ЕВАНГЕЛИЕ ЕЖЕ Ѿ МАТѲЕꙖ
7:1
Ⱀⰵ ⱁⱄⱘⰶⰴⰰⰻⱅⰵ. ⰴⰰ ⱀⰵ ⱁⱄⱘⰶⰴⰵⱀⰻ ⰱⱘⰴⰵⱅⰵ.
7:2
ⰺ҅ⰿⱐⰶⰵ ⰱⱁ ⱄⱘⰴⱁⰿⱐ ⱄⱘⰴⰻⱅⰵ. ⱄⱘⰴⱔⱅⱏ ⰲⰰⰿⱏ. ⰺ҅ ⰲⱐ ⱀ̑ⱙⰶⰵ ⰿⱑⱃⱘ ⰿⱑⱃⰻⱅⰵ. ⰲⱏⰸⰿⱑⱃⱔⱅⱏ ⰲⰰⰿⱏ.
7:3
ⱍⱐⱅⱁ ⰶⰵ ⰲⰻⰴⰻⱎⰻ ⱄⱘⱍⱐⱌⱐ ⰺ҅ⰶⱐ ⰵⱄⱅⱏ ⰲⱏ ⱁⱌⱑ ⰱⱃⰰⱅⱃⰰ ⱅⰲⱁⰵⰳⱁ. ⰰ ⰱⱃⱐⰲ̑ⱀⰰ ⰵⰶⰵ ⰵⱄⱅⱏ ⰲⱏ ⱁⱌⱑ ⱅⰲⱁⰵⰿⱐ ⱀⰵ ⱍⱓⰵⱎⰻ.
7:4
ⰾⰻ ⰽⰰⰽⱁ ⱃⰵⱍⰵⱎⰻ ⰱⱃⰰⱅⱆ ⱄⰲⱁⰵⰿⱆ. ⱁⱄⱅⰰⰲⰻ. ⰺ҅ ⰻⰸⱏⰿⱘ ⱄⱘⱍⰵⱌⱐ ⰺ҅ⰸ ⱁⱍⰵⱄⰵ ⱅⰲⱁⰵⰳⱁ. ⰺ҅ ⱄⰵ ⰱⱃⱏⰲⱏⱀⱁ ⰲⱏ ⱁⱌⱑ ⱅⰲⱁⰵⰿⱐ.
7:5
ⰾⰻⱌⰵⰿⱑⱃⰵ. ⰺ҅ⰸⱏⰿⰻ ⱂⱃⱏⰲⱑⰵ ⰱⱃⱏⰲⱏⱀⱁ ⰺ҅ⰸ ⱁⱍⰵⱄⰵ ⱅⰲⱁⰵⰳⱁ ⰺ҅ ⱅⱏⰳⰴⰰ ⱆⰸⱐⱃⰻⱎⰻ ⰺ҅ⰸⱔⱅⰻ ⰺ҅ ⱄⱘⱍⱐⱌⱐ. ⰺ҅ⰸ ⱁⱍⰵⱄⰵ ⰱⱃⰰ!ⱅ!ⰰ ⱅⰲⱁⰵⰳⱁ.
7:6
Ⱀⰵ ⰴⰰⰴⰻⱅⰵ ⱄⱅ҃ⰰⰳⱁ ⱂⱄⱁⰿⱏ. ⱀⰻ ⱂⱁⰿⱑⱅⰰⰺⱅⰵ ⰱⰻⱄⰵⱃⱏ ⰲⰰⱎⰻⱈⱏ ⱂⱃⱑⰴⱏ ⱄⰲⰻⱀ̑ⰻⱑⰿⰻ. ⰴⰰ ⱀⰵ ⱂⱁⱂⰵⱃⱘⱅⱏ ⰺ҅ⱈⱏ ⱀⱁⰳⰰⰿⰻ ⱄⰲⱁⰺ҅ⰿⰻ. ⰺ҅ ⰲⱃⰰⱎⱅⱐⱎⱔ ⱄⱔ ⱃⰰⱄⱅⱃⱏⰳⱀⱘⱅⱏ ⰲⱏⰹ.
