ЕВАНГЕЛИЕ ЕЖЕ Ѿ ІОАННА
11:1
Ⰱⱑ ⰶⰵ ⰵⱅⰵⱃⱏ ⰱⱁⰾⱔ ⰾⰰⰸⰰⱃⱐ ⱁⱅⱏ ⰲⰻⱅⰰⱀⰻⱗ. ⰳⱃⰰⰴⱐⱌⰰ ⰿⰰⱃⰻⱀⰰ. ⰺ҅ ⰿⰰⱃⱏⱅⱏⰹ ⱄⰵⱄⱅⱃⱏⰹ ⰵⱗ.
11:2
ⰱⱑ ⰶⰵ ⰿⰰⱃⰻⱑ. ⱂⱁⰿⰰⰸⰰⰲⱏⱎⰻⱑ !ⰳⱑ ⰿⱛⱃⱁⰿⱐ. ⰺ҅ ⱁⱅⱐⱃⱏⱎⰻ ⱀⱁⰷⱑ ⰵⰳⱁ ⰲⰾⰰⱄⱏⰹ ⱄⰲⱁⰺⰿⰻ. ⰵⱗⰶⰵ ⰱⱃⰰⱅⱏ. ⰾⰰⰸⰰⱃⱐ ⰱⱁⰾⱑⰰⱎⰵ.
11:3
ⱂⱁⱄⱏⰾⰰⱄⱅⰵ ⰶⰵ ⱄⰵⱄⱅⱃⱑ ⰵⰳⱁ ⰽⱏ ⱀ̑ⰵⰿⱆ ⰳⰾ҃ⱙⱎⱅⰻ. ⰳ҃ⰻ ⱄⰵ ⰵⰳⱁⰶⰵ ⱅⱏⰹ ⰾ̑ⱓⰱⰻⱎⰻ ⰱⱁⰾⰻⱅⱏ.
11:4
ⱄⰾⱏⰹⱎⰰⰲⱏ ⰶⰵ ⰻⱄ҃ ⱃⰵⱍⰵ. ⱄⰻ ⰱⱁⰾⱑⰸⱀⱐ ⱀⱑⱄⱅⱏ ⰽⱏ ⱄⱏⰿⱃⱏⱅⰻ. ⱀⱏ ⰽⱏ ⱄⰾⰰⰲⱑ ⰱⰶ҃ⰺ. ⰴⰰ ⱂⱃⱁⱄⰾⰰⰲⰻⱅⱏ ⱄⱔ ⱄⱀ҃ⱏ ⰱⰶ҃ⰻ ⰵⱙ.
11:5
ⰾ̑ⱓⰱⰾ̑ⱑⰰⱎⰵ ⰶⰵ ⰺⱄ҃. ⰿⰰⱃⸯⱅⱘ. ⰺ҅ ⱄⰵⱄⱅⱃⱘ ⰵⱗ. ⰺ҅ ⰾⰰⰸⰰⱃⱑ.
11:6
ⰵⰳⰴⰰ ⰶⰵ ⱆⱄⰾⱏⰹⱎⰰ ⱑⰽⱁ ⰱⱁⰾⰻⱅⱏ ⱅⱁⰳⰴⰰ ⰶⰵ ⱂⱃⱑⰱⱏⰹⱄⱅⱏ. ⱀⰰ ⱀ̑ⰵⰿⱐⰶⰵ ⰱⱑ ⰿⱑⱄⱅⱑ ⰴⱏⰲⰰ ⰴⱐⱀⰻ
11:7
ⱂⱁⱅⱁⰿⱐ ⰶⰵ ⰳⰾ҃ⰰ ⱆⱍⰵⱀⰻⰽⱁⰿ ⰺ҅ⰴⱑⰿⱏ ⰲⱏ ⰺ҅ⱓⰴⰵⱙ ⱂⰰⰽⱏⰹ.
