ⰲⱏ ⱁⱀⱁ ⰲⱃⱑⰿⱔ. ⱄⰾⱏⰹⱎⰰⰲⱏ ⰺ҅ⱃⱁⰴⱏ ⱅⰵⱅⱃⰰⰰⱃⱈⱏ. ⱄⰾⱆⱈⱏ ⱈⰲ҃ⱏ.

ⰺ҅ ⱃⰵⱍⰵ ⱁⱅⱃⱁⰽⱁⰿⱏ ⱄⰲⱁⰺ҅ⰿⱏ. ⱄⰵ ⰵⱄⱅⱏ ⰺ҅ⱁⰰⱀⱏ ⰽⱃⱐⱄⱅⰻⱅⰵⰾ̑ⱐ. ⱅⱏ ⰲⱏⱄⰽⱃⱏⱄⰵ ⱁⱅⱏ ⰿⱃⱏⱅⰲⱏⰺⱈⱏ. ⰺ҅ ⱄⰵⰳⱁ ⱃⰰⰴⰻ ⱄⰻⰾⱏⰹ ⰴⱑⱙⱅⱏ ⱄⱔ ⱁ ⱀ̑ⰵⰿⱐ.

Ⰺ҅ⱃⱁⰴⱏ ⰱⱁ ⰺⰿⱏ ⰺ҅ⱁⰰⱀⸯⱀⰰ. ⱄⱏⰲⱔⰸⰰ ⰺ҅ ⰲⱏⱄⰰⰴⰻ ⰲⱏ ⱅⱐⰿⱐⱀⰻⱌⱘ. ⰺ҅ⱃⱁⰴⱏⰰⰴⱏⰹ ⱃⰰⰴⰻ. ⰶⰵⱀⱏⰹ ⱇⰻⰾⰻⱂⰰ ⰱⱃⰰⱅⰰ ⱄⰲⱁⰵⰳⱁ.

ⰳⰾ҃ⰰⱎⰵ ⰱⱁ ⰵⰿⱆ ⰺ҅ⱁⰰⱀⱏ. ⱀⰵ ⰴⱁⱄⱅⱁⰺⱅⱏ ⱅⰻ ⰺ҅ⰿⱑⱅⰻ ⱗ.

ⰺ҅ ⱈⱁⱅⱔ ⰻ ⱆⰱⰻⱅⰻ ⱆⰱⱁⱑ ⱄⱔ ⱀⰰⱃⱁⰴⰰ. ⰸⰰⱀ̑ⰵ ⱑⰽⱁ ⱂⱃⱁⱃⱁⰽⰰ ⰺ҅ⰿⱑⱈⱘ ⰺ.

ⰴⱐⱀⰻ ⰶⰵ ⰱⱏⰹⰲⱏⱎⱓ. ⱃⱁⰶⰴⱐⱄⱅⰲⰰ ⰺ҅ⱃⱁⰴⱁⰲⰰ. ⱂⰾⱔⱄⰰ ⰴⱏⱎⱅⰻ ⰺ҅ⱃⱁⰴⰻⱑⰴⰻⱀⰰ ⱂⱁⱄⱃⱑⰴⱑ. ⰺ҅ ⱆⰳⱁⰴⰻ ⰺ҅ⱃⱁⰴⱆ.

ⱅⱑⰿⱐ ⰶⰵ ⰽⰾⱔⱅⰲⱁⱙ ⰺ҅ⰸⰴⱃⰵⱍⰵ ⰵⰻ ⰴⰰⱅⰻ. ⰵⰳⱁⰶⰵ ⰰⱎⱅⰵ ⰲⱏⱄⱂⱃⱁⱄⰻⱅⱏ.

ⱁⱀⰰ ⰶⰵ ⱀⰰⰲⰰⰶⰴⰵⱀⰰ ⰿⰰⱅⰵⱃⰻⱙ ⱄⰲⱁⰵⱙ. ⰴⰰⰶⰴⱐ ⰿⰻ ⱃⰵⱍⰵ ⱄⱐⰴⰵ ⱀⰰ ⰱⰾ̑ⱓⰴⱑ. ⰳⰾⰰⰲⱘ ⰺ҅ⱁⰰⱀⰰ ⰽⱃⱄⱅⰻⱅⰵⰾ̑ⱑ.