7:7
Ⱂⱃⱁⱄⰻⱅⰵ. ⰺ҅ ⰴⰰⱄⱅⱏ ⱄⱔ ⰲⰰⰿⱏ. ⰺ҅ⱎⱅⱑⱅⰵ. ⰺ҅ ⱁⰱⱃⱔⱎⱅⰵⱅⰵ. ⱅⰾⱏⱌⱑⱅⰵ ⰺ҅ ⱁⱅⰲⱃⱏⰸⰵⱅⱏ ⱄⱔ ⰲⰰⰿⱏ.
7:8
ⰲⱐⱄⱑⰽⱏ ⰱⱁ ⱂⱃⱁⱄⱔⰻ ⱂⱃⰻⰵⰿⰾ̑ⰵⱅⱏ. ⰺ҅ ⰻⱎⱅⱔⰻ ⱁⰱⱃⱑⱅⰰⰵⱅⱏ. ⰺ҅ ⱅⰾⱏⰽⱘⱎⱅⱆⰿⱆ ⱁⱅⰲⱃⱏⰸⰵⱅⱏ ⱄⱔ:. !ⰽⱁ!ⱀ
7:9
ⰾⰻ ⰽⱏⱅⱁ ⰵⱄⱅⱏ ⱁⱅⱏ ⰲⰰⱄⱏ ⱍⰽ҃ⱏ. ⰵⰶⰵ ⰰⱎⱅⰵ ⰲⱏⱄⱂⱃⱁⱄⰻⱅⱏ ⱄⱀ҃ⱏ ⱅⰲⱁⰻ ⱈⰾⱑⰱⰰ. ⰵⰴⰰ ⰽⰰⰿⰵⱀⱐ ⱂⱁⰴⰰⱄⱅⱏ ⰵⰿⱆ.
7:10
ⰾⰻ ⰰⱎⱅⰵ ⱃⱏⰹⰱⱏⰹ. ⱂⱁⰴⰰⱄⰻ ⰾⰻ ⰵⰿⱆ ⰸⰿⰻⱙ.
7:11
ⰰⱎⱅⰵ ⱆⰱⱁ ⰲⱏⰹ ⰾⱘⰽⰰⰲⱐⱀⰻ ⱄⱘⱎⱅⰵ. ⱆⰿⱑⰵⱅⰵ ⰴⰰⰰⱀⰻⱑ ⰱⰾⰰⰳⰰ ⰴⰰⱑⱅⰻ ⱍⱔⰴⱁⰿⱏ ⰲⰰⱎⰻⰿⱏ. ⰽⱁⰾⸯⰿⰻ ⱂⰰⱍⰵ ⱁⱌ҃ⱐ ⰲⰰⱎⱐ ⰺ҅ⰶⱐ ⰵⱄⱅⱏ ⱀⰰ ⱀⰱ҃ⱈⱏ. ⰴⰰⱄⱅⱏ ⰱⰾⰰⰳⰰⱑ ⱂⱃⱁⱄⱔⱎⱅⰻⰹⰿⱏ ⱆ ⱀ̑ⰵⰳⱁ:
7:12
Ⰲⱐⱄⱑ ⱆⰱⱁ ⰵⰾⰻⰽⱁ ⱈⱁⱎⱅⰵⱅⰵ ⰴⰰ ⱅⰲⱁⱃⱔⱅⱏ ⰲⰰⰿⱏ ⱍⱌ҃ⰻ. ⱅⰰⰽⱁ ⰺ ⰲⱏⰹ ⱅⰲⱁⱃⰻⱅⰵ ⰺⰿⱏ. ⱄⰵ ⰱⱁ ⰵⱄⱅⱏ ⰸⰰⰽⱁⱀⱏ ⰺ҅ ⱂⱃⱁⱃⱁⱌⰻ.