11:8
ⰳⰾ҃ⰰⱎⱔ ⰵⰿⱆ ⱆⱍⰵⱀⰻⱌⰻ ⱃⰰⰲⰲⰻ ⱀⱏⰹⱀ̑ⱑ ⰺ҅ⱄⰽⰰⱈⱘ ⱅⰵⰱⰵ ⰽⰰⰿⰵⱀⰻⰵⰿⱐ ⱂⱁⰱⰻⱅⰻ ⰺ҅ⱓⰴⰵⰹ. ⰺ҅ ⱂⰰⰽⱏⰹ ⰾⰻ ⰺ҅ⰴⰵⱎⰻ ⱅⰰⰿⱁ.
11:9
ⱁⱅⱏⰲⱑⱎⱅⰰ ⰻⱄ҃. ⱀⰵ ⰴⱏⰲⰰ ⰾⰻ ⱀⰰ ⰴⰵⱄⱔⱅⰵ ⱍⰰⱄⰰ ⰵⱄⱅⰵ ⰲⱏ ⰴⱐⱀⰻ. ⰰⱎⱅⰵ ⰽⱏⱅⱁ ⱈⱁⰴⰻⱅⱏ ⰲⱏ ⰴⱐⱀⰵ. ⱀⰵ ⱂⱁⱅⱏⰽⱀⰵⱅⱏ ⱄⱔ. ⱑⰽⱁ ⱄⰲⱑⱅⱏ ⰿⰻⱃⰰ ⱄⰵⰳⱁ ⰲⰻⰴⰻⱅⱏ.
11:10
ⰰⱎⱅⰵ ⰾⰻ ⰽⱏⱅⱁ ⱈⱁⰴⰻⱅⱏ ⱀⱁⱎⱅⰻⱙ ⱂⱁⱅⱏⰽⱀⰵⱅⱏ ⱄⱔ. ⱑⰽⱁ ⱄⰲⱑⱅⰰ ⱀⱑⱄⱅⱏ ⱁ ⱀ̑ⰵⰿⱐ.
11:11
ⱄⰻ ⱃⰵⱍⰵ. ⰺ҅ ⱂⱁ ⱄⰵⰿⱐ ⰳⰾ҃ⰰ. ⰾⰰⰸⰰⱃⱐ ⰴⱃⱆⰳⱏ ⱀⰰⱎⱐ ⱆⱄⱏⱂⰵ. ⱀⱏ ⰺ҅ⰴⱘ ⰴⰰ ⰲⱏⰸⰱⱆⰶⰴⱘ ⰹ.
11:12
ⱃⱑⱎⱔ ⰶⰵ ⱆⱍⰵⱀⰻⱌⰻ ⰵⰳⱁ. ⰳ҃ⰻ. ⰰⱎⱅⰵ ⱆⱄⱏⱂⰵ. ⱄⱏⱂⰰⱄⰵⱀⱏ ⰱⱘⰴⰵⱅⱏ.
11:13
ⰺⱄ҃ ⰶⰵ ⱃⰵⱍⰵ ⱁ ⱄⱏⰿⱃⱏⱅⰻ ⰵⰳⱁ. ⱁⱀⰻ ⰶⰵ ⰿⱐⱀⱑⱎⱔ. ⱑⰽⱁ ⱁ ⱆⱄⱏⱂⰵⱀⰻⰺ ⱄⱀⰻ ⰺ҅ ⱄⱏⱀⰰ ⰳⰾ҃ⰵⱅⱏ.
11:14
ⱅⱁⰳⰴⰰ ⱃⰵⱍⰵ !ⰺⰿⱏ ⰻⱄ҃. ⱀⰵ ⱁⰱⰻⱀⱆⱗ ⱄⱔ. ⰾⰰⰸⰰⱃⱐ ⱆⰿⱐⱃⱑⱅⱏ.
11:15
ⰺ҅ ⱃⰰⰴⱆⱙ ⱄⱔ ⰲⰰⱄⱏ ⱃⰰⰴⰻ. ⰴⰰ ⰲⱑⱃⱘ ⰺ҅ⰿⰵⱅⰵ ⱑⰽⱁ ⱀⰵ ⰱⱑⱈⱏ ⱅⱆ. ⱀⱏ ⰺ҅ⰴⱑⰿⱏ ⰽⱏ ⱀ̑ⰵⰿⱆ.
