ЕВАНГЕЛИЕ ЕЖЕ Ѿ ЛОУКꙐ
1:1
Ⱂⱁⱀⰵⰶⰵ ⱆⰱⱁ ⰿⱏⱀⱁⰷⰻ ⱀⰰⱍⱔⱄⱔ ⱍⰻⱀⰻⱅⰻ ⱂⱁⰲⱑⱄⱅⱐ ⱁ ⰺⰸⰲⱑⱄⱅⱁⰲⰰⱀⱏⰹⱈⱏ ⰲⱏ ⱀⰰⱄⱏ ⰲⰵⱎⱅⰵⱈⱏ.
1:2
ⱑⰽⱁⰶⰵ ⱂⱃⱑⰴⰰⱎⱔ ⱀⰰⰿⱏ ⰱⱏⰹⰲⱏⱎⰵⰻ ⰻⱄⰽⱁⱀⰻ ⱄⰰⰿⱁⰲⰻⰴⱐⱌⰻ ⰺ ⱄⰾⱆⰳⱏⰹ ⱄⰾⱁⰲⰵⱄⰵ.
1:3
ⰺⰸⰲⱁⰾⰻ ⱄⱔ ⰻ ⰿⱐⱀⱑ ⱈⱁⰶⰴⱏⱎⱓ ⰻⱄ ⱂⱃⱏⰲⰰ ⱂⱁ ⰲⱐⱄⱑⱈⱏ. ⰲⱏ ⰹⱄⱅⰻⱀⱘ ⱂⱁ ⱃⱔⰴⱘ ⱂⰻⱄⰰⱅⰻ ⱅⰵⰱⱑ. ⱄⰾⰰⰲⱏⱀⱏⰹ ⱅⰵⱁⱇⰻⰾⰵ.
1:4
ⰴⰰ ⱃⰰⰸⱆⰿⱑⰵⱎⰻ ⱁ ⱀⰻⱈⱏⰶⰵ ⱀⰰⱆⱍⰻⰾⱏ ⱄⱔ ⰵⱄⰻ ⱄⰾⱁⰲⰵⱄⰵⱈⱏ ⱆⱅⰲⱃⱏⰶⰴⰵⱀⰻⰵ ::
1:5
Ⰱⱏⰹⱄⱅⱏ ⰲⱏ ⰴⱐⱀⰻ ⰻⱃⱁⰴⰰ ⱌⱑⱄⱑⱃⱑ ⰻⱓⰴⰵⰻⱄⰽⰰ. ⰺⰵⱃⰵⰻ ⰵⰴⰻⱀⱏ ⰻⰿⰵⱀⰵⰿⱏ ⰸⰰⱈⰰⱃⰻⱑ. ⱁⱅⱏ ⰵⱇⰻⰿⱑⱃⰻⱗ ⰰⰲⰻⱑⱀⱔ. ⰺ ⰶⰵⱀⰰ ⰵⰳⱁ !ⱁⱅⱏ ⰴⱏⱎⱅⰵⱃⱏ ⰰⱃⱉⱀⱐ. ⰺ ⰻⰿⱔ ⰵⰻ ⰵⰾⰻⱄⰰⰲⰵⱅⱏ.
1:6
ⰱⱑⰰⱎⰵⱅⰵ ⰶⰵ ⱁⰱⰰ ⱂⱃⰰⰲⰵⰴⱏⱀⰰ ⱂⱃⱑⰴⱏ !ⰱⰿⱏ. ⱈⱁⰴⱔⱎⱅⰰ ⰲⱏ ⰸⰰⱂⱁⰲⱑⰴⰵⱈⱏ ⰲⱏⱄⱑⱈⱏ. ⰺ ⱁⱂⱃⰰⰲⱏⰴⰰⱀⰻⰻⱈⱏ ⰳⱀ҃ⰻ ⰻ҅}ⱈⱏ ⰱⰵⱄ ⱂⱁⱃⱁⰽⰰ.
1:7
ⰻ ⱀⰵ ⰱⱑ ⰻⰿⰰ ⱍⱔⰴⰰ. ⱂⱁⱀⰵⰶⰵ ⰱⱑ ⰵⰾⰻⱄⰰⰲⰵⱅⱐ ⱀⰵⱂⰾⱁⰴⱏⰹ. ⰺ ⱁⰱⰰ ⰸⰰⰿⰰⱅⱁⱃⱑⰲⱏⱎⰰ ⰲⱐ ⰴⱐⱀⰵⱈⱏ ⱄⰲⱁⰻⱈⱏ ⰱⱑⰰⱎⰵⱅⰵ.
1:8
ⰱⱏⰹⱄⱅⱏ ⰶⰵ ⱄⰾⱆⰶⱔⱎⱅⱆ ⰵⰿⱆ. ⰲⱏ ⱍⰻⱀⱆ ⱍⱃⱑⰴⱏⰹ ⱄⰲⱁⰵⱗ. ⱂⱃⱑⰴⱏ !ⰱⰿⱏ.
1:9
ⱂⱁ ⱁⰱⱏⰹⱍⰰⱓ ⰻⰵⱃⰵⰻⱄⰽⱆⰿⱆ. ⰽⰾⱓⱍⰻ ⱄⱔ ⰵⰿⱆ ⱂⱁⰽⰰⰴⰻⱅⰻ ⰲⱏⱎⰵⰴⱏⱎⱓ ⰲⱏ !ⱌⱃⰽⰲⱏ ⰳⱀ҃ⱙ.
