Ⰲⱏ ⱅⱏⰶⰴⰵ ⰴⱀⱐ ⰺ҅ⱎⱐⰴⱏ ⰻⱄ҃ ⰺ҅ⰸ ⰴⱁⰿⱆ ⱄⱑⰴⱑⰰⱎⰵ ⱂⱃⰻ ⰿⱁⱃⰻ.

ⰺ҅ ⱄⱏⰱⱏⱃⰰⱎⱔ ⱄⱔ ⰽⱏ ⱀ̑ⰵⰿⱆ ⱀⰰⱃⱁⰴⰻ ⰿⱀⱁⰸⰻ. ⰺ҅ ⱑⰽⱁ ⰲⱏⰾⱑⰸⱏ ⰲⱏ ⰽⱁⱃⰰⰱⱐ ⱄⱑⰴⰵ. ⰺ҅ ⰲⸯⱄⱐ ⱀⰰⱃⱁⰴⱏ ⱀⰰ ⱂⱁⰿⱁⱃⰻⰹ ⱄⱅⱁⱑⱎⰵ.

ⰺ҅ ⰳⰾ҃ⰰ ⰺ҅ⰿⱏ ⰿⱀⱁⰳⱁ. ⱂⱃⰻⱅⱏⱍⰰⰿⰻ ⰳⰾ҃ⱔ. ⱄⰵ ⰺ҅ⰸⰻⰴⰵ ⱄⱑⱗⰹ. ⰴⰰ ⱄⱑⰵⱅⱏ.

ⱄⱑⱙⱎⱅⱓⰿⱆ. ⱁⰲⰰ ⱆⰱⱁ ⱂⰰⰴⱁⱎⱔ ⱂⱃⰻ ⱂⱘⱅⰻ. ⰺ҅ ⱂⱃⰻⰴⱁⱎⱔ ⱂⱅⰻⱌⱔ ⱀⰱ҃ⱄⰽⱏⰹⱗ. ⰺ҅ ⱂⱁⰸⱁⰱⰰⱎⱔ ⱑ.

ⰴⱃⱆⰳⰰⱑ ⰶⰵ ⱂⰰⰴⱁⱎⱔ ⱀⰰ ⰽⰰⰿⰵⱀⰻⰹⱈⱏ. ⱑⰽⱁ ⱀⰵ ⰺⰿⱑⱎⱔ ⰸⰵⰿⰾ̑ⱔ ⰿⱀⱁⰳⱏⰹ. ⰺ҅ ⰰⰱⰻⰵ ⱂⱃⱁⰸⱔⰱⱁⱎⱔ. ⰸⰰⱀ̑ⰵ ⱀⰵ ⰺ҅ⰿⱑⰰⱎⰵ ⰳⰾⱘⰱⰻⱀⱏⰹ ⰸⰵⰿⰾ̑ⱑ.

ⱄⰾⱏⱀⱐⱌⱓ ⰲⱏⱄⰻⱑⰲⱏⱎⱓ ⱂⱃⰻⱄⰲⱔⰴⱘ. ⰸⰰⱀⰵ ⱀⰵ ⰺ҅ⰿⱑⱈⱘ ⰽⱁⱃⰵⱀⰻⱑ ⰺ҅ ⰻⱄⱏⱈⱁⱎⱔ.

ⰰ ⰴⱃⱆⰳⰰⱑ ⱂⰰⰴⱁⱎⱔ ⰲⱏ ⱅⱃⱏⱀⰻⰹ. ⰺ҅ ⰲⱐⰸⰻⰴⰵ ⱅⱃⱏⱀⰻⰵ ⰺ҅ ⱂⱁⰴⰰⰲⰻ ⰵ.

ⰴⱃⱆⰳⰰⰰ ⰶⰵ ⱂⰰⰴⱁⱎⱔ ⱀⰰ ⰸⰵⰿⰾ̑ⰻ ⰴⱁⰱⱃⱑ. ⰺ҅ ⰴⰰⰰⱈⱘ ⱂⰾⱁⰴⱏⰹ. ⱁⰲⱁ ⱄⱏⱅⱁ. ⱁⰲⱁ ⱎⰵⱄⱅⱐ ⰴⰵⱄⱔⱅⱏ. ⱁⰲⱁ. !ⰼ.

ⰺ҅ⰿⱑⱗⰻ ⱆⱎⰻ ⱄⰾⱏⰹⱎⰰⱅⰻ ⰴⰰ ⱄⰾⱏⰹⱎⰻⱅⱏ.

ⰺ҅ ⱂⱃⰻⱄⱅⱘⱂⱐⱎⰵ ⱆⱍⰵⱀⰻⱌⰻ ⰵⰳⱁ ⱃⱑⱎⱔ ⰵⰿⱆ. ⱂⱁ ⱍⱐⱅⱁ ⱂⱃⰻⱅⱏⱍⰰⰿⰻ ⰳⰾ҃ⰵⱎⰻ ⰺ҅ⰿⱏ.

ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ. ⱑⰽⱁ ⰲⰰⰿⱏ ⰴⰰⱀⱁ ⰵⱄⱅⱏ ⱃⰰⰸⱆⰿⱑⱅⰻ. ⱅⰰⰺⱀⰰⰰ ⱌⱃ҃ⱄⱅⰲⰻⱑ ⱀⰵⰱ҃ⱄⰽⰰⰰⰳⱁ. ⱁⱀⱑⰿⱏ ⰶⰵ ⱀⰵ ⰴⰰⱀⱁ ⰵⱄⱅⱏ.

ⰺ҅ⰿⱘⱎⱅⱓⰿⱆ ⰱⱁ ⰴⰰⱄⱅⱏ ⱄⱔ. ⰺ҅ ⰻⰸⰱⱘⰴⰵⱅⱏ ⰵⰿⱆ. ⰰ ⰺⰶⰵ ⱀⰵ ⰺ҅ⰿⰰⱅⱏ. ⰺ҅ ⰵⰶⰵ ⰺ҅ⰿⰰⱅⱏ ⰲⱐⰸⱐⰿⰵⱅⱏ ⱄⱔ ⱁⱅⱏ ⱀ̑ⰵⰳⱁ.

Ⱄⰵⰳⱁ ⱃⰰⰴⰻ ⱂⱃⰻⱅⱏⱍⰰⰿⰻ ⰺ҅ⰿⱏ ⰳⰾ̑ⱙ. ⱑⰽⱁ ⰲⰻⰴⱔⱎⱅⰵ ⱀⰵ ⰲⰻⰴⱔⱅⱏ. ⰺ҅ ⱄⰾⱏⰹⱎⱔⱎⱅⰵ ⱀⰵ ⱄⰾⱏⰹⱎⱔⱅⱏ. ⱀⰻ ⱃⰰⰸⱆⰿⱑⱙⱅⱏ.

ⰺ҅ ⱄⱏⰱⱏⰹⰲⰰⰵⱅⱏ ⱄⱔ ⰺ҅ⰿⱏ. ⱂⱃⱁⱃⱁⱍⱐⱄⱅⰲⱁ ⰺ҅ⱄⰰⰺ҅ⱄⰰⰹ̆ⰻⱀⱁ ⰳⰾ̑ⱙⱎⱅⰵⰵ. ⱄⰾⱆⱈⱏⰿⱐ ⱆⱄⰾⱏⰹⱎⰻⱅⰵ. ⰺ҅ ⱀⰵ ⰺ҅ⰿⰰⱅⰵ ⱃⰰⰸⱆⰿⱑⱅⰻ. ⰸⱐⱃⱔⱎⱅⰵ ⱆⰸⱐⱃⰻⱅⰵ. ⰺ҅ ⱀⰵ ⰺ҅ⰿⰰⱅⰵ ⰲⰻⰴⱑⱅⰻ.

ⱆⱅⰾⱏⱄⱅⱑ ⰱⱁ ⱄⱃⰴⱐⱌⰵ. ⰾ̑ⱓⰴⰻⰹ ⱄⰻⱈⱏ. ⰺ҅ ⱆⱎⰻⰿⰰ ⱅⱔⰶⱐⰽⱁ ⱆⱄⰾⱏⰹⱎⰰⱎⱔ. ⰺ҅ ⱁⱍⰻ ⱄⰲⱁⰹ ⱄⱏⰿⱑⰶⰻⱎⰵ. ⰵⰳⰴⰰ ⰽⱏⰳⰴⰰ ⱆⰸⱐⱃⰻⱅⱏ ⱁⱍⰻⰿⰰ. ⰺ҅ ⱆⱎⰻⰿⰰ ⱆⱄⰾⱏⰹⱎⱔⱅⱏ. ⰺ҅ ⱄⱃⱏⰴⱐⱌⰵⰿⱐ ⱃⰰⰸⱆⰿⱑⱙⱅⱏ. ⰺ҅ ⱁⰱⱃⰰⱅⱔⱅⱏ ⱄⱔ ⰺ҅ ⰻⱌⱑⰾ̑ⱙ ⱗ.

Ⰲⰰⱎⰻ ⰶⰵ ⰱⰾⰰⰶⰵⱀⱑ ⱁⱍⰻ. ⱑⰽⱁ ⰲⰻⰴⰻⱅⰵ. ⰺ҅ ⱆⱎⰻ ⰲⰰⱎⰻ ⱑⰽⱁ ⱄⰾⱏⰹⱎⰻⱅⰵ.

