възърѣвъ же видѣ въмѣтаѭштѧ. вь ђазофилакиѭ. дарꙑ своѩ богатꙑѩ.

видѣвъ же етерѫ въдовицѫ оубогѫ. вьмѣтаѭштѫ тоу дъвѣ лепⸯтѣ.

ꙇ҅ рече. въ ꙇ҅стинѫ гл҃ѭ вамъ. ѣко въдовица си оубогаѣ. бол̑е всѣхъ въвръже.

вьси бо сиі отъ ꙇ҅збꙑтъка въвръгошѧ въ дарꙑ !бви. а си отъ лишеньѣ своего. вⸯсе ꙇ҅мѣнье свое въвръже.

Ꙇ҅ етеромъ гл҃ѭштемъ о цръкъви. ѣко каменьемь добромь. ꙇ҅ съсѫдꙑ оукрашена естъ. рече.

си ѣже видите. придѫтъ дьнье. вь н̑ѧже не останетъ камень на камені сьде. ꙇ҅же не разоритъ сѧ.

Въпросишѧ же і гл҃ѭште. оучител̑ю. когда оубо си бѫдѫтъ. ꙇ҅ чьто естъ знаменье. егда хотѧтъ си бꙑти.

онъ же рече. бл̑юдѣте сѧ да не прѣльштени бѫдете. мнози бо придѫтъ. въ ꙇ҅мѧ мое гл҃ѭште. азъ есмь. ꙇ҅ врѣмѧ приближи сѧ. не ꙇ҅дѣте въ слѣдъ ꙇ҅хъ.

Егда же оуслꙑшите брани ꙇ҅ нестроеньѣ. не оубоꙇ҅те сѧ. подобаетъ бо симъ прѣжде бꙑти. нъ не абье коньчина.

тогда гл҃ааше ꙇ҅мъ. въстанетъ бо ѩзꙑкъ на ѩзꙑка. ꙇ҅ цр҃со. на цр҃со.

трѫси же велици по мѣста. ꙇ҅ глади ꙇ҅ въ мори бѫдѫтъ страхованьѣ. ꙇ҅ знаменьѣ съ неб҃се. вельѣ бѫдѫтъ.

прѣжде же сихъ вⸯсѣхъ. възложѧтъ на вꙑ рѫкꙑ своѩ. ꙇ҅ ижденѫтъ прѣдаѭште на сънъмишта. ꙇ҅ въ тьмьницѧ. ведомꙑ къ !цремъ ꙇ҅ владꙑкамъ. ꙇ҅мене моего ради.

прикл̑ючитъ же сѧ вамъ. въ съвѣдѣтел̑ьство.

Положите оубо на сръдьцихъ вашихъ. не прѣжде пооучати сѧ отъвѣштавати.

азъ бо дамь вамъ. въ оуста прѣмѫдрость. еꙇже не възмогѫтъ противити сѧ. ꙇ҅ отъвѣштати. вси противл̑ѣѭштеі сѧ вамъ.

прѣдани же бѫдете родителꙑ ꙇ҅ братрьѭ. ꙇ҅ родомь. ꙇ҅ дроугꙑ. оумрътвѧтъ отъ васъ.

ꙇ҅ бѫдете ненавидими отъ вⸯсѣхъ. ꙇ҅мене моего ради.

ꙇ҅ власъ главꙑ вашеѩ не погꙑбнетъ.

въ тръпѣніи вашемь. сътѧжите дш҃ѧ вашѧ.

егда же оузьрите. обьстоꙇмъ воі !ꙇ҅илмъ. тогда разоумѣете. ѣко прибліжи сѧ запоустѣнье емоу.

Тогда сѫштеі въ ꙇ҅юдѣі. да бѣгаѭтъ въ горꙑ. ꙇ҅ иже посрѣдѣ его да ꙇ҅сходѧтъ. ꙇ҅же въ странахъ. да не въходѧтъ въ н̑ь.

ѣко дьнье мьштенью сиі сѫтъ. да ꙇ҅сплънѧтъ сѧ. вⸯсѣ напⸯсанаа.

Горе непраздънъꙇ҅мъ. ꙇ҅ доѩшті̆имъ въ тꙑ дни. Бѫдетъ бо бѣда вельѣ на земл̑и. ꙇ҅ гнѣвъ на л̑юдехъ сихъ.

ꙇ҅ падѫтъ въ остри меча. ꙇ҅ плѣн̑ени бѫдѫтъ въ ѩзꙑкꙑ вⸯсѧ. ꙇ҅ ил҃мъ бѫдетъ попираемъ. ѩзꙑкꙑ. доньдеже съконьчаѭтъ сѧ. врѣмена ѩзꙑкъ.

ꙇ҅ бѫдѫтъ знаменьѣ въ слъньци. ꙇ҅ мѣсѧци. ꙇ҅ ѕвѣздахъ. ꙇ҅ на земл̑и тѫга ѩзꙑкомъ. отъ нечааньѣ. шюма морьскааго. ꙇ҅ възмѫштеньѣ.

ꙇ҅здꙑхаѭштемъ чк҃омъ отъ страха. ꙇ҅ чааньѣ. грѧдѫштіихъ на вьсел̑енѫѭ. силꙑ бо неб҃скꙑѩ двигнѫтъ сѧ.

Ꙇ҅ тогда оузьрѧтъ сн҃ъ чс҃кꙑ. грѧдѫшть на облацѣхъ. съ силоѭ ꙇ҅ славоѭ. многоѭ.

начинаѭштемъ же симъ бꙑвати. въсклоните сѧ. ꙇ҅ въздвигнѣте главꙑ вашѧ. зане приближі сѧ ꙇ҅збавл̑енье ваше.

ꙇ҅ рече ꙇ҅мъ притъчѫ. видите смоковьницѫ. ꙇ҅ вⸯсѣ дрѣва.

егда прошибаѭтъ сѧ. оуже видѧште о себѣ вѣсте. ѣко блізъ жѧтва естъ.

Тако ꙇ҅ вꙑ егда оузьрите. си бꙑваѭшта. вѣдите ѣко блізъ естъ цр҃сие бж҃ие.

аминⸯ гл҃ѭ вамъ. ѣко не ꙇ҅матъ прѣꙇ҅ти родъ сь. дон̑деже вⸯсѣ бѫдѫтъ.

нб҃о ꙇ҅ земл̑ѣ мимоꙇ҅детъ. а словеса моѣ не ꙇ҅мѫтъ прѣꙇ҅ти.

Вьнемл̑ѣте же себѣ. еда когда отѧгъчаѭтъ сръдьца ваша. обѣданьемь ꙇ пьѣньствомь. печальми житіискъіми. ꙇ҅ наꙇ҅детъ на вꙑ вьнезаапѫ дьнь тъ.

акꙑ сѣть бо придетъ. на всѧ сѣдѧштѧѩ на лици вⸯсеѩ земл̑ѧ.

бьдите оубо на всѣко врѣмѧ. молѧште сѧ. да съподобите сѧ оубѣжати. вьсѣхъ сихъ хотѧштихъ бꙑти. ꙇ҅ стати прѣдъ сн҃омь чс҃комь.

бѣ же въ дьне оучѧ въ цркъве. а ноштиѭ оудвар̑ѣаше сѧ ꙇ҅сходѧ въ горѣ. нарицаемѣі елеонъ.

ꙇ҅ вси л̑юдье ꙇ҅з оутра приходѧште къ н̑емоу въ цръковь послоушатъ его.