ⰺ҅ ⱈⱁⰶⰴⰰⰰⱎⰵ ⱄⱏ ⱀ̑ⰻⰿⰻ ⰺⱄ҃. ⰲⱏ ⰳⰰⰾⰻⰾⰵⰻ. ⱀⰵ ⱈⱁⱅⱑⰰⱎⰵ ⰱⱁ ⰲⱏ ⰺ҅ⱓⰴⱑⰻ ⱈⱁⰴⰻⱅⰻ. ⱑⰽⱁ ⰺ҅ⱄⰽⰰⰰⱈⱘ ⰵⰳⱁ ⰺ҅ⱓⰴⰵⰹ ⱆⰱⰻⱅⰻ.

ⰱⱑ ⰶⰵ ⰱⰾⰻⰸⱏ ⱂⱃⰰⰸⰴⱐⱀⰻⰽⱏ ⰺ҅ⱓⰴⰵⰺ҅ⱄⰽⱏ. ⱄⰽⰻⱀⱁⱂⰻⰳⰻⱑ.

ⱃⱑⱎⱔ ⰶⰵ ⰽⱏ ⱀ̑ⰵⰿⱆ ⰱⱃⰰⱅⱃⰻⱑ ⰵⰳⱁ. ⱂⱃⱑⰺ҅ⰴⰻ ⱁⱅⱏⱄⱘⰴⱆ. ⰺ҅ ⰻⰴⰻ ⰲⱏ ⰺⱓⰴⰵⱗ. ⰴⱁ ⰺ ⱆⱍⰵⱀⰻⱌⰻ ⱅⰲⱁⰹ ⰲⰻⰴⱔⱅⱏ ⰴⱑⰾⰰ ⱅⰲⱁⱑ. ⱑⰶⰵ ⱅⰲⱁⱃⰻⱎⰻ.

ⱀⰻⰽⱏⱅⱁⰶⰵ ⰱⱁ ⰲⱏ ⱅⰰⰺⱀⱑ ⱀⰻⱍⰵⱄⱁⰶⰵ ⱅⰲⱁⱃⰻⱅⱏ. ⰺ҅ ⰻⱎⱅⰵⱅⱏ ⱄⰰⰿⱏ ⱑⰲⱑ ⰱⱏⰹⱅⰻ. ⰰⱎⱅⰵ ⱄⰻ [ⰲⱄⱑ] ⱅⰲⱁⱃⰻⱎⰻ ⱑⰲⰻ ⱄⱔ ⰲⱐⱄⰵⰿⱆ ⰿⰻⱃⱆ.

ⱀⰻ ⰱⱃⰰⱅⰻⱑ ⰱⱁ ⰲⱑⱃⱁⰲⰰⱈⱘ ⰲⱐ ⱀ̑ⰵⰳⱁ.

ⰳⰾ҃ⰰ ⰶⰵ ⰺ҅ⰿⱏ ⰻⱄ҃. ⰲⱃⱑⰿⱔ ⰿⱁⰵ ⱀⰵ ⱆ ⱂⱃⰻⰴⰵ. ⰰ ⰲⱃⱑⰿⱔ ⰲⰰⱎⰵ ⰲⱐⱄⰵⰳⰴⰰ ⰳⱁⱅⱁⰲⱁ ⰵⱄⱅⱏ.

ⱀⰵ ⰿⱁⰶⰵⱅⱏ ⰿⰻⱃⱏ ⱀⰵⱀⰰⰲⰻⰴⱑⱅⰻ ⰲⰰⱄⱏ. ⰿⰵⱀⰵ ⰶⰵ ⱀⰵⱀⰰⰲⰻⰴⰻⱅⱏ. ⱑⰽⱁ ⰰⰸⱏ ⱄⱏⰲⱑⰴⱑⱅⰵⰾ̑ⱐⱄⱅⰲⱆⱙ ⱁ ⱀ̑ⰵⰿⱐ. ⱑⰽⱁ ⰴⱑⰾⰰ ⰵⰳⱁ ⰸⱏⰾⰰ ⱄⱘⱅⱏ.