ⰰⰿⰻⱀⱐ ⰳⰾ҃ⱙ ⰲⰰⰿⱏ. ⱑⰽⱁ ⰿⱀⱁⰸⰻ ⱂⱃⱁⱃⱁⱌⰻ ⰺ҅ ⱂⱃⰰⰲⰵⰴⱐⱀⰻⱌⰻ. ⰲⱏⰶⰴⰵⰾⱑⱎⱔ ⰲⰻⰴⱑⱅⰻ. ⱑⰶⰵ ⰲⰻⰴⰻⱅⰵ. ⰺ҅ ⱀⰵ ⰲⰻⰴⱑⱎⱔ. ⰺ҅ ⱄⰾⱏⰹⱎⰰⱅⰻ. ⱑⰶⰵ ⱄⰾⱏⰹⱎⰻⱅⰵ. ⰺ҅ ⱀⰵ ⱄⰾⱏⰹⱎⰰⱎⱔ.

Ⰲⱏⰹ ⰶⰵ ⱆⱄⰾⱏⰹⱎⰻⱅⰵ ⱂⱃⰻⱅⱏⱍⱘ ⱄⱑⰲⱏⱎⰰⰵⰳⱁ.

ⰲⱄⱑⰽⱏ ⰺ҅ⰶⰵ ⱄⰾⱏⰹⱎⰻⱅⱏ ⱄⰾⱁⰲⰵⱄⰰ ⱌⱃ҃ⱑ. ⰺ҅ ⱀⰵ ⱃⰰⰸⱆⰿⱑⰲⰰⰵⱅⱏ. ⱂⱃⰻⱈⱁⰴⰻⱅⱏ ⱀⰵⱂⱃⰻⱑⰸⱀⱐ. ⰺ ⰲⱏⱄⱈⱏⰹⱎⱅⰰⰵⱅⱏ ⱄⱑⰰⱀⱁⰵ ⰲⱏ ⱄⱃⱏⰴⱐⱌⰻ ⰵⰳⱁ. ⱄⰵ ⰵⱄⱅⱏ ⱄⱑⰰⱀⱁⰵ ⱂⱃⰻ ⱂⱘⱅⰻ.

ⰰ ⱄⱑⰰⱀⱁⰵ ⱀⰰ ⰽⰰⰿⰵⱀⰻⰹ. ⱄⰵ ⰵⱄⱅⱏ ⱄⰾⱏⰹⱎⱔⰹ ⱄⰾⱁⰲⱁ. ⰺ҅ ⰰⰱⰻⰵ ⱄⱏ ⱃⰰⰴⱁⱄⱅⰻⱙ ⱂⱃⰻⰵⰿⰾ̑ⱔ ⰵ.

ⱀⰵ ⰺ҅ⰿⰰⱅⱏ ⰶⰵ ⰽⱁⱃⰵⱀⰵ ⰲⱐ ⱄⰵⰱⱑ. ⱀⱏ ⰲⱃⱑⰿⰵⱀⱏⱀⱁ ⰵⱄⱅⱏ. ⰱⱏⰹⰲⱏⱎⰻ ⰶⰵ ⱂⰵⱍⰰⰾⰻ ⰺ҅ ⰳⱁⱀ̑ⰵⱀⰻⱓ. ⱄⰾⱁⰲⰵⱄⰵ ⱃⰰⰴⰻ. ⰰⰱⱐⰵ ⱄⱏⰱⰾⰰⰶⱀ̑ⱑⰵⱅⱏ ⱄⱔ.

ⰰ ⱄⰰⱀⱁⰵ ⰲⱏ ⱅⱃⱏⱀⰻⰹ. ⱄⱐ ⰵⱄⱅⱏ. ⱄⰾⱏⰹⱎⱔⰹ ⱄⰾⱁⰲⱁ. ⰺ҅ ⱂⰵⱍⰰⰾ̑ⱐ ⱄⰲⱑⱅⰰ ⱄⰵⰳⱁ. ⰺ҅ ⰾⱐⱄⱅⱐ ⰱⱁⰳⰰⱅⱐⱄⱅⰲⰻⱑ ⱂⱁⰴⰰⰲⰾ̑ⱑⰵⱅⱏ ⰵ. ⱄⰾⱁⰲⱁ ⰺ҅ ⰱⰵⱄⱂⰾⱁⰴⰰ ⰱⱏⰹⰲⰰⰵⱅⱏ.

ⰰ ⱄⱑⰰⱀⱁⰵ ⱀⰰ ⰴⱁⰱⱃⱑ ⰸⰵⰿⰻ. ⱄⱐ ⰵⱄⱅⱏ ⱄⰾⱏⰹⱎⱔⰺ ⱄⰾⱁⰲⱁ. ⰺ҅ ⱃⰰⰸⱆⰿⱑⰲⰰⱗ ⰵ. ⰺ ⱂⱃⰻⱀⱁⱄⰻⱅⱏ ⱂⰾⱁⰴⱏⰹ ⱑⰽⱁ ⱂⱁⰴⱁⰱⰰⰵⱅⱏ. ⰺ҅ ⱅⰲⱁⱃⰻⱅⱏ. ⱁⰲⱁ !ⱃ. ⱁⰲⱁ !ⰿ. ⱁⰲⱁ !ⰼ.