11:16
ⱃⰵⱍⰵ ⰶⰵ ⱅⸯⱁⰿⰰ. ⱀⰰⱃⰻⱌⰰⰵⰿⱏⰹ ⰱⰾⰻⰸⱀⱐⱌⱐ. ⰽⱏ ⱆⱍⰵⱀⰻⰽⱁⰿⱏ. ⰺ҅ⰴⱑⰿⱏ ⰺ҅ ⰿⱏⰹ ⰴⰰ ⱆⰿⱐⱃⰵⰿⱏ ⱄⱏ ⱀ̑ⰻⰿⱐ.
11:17
ⱂⱃⰻⱎⱐⰴⱏ ⰶⰵ ⰻⱄ҃ ⰲⱏ ⰲⰻⱅⰰⱀⰻⱙ. ⱁⰱⱃⱑⱅⰵ ⰹ. ⱍⰵⱅⱏⰹⱃⰻ ⰴⱐⱀⰻ ⰺ҅ⰿⱘⱎⱅⱐ ⰲⱏ ⰳⱃⱁⰱⱑ.
11:18
ⰱⱑ ⰶⰵ ⰲⰻⱅⰰⱀⰻⱑ ⰱⰾⰻⰸⱏ ⰺⰾ҃ⰿⰰ. ⱑⰽⱁ ⰴ҃ ⰺ҃ ⱄⱅⰰⰴⰻⰹ.
11:19
ⰺ҅ ⰿⱀⱁⰸⰻ ⰶⰵ ⰱⱑⰰⱈⱘ ⱂⱃⰻⱎⱐⰾⰻ. ⰽⱏ ⰿⰰⱃⸯⱅⱑ ⰺ҅ ⰿⰰⱃⰹ. ⰴⰰ ⱆⱅⱑⱎⱔⱅⱏ ⰹ. ⱁ ⰱⱃⰰⱅⱑ ⰵⱓ
11:20
ⰿⰰⱃⱏⱅⰰ ⰶⰵ ⰵⰳⰴⰰ ⱆⱄⰾⱏⰹⱎⰰ. ⱑⰽⱁ ⰻⱄ҃ ⰳⱃⱔⰴⰵⱅⱏ ⱄⱏⱃⱑⱅⰵ ⰹ. ⰰ ⰿⰰⱃⰻⱑ ⰴⱁⰿⰰ ⱄⱑⰴⱑⰰⱎⰵ.
11:21
ⱃⰵⱍⰵ ⰶⰵ ⰿⰰⱃⸯⱅⰰ ⰽⱏ ⰹⱄ҃ⱛ. ⰳ҃ⰻ ⰰⱎⱅⰵ ⰱⰻ ⱄⱐⰴⰵ ⰱⱏⰹⰾⱏ. ⱀⰵ ⰱⰻ ⰱⱃⰰⱅⱏ ⰿⱁⰹ ⱆⰿⱃⱏⰾⱏ.
11:22
ⱀⱏⰹⱀ̑ⱑ ⰲⱑⰿⱐ. ⱑⰽⱁ ⰵⰳⱁⰶⰵ ⰽⱁⰾⰻⰶⱐⰴⱁ. ⱂⱃⱁⱄⰻⱎⰻ ⱁⱅⱏ ⰱ҃ⰰ ⰴⰰⱄⱅⱏ ⱅⰻ ⰱ҃ⱏ.
11:23
ⰳⰾ҃ⰰ ⰵⰹ ⰻⱄ҃. ⰲⱏⱄⰽⱃⱏⱄⱀⰵⱅⱏ ⰱⱃⰰⱅⱏ ⱅⰲⱁⰹ.
11:24
ⰳⰾ҃ⰰ ⰵⰿⱆ ⰿⰰⱃⸯⱅⰰ. ⰲⱑⰿⱐ ⱑⰽⱁ ⰲⱏⱄⰽⱃⱏⱄⱀⰵⱅⱏ. ⰲⱏ ⰲⱏⱄⰽⱃⱑⱎⰵⱀⰻⰵ ⰲⱏ ⱂⱁⱄⰾⱑⰴⱐⱀⰻ ⰴⱐⱀⱐ.
