Прѣжде же праздьника пасцѣ. вѣдꙑ ис҃ ѣко приде емоу година. да ꙇ прѣꙇ҅детъ отъ мира сего къ оц҃ю. възл̑юбль своѩ. сѫштѧѩ въ вьсемь мирѣ. до коньца вьзлюби ѩ.

Ꙇ҅ вечери бꙑвъши. диѣволоу юже въложьшю въ сръдьце ꙇ҅юдѣ симоновоу. ꙇ҅скариотьскоуемоу. да и прѣдастъ.

Вѣдꙑ же ис҃. ѣко вьсѣ дастъ емоу оц҃ь въ рѫцѣ. ꙇ҅ ѣко отъ б҃а ꙇ҅зидъ. ꙇ҅ къ б҃ѵ грѧдетъ.

Въста съ вечерѧ. ꙇ҅ положи ризꙑ. ꙇ҅ приімъ ле[̆о]нтиі. прѣпоѣса сѧ.

потомь же волиѣ водѫ въ оумꙑвальницѫ. ꙇ҅ начѧтъ оумꙑвати нозѣ оученикомъ. ꙇ҅ отирати лентиемь. ꙇ҅мьже бѣ прѣпоѣсанъ.

приде же къ симоноу петроу. ꙇ҅ гл҃а емоу тъ г҃и. тꙑ ли моꙇ оумꙑеши нозѣ.

отъвѣшта ис҃. ꙇ҅ рече емоу. еже азъ творѫ тꙑ не вѣси нꙑн̑ѣ. разоумѣеши же по сихъ.

гл҃а емоу петръ. не оумꙑеши моею ногоу въ вѣкъ. отъвѣшта емоу ис҃. аште не оумꙑѭ тебе. не ꙇ҅маши чѧсти съ мноѭ.

гл҃а емоу симонъ петръ. г҃и не ноѕѣ моі тъкъмо. нъ і рѫцѣ ꙇ҅ главѫ.

гл҃а емоу ис҃. ꙇ҅змъвенꙑ не трѣбоуетъ. тъкъмо ноѕѣ оумꙑти. естъ бо вьсь чистъ. ꙇ҅ вꙑ чисти есте нъ не вьси.

вѣдѣаше бо прѣдаѭштаего ꙇ. сего ради рече. ѣко не вси есте чисти.

егда оумꙑ нозѣ ꙇ҅хъ. ꙇ҅ приѩтъ ризꙑ своѩ. ꙇ҅ вьзлеже. пакꙑ рече ꙇ҅мъ вѣсте ли чьто сътворихъ вамъ.

Вꙑ глашаете мѧ оучител̑ѣ ꙇ҅ !гѣ. ꙇ҅ добрѣ гл҃ете есмь бо.

Аште оубо азъ оумꙑхъ ваши ноѕѣ. г҃ь ꙇ҅ оучител̑ь. ꙇ҅ вꙑ длъжьни есте дроугъ дроугоу. оумꙑвати нозѣ.

образъ дахъ вамъ. да ѣкоже азъ творихъ вамъ. ꙇ҅ вꙑ творите.

Амин амин гл҃ѭ вамъ. нѣстъ рабъ бол̑и !гѣ своего. ни ап҃олъ боли посълавъшаего ꙇ.

аште си вѣсте блажени есте. аште творите ѣ.

не о вьсѣхъ васъ гл҃ѭ. азъ бо вѣмь еже ꙇ҅збърахъ. нъ да кън̑игꙑ събѫдѫтъ сѧ. ѣко ѣдꙑ съ мноѭ хлѣбъ. вьздвигнетъ на мѧ пѧтѫ своѭ.

отъселѣ гл҃ѭ вамъ. прѣжде даже не бѫдетъ. да егда бѫдетъ вѣсте ѣко азъ есмь.

Амин амин гл҃ѭ вамъ. приемлѧꙇ҅ аште кого посъл̑ѭ мене приемлетъ. а приемл̑ѧі мене. приемл̑етъ посълавьшаего мѧ.

Си рекъ ис҃. възмѫти сѧ дх҃омь. ꙇ҅ съвѣдѣтел̑ьствова ꙇ҅ рече. амин амин гл҃ѭ вамъ. ѣко единъ отъ васъ прѣдастъ мѧ.

Съзираахѫ же сѧ междю собоѭ оученици. не домꙑслѧште о комь гл҃етъ.

Бѣ же вьзлежѧ единъ отъ оученикъ его на лонѣ ꙇс҃вѣ. егоже л̑юбл̑ѣаше ис҃.

поманѫ же семоу симонъ петръ. въпроситі и къто оубо естъ. о н̑емьже гл҃етъ.

нападъ же тако на пръси ꙇс҃вꙑ. гл҃а емоу. г҃и къто естъ.

отъвѣшта ис҃. тъ естъ емоуже азъ омочь хлѣбъ подамь. ꙇ҅ омочь хлѣбъ приѩтъ. ꙇ҅ дастъ ꙇ҅юдѣ симоноу. ꙇ҅скариотьскоумоу.

ꙇ҅ по хлѣбѣ. тогда вьниде въ н̑ь сотона. !Гла емоу ис҃. еже твориши твори скоро.

сего же никътоже не разоумѣ. вьзлежѧштихъ. чесо ради рече емоу.

етери бо мьнѣахѫ. пон̑еже ковьчежьць ꙇ҅мѣаше ꙇ҅юда. ѣко гл҃етъ емоу ис҃. коупи егоже трѣбоуемъ на праздьникъ. ли ништимъ да нѣчьто дастъ.

пріимъ же онъ хлѣбъ. ꙇ҅зиде абие. бѣ же ношть

егда ꙇ҅зиде. гл҃а же ис҃. Нꙑн̑ѣ прослави сѧ сн҃ъ чс҃кꙑ. ꙇ҅ б҃ъ прослави сѧ о н̑емь.

аште б҃ъ прославитъ сѧ о н̑емь. ꙇ҅ б҃ъ прославитъ і [в] себѣ. [и] абие прославитъ і.

чѧдьца еште мало съ вами есмь. вьзиштете мене. ꙇ҅ ѣкоже рѣхъ ꙇюдѣомъ. ѣко ѣможе азъ ꙇ҅дѫ вꙑ не можете прити. ꙇ҅ вамъ гл҃ѭ нꙑн̑ѣ.

заповѣдь новѫ даѭ вамъ. да л̑юбите дроугъ дроуга. ѣкоже вьзл̑юбихъ вꙑ. да ꙇ҅ вꙑ л̑юбите дроугъ дроуга.

о семь разоумѣѭтъ вⸯси. ѣко моі оученици есте. аште л̑юбовь ꙇ҅мате междю собоѭ

гл҃а емоу симонъ петръ. г҃и. камо ꙇ҅деши. отъвѣшта емоу ис҃. ѣможе азъ ꙇ҅дѫ. не можеши нꙑн̑ѣ по мьнѣ ꙇ҅ти. послѣдь же по мнѣ ꙇ҅деши.

!Гла емоу петръ. г҃и по чьто нꙑн̑ѣ по тебѣ не могѫ ꙇ҅ти. нꙑн̑ѣ дш҃ѫ моѭ за тѧ положѫ.

отъвѣшта емоу ис҃. дш҃ѫ ли твоѭ за мѧ положиши. амин амин гл҃ѭ тебѣ. не възгласитъ коуръ. дон̑ьдеже отъвръжеши сѧ мене три кратꙑ.