ⰺ҅ⱀⱘ ⱂⱃⰻⱅⱏⱍⱘ ⱂⱃⱑⰴⱏⰾⱁⰶⰻ ⰺ҅ⰿⱏ ⰳⰾ҃ⱔ. ⱆⱂⱁⰴⱁⰱⰻ ⱄⱔ ⱌⱃ҃ⱄⱅⰲⰻⰵ ⱀⰱ҃ⱄⰽⱁⰵ. ⱍⰽ҃ⱆ ⱄⱑⰲⱏⱎⱓⰿⱆ ⰴⱁⰱⱃⱁⰵ ⱄⱑⰿⱔ ⱀⰰ ⱄⰵⰾⱑ ⱄⰲⱁⰵⰿⱐ.

ⱄⱏⱂⱔⱎⱅⰵⰿⱏ ⰶⰵ ⱍⰽ҃ⱁⰿⱏ. ⱂⱃⰻⰴⰵ ⰲⱃⰰⰳⱏ ⰵⰳⱁ. ⰺ҅ ⰲⱄⱑ ⱂⰾⱑⰲⰵⰾⱏ. ⱂⱁⱄⱃⱑⰴⱑ ⱂⱐⱎⰵⱀⰻⱌⱔ ⰺ ⱁⱅⰻⰴⰵ.

ⰵⰳⰴⰰ ⰶⰵ ⱂⱃⱁⰸⱔⰱⰵ ⱅⱃⱑⰲⰰ. ⰺ҅ ⱂⰾⱁⰴⱏ ⱄⱏⱅⰲⱁⱃⰻ. ⱅⱏⰳⰴⰰ ⰰⰲⰻ ⱄⱔ ⰺ҅ ⱂⰾⱑⰲⰵⰾⱏ.

ⱂⱃⰻⱎⰵⰴⱏⱎⰵ ⱃⰰⰱⰻ ⰳⱀ҃ⱆ ⱃⱑⱎⱔ. ⰳ҃ⰻ ⱀⰵ ⰴⱁⰱⱃⱁ ⰾⰻ ⱄⱑⰿⱔ ⱄⱑⰾⱏ ⰵⱄⰻ ⱀⰰ ⱄⰵⰾⱑ ⱅⰲⱁⰵⰿⱐ. ⱁⱅⱏⰽⱘⰴⱆ ⱆⰱⱁ ⰺⰿⰰⱅⱏ ⱂⰾⱑⰲⰵⰾⱏ.

ⱁⱀⱏ ⰶⰵ ⱃⰵⱍⰵ ⰺ҅ⰿⱏ ⰲⱃⰰⰳⱏ ⱍⱄ҃ⰽⱏ ⱄⰵ ⱄⱏⱅⰲⱁⱃⰻ. ⱃⰰⰱⰻ ⰶⰵ ⱃⱑⱎⱔ ⰵⰿⱆ. ⱈⱁⱎⱅⰵⱎⰻ ⰾⰻ ⱆⰱⱁ ⰴⰰ ⱎⱐⰴⱏⱎⰵ ⰺ҅ⱄⱂⰾⱑⰲⰵⰿⱏ ⱗ.

ⱁⱀⱏ ⰶⰵ ⱃⰵⱍⰵ ⱀⰻ. ⰵⰴⰰ ⰲⱏⱄⱅⱃⱏⰳⰰⱙⱎⱅⰵ ⱂⰾⱑⰲⰵⰾⱏ. ⰲⱏⱄⱅⱃⱏⰳⱀⰵⱅⰵ ⰽⱆⱂⱏⱀⱁ ⱄⱏ ⱀ̑ⰻⰿⱐ ⰺ҅ ⱂⱐⱎⰵⱀⰻⱌⱘ.

ⱁⱄⱅⰰⰲⰻⱅⰵ ⰽⱆⱂⱏⱀⱁ ⱃⰰⱄⱅⰻ ⱁⰱⱁⰵ ⰴⱁ ⰶⱔⱅⰲⱏⰹ. ⰺ҅ ⰲⱏ ⰲⱃⱑⰿⱔ ⰶⰵⱅⰲⱑ. ⱃⰵⰽⱘ ⰴⱑⰾⰰⱅⰵⰾ̑ⰵⰿⱏ. ⱄⱏⰱⰵⱃⱑⱅⰵ ⱂⱃⱏⰲⱑⰵ. ⱂⰾⱑⰲⰵⰾⱏ. ⰺ҅ ⱄⱏⰲⱔⰶⰰⱅⰵ ⱗ ⰲⱏ ⱄⱀⱁⱂⱏⰹ ⱑⰽⱁ ⰶⰵⱎⱅⰻ ⱗ. ⰰ ⱂⱐⱎⰵⱀⰻⱌⱘ ⱄⱏⰱⰵⱃⱑⱅⰵ ⰲⱏ ⰶⰻⱅⱐⱀⰻⱌⱘ ⰿⱁⱙ.

