ЕВАНГЕЛИЕ ЕЖЕ Ѿ МАТѲЕꙖ
10:1
Ⰺ ⱂⱃⰻⰸⱏⰲⰰⰲⱏ ⱁⰱⰰ ⱀⰰ ⰴⰵⱄⱔⱅⰵ ⱆⱍⰵⱀⰻⰽⰰ ⱄⰲⱁⱑ. ⰴⰰⱄⱅⱏ ⰺ҅ⰿⱏ ⰲⰾⰰⱄⱅⱐ. ⱀⰰ ⰴⱆⱄⱑⱈⱏ ⱀⰵⱍⰻⱄⱅⱏⰹⱈⱏ. ⰴⰰ ⰺⰸⰳⱁⱀⱔⱅⱏ ⱗ. ⰺ҅ ⰻⱌⱑⰾⱔⱅⱏ ⰲⱐⱄⱑⰽⱏ ⱀⰵⰴⱘⰳⱏ. ⰺ҅ ⰲⱐⱄⱑⰽⱘ ⰱⱁⰾⱑⰸⱀⱐ.
10:2
Ⱉⰱⱑⰿⰰ ⰶⰵ ⱀⰰ ⰴⰵⱄⱔⱅⰵ ⰰⱂ҃ⱁⰾⱁⰿⰰ. ⰺ҅ⰿⰵⱀⰰ ⱄⱘⱅⱏ ⱄⰻ. ⱂⱃⱏⰲⱏⰺ ⰶⰵ ⱄⰻⰿⱁⱀⱏ ⰺ҅ⰶⰵ ⱀⰰⱃⰻⱌⰰⰵⱅⱏ ⱄⱔ ⱂⰵⱅⱃⱐ. ⰺ҅ ⰰⱀⸯⰴⱃⱑⰰ. ⰱⱃⰰⱅⱏ ⰵⰿⱆ.
10:3
ⱇⰻⰾⰻⱂⱏ. ⰺ҅ ⰲⰰⱃⸯⱅⱁⰾⱁⰿⱑⰻ. ⰺ҅ ⱅⸯⱁⰿⰰ. ⰺ҅ ⰿⰰⱅⸯⱅⰵⰻ ⰿⱏⰹⱅⰰⱃⱐ. ⰺ҅ⱑⰽⱁⰲⱏ ⰰⰾⱇⸯⰵⱁⰲⱏ. ⰺ҅ ⰽⰵⰾⰵⰲⰵⰻ ⱀⰰⱃⰵⱍⰵⱀⱏⰺ ⱅⰰⰴⰵⰻ.
10:4
ⱄⰻⰿⱁⱀⱏ ⰽⰰⱀⰰⱀⱑⰹ. ⰺ҅ ⱓⰴⰰ ⰺ҅ⱄⰽⰰⱃⰻⱁⱅⱐⱄⰽⱏⰺ. ⰺ҅ⰶⰵ ⰺ ⱂⱃⱑⰴⰰⱄⱅⱏ.
10:5
Ⱄⰻⱗ ⱁⰱⰰ ⱀⰰ ⰴⰵⱄⱔⱅⰵ ⱂⱁⱄⱏⰾⰰ ⰻⱄ҃. ⰸⰰⱂⱁⰲⱑⰴⱑⰲⱏ ⰺ҅ⰿⱏ. ⰳⰾ҃ⱔ. ⱀⰰ ⱂⱘⱅⱐ ⱗⰸⱏⰹⰽⱁⰿⱏ ⱀⰵ ⰺⰴⱑⱅⰵ. ⰺ҅ ⰲⱏ ⰳⱃⰰⰴⱏ ⱄⰰⰿⰰⱃⱑⱀⱏ ⱀⰵ ⰲⱏⱀⰻⰴⱑⱅⰵ.
10:6
ⰺ҅ⰴⱑⱅⰵ ⰶⰵ ⱂⰰⱍⰵ ⰽⱏ ⱁⰲⱐⱌⰰⰿⱏ ⱂⱁⰳⱏⰹⰱⱏⱎⰻⰹⰿⱏ ⰴⱁⰿⱆ ⰺⰾ҃ⰵⰲⰰ.
