ⰴⰰ ⱀⰵ ⱄⱏⰿⱘⱎⱅⰰⰵⱅⱏ ⱄⱔ ⰲⰰⱎⰵ ⱄⱃⱏⰴⱐⱌⰵ. ⰲⱑⱃⱆⰺⱅⰵ ⰲⱏ ⰱ҃ⰰ. ⰺ҅ ⰲⱏ ⰿⱔ ⰲⱑⱃⱆⰺ҅ⱅⰵ.

ⰲⱏ ⰴⱁⰿⱏ ⱁⱌ҃ⰰ ⰿⱁⰵⰳⱁ. ⱁⰱⰻⱅⱑⰾⰻ ⰿⱀⱁⰳⱏⰹ ⱄⱘⱅⱏ. ⰰⱎⱅⰵ ⰾⰻ ⰶⰵ ⱀⰻ. ⱃⰵⰽⰾⱏ ⰱⰻⰿⱐ ⰲⰰⰿⱏ. ⱑⰽⱁ ⰺ҅ⰴⱘ ⱆⰳⱁⱅⱁⰲⰰⱅⰻ ⰿⱑⱄⱅⱁ ⰲⰰⰿⱏ.

ⰺ҅ ⰵⱎⱅⰵ ⰺ҅ⰴⱘ ⱂⰰⰽⱏⰹ ⱂⱃⰻⰴⱘ. ⰺ҅ ⱆⰳⱁⱅⱁⰲⰰⱙ ⰿⱑⱄⱅⱁ ⰲⰰⰿⱏ. ⰺ҅ ⱂⱁⰺ҅ⰿⱘ ⰲⱏⰹ ⰽⱏ ⱄⰵⰱⱑ. ⰴⰰ ⰺ҅ⰴⰵⰶⰵ ⰵⱄⰿⱐ ⰰⰸⱏ ⰺ҅ ⰲⱏⰹ ⰱⱘⰴⰵⱅⰵ.

ⰺ҅ ⱑⰿⱁⰶⰵ ⰰⰸⱏ ⰺ҅ⰴⱘ ⰲⱑⱄⱅⰵ ⱂⱘⱅⱐ.

ⰳⰾ҃ⰰ ⰵⰿⱆ ⱅⸯⱁⰿⰰ ⰳ҃ⰻ. ⱀⰵ ⰲⱑⰿⱏ ⰽⰰⰿⱁ ⰺ҅ⰴⰵⱎⰻ. ⰺ҅ ⰽⰰⰽⱁ ⱂⱘⱅⱐ ⰿⱁⰶⰵⰿⱏ ⰲⱑⰴⱑⱅⰻ.

ⰳⰾ҃ⰰ ⰵⰿⱆ ⰻⱄ҃. ⰰⰸⱏ ⰵⱄⰿⱐ ⱂⱘⱅⱐ ⰺ҅ ⰻⱄⱅⰻⱀⰰ. ⰺ҅ ⰶⰻⰲⱁⱅⱏ. ⱀⰻⰽⱏⱅⱁⰶⰵ ⱂⱃⰻⰴⰵⱅⱏ ⰽⱏ ⱁⱌ҃ⱓ. ⱅⱏⰽⰿⱁ ⰿⱀⱁⱙ.

ⰰⱎⱅⰵ ⰿⱔ ⰱⰻⱄⱅⰵ ⰸⱀⰰⰾⰻ. ⰺ҅ ⱁⱌ҃ⰰ ⰿⱁⰵⰳⱁ ⰸⱀⰰⰾⰻ ⰱⰻⱄⱅⰵ ⱆⰱⱁ. ⱁⱅⱏⱄⰵⰾⱑ ⱂⱁⰸⱀⰰ[ⱄ]ⱅⰵ ⰹ. ⰺ҅ ⰲ[ⰻ]ⰴⱑⱄⱅⰵ ⰺ҅.

