народа. оучител̑ю. рьци братоу моемоу. да раздѣлитъ съ мъноѭ достоѣние.

ѡнъ же рече емоу чловѣче. къто мѧ постави сѫдиѭ ли дѣлател̑ѣ надъ вами.

рече же къ н̑имъ. бл̑юдѣте сѧ. ꙇ҅ храните сѧ. отъ всѣкого лихоꙇ҅миѣ. ѣко не отъ ꙇ҅збꙑтъка комоужьдо. животъ его естъ. о ꙇ҅мѣниі емоу.

рече же притъчѫ къ н̑имъ гл҃ѧ. !Чкоу етероу богатоу. оугобьзи сѧ н̑ива.

ꙇ҅ мꙑшл̑ѣаше вь себѣ !глѩ. чьто сътвор̑ѭ. ѣко не ꙇ҅мамь къде събирати. плодъ моꙇ҅хъ.

ꙇ҅ рече се сътвор̑ѭ. разор̑ѭ житьницѫ моѭ. ꙇ҅ большѫ съзиждѫ. ꙇ҅ съберѫ тоу жита моѣ. ꙇ҅ добро мое.

ꙇ҅ рекѫ дш҃и моеі. дш҃е. ꙇ҅маши мъного добро лежѧште на лѣта многа. почиваі. ѣждь пиі. весели сѧ.

Рече же емоу б҃ъ. безоумьне. въ сиѭ ношть дш҃ѫ твоѭ ꙇ҅стѧзаѭ отъ тебе. а ѣже оуготова комоу бѫдѫтъ.

тако събираѩі себѣ. а не въ б҃ъ богатѣѩ.

рече же къ оученикомъ своꙇ҅мъ. сего ради гл҃ѭ вамъ. не пьцѣте сѧ дш҃еѭ чьто ѣсте. ни тѣломь въ чьто облѣчете сѧ.

дш҃а бо больши естъ пиштѧ. ꙇ҅ тѣло одеждѧ.

съмотрите вранъ. како не сѣѭтъ ни жьн̑ѭтъ. ꙇ҅мъже нѣстъ съкровишта. ни хранилишта. ꙇ҅ б҃ъ питѣетъ ѩ. кольми паче вꙑ есте лоучьши пьтиць.

къто же отъ васъ пекꙑ сѧ можетъ. приложити тѣлесе своемь лакъть единъ.

аште оубо ни мала чесо можете. чьто въ прочиіхъ печете сѧ.

съмотрите цвѣтъ селънъꙇ҅хъ. како растѫтъ. не троуждаѭтъ сѧ ни прѧ[д]ѫтъ. гл҃ѭ же вамъ. ѣко ни соломоунъ. въ всеі славѣ своеі облѣче сѧ. ѣко единъ отъ сихъ.

аште ли же трѣвѫ. дьньсь на селѣ сѫштѫ. ꙇ҅ оутрѣ въ пешть въмѣтаемѫ. б҃ъ тако одѣетъ. кольми паче васъ маловѣри.

ꙇ҅ вꙑ не ꙇ҅штѣте чьто ꙇ҅мате ѣсти. ꙇ҅ чьто пити. ꙇ҅ не възносите сѧ.

вьсѣхъ сихъ ѩзꙑци мира сего ꙇ҅штѫтъ. вашь же оц҃ь вѣстъ. ѣко трѣбоуете сихъ.

обаче ꙇ҅штате цр҃сьѣ бж҃иѣ. ꙇ҅ си всѣ приложѧтъ сѧ вамъ.

Не боꙇ҅те сѧ малое стадо. ѣко благоꙇ҅зволи оц҃ь вашь. дати вамъ цр҃сье.

продадите ꙇ҅мѣнье ваше. ꙇ҅ дадите милостꙑн̑ѭ. Сътворите вълагалиште не ветъшаѭште. съкровиште не скѫдѣемо. на !нсхъ. ꙇ҅деже тать не приближаетъ сѧ. ни тьл̑ѣ тьлитъ. ни чръвь.

ꙇ҅деже бо естъ съкровиште ваше. тоу ꙇ҅ сръдьце ваше бѫдетъ.

Бѫдѫ чрѣсла ваша прѣпоѣсана. ꙇ҅ свѣтильници горѫште.

ꙇ҅ вꙑ подобьни чк҃омъ. чаѭштемъ !га своего. тъгда възвратишѧ сѧ отъ бракъ. да пришьдъшю ꙇ҅ тлъкнѫвъшю. абье отвръзѫтъ емоу.