10:7
ⱈⱁⰴⱔⱎⱅⰵ ⰶⰵ ⱂⱃⱁⱂⱁⰲⱑⰴⰰⰺⱅⰵ ⰳⰾ҃ⱙⱎⱅⰵ. ⱑⰽⱁ ⱂⱃⰻⰱⰾⰻⰶⰻ ⱄⱔ ⱌⱃ҃ⱄⰻⰵ ⱀⰵⰱ҃ⱄⰽⱁⰵ.
10:8
Ⰱⱁⰾⱔⱎⱅⱔⱗ ⰺ҅ⱌⱑⰾⰻⱅⰵ. ⰿⱃⱏⱅⰲⱏⰹⱗ ⰲⱏⱄⰽⱃⱑⱎⰰⰻⱅⰵ. ⱂⱃⱁⰽⰰⰶⰵⱀⱏⰹⱗ ⱁⱍⰻⱎⱅⰰⰻⱅⰵ. ⰱⱑⱄⱏⰹ ⰺⰸⰳⱁⱀⰻⱅⰵ. ⱅⱆⱀⰵ ⱂⱃⰻⱗⱄⱅⰵ. ⱅⱆⱀⰵ ⰶⰵ ⰴⰰⰴⰻⱅⰵ.
10:9
Ⱀⰵ ⱄⱏⱅⱔⰶⰻⱅⰵ ⰸⰾⰰⱅⰰ ⱀⰻ ⱄⱏⱃⰵⰱⱃⰰ. ⱀⰻ ⰿⱑⰴⰻ ⱂⱃⰻ ⱂⱁⱑⱄⱑⱈⱏ ⰲⰰⱎⰻⱈⱏ.
10:10
ⱀⰻ ⰿⱁⱎⱐⱀⱏⰹ ⱀⰰ ⱂⱘⱅⰻ. ⱀⰻ ⰴⱏⰲⱁⱓ ⱃⰻⰸⱆ ⱀⰻ ⱄⰰⱂⱁⰳⱏ ⱀⰻ....ⰰ. ⰴⱁⱄⱅⱁⰺⱀⱏ ⰱⱁ ⰵⱄⱅⱏ ⰴⱑⰾⰰⱅⰵⰾⱐ ⱂⰻⱎⱅⱔ ⱄⰲⱁⰵⱗ.
10:11
Ⰲⱏ ⱀ̑ⱐⰶⰵ ⰽⱁⰾⰻⰶⰴⱁ ⰳⱃⰰⰴⱏ ⰾⰻ ⰲⱏ ⰲⱐⱄⱐ ⰲⱐⱀⰻⰴⰵⱅⰵ. ⰺ҅ⱄⱂⱏⰹⱅⰰⰺⱅⰵ. ⰽⱏⱅⱁ ⰲⱐ ⱀ̑ⰵⰿⱐ ⰴⱁⱄⱅⱁⰺⱀⱏ ⰵⱄⱅⱏ. ⰺ҅ ⱅⱆ ⱂⱃⱑⰱⱘⰴⱑⱅⰵ ⰴⱁⱀⱐⰴⰵⰶⰵ ⰺ҅ⰸⰻⰴⰵⱅⰵ.
10:12
ⰲⱏⱈⱁⰴⱔⱎⱅⰵ ⰶⰵ ⰲⱏ ⰴⱁⰿⱏ ⱌⱑⰾⱆⰺⱅⰵ ⰻ.