11:25
ⱃⰵⱍⰵ ⰶⰵ ⰵⰹ ⰻⱄ҃. *̆ⰰⰸⱏ ⰵⱄⰿⱐ ⰲⱏⱄⰽⱃⱑⱎⰵⱀⰻⰵ ⰺ҅ ⰶⰻⰲⱁⱅⱏ. ⰲⱑⱃⱆⱗⰻ ⰲⱏ ⰿⱔ. ⰰⱎⱅⰵ ⱆⰿⱐⱃⰵⱅⱏ ⱁⰶⰻⰲⰵⱅⱏ.
11:26
ⰺ҅ ⰲⸯⱄⱑⰽⱏ ⰶⰻⰲⱏⰹⰻ. ⰺ҅ ⰲⱑⱃⱆⱗⰻ ⰲⱏ ⰿⱔ ⱀⰵ ⱆⰿⱐⱃⰵⱅⱏ ⰲⱏ ⰲⱑⰽⱏ. ⰺ҅ⰿⰵⱎⰻ ⰾⰻ ⰲⱑⱃⱘ ⱄⰵⰿⱆ.
11:27
ⰳⰾ҃ⰰ ⰵⰿⱆ ⰵⰹ ⰳ҃ⰻ. ⰰⰸⱏ ⰲⱑⱃⱁⰲⰰⱈⱏ ⱑⰽⱁ ⱅⱏⰹ ⰵⱄⰻ ⱈ҃ⱏ ⱄⱀ҃ⱏ ⰱⰶ҃ⰹⰻ. ⰳⱃⱔⰴⱔⰻ ⰲⱏ ⰿⰻⱃⱏ.
11:28
ⰺ҅ ⱄⰵ ⱃⰵⰽⱏⱎⰻ ⰺ҅ⰴⰵ. ⰺ҅ ⱂⱃⰻⰸⱏⰲⰰ ⰿⰰⱃⰻⱙ ⱄⰵⱄⱅⱃⱘ ⱄⰲⱁⱙ ⱅⰰⰹ. ⰺ҅ ⱃⰵⰽⱏⱎⰻ ⰵⰹ. ⱆⱍⰻⱅⰵⰾ̑ⱐ ⱄⰵ ⰵⱄⱅⱏ. ⰺ҅ ⰸⱁⰲⰵⱅⱏ ⱅⱔ.
11:29
ⱁⱀⰰ ⰶⰵ ⱑⰽⱁ ⱆⱄⰾⱏⰹⱎⰰ. ⰲⱏⱄⱅⰰ ⱄⰽⱁⱃⱁ. ⰺ҅ ⰻⰴⰵ ⰽⱏ ⱀ̑ⰵⰿⱆ.
11:30
ⱀⰵ ⰱⱑ ⰶⰵ ⱀⰵ ⱆ ⰻⱄ҃. ⱂⱃⰻⱎⱐⰾⱏ ⰲⱏ ⰲⱐⱄⸯⱐ. ⱀⱏ ⰱⱑ ⱀⰰ ⰿⱑⱄⱅⱑ ⰵⱎⱅⰵ. ⰺ҅ⰴⰵⰶⰵ ⱄⱏⱃⱑⱅⰵ ⰹ ⰿⰰⱃⸯⱅⰰ.
11:31
ⰺ҅ⱓⰴⰵⰺ ⰶⰵ. ⱄⱘⱎⱅⰵⰹ ⱄⱏ ⱀ̑ⰵⱙ ⰲⱏ ⰴⱁⰿⱆ. ⰺ҅ ⱆⱅⱑⱎⰰⱙⱎⱅⰵ ⱙ. ⰲⰻⰴⱑⰲⱏⱎⰵ ⰿⰰⱃⰻⱙ. ⱑⰽⱁ ⱄⰽⱁⱃⱁ ⰲⱏⱄⱅⰰ ⰺ҅ ⰻⰸⰻⰴⰵ. ⱂⱁ ⱀ̑ⰵⰹ ⰺ҅ⰴⱘ ⰳⰾ҃ⱙⱎⱅⰵ. ⱑⰽⱁ ⰺ҅ⰴⰵⱅⱏ ⱀⰰ ⰳⱃⱁⰱⱏ ⰺ҅ ⱂⰾⰰⱍⰵⱅⱏ ⱄⱔ ⱅⱆ.