ⰲⱏⰹ ⰲⱐⰸⰻⰴⱑⱅⰵ ⰲⱏ ⱂⱃⰰⰸⰴⱐⱀⰻⰽⱁⱄⱐ. *̆ⰰⰸⱏ ⱀⰵ ⰲⱐⰸⰻⰴⱘ ⰲⱏ ⱂⱃⰰⰸⰴⱐⱀⰻⰽⱏ ⱄⱐ. ⱑⰽⱁ ⰲⱃⱑⰿⱔ ⰿⱁⰵ ⱀⰵ ⰺ҅ⱄⱂⰾⱏⱀⰻ ⱄⱔ.

ⱄⰻ ⱃⰵⰽⱏ ⱄⰰⰿⱏ ⱁⱄⱅⰰ ⰲⱏ ⰳⰰⰾⰻⰾⰵⰹ.

ⰵⰳⰴⰰ ⰶⰵ ⰲⱐⰸⰻⰴⱘ ⰱⱃⰰⱅⱃⰻⱑ ⰵⰳⱁ ⰲⱏ ⱂⱃⰰⰸⰴⱐⱀⰻⰽⱏ. ⱅⱁⰳⰴⰰ ⰺ҅ ⱄⰰⰿⱏ ⰲⱐⰸⰻⰴⰵ. ⱀⰵ ⱑⰲⱑ ⱀⱏ ⰰⰽⱁ ⱅⰰⰹ.

ⰺ҅ⱓⰴⰵⰹ ⰶⰵ ⰵⰳⱁ ⰺ҅ⱄⰽⰰⱈⱘ ⰲⱏ ⱂⱃⰰⰸⰴⱐⱀⰻⰽⱏ. ⰺ҅ ⰳⰾ҃ⰰⱈⱘ. ⰽⱏⰴⰵ ⰵⱄⱅⱏ ⱁⱀⱏ.

ⰺ҅ ⱃⱏⱂⱏⱅⱏ ⰿⱏⱀⱁⰳⱏ ⰱⱑ ⱁ ⱀ̑ⰵⰿⱐ ⰲⱏ ⱀⰰⱃⱁⰴⱑⱈⱏ. ⱁⰲⰻ ⰳⰾ҃ⰰⱈⱘ ⱑⰽⱁ ⰱⰾⰰⰳⱏ ⰵⱄⱅⱏ. ⰺ҅ⱀⰻ ⰶⰵ ⰳⰾ҃ⰰⱈⱘ ⱀⰻ. ⱀⱏ ⰾⱐⱄⱅⰻⱅⱏ ⱀⰰⱃⱁⰴⱏⰹ.

ⱀⰻⰽⱁⱅⰵⱃⱏⰹ ⰶⰵ ⱆⰱⱁ ⱑⰲⱑ ⰳⰾ҃ⰰⱎⰵ ⱁ ⱀ̑ⰵⰿⱐ. ⱄⱅⱃⰰⱈⰰ ⱃⰰⰴⰻ ⰺ҅ⱓⰴⰵⰺ҅ⱄⰽⰰ.

*̆ⰰⰱⰻⰵ ⰶⰵ ⰲⱏ ⱂⱃⱑⱂⱁⰾⱁⰲⰾ̑ⰵⱀⰻⰵ ⱂⱃⰰⰸⰴⱐⱀⰻⰽⰰ. ⰲⱐⰸⰻⰴⰵ ⰻⱄ҃ ⰲⱏ ⱌⱃⱏⰽⱏⰲⰵ ⰺ҅ ⱆⱍⰰⰰⱎⰵ.

ⰺ҅ ⰴⰻⰲⰾ̑ⱑⰰⱈⱘ ⱄⱔ ⰺ҅ⱓⰴⰵⰻ ⰳⰾ̑ⱙⱎⱅⰵ. ⰽⰰⰽⱁ ⱄⱐ ⰽⱏⱀ̑ⰻⰳⱏⰹ ⱆⰿⱑⰵⱅⱏ ⱀⰵ ⱆⱍⱐ ⱄⱔ.

ⱁⱅⱏⰲⱑⱎⱅⰰ ⰶⰵ ⰻⱄ҃. ⰺ҅ ⱃⰵⱍⰵ ⰺ҅ⰿⱏ. ⰿⱁⰵ ⱆⱍⰵⱀⰻⰵ ⱀⱑⱄⱅⱏ ⰿⱁⰵ. ⱀⱏ ⱂⱁⱄⱏⰾⰰⰲⱏⱎⰰⰵⰳⱁ ⰿⱔ.