1:10
ⰺ ⰲⱐⱄⰵ ⰿⱏⱀⱁⰶⱏⱄⱅⰲⱁ ⰾⱓⰴⰻⰻ ⰱⱑ ⰿⱁⰾⰻⱅⰲⱘ ⰴⱑⱗ ⰲⱐⱀⱑ ⰲⱏ ⰳⱁⰴⱏ ⱅⰵⰿⱐⱑⱀⰰ.
1:11
ⱑⰲⰻ ⰶⰵ ⱄⱔ ⰵⰿⱆ ⰰⱀⰼ҃ⱏ ⰳⱀ҃ⱐ ⱄⱅⱁⱗ ⱁ ⰴⰵⱄⱀⱘⱙ ⱁⰾⱅⰰⱃⱑ ⰽⰰⰴⰻⰾⱏⱀⰰⰵⰳⱁ.
1:12
ⰺ ⱄⱏⰿⱔⱅⰵ ⱄⱔ ⰸⰰⱈⰰⱃⰻⱑ ⰲⰻⰴⱑⰲⱏ. ⰺ ⱄⱅⱃⰰⱈⱏ ⱀⰰⱂⰰⰴⰵ ⱀⰰ ⱀⱐ.
1:13
ⱃⰵⱍⰵ ⰶⰵ ⰽⱏ ⱀⰵⰿⱆ ⰰⱀⰼ҃ⰾⱏ. ⱀⰵ ⰱⱁⰻ ⱄⱔ ⰸⰰⱈⰰⱃⰻⰵ. ⰸⰰⱀⰵ ⱆⱄⰾⱏⰹⱎⰰⱀⰰ ⰱⱏⰹⱄⱅⱏ ⰿⱁⰾⰻⱅⰲⰰ ⱅⰲⱁⱑ. ⰺ ⰶⰵⱀⰰ ⱅⰲⱁⱑ ⰵⰾⰻⱄⰰⰲⰵⱅⱐ ⱃⱁⰴⰻⱅⱏ ⱄⱀ҃ⱏ ⱅⰵⰱⱑ. ⰺ ⱀⰰⱃⰵⱍⰵⱎⰻ ⰻⰿⱔ ⰵⰿⱆ ⰻⱁⰰⱀⱏ.
1:14
ⰺ ⰱⱘⰴⰵⱅⱏ ⱅⰵⰱⱑ ⱃⰰⰴⱁⱄⱅⱐ ⰻ ⰲⰵⱄⰵⰾⰻⰵ. ⰺ ⰿⱏⱀⱁⰷⰻ ⱁ ⱃⱁⰶⰴⱐⱄⱅⰲⱑ ⰵⰳⱁ ⰲⱏⰸⰴⱃⰰⰴⱆⱙⱅⱏ ⱄⱔ.
1:15
ⰱⱘⰴⰵⱅⱏ ⰱⱁ ⰲⰵⰾⰵⰻ ⱂⱃⱑⰴⱏ !ⰳⰿⱐ. ⰻ ⰲⰻⱀⰰ ⰻ ⱄⰻⰽⰵⱃⰰ ⱀⰵ ⰻⰿⰰⱅⱏ ⱂⰻⱅⰻ. ⰺ ⰴⱈ҃ⰰ ⱄⱅ҃ⰰⰰⰳⱁ ⰻⱄⱂⰾⱏⱀⰻⱅⱏ ⱄⱔ ⰵⱎⱅⰵ ⰻ ⱍⱃⱑⰲⰰ ⰿⰰⱅⰵⱃⰵ ⱄⰲⱁⰵⱗ.
1:16
ⰺ ⰿⱏⱀⱁⰳⱏⰹ ⱄⱀ҃ⰲⱏ !ⰻⰸⰴⱃⰾⰲⱏ ⱁⰱⱃⰰⱅⰻⱅⱏ ⰽⱏ ⰳ҃ⰻ ⰱ҃ⱆ ⰻⱈⱏ.
1:17
ⰺ ⱅⱏ ⱂⱃⱑⰴⱏⰻⰴⰵⱅⱏ ⱂⱃⱑⰴⱏ ⱀⰻⰿⱐ ⰴⱈ҃ⱁⰿⱐ ⰻ ⱄⰻⰾⱁⱙ ⰻⰾⰻⰻⱀⱁⱙ. ⱁⰱⱃⰰⱅⰻⱅⰻ ⱄⱃⱏⰴⱏⱌⰰ ⱁⱅⱏⱌⰵⰿⱏ ⱀⰰ ⱍⱔⰴⰰ. ⰺ ⱂⱃⱁⱅⰻⰲⱏⱀⱏⰹⱗ ⰲⱏ ⰿⱘⰴⱃⱁⱄⱅⱐ ⱂⱃⰰⰲⰵⰴⱏⱀⱏⰹⱈⱏ. ⱆⰳⱁⱅⱁⰲⰰⱅⰻ !ⰳⰲⰻ ⰾⱓⰴⰻ ⱄⱏⰲⱃⱏⱎⰵⱀⱏⰹ.
1:18
ⰺ ⱃⰵⱍⰵ ⰸⰰⱈⰰⱃⰻⱑ ⰽⱏ ⰰⱀⰼ҃ⱆ. ⱂⱁ ⱍⰵⱄⱁⰿⱆ ⱃⰰⰸⱆⰿⱑⱙ ⱄⰵ. ⰰⰸⱏ ⰱⱁ ⰵⱄⰿⱏ ⱄⱅⰰⱃⱏ ⰻ ⰶⰵⱀⰰ ⰿⱁⱑ ⰸⰰⰿⰰⱅⱁⱃⱑⰲⱏⱎⰻ ⰲⱐ ⰴⱐⱀⰵⱈⱏ ⱄⰲⱁⰻⱈⱏ.
