Ⱂⱃⱑⰶⰴⰵ ⰶⰵ ⱂⱃⰰⰸⰴⱐⱀⰻⰽⰰ ⱂⰰⱄⱌⱑ. ⰲⱑⰴⱏⰹ ⰻⱄ҃ ⱑⰽⱁ ⱂⱃⰻⰴⰵ ⰵⰿⱆ ⰳⱁⰴⰻⱀⰰ. ⰴⰰ ⰺ ⱂⱃⱑⰺ҅ⰴⰵⱅⱏ ⱁⱅⱏ ⰿⰻⱃⰰ ⱄⰵⰳⱁ ⰽⱏ ⱁⱌ҃ⱓ. ⰲⱏⰸⰾ̑ⱓⰱⰾⱐ ⱄⰲⱁⱗ. ⱄⱘⱎⱅⱔⱗ ⰲⱏ ⰲⱐⱄⰵⰿⱐ ⰿⰻⱃⱑ. ⰴⱁ ⰽⱁⱀⱐⱌⰰ ⰲⱐⰸⰾⱓⰱⰻ ⱗ.

Ⰺ҅ ⰲⰵⱍⰵⱃⰻ ⰱⱏⰹⰲⱏⱎⰻ. ⰴⰻⱑⰲⱁⰾⱆ ⱓⰶⰵ ⰲⱏⰾⱁⰶⱐⱎⱓ ⰲⱏ ⱄⱃⱏⰴⱐⱌⰵ ⰺ҅ⱓⰴⱑ ⱄⰻⰿⱁⱀⱁⰲⱆ. ⰺ҅ⱄⰽⰰⱃⰻⱁⱅⱐⱄⰽⱆⰵⰿⱆ. ⰴⰰ ⰻ ⱂⱃⱑⰴⰰⱄⱅⱏ.

Ⰲⱑⰴⱏⰹ ⰶⰵ ⰻⱄ҃. ⱑⰽⱁ ⰲⱐⱄⱑ ⰴⰰⱄⱅⱏ ⰵⰿⱆ ⱁⱌ҃ⱐ ⰲⱏ ⱃⱘⱌⱑ. ⰺ҅ ⱑⰽⱁ ⱁⱅⱏ ⰱ҃ⰰ ⰺ҅ⰸⰻⰴⱏ. ⰺ҅ ⰽⱏ ⰱ҃ⱛ ⰳⱃⱔⰴⰵⱅⱏ.

Ⰲⱏⱄⱅⰰ ⱄⱏ ⰲⰵⱍⰵⱃⱔ. ⰺ҅ ⱂⱁⰾⱁⰶⰻ ⱃⰻⰸⱏⰹ. ⰺ҅ ⱂⱃⰻⰹⰿⱏ ⰾⰵ[̆ⱁ]ⱀⱅⰻⰹ. ⱂⱃⱑⱂⱁⱑⱄⰰ ⱄⱔ.

ⱂⱁⱅⱁⰿⱐ ⰶⰵ ⰲⱁⰾⰻⱑ ⰲⱁⰴⱘ ⰲⱏ ⱆⰿⱏⰹⰲⰰⰾⱐⱀⰻⱌⱘ. ⰺ҅ ⱀⰰⱍⱔⱅⱏ ⱆⰿⱏⰹⰲⰰⱅⰻ ⱀⱁⰸⱑ ⱆⱍⰵⱀⰻⰽⱁⰿⱏ. ⰺ҅ ⱁⱅⰻⱃⰰⱅⰻ ⰾⰵⱀⱅⰻⰵⰿⱐ. ⰺ҅ⰿⱐⰶⰵ ⰱⱑ ⱂⱃⱑⱂⱁⱑⱄⰰⱀⱏ.