Ⰺⱀⱘ ⱂⱃⰻⱅⱏⱍⱘ ⱂⱃⱑⰴⱏⰾⱁⰶⰻ ⰺ҅ⰿⱏ ⰳⰾ̑ⱔ. ⱂⱁⰴⱁⰱⱐⱀⱁ ⰵⱄⱅⱏ ⱌⱃ҃ⱄⱁ ⱀⰱ҃ⱄⰽⱁⰵ. ⰸⱃⱏⱀⱆ ⰳⱁⱃⱓⱎⱐⱀⱆ. ⰵⰶⰵ ⰲⱐⰸⱐⰿⱏ ⱍⰽ҃ⱏ ⰲⱐⱄⱑⱑ ⱀⰰ ⱄⰵⰾⱑ ⱄⰲⱁⰵⰿⱐ.

ⰵⰶⰵ ⰿⱐⱀ̑ⰵ ⰵⱄⱅⱏ ⰲⱄⱑⱈⱏ ⱄⱑⰿⰵⱀⱏ. ⰵⰳⰴⰰ ⰶⰵ ⰲⱏⰸⰴⱃⰰⱄⱅⰵⱅⱏ. ⰱⱁⰾ̑ⰵ ⰵⱄⱅⱏ ⰸⰵⰾ̑ⰻⰹ. ⰺ҅ ⰱⱏⰹⰲⰰⰵⱅⱏ ⰴⱃⱑⰲⱁ. ⱑⰽⱁ ⱂⱃⰻⱅⰻ ⱂⱅⰻⱌⰰⰿⱏ ⱀⰱ҃ⱄⰽⱏⰺⰿⱏ. ⰺ҅ ⰲⰻⱅⰰⱅⰻ ⱀⰰ ⰲⱑⱅⱐⱈⱏ ⰵⰳⱁ.

ⰺ҅ⱀⱘ ⱂⱃⰻⱅⱏⱍⱘ ⰳⰾ҃ⰰ ⰺⰿⱏ. ⱂⱁⰴⱁⰱⱐⱀⱁ ⰵⱄⱅⱏ ⱌⱃ҃ⱄⱁ ⱀⰱ҃ⱄⰽⱁⰵ. ⰽⸯⰲⰰⱄⱆ. ⰺ҅ⰶⰵ ⰲⱐⰸⱐⰿⱏⱎⰻ ⰶⰵⱀⰰ ⱄⱏⰽⱃⱏⰹ ⰲⱏ ⰿⱘⱌⱑ ⱅⱃⰹⰻ ⱄ[ⰰ]ⱅⱏ. ⰴⱁⱀⱐⰴⰵⰶⰵ ⰲⱏⱄⰽⱏⰹⱄⱑ ⰲⱐⱄⰰ.

Ⰲⱐⱄⱑ ⱄⰻ ⰳⰾ҃ⰰ ⰻⱄ҃. ⱂⱃⰻⱅⱏⱍⰰⰿⰻ ⰽⱏ ⱀⰰⱃⱁⰴⱁⰿⱏ. ⰺ҅ ⰱⰵⱄ ⱂⱃⰻⱅⱏⱍⱔ ⱀⰻⱍⱐⱅⱁⰶⰵ ⰳⰾ҃ⰰⱎⰵ ⰽⱏ ⱀ̑ⰻⰿⱏ.

ⰴⰰ ⱄⱏⰱⱘⰴⰵⱅⱏ ⱄⱔ ⱃⰵⱍⰵⱀⱁⰵ ⱂⱃⱁⱃⱁⰽⱁⰿⱐ ⰳⰾ̑ⱙⱎⱅⰵⰿⱐ. ⱁⱅⰲⱃⱏⰸⱘ ⰲⱏ ⱂⱃⰻⱅⱏⱍⰰⱈⱏ ⱆⱄⱅⰰ ⰿⱁⱑ. ⱁⱅⱏⰽⱃⱏⰹⱙ ⱄⱏⰽⱃⱏⰲⰵⱀⰰⱑ. ⱁⱅⱏ ⱄⱏⰾⱁⰶⰵⱀⰻⱑ ⰲⱐⱄⰵⰳⱁ ⰿⰻⱃⰰ.

ⱅⱏⰳⰴⰰ ⱁⱄⱅⰰⰲⱐ ⱀⰰⱃⱁⰴⱏⰹ ⰺ҅ⰴⰵ ⰲⱏ ⰴⱁⰿⱏ ⰻⱄ҃. ⰺ҅ ⱂⱃⰻⱄⱅⱘⱂⰻⱎⱔ ⰽⱏ ⱀ̑ⰵⰿⱆ ⱆⱍⰵⱀⰻⱌⰻ ⰵⰳⱁ ⰳⰾ̑ⱙⱎⱅⰵ. ⱄⱏⰽⰰⰶⰻ ⱀⰰⰿⱏ ⱂⱃⰻⱅⱏⱍⱘ ⱂⰾⱑⰲⰵⰾⱏ ⱄⰵⰾⱏⱀⱏⰺⱈⱏ.

ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰺ҅ⰿⱏ. ⰲⱏⱄⱑⰰⰲⱏ ⰴⱁⰱⱃⱁⰵ ⱄⱑⰿⱔ ⰵⱄⱅⱏ ⱄⱀ҃ⱏ ⱍⰽ҃ⱏⰺ.

ⰰ ⱄⰵⰾⱁ ⰵⱄⱅⱏ ⰲⱄⱐ ⰿⰻⱃⱏ. ⰴⱁⰱⱃⱁⰵ ⰶⰵ ⱄⱑⰿⱔ ⰵⱄⱅⱏ ⱄⱀ҃ⱁⰲⰵ ⱌⱃ҃ⱄⱅⰲⰻⱑ. ⰰ ⱂⰾⱑⰲⰵⰾⱏ ⱄⱘⱅⱏ ⱄⱀ҃ⱁⰲⰵ ⱀⰵⱂⱃⰻⱑⰸⱀⰻⱀⰻ.

ⰰ ⰲⱃⰰⰳⱏ ⰵⱄⱅⱏ ⰲⱐⱄⱑⰰⰲⱏⰹ ⱂⰾⱑⰲⰵⰾⱏ ⰴⰻⱑⰲⱁⰾⱏ. ⰰ ⰶⱔⱅⰲⰰ ⰵⱄⱅⱏ ⰽⱁⱀⱐⱍⰰⱀⰻⰵ ⰲⱑⰽⱆ. ⰰ ⰶⱔⱅⰵⰾ̑ⰵ ⱄⱘⱅⱏ ⰰⰼ҃ⰾⰻ.

ⱑⰽⱁ ⱆⰴⱁⰱⱐ ⱄⱏⰱⰻⱃⰰⱙⱅⱏ ⱂⰾⱑⰲⰵⰾⱏⰹ. ⱑⰽⱁ ⱁⰳⱀ̑ⰵⰿⱐ ⱄⱏⰶⰻⰸⰰⱙⱅⱏ. ⱅⰰⰽⱁ ⰱⱘⰴⰵⱅⱏ ⰲⱏ ⱄⱏⰽⱁⱀⱐⱍⰰⱀⰻⰵ ⰲⱑⰽⰰ ⱄⰵⰳⱁ.

ⱂⱁⱄⱏⰾ̑ⰵⱅⱏ ⱄⱀ҃ⱏ ⱍⱄⰽⱏⰺ. ⰰⰼ҃ⰾⱏⰹ ⱄⰲⱁⱗ. ⰺ҅ ⱄⱏⰱⰵⱃⱘⱅⱏ ⱁⱅⱏ ⱌⱃ҃ⱄⰻⱑ ⰵⰳⱁ. ⰲⱄⱔ ⱄⱏⰱⰾⰰⰸⱀⱏⰹ. ⰺ҅ ⱅⰲⱁⱃⱔⱎⱅⱔⱗ ⰱⰵⰸⰰⰽⱁⱀⰻⰵ.

ⰺ҅ ⰲⱏⰲⱃⱏⰳⱘⱅⱏ ⱗ ⰲⱏ ⱂⰵⱎⱅⱐ ⱁⰳⱀ̑ⱐⱀⱁⱙ. ⱅⱆ ⰱⱘⰴⰵⱅⱏ ⱂⰾⰰⱍⱐ ⰺ҅ ⱄⰽⱃⱐⰶⱐⱅⱏ ⰸⱘⰱⱁⰿⱏ.

ⱅⱏⰳⰴⰰ ⱂⱃⰰⰲⰵⰴⱐⱀⰻⰹ ⱂⱃⱁⱄⰲⱐⱅⱔⱅⱏ ⱄⱔ ⱑⰽⱁ ⱄⰾⱏⱀⱌⰵ. ⰲⱏ ⱌⱃ҃ⱄⱅⰲⰻⰹ ⱁⱌ҃ⰰ ⰺⱈⱏ. ⰺ҅ⰿⱑⱗⰻ ⱆⱎⰻ ⱄⰾⱏⰹⱎⰰⱅⰻ. ⰴⰰ ⱄⰾⱏⰹⱎⰻⱅⱏ.