ⰳⰾ҃ⰰ ⰵⰿⱆ ⱇⰻⰾⰻⱂⱏ. ⰳ҃ⰻ ⱂⱁⰽⰰⰶⰻ ⱀⰰⰿⱏ ⱁⱌ҃ⰰ. ⰺ҅ ⰴⱁⰲⱐⰾⰵⱅⱏ ⱀⰰⰿⱏ

ⰳⰾ҃ⰰ ⰵⰿⱆ ⰻⱄ҃. ⱅⱁⰾⰻⰽⱁ ⰲⱃⱑⰿⱔ ⱄⱏ ⰲⰰⰿⰻ ⰵⱄⰿⱐ. ⰺ҅ ⱀⰵ ⱂⱁⰸⱀⰰ ⰾⰻ ⰿⰵⱀⰵ ⱇⰻⰾⰻⱂⱂⰵ. ⰲⰻⰴⱑⰲⱏⰹ ⰿⰵⱀⰵ ⰲⰻⰴⱑ ⱁⱌ҃ⰰ. Ⰽⰰⰽⱁ ⱅ[ⱏⰹ] ⰳⰾ҃ⰵⱎⰻ ⱂⱁⰽⰰⰶⰻ ⱀⰰⰿⱏ ⱁⱌ҃ⰰ.

Ⱀⰵ [ⰲⱑ]ⱃⱆⰵⱎⰻ ⰾⰻ ⱑⰽⱁ ⰰⰸⱏ ⰲⱏ !ⱁⱌⰻ. ⰺ҅ [!ⱁⱌⱐ] ⰲⱏ ⰿⱀⱑ ⰵⱄⱅⱏ. ⰳⰾ҃ⱏⰹ ⱗⰶⰵ ⰰⰸⱏ ⰳⰾ҃ⱙ ⰲⰰⰿⱏ. ⱁ ⱄⰵⰱⱑ ⱀⰵ ⰳⰾ҃ⱙ. ⱁⱌ҃ⱐ ⰶⰵ ⱂⱃⱑⰱⱏⰹⰲⰰⱗⰹ ⰲⱏ ⰿⱐⱀⱑ. ⱅⱏ ⱅⰲⱁⱃⰻⱅⱏ ⰴⱑ[ⰾⱁ].

ⰲⱑⱃⱘ ⰺ҅ⰿⱑⱅⰵ ⰿⱐⱀⱑ. ⱑⰽⱁ ⰰⰸⱏ ⰲⱏ !ⱁⱌⰻ. ⰺ҅ ⱁⱌ҃ⱐ ⰲⱏ ⰿⱐⱀⱑ. ⰰⱎⱅⰵ ⰾⰻ ⰶⰵ ⱀⰻ. ⰸⰰ ⱅⰰ ⰴⱑⰾⰰ ⰲⱑⱃⱘ ⰵⰿⰾ̑ⱑⱅⰵ ⰿⰻ.

ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⰲⱑⱃⱆⱗⰻ ⰲⱏ ⰿⱔ. ⰴⱑⰾⰰ ⱑⰶⰵ ⱅⰲⱁⱃⱘ. ⰺ҅ ⱅⱏ ⱅⰲⱁⱃⰻⱅⱏ. ⰺ҅ ⰱⱁⰾⱐⱎⰰ ⱅⰲⱁⱃⰻⱅⱏ ⱄⰻⱈⱏ. ⱑⰽⱁ ⰰⰸⱏ ⰽⱏ ⱁⱌ҃ⱓ ⰳⱃⱔⰴⱘ.

ⰺ҅ ⰵⰳⱁⰶⰵ ⰽⱁⰾⰻⰶⱐⰴⱁ ⱂⱃⱁⱄⰻⱅⰵ ⰲⱏ ⰺⰿⱔ ⰿⱁⰵ. ⱅⱁ ⱄⱅⰲⱁⱃⱘ. ⰴⰰ ⱂⱃⱁⱄⰾⰰⰲⰻⱅⱏ ⱄⱔ !ⱁⱌⱐ ⱁ !ⱄⱀⱑ.