ⱂⱃⰻⰴⰵ ⰶⰵ ⰽⱏ ⱄⰻⰿⱁⱀⱆ ⱂⰵⱅⱃⱆ. ⰺ҅ ⰳⰾ҃ⰰ ⰵⰿⱆ ⱅⱏ ⰳ҃ⰻ. ⱅⱏⰹ ⰾⰻ ⰿⱁⰺ ⱆⰿⱏⰹⰵⱎⰻ ⱀⱁⰸⱑ.

ⱁⱅⱏⰲⱑⱎⱅⰰ ⰻⱄ҃. ⰺ҅ ⱃⰵⱍⰵ ⰵⰿⱆ. ⰵⰶⰵ ⰰⰸⱏ ⱅⰲⱁⱃⱘ ⱅⱏⰹ ⱀⰵ ⰲⱑⱄⰻ ⱀⱏⰹⱀ̑ⱑ. ⱃⰰⰸⱆⰿⱑⰵⱎⰻ ⰶⰵ ⱂⱁ ⱄⰻⱈⱏ.

ⰳⰾ҃ⰰ ⰵⰿⱆ ⱂⰵⱅⱃⱏ. ⱀⰵ ⱆⰿⱏⰹⰵⱎⰻ ⰿⱁⰵⱓ ⱀⱁⰳⱆ ⰲⱏ ⰲⱑⰽⱏ. ⱁⱅⱏⰲⱑⱎⱅⰰ ⰵⰿⱆ ⰻⱄ҃. ⰰⱎⱅⰵ ⱀⰵ ⱆⰿⱏⰹⱙ ⱅⰵⰱⰵ. ⱀⰵ ⰺ҅ⰿⰰⱎⰻ ⱍⱔⱄⱅⰻ ⱄⱏ ⰿⱀⱁⱙ.

ⰳⰾ҃ⰰ ⰵⰿⱆ ⱄⰻⰿⱁⱀⱏ ⱂⰵⱅⱃⱏ. ⰳ҃ⰻ ⱀⰵ ⱀⱁⰷⱑ ⰿⱁⰹ ⱅⱏⰽⱏⰿⱁ. ⱀⱏ ⰹ ⱃⱘⱌⱑ ⰺ҅ ⰳⰾⰰⰲⱘ.

ⰳⰾ҃ⰰ ⰵⰿⱆ ⰻⱄ҃. ⰺ҅ⰸⰿⱏⰲⰵⱀⱏⰹ ⱀⰵ ⱅⱃⱑⰱⱆⰵⱅⱏ. ⱅⱏⰽⱏⰿⱁ ⱀⱁⰷⱑ ⱆⰿⱏⰹⱅⰻ. ⰵⱄⱅⱏ ⰱⱁ ⰲⱐⱄⱐ ⱍⰻⱄⱅⱏ. ⰺ҅ ⰲⱏⰹ ⱍⰻⱄⱅⰻ ⰵⱄⱅⰵ ⱀⱏ ⱀⰵ ⰲⱐⱄⰻ.

ⰲⱑⰴⱑⰰⱎⰵ ⰱⱁ ⱂⱃⱑⰴⰰⱙⱎⱅⰰⰵⰳⱁ ⰺ. ⱄⰵⰳⱁ ⱃⰰⰴⰻ ⱃⰵⱍⰵ. ⱑⰽⱁ ⱀⰵ ⰲⱄⰻ ⰵⱄⱅⰵ ⱍⰻⱄⱅⰻ.

ⰵⰳⰴⰰ ⱆⰿⱏⰹ ⱀⱁⰸⱑ ⰺ҅ⱈⱏ. ⰺ҅ ⱂⱃⰻⱗⱅⱏ ⱃⰻⰸⱏⰹ ⱄⰲⱁⱗ. ⰺ҅ ⰲⱐⰸⰾⰵⰶⰵ. ⱂⰰⰽⱏⰹ ⱃⰵⱍⰵ ⰺ҅ⰿⱏ ⰲⱑⱄⱅⰵ ⰾⰻ ⱍⱐⱅⱁ ⱄⱏⱅⰲⱁⱃⰻⱈⱏ ⰲⰰⰿⱏ.