7:13
ⰲⱐⱀⰻⰴⱑⱅⰵ ⱘⰸⱏⰽⱏⰹⰿⰻ ⰲⱃⰰⱅⱏⰹ. ⱑⰽⱁ ⱂⱃⱁⱄⱅⱃⰰⱀⰰ ⰲⱃⰰⱅⰰ. ⰺ҅ ⱎⰻⱃⱁⰽⱏ ⱂⱘⱅⱐ. ⰲⱏⰲⱁⰴⱔⰻ ⰲⱏ ⱂⰰⰳⱆⰱⱘ. ⰺ҅ ⰿⱀⱁⰸⰻ ⱄⱘⱅⱏ ⰲⱏⱈⱁⰴⱔⱎⱅⰻ ⰺⰿⱐ.
7:14
ⰽⱁⰾⱐ ⱘⰸⱏⰽⰰ ⰲⱃⰰⱅⰰ ⰺ҅ ⱅⱑⱄⱀⱏ ⱂⱘⱅⱐ. ⰲⱏⰲⱁⰴⱔⰹ ⰲⱏ ⰶⰻⰲⱁⱅⱏ. ⰺ҅ ⰿⰰⰾⱁ ⰺⱈⱏ ⰵⱄⱅⱏ ⰺⰶⰵ ⰺ҅ ⱁⰱⱃⱑⱅⰰⱙ.
7:15
Ⰲⱏⱀⰵⰿⰾ̑ⱑⱅⰵ ⱁⱅⱏ ⰾⱏⰶⰻ!ⰹⱈⱏ ⱂⱃⱁⱃⱁⰽⱏ. ⰺ҅ⰶⰵ ⱂⱃⰻⱈⱁⰴⱔⱅⱏ ⰽⱏ ⰲⰰⰿⱏ ⰲⱏ ⱁⰴⰵⰶⰴⰰⱈⱏ ⱁⰲⱐⱍⰰⱈⱏ. ⰲⱏⱀⱘⱅⱃⱐⱙⰴⱆ ⰶⰵ ⱄⱘⱅⱏ ⰲⰾⱐⱌⰻ. ⱈⱏⰹⱎⱅⱐⱀⰻⱌⰻ.
7:16
ⱁⱅⱏ ⱂⰾⱁⰴⱏ ⰺ҅ⱈⱏ ⱂⱁⰸⱀⰰⰵⱅⰵ ⱗ. Ⰵⰴⰰ ⱁⰱⱐⰵⰿⰾ̑ⱙⱅⱏ ⱁⱅⱏ ⱅⱃⱏⱀⰻⱑ ⰳⱃⱁⰸⰴⱏⰹ. ⰾⰻ ⱁⱅⱏ ⱃⱑⱂⱐⱑ ⱄⰿⱁⰽⱏⰲⰻ.
7:17
ⱅⰰⰽⱁ ⰲⱄⱑⰽⱁ ⰴⱃⱑⰲⱁ ⰴⱁⰱⱃⱁ. ⱂⰾⱁⰴⱏⰹ ⰴⱁⰱⱃⱏⰹ ⱅⰲⱁⱃⰻⱅⱏ. ⰰ ⰸⱏⰾⱁ ⰴⱃⱑⰲⱁ ⱂⰾⱁⰴⱏⰹ ⰸⱏⰾⱏⰹ ⱅⰲⱁⱃⰻⱅⱏ.
7:18
ⱀⰵ ⰿⱁⰶⰵⱅⱏ ⰴⱃⱑⰲⱁ ⰴⱁⰱⱃⱁ ⱂⰾⱁⰴⰰ ⰸⱏⰾⰰ ⱅⰲⱁⱃⰻⱅⰻ. ⱀⰻ ⰴⱃⱑⰲⱁ ⰸⱏⰾⱁ ⰴⱁⰱⱃⰰ ⱂⰾⱁⰴⰰ ⱅⰲⱁⱃⰻⱅⰻ.