ⰰⱎⱅⰵ ⰽⱏⱅⱁ ⱈⱁⱎⱅⰵⱅⱏ ⰲⱁⰾ̑ⱙ ⰵⰳⱁ ⱅⰲⱁⱃⰻⱅⰻ. ⱃⰰⰸⱆⰿⱑⰵⱅⱏ ⱁ ⱆⱍⰵⱀⰻ ⰽⱁⰵ ⱁⱅⱏ ⰱ҃ⰰ ⰵⱄⱅⱏ. ⰾⰻ ⰰⰸⱏ ⱄⰵⰱⱑ ⰳⰾ̑ⱙ.

ⰳⰾ҃ⱔⰻ ⱁ ⱄⰵⰱⱑ. ⱄⰾⰰⰲⱏⰹ ⱄⰲⱁⰵⱗ ⰺ҅ⱎⱅⰵⱅⱏ. ⰰ ⰺⱎⱅⱔⰹ ⱄⰾⰰⰲⱏⰹ ⱂⱁⱄⱏⰾⰰⰲⱏⱎⰰⰵⰳⱁ ⰹ. ⱄⱐ ⰺ҅ⱄⱅⰻⱀⰵⱀⱏ ⰵⱄⱅⱏ. ⰺ҅ ⱀⱑⱄⱅⱏ ⱀⰵⱂⱃⰰⰲⱏⰴⱏⰹ ⰲⱐ ⱀ̑ⰵⰿⱐ.

ⱀⰵ ⰿⱁⱄⰻ ⰾⰻ ⰴⰰⱄⱅⱏ ⰲⰰⰿⱏ ⰸⰰⰽⱁⱀⱏ. ⰺ҅ ⱀⰻⰽⱏⱅⱁⰸⰵ ⱁⱅⱏ ⰲⰰⱄⱏ ⱅⰲⱁⱃⰻⱅⱏ ⰸⰰⰽⱁⱀⰰ. Ⱍⱐⱅⱁ ⰿⰵⱀⰵ ⰺ҅ⱎⱅⰵⱅⰵ ⱆⰱⰻⱅⰻ.

ⱁⱅⱏⰲⱑⱎⱅⰰ ⱀⰰⱃⱁⰴⱏ ⰺ҅ ⱃⰵⱍⰵ. ⰱⱑⱄⱏ ⰾⰻ ⰺ҅ⰿⰰⱎⰻ. ⰽⱏⱅⱁ ⱅⰵⰱⰵ ⰺ҅ⱎⱅⰵⱅⱏ ⱆⰱⰻⱅⰻ.

ⱁⱅⱏⰲⱑⱎⱅⰰ ⰻⱄ҃. ⰺ҅ ⱃⰵⱍⰵ ⰺ҅ⰿⱏ. ⰵⰴⰻⱀⱁ ⰴⱑⰾⱁ ⱄⱏⱅⰲⱁⱃⰻⱈⱏ. ⰺ҅ ⰲⱐⱄⰻ ⰴⰻⰲⰻⱅⰵ ⱄⱔ.

ⱄⰵⰳⱁ ⱃⰰⰴⰻ ⰴⰰⱄⱅⱏ ⰲⰰⰿⱏ ⰿⱁⱄⰻ ⱁⰱⱃⱑⰸⰰⱀⰻⰵ. ⱀⰵ ⱑⰽⱁ ⱁⱅⱏ ⰿⱁⱄⱑⰰ ⰵⱄⱅⱏ. ⱀⱏ ⱁⱅⱏ ⱁⱌ҃ⱐ. ⰺ҅ ⰲⱏ ⱄⱘⰱⱁⱅⱘ ⱁⰱⱃⱑⰸⰰⰵⱅⰵ ⱍⰽ҃ⰰ.

