ЕВАНГЕЛИЕ ЕЖЕ Ѿ ЛОУКꙐ
15:1
Ⰱⱑⰰⱈⱘ ⰶⰵ ⰽⱏ ⱀⰵⰿⱆ ⱂⱃⰻⰱⰾⰻⰶⰰⱙⱎⱅⰵ ⱄⱔ ⰲⱐⱄⰻ ⰿⱏⰹⱅⰰⱃⰵ ⰻ ⰳⱃⱑⱎⱏⱀⰻⱌⰻ. ⱂⱁⱄⰾⱆⱎⰰⱅⱏ ⰵⰳⱁ.
15:2
ⰻ ⱃⱁⱂⱅⰰⰰⱈⱘ ⱇⰰⱃⰻⱄⱑⰻ. ⰻ ⰽⱏⱀⰻⰶⱏⱀⰻⱌⰻ ⰳⰾ҃ⱙⱎⱅⰵ. ⱑⰽⱁ ⱄⱐ ⰳⱃⱑⱎⱏⱀⰻⰽⱏⰹ ⱂⱃⰻⰵⰿⰾⰵⱅⱏ. ⰻ ⱄⱏ ⱀⰻⰿⰻ ⱑⱄⱅⱏ ::
15:3
Ⱃⰵⱍⰵ ⰶⰵ ⰽⱏ ⱀⰻⰿⱐ ⱂⱃⰻⱅⱏⱍⱘ ⱄⰻⱙ ⰳⰾ҃ⱔ.
15:4
ⰽⱏⰹ ⱍⰾⰲ҃ⰽⱏ ⱁⱅⱏ ⰲⰰⱄⱏ. ⰻⰿⱏⰹ ⱄⱏⱅⱁ ⱁⰲⰵⱌⱏ ⰻ ⱂⱁⰳⱆⰱⰾⱐ ⰵⰴⰻⱀⱘ ⱁⱅⱏ ⱀⰻⱈⱏ. ⱀⰵ ⱁⱄⱅⰰⰲⰻⱅⱏ ⰾⰻ ⰴⰵⰲⱔⱅⰻ ⰴⰵⱄⱔⱅⱏ ⰻ ⰴⰵⰲⱔⱅⰻ ⰲⱏ ⱂⱆⱄⱅⱏⰹⱀⰻ. ⰻ ⰻⰴⰵⱅⱏ ⰲⱏ ⱄⰾⱑⰴⱏ ⱂⱁⰳⱏⰹⰱⱏⱎⱔⱗ. ⰴⱁⱀⱐⰴⰵⰶⰵ ⱁⰱⱃⱔⱎⱅⰵⱅⱏ ⱙ.
15:5
ⰺ ⱁⰱⱃⱑⱅⱏ ⰲⱏⰸⰾⰰⰳⰰⰰⱅⱏ ⱀⰰ ⱃⰰⰿⱑ ⱄⰲⱁⰻ ⱃⰰⰴⱆⱗ ⱄⱔ.
15:6
ⰻ ⱂⱃⰻⱎⰵⰴⱏ ⰲⱏ ⰴⱁⰿⱏ. ⱄⱏⰸⱏⰹⰲⰰⰰⱅⱏ ⰴⱃⱆⰳⱏⰹ ⰻ ⱄⱘⱄⱑⰴⱏⰹ ⰳⰾ҃ⱔ ⰻⰿⱏ. ⱃⰰⰴⱆⰻⱅⰵ ⱄⱔ ⱄⱏ ⰿⱏⱀⱁⱙ ⱑⰽⱁ ⱁⰱⱃⱑⱅⱏ ⱁⰲⱏⱌⱘ ⰿⱁⱙ ⱂⱁⰳⱏⰹⰱⱏⱎⱘⱙ.
15:7
ⰳⰾ҃ⱙ ⰲⰰⰿⱏ ⱑⰽⱁ ⱅⰰⰽⱁ ⱃⰰⰴⱁⱄⱅⱏ ⰱⱘⰴⰵⱅⱏ ⱀⰰ ⱀⰱ҃ⱄⰵ. ⱁ ⰵⰴⰻⱀⱁⰿⱏ ⰳⱃⱑⱎⱏⱀⰻⱌⱑ ⰽⰰⱙⱎⱅⰻ ⱄⱔ. ⱀⰵⰶⰵ ⱁ ⰴⰵⰲⱔⱅⰻ ⰴⰵⱄⱔⱅⱏ ⰻ ⰴⰵⰲⱔⱅⰻ ⱂⱃⰰⰲⰵⰴⱏⱀⰻⱌⱑⱈⱏ ⰻⰶⰵ ⱀⰵ ⱅⱃⱑⰱⱆⱙⱅⱏ ⱂⱁⰽⰰⰰⱀⰻⱑ.
15:8
ⰾⰻ ⰽⰰⱑ ⰶⰵⱀⰰ ⰻⰿⱘⱎⱅⰻ ⰴⰵⱄⱔⱅⱏ ⰴⱃⰰⰳⰿⱏ. ⰰⱎⱅⰵ ⱂⱁⰳⱆⰱⰻⱅⱏ ⰴⱃⰰⰳⰿⱘ ⰵⰴⰻⱀⱘ. ⱀⰵ ⰲⱏⰶⰻⰷⰰⰰⱅⱏ ⰾⰻ ⱄⰲⱑⱅⰻⰾⱐⱀⰻⰽⰰ. ⰻ ⱂⱁⰿⰵⱅⰵⱅⱏ ⱈⱃⰰⰿⰻⱀⱏⰹ. ⰺ ⰻⱎⱅⰵⱅⱏ ⱂⱃⰻⰾⰵⰶⱏⱀⱁ ⰴⱁⱀⱐⰴⰵⰶⰵ ⱁⰱⱃⱔⱎⱅⰵⱅⱏ.
15:9
ⰻ ⱁⰱⱃⱑⱅⱏⱎⰻ ⱄⱏⰸⱏⰹⰲⰰⰰⱅⱏ ⰴⱃⱆⰳⱏⰹ. ⰻ ⱄⱘⱄⱑⰴⱏⰹⱀⱔ ⰳⰾ҃ⱙⱎⱅⰻ. ⱃⰰⰴⱆⰻⱅⰵ ⱄⱔ ⱄⱏ ⰿⱏⱀⱁⱙ. ⱑⰽⱁ ⱁⰱⱃⱑⱅⱏ ⰴⱃⰰⰳⰿⱘ ⱙⰶⰵ ⱂⱁⰳⱆⰱⰻⱈⱏ.
15:10
ⱅⰰⰽⱁ ⰳⰾ҃ⱙ ⰲⰰⰿⱏ. ⱃⰰⰴⱁⱄⱅⱐ ⰱⱏⰹⰲⰰⰰⱅⱏ ⱂⱃⱑⰴⱏ ⰰ!ⱀⰾⱏⰹ ⰱⰶ҃ⰻⰻ. ⱁ ⰵⰴⰻⱀⱁⰿⱐ ⰳⱃⱑⱎⱏⱀⰻⱌⱑ ⰽⰰⱙⱎⱅⰻⰻⰿⱏ ⱄⱔ ......
15:11
Ⱃⰵⱍⰵ ⰶⰵ ⰳ҃ⱏ ⱍⰾⰲ҃ⰽⱏ ⰵⰴⰻⱀⱏ ⰻⰿⱑ ⰴⱏⰲⰰ ⱄⱀ҃ⰰ.
15:12
ⰻ ⱃⰵⱍⰵ ⱓⱀⱑⰻ ⰵⱓ ⱁⱅ҃ⱌⱓ. !ⱁⱅⱍⰵ ⰴⰰⰶⰴⱐ ⰿⰻ ⰴⱁⱄⱅⱁⰻⱀⱘⱙ ⱍⱔⱄⱅⱐ ⰻⰿⱑⱀⰻⱑ. ⰻ ⱃⰰⰸⰴⱑⰾⰻ ⰻⰿⰰ ⰻⰿⱑⱀⰻⰵ.
15:13
ⰺ ⱀⰵ ⱂⱁ ⰿⱏⱀⱁⰷⱑⱈⱏ ⰴⱐⱀⰵⱈⱏ ⱄⱏⰱⱏⱃⰰⰲⱏ ⰲⱐⱄⰵ ⰿⱐⱀⰻⰻ ⱄⱀ҃ⱏ ⱁⱅⰻⰴⰵ ⱀⰰ ⱄⱅⱃⰰⱀⱘ ⰴⰰⰾⰵⱍⰵ. ⰻ ⱅⱆ ⱃⰰⱄⱅⱁⱍⰻ ⰻⰿⱑⱀⰻⰵ ⱄⰲⱁⰵ ⰶⰻⰲⱏⰹ ⰱⰾⱘⰴⱏⱀⱁ.
15:14
ⰻⰶⰴⰻⰲⱏⱎⱓ ⰶⰵ ⰵⰿⱆ ⰲⱐⱄⱑ. ⰱⱏⰹⱄⱅⱏ ⰳⰾⰰⰴⱏ ⰽⱃⱑⱂⱁⰽⱏ ⱀⰰ ⱄⱅⱃⰰⱀⱑ ⱅⱁⰻ. ⰻ ⱅⱏ ⱀⰰⱍⱔⱅⱏ ⰾⰻⱎⰻⱅⰻ ⱄⱔ.
15:15
ⰻ ⱎⰵⰴⱏ ⱂⱃⰻⰾⱑⱂⰻ ⱄⱔ ⰵⰴⰻⱀⱁⰿⱏ ⱁⱅⱏ ⰶⰻⱅⰵⰾⱏ ⱅⱁⱗ ⱄⱅⱃⰰⱀⱏⰹ. ⰻ ⱂⱁⱄⱏⰾⰰ ⰻ ⱀⰰ ⱄⰵⰾⰰ ⱄⰲⱁⱑ ⱂⰰⱄⱅⱏ ⱄⰲⰻⱀⰻⰻ.
15:16
ⰹ ⰶⰵⰾⰰⰰⱎⰵ ⱀⰰⱄⱏⰹⱅⰻⱅⰻ ⱍⱃⱑⰲⱁ ⱄⰲⱁⰵ ⱁⱅⱏ ⱃⱁⰶⰵⱌⱏ ⱗⰶⰵ ⱑⰴⱑⰰⱈⱘ ⱄⰲⰻⱀⰻⱗ. ⰻ ⱀⰻⰽⱅⱁⰶⰵ ⱀⰵ ⰴⰰⱑⱎⰵ ⰵⰿⱆ.
15:17
ⰲⱐ ⱄⰵⰱⱑ ⰶⰵ ⱂⱃⰻⱎⰵⰴⱏ ⱃⰵⱍⰵ. ⰽⱁⰾⰻⰽⱁ ⱀⰰⰻⰿⱏⱀⰻⰽⱏ ⱁⱅⱏⱌⰰ ⰿⱁⰵⰳⱁ. ⰻⰸⰱⱏⰹⰲⰰⱙⱅⱏ ⱈⰾⱑⰱⰻ. ⰰⰸⱏ ⰶⰵ ⰳⰾⰰⰴⱁⰿⱐ ⰳⱏⰹⰱⰾⱙ.
15:18
ⰲⱏⱄⱅⰰⰲⱏ ⰻⰴⱘ ⰽⱏ ⱁⱅ҃ⱌⱓ ⰿⱁⰵⰿⱆ. ⰺ ⱃⰵⰽⱘ ⰵⰿⱆ ⱁⱅⱏⱍⰵ ⱄⱏⰳⱃⱑⱎⰻⱈⱏ ⱀⰰ ⱀⰵⰱⱁ ⰻ ⱂⱃⱑⰴⱏ ⱅⱁⰱⱁⱙ.
15:19
ⱓⰶⰵ ⱀⱑⱄⰿⱏ ⰴⱁⱄⱅⱁⰻⱀⱏ ⱀⰰⱃⰵⱋⰻ ⱄⱔ ⱄⱀ҃ⱏ ⱅⰲⱁⰻ. ⱄⱏⱅⰲⱁⱃⰻ ⰿⱔ ⱑⰽⱁ ⰵⰴⰻⱀⱁⰳⱁ ⱁⱅⱏ ⱀⰰⰻⰿⱏⱀⰻⰽⱏ ⱅⰲⱁⰻⱈⱏ.
15:20
ⰺ҅ ⰲⱏⱄⱅⰰⰲⱏ ⰻⰴⰵ ⰽⱏ !ⱁⱅⱍⱓ ⱄⰲⱁⰵⰿⱆ. ⰵⱋⰵ ⰶⰵ ⰵⰿⱆ ⰴⰰⰾⰵⱍⰵ ⱄⱘⱎⱅⱓ. ⱆⰸⱐⱃⱑ ⰻ ⱁⱅⰵⱌⱏ ⰵⰳⱁ. ⰻ ⰿⰻⰾⱏ ⰵⰿⱆ ⰱⱏⰹⱄⱅⱏ. ⰺ ⱅⰵⰽⱏ ⱀⰰⱂⰰⰴⰵ ⱀⰰ ⰲⱏⰹⱙ ⰵⰳⱁ ⰻ ⱁⰱⰾⱁⰱⱏⰹⰸⰰ ⰻ.
15:21
ⱃⰵⱍⱔ ⰶⰵ ⰵⰿⱆ ⱄⱀ҃ⱏ !ⱁⱅⱍⰵ. ⱄⱏⰳⱃⱑⱎⰻⱈⱏ ⱀⰰ ⱀⰵⰱⱁ ⰻ ⱂⱃⱑⰴⱏ ⱅⱁⰱⱁⱙ. ⱓⰶⰵ ⱀⱑⱄⰿⱏ ⰴⱁⱄⱅⱁⰻⱀⱏ ⱀⰰⱃⰵⱎⱅⰻ ⱄⱔ ⱄⱀ҃ⱏ ⱅⰲⱁⰻ.
15:22
ⱃⰵⱍⰵ ⰶⰵ ⱁⱅ҃ⱌⱏ ⰽⱏ ⱃⰰⰱⱁⰿⱏ ⱄⰲⱁⰻⰿⱏ. ⰺⰸⱀⰵⱄⱑⱅⰵ ⱁⰴⰵⰶⰴⱘ ⱂⱃⱏⰲⱘⱙ ⰺ ⱁⰱⰾⱑⱌⱑⱅⰵ ⰻ. ⰺ ⰴⰰⰴⰻⱅⰵ ⱂⱃⱏⱄⱅⰵⱀⱐ ⱀⰰ ⱃⱘⰽⱘ ⰵⰳⱁ. ⰺ ⱄⰰⱂⱁⰳⱏⰹ ⱀⰰ ⱀⱁⰷⱑ.
15:23
ⰺ҅ ⱂⱃⰻⰲⰵⰴⱏⱎⰵ ⱅⰵⰾⰵⱌⱏ ⱆⱂⰻⱅⱑⱀⱏⰹ ⰸⰰⰽⱁⰾⰻⱅⰵ. ⰻ ⱑⰴⱏⱎⰵ ⰴⰰ ⰲⰵⱄⰵⰾⰻⰿⱏ ⱄⱔ.
15:24
ⱑⰽⱁ ⱄⱀ҃ⱏ ⰿⱁⰻ ⱄⱐ ⰿⱃⱏⱅⰲⱏ ⰱⱑ ⰻ ⱁⰶⰻⰲⰵ. ⰺⰸⰳⱏⰹⰱⰾⱏ ⰱⱑ ⰻ ⱁⰱⱃⱑⱅⰵ ⱄⱔ. ⰺ ⱀⰰⱍⱔⱄⱔ ⰲⰵⱄⰵⰾⰻⱅⰻ ⱄⱔ.
15:25
ⰱⱑ ⰶⰵ ⱄⱀ҃ⱏ ⰵⰳⱁ ⱄⱅⰰⱃⱑⰻ ⱀⰰ ⱄⰵⰾⱑ. ⰺ ⱑⰽⱁ ⰳⱃⱔⰴⱏⰹ ⱂⱃⰻⰱⰾⰻⰶⰻ ⱄⱔ ⰽⱏ ⰴⱁⰿⱆ. ⱄⰾⱏⰹⱎⰰ ⱂⱑⱀⰻⱑ ⰻ ⰾⰻⰽⱏⰹ.
15:26
ⰺ ⱂⱃⰻⰸⱏⰲⰰⰲⱏ ⰵⰴⰻⱀⱁⰳⱁ ⱁⱅⱏ ⱃⰰⰱⱏ. ⰲⱏⱂⱃⰰⱎⰰⰰⱎⰵ ⱍⱅⱁ ⱆⰱⱁ ⱄⰻ ⱄⱘⱅⱏ.
15:27
ⱁⱀⱏ ⰶⰵ ⱃⰵⱍⰵ ⰵⰿⱆ ⱑⰽⱁ ⰱⱃⰰⱅⱃⱏ ⱅⰲⱁⰻ ⱂⱃⰻⰴⰵ. ⰺ ⰸⰰⰽⰾⰰ ⱁⱅ҃ⱌⱏ ⱅⰲⱁⰻ ⱅⰵⰾⰵⱌⱏ ⱆⱂⰻⱅⱑⱀⱏⰹ ⱑⰽⱁ ⱄⱏⰴⱃⰰⰲⰰ ⰻ ⱂⱃⰻⱗⱅⱏ.
15:28
ⱃⰰⰸⰳⱀⱑⰲⰰ ⰶⰵ ⱄⱔ ⰻ ⱀⰵ ⱈⱁⱅⱑⰰⱎⰵ ⰲⱏⱀⰻⱅⰻ. ⱁⱅ҃ⱌⱏ ⰶⰵ ⰵⰳⱁ ⰻⱎⰵⰴⱏ ⰿⱁⰾⱑⰰⱎⰵ ⰻ.
15:29
ⱁⱀⱏ ⰶⰵ ⱁⱅⱏⰲⱑⱋⰰⰲⱏ ⱃⰵⱌⰵ !ⱁⱅⱏⱌⱓ ⱄⰲⱁⰵⰿⱆ. ⱄⰵ ⱅⱁⰾⰻⰽⱁ ⰾⱑⱅⱏ ⱃⰰⰱⱁⱅⰰⱙ ⱅⰵⰱⱑ. ⰺ ⱀⰻⰽⱁⰾⰻⰶⰵ ⰸⰰⱂⱁⰲⱑⰴⰻ ⱅⰲⱁⰵⱗ ⱀⰵ ⱂⱃⱑⱄⱅⱘⱂⰻⱈⱏ. ⰺ ⰿⱐⱀⱑ ⱀⰻⰽⱁⰾⰻⰶⰵ ⱀⰵ ⰴⰰⰾⱏ ⰵⱄⰻ ⰽⱁⰸⱐⰾⱔⱅⰵ. ⰴⰰ ⱄⱏ ⰴⱃⱆⰳⱏⰹ ⰿⱁⰻⰿⰻ ⰲⱏⰸⰲⰵⱄⰵⰾⰻⰾⱏ ⱄⱔ ⰱⰻⰿⱐ.
15:30
ⰵⰳⰴⰰ ⰶⰵ ⱄⱀ҃ⱏ ⱅⰲⱁⰻ ⱄⱐ. ⰺⰸⱑⰴⱏⰹ ⱅⰲⱁⰵ ⰻⰿⱑⱀⰻⰵ ⱄⱏ ⰾⱓⰱⱁⰴⱑⰻⱌⰰⰿⰻ ⱂⱃⰻⰴⰵ. ⰸⰰⰽⰾⰰ ⰵⰿⱆ ⱅⰵⰾⰵⱌⱏ ⱂⰻⱅⱁⰿⱏⰹ.
15:31
ⱁⱀⱏ ⰶⰵ ⱃⰵⱍⰵ ⰵⰿⱆ. ⱍⱔⰴⱁ ⱅⱏⰹ ⰲⱐⱄⰵⰳⰴⰰ ⱄⱏ ⰿⱐⱀⱁⱙ ⰵⱄⰻ. ⰺ ⰲⱐⱄⱑ ⰿⱁⱑ ⱅⰲⱁⱑ ⱄⱘⱅⱏ.
15:32
ⰲⱐⰸⰲⰵⱄⰵⰾⰻⱅⰻ ⰶⰵ ⱄⱔ ⰻ ⰲⱏⰸⰴⱃⰰⰴⱁⰲⰰⱅⰻ ⱂⱁⰴⱁⰱⰰⰰⱎⰵ. ⱑⰽⱁ ⰱⱃⰰⱅⱃⱏ ⱅⰲⱁⰻ ⱄⱐ ⰿⱃⱏⱅⰲⱐ ⰱⱑ ⰻ ⱁⰶⰻⰲⰵ. ⰺⰸⰳⱏⰹⰱⰾⱐ ⰱⱑ ⰻ ⱁⰱⱃⱑⱅⰵ ⱄⱔ. :: ⰽ!ⱌ ::