Ⰲⱏⰹ ⰳⰾⰰⱎⰰⰵⱅⰵ ⰿⱔ ⱆⱍⰻⱅⰵⰾ̑ⱑ ⰺ҅ !ⰳⱑ. ⰺ҅ ⰴⱁⰱⱃⱑ ⰳⰾ҃ⰵⱅⰵ ⰵⱄⰿⱐ ⰱⱁ.

Ⰰⱎⱅⰵ ⱆⰱⱁ ⰰⰸⱏ ⱆⰿⱏⰹⱈⱏ ⰲⰰⱎⰻ ⱀⱁⰷⱑ. ⰳ҃ⱐ ⰺ҅ ⱆⱍⰻⱅⰵⰾ̑ⱐ. ⰺ҅ ⰲⱏⰹ ⰴⰾⱏⰶⱐⱀⰻ ⰵⱄⱅⰵ ⰴⱃⱆⰳⱏ ⰴⱃⱆⰳⱆ. ⱆⰿⱏⰹⰲⰰⱅⰻ ⱀⱁⰸⱑ.

ⱁⰱⱃⰰⰸⱏ ⰴⰰⱈⱏ ⰲⰰⰿⱏ. ⰴⰰ ⱑⰽⱁⰶⰵ ⰰⰸⱏ ⱅⰲⱁⱃⰻⱈⱏ ⰲⰰⰿⱏ. ⰺ҅ ⰲⱏⰹ ⱅⰲⱁⱃⰻⱅⰵ.

Ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⱀⱑⱄⱅⱏ ⱃⰰⰱⱏ ⰱⱁⰾ̑ⰻ !ⰳⱑ ⱄⰲⱁⰵⰳⱁ. ⱀⰻ ⰰⱂ҃ⱁⰾⱏ ⰱⱁⰾⰻ ⱂⱁⱄⱏⰾⰰⰲⱏⱎⰰⰵⰳⱁ ⰺ.

ⰰⱎⱅⰵ ⱄⰻ ⰲⱑⱄⱅⰵ ⰱⰾⰰⰶⰵⱀⰻ ⰵⱄⱅⰵ. ⰰⱎⱅⰵ ⱅⰲⱁⱃⰻⱅⰵ ⱑ.

ⱀⰵ ⱁ ⰲⱐⱄⱑⱈⱏ ⰲⰰⱄⱏ ⰳⰾ҃ⱙ. ⰰⰸⱏ ⰱⱁ ⰲⱑⰿⱐ ⰵⰶⰵ ⰺ҅ⰸⰱⱏⱃⰰⱈⱏ. ⱀⱏ ⰴⰰ ⰽⱏⱀ̑ⰻⰳⱏⰹ ⱄⱏⰱⱘⰴⱘⱅⱏ ⱄⱔ. ⱑⰽⱁ ⱑⰴⱏⰹ ⱄⱏ ⰿⱀⱁⱙ ⱈⰾⱑⰱⱏ. ⰲⱐⰸⰴⰲⰻⰳⱀⰵⱅⱏ ⱀⰰ ⰿⱔ ⱂⱔⱅⱘ ⱄⰲⱁⱙ.

ⱁⱅⱏⱄⰵⰾⱑ ⰳⰾ҃ⱙ ⰲⰰⰿⱏ. ⱂⱃⱑⰶⰴⰵ ⰴⰰⰶⰵ ⱀⰵ ⰱⱘⰴⰵⱅⱏ. ⰴⰰ ⰵⰳⰴⰰ ⰱⱘⰴⰵⱅⱏ ⰲⱑⱄⱅⰵ ⱑⰽⱁ ⰰⰸⱏ ⰵⱄⰿⱐ.

Ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⱂⱃⰻⰵⰿⰾⱔⰺ҅ ⰰⱎⱅⰵ ⰽⱁⰳⱁ ⱂⱁⱄⱏⰾ̑ⱙ ⰿⰵⱀⰵ ⱂⱃⰻⰵⰿⰾⰵⱅⱏ. ⰰ ⱂⱃⰻⰵⰿⰾ̑ⱔⰹ ⰿⰵⱀⰵ. ⱂⱃⰻⰵⰿⰾ̑ⰵⱅⱏ ⱂⱁⱄⱏⰾⰰⰲⱐⱎⰰⰵⰳⱁ ⰿⱔ.

Ⱄⰻ ⱃⰵⰽⱏ ⰻⱄ҃. ⰲⱏⰸⰿⱘⱅⰻ ⱄⱔ ⰴⱈ҃ⱁⰿⱐ. ⰺ҅ ⱄⱏⰲⱑⰴⱑⱅⰵⰾ̑ⱐⱄⱅⰲⱁⰲⰰ ⰺ҅ ⱃⰵⱍⰵ. ⰰⰿⰻⱀ ⰰⰿⰻⱀ ⰳⰾ҃ⱙ ⰲⰰⰿⱏ. ⱑⰽⱁ ⰵⰴⰻⱀⱏ ⱁⱅⱏ ⰲⰰⱄⱏ ⱂⱃⱑⰴⰰⱄⱅⱏ ⰿⱔ.

Ⱄⱏⰸⰻⱃⰰⰰⱈⱘ ⰶⰵ ⱄⱔ ⰿⰵⰶⰴⱓ ⱄⱁⰱⱁⱙ ⱆⱍⰵⱀⰻⱌⰻ. ⱀⰵ ⰴⱁⰿⱏⰹⱄⰾⱔⱎⱅⰵ ⱁ ⰽⱁⰿⱐ ⰳⰾ҃ⰵⱅⱏ.

Ⰱⱑ ⰶⰵ ⰲⱐⰸⰾⰵⰶⱔ ⰵⰴⰻⱀⱏ ⱁⱅⱏ ⱆⱍⰵⱀⰻⰽⱏ ⰵⰳⱁ ⱀⰰ ⰾⱁⱀⱑ ⰺⱄ҃ⰲⱑ. ⰵⰳⱁⰶⰵ ⰾ̑ⱓⰱⰾ̑ⱑⰰⱎⰵ ⰻⱄ҃.

ⱂⱁⰿⰰⱀⱘ ⰶⰵ ⱄⰵⰿⱆ ⱄⰻⰿⱁⱀⱏ ⱂⰵⱅⱃⱏ. ⰲⱏⱂⱃⱁⱄⰻⱅⰹ ⰻ ⰽⱏⱅⱁ ⱆⰱⱁ ⰵⱄⱅⱏ. ⱁ ⱀ̑ⰵⰿⱐⰶⰵ ⰳⰾ҃ⰵⱅⱏ.

ⱀⰰⱂⰰⰴⱏ ⰶⰵ ⱅⰰⰽⱁ ⱀⰰ ⱂⱃⱏⱄⰻ ⰺⱄ҃ⰲⱏⰹ. ⰳⰾ҃ⰰ ⰵⰿⱆ. ⰳ҃ⰻ ⰽⱏⱅⱁ ⰵⱄⱅⱏ.

ⱁⱅⱏⰲⱑⱎⱅⰰ ⰻⱄ҃. ⱅⱏ ⰵⱄⱅⱏ ⰵⰿⱆⰶⰵ ⰰⰸⱏ ⱁⰿⱁⱍⱐ ⱈⰾⱑⰱⱏ ⱂⱁⰴⰰⰿⱐ. ⰺ҅ ⱁⰿⱁⱍⱐ ⱈⰾⱑⰱⱏ ⱂⱃⰻⱗⱅⱏ. ⰺ҅ ⰴⰰⱄⱅⱏ ⰺ҅ⱓⰴⱑ ⱄⰻⰿⱁⱀⱆ. ⰺ҅ⱄⰽⰰⱃⰻⱁⱅⱐⱄⰽⱆⰿⱆ.