10:13
Ⰺ ⰰⱎⱅⰵ ⱆⰱⱁ ⰱⱘⰴⰵⱅⱏ ⰴⱁⰿⱏ ⰴⱁⱄⱅⱁⰺⱀⱏ. ⱂⱃⰻⰴⰵⱅⱏ ⰿⰻⱃⱏ ⰲⰰⱎⱐ ⱀⰰ ⱀ̑ⱐ. ⰰⱎⱅⰵ ⰾⰻ ⰶⰵ ⱀⰵ ⰱⱘⰴⰵⱅⱏ ⰴⱁⱄⱅⱁⰺⱀⱏ. ⰿⰻⱃⱏ ⰲⰰⱎⱐ ⰽⱏ ⰲⰰⰿⱏ ⰲⱏⰸⰲⱃⰰⱅⰻⱅⱏ ⱄⱔ.
10:14
Ⰺ ⰻⰶⰵ ⰽⱁⰾⰻⰶⱐⰴⱁ ⱀⰵ ⱂⱃⰻⰿⰵⱅⱏ ⰲⰰⱄⱏ. ⱀⰻ ⱂⱁⱄⰾⱆⱎⰰⱙⱅⱏ ⱄⰾⱁⰲⰵⱄⱏ ⰲⰰⱎⰻⱈⱏ. Ⰺⱄⱈⱁⰴⱔⱎⱅⰵ ⰺ҅ⰸ ⰴⱁⰿⱆ. ⰾⰻ ⰺ҅ⰸ ⰳⱃⰰⰴⰰ ⱅⱁⰳⱁ. ⱁⱅⱏⱅⱃⱔⱄⱑⱅⰵ. ⱂⱃⰰⱈⱏ ⱁⱅⱏ ⱀⱁⰳⱏ ⰲⰰⱎⰻⱈⱏ.
10:15
ⰰⰿⰻⱀ ⰳⰾ̑ⱙ ⰲⰰⰿⱏ. ⱁⱅⱏⱃⰰⰴⱐⱀⱑⰵ ⰱⱘⰴⰵⱅⱏ ⰸⰵⰿⰻ ⱄⱁⰴⱁⰿⱐⱄⱌⱑ. ⰺ҅ ⰸⰵⰿⰻ ⰳⱁⰿⱁⱃⱄⱌⱑ. ⰲⱏ ⰴⱐⱀⱐ ⱄⱘⰴⱏⱀⱏⰺ ⱀⰵⰶⰵ ⰾⰻ ⰳⱃⰰⰴⱆ ⱅⱁⰿⱆ.
10:16
Ⱄⰵ ⰰⰸⱏ ⱄⱏⰾ̑ⱙ ⰲⱏⰹ. ⱑⰽⱁ ⱁⰲⸯⱌⱔ ⱂⱁⱄⱃⱑⰴⱑ ⰲⰾⱐⰽⱏ. ⰱⱘⰴⱑⱅⰵ ⰶⰵ ⰿⱘⰴⱃⰻ ⰰⰽⱏⰹ ⰸⰿⰻⱗ. ⰺ҅ ⱌⱑⰾⰻ ⱑⰽⱁ ⰺ҅ ⰳⱁⰾⱘⰱⰻⰵ.
10:17
ⰲⱏⱀⰵⰿⰾ̑ⱑⱅⰵ ⰶⰵ ⱁⱅⱏ ⱍⰽ҃ⱏ. ⱂⱃⱑⰴⰰⰴⱔⱅⱏ ⰱⱁ ⰲⱏⰹ ⱀⰰ ⱄⱏⱀⱏⰿⱏⰹ. ⰺ ⱀⰰ ⱄⱏⱀⱏⰿⰻⱎⱅⰻⱈⱏ ⰲⰰⱎⰻⱈⱏ. ⱆⰱⱐⱙⱅⱏ ⰲⱏⰹ.
10:18
ⰺ҅ ⱂⱃⱑⰴⱏ ⰲⰾⰰⰴⱏⰹⰽⱏⰹ ⰶⰵ ⰺ ⱌⱃ҃ⱔ. ⰲⰵⰴⰵⱀⰻ ⰱⱘⰴⰵⱅⰵ ⰿⰵⱀⰵ ⱃⰰⰴⰻ. ⰲⱏ ⱄⱏⰲⱑⰴⱑⱀⰻⰵ ⰺ҅ⰿⱏ. ⰺ҅ ⱗⰸⱏⰹⰽⱁⰿⱏ.
