ЕВАНГЕЛИЕ ЕЖЕ Ѿ ІОАННА
9:1
Ꙇ҅ мимоꙇдꙑ видѣ чк҃а слѣпа. отъ !рса.
9:2
ꙇ҅ въпросишѧ і оученици гл҃ѭште. равви. къто съгрѣши. сь ли ꙇ҅ли родител̑ѣ его. да слѣпъ роди сѧ.
9:3
отъвѣшта ис҃. ни сь съгрѣши. ни родител̑ѣ его. нъ да ѣвѧтъ сѧ дѣла бж҃иѣ на н̑емь.
9:4
мьнѣ подобаетъ. дѣлати дѣла. посълавъшааего мѧ. доньдеже дьнь естъ придетъ ношть. егда никътоже не можетъ дѣлати.
9:5
егда въ мирѣ есмь свѣтъ есмь мироу.
9:6
си рекъ плинѫ на земл̑ѫ. ꙇ҅ сътвори брьние отъ плиновениѣ. ꙇ҅ помаза емоу очи брьниемь.
9:7
ꙇ҅ рече емоу ꙇ҅ди оумꙑ сѧ. въ кѫпѣли силоуамьсцѣ. еже съказаетъ сѧ посъланъ. ꙇ҅ иде же. ꙇ҅ оумꙑ сѧ ꙇ҅ приде вѧдѧ.
9:8
сѫсѣди же. ꙇ҅ иже бѣахѫ видѣли прѣжде. ѣко проситель бѣ. гл҃ахѫ. не сь ли естъ сѣдѧ ꙇ҅ просѧ. ови гл҃ахѫ ѣко сь естъ.
9:9
А ꙇ҅ни гл҃ахѫ подобьнъ емоу естъ. онъ же гл҃аше ѣко азъ есмь.
9:10
гл҃ахѫ же емоу. како ти сѧ отврѣсте очи.
9:11
отъвѣшта онъ ꙇ҅ рече. чк҃ъ. нарицаемꙑ ис҃. брьние сътвори. ꙇ҅ помаза очи ми. ꙇ҅ рече ми. ꙇ҅ди въ кѫпѣль силаамл̑ѫ. ꙇ҅ оумꙑ сѧ. шьдъ же ꙇ҅ оумꙑвъ сѧ прозьрѣхъ.
9:12
рѣшѧ же емоу къто тъ естъ. гл҃а не вѣмь.
9:13
вѣсѧ і къ фарисѣомъ. ꙇ҅же бѣ ꙇ҅ногда слѣпъ.
9:14
бѣ же сѫбота. егда сътвори брьние ис҃. ꙇ҅ отвръзе емоу очи.
9:15
пакꙑ же въпрашахѫ і фарисѣи како прозьрѣ. онъ же рече ꙇ҅мъ. брьние положи мьнѣ на очию. ꙇ҅ оумꙑхъ сѧ ꙇ виждѫ.
9:16
гл҃ахѫ же отъ фарисѣи етери. нѣстъ сь отъ б҃а чк҃ъ. ѣко сѫботꙑ не хранитъ. ови гл҃аахѫ. како можетъ чк҃ъ грѣшьнъ. сице знамениѣ творити. ꙇ҅ распьрѣ бѣ вь н̑ихъ.
9:17
!гл̆ашѧ слѣпьцю пакꙑ. тꙑ чьто гл҃еши о н̑емь. ѣко отвръзе очи твоі. онъ же рече ѣко пророкъ естъ.
9:18
не ѩсѧ же вѣрꙑ ꙇ҅юдеі о н̑емь. ѣко бѣ слѣпъ ꙇ҅ прозьрѣ. доньдеже възгласишѧ родител̑ѣ. того прозьрѣвъшаего.
9:19
ꙇ҅ въпросишѧ ѣ гл̑ѭште. сь ли естъ сн҃ъ ваю. егоже вꙑ гл҃ета. ѣко слѣпъ роди сѧ. како оубо нꙑн̑ѣ видитъ.
9:20
отъвѣштасте ꙇ҅мъ родител̑ѣ его ꙇ҅ рѣста. то вѣвѣ ѣко сь естъ сн҃ъ наю. ꙇ҅ ѣко слѣпъ роди сѧ.