ⰺ҅ [ⰰ]ⱎⱅⰵ ⱍⰵⱄⱁ ⱂⱃⱁⱄⰻⱅⰵ ⰲⱏ ⰹⰿⱔ ⰿⱁⰵ. ⱅⱁ ⱄⱏⱅⰲⱁⱃⱘ.

ⰰⱎⱅⰵ ⰾ̑ⱓⰱⰻⱅⰵ ⰿⱔ. ⰸⰰⱂⱁⰲⱑⰴⰻ [ⰿⱁ]ⱗ ⱄⱏⰱⰾ̑ⱓⰴⱑⱅⰵ.

ⰺ҅ ⰰⰸⱏ ⱆ[ⰿ]ⱁⰾ̑ⱘ ⱁⱌ҃ⰰ. ⰺ҅ ⰻⱀⱁⰳⱁ ⱂⰰⱃⰰⰽⰾⰻⱅⰰ ⰴⰰⱄⱅⱏ ⰲⰰⰿⱏ. ⰴⰰ ⰱⱘⰴⰵⱅⱏ ⱄⱏ ⰲⰰⰿⰻ ⰲⱏ ⰲⱑⰽⱏⰹ.

ⰴⱈ҃ⱏ ⰺ҅ⱄⱅⰻⱀⱏⱀⱏⰹ. ⰵⰳⱁⰶⰵ ⰲⱐⱄⱐ ⰿⰻⱃⱏ ⱀⰵ ⰿⱁⰶⰵⱅⱏ ⱂⱃⰻⱗⱅⰻ. ⱑⰽⱁ ⱀⰵ ⰲⰻⰴⰻⱅⱏ ⰵⰳⱁ ⱀⰻ ⰸⱀⰰⰵⱅⱏ ⰵⰳⱁ. ⰲⱏⰹ ⰶⰵ ⰸⱀⰰⰵⱅⰵ ⰹ. ⱑⰽⱁ ⰲⱏ ⰲⰰⱄⱏ. ⱂⱃⱑⰱⱏⰹⰲⰰⰵⱅⱏ. ⰺ҅ ⰲⱏ ⰲⰰⱄⱏ ⰱⱘⰴⰵⱅⱏ.

ⱀⰵ ⱁⱄⱅⰰⰲⰾ̑ⱙ ⰲⰰⱄⱏ ⱄⰻⱃⱏ. ⱂⱃⰻⰴⱘ ⰽⱏ ⰲⰰⰿⱏ.

ⰵⱎⱅⰵ ⰿⰰⰾⱁ ⰺ҅ ⰲⱐⱄⱐ ⰿⰻⱃⱏ ⱀⰵ... ⰲⰻⰴⰻⱅⱏ ⰿⰵⱀⰵ. ⰲⱏⰹ ⰶⰵ ⰲⰻⰴⰻⱅⰵ ⰿⱔ. ⱑⰽⱁ ⰰⰸⱏ ⰶⰻⰲⱘ.ⰺ҅ ⰲⱏⰹ ⰶⰻⰲⰻ ⰱⱘⰴⰵⱅⰵ.

ⰲⱏ ⱅⱏ ⰴⱐⱀⱐ ⱃⰰⰸⱆⰿⱑⰵⱅⰵ ⰲⱏⰹ. ⱑⰽⱁ ⰰⰸⱏ ⰲⱏ !ⱁⱌⰻ ⰿⱁⰵⰿⱐ. ⰺ҅ ⰲⱏⰹ ⰲⱏ ⰿⱐⱀⱑ ⰵⱄⱅⰵ. ⰺ҅ ⰰⰸⱏ ⰲⱏ ⰲⰰⱄⱏ.