ⰺ҅ ⱂⰵⱍⰰⰾⱐⱀⱏ ⰱⱏⰹ!ⱄ ⱌⱃ҃ⱐ ⰽⰾⱔⱅⰲⱏⰹ ⱃⰰⰴⰻ. ⰺ҅ ⰲⱏⰸⰾⰵⰶⱔⱎⱅⰻⰹⱈⱏ ⱄⱏ ⱀ̑ⰻⰿⱐ ⱂⱁⰲⰵⰾⱑ ⰴⰰⱅⰻ.

ⰺ҅ ⱂⱁⱄⱏⰾⰰⰲⱏ ⱆⱄⱑⰽⱀⱘ ⰺ҅ⱁⱀⰰ ⰲⱏ ⱅⱐⰿⱐⱀⰻⱌⰻ. ⰺ҅ ⱂⱃⰻⱀⰵⱄⱁⱎⱔ ⰳⰾⰰⰲⱘ ⰵⰳⱁ ⱀⰰ ⰱⰾ̑ⱓⰴⱑ. ⰺ҅ ⰴⰰⱎⱔ ⰴⱑⰲⰻⱌⰻ. ⰺ҅ ⱀⰵⱄⰵ ⰿⰰⱅⰵⱃⰻ ⱄⰲⱁⰵⰻ.

ⰺ҅ ⱂⱃⰻⱄⱅⱘⱂⱐⱎⰵ ⱆⱍⰵⱀⰻⱌⰻ ⰵⰳⱁ. ⰲⱐⰸⱔⱎⱔ ⱅⱑⰾⱁ ⰵⰳⱁ ⰺ҅ ⱂⱁⰳⱃⰵⰱⱁⱎⱔ ⰵ. ⰺ҅ ⱂⱃⰻⱎⱐⰴⱏⱎⰵ ⰲⱏⰸⰲⱑⱄⱅⰻⱎⱔ ⰺⱄ҃ⰲⰻ.

Ⰺ҅ ⱄⰾⱏⰹⱎⰰⰲⱏ ⰻⱄ҃. ⱁⱅⰻⰴⰵ ⱁⱅⱏⱅⱘⰴⱑ ⰲⱏ ⰽⱁⱃⰰⰱⰻ. ⰲⱏ ⱂⱆⱄⱅⱁ ⰿⱑⱄⱅⱁ ⰵⰴⰻⱀⱏ. ⰺ҅ ⱄⰾⱏⰹⱎⰰⰲⱏⱎⰵ ⱀⰰⱃⱁⰴⰻ ⱂⱁ ⱀ̑ⰵⰿⱐ ⰺ҅ⰴⱁⱎⱔ ⱂⱑⱎⰻ ⱁⱅⱏ ⰳⱃⰰⰴⰰ.

ⰺ҅ ⰻⱎⱐⰴⱏ ⰻⱄ҃. ⰲⰻⰴⱑ ⱀⰰⱃⱁⰴⱏⰹ ⰿⱀⱁⰳⱏⰹ. ⰺ҅ ⰿⰻⰾⱁⱄⱃⱏⰴⱁⰲⰰⰲⱏ ⱁ ⱀ̑ⰻⱈⱏ. ⰺ҅ ⰻⱌⱑⰾⰻ ⱀⰵⰴⱘⰶⱐⱀⱏⰹⱗ ⰺⱈⱏ: -