Блажени раби ті. ѩже г҃ь обрѧштетъ бьдѧштѧ. аминⸯ гл҃ѭ вамъ. ѣко прѣпоѣшетъ сѧ. ꙇ҅ посадитъ ѩ. ꙇ҅ минѫвъ послоужитъ ꙇмъ.

л̑юбо въ въторѫѭ. л̑юбо въ третиѭ стражѫ придетъ. ꙇ҅ обрѧштетъ ѩ тако. блажени сѫтъ раби ти.

Се же вѣдите. ѣко аште би вѣдѣлъ гн҃ъ. храминꙑ. въ кꙑ часъ тать придетъ. бьдѣлъ оубо би. ꙇ҅ не далъ подъкопати домоу своего.

ꙇ҅ вꙑ бѫдѣте готови. ѣко въ н̑ьже часъ не мьните сн҃ъ чс҃кꙑ придетъ.

Рече же емоу петръ г҃и. къ намъ ли притъчѫ сьѭ гл҃еши. ли къ всѣмъ.

Рече г҃ь. къто оубо естъ вѣрънꙑ приставьникъ. ꙇ҅ мѫдрꙑ. егоже поставитъ гн҃ъ надъ домомь своꙇ҅мь. даѣти въ врѣмѧ житомѣренье.

Блаженъ работъ егоже пришьдъ гн҃ъ его. обрѧштетъ творѧшта тако.

въ ꙇстинѫ гл̑ѭ вамъ. ѣко надъ вⸯсѣмь ꙇ҅мѣниемь своꙇ҅мь поставитъ ꙇ҅.

Аште ли речетъ рабъ тъ въ сръдьци своемь. мѫдитъ гн҃ъ моі прити. начьнетъ бити рабꙑ. ꙇ҅ рабꙑн̑ѧ. ѣсти же ꙇ҅ пити. ꙇ҅ оупивати сѧ.

придетъ гн҃ъ раба того. въ н̑ьже дьнь не чаетъ. ꙇ҅ въ часъ въ н̑ьже не вѣстъ. ꙇ҅ протешетъ і. ꙇ҅ чѧсть его съ невѣрънъꙇми полож{ит}итъ.

тъ же рабъ вѣдꙑ вол̑ѭ сн҃а своего. ꙇ҅ не оуготовавъ. ли не сътворь повелѣниі его. бьенъ бѫдетъ много.

не вѣдѣвꙑ же. сътворь же достоꙇнаа ранамъ. бьенъ бѫдетъ малꙑ. Вⸯсѣкомоу же емоуже дано бꙑ!с много. мъного ꙇ҅зиштетъ сѧ отъ н̑его. ꙇ҅ емоуже прѣдааш=ѧ= много. лишⸯша просѧтъ отъ н̑его.

Ѡгн̑ѣ прѣдъ въврѣшти въ земл̑ѭ. чьто хоштѫ. аште оуже възгорѣ сѧ.

крьштеньемь ꙇ҅мамь крьстити сѧ. ꙇ҅ како оудръжѫ сѧ. дондеже коньчаетъ сѧ.

мьните ли ѣко мира придъ дати на земл̑ѭ. ни. гл̑ѭ вамъ. нъ раздѣл̑еньѣ.

бѫдетъ бо отъселѣ. пѧть въ единомь домоу раздѣл̑енъ. трие на дⸯва. ꙇ҅ два на три.

раздѣлѧтъ сѧ. оц҃ь на сн҃а. ꙇ сн҃ъ на оц҃а. мати на дъштерь. ꙇ҅ дъшти на матерь. ꙇ҅ свекръве на невѣстѫ своѭ. ꙇ҅ невѣстѫ на свекръве своѭ.

!Глааше же ꙇ҅ народомъ. егда оузьрите облакъ. въсходѧшть отъ западъ. абье гл҃ете ѣко тѫча грѧдетъ. ꙇ҅ бꙑваетъ тако.

ꙇ҅ егда югъ доушетъ. гл҃ете варъ бѫдетъ. ꙇ҅ бꙑваетъ.

ѵпокрити. лице !нбоу. ꙇ҅ земл̑і оумѣете ꙇ҅скоушати.

чьто же ꙇ҅ о себѣ не сѫдите правъдꙑ.

Егда же грѧдеши съ сѫпьремь своꙇ҅мь къ кънѧзоу. на пѫти даждь дѣланье ꙇ҅збꙑти отъ н̑его. да не привлѣчетъ тебе къ сѫдіи. ꙇ҅ сѫди тѧ прѣдастъ слоузѣ. ꙇ҅ слоуга тѧ въсадитъ въ тьмьницѫ.

гл҃ѭ тебѣ. не ꙇ҅маши ꙇ҅зити отътѫдѣ. дондеже ꙇ҅ послѣдьн̑иі трьхоть въздаси.