ⰺ҅ⰿⱑⱗⰹ ⰸⰰⱂⱁⰲⱑⰴⰻ ⰿⱁⱗ. ⰺ҅ ⱄⱏⰱⰾ̑ⱓⰴⰰⱗ ⱗ. ⱅⱏ ⰵⱄⱅⱏ ⰾ̑ⱓⰱⱔⰹ ⰿⱔ. ⰰ ⰾⱓⰱⱔⰹ ⰿⱔ. ⰲⱐⰸⰾ̑[ⱓ]ⰱⰾ̑ⰵⱀⱏ ⰱⱘⰴⰵⱅⱏ ⱁⱌ҃ⰵⰿⱐ ⰿⱁⰺ[ⰿⱐ] ⰺ҅ ⰰⰸⱏ ⰲⱏⰶⰾ̑ⱓⰱⰾⱘ ⰹ. ⰺ҅ ⱑⰲⰾ[ⱙ] ⱄⱔ ⰵⰿⱆ ⱄⰰⰿⱏ.

!Ⰳⰾⰰ ⰵⰿⱆ ⰺ҅[ⱓ]ⰴⰰ. ⱀⰵ ⰺ҅ⱄⰽⰰⱃⰻⱁⱅⱐⱄⰽⱏⰹ. ⰳ҃ⰻ ⱅⱁ ⰱⱏⰹⱄⱅⱏ. ⱑⰽⱁ ⱀⰰⰿⱏ ⱈⱁⱎⱅ[ⰵ]ⱎⰻ ⱄⱔ ⱑⰲⰻⱅⰻ. ⰰ ⱀⰵ ⰲⱐⱄⰵⰿⱆ ⰿⰻⱃⱆ.

ⱁⱅⱏⰲⱑⱎⱅⰰ ⰻⱄ҃ ⰺ҅ ⱃⰵⱍⰵ ⰵⰿⱆ. ⰰⱎⱅⰵ ⰽⱅⱁ ⰾ̑ⱓⰱⰻⱅⱏ [ⰿⱔ] ⱄⰾⱁⰲⱁ ⰿⱁⰵ ⱄⱏⰱⰾ̑ⱓⰴⰵⱅⱏ. ⰺ [!ⱁⱌⱐ] ⰿⱁⰹ ⰲⱏⰸⰾ̑ⱓⰱⰻⱅⱏ ⰹ. ⰺ҅ ⰽⱏ ⱀ̑[ⰵ]ⰿⱆ ⰺ҅ⰴⰵⰲⱑ. ⰺ҅ ⱁⰱⰻⱅⱑⰾ̑ⱐ ⱆ ⱀ̑ⰵⰳⱁ ⱄⱏⱅⰲⱁⱃⰻⰲⱑ.

ⱀⰵ ⰾ̑ⱓⰱⱔⰹ ⰿⰵⱀⰵ. ⰺ҅ ⱄⰾⱁⰲⰵⱄⱏ ⰿⱁⰺⱈⱏ ⱀⰵ ⱄⱏⰱⰾ̑ⱓⰴⰰⰵⱅⱏ. ⰺ҅ ⱄⰾⱁⰲⱁ ⰵⰶⰵ ⱄⰾⱏⰹⱎⰰⱄⱅⰵ ⱀⱑⱄⱅⱏ ⰿⱁⰵ. ⱀⱏ ⱂⱁⱄⱏⰾⰰⰲⱏⱎⰰⰵⰳⱁ ⰿⱔ ⱁⱌ҃ⰰ.

Ⱄⰻ ⰳⰾ҃ⰰⱈⱏ ⰲⰰⰿⱏ. ⰲⱏ ⰲⰰⱄⱏ ⱄⱏⰹ.

ⱂⰰⱃⰰⰽⰾⰻⱅⱏ ⰶⰵ ⰴⱈ҃ⱏ ⱄⱅ҃ⱏⰹ. ⰵⰳⱁⰶⰵ ⱂⱁⱄⱏⰾⰵⱅⱏ ⱁⱌ҃ⱐ ⰲⱏ ⰺⰿⱔ ⰿⱁⰵ. ⱅⱏ ⰲⱏⰹ ⱀⰰⱆⱍⰻⱅⱐ ⰲⱐⱄⰵⰿⱆ. ⰺ҅ ⰲⱏⱄⱂⱁⰿⱔⱀⱘⱅⱏ ⰲⰰⰿⱏ ⰲⸯⱄⱑ. ⱑⰶⰵ ⱃⱑⱈⱏ ⰲⰰⰿⱏ.