1:19
ⰺ ⱁⱅⱏⰲⱑⱎⱅⰰⰲⱏ ⰰⱀⰼ҃ⰾⱏ. ⱃⰵⱍⰵ ⰵⰿⱆ. ⰰⰸⱏ ⰵⱄⰿⱏ ⰳ҃ⰰⰲⱃⰾⱏ ⱂⱃⱑⱄⱅⱁⱗⰻ ⱂⱃⱑⰴⱏ !ⰱⰿⱏ. ⰺ ⱂⱁⱄⱏⰾⰰⱀⱏ ⰵⱄⰿⱏ ⰳⰾ҃ⱅⰻ [ⰽⱏ] ⱅⰵⰱⱑ. ⰺ ⰱⰾⰰⰳⱁⰲⱑⱄⱅⰻⱅⰻ ⱅⰵⰱⱑ.
1:20
ⰺ ⱄⰵ ⰱⱘⰴⰵⱎⰻ ⰿⰾⱏⱍⱔ ⰻ ⱀⰵ ⰿⱁⰳⱏⰹ ⱂⱃⱁⰳⰾⰰⰳⱁⰾⰰⱅⰻ. ⰴⱁ ⱀⰵⰳⱁⰶⰵ ⰴⱐⱀⰵ ⰱⱘⰴⰵⱅⱏ ⱄⰵ. ⰸⰰⱀⰵ ⱀⰵ ⰲⱑⱃⱁⰲⰰ ⱄⰾⱁⰲⰵⱄⰵⰿⱏ ⰿⱁⰻⰿⱏ. ⱑⰶⰵ ⱄⱏⰱⱘⰴⱘⱅⱏ ⱄⱔ ⰲⱏ ⰲⱃⱑⰿⱔ ⱄⰲ ⰵ҅.
1:21
ⰺ ⰱⱑⱎⱔ ⰾⱓⰴⱐⰵ ⰶⰻⰴⱘⱋⰵ ⰸⰰⱈⰰⱃⰻⱗ. ⰺ ⱍⱓⰶⰴⰰⰰⱈⱘ ⱄⱔ ⰵⰶⰵ ⰽⱏⱎⱀⱑⰰⱎⰵ ⱅⱏ ⰲⱏ ⱌⱃⱏⰽⱏⰲⰵ.
1:22
ⰺⱎⰵⰴⱏ ⰶⰵ ⱀⰵ ⰿⱁⰶⰰⰰⱎⰵ ⰳⰾ҃ⰰⱅⰻ ⰽⱏ ⰾⱓⰴⰵⰿⱏ. ⰺ ⱃⰰⰸⱆⰿⱑⱎⱔ ⱑⰽⱁ ⰲⰻⰴⱑⱀⰻⰵ ⰲⰻⰴⱑ ⰲⱏ !ⱌⱃⰽⰲⰻ. ⰺ ⱅⱏ ⰱⱑ ⱂⱁⰿⰰⰲⰰⱗ ⰻⰿⱏ. ⰺ ⱂⱃⱑⰱⱏⰹⰲⰰⰰⱎⰵ ⱀⱑⰿⱏ.
1:23
ⰺ ⰱⱏⰹⱄⱅⱏ ⱑⰽⱁ ⰻⱄⱂⰾⱏⱀⰻⱎⱔ ⱄⱔ ⰴⰵⱀⱐⰵ ⱄⰾⱆⰶⱐⰱⱏⰹ ⰵⰳⱁ ⰻⰴⰵ ⰲⱏ ⰴⱁⰿⱏ ⱄⰲⱁⰻ.
1:24
ⱂⱁ ⱄⰻⱈⱏ ⰶⰵ ⰴⱐⱀⰵⱈⱏ :: ⰸ!ⱍ :: ⰸⰰⱍⱔⱅⱏ ⰵⰾⰻⱄⰰⰲⰵⱅⱐ ⰶⰵⱀⰰ ⰵⰳⱁ. ⰺ ⱅⰰⱑⱎⰵ ⱄⱔ !ⰴ !ⰿⱄⱌⱏ ⰳⰾ҃ⱙⱎⱅⰻ.
1:25
ⱑⰽⱁ ⱅⰰⰽⱁ ⱄⱏⱅⰲⱁⱃⰻ ⰿⱐⱀⱑ ⰳ҃ⱏ. ⰲⱐ ⰴⱐⱀⰻ ⰲⱐ ⱀⱔⰶⰵ ⱂⱃⰻⰸⱐⱃⱑ. ⱁⱅⱏⱗⱅⰻ ⱂⱁⱀⱁⱎⰵⱀⰻⰵ ⰿⱁⰵ ⰲⱏ ⱍⰾⰲ҃ⱌⱑⱈⱏ ::
1:26
Ⰲⱏ ⱎⰵⱄⱅⱏⰹ ⰶⰵ ⰿⱑⱄⱔⱌⱏ ⱂⱁⱄⱏⰾⰰⱀⱏ ⰱⱏⰹⱄⱅⱏ ⰰⱀⰼ҃ⰾⱏ ⰳⰰⰲⱐⱃⰻⰾⱏ ⱁⱅⱏ ⰱ҃ⰰ. ⰲⱏ ⰳⱃⰰⰴⱏ ⰳⰰⰾⰻⰾⰵⰻⱄⰽⱏ. ⰵⰿⱆⰶⰵ ⰻⰿⱔ ⱀⰰⰸⰰⱃⰵⱅⱏ.
