ꙇ҅ гл҃ааше ꙇ҅мъ. аминⸯ. гл̑ѭ вамъ. сѫтъ етери отъ сьде стоѩштиіхъ. ꙇ҅же не ꙇ҅мѫтъ въкоусити съмръти. доньдеже видѧтъ цр҃сие бж҃ие. пришьдъшее вь силѣ.

Ꙇ҅ по шести днъ. поѩтъ ис҃. петра. ꙇ҅ ѣкова. ꙇ҅оана. ꙇ҅ вьзведе ѩ на горѫ вꙑсокѫ. единꙑ. ꙇ҅ прѣ̆образи сѧ прѣдь н̑ими.

ꙇ҅ бꙑшѧ ризꙑ его льштѧштѧ сѧ. бѣлꙑ ѕѣло ѣко ꙇ҅ снѣгъ. ѣцѣхъже не можетъ. гнафе ꙇ҅ на земл̑ѣ тако бѣлити.

ꙇ҅ ави сѧ ꙇ҅мъ ꙇ҅лиѣ съ мосѣомь. ꙇ҅ бѣашете гл̑ѭшта съ ꙇс҃мь.

ꙇ҅ отъвѣштавъ петръ гл҃а ис҃ви. равⸯви. добро [естъ] намъ сьде бꙑти. ꙇ҅ сътворимъ !в кровꙑ. тебѣ единѫ. ꙇ҅ мосѣови единѫ. ꙇ҅ или единѫ.

не вѣдѣаше бо чьто гле!т. пристрашьни бо бѣахѫ.

бꙑ!с же облакъ осѣн̑ѣѩ ѩ. ꙇ҅ приде гласъ ꙇ҅з облака гл҃ѧ. сь естъ сн҃ъ моі възл̑юбл̑енъꙇ. послоушаꙇте его.

ꙇ҅ вънезаапѫ възьрѣвъше. никогоже не видѣшѧ къ томоу. нъ ꙇ҅с҃а единого съ собоѭ.

съходѧштемъ же ꙇ҅мъ съ горꙑ. запрѣти ꙇ҅мъ да никомоуже не повѣдѧтъ ѣже видѣшѧ. тъкъмоу егда сн҃ъ чс҃къꙇ ꙇ҅з мрътвъꙇхъ въскръснетъ.

ꙇ҅ оудръжашѧ. слово вь себѣ. сътѧзаѭште сѧ. чьто естъ еже ꙇ҅з мрътвъꙇхъ въскръснѫти.

ꙇ҅ въпрашаахѫ гл̑ѭште. ѣко !глѭтъ кънижьници. ѣко ꙇ҅ли подобаетъ прити прѣжде.

онъ же отъвѣштавъ рече і҅мъ ꙇ҅лиѣ оубо пришьдъ прѣжде оустроꙇ҅тъ всѣ. ꙇ҅ како естъ псано о !снѣ !чсцѣмь. да много постраждетъ. ꙇ҅ оуничьжѧтъ і.

нъ гл̑ѭ вамъ. ѣко ꙇ҅лиѣ приде. ꙇ҅ сътворишѧ емоу еликоже хотѣшѧ. ѣкоже естъ псано о н̑емь.

Ꙇ҅ пришьдъ къ оученикомъ. видѣ народъ многъ о н̑ихъ. ꙇ҅ кънижьникꙑ. сътѧзаѭштѧ сѧ съ н̑ими.

ꙇ҅ абье вьсь народъ. видѣвъше и оужасѫ сѧ. ꙇ҅ пририштѫште цѣловаахѫ і.

Ꙇ҅ въпроси кън̑ижьн̑икꙑ. чьто сътѧзаете сѧ вь себѣ.

Ꙇ҅ отъвѣштавъ единъ отъ народа рече. оучител̑ю привѣсъ сн҃ъ мои къ тебѣ. ꙇ҅мѫшть дх҃ъ нѣмъ глоухъ.

ꙇ҅же аште колижьдо ꙇ҅метъ ꙇ. разбиваатъ і ꙇ҅ пѣнꙑ тѣштитъ. ꙇ҅ скрьжьштетъ зѫбꙑ своꙇ҅ми. ꙇ҅ оцѣпѣнѣетъ. ꙇ҅ рѣхъ оученикомъ твоꙇ҅мъ. да ꙇ҅жденѫтъ ꙇ. ꙇ҅ не възмогѫ.

онъ же отъвѣштавъ гл҃а. ̆ѡ роде невѣрьнъ. доколѣ въ васъ бѫдѫ. доколѣ тръпл̑ѫ вꙑ. принесѣте и къ мнѣ.

ꙇ҅ принѣсѧ і къ н̑емоу. ꙇ҅ видѣвъ ꙇ дх҃ъ сътрѧсе и. ꙇ҅ падъ на земл̑и вал̑ѣаше сѧ пѣнꙑ тѣштѧ.

ꙇ҅ въпроси ис҃ оц҃а его. колико лѣтъ естъ отън̑елиже се бꙑ!с емоу. онъ же рече. емоу. ꙇ҅з отрочинꙑ.

ꙇ҅ множицеѭ и въ огнь въвръже. ꙇ҅ въ водѫ. да ꙇ҅ би погоубилъ. нъ аште можеши. помози намъ. милосръдовавъ же о насъ

ис҃. рече емоу. еже аште можеши вѣровати. вьсѣ възможьна вѣроуѭштюмоу.

ꙇ҅ абье възъпивъ оц҃ь отрочѧте. съ сльзами гл҃ааше. вѣроуѭ г҃и. помози моемоу невѣрью.