ⰿⰻⱃⱏ ⱁⱄⱅⰰⰲⰾ̑ⱑⱙ ⰲⰰⰿⱏ. ⰿⰻⱃⱏ ⰿⱁⰹ ⰴⰰⱙ ⰲⰰⰿⱏ ⱀⰵ ⱑⰽⱁⰶⰵ ⰲⱐⱄⱐ ⰿⰻⱃⱏ ⰴⰰⰵⱅⱏ. ⰰⰸⱏ ⰴⰰⱙ ⰲⰰⰿⱏ. ⰴⰰ ⱀⰵ ⱄⱏⰿⱘⱎⱅⰰⰵⱅⱏ ⱄⱔ ⱄⱃⱏⰴⱐⱌⰵ ⰲⰰⱎⰵ. ⱀⰻ ⱆⱄⱅⱃⰰⱎⰰⰵⱅⱏ.

ⱄⰾⱏⰹⱎⰰⱄⱅⰵ ⱑⰽⱁ ⰰⰸⱏ ⱃⱑⱈⱏ ⰲⰰⰿⱏ. ⰺ҅ⰴⱘ ⰺ҅ ⱂⱃⰻⰴⱘ ⰽⱏ ⰲⰰⰿⱏ. ⰰⱎⱅⰵ ⰱⰻⱄⱅⰵ ⰾ̑ⱓⰱⰻⰾⰻ ⰿⱔ. ⰲⱏⰸⰴⱃⰰⰴⱁⰲⰰⰾⰻ ⱄⱔ ⰱⰻⱄⱅⰵ ⱆⰱⱁ. ⱑⰽⱁ ⰺ҅ⰴⱘ ⰽⱏ ⱁⱌ҃ⱓ. ⱑⰽⱁ ⱁⱌ҃ⱐ ⰱⱁⰾ̑ⰻ ⰿⰵⱀⰵ ⰵⱄⱅⱏ.

ⰺ҅ ⱀⱏⰹⱀ̑ⱑ ⱃⱑⱈⱏ ⰲⰰⰿⱏ. ⱂⱃⱑⰶⰴⰵ ⰴⰰⰶⰵ ⱀⰵ ⰱⱘⰴⰵⱅⱏ. ⰴⰰ ⰵⰳⰴⰰ ⰱⱘⰴⰵⱅⱏ. ⰲⱑⱃⱘ ⰺ҅ⰿⰵⱅⰵ ⱑⰽⱁ ⰰⰸⱏ ⱃⱑⱈⱏ ⰲⰰⰿⱏ.

ⱓⰶⰵ ⱀⰵ ⰿⱀⱁⰳⱁ ⰳⰾ҃ⱙ ⱄⱏ ⰲⰰⰿⰻ. ⰳⱃⱔⰴⰵⱅⱏ ⰱⱁ ⱄⰵⰳⱁ ⰿⰻⱃⰰ ⰽⱏⱀⱔⰷⱐ. ⰺ҅ ⰲⱏ ⰿⱐⱀⱑ ⱀⰵ ⰺ҅ⰿⰰⱅⱏ ⱀⰻⱍⰵⱄⱁⰶⰵ.

ⱀⱏ ⰴⰰ ⱃⰰⰸⱆⰿⱑⰵⱅⱏ ⰲⱐⱄⱐ ⰿⰻⱃⱏ. ⱑⰽⱁ ⰾ̑ⱓⰱⰾ̑ⱘ ⱁⱌ҃ⰰ. ⰺ҅ ⱑⰽⱁⰶⰵ ⰸⰰⱂⱁⰲⱑⰴⱑ ⰿⱐⱀⱑ ⱁⱌ҃ⱐ. ⱅⰰⰽⱁ ⱅⰲⱁⱃⱘ. ⰲⱏⱄⱅⰰⱀⱑⱅⰵ ⰺ҅ⰴⱑⰿⱏ ⱁⱅⱏⱄⱘⰴ[ⱆ]