!ⰸⰰ!ⱍ. Ⱂⱁⰸⰴⱑ ⰶⰵ ⰱⱏⰹⰲⱏⱎⱓ. ⱂⱃⰻⱄⱅⱘⱂⰻⱎⱔ ⰽⱏ ⱀ̑ⰵⰿⱆ. ⱆⱍⰵⱀⰻⱌⰻ ⰵⰳⱁ ⰳⰾ҃ⱙⱎⱅⰵ. ⱂⱆⱄⱅⱁ ⰵⱄⱅⱏ ⰿⱑⱄⱅⱁ. ⰺ҅ ⰳⱁⰴⰻⱀⰰ ⰿⰻⱀⱘ ⱓⰶⰵ. ⱁⱅⱏⱂⱆⱄⱅⰻ ⱀⰰⱃⱁⰴⱏⰹ. ⰴⰰ ⱎⱐⰴⱏⱎⰵ ⰲⱏ ⰱⰾⰻⰶⱐⱀ̑ⱔⱗ ⰳⱃⰰⰴⱐⱌⱔ. ⰽⱆⱂⱔⱅⱏ ⰱⱃⰰⱎⱐⱀⰰ ⱄⰵⰱⱑ.

ⰻⱄ҃ ⰶⰵ ⱃⰵⱍⰵ ⰺ҅ⰿⱏ. ⱀⰵ ⱅⱃⱑⰱⱆⱙⱅⱏ ⱁⱅⰻⱅⰻ. ⰴⰰⰴⰻⱅⰵ ⰺ҅ⰿⱏ ⰲⱏⰹ ⱑⱄⱅⰻ.

ⱁⱀⰻ ⰶⰵ ⰳⰾ҃ⰰⱎⱔ ⰵⰿⱆ. ⱀⰵ ⰺ҅ⰿⰰⰿⱏ ⱄⱐⰴⰵ. ⱅⱏⰽⰿⱁ !ⰴ. ⱈⰾⱑⰱⱏ. ⰺ҅ ⰱ҃ ⱃⱏⰹⰱⱑ.

ⱁⱀⱏ ⰶⰵ ⱃⰵⱍⰵ. ⱂⱃⰻⱀⰵⱄⱑⱅⰵ ⰿⰻ ⱗ ⱄⱑⰿⱁ.

ⰺ҅ ⱂⱁⰲⰵⰾⱑⰲⱏ ⱀⰰⱃⱁⰴⱁⰿⱏ ⰲⱐⰸⰾⰵⱎⱅⰻ ⱀⰰ ⱅⱃⱑⰲⱑ.ⰺ҅ ⱂⱃⰻⰹⰿⱏ ⰴ҃ ⱈⰾⱑⰱⱏ. ⰺ҅ ⰱ҃ ⱃⱏⰹⰱⱑ. ⰲⱏⰸⱐⱃⱑⰲⱏ ⱀⰰ ⱀⰱ҃ⱁ !ⰱⰾⰳⰲⰻ. ⰺ҅ ⱂⱃⱑⰾⱁⰿⱐ ⱈⰾⱑⰱⱏⰹ. ⰴⰰⱄⱅⱏ ⱆⱍⰵⱀⰻⰽⱁⰿⱏ. ⰺ҅ ⱆⱍⰵⱀⰻⱌⰻ ⰶⰵ ⱀⰰⱃⱁⰴⱁⰿⱏ.

ⰺ҅ ⱑⱎⱔ ⰲⸯⱄⰻ ⰺ҅ ⱀⰰⱄⱏⰹⱅⰻⱎⱔ ⱄⱔ. ⰺ҅ ⰲⱐⰸⱔⱎⱔ ⰺ҅ⰸⰱⱏⰹⱅⱏⰽⱏⰹ ⱆⰽⱃⱆⱈⱏ ⰱ҃ ⰺ҃ ⰽⱁⱎⰰ ⰺ҅ⱄⱂⰾⱏⱀⱐ.

ⱑⰴⱏⱎⰻⰹⱈⱏ ⰶⰵ ⰱⱑⰰⱎⰵ ⰿⱘⰶⱐ. ⱂⱔⱅⱐ ⱅⱏⰹⱄⱔⱎⱅⱐ. ⱃⰰⰸⰲⱑ ⰶⰵⱀⱏ ⰺ҅ ⰴⱑⱅⰻⰹ.