ⰰⱎⱅⰵ ⱁⰱⱃⱑⰸⰰⱀⰻⰵ ⱂⱃⰻⰵⰿⰾ̑ⰵⱅⱏ ⱍⰽ҃ⱏ ⰲⱏ ⱄⱘⰱⱁⱅⱘ. ⰴⰰ ⱀⰵ ⱃⰰⰸⱁⱃⰻⱅⱏ ⱄⱔ ⰸⰰⰽⱁⱀⱏ ⰿⱁⱄⱑⱁⰲⱏ. ⱀⰰ ⰿⱔ ⰾⰻ ⰳⱀⱑⰲⰰⰵⱅⰵ ⱄⱔ. ⱑⰽⱁ ⰲⱐⱄⰵⰳⱁ ⱍⰽ҃ⰰ ⱄⱏⰴⱃⰰⰲⰰ ⱄⱏⱅⰲⱁⱃⰻⱈⱏ ⰲⱏ ⱄⱘⰱⱁⱅⱘ.

ⱀⰵ ⱄⱘⰴⰻⱅⰵ ⱀⰰ ⰾⰻⱌⰰ. ⱀⱏ ⱂⱃⰰⰲⱐⰴⱐⱀⱏⰹ ⱄⱘⰴⱏ ⱄⱘⰴⰻⱅⰵ.

ⰳⰾ҃ⰰⱈⱘ ⰶⰵ ⰵⱅⰵⱃⰻⰹ ⱁⱅⱏ !ⰺ҅ⰻⰾⰿⰾⱑⱀⱏ. ⱀⰵ ⱄⱐ ⰾⰻ ⰵⱄⱅⱏ ⰵⰳⱁⰶⰵ ⰺ҅ⱎⱅⱘⱅⱏ ⱆⰱⰻⱅⰻ.

ⰺ҅ ⱄⰵ ⱀⰵ ⱁⰱⰻⱀⱆⱗ ⱄⱔ ⰳⰾ҃ⰵⱅⱏ. ⰺ҅ ⱀⰻⱍⰵⱄⱁⰶⰵ ⰵⰿⱆ ⱀⰵ !ⰳⰾⱙⱅⱏ. ⰵⰴⰰ ⰽⰰⰽⱁ ⱃⰰⰸⱆⰿⱑⱎⱔ ⰽⱏⱀⱔⰸⰻ ⱑⰽⱁ ⱄⱐ ⰵⱄⱅⱏ ⱈ҃ⱏ.

ⱀⱏ ⱄⰵⰳⱁ ⰲⱑⰿⱏ ⱁⱅⱏⰽⱘⰴⱆ ⱄⱐ ⰵⱄⱅⱏ. ⰰ ⱈ҃ⱏ ⰵⰳⰴⰰ ⱂⱃⰻⰴⰵⱅⱏ. Ⱀⰻⰽⱏⱅⱁⰶⰵ ⱀⰵ ⰲⱑⱄⱅⱏ ⱁⱅⱏⰽⱘⰴⱆ ⰵⱄⱅⱏ.

ⰲⱏⰸⱏⰲⰰ ⰶⰵ ⰲⱏ ⱌⱃⱏⰽⱏⰲⰵ. ⱆⱍⱔ ⰻⱄ҃. ⰺ҅ ⰳⰾ҃ⱔ. ⰺ҅ ⰿⰵⱀⰵ ⰲⱑⱄⱅⰵ. ⰺ҅ ⰲⱑⱄⱅⰵ ⱁⱅⱏ ⰽⱘⰴⱆ ⰵⱄⰿⱐ. ⰺ҅ ⱁ ⱄⰵⰱⱑ ⱀⰵ ⱂⱃⰻⰴⱏ. ⱀⱏ ⰵⱄⱅⱏ ⰺ҅ⱄⱅⰻⱀⱐⱀⱏ ⱂⱁⱄⱏⰾⰰⰲⱏⰹ ⰿⱔ. ⰵⰳⱁⰶⰵ ⰲⱏⰹ ⱀⰵ ⰲⱑⱄⱅⰵ.

ⰰⰸⱏ ⰻ ⰲⱑⰿⱐ. Ⱑⰽⱁ ⱁⱅⱏ ⱀ̑ⰵⰳⱁ ⰵⱄⰿⱐ ⰺ҅ ⱅⱏ ⰿⱔ ⱂⱁⱄⱏⰾⰰ.