Ⱂⰰⰽⱏⰹ ⱂⱁⰴⱁⰱⱐⱀⱁ ⰵⱄⱅⱏ ⱌⱃ҃ⱄⱅⰲⰻⰵ ⱀⰵⰱ҃ⱄⰽⱁⰵ. ⱄⱏⰽⱃⱁⰲⰻⱎⱅⱓ ⱄⱏⰽⱃⱏⰲⰵⱀⱆ ⱀⰰ ⱄⰵⰾⱑ ⰵⰶⰵ ⱁⰱⱃⱑⱅⱏ ⱍⰽ҃ⱏ ⱄⱏⰽⱃⱏⰹ. ⰺ҅ ⱁⱅⱏ ⱃⰰⰴⱁⱄⱅⰻ ⰵⰳⱁ ⰺ҅ⰴⰵⱅⱏ. ⰺ҅ ⰲⱄⰵ ⰵⰾⰻⰽⱁ ⰺ҅ⰿⰰⱅⱏ ⱂⱃⱁⰴⰰⰵⱅⱏ. ⰺ҅ ⰽⱆⱂⱆⰵⱅⱏ ⱄⰵⰾⱁ ⱅⱁ.

Ⱂⰰⰽⱏⰹ ⱂⱁⰴⱁⰱⱐⱀⱁ ⰵⱄⱅⱏ ⱌⱃ҃ⱄⱅⰲⰻⰵ ⱀⰵⰱ҃ⱄⰽⱁⰵ. ! ⱍⰽⱆ ⰽⱆⱂⱐⱌⱆ. ⰺ҅ⱎⱅⱘⱎⱅⱓ ⰴⱁⰱⱃⰰ ⰱⰻⱄⱏⱃⰰ.

ⰺ҅ⰶⰵ ⱁⰱⱃⱑⱅⱏ ⰵⰴⰻⱀⱏ ⰿⱀⱁⰳⱁⱌⱑⱀⱀⱐ ⰱⰻⱄⱐⱃⱏ. ⱎⱐⰴⱏ ⱂⱃⱁⰴⰰ ⰲⱄⰵ ⰺ҅ⰿⱑⱀⰻⰵ ⰺ҅ ⰽⱆⱂⰻ ⰵ.

Ⱂⰰⰽⱏⰹ ⱂⱁⰴⱁⰱⱐⱀⱁ ⰵⱄⱅⱏ ⱌⱃ҃ⱄⱅⰲⰻⰵ ⰱⰶ҃ⰻⰵ ⱀⰵⰲⱁⰴⱆ. ⰲⱏⰲⱃⱏⰶⰵⱀⱆ ⰲⱏ ⰿⱁⱃⰵ. ⰺ҅ ⱁⱅⱏ ⰲⱄⱑⰽⱁⰳⱁ ⱃⱁⰴⰰ ⱄⱏⰱⱏⱃⰰⰲⱏⱎⱓ.

ⰺ҅ⰸⰵ ⰵⰳⰴⰰ ⰺ҅ⱄⱂⰾⱏⱀⰻ ⱄⱔ. ⰺ҅ⰸⰲⰾⱏⰽⱏⱎⰵ ⰹ ⱀⰰ ⰽⱃⰰⰻ. ⰺ҅ ⱄⱑⰴⱏⱎⰵ ⰺⰸⰱⱏⱃⰰⱎⱔ ⰴⱁⰱⱃⱏⰹⱗ ⰲⱏ ⱄⱏⱄⱘⰴⱏⰹ. ⰰ ⰸⱏⰾⱏⰹⱗ ⰺ҅ⰸⰲⱃⱏⰳⱁⱎⱔ ⰲⱏⱀⱏ.

ⱅⰰⰽⱁ ⰱⱘⰴⰵⱅⱏ ⰲⱏ ⱄⱏⰽⱁⱀⱐⱍⰰⱀⰻⰵ ⰲⱑⰽⰰ. ⰺ҅ⰸⰻⰴⱘⱅⱏ ⰰⰼ҃ⰾⰻ. ⰺ҅ ⱁⱅⱏⰾⱘⱍⱔⱅⱏ ⰸⱏⰾⱏⰹⱗ. ⱁⱅⱏ ⱄⱃⱑⰴⱏⰹ. ⱂⱃⰰⰲⰵⰴⱏⱀⱏⰺⱈⱏ.

ⰺ҅ ⰲⱏⰲⱃⱏⰳⱘⱅⱏ ⱗ ⰲⱐ ⱂⰵⱎⱅⱐ ⱁⰳⱀ̑ⱐⱀⱘ. ⱅⱆ ⰱⱘⰴⰵⱅⱏ ⱂⰾⰰⱍⱐ ⰺ҅ ⱄⰽⱃⱐⰶⱐⱅⱏ ⰸⱘⰱⱁⰿⱏ.

ⰳⰾ҃ⰰ ⰺ҅ⰿⱏ ⰻⱄ. ⱃⰰⰸⱆⰿⱑⰵⱅⰵ ⰾⰻ ⰲⱄⱑ ⱄⰻ. ⰳⰾ҃ⰰⱎⱔ ⰵⰿⱆ ⰵⰹ ⰳ҃ⰻ.