Ⰺ ⰰⰱⰻⰵ ⱆⰱⱑⰴⰻ ⱆⱍⰵⱀⰻⰽⱏⰹ ⰲⱏⰾⱑⱄⱅⰻ ⰲⱏ ⰽⱁⱃⰰⰱⱐ. ⰺ҅ ⰲⰰⱃⰻⱅⰻ ⰹ ⱀⰰ ⱁⱀⱁⰿⱐ ⱂⱁⰾⱆ. ⰴⱁⱀⱐⰴⰵⰶⰵ ⱁⱅⱏⱂⱆⱄⱅⰻⱅⱏ ⱀⰰⱃⱁⰴⱏⰹ. !ⰽⱁ!ⱀ.

Ⰺ҅ ⱁⱅⱏⱂⱆⱎⱅⱐ ⱀⰰⱃⱁⰴⱏⰹ. ⰲⱐⰸⰻⰴⰵ ⱀⰰ ⰳⱁⱃⱘ ⱂⱁⰿⱁⰾⰻⱅⱏ ⱄⱔ. ⱂⱁⰸⰴⱑ ⰶⰵ ⰱⱏⰹⰲⱏⱎⱓ ⰵⰴⰻⱀⱏ ⰱⱑ ⱅⱆ.

ⰽⱁⱃⰰⰱⱐ ⰶⰵ ⰱⱑ ⱂⱁⱄⱃⱑⰴⱑ ⰿⱁⱃⱑ ⰲⱏⰾⰰⱗ ⱄⱔ ⰲⰾⱏⱀⰰⰿⰻ. ⰱⱑ ⰱⱁ ⱂⱃⱁⱅⰻⰲⱐⱀⱏ ⰲⱑⱅⱃⱏ.

ⰲⱏ ⱍⰵⱅⰲⱃⱏⱅⱘⱙ ⰶⰵ ⱄⱅⱃⰰⰶⱘ ⱀⱁⱎⱅⰻ. ⰺ҅ⰴⰵ ⰽⱏ ⱀ̑ⰻⰿⱏ ⰻⱄ҃. ⱈⱁⰴⱔ ⱂⱁ ⰿⱁⱃⱓ.

ⰺ҅ ⰲⰻⰴⱑⰲⱏⱎⰵ ⰻ ⱆⱍⰵⱀⰻⱌⰻ ⱈⱁⰴⱔⱎⱅⱐ ⱂⱁ ⰿⱁⱃⱓ. ⱄⱏⰿⱔⱅⱁⱎⱔ ⱄⱔ ⰳⰾ҃ⱙⱎⱅⰵ. ⱑⰽⱁ ⱂⱃⰻⰸⱃⰰⰽⱏ ⰵⱄⱅⱏ. ⰺ҅ ⱁⱅⱏ ⱄⱅⱃⰰⱈⰰ ⰲⱏⰸⱏⱂⰻⱎⱔ.

ⰰⰱⰻⰵ ⰶⰵ ⱃⰵⱍⰵ ⰺ҅ⰿⱏ ⰻⱄ҃ ⰳⰾ҃ⱔ. ⰴⱃⱏⰸⰰⰻⱅⰵ ⰰⰸⱏ ⰵ!ⱄⰿⱐ ⱀⰵ ⰱⱁⰺⱅⰵ ⱄⱔ.

ⱉⱅⱏⰲⱑⱎⱅⰰⰲⱏ ⰶⰵ ⱂⰵⱅⱃⱏ ⱃⰵⱍⰵ ⰵⰿⱆ. ⰳ҃ⰻ ⰰⱎⱅⰵ ⱅⱏⰹ ⰵⱄⰻ. ⱂⱁⰲⰵⰾⰻ ⰿⰻ ⱂⱃⰻⱅⰻ ⰽⱐ ⱅⰵⰱⱑ ⱂⱁ ⰲⱁⰴⰰⰿⱏ.