ⰺ҅ⱄⰽⰰⱈⱘ ⰶⰵ ⱗⱅⰻ ⰹ. ⰺ҅ ⱀⰻⰽⱏⱅⱁⰶⰵ ⱀⰵ ⰲⱏⰸⰾⱁⰶⰻ ⱃⱘⰽⱏⰹ ⱀⰰ ⱀ̑ⱐ. ⱑⰽⱁ ⱀⰵ ⱓ ⰱⱑ ⱂⱃⰻⱎⱐⰾⱏ ⰳⱁⰴⱏ ⰵⰳⱁ.

Ⱉⱅⱏ ⱀⰰⱃⱁⰴⰰ ⰶⰵ ⰿⱀⱁⰸⰻ ⰲⱑⱃⱁⰲⰰⱎⱔ ⰲⱏ ⱀⱐ. ⰺ҅ ⰳⰾ҃ⰰⱈⱘ. ⱑⰽⱁ ⱈ҃ⱏ ⰵⰳⰴⰰ ⱂⱃⰻⰴⰵⱅⱏ. ⰵⰴⰰ ⰱⱁⰾⱐⱎⰰ ⰸⱀⰰⰿⰵⱀⰻⱑ ⱄⱏⱅⰲⱁⱃⰻⱅⱏ. ⱑⰶⰵ ⰵⱄⱅⱏ ⱄⱏⱅⰲⱁⱃⰻⰾⱏ.

ⱄⰾⱏⰹⱎⰰⱎⱔ ⰶⰵ ⱇⰰⱃⰻⱄⱑⰹ. ⱀⰰⱃⱁⰴⱏ ⱃⱏⱂⱏⱎⱅⱘⱎⱅⱐ ⱁ ⱀ̑ⰵⰿⱐ ⱄⰵ. Ⰺ ⱂⱁⱄⱏⰾⰰⱎⱔ ⰰⱃⱈⰻⰵⱃⰵⰹ. ⱄⰾⱆⰳⱏⰹ ⰴⰰ ⰺⰿⱘⱅⱏ ⰹ.

Ⱃⰵⱍⰵ ⰶⰵ ⰻⱄ҃. ⰵⱎⱅⰵ ⰿⰰⰾⱁ ⰲⱃⱑⰿⱔ ⱄⱏ ⰲⰰⰿⰻ ⰵⱄⰿⱐ. ⰺ҅ ⰻⰴⱘ ⰽⱏ ⱂⱁⱄⱏⰾⰰⰲⱏⱎⱓⰵⰿⱆ ⰿⱔ.

Ⱂⱁⰺ҅ⱎⱅⰵⱅⰵ ⰿⰵⱀⰵ ⰺ҅ ⱀⰵ ⱁⰱⱃⱔⱎⱅⰵⱅⰵ. ⰺ҅ⰴⰵⰶⰵ ⰵⱄⰿⱐ ⰰⰸⱏ ⰲⱏⰹ ⱀⰵ ⰿⱁⰶⰵⱅⰵ ⱂⱃⰻⱅⰻ.

ⱃⱑⱎⱔ ⰶⰵ ⰺ҅ⱓⰴⰵⰹ ⰽⱏ ⱄⰵⰱⱑ ⱄⰰⰿⰻ. ⰽⰰⰿⱁ ⱈⱁⱎⱅⰵⱅⱏ ⰺ҅ⱅⰻ. ⰺ҅ ⱆⱍⰻⱅⰻ. ⰵⰾⰻⱀⱏⰹ.

Ⱍⱐⱅⱁ ⰵⱄⱅⱏ ⱄⰾⱁⰲⱁ ⱄⰵ ⰵⰶⰵ ⱃⰵⱍⰵ. ⰲⱐⰸⰻⱎⱅⰵⱅⰵ ⰿⰵⱀⰵ ⰺ҅ ⱀⰵ ⱁⰱⱃⱔⱎⱅⰵⱅⰵ. ⰺ҅ ⰻⰴⰵⰶⰵ ⰵⱄⰿⱐ ⰰⰸⱏ ⰲⱏⰹ ⱀⰵ ⰿⱁⰶⰵⱅⰵ ⱂⱃⰻⱅⰻ.