10:19
Ⰵⰳⰴⰰ ⰶⰵ ⱂⱃⱑⰴⰰⰴⱔⱅⱏ ⰲⱏⰹ. ⱀⰵ ⱂⱌⱑⱅⰵ ⱄⱔ ⰽⰰⰽⱁ ⰾⰻ ⱍⱐⱅⱁ ⰲⱏⰸⰳⰾ҃ⰵⱅⰵ. ⰴⰰⱄⱅⱏ ⰱⱁ ⱄⱔ ⰲⰰⰿⱏ ⰲⱏ ⱅⱏ ⱍⰰⱄⱏ. ⱍⱐⱅⱁ ⰳⰾ҃ⰵⱅⰵ.
10:20
ⱀⰵ ⰲⱏⰹ ⰱⱁ ⰵⱄⱅⰵ ⰳⰾ҃ⱙⱎⱅⰵⰹ. ⱀⱏ ⰴⱈ҃ⱏ ⱁⱌ҃ⰰ ⰲⰰⱎⰵⰳⱁ ⰳⰾ҃ⱔⰻ ⰲⱏ ⰲⰰⱄⱏ.
10:21
ⱂⱃⱑⰴⰰⱄⱅⱏ ⰶⰵ ⰱⱃⰰⱅⱏ ⰱⱃⰰⱅⰰ ⱀⰰ ⱄⱏⰿⱃⱏⱅⱐ. ⰺ҅ ⱁⱌ҃ⱐ ⱍⱔⰴⱁ. ⰺ҅ ⰲⱏⱄⱅⰰⱀⱘⱅⱏ ⱍⱔⰴⰰ ⱀⰰ ⱃⱁⰴⰻⱅⰵⰾ̑ⱔ. ⰺ҅ ⱆⰱⰻⱙⱅⱏ ⱗ.
10:22
ⰺ҅ ⰱⱘⰴⰵⱅⰵ ⱀⰵⱀⰰⰲⰻⰴⰻⰿⰻ ⰲⱄⱑⰿⰻ. ⰺ҅ⰿⰵⱀⰵ ⰿⱁⰵⰳⱁ ⱃⰰⰴⰻ. ⱂⱃⱑⱅⱃⱏⱂⱑⰲⱏⰹ ⰶⰵ ⰴⱁ ⰽⱁⱀⱌⰰ ⱄⱂ҃ⰵⱀⱏ ⰱⱘⰴⰵⱅⱏ: !ⰽⱁ!ⱀ
10:23
Ⰵⰳⰴⰰ ⰶⰵ ⰳⱁⱀⱔⱅⱏ ⰲⱏⰹ ⰲⱏ ⰳⱃⰰⰴⱑ ⱄⰵⰿⱐ. ⰱⱑⰳⰰⰻⱅⰵ ⰲⱏ ⰴⱃⱆⰳⱏⰺ. ⰰⰿⰻⱀⱐ ⰱⱁ ⰳⰾ̑ⱙ ⰲⰰⰿⱏ. ⱑⰽⱁ ⱀⰵ ⰺ҅ⰿⰰⱅⱏ ⰺ҅ⱄⰽⱁⱀⱐⱍⰰⱅⰻ ⱄⱔ ⰳⱃⰰⰴⱏ ⰺⰾ҃ⰵⰲⱏ. ⰴⱁⱀⸯⰴⰵⰶⰵ ⱂⱃⰻⰴⰵⱅⱏ ⱄⱀ҃ⱏ ⱍⱄ҃ⰽⱏⰺ:
10:24
Ⱀⱑⱄⱅⱏ ⱆⱍⰵⱀⰻⰽⱏ ⱀⰰⰴⱏ ⱆⱍⰻⱅⰵⰾ̑ⰵⰿⱐ. ⱀⰻ ⱃⰰⰱⱏ ⱀⰰⰴⱏ ⰳⰿ҃ⱐ ⱄⰲⱁⰺⰿⱐ.