1:27
ⰽⱏ ⰴⱑⰲⱑ ⱁⰱⱃⱘⱍⰵⱀⱑ ⰿⱘⰶⰵⰲⰻ. ⰵⰿⱆⰶⰵ ⰻⰿⱔ ⰻⱁⱄⰻⱇⱏ. ⱁⱅⱏ ⰴⱁⰿⱆ ⰴⰰⰲ҃ⰴⰲⰰ. ⰺ ⰻⰿⱔ ⰴⱑⰲⱑ ⰿⰰⱃⰻⱑ.
1:28
ⰺ ⰲⱏⱎⰵⰴⱏ ⰽⱏ ⱀⰵⰻ ⰰⱀⰼ҃ⰾⱏ ⱃⰵⱍⰵ. ⱃⰰⰴⱆⰻ ⱄⱔ ⰱⰾⰰⰳⱁⰴⰰⱅⱏⱀⰰⱑ ⰳ҃ⱏ ⱄⱏ ⱅⱁⰱⱁⱙ. !ⰱⰾⰳⱄⱀⰰ ⱅⱏⰹ ⰲⱏ ⰶⰵⱀⰰⱈⱏ.
1:29
ⱁⱀⰰ ⰶⰵ ⰲⰻⰴⱑⰲⱏⱎⰻ ⱄⱏⰿⱔⱅⰵ ⱄⱔ ⱁ ⱄⰾⱁⰲⰵⱄⰻ ⰵⰳⱁ. ⰺ ⱂⱁⰿⱏⰹⱎⰾⱑⰰⱎⰵ ⰲⱐ ⱄⰵⰱⱑ ⰽⰰⰽⱁⰲⱁ ⱄⰵ ⰱⱘⰴⰵⱅⱏ ⱌⱑⰾⱁⰲⰰⱀⰻⰵ.
1:30
ⰺ ⱃⰵⱍⰵ ⰵⰻ ⰰⱀⰼ҃ⰾⱏ. ⱀⰵ ⰱⱁⰻ ⱄⱔ ⰿⰰⱃⰻⰵ. ⱁⰱⱃⱑⱅⰵ ⰱⱁ ⰱⰾⰰⰳⱁⰴⰰⱅⱏ ⱁⱅⱏ ⰱ҃ⰰ.
1:31
ⰺ ⱄⰵ ⰸⰰⱍⱐⱀⰵⱎⰻ ⰲⱐ ⱍⱃⱑⰲⱑ ⰻ ⱃⱁⰴⰻⱎⰻ ⱄⱀ҃ⱏ. ⰺ ⱀⰰⱃⰵⱍⰵⱎⰻ ⰻⰿⱔ ⰵⰿⱆ ⰻⱄ҃ⱏ.
1:32
ⱄⱐ ⰱⱘⰴⰵⱅⱏ ⰲⰵⰾⰻⰻ. ⰺ ⱄⱀ҃ⱏ ⰲⱏⰹⱎⱏⱀⱑⰰⰳⱁ ⱀⰰⱃⰵⱍⰵⱅⱏ ⱄⱔ :: ⰺ ⰴⰰⱄⱅⱏ ⰵⰿⱆ ⰳ҃ⱏ ⰱ҃ⱏ ⱂⱃⱑⱄⱅⱁⰾⱏ ⰴⰰⰲ҃ⰴⰰ ⱁⱅ҃ⱌⰰ ⰵⰳⱁ.
1:33
ⰺ ⰲⱏⱌⱑⱄⰰⱃⰻⱅⱏ ⱄⱔ ⰲⱏ ⰴⱁⰿⱆ ⰻⱑⰽⱁⰲⰾⰻ ⰲⱏ ⰲⱑⰽⱏⰹ. ⰺ ⱌⱄ҃ⱃⱄⱅⰲⰻⱓ ⰵⰳⱁ ⱀⰵ ⰱⱘⰴⰵⱅⱏ ⰽⱁⱀⱐⱌⰰ ::
1:34
Ⱃⰵⱍⰵ ⰶⰵ ⰿⰰⱃⰻⱑ ⰽⱏ ⰰⱀⰼ҃ⰾⱆ. ⰽⰰⰽⱁ ⰱⱘⰴⰵⱅⱏ ⱄⰵ ⰻⰴⰵ ⰿⱘⰶⰰ ⱀⰵ ⰸⱀⰰⱙ.
1:35
ⰺ ⱁⱅⱏⰲⱑⱎⱅⰰⰲⱏ ⰰⱀⰼ҃ⰾⱏ ⱃⰵⱍⰵ ⰵⰻ. ⰴⱈ҃ⱏ ⱄⱅ҃ⱏⰹ ⱀⰰⰻⰴⰵⱅⱏ ⱀⰰ ⱅⱔ. ⰺ ⱄⰻⰾⰰ ⰲⱏⰹⱎⱏⱀⱑⰰⰳⱁ ⱁⱄⱑⱀⰻⱅⱏ ⱅⱔ. ⱅⱑⰿⱐ ⰶⰵ ⰵⰶⰵ ⱃⱁⰴⰻⱅⱏ ⱄⱔ ⱄⱅ҃ⱁ ⱀⰰⱃⰵⱍⰵⱅⱏ ⱄⱔ ⱄⱀ҃ⱏ ⰱⰶ҃ⰹⰻ.
1:36
ⰺ ⱄⰵ ⰵⰾⰻⱄⰰⰲⰵⱅⱐ ⱘⰶⰻⰽⰰ ⱅⰲⱁⱑ. ⰺ ⱅⰰ ⰸⰰⱍⱔⱅⱏ ⱄⱀ҃ⰰ ⰲⱏ ⱄⱅⰰⱃⱁⱄⱅⱐ ⱄⰲⱁⱙ. ⰺ ⱄⱐ ⰿⱑⱄⱔⱌⱏ ⱎⰵⱄⱅⱏⰹ ⰵⱄⱅⱏ ⰵⰻ. ⱀⰰⱃⰻⱌⰰⰵⰿⱑⰻ ⱀⰵⱂⰾⱁⰴⱏⰲⰻ.