ⰲⱏ ⱂⱁⱄⰾⱑⰴⱐⱀⰻ ⰶⰵ ⰴⱐⱀⱐ ⰲⰵⰾⰻⰽⱏⰹ. ⱂⱃⰰⰸⰴⱐⱀⰻⰽⱏ. ⱄⱅⱁⱑⰰⱎⰵ ⰻⱄ҃. ⰺ҅ ⰸⱏⰲⰰⱎⰵ ⰳⰾ҃ⱔ. ⰰⱎⱅⰵ ⰽⱏⱅⱁ ⰶⱔⰶⰴⰵⱅⱏ. ⰴⰰ ⱂⱃⰻⰴⰵⱅⱏ. ⰽⱏ ⰿⱐⱀⱑ ⰺ҅ ⱂⰻⰵⱅⱏ.

ⰺ҅ ⰲⱑⱃⱆⱗⰹ ⰲⱏ ⰿⱔ. ⱑⰽⱁⰶⰵ ⰽⱏⱀ̑ⰻⰳⱏⰹ ⱃⱑⱎⱔ. ⱃⱑⰽⱏⰹ ⱁⱅⱏ ⱍⱃⱑⰲⰰ ⰵⰳⱁ ⰺ҅ⱄⱅⰵⰽⱘⱅⱏ ⰲⱁⰴⱏⰹ ⰶⰻⰲⱏⰹ.

ⱄⰵ ⰶⰵ ⱃⰵⱍⰵ ⱁ ⰴⱄ҃ⱑ. ⰺ҅ⰶⰵ ⱈⱁⱅⱑⱈⱘ ⱂⱃⰻⰵⰿⰰⱅⰻ. ⰲⱑⱃⱆⱙⱎⱅⰵⰹ ⰲⱐ ⱀ̑ⰵⰳⱁ. ⱀⰵ ⱓ ⰱⱁ ⰱⱑ ⰴⱈ҃ⱏ ⱄⱅ҃ⱏⰹ ⰴⰰⱀⱏ. ⱑⰽⱁ ⰻⱄ҃ ⱀⰵ ⱓ ⰱⱑ ⱂⱃⱁⱄⰾⰰⰲⰾ̑ⰵⱀⱏ.

Ⰿⱀⱁⰸⰻ ⰶⰵ ⱁⱅⱏ ⱀⰰⱃⱁⰴⰰ ⱄⰾⱏⰹⱎⰰⰲⱏⱎⰵ ⱄⰾⱁⰲⰵⱄⰰ ⱄⰻ. ⰳⰾ҃ⰰⱈⱘ ⱄⱐ ⰵⱄⱅⱏ ⰲⱏ ⰺ҅ⱄⱅⰻⱀⱘ ⱂⱃⱁⱃⱁⰽⱏ.

Ⰴⱃⱆⰸⰻ ⰶⰵ ⰳⰾ҃ⰰⱈⱘ ⱄⱐ ⰵⱄⱅⱏ ⱈ҃ⱏ. ⱁⰲⰻ ⰶⰵ ⰳⰾ҃ⰰⱈⱘ. ⰵⰴⰰ ⱁⱅⱏ ⰳⰰⰾⰻⰾⰵⱗ ⱈ҃ⱏ ⱂⱃⰻⰴⰵⱅⱏ.

ⱀⰵ ⰽⱏⱀⰻⰳⱏⰹ ⰾⰻ ⱃⱑⱎⱔ. ⱑⰽⱁ ⱁⱅⱏ ⱄⱑⰿⰵⱀⰵ !ⰴⰰⰲⰰ. ⰺ҅ ⱁⱅⱏ ⰲⰻⱅⱐⰾⰵⱁⰿⱐⱄⰽⰰⰳⱁ ⰳⱃⰰⰴⱐⱌⰰ. ⰺ҅ⰴⰵⰶⰵ ⰱⱑ ⰴⰰ҃ⰴⱏ ⱂⱃⰻⰴⰵⱅⱏ ⱈ҃ⱏ.

Ⱃⰰⱄⱂⱐⱃⱑ ⰶⰵ ⰱⱏⰹ!ⱄ ⰲⱏ ⱀⰰⱃⱁⰴⱑ ⰵⰳⱁ ⱃⰰⰴⰻ.