7:19
ⰲⱄⱑⰽⱁ ⰴⱃⱑⰲⱁ ⰵⰶⰵ ⱀⰵ ⱄⱏⱅⰲⱁⱃⰻⱅⱏ ⱂⰾⱁⰴⰰ ⰴⱁⰱⱃⰰ. ⱂⱁⱄⱑⰽⰰⱙⱅⱏ. ⰺ҅ ⰲⱏ ⱁⰳⱀ̑ⱐ ⰲⱏⰿⰵⱅⰰⱙⱅⱏ:
7:20
Ⱅⱑⰿⱐ ⰶⰵ ⱆⰱⱁ ⱁⱅⱏ ⱂⰾⱁⰴⱏ ⰺ҅ⱈⱏ ⱂⱁⰸⱀⰰⰵⱅⰵ ⱗ.
7:21
ⱀⰵ ⰲⱄⱑⰽⱏ ⰳⰾ҃ⱔⰻ ⰿⱀⱑ ⰳ҃ⰻ ⰳ҃ⰻ. ⰲⱐⱀⰻⰴⰵⱅⱏ ⰲⱏ ⱌⱃ҃ⱄⱅⰲⱁ ⱀⰱ҃ⱄⰽⱁⰵ. ⱀⱏ ⱅⰲⱁⱃⱔⰻ ⰲⱁⰾ̑ⱙ ⱁⱌ҃ⰰ ⰿⱁⰵⰳⱁ. ⰺ҅ⰶⱐ ⰵⱄⱅⱏ ⱀⰰ ⱀⰱ҃ⱄⱈⱏ.
7:22
Ⰿⱀⱁⰷⰻ ⱃⰵⰽⱘⱅⱏ ⰿⱀⱑ ⰲⱏ ⱅⱏ ⰴⸯⱀⱐ ⰳ҃ⰻ ⰳ҃ⰻ. ⱀⰵ ⰲⱏ ⱅⰲⱁⰵ ⰾⰻ ⰺ҅ⰿⱔ ⱂⱃⱁⱃⱁⱍⱐⱄⱅⰲⱁⰲⰰⱈⱁⰿⱏ. ⰺ҅ ⱅⰲⱁⰺ҅ⰿⱐ ⰺ҅ⰿⰵⱀⰵⰿⱐ ⰱⱑⱄⱏⰹ ⰺ҅ⰸⰳⱏⱀⰰⱈⱁⰿⱏ. ⰺ҅ ⱅⰲⱁⰺ҅ⰿⱐ ⰺ҅ⰿⰵⱀⰵⰿⱐ ⱄⰻⰾⱏⰹ ⰿⱀⱁⰳⱏⰹ ⱄⱏⱅⰲⱁⱃⰻⱈⱁⰿⱏ.
7:23
ⰺ҅ ⱅⱁⰳⰴⰰ ⰺ҅ⱄⱂⱁⰲⱑⰿⱐ ⰺ҅ⰿⱏ. ⱑⰽⱁ ⱀⰻⰽⱁⰾⰻⰶⰵ ⰸⱀⰰⱈⱏ ⰲⰰⱄⱏ. ⱁⱅⰻⰴⱑⱅⰵ ⱁⱅⱏ ⰿⰵⱀⰵ ⰴⱑⰾⰰⱙⱎⱅⰻⰹ ⰱⰵⰸⰰⰽⱁⱀⰻⰵ. !ⰸⰰ!ⱍ.