1:37
ⱑⰽⱁ ⱀⰵ ⰻⰸⱀⰵⰿⱁⰶⰵⱅⱏ ⱁⱅⱏ ⰱ҃ⰰ ⰲⱐⱄⱑⰽⱏ ⰳⰾ҃ⱏ.
1:38
ⱃⰵⱍⰵ ⰶⰵ ⰿⰰⱃⰻⱑ ⱄⰵ ⱃⰰⰱⰰ ⰳⱀ҃ⱑ. ⰱⱘⰴⰻ ⰿⱐⱀⱑ ⱂⱁ ⰳⰾ҃ⱆ ⱅⰲⱁⰵⰿⱆ. ⰺ ⱁⱅⰻⰴⰵ ⱁⱅⱏ ⱀⰵⱗ ⰰⱀⰼ҃ⰾⱏ :: ⰽ!ⱌ ::
1:39
Ⰲⱏⱄⱅⰰⰲⱏⱎⰻ ⰶⰵ ⰿⰰⱃⰻⱑ ⰲⱏ ⱅⱏⰹ ⰴⱐⱀⰻ. ⰺⰴⰵ ⰲⱏ ⰳ!ⱃⱘ ⱄⱏ ⱅⱏⱎⱅⰰⱀⰻⰵⰿⱐ. ⰲⱏ ⰳⱃⰰⰴⱏ ⰻⱓⰴⱁⰲⱏ.
1:40
ⰺ ⰲⱐⱀⰻⰴⰵ ⰲⱏ ⰴⱁⰿⱏ ⰸⰰⱈⰰⱃⰻⰻⱀⱏ. ⰺ ⱌⱑⰾⱁⰲⰰ ⰵⰾⰻⱄⰰⰲⰵⱅⱐ ::
1:41
ⰺ ⰱⱏⰹⱄⱅⱏ ⱑⰽⱁ ⱆⱄⰾⱏⱎⰰ ⰵⰾⰻⱄⰰⰲⰵⱅⱐ. ⱌⱑⰾⱁⰲⰰⱀⰻⰵ ⰿⰰⱃⰻⰻⱀⱁ. ⰲⱐⰸⰻⰳⱃⰰ ⱄⱔ ⰿⰾⰰⰴⱏⱀⰵⱌⱏ ⰲⱏ ⱍⱃⱑⰲⱑ ⱗ҅. ⰺ ⰻⱄⱂⰾⱏⱀⰻ ⱄⱔ ⰴⱈ҃ⰿⱐ ⱄⱅ҃ⱏⰹⰿⱏ ⰵⰾⰻⱄⰰⰲⰵⱅⱐ.
1:42
ⰺ ⰲⱏⰸⱏⱂⰻ ⰳⰾ҃ⰰⱄⱁⰿⱐ ⰲⰵⰾⰻⰵⰿⱐ ⰻ ⱃⰵⱍⰵ. !ⰱⰾⰳⱄⱀⰰ ⱅⱏⰹ ⰲⱏ ⰶⰵⱀⰰⱈⱏ. ⰺ !ⰱⰾⰳⱄⰾⰲⱀⱏ ⱂⰾⱁⰴⱏ ⱘⱅⱃⱁⰱⱏⰹ ⱅⰲⱁ ⱗ҅.
1:43
ⰺ ⱁⱅⱏ ⰽⱘⰴⱘ ⱄⰵ ⰿⱐⱀⱑ. ⰴⰰ ⱂⱃⰻⰴⰵⱅⱏ ⰿⰰⱅⰻ ⰳ҃ⰻ ⰿⱁⰵⰳⱁ ⰽⱏ ⰿⱐⱀⱑ.
1:44
ⱄⰵ ⰱⱁ ⱑⰽⱁ ⰱⱏⰹⱄⱅⱏ ⰳⰾⰰⱄⱏ ⱌⱑⰾⱁⰲⰰⱀⰻⱑ ⱅⰲⱁⰵⰳⱁ ⰲⱏ ⱀⱆⱎⰻⱓ ⰿⱁ ⱓ҅. ⰲⱐⰸⰻⰳⱃⰰ ⱄⱔ ⰿⰾⰰⰴⱐⱀⰵⱌⱏ ⱃⰰⰴⱁⱎⱅⰰⰿⰻ ⰲⱏ ⱘⱅⱃⱁⰱⱑ ⰿⱁ ⰻ҅.
1:45
ⰺ ⰱⰾⰰⰶⰵⱀⰰ ⱑⰶⰵ ⰲⱑⱃⱘ ⱗⱅⱏ. ⱑⰽⱁ ⰱⱘⰴⰵⱅⱏ ⱄⱏⰲⱃⱏⱎⰵⱀⰻⰵ ⰳⰾ҃ⰰⱀⱏⰹⰿⱏ ⱁⱅⱏ ⰳ҃ⰻ.
1:46
ⰺ ⱃⰵⱍⰵ ⰿⰰⱃⰻⱑ. ⰲⰵⰾⰻⱍⰻⱅⱏ ⰴⱎ҃ⰰ ⰿⱁⱑ ⰳ҃ⰰ.
1:47
ⰺ ⰲⱏⰸⰴⱃⰰⰴⱁⰲⰰ ⱄⱔ ⰴⱈ҃ⱏ ⰿⱁⰻ ⱁ !ⰱⰷⱑ ⱄⱂ҃ⱄⱑ ⰿⱁⰵⰿⱐ.
