ЕВАНГЕЛИЕ ЕЖЕ Ѿ МАРЪКА
1:1
Ⰸⰰⱍⱔⰾⱁ ⰵⰲⰰⱀⱐⰼ҃ⰾⰻⱑ ⰻⱄ҃ⱈⰲⰰ ⱄⱀ҃ⰰ ⰱⰶ҃ⰻⱑ.
1:2
ⱑⰽⱁⰶⰵ ⰵⱄⱅⱏ ⱂⰻⱄⰰⱀⱁ ⰲⱏ ⱂⱃⱁⱃⱁⱌⱑⱈⱏ. ⱄⰵ ⰰⰸⱏ ⱂⱁⱄⱏⰾⱙ ⰰⱀⰼ҃ⰾⱏ ⰿⱁⰻ ⱂⱃⱑⰴⱏ ⰾⰻⱌⰵⰿⱏ ⱅⰲⱁⰻⰿⱏ. ⰺⰶⰵ ⱆⰳⱁⱅⱁⰲⰻⱅⱏ ⱂⱘⱅⱐ ⱅⰲⱁⰻ.
1:3
ⰳⰾⰰⱄⱏ ⰲⱏⱂⰻⱙⱋⰰⰰⰳⱁ ⰲⱏ ⱂⱆⱄⱅⱏⰹⱀⰻ. ⱆⰳⱁⱅⱁⰲⰻⱅⰵ ⱂⱘⱅⱐ ⰳⱀ҃ⱐ. ⱂⱃⰰⰲⱏⰹ ⱅⰲⱁⱃⰻⱅⰵ ⱄⱅⱏⰷⱔ ⰵⰳⱁ.
1:4
ⰱⱏⰹⱄⱅⱏ ⰻⱁⰰⱀⱏ ⰽⱃⱏⱄⱅⱔ ⰲⱏ ⱂⱆⱄⱅⱏⰹⱀⰻ. ⰺ ⱂⱃⱁⱂⱁⰲⱑⰴⰰⱗ ⰽⱃⱏⱎⱅⰵⱀⰻⰵ ⱂⱁⰽⰰⰰⱀⰻⱓ. ⰲⱏ ⱁⱅⱏⱂⱆⱎⱅⰵⱀⰻⰵ ⰳⱃⱑⱈⱁⰿⱏ.
1:5
ⰺ ⰻⱄⱈⱁⰶⰴⰰⰰⱎⰵ ⰽⱏ ⱀⰵⰿⱆ ⰲⱐⱄⱑ ⰻⱓⰴⰵⰻⱄⰽⰰ ⱄⱅⱃⰰⱀⰰ ⰻ ⰵⱃⰾ҃ⰿⱀⰵ ⰻ ⰽⱃⱏⱎⱅⰰⰰⱈⱘ ⱄⱔ ⰲⱐⱄⰻ ⰲⱏ ⰹⱁⱃⱏⰴⰰⱀⱄⱌⱑⰻ ⱃⱑ[ⱌⱑ] ⱁⱅⱏ ⱀⰵⰳⱁ ⰺⱄⱂⱁⰲⱑⰴⰰⱙⱎⱅⰵ ⰳⱃⱑⱈⱏⰹ ⱄⰲⱁⱗ.
1:6
ⰱⱑ ⰶⰵ ⰻⱁⰰⱀⱏ ⱁⰱⰾⱏⱍⰵⱀⱏ ⰲⰾⰰⱄⱏⰹ ⰲⰵⰾⱐⰱⱘⰶⰴⰺ. ⰺ ⱂⱁⱑⱄⱏ ⱆⱄⱀⰻⱑⱀⱏ ⱁ ⱍⱃⱑⱄⰾⱑⱈⱏ ⰵⰳⱁ. ⰺ ⱑⰴⱐ ⰰⰽⱃⰻⰴⰻ ⰻ ⰿⰵⰴⱏ ⰴⰻⰲⰻⰻ.
1:7
Ⰺ ⱂⱃⱁⱂⱁⰲⱑⰴⰰⰰⱎⰵ ⰳⰾ҃ⱔ. ⰳⱃⱔⰴⰵⱅⱏ ⰽⱃⱑⱂⰾⰵⰻ ⰿⰵⱀⰵ ⰲⱏ ⱄⰾⱑⰴⱏ ⰿⰵⱀⰵ. ⰵⰿⱆⰶⰵ ⱀⱑⱄⰿⱏ ⰴⱁⱄⱅⱁⰻⱀⱏ ⱂⱁⰽⰾⱁⱀⱐ ⱄⱔ ⱃⰰⰸⰴⱃⱑⱎⰻⱅⰻ. ⱃⰵⰿⰵⱀⰵ ⱍⱃⱑⰲⰻⰵⰿⱏ ⰵⰳⱁ.
1:8
ⰰⰸⱏ ⱆⰱⱁ ⰽⱃⱏⱄⱅⰻⱈⱏ ⰲⱏⰹ ⰲⱁⰴⱁⱙ. ⰰ ⱅⱏ ⰽⱃⱏⱄⱅⰻⱅⱏ ⰲⱏⰹ ⰴⱈ҃ⱁⰿⱏ ⱄⱅ҃ⱏⰹⰿⱏ :: ⰽ!ⱌ ::
1:9
Ⰺ ⰱⱏⰹⱄⱅⱏ ⰲⱏ ⰴⱐⱀⰻ ⱅⱏⰹ. ⱂⱃⰻⰴⰵ ⰻⱄ҃ⱏ ⱁⱅⱏ ⱀⰰⰸⰰⱃⰵⱅⰰ ⰳⰰⰾⰻⰾⰵⰻⱄⰽⰰⰰⰳⱁ. ⰺ ⰽⱃⱏⱄⱅⰻ ⱄⱔ ⱁⱅⱏ ⰻⱁⰰⱀⰰ ⰲⱏ ⰹⱁⱃⰴⰰⱀⱑ.
1:10
ⰺ ⰰⰱⱐⰵ ⰲⱏⱄⱈⱁⰴⱔ ⱁⱅⱏ ⰲⱁⰴⱏⰹ. ⰺ ⰲⰻⰴⱑ ⱃⰰⰸⰲⱁⰴⱔⱎⱅⰰ ⱄⱔ ⱀⰱ҃ⱄⰰ. ⰺ ⰴⱈ҃ⱏ ⱑⰽⱁ ⰳⱁⰾⱘⰱⱐ ⱄⱏⱈⱁⰴⱔⱎⱅⱐ ⱀⰰ ⱀⱐ.
1:11
ⰺ ⰱⱏⰹⱄⱅⱏ ⰳⰾⰰⱄⱏ ⱄⱏ ⱀⰱ҃ⱄⰵ. ⱅⱏⰹ ⰵⱄⰻ ⱄⱀ҃ⱏ ⰿⱁⰻ ⰲⱏⰸⰾⱓⰱⰾⰵⱀⱏⰹ. ⱁ ⱅⰵⰱⱑ ⰱⰾⰰⰳⱁⰲⱁⰾⰻⱈⱏ.
1:12
ⰺ ⰰⰱⱐⰵ ⰴⱈ҃ⱏ ⰻⰸⰲⰵⰴⰵ ⰻ ⰲⱐ ⱂⱆⱄⱅⱏⰹⱀⱙ.
1:13
ⰺ ⰱⱑ ⱅⱆ ⰲⱏ ⱂⱆⱄⱅⱏⰹⱀⰻ .ⰽ҃. ⰴⱐⱀⱏ. ⰺⱄⰽⱆⱎⰰⰵⰿⱏ ⱄⱁⱅⱁⱀⱁⱙ. ⰺ ⰱⱑ ⱄⱏ ⰸⰲⱑⱃⱐⰿⰻ. ⰺ ⰰⱀⰼ҃ⰾⰻ ⱄⰾⱁ[ⱏⰹ]ⰶⰰⰰⱈⱘ ⰵⰿⱆ.
1:14
ⱂⱁ ⱂⱃⱑⰴⰰⱀⰻⰻ ⰶⰵ ⰻⱁⰰⱀⱁⰲⱑ :: ⱂⱃⰻⰴⰵ ⰻⱄ҃ⱏ ⰲⱏ ⰳⰰⰾⰻⰾⰵⱙ. Ⱂⱃⱁⱂⱁⰲⱑⰴⰰⱗ ⰵⰲⰰⱀⰼ҃ⰾⰻⰵ ⱌⱄ҃ⱅⰲⰹⱑ ⰱⰶ҃ⰻⱑ
1:15
ⰳⰾ҃ⱔ. ⱑⰽⱁ ⰻⱄⱂⰾⱏⱀⰻ ⱄⱔ ⰲⱃⱑⰿⱔ. ⰺ ⱂⱃⰻⰱⰾⰻⰶⰻ ⱄⱔ ⱌⱄ҃ⱃⱄⱅⰲⰻⰵ ⰱⰶ҃ⰻⰵ. ⰽⰰⰻⱅⰵ ⱄⱔ ⰻ ⰲⱑⱃⱆⰻⱅⰵ ⰲⱏ ⰵⰲⱀ҃ⰼⰾⰻⰵ.
1:16
ⱈⱁⰴⱔ ⰶⰵ ⱂⱃⰻ ⰿⱁⱃⰻ ⰳⰰⰾⰻⰾⰵⰻⱄⱌⱑ. ⰲⰻⰴⱑ ⱄⰻⰿⱁⱀⰰ ⰺ ⰰⱀⱐⰴⱃⱑⱙ ⰱⱃⰰⱅⱃⰰ ⱅⱁⰳⱁ ⱄⰻⰿⱁⱀⰰ. ⰲⱏⰿⰵⱅⰰⱙⱎⱅⰰ ⰿⱃⱑⰶⱔ ⰲⱐ ⰿⱁⱃⰵ. ⰱⱑⰰⱎⰵⱅⰵ ⰱⱁ ⱃⱏⰹⰱⰰⱃⱑ.
1:17
ⰺ ⱃⰵⱍⰵ ⰻⰿⰰ ⰻⱄ҃ⱏ ⱂⱃⰻⰴⱑⱅⰰ ⰲⱐ ⱄⰾⱑⰴⱏ ⰿⰵⱀⰵ. ⰺ ⱄⱏⱅⰲⱁⱃⱙ ⰲⱏⰹ ⰱⱏⰹⱅⰻ ⰾⱁⰲⱏⱌⰰ ⱍⰾⱁⰲⱑⰽⱁⰿⱏ.
1:18
ⰺ ⰰⰱⱐⰵ ⱁⱄⱅⰰⰲⰾⱐⱎⰰ ⰿⱃⱑⰶⱔ ⱄⰲⱁⱗ ⱂⱁ ⱀⰵⰿⱐ ⰻⰴⰵⱅⰵ.
1:19
ⰺ ⱂⱃⱑⱎⰵⰴⱏ ⱁⱅⱏ ⱅⱘⰴⱆ ⱆⰸⱐⱃⱑ ⰻⱑⰽⱁⰲⰰ ⰸⰵⰲⰵⰴⰵⱁⰲⰰ. ⰺ ⰻⱁⰰⱀⰰ ⰱⱃⰰⱅⱃⰰ ⰵⰳⱁ. ⰺ ⱅⰰ ⰲⱏ ⰾⰰⰴⰻⰻ ⰸⰰⰲⱔⰸⰰⱙⱎⱅⰰ ⰿⱃⱑⰶⱔ.
1:20
ⰺ ⰰⰱⱐⰵ ⰲⱏⰸⱏⰲⰰ ⱑ. ⰺ ⱁⱄⱅⰰⰲⰾⱐⱎⰰ ⱁⱅⱏⱌⰰ ⱄⰲⱁⰵⰳⱁ ⰸⰵⰲⰵⰴⰵⰰ ⰲⱏ ⰾⰰⰴⰻⰻ҅ ⱄⱏ ⱀⰰⰵⰿⱏⱀⰻⰽⱏⰹ. ⱂⱁ ⱀⰵⰿⱐ ⰻⰴⰵⱅⰵ. ::
1:21
ⰺ҅ ⰲⱐⱀⰻⰴⱘ ⰲⱏ ⰽⰰⱂⰵⱃⱏⱀⰰⱆⰿⱏ. ⰺ ⰰⰱⱐ ⰲⱏ ⱄⱁⰱⱁⱅⱏⰹ ⱀⰰ ⱄⱁⱀⱐⰿⰻⱋⰻ ⱏⰹⱍⰰⱎⰵ ⱗ.
1:22
ⰺ ⰴⰻⰲⰾⱑⰰⱈⱘ ⱄⱔ ⱁ ⱆⱍⰵⱀⰻⰻ ⰵⰳⱁ ⰱⱑ ⰱⱁ ⱆⱍⱔ ⱑⰽⱁ ⰲⰾⰰⱄⱅⱐ ⰺ҅ⰿⱏⰹ. ⰺ ⱀⰵ ⱑⰽⱁ ⰽⱏⱀⰻⰶⱏⱀⰻⱌⰻ ⰻⱈⱏ ::
1:23
Ⰺ ⰱⱑ ⱀⰰ ⱄⱁⱀⱐⰿⰻ[ⱋⰻ]ⱈⱏ ⱍⰾ҃ⰽⱏ ⱀⰵⱍⰻⱄⱅⱁⰿⱐ ⰴⱈ҃ⰿⱐ. ⰺ ⰲⱏⰸⱏⰲⰰ ⰳⰾ҃ⱔ
1:24
ⱁⱄⱅⰰⱀⰻ ⱍⱅⱁ ⰵⱄⱅⱏ ⱀⰰⰿⱏ ⰻ ⱅⰵⰱⱑ. ⰺⱄ҃ⰵ ⱀⰰⰸⰰⱃⱑⱀⰻⱀⰵ ⱂⱃⰻⱎⰵⰾⱏ ⰵⱄⰻ ⱂ[ⱁⰳ]ⱆⰱⰻⱅⱏ ⱀⰰⱄⱏ. ⰲⱑⰿⱐ ⱅⱔ ⰽⱅⱁ ⰵⱄⰻ ⱄⱅ҃ⱏⰹ ⰱⰶ҃ⰻⰹ.
1:25
ⰺ ⰸⰰⱂⱃⱑⱅⰻ ⰵⰿⱆ ⰻⱄ҃ⱏ ⰳⰾ҃ⱔ. ⱆⰿⰾⱏⱍⰻ ⰻⰸⰻⰴⰻ ⰻⰸ ⱀⰵⰳⱁ.
1:26
ⰺ ⱄⱏⱅⱃⱔⱄⱏ ⰹ ⰴⱈ҃ⱏ ⱀⰵⱍⰻⱄⱅⱏⰹⰻ. ⰺ ⰲⱏⰸⱏⱂⰻⰲⱏ ⰳⰾⰰⱄⱁⰿⱏ ⰲⰵⰾⰻⰵⰿⱐ ⰺⰸⰻⰴⰵ ⰻⰶ ⱀⰵⰳⱁ.
1:27
ⰺ ⱆⰶⰰⱄⱘ ⱄⱔ ⰲⱐⱄⰻ. ⰺ ⱄⱏⱅⱔⰷⰰⱈⱘ ⱄⱔ ⰽⱏ ⱄⰵⰱⱑ ⰳⰾ҃ⱙⱎⱅⰵ. ⱍⱏⱅⱁ ⱆⰱⱁ ⰵⱄⱅⱏ ⱄⰵ. ⱍⱅⱁ ⱆⱍⰵⱀⰻⰵ ⱀⱁⰲⱁⰵ ⱄⰵ. ⱑⰽⱁ ⱂⱁ ⱁⰱⰾⰰⱄⱅⰻ ⰴⱈ҃ⰿⱏ ⱀⰵⱍⰻⱄⱅⱏⰹⰿⱏ ⰲⰵⰾⰻⱅⱏ ⰻ ⱂⱁⱄⰾⱆⱎⰰⱙⱅⱏ ⰵⰳⱁ.
1:28
Ⰺ ⰻⰸⰻⰴⰵ ⱄⰾⱆⱈⱏ ⰵⰳⱁ ⰰⰱⰻⰵ ⰲⱁ ⰲⱐⱄⱘ ⱄⱅⱃⰰⱀⱘ ⰳⰰⰾⰻⰾⰵⰻⱄⰽⱘ.
1:29
ⰺ ⰰⰱⱐⰵ ⰻⱎⰵⰴⱏⱎⰵ ⰻ ⱄⱏⱀⱐⰿⰻⱎⱅⰰ. ⱂⱃⰻⰴⱘ ⰲⱏ ⰴⱁⰿⱏ ⱄⰻⰿⱁⱀⱁⰲⱏ ⰻ ⰰⱀⱐⰴⱃⱑⱁⰲⱏ. ⱄⱏ ⰻ҅ⱑⰽⱁⰲⱁⰿⱏ ⰻ ⱁⰰⱀⱁⰿⱏ.
1:30
Ⱅⱏⱎⱅⰰ ⰶⰵ ⱄⰻⰿⱁⱀⱁⰲⰰ ⰾⰵⰶⰰⱎⰵ ⱁⰳⱀⰵⰿⱐ ⰶⰵⰳⱁⰿⰰ. ⰺ ⰰⰱⰻⰵ ⰳⰾ҃ⰰⱎⱔ ⰵⰿⱆ ⱁ ⱀⰵⰻ.
1:31
ⰺ ⱂⱃⰻⱄⱅⱘⱂⱐ ⰲⱐⰸⰴⰲⰻⰶⰵ ⱙ ⰵⰿⱏ ⰸⰰ ⱃⱘⰽⱘ. ⰺ ⱁⱄⱅⰰⰲⰻ ⱙ ⰰⰱⰻⰵ ⱁⰳⱀⱐ. ⰺ ⱄⰾⱆⰶⰰⰰⱎⰵ ⰻⰿⱏ.
1:32
ⱂⱁⰸⰴⱑ ⰶⰵ ⰱⱏⰹⰲⱏⱎⱓ. ⰵⰳⰴⰰ ⰸⰰⱈⱁⰶⰴⰰⱎⰵ ⱄⰾⱏⱀⱐⱌⰵ. ⱂⱃⰻⱀⱁⱎⰰⰰⱈⱘ ⰽⱏ ⱀⰵⰿⱆ ⰲⱐⱄⱔ ⱀⰵⰴⱘⰶⱏⱀⱏⰹⱗ ⰻ ⰱⱑⱄⱏⱀⱏⰹⱗ.
1:33
ⰺ ⰱⱑ ⰲⰵⱄⱐ ⰳⱃⰰⰴⱏ ⱄⱏⰱⱐⱃⰰⰾⱐ ⱄⱔ ⰽⱏ ⰴⰲⱏⱃⰵⰿⱏ.
1:34
Ⰺ ⰻⱄⱌⱑⰾⰻ ⰿⱏⱀⱁⰳⱏⰹ ⱀⰵⰴⱘⰶⱏⱀⱏⰹ ⰺⰿⱘⱎⱅⱔ ⱃⰰⰸⰾⰻⱍⱏⱀⱏⰹ ⱗⰷⱔ. ⰺ ⰱⱑⱄⱏⰹ ⰿⱏⱀⱁⰳⱏⰹ ⰺⰸⰳⱏⱀⰰ. ⰺ ⱀⰵ ⱁⱄⱅⰰⰲⰾⱑⱎⰵ ⰳⰾ҃ⰰⱅⰻ ⰱⱑⱄⱏ. ⱑⰽⱁ ⰲⰻⰴⱑⰰⱈⱘ ⰻ ::
1:35
Ⰺ ⱓⱅⱃⱁ ⱂⱃⱁⰱⱃⱑⰸⰳⱆ ⰷⱑⰾⱁ. ⰲⱏⱄⱅⰰⰲⱏ ⰻⰸⰻⰴⰵ ⰻⱄ҃ⱐ ⰻ ⰻⰴⰵ ⰲⱏ ⱂⱆⱄⱅⱁ ⰿⱑⱄⱅⱁ. ⰺ ⱅⱆ ⰿⱁⰾⰻⱅⰲⱘ ⰴⱑⰰⱎⰵ.
1:36
ⰺ ⰳⱏⱀⰰⱎⱔ ⰻ ⱄⰻⰿⱁⱀⱏ ⰻ ⰻⰶⰵ ⰱⱑⰰⱈⱘ ⱄⱏ ⱀⰻⰿⱐ.
1:37
ⰺ ⱁⰱⱃⱑⱅⱏⱎⰵ ⰻ ⰳⰾ҃ⰰⱎⱔ ⰵⰿⱆ. ⱑⰽⱁ ⰲⱐⱄⰻ ⰻⱎⱅⱘⱅⱏ ⱅⰵⰱⰵ.
1:38
ⰺ ⰳⰾ҃ⰰ ⰻⰿⱏ ⰻⰴⱑⰿⱏ ⰲⱏ ⰱⰾⰻⰶⱐⱀⱔⱗ ⰲⱐⱄⰻ ⰻ ⰳⱃⰰⰴⱏⰹ. ⰴⰰ ⰻ ⱅⱆ ⱂⱃⱁⱂⱁⰲⱑⰿⱐ. ⱀⰰ ⱄⰵ ⰱⱁ ⰻⰸⰻⰴⱏ.