10:25
ⰴⱁⰲⱐⰾ̑ⰵⱅⱏ ⱆⱍⰵⱀⰻⰽⱆ ⰴⰰ ⰱⱘⰴⰵⱅⱏ ⱑⰽⱁⰶⰵ ⰺ҅ ⱆⱍⰻⱅⰵⰾ̑ⱐ ⰵⰳⱁ. ⰺ ⱃⰰⰱⱆ ⱑⰽⱁⰶⰵ ⰺ҅ ⰳ҃ⱐⱀⱏ ⰵⰳⱁ. ⰰⱎⱅⰵ ⰳⰻ҃ⱀⰰ ⰴⱁⰿⱆ ⰲⰵⰾⱐⰸⱑⰲⱁⰾⰰ ⱀⰰⱃⱑⱎⱔ. ⰽⱁⰾⰿⰻ ⱂⰰⱍⰵ ⰴⱁⰿⰰⱎⱐⱀ̑ⱗⱗ ⰵⰳⱁ.
10:26
ⱀⰵ ⱆⰱⱁⰺ҅ⱅⰵ ⱄⱔ ⰺ҅ⱈⱏ: !ⰸⰰ!ⱍ Ⱀⰻⱍⱐⱅⱁⰶⰵ ⰱⱁ ⰵⱄⱅⱏ ⱂⱁⰽⱃⱏⰲⰵⱀⱁ ⰵⰶⰵ ⱀⰵ ⱁⰽⱃⱏⰲⰵⱀⱁ ⰱⱘⰴⰵⱅⱏ. ⱅⰰⰺⱀⱁ ⰵⰶⰵ ⱀⰵ ⱆⰲⱑⰴⱑⱀⱁ ⰱⱘⰴⰵⱅⱏ.
10:27
Ⰵⰶⰵ ⰳⰾ̑ⱙ ⰰⰸⱏ ⰲⱏ ⱅⱏⰿⱑ. ⱃⱐⱌⱑⱅⰵ ⰲⱏ ⱄⰲⱑⱅⱑ. ⰺ҅ ⰵⰶⰵ ⰲⱏ ⱆⱈⱁ ⱄⰾⱏⰹⱎⰻⱅⰵ. ⱂⱃⱁⱂⱁⰲⱑⰴⰻⱅⰵ ⱀⰰ ⰽⱃⱁⰲⱑⱈⱏ.
10:28
ⰺ҅ ⱀⰵ ⱆⰱⱁⰺⱅⰵ ⱄⱔ ⱆⰱⰻⰲⰰⱙⱎⱅⰻⰹⱈⱏ ⱅⱑⰾⱁ. ⰰ ⰴⱎ҃ⱔ ⱀⰵ ⰿⱁⰳⱘⱎⱅⱐ ⱆⰱⰻⱅⰻ. ⱆⰱⱁⰻⱅⰵ ⱄⱔ ⱂⰰⱍⰵ ⰿⱁⰳⱘⱎⱅⰰⰰⰳⱁ. ⰺ҅ ⰴⱎ҃ⱘ ⰺ ⱅⱑⰾⱁ ⱂⱁⰳⱆⰱⰻⱅⰻ ⰲⱏ ⰼⰵⱁⱀⱑ.
10:29
ⱀⰵ ⰴⱐⰲⱑ ⰾⰻ ⱂⱅⰻⱌⰻ ⱂⱑⱀⱔⰸⱆ ⰲⱑⱀⰻⱅⰵ ⱄⱔ. ⰺ҅ ⰵⰴⰻⱀⰰ ⰶⰵ ⱁⱅⱏ ⱀ̑ⰵⱓ ⱀⰵ ⱂⰰⰴⰵⱅⱏ ⱀⰰ ⰸⰵⰿⰻ. ⰱⰵⰸⱁ ⱁⱌ҃ⰰ ⰲⰰⱎⰵⰳⱁ.