1:48
ⱑⰽⱁ ⱂⱃⰻⰸⱏⱃⱑ ⱀⰰ ⱄⱏⰿⱑⱃⰵⱀⰻⰵ ⱃⰰⰱⱏⰹ ⱄⰲⱁ ⱗ҅. ⱄⰵ ⰱⱁ ⱁⱅⱏ ⱄⰵⰾⱑ ⰱⰾⰰⰶⱔⱅⱏ ⰿⱔ ⰲⱐⱄⰻ ⱃⱁⰴⰻ.
1:49
ⱑⰽⱁ ⱄⱏⱅⰲⱁⱃⰻ ⰿⱐⱀⱑ ⰲⰵⰾⰻⱍⱐⱑ ⱄⰻⰾⱏⱀⱏⰹ. ⰺ ⱄⰲⱔⱅⱁ ⰻⰿⱔ ⰵⰳⱁ.
1:50
ⰺ ⰿⰻⰾⱁⱄⱅⱐ ⰵⰳⱁ ⰲⱏ ⱃⱁⰴⱏ ⰻ ⱃⱁⰴⱏ ⰱⱁⱗⱎⱅⰻⰻⰿⱏ ⱄⱔ ⰵⰳⱁ.
1:51
ⱄⱏⱅⰲⱁⱃⰻ ⰴⱃⱏⰶⰰⰲⱘ ⰿⱏⰹⱎⱏⱌⰵⱙ ⱄⰲⱁⰵⱙ. ⱃⰰⱄⱅⰰⱍⰻ ⰳⱃⱏⰴ ⱗ҅ ⰿⱏⰹⱄⰾⰻⱙ ⱄⱃⰴ҃ⱌⰰ ⰻⱈⱏ.
1:52
ⱀⰻⰸⱏⰾⱁⰶⰻ ⱄⰻⰾⱏⱀⱏⰹⱗ ⱄⱏ ⱂⱃⱑⱄⱅⱁⰾⱏ. ⰺ ⰲⱏⰸⱀⰵⱄⰵ ⱄⱏⰿⱑⱃⰵⱀⱏⰹⱗ.
1:53
ⰰⰾⱍⱘⱎⱅⱔⱗ ⰻⱄⱂⰾⱏⱀⰻ ⰱⰾⰰⰳⱏ. ⰺ ⰱⱁⰳⰰⱅⱔⱎⱅⱔⱗ ⱄⱔ ⱁⱅⱏⱂⱆⱄⱅⰻ ⱅⱏⱎⱅⱔ.
1:54
ⱂⱃⰻⱗⱅⱏ !ⰻⰾⱑ ⱁⱅⱃⱁⰽⰰ ⱄⰲⱁⰵⰳⱁ. ⱂⱁⰿⱑⱀⱘⱅⰻ ⰿⰻⰾⱁⱄⱅⱐ.
1:55
ⱑⰽⱁⰶⰵ ⰳⰾ҃ⰰ ⰽⱏ ⱁⱅ҃ⱌⰿⱏ ⱀⰰⱎⰻⰿⱏ. ⰰⰲⱃⰰⰿⱆ ⰻ ⱄⱑⰿⰵⱀⰻ ⰵⰳⱁ ⰴⱁ ⰲⱑⰽⰰ ::
1:56
Ⱂⱃⱑⰱⱏⰹⱄⱅⱏ ⰶⰵ ⰿⰰⱃⰻⱑ ⱄⱏ ⱀⰵⱙ ⱑⰽⱁ ⰻ ⱅⱃⰻ ⰿⱄⱌⱔ. ⰺ ⰲⱏⰸⰲⱃⰰⱅⰻ ⱄⱔ ⰲⱏ ⰴⱁⰿⱏ ⱄⰲⱁⰻ :: :: ⰽ!ⱌ ::
1:57
Ⰵⰾⰻⱄⰰⰲⰵⱅⰻ ⰶⰵ ⰻⱄⱂⰾⱏⱀⰻ ⱄⱔ ⰲⱃⱑⰿⱔ ⱃⱁⰴⰻⱅⰻ ⰵⰻ. ⰺ ⱃⱁⰴⰻ ⱄⱀ҃ⱏ.
1:58
ⰺ ⱄⰾⱏⰹⱎⰰⱎⱔ ⱁⰽⱃⱏⱄⱅⱐ ⰶⰻⰲⱘⱎⱅⰵⰻ ⰺ ⱃⱁⰶⰴⰵⱀⰻⰵ ⱗ҅. ⱑⰽⱁ ⰲⱐⰸⰲⰵⰾⰻⱍⰻⰾⱏ ⰵⱄⱅⱏ ⰳ҃ⱏ ⰿⰻⰾⱁⱄⱅⱐ ⱄⰲⱁⱙ ⱄⱏ ⱀⰵⱙ. ⰺ ⱃⰰⰴⱁⰲⰰⱈⱘ ⱄⱔ ⱄⱏ ⱀⰵⱙ.
1:59
ⰺ҅ ⰱⱏⰹⱄⱅⱏ ⰲⱏ ⱁⱄⰿⱏⰹ ⰴⰵⱀⱐ ⱂⱃⰻⰴⱘ ⱁⰱⱃⱑⰸⰰⱅⱏ ⱁⱅⱃⱁⱍⱔⱅⰵ. ⰺ ⱀⰰⱃⰻⱌⰰⱈⱘ ⰵ ⰻⰿⰵⱀⰵⰿⱐ ⱁⱅ҃ⱌⰰ ⱄⰲⱁⰵⰳⱁ ⰸⰰⱈⰰⱃⰻⱑ.
1:60
ⰺ ⱁⱅⱏⰲⱑⱎⱅⰰⰲⱏⱎⰻ ⰿⰰⱅⰻ ⰵⰳⱁ ⱃⰵⱍⰵ. ⱀⰻ ⱀⱏ ⰴⰰ ⱀⰰⱃⰵⱍⰵⱅⱏ ⱄⱔ ⰻⱁⰰⱀⱏ.
1:61
ⰺ ⱃⱑⱎⱔ ⰵⰻ. ⱑⰽⱁ ⱀⰻⰽⱅⱁⰶⰵ ⰵⱄⱅⱏ ⱁⱅⱏ ⱃⱁⰶⰴⰵⱀⰻⱑ ⱅⰲⱁⰵⰳⱁ. ⰺⰶⰵ ⱀⰰⱃⰻⱌⰰⰰⱅⱏ ⱄⱔ ⰻⰿⰵⱀⰵⰿⱐ ⱅⱑⰿⱐ.
1:62
Ⱂⱁⰿⰰⰲⰰⰰⱈⱘ ⰶⰵ ⱁⱅⱏⱌⱓ ⰵⰳⱁ. ⰽⰰⰽⱁ ⰱⰻ ⱈⱁⱅⱑⰾⱏ ⱀⰰⱃⰵⱎⱅⰻ ⰵ.
1:63
ⰺ ⰻⱄⱂⱃⱁⱎⱏ ⰴⱏⱎⱅⰻⱌⱘ ⱀⰰⱂⰻⱄⰰ ⰳⰾ҃ⱔ. ⰺⱁⰰⱀⱏ ⰵⱄⱅⱏ ⰻⰿⱔ ⰵⰿⱆ. ⰺ ⱍⱓⰴⰻⱎⱔ [ⱄⱔ] ⰲⱐⱄⰻ.
1:64
ⱁ҅ⱅⰲⱃⱑⱄⱔ ⰶⰵ ⱄⱔ ⱆⱄⱅⰰ ⰵⰳⱁ ⰰⰱⰻⰵ ⰻ !ⱗⰸⰽⱏ ⰵⰳⱁ. ⰺ ⰳⰾ҃ⰰⱎⰵ ⰱⰾⰰⰳⱁⱄⰾⱁⰲⱔ ⰱ҃ⰰ.
1:65
ⰺ ⰱⱏⰹⱄⱅⱏ ⱀⰰ ⰲⱐⱄⱑⱈⱏ ⱄⱅⱃⰰⱈⱏ ⰶⰻⰲⱘⱎⱅⰻⰻⱈⱏ ⱁⰽⱃⱏⱄⱅⱐ ⰻⱈⱏ. ⰺ ⰲⱏ ⰲⱐⱄⰵⰻ ⱄⱅⱃⰰⱀⱑ ⰻⱓⰴⰵⰻⱄⱅⱌⱑⰻ ⱂⱁⰲⱑⰴⰰⰵⰿⰻ ⰱⱑⰰⱈⱘ ⰲⱐⱄⰻ ⰳⰾ҃ⰻ ⱄⰻⰻ.
1:66
ⰺ ⱂⱁⰾⱁⰶⰻⱎⱔ ⰲⱐⱄⰻ ⱄⰾⱏⰹⱎⰰⰲⱏⱎⰵⰻ ⱀⰰ ⱄⱃⱏⰴⱐⱌⰻⱈⱏ ⱄⰲⱁⰻⱈⱏ ⰳⰾ҃ⱙⱎⱅⰵ. ⱍⱅⱁ ⱆⰱⱁ ⱁⱅⱃⱁⱍⱔ ⱄⰵ ⰱⱘⰴⰵⱅⱏ. ⰺ ⱃⱘⰽⰰ ⰳⱀ҃ⱑ ⰱⱑ ⱄⱏ ⱀⰻⰿⱐ.
1:67
ⰺ ⰸⰰⱈⰰⱃⰻⱑ ⱁⱅ҃ⱌⱏ ⰵ[ⰳⱁ]. ⰺⱄⱂⰾⱏⱀⰻ ⱄⱔ ⰴⱈ҃ⰿⱐ ⱄⱅ҃ⱏⰹⰿⱏ. ⰺ ⱂⱃⱁⱃⱁⱍⱏⱄⱅⰲⱁⰲⰰ ⰳⰾ҃ⱔ ::
1:68
!ⰱⰾⰳⱀⱏ ⰳ҃ⱏ ⰱ҃ⱏ ⰻⰸ҃ⰾⰲⱏ. ⱑⰽⱁ ⱂⱁⱄⱑⱅⰻ ⰻ ⱄⱏⱅⰲⱁⱃⰻ ⰻⰸⰱⰰⰲⰾⰵⱀⰻⰵ ⰾⱓⰴⰵⰿⱏ ⱄⰲⱁⰻⰿⱏ.
1:69
ⰺ ⰲⱐⰸⰴⰲⰻⰶⰵ ⱃⱁⰳⱏ ⱄⱂ҃ⱄⱀⰻⱑ ⱀⰰⱎⰵⰳⱁ. ⰲⱏ ⰴⱁⰿⱆ ⰴⰰⰲ҃ⰴⰰ ⱁⱅⱃⱁⰽⰰ ⱄⰲⱁⰵⰳⱁ.
1:70
ⱑⰽⱁⰶⰵ ⰳⰾ҃ⰰ ⱆⱄⱅⱏⰹ ⱄⱅ҃ⱏⰹⱈⱏ ⱄⱘⱎⱅⰻⰻⱈⱏ ⱁⱅⱏ ⰲⱑⰽⰰ !ⱂⱃⰽⱏ.