Ⰵⱅⰵⱃⰹⰻ ⰶⰵ ⱁⱅⱏ ⱀ̑ⰻⱈⱏ ⱈⱁⱅⱑⰰⱈⱘ ⱗⱅⰻ ⰹ. ⱀⱏ ⱀⰻⰽⱏⱅⱁⰶⰵ ⱀⰵ ⰲⱏⰸⰾⱁⰶⰻ ⱀⰰ ⱀ̑ⱐ ⱃⱘⰽⱆ.

Ⱂⱃⰻⰴⱘ ⰶⰵ ⱄⰾⱆⰳⱏⰹ. ⰽⱏ ⰰⱃⱈⰻⰵⱃⰵⱁⰿⱏ ⰺ҅ ⱇⰰⱃⰻⱄⰵⱁⰿⱏ. Ⰺ҅ ⱃⱑⱎⱔ ⰺ҅ⰿⱏ ⱅⰻ. ⱂⱁ ⱍⱐⱅⱁ ⱀⰵ ⱂⱃⰻⰲⱑⱄⱅⰵ ⰵⰳⱁ.

ⱁⱅⱏⰲⱑⱎⱅⰰⱎⱔ ⱄⰾⱆⰳⱏⰹ. ⱀⰻⰽⱁⰾⰻⰶⰵ ⱅⰰⰽⱁ ⰵⱄⱅⱏ. ⰳⰾ҃ⱏ ⱍⰽ҃ⱏ. ⱑⰽⱁ ⱄⱐ ⱍⰽ҃ⱏ. ⱁⱅⱏⰲⱑⱎⱅⰰⱎⱔ ⰺ҅ⰿⱏ ⱇⰰⱃⰻⱄⱑⰹ.

ⱀⱏ ⱀⰰⱃⱁⰴⱁⱄⱐ. ⰺ҅ⰶⰵ ⱀⰵ ⰲⱑⱄⱅⱏ ⰸⰰⰽⱁⱀⰰ ⱂⱃⱁⰽⰾⱔⱅⰻ ⱄⱘⱅⱏ.

ⰳⰾ҃ⰰ ⱀⰻⰽⱁⰴⰻⰿⱏ ⰽⱏ ⱀ̑ⰻⰿⱏ. ⱂⱃⰻⱎⰵⰴⱏⰹ ⰽⱏ ⱀ̑ⰵⰿⱆ ⱀⱁⱎⱅⰻⱙ. ⰵⰴⰻⱀⱏ ⱄⱏⰹ ⱁⱅⱏ ⱀ̑ⰻⱈⱏ.

ⰵⰴⰰ ⰸⰰⰽⱁⱀⱏ ⱀⰰⱎⱐ ⱄⱘⰴⰻⱅⱏ ⱍⰽ҃ⱆ. ⰰⱎⱅⰵ ⱀⰵ ⱄⰾⱏⰹⱎⰻⱅⱏ ⱁⱅⱏ ⱀ̑ⰵⰳⱁ ⱂⱃⱑⰶⰴⰵ. ⰺ҅ ⱃⰰⰸⱆⰿⱑⱙⱅⱏ ⱍⱐⱅⱁ ⱅⰲⱁⱃⰻⱅⱏ.

ⱁⱅⱏⰲⱑⱎⱅⰰⱎⱔ ⰺ҅ ⱃⱑⱎⱔ ⰵⰿⱆ. ⰵⰴⰰ ⱅⱏⰹ ⱁⱅⱏ ⰳⰰⰾⰻⰾⰵⱗ ⰵⱄⰻ. ⰺ҅ⱄⱂⱏⰹⱅⰰⰻ ⰹ ⰺ҅ ⰲⰻⰶⰴⱐ. ⱑⰽⱁ ⱁⱅⱏ ⰳⰰⰾⰻⰾⰵⱗ ⱂⱃⱁⱃⱁⰽⱏ ⱀⰵ ⱂⱃⰻⰴⰵⱅⱏ.

ⰺ҅ ⰻⰴⰵ ⰽⱏⰶⱐⰴⱁ ⰲⱏ ⰴⱁⰿⱏ ⱄⰲⱁⰹ.