ⱁⱀⱏ ⰶⰵ ⱃⰵⱍⰵ ⱂⱃⰻⰴⰻ. ⰺ҅ ⰻⰸⰾⱑⰸⱏ ⰺ҅ⱄ ⰽⱁⱃⰰⰱⰾ̑ⱑ ⱂⰵⱅⱃⱏ. ⱈⱁⰶⰴⰰⰰⱎⰵ ⱀⰰ ⰲⱁⰴⰰⱈⱏ. ⰺ҅ ⱂⱃⰻⰴⰵ ⰽⱏⰹ ⰻⱄ҃ⰲⰻ.

ⰲⰻⰴⱔ ⰶⰵ ⰲⱑⱅⱃⱏⰹ ⰽⱃⱑⱂⱏⰽⱏⰹ ⱆⰱⱁⱑ ⱄⱔ. ⰺ҅ ⱀⰰⱍⱐⱀⱏ ⱆⱅⰰⱂⰰⱅⰻ. ⰲⱏⰸⱏⱂⰻ ⰳⰾ҃ⱔ ⰳ҃ⰻ ⱄⱂ҃ⰻ ⰿⱔ.

ⰰⰱⰻⰵ ⰶⰵ ⰻⱄ҃ ⱂⱃⱁⱄⱅⱐⱃⱏ ⱃⱘⰽⱘ ⱗⱅⱏ ⰺ. Ⰺ ⰳⰾ҃ⰰ ⰵⰿⱆ ⰿⰰⰾⱁⰲⱑⱃⰵ. ⱂⱁ ⱍⱐⱅⱁ ⱄⱔ ⱆⱄⱘⰿⱀⱑ.

ⰺ҅ ⰲⱏⰾⱑⰸⱏⱎⰵⰿⰰ ⰺ҅ⰿⰰ ⰲⱏ ⰽⱁⱃⰰⰱ̑ⱐ. ⱂⱃⱑⱄⱅⰰ ⰲⱑⱅⱃⱏ.

ⱄⱘⱎⱅⰵⰺ҅ ⰶⰵ ⰲⱏ ⰽⱁⱃⰰⰱⰻ. ⱂⱃⰻⱎⱐⰴⱏⱎⰵ ⱂⱁⰽⰾⱁⱀⰻⱎⱔ ⱄⱔ ⰵⰿⱆ ⰳⰾ҃ⱙⱎⱅⰵ. ⰲⱏ ⰺ҅ⱄⱅⰻⱀⱘ ⱄⱀ҃ⱏ ⰱⰶ҃ⰻ ⰵⱄⰻ.

ⰺ҅ ⱂⱃⱑⱑⰲⱏⱎⰵ ⱂⱃⰻⰴⱁⱎⱔ ⱀⰰ ⰸⰵⰿⰾ̑ⱙ ⰼⰵⱀⰻⱄⰰⱃⰵⱅⱐⱄⰽⱘ.

ⰺ҅ ⱂⱁⰸⱀⰰⰲⱏⱎⰵ ⰻ ⰿⱘⰶⰻ ⰿⱑⱄⱅⰰ ⱅⱁⰳⱁ. ⱂⱁⱄⱏⰾⰰⱎⱔ ⰲⱏ ⰲⱐⱄⱘ ⱄⱅⱃⰰⱀⱘ ⱅⱘ. ⰺ҅ ⱂⱃⰻⱀⰵⱄⱁⱎⱔ ⰽⱏ ⱀ̑ⰵⰿⱆ ⰲⱄⱔ ⰱⱁⰾⱔⱎⱅⱔⱗ.

ⰺ҅ ⰿⱁⰾ̑ⱑⰰⱈⱘ ⰻ ⰴⰰ ⱅⱏⰽⰿⱁ ⱂⱃⰻⰽⱁⱄⱀⱘⱅⱏ ⱄⱔ ⰲⱏⱄⰽⱃⰻⰾⰻⰹ ⱃⰻⰸⱑ ⰵⰳⱁ. ⰺ҅ ⰵⰾⰻⰽⱁ ⱄⱔ ⱂⱃⰻⰽⱁⱄⱀⱘⱎⱔ ⰵⰿⱐ ⱄⱂ҃ⰵⱀⰻ ⰱⱏⰹⱎⱔ.