7:24
Ⰲⱄⱑⰽⱏ ⱆⰱⱁ ⰺ҅ⰶⰵ ⱄⰾⱏⰹⱎⰻⱅⱏ ⱄⰾⱁⰲⰵⱄⰰ ⰿⱁⱑ ⱄⰻ. ⰺ ⱄⱏⱅⰲⱁⱃⰻⱅⱏ ⱑ. ⱆⱂⱁⰴⱁⰱⰾ̑ⱙ ⰻ ⰿⱘⰶⱓ ⰿⱘⰴⱃⱆ. ⰺ҅ⰶⱐ ⱄⱏⰸⱏⰴⰰ ⱈⱃⰰⰿⰻⱀⱘ ⱄⰲⱁⱙ ⱀⰰ ⰽⰰⰿⰵⱀⰵ.
7:25
ⰺ҅ ⱄⱏⱀⰻⰴⱘ ⰴⱏⰶⰴⰻ ⰺ҅ ⱂⱃⰻⰴⱘ ⱃⱑⰽⱏⰹ. ⰺ҅ ⰲⱐⰸⰲⱑⰰⱎⱔ ⰲⱑⱅⱃⰻ. ⰺ҅ ⱀⰰⱂⰰⰴⱘ ⱀⰰ ⱈⱃⰰⰿⰻⱀⱘ ⱅⱘ. ⰺ҅ ⱀⰵ ⱂⰰⰴⰵ ⱄⱔ. ⱁⱄⱀⱁⰲⰰⱀⰰ ⰱⱁ ⰱⱑ ⱀⰰ ⰽⰰⰿⰵⱀⰻ.
7:26
ⰺ҅ ⰲⱄⱑⰽⱏ ⱄⰾⱏⰹⱎⱔⰻ ⱄⰾⱁⰲⰵⱄⰰ ⰿⱁⱑ ⱄⰻ. ⰺ҅ ⱀⰵ ⱅⰲⱁⱃⱔ ⰺ҅ⱈⱏ. ⱆⱂⱁⰴⱁⰱⰻⱅⱏ ⱄⱔ ⰿⱘⰶⱓ ⰱⱆⱓ. ⰺ҅ⰶⱐ ⱄⱏⰸⱏⰴⰰ ⱈⱃⰰⰿⰻⱀⱘ ⱄⰲⱁⱙ ⱀⰰ ⱂⱑⱄⱏⱌⱑ.
7:27
ⰺ҅ ⱄⱏⱀⰻⰴⰵ ⰴⱏⰶⰴⱐ ⰺ҅ ⱂⱃⰻⰴⱘ ⱃⱑⰽⱏⰹ. ⰺ҅ ⰲⱏⰸⰲⱑⱑⱎⱔ ⰲⱑⱅⱃⰻ. ⰺ҅ ⱁⱂⱐⱃⱑⱎⱔ ⱄⱔ ⱈⱃⰰⰿⰻⱀⱑ ⱅⱁⰻ. ⰺ҅ ⱂⰰⰴⰵ ⱄⱔ. ⰺ҅ ⰱⱑ ⱃⰰⰸⰴⱃⱆⱎⰵⱀⰻⰵ ⰵⱗ ⰲⰵⰾⰻⰵ ⰷⱑⰾⱁ.
7:28
Ⰺ҅ ⰱⱏⰹⱄⱅⱏ ⰵⰳⰴⰰ ⱄⱏⰽⱁⱀⱍⰰ ⰻⱄ҃. ⰲⱄⱑ ⱄⰾⱁⰲⰵⱄⰰ ⱄⰻ. ⰴⰻⰲⰾ̑ⱑⰰⱈⱘ ⱄⱔ ⱀⰰⱃⱁⰴⰻ ⱁ ⱆⱍⰵⱀⰻⰹ ⰵⰳⱁ.
7:29
ⰱⱑ ⰱⱁ ⱆⱍⱔ ⱑⰽⱁ ⰲⰾⰰⱄⱅⱐ ⰺ҅ⰿⱏⰹ. ⰺ҅ ⱀⰵ ⱑⰽⱁ ⰽⱏⱀⰻⰶⱐⱀⰻⱌⰻ ⰺ҅ⱈⱏ. ⰺ҅ ⱇⰰⱃⰻⱄⰵⰻ: