Ꙇ҅ въшьдъ прохождааше въ ꙇ҅ерихѫ.

ꙇ҅ се мѫжь ꙇ҅менемь нарицаемꙑ зак̑ьхӗа. ꙇ҅ сь бѣ старѣі мꙑтаремъ. ꙇ҅ тъ бѣ богатъ.

ꙇ҅ искааше видѣти ꙇс҃а. къто естъ. ꙇ҅ не можааше видѣти народомь. ѣко тѣломь малъ бѣ.

ꙇ҅ прѣди текъ вьзлѣзе на сⸯѵкомариѭ. да видитъ ꙇ҅с҃а. ѣко тѫдѣ хотѣаше минѫти.

ꙇ҅ ѣко приде на мѣсто. възърѣвъ ꙇс҃ видѣ і. ꙇ҅ рече къ н̑емоу. зак̑ьх̑ѣе. потъштавъ сѧ сълѣзи. дьньсь бо подобаатъ ми. въ домоу твоемь бꙑти.

ꙇ҅ потъштавъ сѧ сълѣзе. ꙇ҅ приѩтъ і радоуѩ сѧ.

ꙇ҅ видѣвъше і ръпътаахѫ гл҃ѭште. ѣко къ грѣшьноу мѫжю вьниде. витатъ.

ставъ же зак̑ьхеі. рече къ !гю. се полъ ꙇ҅мѣниѣ моего г҃и. дамь ништімъ. ꙇ҅ аште есмь кого чимь обидѣлъ. възвраштѫ четворицеѭ.

рече же къ н̑емоу ис҃. ѣко дьньсь !спние домоу семоу бꙑстъ. зан̑е ꙇ҅ сь !снъ авраамл̑ь естъ.

Приде бо сн҃ъ чс҃кꙑ вьзискатъ. ꙇ҅ сп҃стъ погꙑбъшааго.

Слꙑшѧштемъ же ꙇ҅мъ се. приложь рече............ притъчѫ. зан̑еже тъ бѣ близъ ꙇл҃ма. ꙇ҅ мьнѣахѫ. ѣко абье хоштетъ цр҃сье бж҃ие авити сѧ.

Рече же. чк҃ъ етеръ добра рода. ꙇ҅де на странѫ далече. приѩти себѣ цр҃сие. ꙇ възврати сѧ.

Призъвавъ же. !ꙇ. рабъ своꙇхъ. въдастъ ꙇ҅мъ ꙇ҃ мънасъ. ꙇ҅ рече къ н̑имъ. коупл̑ѫ дѣꙇте дон̑деже придѫ.

ꙇ҅ граждане емоу. ненавидѣахѫ его. ꙇ҅ посълашѧ молитвѫ. въ слѣдъ его гл҃ѭште. не хоштемъ семоу. да цр҃соуетъ надъ нами.

ꙇ҅ бꙑстъ егда сѧ възврати приімъ цр҃сье. ꙇ҅ рече да пригласѧтъ емоу рабꙑ тꙑ. ꙇ҅мъже дастъ съребро. да оувѣстъ какѫ коупл̑ѫ сѫтъ сътворили.

приде же пръвꙑ гл҃ѧ. г҃и. мънась твоѣ. ꙇ҃ придѣла мънасъ.

ꙇ҅ рече емоу. благꙑ рабе. добрꙑ вѣрьне. ѣко о малѣ бꙑ!с вѣрьнъ. бѫди область ꙇ҅мꙑ. надъ десѧтьѭ градъ.

ꙇ҅ приде въторꙑ гл҃ѧ. мънась твоѣ г҃и сътвори. !д. мънасъ.

рече же ꙇ҅ томоу. ꙇ҅ тꙑ бѫди надъ. !дѭ градъ.

Ꙇ҅ дроугꙑ приде гл҃ѧ. г҃и. се мⸯнась твоѣ ѭже ꙇ҅мѣхъ. положенѫ въ оуброусѣ.

боѣхъ бо сѧ тебе. ѣко чк҃ъ ѣръ еси. вьземл̑еши. ꙇ҅деже не положь. ꙇ҅ жьнеши егоже не сѣавъ.

гл҃а емоу. отъ оустъ твоꙇ҅хъ осѫждѫ тѧ. зълꙑ рабе. Вѣдѣаше ѣко чк҃ъ ѣръ есмь. вьземл̑ѭ егоже не положихъ. ꙇ҅ жьн̑ѧ егоже не сѣахъ. ꙇ҅ събираѩ ѭдоуже не раздаахъ.

ꙇ҅ по чьто не въдастъ моего съребра пѣнѧжьникомъ. ꙇ҅ азъ пришьдъ съ лихвоѭ. ꙇ҅стѧзалъ е бимь.

ꙇ҅ прѣдьстоѩштімъ рече. възьмѣте отъ н̑его мънасѫ. ꙇ҅ дадите ꙇ҅мѫштюмоу. !ꙇ. мънасъ.

ꙇ҅ рѣшѧ емоу. г҃и. ꙇ҅матъ. !ꙇ. мⸯнасъ.

!Глѭ же вамъ. ѣко всѣкомоу ꙇ҅мѫштюмоу дадѧтъ. а отъ не ꙇ҅мѫштааго. ꙇ҅ еже ꙇ҅матъ отъꙇ҅мѫтъ отъ н̑его.

Ѡбаче врагꙑ моѩ тꙑ. не хотѣвъшѧѩ мьнѣ. да цр҃ь бимь бꙑлъ надъ н̑ими. приведѣте ѩ сѣмо. ꙇ҅ исѣцѣте ѩ прѣдъ мноѭ.

Ꙇ҅ се рекъ ꙇ҅дѣаше прѣди. въсходѧ въ ꙇл҃мъ.

ꙇ҅ бꙑстъ ѣко прибліжи сѧ. въ витъфагиѭ. ꙇ҅ витаниѭ. къ горѣ нарицаемѣі елеонъ. посъла дъва отъ оученикъ своꙇ҅хъ

гл҃ѧ. ꙇ҅дѣта въ прѣмьн̑ѭѭ вьсь. въ н̑ѭже въсходѧшта обрѧштета. жрѣбѧ привѧзано. на н̑еже никътоже къде. отъ чк҃ъ не въсѣде. отрѣшⸯша приведѣта ми е.

ꙇ҅ аште къто вꙑ въпрашаетъ. по чьто отрѣшаета е. тако речета ѣко г҃ь его трѣбоуетъ.

Шьдъша же посъланаа. обрѣтосте ѣкоже рече ꙇ҅ма.

отрѣшаѭштема же ꙇ҅ма жрѣбѧ. рѣшѧ !гдье его къ н̑има. чьто отрѣшаета жрѣбѧ.

она же рѣсте. ѣко г҃ь его трѣбоуетъ.

ꙇ҅ приведосте е къ ꙇс҃ви. ꙇ҅ възвръгъше ризꙑ своѩ на жрѣбѧ въсадишѧ ꙇс҃а.

Ꙇ҅дѫштю же емоу. постилаахѫ ризꙑ своѩ по пѫти.

приближаѭште же сѧ емоу. абье. къ низъхожденью горѣ елеоньсцѣ. оучѧтъ вⸯсе множьство оученикъ. радоуѭште сѧ хвалите б҃а. гласомь вельемь. о вⸯсѣхъ силахъ ѩже видѣшѧ.

гл҃ѭште. !Блгнъ {цр҃ь} грѧдꙙі. цр҃ь въ ꙇмѧ гн҃е. миръ на нб҃схъ. ꙇ҅ слава въ вꙑшьн̑иіхъ.

Ꙇ҅ етери фарисѣі рѣшѧ къ немоу отъ народа. оучител̑ю запрѣти оученикомъ твоꙇ҅мъ.

ꙇ҅ отъвѣштавъ рече ꙇ҅мъ. гл̑ѭ вамъ. ѣко аште сиі оумльчѧтъ. каменье възъпити ꙇ҅матъ.

ꙇ҅ ѣко приближи сѧ. видѣвъ градъ плака сѧ о н̑емь гл҃ѧ.

ѣко аште би разоумѣлъ вь дьнь сь. ꙇ҅ тꙑ ѣже къ мироу твоемоу. нꙑн̑ѣ же оукрꙑ сѧ. отъ очью твоею.

ѣко придѫтъ дьнье на тѧ. ꙇ҅ обложѧтъ врази твоі. острогъ о тебѣ. ꙇ҅ обидѫтъ тѧ. ꙇ҅ окрочѧтъ тѧ въ сѫдоу.

ꙇ҅ разбьѭтъ тѧ. ꙇ҅ чѧда твоѣ вь тебѣ. Ꙇ҅ не оставѧтъ камене. на камени вь тебѣ. пон̑еже не разоумѣ врѣмене посѣштенью твоемоу.

Ꙇ҅ въшьдъ въ цръковь. начѧтъ ꙇ҅згонити продаѭштѧѩ голѫби.

гл҃ѧ ꙇ҅мъ. пⸯсано естъ. ꙇ҅ бѫдетъ храмъ моі. храмъ молитвѣ. вꙑ же сътвористе і врътъпъ разбоꙇ҅никомъ.

ꙇ҅ бѣ оучѧ въ цръкъве по вⸯсѧ дⸯни. *̆архиереі же ꙇ҅ кънижьници. ꙇ҅скаахѫ его погоубити. ꙇ҅ старѣішинꙑ л̑юдьмъ.

ꙇ҅ не обрѣтаахѫ чьто сътворѧтъ емоу. л̑юдье бо его вси дръжаахѫ сѧ. послоушаѭште его.