ⰻⱄ҃ ⰶⰵ ⱃⰵⱍⰵ ⰺ҅ⰿⱏ. ⱄⰵⰳⱁ ⱃⰰⰴⰻ ⰲⱐⱄⱑⰽⱏ ⰽⱏⱀⰻⰶⱐⱀⰻⰽⱏ. ⱀⰰⱆⱍⱐ ⱄⱔ ⱌⱃ҃ⱄⱅⰲⰻⱓ ⱀⰵⰱ҃ⱄⰽⱆⰿⱆ. ⱂⱁⰴⱁⰱⱐⱀⱏ ⰵⱄⱅⱏ ⱍⰽ҃ⱆ ⰴⱁⰿⱁⰲⰻⱅⱆ. ⰺ҅ⰶⰵ ⰺⰸⱀⱁⱄⰻⱅⱏ ⱁⱅⱏ ⱄⱏⰽⱃⱁⰲⰻⱎⱅⰰ ⱄⰲⱁⰵⰳⱁ ⱀⱁⰲⰰⱑ ⰺ҅ ⰲⰵⱅⱏⱈⰰⱑ.

Ⰺ ⰱⱏⰹ!ⱄ ⰵⰳⰴⰰ ⱄⱏⰽⱁⱀⱐⱍⰰ ⰻⱄ҃ ⱂⱃⰻⱅⱏⱍⱔ ⱄⰻⱗ. ⱂⱃⱑⰺⰴⰵ ⱁⱅⱏⱅⱘⰴⱑ.

ⰺ҅ ⱂⱃⰻⱎⱐⰴⱏ ⰲⱏ ⱁⱅⱐⱍⱐⱄⱅⰲⰻⰵ ⱄⰲⱁⰵ. ⱆⱍⰰⱎⰵ ⱗ ⱀⰰ ⱄⱏⱀⱏⰿⰻⱎⱅⰻⱈⱏ ⰺ҅ⱈⱏ. ⱑⰽⱁ ⰴⰻⰲⰾ̑ⱑⰰⱈⱘ ⱄⱔ ⰵⰿⱆ ⰺ҅ ⰳⰾ҃ⰰⱈⱘ. ⱁⱅⱏⰽⱘⰴⱑ ⱄⰵⰿⱆ ⰵⱄⱅⱏ ⱂⱃⱑⰿⱘⰴⱃⱁⱄⱅⱐ ⱄⰻ ⰺ҅ ⱄⰻⰾⰰ.

ⱀⰵ ⱄⱐ ⰾⰻ ⰵⱄⱅⱏ ⱅⰵⰽⱅⱁⱀⱁⰲⱏ ⱄⱀ҃ⱏ. ⱀⰵ ⰿⰰⱅⰻ ⰾⰻ ⰵⰳⱁ ⱀⰰⱃⰻⱌⰰⰵⱅⱏ ⱄⱔ ⰿⰰⱃⰻⱑ. ⰺ҅ ⰱⱃⰰⱅⱃⰻⱑ ⰵⰳⱁ ⰺ҅ⱑⰽⱁⰲⱏ. ⰺ҅ ⱁⱄⰻⱇⱏ. ⰺ҅ ⱄⰻⰿⱁⱀⱏ. ⰺ҅ ⱓⰴⰰ.

ⰺ҅ ⱄⰵⱄⱅⱃⱏⰹ ⰵⰳⱁ. ⱀⰵ ⰲⱐⱄⰻ ⰾⰻ ⰲⱏ ⱀⰰⱄⱏ ⱄⱘⱅⱏ. ⱁⱅⱏⰽⱘⰴⱆ ⱆⰱⱁ ⱄⰵⰿⱆ ⰲⱄⱑ ⱄⰻ ⱄⱘⱅⱏ.

Ⰺ ⰱⰾⰰⰶⱀⱑⰰⱈⱘ ⱄⱔ ⱁ ⱀ̑ⰵⰿⱐ. ⰻⱄ҃ ⰶⰵ ⱃⰵⱍⰵ ⰺ҅ⰿⱏ. ⱀⱑⱄⱅⱏ ⱂⱃⱁⱃⱁⰽⱏ ⰱⰵⱍⱐⱄⱅⰻⰹ. ⱅⱏⰽⰿⱁ ⰲⱏ ⱄⰲⱁⰵⰿⱐ !ⱁⱅⱍⱄⱅⰲⰻ. ⰺ҅ ⰲⱏ ⰴⱁⰿⱆ ⱄⰲⱁⰵⰿⱐ. ⰺ҅ ⱀⰵ ⱄⱏⱅⰲⱁⱃⰻ ⱅⱆ ⱄⰻⰾⱏ ⰿⱀⱁⰳⱏ. ⰸⰰ ⱀⰵⰲⱑⱃⱐⱄⱅⰲⰻⰵ ⰺ҅ⱈⱏ.