ⰺ҅ ⱂⱁ ⱈⰾⱑⰱⱑ. ⱅⱁⰳⰴⰰ ⰲⱐⱀⰻⰴⰵ ⰲⱏ ⱀ̑ⱐ ⱄⱁⱅⱁⱀⰰ. !Ⰳⰾⰰ ⰵⰿⱆ ⰻⱄ҃. ⰵⰶⰵ ⱅⰲⱁⱃⰻⱎⰻ ⱅⰲⱁⱃⰻ ⱄⰽⱁⱃⱁ.

ⱄⰵⰳⱁ ⰶⰵ ⱀⰻⰽⱏⱅⱁⰶⰵ ⱀⰵ ⱃⰰⰸⱆⰿⱑ. ⰲⱐⰸⰾⰵⰶⱔⱎⱅⰻⱈⱏ. ⱍⰵⱄⱁ ⱃⰰⰴⰻ ⱃⰵⱍⰵ ⰵⰿⱆ.

ⰵⱅⰵⱃⰻ ⰱⱁ ⰿⱐⱀⱑⰰⱈⱘ. ⱂⱁⱀ̑ⰵⰶⰵ ⰽⱁⰲⱐⱍⰵⰶⱐⱌⱐ ⰺ҅ⰿⱑⰰⱎⰵ ⰺ҅ⱓⰴⰰ. ⱑⰽⱁ ⰳⰾ҃ⰵⱅⱏ ⰵⰿⱆ ⰻⱄ҃. ⰽⱆⱂⰻ ⰵⰳⱁⰶⰵ ⱅⱃⱑⰱⱆⰵⰿⱏ ⱀⰰ ⱂⱃⰰⰸⰴⱐⱀⰻⰽⱏ. ⰾⰻ ⱀⰻⱎⱅⰻⰿⱏ ⰴⰰ ⱀⱑⱍⱐⱅⱁ ⰴⰰⱄⱅⱏ.

ⱂⱃⰹⰻⰿⱏ ⰶⰵ ⱁⱀⱏ ⱈⰾⱑⰱⱏ. ⰺ҅ⰸⰻⰴⰵ ⰰⰱⰻⰵ. ⰱⱑ ⰶⰵ ⱀⱁⱎⱅⱐ

ⰵⰳⰴⰰ ⰺ҅ⰸⰻⰴⰵ. ⰳⰾ҃ⰰ ⰶⰵ ⰻⱄ҃. Ⱀⱏⰹⱀ̑ⱑ ⱂⱃⱁⱄⰾⰰⰲⰻ ⱄⱔ ⱄⱀ҃ⱏ ⱍⱄ҃ⰽⱏⰹ. ⰺ҅ ⰱ҃ⱏ ⱂⱃⱁⱄⰾⰰⰲⰻ ⱄⱔ ⱁ ⱀ̑ⰵⰿⱐ.

ⰰⱎⱅⰵ ⰱ҃ⱏ ⱂⱃⱁⱄⰾⰰⰲⰻⱅⱏ ⱄⱔ ⱁ ⱀ̑ⰵⰿⱐ. ⰺ҅ ⰱ҃ⱏ ⱂⱃⱁⱄⰾⰰⰲⰻⱅⱏ ⰹ [ⰲ] ⱄⰵⰱⱑ. [ⰻ] ⰰⰱⰻⰵ ⱂⱃⱁⱄⰾⰰⰲⰻⱅⱏ ⰹ.

ⱍⱔⰴⱐⱌⰰ ⰵⱎⱅⰵ ⰿⰰⰾⱁ ⱄⱏ ⰲⰰⰿⰻ ⰵⱄⰿⱐ. ⰲⱐⰸⰻⱎⱅⰵⱅⰵ ⰿⰵⱀⰵ. ⰺ҅ ⱑⰽⱁⰶⰵ ⱃⱑⱈⱏ ⰺⱓⰴⱑⱁⰿⱏ. ⱑⰽⱁ ⱑⰿⱁⰶⰵ ⰰⰸⱏ ⰺ҅ⰴⱘ ⰲⱏⰹ ⱀⰵ ⰿⱁⰶⰵⱅⰵ ⱂⱃⰻⱅⰻ. ⰺ҅ ⰲⰰⰿⱏ ⰳⰾ҃ⱙ ⱀⱏⰹⱀ̑ⱑ.

ⰸⰰⱂⱁⰲⱑⰴⱐ ⱀⱁⰲⱘ ⰴⰰⱙ ⰲⰰⰿⱏ. ⰴⰰ ⰾ̑ⱓⰱⰻⱅⰵ ⰴⱃⱆⰳⱏ ⰴⱃⱆⰳⰰ. ⱑⰽⱁⰶⰵ ⰲⱐⰸⰾ̑ⱓⰱⰻⱈⱏ ⰲⱏⰹ. ⰴⰰ ⰺ҅ ⰲⱏⰹ ⰾ̑ⱓⰱⰻⱅⰵ ⰴⱃⱆⰳⱏ ⰴⱃⱆⰳⰰ.

ⱁ ⱄⰵⰿⱐ ⱃⰰⰸⱆⰿⱑⱙⱅⱏ ⰲⸯⱄⰻ. ⱑⰽⱁ ⰿⱁⰹ ⱆⱍⰵⱀⰻⱌⰻ ⰵⱄⱅⰵ. ⰰⱎⱅⰵ ⰾ̑ⱓⰱⱁⰲⱐ ⰺ҅ⰿⰰⱅⰵ ⰿⰵⰶⰴⱓ ⱄⱁⰱⱁⱙ

ⰳⰾ҃ⰰ ⰵⰿⱆ ⱄⰻⰿⱁⱀⱏ ⱂⰵⱅⱃⱏ. ⰳ҃ⰻ. ⰽⰰⰿⱁ ⰺ҅ⰴⰵⱎⰻ. ⱁⱅⱏⰲⱑⱎⱅⰰ ⰵⰿⱆ ⰻⱄ҃. ⱑⰿⱁⰶⰵ ⰰⰸⱏ ⰺ҅ⰴⱘ. ⱀⰵ ⰿⱁⰶⰵⱎⰻ ⱀⱏⰹⱀ̑ⱑ ⱂⱁ ⰿⱐⱀⱑ ⰺ҅ⱅⰻ. ⱂⱁⱄⰾⱑⰴⱐ ⰶⰵ ⱂⱁ ⰿⱀⱑ ⰺ҅ⰴⰵⱎⰻ.

!Ⰳⰾⰰ ⰵⰿⱆ ⱂⰵⱅⱃⱏ. ⰳ҃ⰻ ⱂⱁ ⱍⱐⱅⱁ ⱀⱏⰹⱀ̑ⱑ ⱂⱁ ⱅⰵⰱⱑ ⱀⰵ ⰿⱁⰳⱘ ⰺ҅ⱅⰻ. ⱀⱏⰹⱀ̑ⱑ ⰴⱎ҃ⱘ ⰿⱁⱙ ⰸⰰ ⱅⱔ ⱂⱁⰾⱁⰶⱘ.

ⱁⱅⱏⰲⱑⱎⱅⰰ ⰵⰿⱆ ⰻⱄ҃. ⰴⱎ҃ⱘ ⰾⰻ ⱅⰲⱁⱙ ⰸⰰ ⰿⱔ ⱂⱁⰾⱁⰶⰻⱎⰻ. ⰰⰿⰻⱀ ⰰⰿⰻⱀ ⰳⰾ҃ⱙ ⱅⰵⰱⱑ. ⱀⰵ ⰲⱏⰸⰳⰾⰰⱄⰻⱅⱏ ⰽⱆⱃⱏ. ⰴⱁⱀ̑ⱐⰴⰵⰶⰵ ⱁⱅⱏⰲⱃⱏⰶⰵⱎⰻ ⱄⱔ ⰿⰵⱀⰵ ⱅⱃⰻ ⰽⱃⰰⱅⱏⰹ.