11:32
ⰿⰰⱃⰻⱑ ⰶⰵ ⱑⰽⱁ ⱂⱃⰻⰴⰵ. ⰺ҅ⰴⰵⰶⰵ ⰱⱑ ⰻⱄ҃. ⰲⰻⰴⱑⰲⱏⱎⰻ ⰺ҅ ⱂⰰⰴⰵ ⰵⰿⱆ ⱀⰰ ⱀⱁⰳⱆ. ⰳⰾ҃ⱙⱎⱅⰻ ⰵⰿⱆ ⰳ҃ⰻ. ⰰⱎⱅⰵ ⰱⰻ ⰱⱏⰹⰾⱏ ⱄⱐⰴⰵ. ⱀⰵ ⰱⰻ ⰿⱁⰹ ⰱⱃⰰⱅⱏ ⱆⰿⱃⱏⰾⱏ.
11:33
ⰺⱄ҃ ⰶⰵ ⱑⰽⱁ ⰲⰻⰴⱑ ⱙ ⱂⰾⰰⱍⱘⱎⱅⱘ ⱄⱔ. ⰺ҅ ⱂⱃⰻⱎⱐⰴⱏⱎⱔⱗ ⱄⱏ ⱀ̑ⰵⱙ ⰺ҅ⱓⰴⰵⱙ. ⱂⰾⰰⱍⱘⱎⱅⱔ ⱄⱔ. ⰸⰰⱂⱃⱑⱅⰻ ⰴⱆⱈⱆ. ⰺ҅ ⰲⱏⰸⰿⱘⱅⰻ ⱄⱔ ⱄⰰⰿⱏ
11:34
ⰺ҅ ⱃⰵⱍⰵ. ⰽⱏⰴⰵ ⱂⱁⰾⱁⰶⰻⱄⱅⰵ ⰹ. ⰳⰾ҃ⰰⱎⱔ ⰵⰿⱆ. ⰳ҃ⰻ. ⰳⱃⱔⰴⰻ ⰺ҅ ⰲⰻⰶⰴⱐ.
11:35
ⰺ҅ ⱂⱃⱁⱄⰾⱐⰸⰻ ⱄⱔ ⰻⱄ҃.
11:36
ⰳⰾ҃ⰰⱈⱘ ⰶⰵ ⰺ҅ⱓⰴⰵⰹ. ⰲⰻⰶⰴⱐ ⰽⰰⰽⱁ ⰾ̑ⱓⰱⰾ̑ⱑⰰⱎⰵ ⰹ.
11:37
ⰵⱅⰵⱃⰻⰹ ⰶⰵ ⱁⱅⱏ ⱀⰻⱈⱏ ⱃⱑⱎⱔ. ⱀⰵ ⰿⱁⰶⰰⰰⱎⰵ ⰾⰻ ⱄⱐ ⱁⱅⰲⱃⱏⰸⱏⰹ ⱁⱍⰻ ⱄⰾⱑⱂⱆⰵⰿⱆ. ⱄⱏⱅⰲⱁⱃⰻⱅⰻ. ⰴⰰ. ⰺ ⱄⱐ ⱀⰵ ⱆⰿⱐⱃ̑ⰵⱅⱏ.
11:38
ⰺⱄ҃ ⰶⰵ ⱂⰰⰽⱏⰹ ⱂⱃⱑⱅⱔ ⰲⱐ ⱄⰵⰱⱑ. ⱂⱃⰻⰴⰵ ⰽⱏ ⰳⱃⱁⰱⱆ. ⰱⱑ ⰶⰵ ⱂⰵⱎⱅⱐ ⰺ҅ ⰽⰰⰿⰵⱀⱐ ⱀⰰⰾⰵⰶⰰⰰⱎⰵ ⱀⰰ ⱀ̑ⰵⰹ.