1:71
ⱄⱂ҃ⱄⱀⰻⰵ ⱁⱅⱏ ⰲⱃⰰⰳⱏ ⱀⰰⱎⰻⱈⱏ. ⰺ ⰻⰸ ⰴ [ⱃ]ⱘⰽⱏ ⰲⱏⱄⱑⱈⱏ ⱀⰵⱀⰰⰲⰻⰴⱔⱎⱅⰻⰻⱈⱏ ⱀⰰⱄⱏ.
1:72
ⱄⱏⱅⰲⱁⱃⰻⱅⰻ ⰿⰻⰾⱁⱄⱅⱐ ⱄⱏ ⱁⱌ҃ⰻ ⱀⰰⱎⰻⰿⰻ. ⰺ ⱂⱁⰿⱔⱀⱘⱅⰻ ⰸⰰⰲⱑⱅⱏ ⱄⱅ҃ⱁⰻ ⱄⰲⱁⰻ.
1:73
ⰽⰾⱔⱅⰲⱁⱙ ⰵⱙⰶⰵ ⰽⰾⱔⱅⱏ ⱄⱔ. ⰽⱏ ⰰⰲⱃⰰⰰⰿⱆ ⱁⱅ҃ⱌⱓ ⱀⰰⱎⰵⰿⱆ ⰴⰰⱅⰻ ⱀⰰⰿⱏ
1:74
ⰱⰵ ⱄⱅⱃⰰⱈⰰ. ⰺⰸ ⰴ ⱃⱘⰽⱏⰹ ⰲⱃⰰⰳⱏ ⱀⰰⱎⰻⱈⱏ ⰻⰸⰱⰰⰲⰾⱐⱎⰵⰿⱐ ⱄⱔ. ⱄⰾ{ⱆ}ⱆⰶⰻⱅⰻ ⰵⰿⱆ
1:75
ⱂⱃⱑⱂⱁⰴⱁⰱⰻⰵⰿⱐ. ⰺ ⱂⱃⰰⰲⱏⰴⱁⱙ ⱂⱃⱑⰴⱏ ⱀⰻⰿⱐ ⰲⱐⱄⱔ ⰴⱐⱀⰻ ⰶⰻⰲⱁⱅⰰ ⱀⰰⱎⰵⰳⱁ.
1:76
ⰺ ⱅⱏⰹ ⱁⱅⱃⱁⱍⱔ ⱂⱃⱁⱃⰽⱏ ⰲⱏⰹⱎⱐⱀⱑⰰⰳⱁ ⱀⰰⱃⰵⱍⰵⱎⰻ ⱄⱔ. ⱂⱃⱑⰴⱏⰻⰴⰵⱎⰻ ⰱⱁ ⱂⱃⱑⰴⱏ ⰾⰻⱌⰵⰿⱏ ⰳⱀ҃ⰵⰿⱐ ⱆⰳⱁⱅⱁⰲⰰⱅⰻ ⱂⱘⱅⰻ ⰵⰳⱁ.
1:77
ⰴⰰⱅⰻ ⱃⰰⰸⱆⰿⱏ ⱄⱂ҃ⱄⱀⰻⱑ ⰾⱓⰴⰵⰿⱏ ⰵⰳⱁ ⰲⱏ ⱁⱅⱏⱂⱆⱎⱅⰵⱀⰻⰵ ⰳⱃⱑⱈⱁⰲⱏ ⰺ҅ⱈⱏ.
1:78
ⰿⰻⰾⱁⱄⱃ҃ⰴⰵⰻ ⱃⰰⰴⰻ ⰱ҃ⰰ ⱀⰰⱎⰵⰳⱁ. ⰲⱐ ⱀⰻⱈⱏⰶⰵ ⱂⱁⱄⱑⱅⰻⰾⱏ ⰵⱄⱅⱏ ⱀⰰⱄⱏ ⰲⱏⱄⱅⱁⰽⱏ ⱄⱏ ⰲⱏⰹⱎⰵ.
1:79
ⱂⱃⱁⱄⰲⱑⱅⰻⱅⰻ ⱄⱑⰴⱔⱎⱅⱔⱗ ⰲⱐ ⱅⱏⰿⱑ : ⰺ ⱄⱑⱀⰻ ⱄⱏⰿⱃⱏⱅⱐⱀⱑ. ⱀⰰⱂⱃⰰⰲⰻⱅⰻ ⱀⱁⰳⱏⰹ ⱀⰰⱎⱔ ⱀⰰ ⱂⱘⱅⱐ ⰿⰻⱃⰵⱀⱏ.
1:80
ⱁⱅⱃⱁⱍⱔ ⰶⰵ ⱃⰰⱄⱅⱑⰰⱎⰵ ⰻ ⰽⱃⱑⱂⰾⱑⰰⱎⰵ ⱄⱔ ⰴⱈ҃ⰿⱐ. ⰺ ⰱⱑ ⰲⱏ ⱂⱆⱄⱅⱏⰹⱀⱑⱈⱏ ⰴⱁ ⰴⱐⱀⰵ ⰰⰲⰾⰵⱀⰻⱑ ⱄⰲⱁⰵⰳⱁ ⰽⱏ ⰻⰸⰴⱃⰰⰻⰾⱓ. :: ⰽ!ⱌ :: Ⰲⱏ ⰲⰵⱍⰵⱃⱏ !ⱈⰲⰰ ⱃⱁⰶⰴⱄⱅⰲⰰ :: ::