10:30
ⰲⰰⰿⱏ ⰶⰵ ⰺ҅ ⰲⰾⰰⱄⰻ ⰳⰾⰰⰲⱏⰹ. ⰲⱄⰻ ⰺ҅ⱎⱅⱐⱅⰵⱀⰻ ⱄⱘⱅⱏ.
10:31
ⱀⰵ ⱆⰱⱁⰺⱅⰵ ⱄⱔ ⱆⰱⱁ ⰿⱀⱁⰸⱑⱈⱏ ⱂⱅⰻⱌⱐ ⰾⱆⱍⱐⱎⰵ ⰵⱄⱅⰵ ⰲⱏⰹ. !ⰽⱁ!ⱀ. !ⰸⰰ!ⱍ.
10:32
Ⰲⱐⱄⱑⰽⱏ ⱆⰱⱁ. ⰺ҅ⰶⰵ ⰺ҅ⱄⱂⱁⰲⱑⱄⱅⱏ ⰿⱔ ⱂⱃⱑⰴⱏ ⱍⰽ҃ⱏⰹ. ⰺ҅ⱄⱂⱁⰲⱑⰿⱐ ⰹ ⰰⰸⱏ ⱂⱃⱑⰴⱏ ⱁⱌ҃ⰿⱐ. ⰿⱁⰻⰿⱐ. ⰺ҅ⰶⰵ ⰵⱄⱅⱏ ⱀⰰ ⱀⰱ҃ⱈⱏ.
10:33
ⰰ ⰺⰶⰵ ⱁⱅⱏⰲⱃⱏⰶⰵⱅⱏ ⱄⱔ ⰿⰵⱀⰵ ⱂⱃⱑⰴⱏ ⱍⰽ҃ⱏⰹ. ⱁⱅⱏⰲⱃⱏⰳⱘ ⱄⱔ ⰺ ⰰⰸⱏ ⰵⰳⱁ ⱂⱃⱑⰴⱏ ⱁⱌ҃ⰵⰿⱐ ⰿⱁⰺ҅ⰿⱐ ⰺ҅ⰶⰵ ⰵⱄⱅⱏ ⱀⰰ ⱀⰱ҃ⱄⱈⱏ.
10:34
ⱀⰵ ⰿⱐⱀⰻⱅⰵ. ⱑⰽⱁ ⱂⱃⰻⰴⱏ ⱂⱁⰾⱁⰶⰻⱅⰻ ⰿⰻⱃⰰ ⱀⰰ ⰸⰵⰿⰻ. ⱀⰵ ⱂⱃⰻⰴⱏ ⱂⱁⰾⱁⰶⰻⱅⰻ ⰿⰻⱃⰰ. ⱀⱏ ⰿⰵⱍⱐ.
10:35
ⱂⱃⰻⰴⱏ ⰱⱁ......... ⱍⰽ҃ⰰ ⱀⰰ ⱁⱌ҃ⰰ ⱄⰲⱁⰵⰳⱁ. ⰺ ⰴⱏⱎⱅⰵⱃⱐ ⱀⰰ ⰿⱃ҃ⱐ ⱄⰲⱁⱙ. ⰺ҅ ⱀⰵⰲⱑⱄⱅⱘ ⱀⰰ ⱄⰲⰵⰽⱃⱏⰲⰵ ⱄⰲⱁⱙ.
10:36
ⰺ҅ ⰲⱃⰰⰸⰻ ⱍⰽ҃ⱆ ⰴⱁⰿⰰⱎⱐⱀ̑ⰻⰹ ⰵⰳⱁ:
10:37
Ⰺⰶⰵ ⰾ̑ⱓⰱⰻⱅⱏ ⱁⱌ҃ⰰ ⰾⰻ ⰿⰰⱅⰵⱃⱐ ⱂⰰⱍⰵ ⰿⰵⱀⰵ. ⱀⱑⱄⱅⱏ ⰿⰵⱀⰵ ⰴⱁⱄⱅⱁⰺ҅ⱀⱏ. ⰺ҅ⰸⰵ ⰾⱓⰱⰻⱅⱏ ⱄⱀ҃ⰰ ⰾⰻ ⰴⱏⱎⱅⰵⱃⱐ ⱂⰰⱍⰵ ⰿⰵⱀⰵ. ⱀⱑⱄⱅⱏ ⰿⰵⱀⰵ ⰴⱁⱄⱅⱁⰺⱀⱏ.