11:39
ⰳⰾ҃ⰰ ⰻⱄ҃. ⰲⱏⰸⱏⰿⱑⱅⰵ ⰽⰰⰿⰵⱀⱐ. ⰳⰾ҃ⰰ ⰵⰿⱆ ⱄⰵⱄⱅⱃⰰ ⱆⰿⱐⱃⱏⱎⰰⰵⰳⱁ. ⰿⰰⱃⸯⱅⰰ. ⰳ҃ⰻ ⱓⰶⰵ ⱄⰿⱃⱏⰴⰻⱅⱏ. ⱍⰵⱅⰲⱃⱑⰴⱐⱀⰵⰲⱐⱀⱏ ⰱⱁ ⰵⱄⱅⱏ.
11:40
ⰳⰾ҃ⰰ ⰵⰻ ⰻⱄ҃. ⱀⰵ ⱃⱑⱈⱏ ⰾⰻ ⱅⰻ. ⱑⰽⱁ ⰰⱎⱅⰵ ⰲⱑⱃⱆⰵⱎⰻ. ⱆⰸⱐⱃⰻⱎⰻ ⱄⰾⰰⰲⱘ ⰱⰶ҃ⰻⱙ.
11:41
ⰲⱐⰸⱔⱄⱔ ⰶⰵ ⰽⰰⰿⰵⱀⱐ. ⰺⱄ҃ ⰶⰵ ⰲⱐⰸⰲⰵⰴⰵ ⱁⱍⰻ ⰲⱏⰹⱄⱂⱃⱐ. ⰺ ⱃⰵⱍⰵ. !ⱁⱍⰵ ⱈⰲⰰⰾⱘ ⱅⰵⰱⱑ ⰲⱏⰸⰴⰰⱙ. ⱑⰽⱁ ⱆⱄⰾⱏⰹⱎⰰ ⰿⱔ.
11:42
ⰰⰸⱏ ⰲⱑⰴⱑⰰⱈⱏ. ⱑⰽⱁ ⰲⱐⱄⰵⰳⰴⰰ ⰿⰵⱀⰵ ⱂⱁⱄⰾⱆⱎⰰⰵⱎⰻ. ⱀⱏ ⱀⰰⱃⱁⰴⰰ ⱃⰰⰴⰻ. ⱄⱅⱁⱗⱎⱅⰰⰵⰳⱁ ⱁⰽⱃⱏⱄⱅⱏ. ⱃⱑⱈⱏ ⰴⰰ ⰲⱑⱃⱘ ⰺ҅ⰿⱘⱅⱏ. ⱑⰽⱁ ⱅⱏⰹ ⰿⱔ ⱂⱁⱄⱏⰾⰰ.
11:43
ⰺ҅ ⱄⰵ ⱃⰵⰽⱏ. ⰳⰾⰰⱄⱁⰿⱐ ⰲⰵⰾⰻⰵⰿⱐ ⰲⱏⰸⰳⰾⰰⱄⰻ. ⰾⰰⰸⱁⱃⰵ ⰳⱃⱔⰴⰻ ⰲⱏⱀⱏ.
11:44
ⰺ҅ ⰰⰱⰻⰵ ⰺ҅ⰸⰻⰴⰵ ⱆⰿⱐⱃⱏⰹ. ⱁⰱⱔⰸⰰⱀⱏ ⱀⱁⰳⰰⰿⰰ ⰺ҅ ⱃⱘⰽⰰⰿⰰ. ⱆⰽⱃⱁⰵⰿⱐ. ⰺ҅ ⰾⰻⱌⰵ ⰵⰳⱁ ⱁⰱⱔⰸⰰⱀⱁ ⱆⰱⱃⱆⱄⱁⰿⱐ. ⰳⰾ҃ⰰ ⰺ҅ⰿⱏ ⰻⱄ҃. ⱃⰰⰸⰴⱃⱑⱎⰻⱅⰵ ⰹ. ⰺ҅ ⱀⰵ ⰴⱑⰺ҅ⱅⰵ ⰵⰳⱁ ⰺ҅ⱅⰻ.
11:45
ⰿⱀⱁⰸⰻ ⰶⰵ ⱁⱅⱏ ⰺ҅ⱓⰴⱑⰹ. ⱂⱃⰻⱎⱐⰴⱏⱎⰵⰹ ⰽⱏ ⰿⰰⱃⰻⰹ. ⰲⰻⰴⱑⰲⱏⱎⰵ ⰵⰶⰵ ⱄⱏⱅⰲⱁⱃⰻ ⰺⱄ҃. ⰲⱑⱃⱁⰲⰰⱎⱔ ⰲⱐ ⱀ̑ⰵⰳⱁ:. !ⰽⱁ!ⱌ.