9:21
како же нꙑн̑ѣ видитъ не вѣвѣ. ли къто емоу отвръзе очи не вѣвѣ. самого въпросите. въздрастъ ꙇ҅матъ самъ. о себѣ да гл҃етъ.
9:22
сице рѣсте родител̑ѣ его. ѣко боѣашете сѧ ꙇ҅юдѣі. юже бо сѧ бѣахѫ съложили ꙇ҅юдеі. да аште къто ꙇ҅сповѣстъ х҃а. отълѫчьнъ сънъмишта бѫдетъ.
9:23
сего ради родител̑ѣ его рѣсте. ѣко въздрастъ ꙇ҅матъ. самого въпросите.
9:24
възгласишѧ же въторицеѭ чк҃а. ꙇ҅же бѣ слѣпъ. ꙇ҅ рѣшѧ емоу. даждь славѫ б҃ѵ. мꙑ вѣмъ ѣко чк҃ъ сь грѣшьнъ естъ.
9:25
отъвѣшта же онъ ꙇ҅ рече. аште грѣшьникъ естъ не вѣмь. едино вѣмь. ѣко слѣпъ бѣхъ. нꙑн̑ѣ же виждѫ.
9:26
рѣшѧ же емоу пакꙑ. чьто сътвори тебѣ. како отвръзе твоі очи.
9:27
отъвѣшта ꙇ҅мъ. рѣхъ вамъ юже. ꙇ҅ не слꙑшасте. чьто пакꙑ хоштете слꙑшати. еда ꙇ҅ вꙑ оученици его хоштете бꙑти.
9:28
они же оукоришѧ і ꙇ҅ рѣшѧ. тꙑ оученикъ еси того. мꙑ мосѣови есмъ оученици.
9:29
мꙑ вѣмꙑ ѣко мосѣови гл҃а б҃ъ. сего же не вѣмъ отъкѫдоу естъ.
9:30
отъвѣшта чк҃ъ ꙇ҅ рече ꙇ҅мъ. о семь оубо дивъно естъ. ѣко вꙑ не вѣсте отъкѫдоу естъ. ꙇ҅ отврьзе очи моі.
9:31
вѣмь же ѣко грѣшьникъ б҃ъ не послоушаетъ. нъ аште къто !бгочьтьць естъ. ꙇ҅ вол̑ѫ его творитъ. того послоушаетъ.
9:32
отъ вѣка нѣстъ слꙑшано. ѣко къто отвръзе очи слѣпоу рожденоу.
9:33
аште сь не би отъ б҃а бꙑлъ. не моглъ би творити ничесоже.
9:34
отъвѣшташѧ ꙇ҅ рѣшѧ емоу. въ грѣсѣхъ тꙑ родилъ сѧ еси вьсь. ꙇ҅ тꙑ ли нꙑ оучиши. ꙇ҅згънашѧ же і вънъ.
9:35
слꙑшавъ же ис҃. ѣко ꙇ҅згънашѧ і вънъ. ꙇ҅ обрѣтъ і рече емоу. тꙑ вѣроуеши ли въ сн҃а бж҃иѣ.
9:36
отъвѣшта онъ ꙇ҅ рече ꙇ҅ къто естъ г҃и. да вѣрѫ ꙇ҅мѫ вь н̑его.
9:37
рече же емоу ис҃. ꙇ҅ видѣлъ і еси. ꙇ҅ гл҃ѧі съ тобоѭ тъ естъ.
9:38
онъ же рече. вѣроуѭ г҃и. ꙇ҅ поклони сѧ емоу. !ко!ц
9:39
Ꙇ҅ рече ис҃. на сѫдъ азъ въ миръ се придъ. да невидѧштеі видѧтъ. ꙇ҅ видѧштеі слѣпи бѫдѫтъ.
9:40
слꙑшашѧ се отъ фарисѣі. сиі сѫштеі съ н̑имь. ꙇ҅ рѣшѧ емоу. еда ꙇ҅ мꙑ слѣпи есмъ.
9:41
рече же ꙇ҅мъ ис҃. аште бисте слѣпи бꙑли. не бисте ꙇ҅мѣли грѣха. нꙑн̑ѣ же гл҃ете. ѣко видимъ. ꙇ҅ грѣхъ [в]ашь прѣбꙑваетъ.