видѣвъ же ис҃. ѣко съриштетъ сѧ народъ. запрѣти дх҃оу нечистоумоу. гл҃ѧ емоу. нѣмꙑ. ꙇ҅ глоухꙑ дш҃е. азъ ти вел̑ѭ ꙇ҅зиди ꙇж него. ꙇ҅ къ томоу не вьниди въ н̑ь.

ꙇ҅ възъпивъ ꙇ҅ много прѫжавъ сѧ ꙇ҅зиде. ꙇ҅ бꙑстъ. ѣко і мрътвъ. ѣко мнози гл҃аахѫ ѣко оумрѣтъ.

ис҃ же ꙇ҅мъ ꙇ за рѫкѫ вьздвиже и. ꙇ въста.

ꙇ҅ въшьдъшю моу въ домъ. оученици его въпрашаахѫ і. единого. како мꙑ не възмогомъ ꙇ҅згънати его.

Ꙇ҅ рече ꙇмъ. тъ родъ не ꙇ҅матъ ничимьже ꙇ҅зити. тъкъмо молитвоѭ ꙇ҅ постомь. Ꙇ҅ отътѫдоу ꙇ҅шьдьше. ꙇ҅дѣахѫ сквозѣ галилеѭ. ꙇ҅ не хотѣаше да ꙇ къто оувѣстъ.

оучааше бо оученикꙑ своѩ. ꙇ҅ гл҃ааше ꙇ҅мъ. ѣко сн҃ъ чс҃къꙇ прѣданъ бѫдетъ. въ рѫцѣ !чсцѣ. ꙇ҅ оубиѭтъ ꙇ. ꙇ҅ оубиенъ бꙑвъ. вь третиі днь. въскръснетъ.

они же не разоумѣахѫ гл҃а ꙇ҅ боѣахѫ сѧ въпросити і.

Ꙇ҅ приде въ каперънаоумъ ꙇ҅ въ домоу бꙑвъ. въпрашааше ѩ. чьто на пѫти вь себѣ помꙑшл̑ѣашете.

они же мльчаахѫ. дроугъ къ дроугоу бо сьтѧзааше сѧ на пѫти. къто естъ бол̑иі.

ꙇ҅ сѣдъ гласи оба на десѧте. ꙇ҅ гл҃а ꙇ҅мъ. аште къто хоштетъ старѣі бꙑти. да бѫдетъ всѣхъ мьн̑иі. ꙇ҅ всѣхъ слоуга.

ꙇ҅ приімъ отрочѧ. постави е посрѣдѣ ꙇ҅хъ. ꙇ҅ обьмъ е рече ꙇ҅мъ.

ꙇ҅же аште едино таковъꙇ҅хъ отрочѧтъ. приіметъ въ імѧ мое. мѧ приемл̑етъ. ꙇ҅ иже аште мене приемл̑етъ. не мене приемл̑етъ. нъ посълавъшааго мѧ.

*̆ѡтъвѣшта емоу ꙇ҅оанъ гл҃ѧ. оучител̑ю видѣхомъ етера. о ꙇ҅мени твоемь ꙇ҅згонѧшта бѣсꙑ. ꙇ҅же не ходитъ по насъ. ꙇ҅ възбранихомъ емоу. ѣко не послѣдова намъ.

!Ис же рече емоу. не браните емоу. никътоже бо естъ. ꙇ҅же творитъ силѫ. о моемь ꙇ҅мени. ꙇ҅ възможетъ въ скорѣ зълословити мѧ.

ꙇ҅же бо нѣстъ на вꙑ. по васъ естъ.

Ꙇ҅же бо аште напоꙇтъ вꙑ. чашѫ водꙑ. въ ꙇмѧ ѣко крьстиѣни есте. аминⸯ. гл҃ѭ вамъ. не погоубитъ мьздꙑ своеѩ.

ꙇ҅ иже аште съблазнитъ единого отъ малъꙇхъ сихъ. вѣроуѭштиіхъ въ мѧ. дебрѣе емоу стъ паче. аште обложѧтъ камень. жръновънꙑ о вꙑ его. ꙇ҅ въвръгѫтъ ꙇ въ море.

ꙇ҅ аште съблажнѣетъ тѧ рѫка твоѣ. отъсѣци ѭ. дебрѣе ти естъ маломоштиѭ въ животъ вьнити. нежели обѣ рѫцѣ ꙇ҅мѫштю ꙇ҅ти въ ђеонѫ. въ огн̑ь негашѫштеі.

ꙇ҅деже чрьвь ꙇ҅хъ не оумираетъ. ꙇ҅ огн̑ь не оугасаетъ.

ꙇ҅ аште нога твоѣ съблажн̑ѣетъ тѧ. отъсѣци ѭ. дебрѣ̆е ти естъ вънити въ животъ хромоу. нежели двѣ нозѣ ꙇ҅мѫштю. въвръженоу бꙑти въ ђеонѫ. въ огн̑ь не гашѫштеі.

ꙇ҅деже чръвь ꙇ҅хъ не оумираетъ. ꙇ҅ огн̑ь не оугасаетъ.

ꙇ҅ аште око твое съблажн̑ѣ̆етъ тѧ. ꙇ҅стъкни е. добрѣе ти естъ съ единѣмь окомь. вьнити вь цр҃сие бж҃ие. нежели обѣ очи ꙇ҅мѫштю. ꙇ҅ти въ ђеонѫ огн̑ьнѫѭ.

ꙇ҅деже чръвь ꙇ҅хъ не оумираетъ. ꙇ҅ огнь не оугасаетъ.

вьсѣкъ бо огн̑емь поѣстъ сѧ. ꙇ҅ вьсѣка жрътва солиѭ осолитъ сѧ.

добро естъ соль. аште ли же соль неслана бѫдетъ. о чемь ѭ осолите. ꙇ҅мѣсте соль вь себѣ. ꙇ҅ миръ ꙇ҅мѣите междю собоѭ.