10:38
ⰺ҅ ⰻⰶⰵ ⱀⰵ ⱂⱃⰹⰹⰿⰵⱅⱏ ⰽⱃ҃ⱄⱅⰰ ⱄⰲⱁⰵⰳⱁ. ⰺ҅ ⰲⱏ ⱄⰾⱑⰴⱏ ⰿⰵⱀⰵ ⰳⱃⱔⰴⰵⱅⱏ. ⱀⱑⱄⱅⱏ ⰿⰵⱀⰵ ⰴⱁⱄⱅⱁⰺⱀⱏ.
10:39
Ⱉⰱⱃⱑⱅⱏⰺ ⰴⱎ҃ⱘ ⱄⰲⱁⱙ ⱂⱁⰳⱆⰱⰻⱅⱏ ⱙ. ⰰ ⰺⰶⰵ ⱂⱁⰳⱆⰱⰻⱅⱏ ⰴⱎ҃ⱘ ⱄⰲⱁⱙ ⰿⰵⱀⰵ ⱃⰰⰴⰻ. ⱁⰱⱃⱔⱎⱅⰵⱅⱏ ⱙ.
10:40
ⰺ҅ⰶⰵ ⰲⱏⰹ ⱂⱃⰻⰿⰵⱅⱏ. ⰿⱔ ⱂⱃⰻⰵⰿⰾⰵⱅⱏ. ⰺ҅ ⰻⰶⰵ ⱂⱃⰻⰵⰿⰾⰵⱅⱏ ⰿⱔ. ⱂⱃⰻⰵⰿⰾⰵⱅⱏ ⱂⱁⱄⱏⰾⰰⰲⱏⱎⰰⰳⱁ ⰿⱔ.
10:41
ⱂⱃⰻⰵⰿⰾ̑ⱔⰹ ⱂⱃⱁⱃⱁⰽⰰ. ⰲⱏ ⰺⰿⱔ ⱂⱃⱁⱃⱁⱍⰵ. ⰿⱏⰸⰴⱘ ⱂⱃⱁⱃⱁⱍⱘ ⱂⱃⰻⰿⰵⱅⱏ. ⰺ҅ ⱂⱃⰻⰵⰿⰾ̑ⱔⰻ ⱂⱃⰰⰲⰵⰴⱐⱀⰻⰽⰰ. ⰲⱏ ⰺⰿⱔ ⱂⱃⰰⰲⰵⰴⱐⱀⰻⱍⰵ. ⰿⱏⰸⰴⱘ ⱂⱃⰰⰲⰵⰴⱐⱀⰻⱍⱘ ⱂⱃⰻⰿⰵⱅⱏ.
10:42
Ⰺ҅ ⰻⰶⰵ ⰽⱁⰾⰻⰶⱐⰴⱁ ⱀⰰⱂⱁⰺⱅⱏ. ⰵⰴⰻⱀⱁⰳⱁ ⱁⱅⱏ ⰿⰰⰾⱏⰺⱈⱏ ⱄⰻⱈⱏ. ⱍⰰⱎⱘ ⱄⱅⱆⰴⰵⱀⱏⰹ ⰲⱁⰴⱏⰹ. ⱅⱁⰽⰿⱁ ⰲⱏ ⰺⰿⱔ ⱆⱍⰵⱀⰻⱍⰵ. ⰰⰿⰻⱀⸯ ⰳⰾ̑ⱙ ⰲⰰⰿⱏ. ⱀⰵ ⱂⱁⰳⱆⰱⰻⱅⱏ ⰿⱏⰸⰴⱏⰹ ⱄⰲⱁⰵⱗ.