1:39
ⰺ ⰱⱑ ⱂⱃⱁⱂⱁⰲⱑⰴⰰⱗ ⱀⰰ ⱄⱏⱀⱏⰿⰻⱎⱅⰻⱈⱏ ⰻⱈⱏ. ⰲⱏ ⰲⱏⱄⰵⰻ ⰳⰰⰾⰻⰾⰵⰻ. ⰺ ⰱⱑⱄⱏⰹ ⰻⰸⰳⱁⱀⱔ. ::
1:40
Ⰺ ⱂⱃⰻⰴⰵ ⰽⱏ ⱀⰵⰿⱆ ⱂⱃⱁⰽⰰⰶⰵⱀⱏ ⰿⱁⰾⱔ ⰻ. ⰺ ⱀⰰ ⰽⱁⰾⱑⱀⱆ ⱂⰰⰴⰰⱗ ⰻ ⰳⰾ҃ⱔ ⰵⰿⱆ. ⱑⰽⱁ ⰰⱎⱅⰵ ⱈⱁⱎⱅⰵⱎⰻ ⰿⱁⰶⰵⱎⰻ ⰿⱔ ⰻⱎⱅⰻⱄⱅⰻⱅⰻ.
1:41
ⰺⱄ҃ ⰶⰵ ⰿⰻⰾⱁⱄⱃ҃ⰴⱁⰲⰰⰲⱏ ⱂⱃⱁⱄⱅⰵⱃⱏ ⱃⱘⰽⱘ ⰽⱁⱄⱀⱘ ⰻ. ⰺ ⰳⰾ҃ⰰ ⰵⰿⱆ ⱈⱁⱋⱘ ⰻⱎⱅⰻⱄⱅⰻ ⱄⱔ.
1:42
ⰺ ⱃⰵⰽⱏⱎⱓ ⰵⰿⱆ. ⰰⰱⰻⰵ ⱁⱅⰻⰴⰵ ⱂⱃⱁⰽⰰⰸⰰ ⱁⱅⱏ ⱀⰵⰳⱁ. ⰺ ⱍⰻⱄⱅⱏ ⰱⱏⰹⱄⱅⱏ.
1:43
ⰺ ⰸⰰⱂⱃⱑⱋⱐ ⰵⰿⱆ ⰰⰱⰻⰵ ⰻⰸⰳⱏⱀⰰ ⰻ.
1:44
ⰺ ⰳⰾ҃ⰰ ⰵⰿⱆ ⰱⰾⱓⰴⰻ ⱄⱔ ⱀⰻⰽⱁⰿⱆⰶⰵ ⱀⰻⱍⰵⱄⱁⰶⰵ ⱀⰵ ⱃⱐⱌⰻ. ⱀⱏ ⱎⰵⰴⱏ ⱂⱁⰽⰰⰶⰻ ⱄⱔ ⰰⱃⱈⰻⰵⱃⰵⱁⰲⰻ. ⰻ ⱂⱃⰻⱀⰵⱄⰻ ⰸⰰ ⱁⱍⰻⱎⱅⰵⱀⰻⰵ ⱅⰲⱁⰵ. ⰵⰶⰵ ⱂⱁⰲⰵⰾⱑ ⰿⱁⱄⰻ ⰲⱏ ⱄⱏⰲⱑⰴⱑⱀⰻⰵ ⰻⰿⱏ ::
1:45
ⱁⱀⱏ ⰶⰵ ⰻⱎⰵⰴⱏ ⱀⰰⱍⱔⱅⱏ ⱂⱃⱁⱂⱁⰲⱑⰴⰰⱅⰻ ⰿⱏⱀⱁⰳⱁ. ⰺ ⱂⱃⱁⱀⱁⱄⰻⱅⰻ ⱄⰾⱁⰲⱁ. ⱑⰽⱁ ⰽ ⱅⱁⰿⱆ ⱀⰵ ⰿⱁⰶⰰⰰⱎⰵ ⱑⰲⱑ ⰲⱏ ⰳⱃⰰⰴⱏ ⰲⱐⱀⰻⱅⰻ. ⱀⱏ ⰲⱐⱀⱑ ⰲⱏ ⱂⱆⱄⱅⱑⱈⱏ ⰿⱑⱄⱅⱑⱈⱏ ⰱⱑ. ⰺ ⱂⱃⰻⱈⱁⰶⰴⰰⱈⱘ ⰽⱏ ⱀⰵⰿⱆ ⱁⱅⱏ ⰲⱏⱄⱘⰴⱑ ::