11:46
ⰵⱅⰵⱃⰻ ⰶⰵ ⱁⱅⱏ ⱀ̑ⰻⱈⱏ. ⰺ҅ⰴⱘ ⰽⱏ ⱇⰰⱃⰻⱄⱑⱁⰿⱏ. ⰺ҅ ⱃⱑⱎⱔ ⰺ҅ⰿⱏ. ⰵⰶⰵ ⱄⱏⱅⰲⱁⱃⰻ{ⱃⰻ} ⰺⱄ҃.
11:47
ⱄⱏⰱⱏⱃⰰⱎⱔ ⰶⰵ ⰰⱃⱈⰻⰵⱃⰵⰹ. ⰺ҅ ⱇⰰⱃⰻⱄⱑⰹ ⱄⱏⰱⱁⱃⱏ. ⰺ҅ ⰳⰾ҃ⰰⰰⱈⱘ ⱍⱐⱅⱁ ⱄⱏⱅⰲⱁⱃⰻⰿⱏ. ⱑⰽⱁ ⱍⰽ҃ⱏ ⱄⱐ ⰸⱀⰰⰿⰵⱀⰻⱑ ⰿⱀⱁⰳⰰ ⱅⰲⱁⱃⰻⱅⱏ.
11:48
ⰰⱎⱅⰵ ⱁⱄⱅⰰⰲⰻⰿⱏ ⰹ ⱅⰰⰽⱁ. ⰲⱐⱄⰻ ⰲⱑⱃⱘ ⰺ҅ⰿⱘⱅⱏ ⰲⱏ ⱀ̑ⱐ. ⰺ҅ ⱂⱃⰻⰴⱘⱅⱏ ⱃⰻⰿⰾ̑ⱑⱀⰵ. ⰺ҅ ⰲⱏⰸⱏⰿⱘⱅⱏ ⰹ ⰿⱑⱄⱅⱁ ⱗⰸⱏⰹⰽⱏ.
11:49
ⰵⰴⰻⱀⱏ ⰶⰵ ⱁⱅⱏ ⱀ̑ⰻⱈⱏ ⰽⰰⰺⰰⱇⰰ. ⰰⱃⱈⰻⰵⱃⰵⰹ ⱄⱏⰹ ⰾⱑⱅⱆ ⱅⱁⰿⱆ. ⱃⰵⱍⰵ ⰺ҅ⰿⱏ ⰲⱏⰹ ⱀⰵ ⰲⱑⱄⱅⰵ ⱀⰻⱍⰵⱄⱁⰶⰵ.
11:50
ⱀⰻ ⱂⱁⰿⱏⰹⱎⰾ̑ⱑⰵⱅⰵ. ⱑⰽⱁ ⰴⱁⰱⱃⱑⰵ ⰵⱄⱅⱏ ⰲⰰⰿⱏ. ⰴⰰ ⰵⰴⰻⱀⱏ ⱍⰽ҃ⱏ ⱆⰿⱐⱃ̑ⰵⱅⱏ ⰸⰰ ⰾ̑ⱓⰴⰻ. ⰰ ⱀⰵ ⰲⱐⱄⱐ ⱗⰸⱏⰹⰽⱏ ⱂⱁⰳⱏⰹⰱⱀⰵⱅⱏ.
11:51
ⱄⰵⰳⱁ ⰶⰵ ⱁ ⱄⰵⰱⱑ ⱀⰵ ⱃⰵⱍⰵ. ⱀⱏ ⰰⱃⱈⰻⰵⱃⰵⰹ ⱄⱏⰹ ⰾⱑⱅⱆ ⱅⱁⰿⱆ ⱂⱃⱁⱃⰵⱍⰵ. ⱑⰽⱁ ⱈⱁⱅⱑⰰⱎⰵ ⰻⱄ҃. ⱆⰿⱐⱃⱑⱅⰻ ⰸⰰ ⰾ̑ⱓⰴⰻ.
11:52
ⰺ҅ ⱀⰵ ⱅⱏⰽⱏⰿⱁ ⰸⰰ ⰾ̑ⱓⰴⰻ. ⱀⱏ ⰹ ⰴⰰ ⱍⱔⰴⰰ ⰱⰶ҃ⰻⱑ ⱄⱏⰱⰵⱃⰵⱅⱏ ⱃⰰⱄⱅⱁⱍⰵⱀⰰⰰ ⰲⱏ ⰵⰴⰻⱀⱁ.
11:53
Ⱉⱅⱏ ⱅⱁⰳⱁ ⰶⰵ ⰴⱐⱀⰵ. ⱄⱏⰲⱑⱎⱅⰰⱎⱔ ⰴⰰ ⰺ ⰱⱘ ⱆⰱⰻⰾⰻ.
11:54
ⰺⱄ҃ ⰶⰵ ⰽⱏ ⱅⱁⰿⱆ ⱀⰵ ⱑⰲⱑ ⱈⱁⰶⰴⰰⰰⱎⰵ ⰲⱏ ⰺ҅ⱓⰴⰵⰺⱈⱏ. ⱀⱏ ⰺ҅ⰴⰵ ⱁⱅⱏⱅⱘⰴⱆ. ⰲⱏ ⱄⱅⱃⰰⱀⱘ ⰱⰾⰻⰸⱏ ⰲⱏ ⱂⱆⱄⱅⱏⰹⱀ̑ⰻ ⰲⱏ ⰵⱇⱃⰵⱁⰿⱏ. ⱀⰰⱃⰻⱌⰰⰵⰿⱏ ⰳⱃⰰⰴⱏ. ⰺ҅ ⱅⱆ ⰶⰻⰲⱑⰰⱎⰵ. ⱄⱏ ⱆⱍⰵⱀⰻⰽⱏⰹ ⱄⰲⱁⰺ҅ⰿⰻ.
11:55
Ⰱⱑ ⰶⰵ ⰱⰾⰻⰸⱏ ⱂⰰⱄⱈⰰ ⰺ҅ⱓⰴⰵⰺⱄⰽⰰ. ⰺ҅ ⰲⱐⰸⰻⰴⱘ ⰿⸯⱀⱁⰸⰻ ⰲⱏ ⰺⰾ҃ⰿⱏ. ⱁⱅⱏ ⱄⱅⱃⰰⱀⱏⰹ ⱂⱃⱑⰶⰴⰵ ⱂⰰⱄⱈⱏⰹ. ⰴⰰ ⱁⱍⰻⱄⱅⱔⱅⱏ ⱄⱔ.
11:56
Ⰺ҅ ⰻⱄⰽⰰⱈⱘ ⰶⰵ ⰻⱄ҃ⰰ. ⰺ҅ ⰳⰾ҃ⰰⱈⱘ ⰽⱏ ⱄⰵⰱⱑ ⰲⱏ ⱌⱃⱏⰽⱏⰲⰵ ⱄⱅⱁⱗⱎⱅⰵ. ⱍⱐⱅⱁ ⱄⱔ ⰿⱐⱀⰻⱅⱏ ⰲⰰⰿⱏ. ⱑⰽⱁ ⱀⰵ ⰺ҅ⰿⰰⱅⱏ ⰾⰻ ⱂⱃⰻⱅⰻ ⰲⱏ ⱂⱃⰰⰸⰴⱐⱀⰻⰽⱏ.
11:57
ⰴⰰⱎⱔ ⰱⱁ ⰰⱃⱈⰻⰵⱃⰵⰹ. ⰺ҅ ⱇⰰⱃⰻⱄⱑⰹ. ⰸⰰⱂⱁⰲⱑⰴⱐ. ⰴⰰ ⰰⱎⱅⰵ ⰽⱏⱅⱁ ⱁⱎⱅⱓⱅⰻⱅⱏ ⰹ. ⰽⱏⰴⰵ ⰱⱘⰴⰵⱅⱏ ⱂⱁⰲⱑⱄⱅⰵ ⰴⰰ ⰺ҅ⰿⱘⱅⱏ ⰹ.